| Library / Tipiṭaka / តិបិដក • Tipiṭaka / សំយុត្តនិកាយ (អដ្ឋកថា) • Saṃyuttanikāya (aṭṭhakathā) |
១០. អព្យាកតសំយុត្តំ
10. Abyākatasaṃyuttaṃ
១. ខេមាសុត្តវណ្ណនា
1. Khemāsuttavaṇṇanā
៤១០. អព្យាកតសំយុត្តស្ស បឋមេ ខេមាតិ គិហិកាលេ ពិម្ពិសារស្ស ឧបាសិកា សទ្ធាបព្ពជិតា មហាថេរី ‘‘ឯតទគ្គំ, ភិក្ខវេ, មម សាវិកានំ ភិក្ខុនីនំ មហាបញ្ញានំ យទិទំ ខេមា’’តិ ឯវំ ភគវតា មហាបញ្ញតាយ ឯតទគ្គេ ឋបិតា។ បណ្ឌិតាតិ បណ្ឌិច្ចេន សមន្នាគតា។ វិយត្តាតិ វេយ្យត្តិយេន សមន្នាគតា។ មេធាវិនីតិ មេធាយ បញ្ញាយ សមន្នាគតា។ ពហុស្សុតាតិ បរិយត្តិពាហុសច្ចេនបិ បដិវេធពាហុសច្ចេនបិ សមន្នាគតា។
410. Abyākatasaṃyuttassa paṭhame khemāti gihikāle bimbisārassa upāsikā saddhāpabbajitā mahātherī ‘‘etadaggaṃ, bhikkhave, mama sāvikānaṃ bhikkhunīnaṃ mahāpaññānaṃ yadidaṃ khemā’’ti evaṃ bhagavatā mahāpaññatāya etadagge ṭhapitā. Paṇḍitāti paṇḍiccena samannāgatā. Viyattāti veyyattiyena samannāgatā. Medhāvinīti medhāya paññāya samannāgatā. Bahussutāti pariyattibāhusaccenapi paṭivedhabāhusaccenapi samannāgatā.
គណកោតិ អច្ឆិទ្ទកគណនាយ កុសលោ។ មុទ្ទិកោតិ អង្គុលិមុទ្ទាយ គណនាយ កុសលោ។ សង្ខាយកោតិ បិណ្ឌគណនាយ កុសលោ។ គម្ភីរោតិ ចតុរាសីតិយោជនសហស្សគម្ភីរោ។ អប្បមេយ្យោតិ អាឡ្ហកគណនាយ អប្បមេយ្យោ។ ទុប្បរិយោគាហោតិ អាឡ្ហកគណនាយ បមាណគហណត្ថំ ទុរោគាហោ។ យេន រូបេន តថាគតន្តិ យេន រូបេន ទីឃោ រស្សោ សាមោ ឱទាតោតិ សត្តសង្ខាតំ តថាគតំ បញ្ញបេយ្យ។ តំ រូបំ តថាគតស្ស បហីនន្តិ តំ វុត្តប្បការរូបំ សមុទយប្បហានេន សព្ពញ្ញុតថាគតស្ស បហីនំ។ រូបសង្ខាយ វិមុត្តោតិ អាយតិំ រូបស្ស អនុប្បត្តិយា រូបារូបកោដ្ឋាសេនបិ ឯវរូបោ នាម ភវិស្សតីតិ វោហារស្សបិ បដិបស្សទ្ធត្តា រូបបណ្ណត្តិយាបិ វិមុត្តោ។ គម្ភីរោតិ អជ្ឈាសយ គម្ភីរតាយ ច គុណគម្ភីរតាយ ច គម្ភីរោ។ តស្ស ឯវំ គុណគម្ភីរស្ស សតោ សព្ពញ្ញុតថាគតស្ស យំ ឧបាទាយ សត្តសង្ខាតោ តថាគតោតិ បញ្ញត្តិ ហោតិ, តទភាវេន តស្សា បញ្ញត្តិយា អភាវំ បស្សន្តស្ស អយំ សត្តសង្ខាតោ ហោតិ តថាគតោ បរំ មរណាតិ ឥទំ វចនំ ន ឧបេតិ ន យុជ្ជតិ, ន ហោតិ តថាគតោ បរំ មរណាតិអាទិវចនម្បិ ន ឧបេតិ ន យុជ្ជតីតិ អត្ថោ។
Gaṇakoti acchiddakagaṇanāya kusalo. Muddikoti aṅgulimuddāya gaṇanāya kusalo. Saṅkhāyakoti piṇḍagaṇanāya kusalo. Gambhīroti caturāsītiyojanasahassagambhīro. Appameyyoti āḷhakagaṇanāya appameyyo. Duppariyogāhoti āḷhakagaṇanāya pamāṇagahaṇatthaṃ durogāho. Yena rūpena tathāgatanti yena rūpena dīgho rasso sāmo odātoti sattasaṅkhātaṃ tathāgataṃ paññapeyya. Taṃ rūpaṃ tathāgatassa pahīnanti taṃ vuttappakārarūpaṃ samudayappahānena sabbaññutathāgatassa pahīnaṃ. Rūpasaṅkhāya vimuttoti āyatiṃ rūpassa anuppattiyā rūpārūpakoṭṭhāsenapi evarūpo nāma bhavissatīti vohārassapi paṭipassaddhattā rūpapaṇṇattiyāpi vimutto. Gambhīroti ajjhāsaya gambhīratāya ca guṇagambhīratāya ca gambhīro. Tassa evaṃ guṇagambhīrassa sato sabbaññutathāgatassa yaṃ upādāya sattasaṅkhāto tathāgatoti paññatti hoti, tadabhāvena tassā paññattiyā abhāvaṃ passantassa ayaṃ sattasaṅkhāto hoti tathāgato paraṃ maraṇāti idaṃ vacanaṃ na upeti na yujjati, na hoti tathāgato paraṃ maraṇātiādivacanampi na upeti na yujjatīti attho.
សំសន្ទិស្សតីតិ ឯកំ ភវិស្សតិ។ សមេស្សតីតិ និរន្តរំ ភវិស្សតិ។ ន វិរោធយិស្សតីតិ ន វិរុទ្ធំ បទំ ភវិស្សតិ។ អគ្គបទស្មិន្តិ ទេសនាយ។ ទេសនា ហិ ឥធ អគ្គបទន្តិ អធិប្បេតា។
Saṃsandissatīti ekaṃ bhavissati. Samessatīti nirantaraṃ bhavissati. Na virodhayissatīti na viruddhaṃ padaṃ bhavissati. Aggapadasminti desanāya. Desanā hi idha aggapadanti adhippetā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ១. ខេមាសុត្តំ • 1. Khemāsuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ១. ខេមាសុត្តវណ្ណនា • 1. Khemāsuttavaṇṇanā
