| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) |
೭. ಖೇಮಸುತ್ತವಣ್ಣನಾ
7. Khemasuttavaṇṇanā
೪೯. ಸತ್ತಮೇ ವುಸಿತವಾತಿ ವುತ್ಥಬ್ರಹ್ಮಚರಿಯವಾಸೋ। ಕತಕರಣೀಯೋತಿ ಚತೂಹಿ ಮಗ್ಗೇಹಿ ಕತ್ತಬ್ಬಂ ಕತ್ವಾ ಠಿತೋ। ಓಹಿತಭಾರೋತಿ ಖನ್ಧಭಾರಂ ಕಿಲೇಸಭಾರಂ ಅಭಿಸಙ್ಖಾರಭಾರಞ್ಚ ಓತಾರೇತ್ವಾ ಠಿತೋ। ಅನುಪ್ಪತ್ತಸದತ್ಥೋತಿ ಸದತ್ಥೋ ವುಚ್ಚತಿ ಅರಹತ್ತಂ, ತಂ ಪತ್ತೋತಿ ಅತ್ಥೋ। ಪರಿಕ್ಖೀಣಭವಸಂಯೋಜನೋತಿ ಖೀಣಭವಬನ್ಧನೋ। ಸಮ್ಮದಞ್ಞಾ ವಿಮುತ್ತೋತಿ ಸಮ್ಮಾ ಹೇತುನಾ ಕಾರಣೇನ ಜಾನಿತ್ವಾ ವಿಮುತ್ತೋ। ತಸ್ಸ ನ ಏವಂ ಹೋತಿ ಅತ್ಥಿ ಮೇ ಸೇಯ್ಯೋತಿ ವಾತಿಆದೀಹಿ ಸೇಯ್ಯಸ್ಸ ಸೇಯ್ಯೋಹಮಸ್ಮೀತಿ ಮಾನಾದಯೋ ತಯೋ ಮಾನಾ ಪಟಿಕ್ಖಿತ್ತಾ। ನ ಹಿ ಖೀಣಾಸವಸ್ಸ ‘‘ಅತ್ಥಿ ಮಯ್ಹಂ ಸೇಯ್ಯೋ, ಅತ್ಥಿ ಸದಿಸೋ, ಅತ್ಥಿ ಹೀನೋ’’ತಿ ಮಾನೋ ಹೋತಿ। ನತ್ಥಿ ಮೇ ಸೇಯ್ಯೋತಿಆದೀಹಿಪಿ ತೇಯೇವ ಪಟಿಕ್ಖಿತ್ತಾ। ನ ಹಿ ಖೀಣಾಸವಸ್ಸ ‘‘ಅಹಮೇವ ಸೇಯ್ಯೋ, ಅಹಂ ಸದಿಸೋ, ಅಹಂ ಹೀನೋ, ಅಞ್ಞೇ ಸೇಯ್ಯಾದಯೋ ನತ್ಥೀ’’ತಿ ಏವಂ ಮಾನೋ ಹೋತಿ।
49. Sattame vusitavāti vutthabrahmacariyavāso. Katakaraṇīyoti catūhi maggehi kattabbaṃ katvā ṭhito. Ohitabhāroti khandhabhāraṃ kilesabhāraṃ abhisaṅkhārabhārañca otāretvā ṭhito. Anuppattasadatthoti sadattho vuccati arahattaṃ, taṃ pattoti attho. Parikkhīṇabhavasaṃyojanoti khīṇabhavabandhano. Sammadaññā vimuttoti sammā hetunā kāraṇena jānitvā vimutto. Tassa na evaṃ hoti atthi me seyyoti vātiādīhi seyyassa seyyohamasmīti mānādayo tayo mānā paṭikkhittā. Na hi khīṇāsavassa ‘‘atthi mayhaṃ seyyo, atthi sadiso, atthi hīno’’ti māno hoti. Natthi me seyyotiādīhipi teyeva paṭikkhittā. Na hi khīṇāsavassa ‘‘ahameva seyyo, ahaṃ sadiso, ahaṃ hīno, aññe seyyādayo natthī’’ti evaṃ māno hoti.
