| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
10. அப்³யாகதஸங்யுத்தங்
10. Abyākatasaṃyuttaṃ
1. கே²மாஸுத்தவண்ணனா
1. Khemāsuttavaṇṇanā
410. அப்³யாகதஸங்யுத்தஸ்ஸ பட²மே கே²மாதி கி³ஹிகாலே பி³ம்பி³ஸாரஸ்ஸ உபாஸிகா ஸத்³தா⁴பப்³ப³ஜிதா மஹாதே²ரீ ‘‘ஏதத³க்³க³ங், பி⁴க்க²வே, மம ஸாவிகானங் பி⁴க்கு²னீனங் மஹாபஞ்ஞானங் யதி³த³ங் கே²மா’’தி ஏவங் ப⁴க³வதா மஹாபஞ்ஞதாய ஏதத³க்³கே³ ட²பிதா. பண்டி³தாதி பண்டி³ச்சேன ஸமன்னாக³தா. வியத்தாதி வெய்யத்தியேன ஸமன்னாக³தா. மேதா⁴வினீதி மேதா⁴ய பஞ்ஞாய ஸமன்னாக³தா. ப³ஹுஸ்ஸுதாதி பரியத்திபா³ஹுஸச்சேனபி படிவேத⁴பா³ஹுஸச்சேனபி ஸமன்னாக³தா.
410. Abyākatasaṃyuttassa paṭhame khemāti gihikāle bimbisārassa upāsikā saddhāpabbajitā mahātherī ‘‘etadaggaṃ, bhikkhave, mama sāvikānaṃ bhikkhunīnaṃ mahāpaññānaṃ yadidaṃ khemā’’ti evaṃ bhagavatā mahāpaññatāya etadagge ṭhapitā. Paṇḍitāti paṇḍiccena samannāgatā. Viyattāti veyyattiyena samannāgatā. Medhāvinīti medhāya paññāya samannāgatā. Bahussutāti pariyattibāhusaccenapi paṭivedhabāhusaccenapi samannāgatā.
க³ணகோதி அச்சி²த்³த³கக³ணனாய குஸலோ. முத்³தி³கோதி அங்கு³லிமுத்³தா³ய க³ணனாய குஸலோ. ஸங்கா²யகோதி பிண்ட³க³ணனாய குஸலோ. க³ம்பீ⁴ரோதி சதுராஸீதியோஜனஸஹஸ்ஸக³ம்பீ⁴ரோ. அப்பமெய்யோதி ஆள்ஹகக³ணனாய அப்பமெய்யோ. து³ப்பரியோகா³ஹோதி ஆள்ஹகக³ணனாய பமாணக³ஹணத்த²ங் து³ரோகா³ஹோ. யேன ரூபேன ததா²க³தந்தி யேன ரூபேன தீ³கோ⁴ ரஸ்ஸோ ஸாமோ ஓதா³தோதி ஸத்தஸங்கா²தங் ததா²க³தங் பஞ்ஞபெய்ய. தங் ரூபங் ததா²க³தஸ்ஸ பஹீனந்தி தங் வுத்தப்பகாரரூபங் ஸமுத³யப்பஹானேன ஸப்³ப³ஞ்ஞுததா²க³தஸ்ஸ பஹீனங். ரூபஸங்கா²ய விமுத்தோதி ஆயதிங் ரூபஸ்ஸ அனுப்பத்தியா ரூபாரூபகொட்டா²ஸேனபி ஏவரூபோ நாம ப⁴விஸ்ஸதீதி வோஹாரஸ்ஸபி படிபஸ்ஸத்³த⁴த்தா ரூபபண்ணத்தியாபி விமுத்தோ. க³ம்பீ⁴ரோதி அஜ்ஜா²ஸய க³ம்பீ⁴ரதாய ச கு³ணக³ம்பீ⁴ரதாய ச க³ம்பீ⁴ரோ. தஸ்ஸ ஏவங் கு³ணக³ம்பீ⁴ரஸ்ஸ ஸதோ ஸப்³ப³ஞ்ஞுததா²க³தஸ்ஸ யங் உபாதா³ய ஸத்தஸங்கா²தோ ததா²க³தோதி பஞ்ஞத்தி ஹோதி, தத³பா⁴வேன தஸ்ஸா பஞ்ஞத்தியா அபா⁴வங் பஸ்ஸந்தஸ்ஸ அயங் ஸத்தஸங்கா²தோ ஹோதி ததா²க³தோ பரங் மரணாதி இத³ங் வசனங் ந உபேதி ந யுஜ்ஜதி, ந ஹோதி ததா²க³தோ பரங் மரணாதிஆதி³வசனம்பி ந உபேதி ந யுஜ்ஜதீதி அத்தோ².
Gaṇakoti acchiddakagaṇanāya kusalo. Muddikoti aṅgulimuddāya gaṇanāya kusalo. Saṅkhāyakoti piṇḍagaṇanāya kusalo. Gambhīroti caturāsītiyojanasahassagambhīro. Appameyyoti āḷhakagaṇanāya appameyyo. Duppariyogāhoti āḷhakagaṇanāya pamāṇagahaṇatthaṃ durogāho. Yena rūpena tathāgatanti yena rūpena dīgho rasso sāmo odātoti sattasaṅkhātaṃ tathāgataṃ paññapeyya. Taṃ rūpaṃ tathāgatassa pahīnanti taṃ vuttappakārarūpaṃ samudayappahānena sabbaññutathāgatassa pahīnaṃ. Rūpasaṅkhāya vimuttoti āyatiṃ rūpassa anuppattiyā rūpārūpakoṭṭhāsenapi evarūpo nāma bhavissatīti vohārassapi paṭipassaddhattā rūpapaṇṇattiyāpi vimutto. Gambhīroti ajjhāsaya gambhīratāya ca guṇagambhīratāya ca gambhīro. Tassa evaṃ guṇagambhīrassa sato sabbaññutathāgatassa yaṃ upādāya sattasaṅkhāto tathāgatoti paññatti hoti, tadabhāvena tassā paññattiyā abhāvaṃ passantassa ayaṃ sattasaṅkhāto hoti tathāgato paraṃ maraṇāti idaṃ vacanaṃ na upeti na yujjati, na hoti tathāgato paraṃ maraṇātiādivacanampi na upeti na yujjatīti attho.
ஸங்ஸந்தி³ஸ்ஸதீதி ஏகங் ப⁴விஸ்ஸதி. ஸமெஸ்ஸதீதி நிரந்தரங் ப⁴விஸ்ஸதி. ந விரோத⁴யிஸ்ஸதீதி ந விருத்³த⁴ங் பத³ங் ப⁴விஸ்ஸதி. அக்³க³பத³ஸ்மிந்தி தே³ஸனாய. தே³ஸனா ஹி இத⁴ அக்³க³பத³ந்தி அதி⁴ப்பேதா.
Saṃsandissatīti ekaṃ bhavissati. Samessatīti nirantaraṃ bhavissati. Na virodhayissatīti na viruddhaṃ padaṃ bhavissati. Aggapadasminti desanāya. Desanā hi idha aggapadanti adhippetā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. கே²மாஸுத்தங் • 1. Khemāsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. கே²மாஸுத்தவண்ணனா • 1. Khemāsuttavaṇṇanā
