| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
7. கே²மஸுத்தவண்ணனா
7. Khemasuttavaṇṇanā
49. ஸத்தமே வுத்த²ப்³ரஹ்மசரியவாஸோதி நிவுத்த²ப்³ரஹ்மசரியவாஸோ. கதகரணீயோதி எத்த² கரணீயந்தி பரிஞ்ஞாபஹானபா⁴வனாஸச்சி²கிரியமாஹ. தங் பன யஸ்மா சதூஹி மக்³கே³ஹி பச்சேகங் சதூஸு ஸச்சேஸு கத்தப்³ப³த்தா ஸோளஸவித⁴ங் வேதி³தப்³ப³ங். தேனாஹ ‘‘சதூஹி மக்³கே³ஹி கத்தப்³ப³’’ந்தி. க²ந்த⁴கிலேஸஅபி⁴ஸங்கா²ரஸங்கா²தா தயோ ஓஸீதா³பனட்டே²ன பா⁴ரா வியாதி பா⁴ரா. தே ஓஹிதா ஓரோபிதா நிக்கி²த்தா பாதிதா ஏதேனாதி ஓஹிதபா⁴ரோ. தேனாஹ ‘‘க²ந்த⁴பா⁴ரங்…பே॰… ஓதாரெத்வா டி²தோ’’தி. அனுப்பத்தோ ஸத³த்த²ந்தி அனுப்பத்தஸத³த்தோ². ஸத³த்தோ²தி ச ஸகத்த²மாஹ க-காரஸ்ஸ த³-காரங் கத்வா. எத்த² ஹி அரஹத்தங் அத்தனோ யோனிஸோமனஸிகாராயத்தத்தா அத்தூபனிப³ந்த⁴ட்டே²ன ஸஸந்தானபரியாபன்னத்தா அத்தானங் அவிஜஹனட்டே²ன அத்தனோ உத்தமத்தே²ன ச அத்தனோ அத்த²த்தா ‘‘ஸகத்தோ²’’தி வுச்சதி. தேனாஹ ‘‘ஸத³த்தோ² வுச்சதி அரஹத்த’’ந்தி. ஸம்மத³ஞ்ஞா விமுத்தோதி ஸம்மா அஞ்ஞாய விமுத்தோ, அச்சி²ன்னபூ⁴தாய மக்³க³பஞ்ஞாய ஸம்மா யதா²பூ⁴தங் து³க்கா²தீ³ஸு யோ யதா² ஜானிதப்³போ³, ததா² ஜானித்வா விமுத்தோதி அத்தோ². தேனாஹ ‘‘ஸம்மா ஹேதுனா’’திஆதி³. விமுத்தோதி ச த்³வே விமுத்தியோ ஸப்³ப³ஸ்ஸ சித்தஸங்கிலேஸஸ்ஸ மக்³கோ³ நிப்³பா³னாதி⁴முத்தி ச. நிப்³பா³னே அதி⁴முச்சனங் தத்த² நின்னபோணபப்³பா⁴ரதாய. அரஹா ஸப்³ப³கிலேஸேஹி விமுத்தசித்தத்தா சித்தவிமுத்தியா விமுத்தோ. நிப்³பா³னங் அதி⁴முத்தத்தா நிப்³பா³னே விமுத்தோ. ஸேஸமெத்த² உத்தானமேவ.
49. Sattame vutthabrahmacariyavāsoti nivutthabrahmacariyavāso. Katakaraṇīyoti ettha karaṇīyanti pariññāpahānabhāvanāsacchikiriyamāha. Taṃ pana yasmā catūhi maggehi paccekaṃ catūsu saccesu kattabbattā soḷasavidhaṃ veditabbaṃ. Tenāha ‘‘catūhi maggehi kattabba’’nti. Khandhakilesaabhisaṅkhārasaṅkhātā tayo osīdāpanaṭṭhena bhārā viyāti bhārā. Te ohitā oropitā nikkhittā pātitā etenāti ohitabhāro. Tenāha ‘‘khandhabhāraṃ…pe… otāretvā ṭhito’’ti. Anuppatto sadatthanti anuppattasadattho. Sadatthoti ca sakatthamāha ka-kārassa da-kāraṃ katvā. Ettha hi arahattaṃ attano yonisomanasikārāyattattā attūpanibandhaṭṭhena sasantānapariyāpannattā attānaṃ avijahanaṭṭhena attano uttamatthena ca attano atthattā ‘‘sakattho’’ti vuccati. Tenāha ‘‘sadattho vuccati arahatta’’nti. Sammadaññā vimuttoti sammā aññāya vimutto, acchinnabhūtāya maggapaññāya sammā yathābhūtaṃ dukkhādīsu yo yathā jānitabbo, tathā jānitvā vimuttoti attho. Tenāha ‘‘sammā hetunā’’tiādi. Vimuttoti ca dve vimuttiyo sabbassa cittasaṃkilesassa maggo nibbānādhimutti ca. Nibbāne adhimuccanaṃ tattha ninnapoṇapabbhāratāya. Arahā sabbakilesehi vimuttacittattā cittavimuttiyā vimutto. Nibbānaṃ adhimuttattā nibbāne vimutto. Sesamettha uttānameva.
கே²மஸுத்தவண்ணனா நிட்டி²தா.
Khemasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 7. கே²மஸுத்தங் • 7. Khemasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 7. கே²மஸுத்தவண்ணனா • 7. Khemasuttavaṇṇanā
