| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
១០. អព្យាកតសំយុត្តំ
10. Abyākatasaṃyuttaṃ
១. ខេមាសុត្តវណ្ណនា
1. Khemāsuttavaṇṇanā
៤១០. ពិម្ពិសារស្ស ឧបាសិកាតិ ពិម្ពិសារស្ស ឱរោធភូតា ឧបាសិកា។ បណ្ឌិច្ចំ សិក្ខិតភាវេន។ វេយ្យត្តិយំ វិសារទភាវេន។ វិសារទា នាម តិហេតុកបដិសន្ធិសិទ្ធសាភាវិកបញ្ញា, តាយ សមន្នាគតា។
410.Bimbisārassaupāsikāti bimbisārassa orodhabhūtā upāsikā. Paṇḍiccaṃ sikkhitabhāvena. Veyyattiyaṃ visāradabhāvena. Visāradā nāma tihetukapaṭisandhisiddhasābhāvikapaññā, tāya samannāgatā.
អច្ឆិទ្ទកគណនាយ កុសលោតិ នវន្តគណនាយ កុសលោ។ អង្គុលិមុទ្ទាយ គណនាយ កុសលោតិ អង្គុលិកាយ ឯវ គណនាយ កុសលោ សេយ្យថាបិ បាទសិកា។ បិណ្ឌគណនាយាតិ សង្កលនបដុប្បន្នការិនោ បិណ្ឌវសេន គណនា។ តថាគតោតិ ខីណាសវោ, តថាគតំ សន្ធាយ បុច្ឆតីតិ ខីណាសវោតិ ចស្ស អរហត្តផលវសិភាវិតខន្ធេ ឧបាទាយ អយំ បញ្ញត្តិ ហោតិ។ តេសុ ខន្ធេសុ សតិ ខីណាសវា សត្តសង្ខាតា ហោន្តីតិ វោហារេន បញ្ញបេតុំ សក្កា ភវេយ្យ, អសន្តេសុ ន សក្កា, តស្មា បរំ មរណាតិ វុត្តត្តា តេសំ អភាវា ‘‘អព្យាកតមេត’’ន្តិ វុត្តំ។ យទិ ឯវំ តេសំ អភាវតោ ‘‘ន ហោតិ តថាគតោ បរំ មរណា’’តិ បុដ្ឋាយ ‘‘អាមា’’តិ បដិជានិតព្ពា សិយា, តំ បន សត្តសង្ខាតស្ស បុច្ឆិតត្តា ន បដិញ្ញាតន្តិ ទដ្ឋព្ពំ។ យេន រូបេនាតិ សត្តតថាគតេ វុត្តរូបំ សព្ពញ្ញុតថាគតេ បដិក្ខិបិតុំ ‘‘តំ រូប’’ន្តិអាទិ វុត្តំ។ យំ ឧបាទាយាតិ យំ ខន្ធបញ្ចកំ ឧបាទាយ។ តទភាវេនាតិ តស្ស ខន្ធបញ្ចកស្ស អភាវេន។ តស្សា បញ្ញត្តិយាតិ សត្តបញ្ញត្តិយា អភាវំ។ និរុទ្ធំ ន និទស្សេតិ។
Acchiddakagaṇanāya kusaloti navantagaṇanāya kusalo. Aṅgulimuddāya gaṇanāya kusaloti aṅgulikāya eva gaṇanāya kusalo seyyathāpi pādasikā. Piṇḍagaṇanāyāti saṅkalanapaṭuppannakārino piṇḍavasena gaṇanā. Tathāgatoti khīṇāsavo, tathāgataṃ sandhāya pucchatīti khīṇāsavoti cassa arahattaphalavasibhāvitakhandhe upādāya ayaṃ paññatti hoti. Tesu khandhesu sati khīṇāsavā sattasaṅkhātā hontīti vohārena paññapetuṃ sakkā bhaveyya, asantesu na sakkā, tasmā paraṃ maraṇāti vuttattā tesaṃ abhāvā ‘‘abyākatameta’’nti vuttaṃ. Yadi evaṃ tesaṃ abhāvato ‘‘na hoti tathāgato paraṃ maraṇā’’ti puṭṭhāya ‘‘āmā’’ti paṭijānitabbā siyā, taṃ pana sattasaṅkhātassa pucchitattā na paṭiññātanti daṭṭhabbaṃ. Yena rūpenāti sattatathāgate vuttarūpaṃ sabbaññutathāgate paṭikkhipituṃ ‘‘taṃ rūpa’’ntiādi vuttaṃ. Yaṃ upādāyāti yaṃ khandhapañcakaṃ upādāya. Tadabhāvenāti tassa khandhapañcakassa abhāvena. Tassā paññattiyāti sattapaññattiyā abhāvaṃ. Niruddhaṃ na nidasseti.
ខេមាយ ថេរិយា វុត្តំ បឋមំ សុត្តំ ភគវតោ សេដ្ឋត្ថទីបនតោ អគ្គបទាវចរំវ ហោតីតិ វុត្តំ ‘‘អគ្គបទស្មិ’’ន្តិ។
Khemāya theriyā vuttaṃ paṭhamaṃ suttaṃ bhagavato seṭṭhatthadīpanato aggapadāvacaraṃva hotīti vuttaṃ ‘‘aggapadasmi’’nti.
ខេមាសុត្តវណ្ណនា និដ្ឋិតា។
Khemāsuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ១. ខេមាសុត្តំ • 1. Khemāsuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ១. ខេមាសុត្តវណ្ណនា • 1. Khemāsuttavaṇṇanā
