| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၁၀. အဗ္ယာကတသံယုတ္တံ
10. Abyākatasaṃyuttaṃ
၁. ခေမာသုတ္တဝဏ္ဏနာ
1. Khemāsuttavaṇṇanā
၄၁၀. အဗ္ယာကတသံယုတ္တသ္သ ပဌမေ ခေမာတိ ဂိဟိကာလေ ဗိမ္ဗိသာရသ္သ ဥပာသိကာ သဒ္ဓာပဗ္ဗဇိတာ မဟာထေရီ ‘‘ဧတဒဂ္ဂံ, ဘိက္ခဝေ, မမ သာဝိကာနံ ဘိက္ခုနီနံ မဟာပညာနံ ယဒိဒံ ခေမာ’’တိ ဧဝံ ဘဂဝတာ မဟာပညတာယ ဧတဒဂ္ဂေ ဌပိတာ။ ပဏ္ဍိတာတိ ပဏ္ဍိစ္စေန သမန္နာဂတာ။ ဝိယတ္တာတိ ဝေယ္ယတ္တိယေန သမန္နာဂတာ။ မေဓာဝိနီတိ မေဓာယ ပညာယ သမန္နာဂတာ။ ဗဟုသ္သုတာတိ ပရိယတ္တိဗာဟုသစ္စေနပိ ပဋိဝေဓဗာဟုသစ္စေနပိ သမန္နာဂတာ။
410. Abyākatasaṃyuttassa paṭhame khemāti gihikāle bimbisārassa upāsikā saddhāpabbajitā mahātherī ‘‘etadaggaṃ, bhikkhave, mama sāvikānaṃ bhikkhunīnaṃ mahāpaññānaṃ yadidaṃ khemā’’ti evaṃ bhagavatā mahāpaññatāya etadagge ṭhapitā. Paṇḍitāti paṇḍiccena samannāgatā. Viyattāti veyyattiyena samannāgatā. Medhāvinīti medhāya paññāya samannāgatā. Bahussutāti pariyattibāhusaccenapi paṭivedhabāhusaccenapi samannāgatā.
ဂဏကောတိ အစ္ဆိဒ္ဒကဂဏနာယ ကုသလော။ မုဒ္ဒိကောတိ အင္ဂုလိမုဒ္ဒာယ ဂဏနာယ ကုသလော။ သင္ခာယကောတိ ပိဏ္ဍဂဏနာယ ကုသလော။ ဂမ္ဘီရောတိ စတုရာသီတိယောဇနသဟသ္သဂမ္ဘီရော။ အပ္ပမေယ္ယောတိ အာဠ္ဟကဂဏနာယ အပ္ပမေယ္ယော။ ဒုပ္ပရိယောဂာဟောတိ အာဠ္ဟကဂဏနာယ ပမာဏဂဟဏတ္ထံ ဒုရောဂာဟော။ ယေန ရူပေန တထာဂတန္တိ ယေန ရူပေန ဒီဃော ရသ္သော သာမော ဩဒာတောတိ သတ္တသင္ခာတံ တထာဂတံ ပညပေယ္ယ။ တံ ရူပံ တထာဂတသ္သ ပဟီနန္တိ တံ ဝုတ္တပ္ပကာရရူပံ သမုဒယပ္ပဟာနေန သဗ္ဗညုတထာဂတသ္သ ပဟီနံ။ ရူပသင္ခာယ ဝိမုတ္တောတိ အာယတိံ ရူပသ္သ အနုပ္ပတ္တိယာ ရူပာရူပကောဋ္ဌာသေနပိ ဧဝရူပော နာမ ဘဝိသ္သတီတိ ဝောဟာရသ္သပိ ပဋိပသ္သဒ္ဓတ္တာ ရူပပဏ္ဏတ္တိယာပိ ဝိမုတ္တော။ ဂမ္ဘီရောတိ အဇ္ဈာသယ ဂမ္ဘီရတာယ စ ဂုဏဂမ္ဘီရတာယ စ ဂမ္ဘီရော။ တသ္သ ဧဝံ ဂုဏဂမ္ဘီရသ္သ သတော သဗ္ဗညုတထာဂတသ္သ ယံ ဥပာဒာယ သတ္တသင္ခာတော တထာဂတောတိ ပညတ္တိ ဟောတိ, တဒဘာဝေန တသ္သာ ပညတ္တိယာ အဘာဝံ ပသ္သန္တသ္သ အယံ သတ္တသင္ခာတော ဟောတိ တထာဂတော ပရံ မရဏာတိ ဣဒံ ဝစနံ န ဥပေတိ န ယုဇ္ဇတိ, န ဟောတိ တထာဂတော ပရံ မရဏာတိအာဒိဝစနမ္ပိ န ဥပေတိ န ယုဇ္ဇတီတိ အတ္ထော။
Gaṇakoti acchiddakagaṇanāya kusalo. Muddikoti aṅgulimuddāya gaṇanāya kusalo. Saṅkhāyakoti piṇḍagaṇanāya kusalo. Gambhīroti caturāsītiyojanasahassagambhīro. Appameyyoti āḷhakagaṇanāya appameyyo. Duppariyogāhoti āḷhakagaṇanāya pamāṇagahaṇatthaṃ durogāho. Yena rūpena tathāgatanti yena rūpena dīgho rasso sāmo odātoti sattasaṅkhātaṃ tathāgataṃ paññapeyya. Taṃ rūpaṃ tathāgatassa pahīnanti taṃ vuttappakārarūpaṃ samudayappahānena sabbaññutathāgatassa pahīnaṃ. Rūpasaṅkhāya vimuttoti āyatiṃ rūpassa anuppattiyā rūpārūpakoṭṭhāsenapi evarūpo nāma bhavissatīti vohārassapi paṭipassaddhattā rūpapaṇṇattiyāpi vimutto. Gambhīroti ajjhāsaya gambhīratāya ca guṇagambhīratāya ca gambhīro. Tassa evaṃ guṇagambhīrassa sato sabbaññutathāgatassa yaṃ upādāya sattasaṅkhāto tathāgatoti paññatti hoti, tadabhāvena tassā paññattiyā abhāvaṃ passantassa ayaṃ sattasaṅkhāto hoti tathāgato paraṃ maraṇāti idaṃ vacanaṃ na upeti na yujjati, na hoti tathāgato paraṃ maraṇātiādivacanampi na upeti na yujjatīti attho.
သံသန္ဒိသ္သတီတိ ဧကံ ဘဝိသ္သတိ။ သမေသ္သတီတိ နိရန္တရံ ဘဝိသ္သတိ။ န ဝိရောဓယိသ္သတီတိ န ဝိရုဒ္ဓံ ပဒံ ဘဝိသ္သတိ။ အဂ္ဂပဒသ္မိန္တိ ဒေသနာယ။ ဒေသနာ ဟိ ဣဓ အဂ္ဂပဒန္တိ အဓိပ္ပေတာ။
Saṃsandissatīti ekaṃ bhavissati. Samessatīti nirantaraṃ bhavissati. Na virodhayissatīti na viruddhaṃ padaṃ bhavissati. Aggapadasminti desanāya. Desanā hi idha aggapadanti adhippetā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁. ခေမာသုတ္တံ • 1. Khemāsuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁. ခေမာသုတ္တဝဏ္ဏနာ • 1. Khemāsuttavaṇṇanā
