| Library / Tipiṭaka / തിപിടക • Tipiṭaka / അങ്ഗുത്തരനികായ (ടീകാ) • Aṅguttaranikāya (ṭīkā) |
൭. ഖേമസുത്തവണ്ണനാ
7. Khemasuttavaṇṇanā
൪൯. സത്തമേ വുത്ഥബ്രഹ്മചരിയവാസോതി നിവുത്ഥബ്രഹ്മചരിയവാസോ. കതകരണീയോതി ഏത്ഥ കരണീയന്തി പരിഞ്ഞാപഹാനഭാവനാസച്ഛികിരിയമാഹ. തം പന യസ്മാ ചതൂഹി മഗ്ഗേഹി പച്ചേകം ചതൂസു സച്ചേസു കത്തബ്ബത്താ സോളസവിധം വേദിതബ്ബം. തേനാഹ ‘‘ചതൂഹി മഗ്ഗേഹി കത്തബ്ബ’’ന്തി. ഖന്ധകിലേസഅഭിസങ്ഖാരസങ്ഖാതാ തയോ ഓസീദാപനട്ഠേന ഭാരാ വിയാതി ഭാരാ. തേ ഓഹിതാ ഓരോപിതാ നിക്ഖിത്താ പാതിതാ ഏതേനാതി ഓഹിതഭാരോ. തേനാഹ ‘‘ഖന്ധഭാരം…പേ॰… ഓതാരേത്വാ ഠിതോ’’തി. അനുപ്പത്തോ സദത്ഥന്തി അനുപ്പത്തസദത്ഥോ. സദത്ഥോതി ച സകത്ഥമാഹ ക-കാരസ്സ ദ-കാരം കത്വാ. ഏത്ഥ ഹി അരഹത്തം അത്തനോ യോനിസോമനസികാരായത്തത്താ അത്തൂപനിബന്ധട്ഠേന സസന്താനപരിയാപന്നത്താ അത്താനം അവിജഹനട്ഠേന അത്തനോ ഉത്തമത്ഥേന ച അത്തനോ അത്ഥത്താ ‘‘സകത്ഥോ’’തി വുച്ചതി. തേനാഹ ‘‘സദത്ഥോ വുച്ചതി അരഹത്ത’’ന്തി. സമ്മദഞ്ഞാ വിമുത്തോതി സമ്മാ അഞ്ഞായ വിമുത്തോ, അച്ഛിന്നഭൂതായ മഗ്ഗപഞ്ഞായ സമ്മാ യഥാഭൂതം ദുക്ഖാദീസു യോ യഥാ ജാനിതബ്ബോ, തഥാ ജാനിത്വാ വിമുത്തോതി അത്ഥോ. തേനാഹ ‘‘സമ്മാ ഹേതുനാ’’തിആദി. വിമുത്തോതി ച ദ്വേ വിമുത്തിയോ സബ്ബസ്സ ചിത്തസംകിലേസസ്സ മഗ്ഗോ നിബ്ബാനാധിമുത്തി ച. നിബ്ബാനേ അധിമുച്ചനം തത്ഥ നിന്നപോണപബ്ഭാരതായ. അരഹാ സബ്ബകിലേസേഹി വിമുത്തചിത്തത്താ ചിത്തവിമുത്തിയാ വിമുത്തോ. നിബ്ബാനം അധിമുത്തത്താ നിബ്ബാനേ വിമുത്തോ. സേസമേത്ഥ ഉത്താനമേവ.
49. Sattame vutthabrahmacariyavāsoti nivutthabrahmacariyavāso. Katakaraṇīyoti ettha karaṇīyanti pariññāpahānabhāvanāsacchikiriyamāha. Taṃ pana yasmā catūhi maggehi paccekaṃ catūsu saccesu kattabbattā soḷasavidhaṃ veditabbaṃ. Tenāha ‘‘catūhi maggehi kattabba’’nti. Khandhakilesaabhisaṅkhārasaṅkhātā tayo osīdāpanaṭṭhena bhārā viyāti bhārā. Te ohitā oropitā nikkhittā pātitā etenāti ohitabhāro. Tenāha ‘‘khandhabhāraṃ…pe… otāretvā ṭhito’’ti. Anuppatto sadatthanti anuppattasadattho. Sadatthoti ca sakatthamāha ka-kārassa da-kāraṃ katvā. Ettha hi arahattaṃ attano yonisomanasikārāyattattā attūpanibandhaṭṭhena sasantānapariyāpannattā attānaṃ avijahanaṭṭhena attano uttamatthena ca attano atthattā ‘‘sakattho’’ti vuccati. Tenāha ‘‘sadattho vuccati arahatta’’nti. Sammadaññā vimuttoti sammā aññāya vimutto, acchinnabhūtāya maggapaññāya sammā yathābhūtaṃ dukkhādīsu yo yathā jānitabbo, tathā jānitvā vimuttoti attho. Tenāha ‘‘sammā hetunā’’tiādi. Vimuttoti ca dve vimuttiyo sabbassa cittasaṃkilesassa maggo nibbānādhimutti ca. Nibbāne adhimuccanaṃ tattha ninnapoṇapabbhāratāya. Arahā sabbakilesehi vimuttacittattā cittavimuttiyā vimutto. Nibbānaṃ adhimuttattā nibbāne vimutto. Sesamettha uttānameva.
ഖേമസുത്തവണ്ണനാ നിട്ഠിതാ.
Khemasuttavaṇṇanā niṭṭhitā.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / അങ്ഗുത്തരനികായ • Aṅguttaranikāya / ൭. ഖേമസുത്തം • 7. Khemasuttaṃ
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / അങ്ഗുത്തരനികായ (അട്ഠകഥാ) • Aṅguttaranikāya (aṭṭhakathā) / ൭. ഖേമസുത്തവണ്ണനാ • 7. Khemasuttavaṇṇanā