ಅಚಿರಪಕ್ಕನ್ತೇಸೂತಿ ಅರಹತ್ತಂ ಬ್ಯಾಕರಿತ್ವಾ ಅಚಿರಂಯೇವ ಪಕ್ಕನ್ತೇಸು। ಅಞ್ಞಂ ಬ್ಯಾಕರೋನ್ತೀತಿ ಅರಹತ್ತಂ ಕಥೇನ್ತಿ। ಹಸಮಾನಕಾ ಮಞ್ಞೇ ಅಞ್ಞಂ ಬ್ಯಾಕರೋನ್ತೀತಿ ಹಸಮಾನಾ ವಿಯ ಕಥೇನ್ತಿ। ವಿಘಾತಂ ಆಪಜ್ಜನ್ತೀತಿ ದುಕ್ಖಂ ಆಪಜ್ಜನ್ತಿ।
Acirapakkantesūti arahattaṃ byākaritvā aciraṃyeva pakkantesu. Aññaṃ byākarontīti arahattaṃ kathenti. Hasamānakā maññe aññaṃ byākarontīti hasamānā viya kathenti. Vighātaṃ āpajjantīti dukkhaṃ āpajjanti.
ನ ಉಸ್ಸೇಸು ನ ಓಮೇಸು, ಸಮತ್ತೇ ನೋಪನೀಯರೇತಿ ಏತ್ಥ ಉಸ್ಸಾತಿ ಉಸ್ಸಿತತಾ ಸೇಯ್ಯಪುಗ್ಗಲಾ। ಓಮಾತಿ ಹೀನಾ। ಸಮತ್ತೋತಿ ಸದಿಸೋ। ಇತಿ ಇಮೇಸು ತೀಸುಪಿ ಸೇಯ್ಯಹೀನಸದಿಸೇಸು ಖೀಣಾಸವಾ ಮಾನೇನ ನ ಉಪನೀಯರೇ, ನ ಉಪನೇನ್ತಿ, ನ ಉಪಗಚ್ಛನ್ತೀತಿ ಅತ್ಥೋ। ಖೀಣಾ ಜಾತೀತಿ ಖೀಣಾ ತೇಸಂ ಜಾತಿ। ವುಸಿತಂ ಬ್ರಹ್ಮಚರಿಯನ್ತಿ ವುತ್ಥಂ ಮಗ್ಗಬ್ರಹ್ಮಚರಿಯಂ। ಚರನ್ತಿ ಸಂಯೋಜನವಿಪ್ಪಮುತ್ತಾತಿ ಸಬ್ಬಸಂಯೋಜನೇಹಿ ವಿಮುತ್ತಾ ಹುತ್ವಾ ಚರನ್ತಿ। ಸುತ್ತೇಪಿ ಗಾಥಾಯಮ್ಪಿ ಖೀಣಾಸವೋ ಕಥಿತೋ।
Na ussesu na omesu, samatte nopanīyareti ettha ussāti ussitatā seyyapuggalā. Omāti hīnā. Samattoti sadiso. Iti imesu tīsupi seyyahīnasadisesu khīṇāsavā mānena na upanīyare, na upanenti, na upagacchantīti attho. Khīṇā jātīti khīṇā tesaṃ jāti. Vusitaṃ brahmacariyanti vutthaṃ maggabrahmacariyaṃ. Caranti saṃyojanavippamuttāti sabbasaṃyojanehi vimuttā hutvā caranti. Suttepi gāthāyampi khīṇāsavo kathito.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / ೭. ಖೇಮಸುತ್ತಂ • 7. Khemasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೭. ಖೇಮಸುತ್ತವಣ್ಣನಾ • 7. Khemasuttavaṇṇanā
