| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
4. ඛෙත්‌තඞ්‌ගපඤ්‌හො
4. Khettaṅgapañho
4. ‘‘භන්‌තෙ නාගසෙන, ‘ඛෙත්‌තස්‌ස තීණි අඞ්‌ගානි ගහෙතබ්‌බානී’ති යං වදෙසි, කතමානි තානි තීණි අඞ්‌ගානි ගහෙතබ්‌බානී’’ති? ‘‘යථා, මහාරාජ, ඛෙත්‌තං මාතිකාසම්‌පන්‌නං හොති, එවමෙව ඛො, මහාරාජ, යොගිනා යොගාවචරෙන සුචරිතවත්‌තප්‌පටිවත්‌තමාතිකාසම්‌පන්‌නෙන භවිතබ්‌බං. ඉදං, මහාරාජ, ඛෙත්‌තස්‌ස පඨමං අඞ්‌ගං ගහෙතබ්‌බං.
4. ‘‘Bhante nāgasena, ‘khettassa tīṇi aṅgāni gahetabbānī’ti yaṃ vadesi, katamāni tāni tīṇi aṅgāni gahetabbānī’’ti? ‘‘Yathā, mahārāja, khettaṃ mātikāsampannaṃ hoti, evameva kho, mahārāja, yoginā yogāvacarena sucaritavattappaṭivattamātikāsampannena bhavitabbaṃ. Idaṃ, mahārāja, khettassa paṭhamaṃ aṅgaṃ gahetabbaṃ.
‘‘පුන චපරං, මහාරාජ, ඛෙත්‌තං මරියාදාසම්‌පන්‌නං හොති, තාය ච මරියාදාය උදකං රක්‌ඛිත්‌වා ධඤ්‌ඤං පරිපාචෙති, එවමෙව ඛො, මහාරාජ, යොගිනා යොගාවචරෙන සීලහිරිමරියාදාසම්‌පන්‌නෙන භවිතබ්‌බං, තාය ච සීලහිරිමරියාදාය සාමඤ්‌ඤං රක්‌ඛිත්‌වා චත්‌තාරි සාමඤ්‌ඤඵලානි ගහෙතබ්‌බානි. ඉදං, මහාරාජ, ඛෙත්‌තස්‌ස දුතියං අඞ්‌ගං ගහෙතබ්‌බං.
‘‘Puna caparaṃ, mahārāja, khettaṃ mariyādāsampannaṃ hoti, tāya ca mariyādāya udakaṃ rakkhitvā dhaññaṃ paripāceti, evameva kho, mahārāja, yoginā yogāvacarena sīlahirimariyādāsampannena bhavitabbaṃ, tāya ca sīlahirimariyādāya sāmaññaṃ rakkhitvā cattāri sāmaññaphalāni gahetabbāni. Idaṃ, mahārāja, khettassa dutiyaṃ aṅgaṃ gahetabbaṃ.
‘‘පුන චපරං, මහාරාජ, ඛෙත්‌තං උට්‌ඨානසම්‌පන්‌නං හොති, කස්‌සකස්‌ස හාසජනකං අප්‌පම්‌පි බීජං වුත්‌තං බහු හොති, බහු වුත්‌තං බහුතරං හොති, එවමෙව ඛො, මහාරාජ, යොගිනා යොගාවචරෙන උට්‌ඨානසම්‌පන්‌නෙන විපුලඵලදායිනා භවිතබ්‌බං, දායකානං හාසජනකෙන භවිතබ්‌බං, යථා අප්‌පං දින්‌නං බහු හොති, බහු දින්‌නං බහුතරං හොති. ඉදං, මහාරාජ, ඛෙත්‌තස්‌ස තතියං අඞ්‌ගං ගහෙතබ්‌බං. භාසිතම්‌පෙතං, මහාරාජ, ථෙරෙන උපාලිනා විනයධරෙන –
‘‘Puna caparaṃ, mahārāja, khettaṃ uṭṭhānasampannaṃ hoti, kassakassa hāsajanakaṃ appampi bījaṃ vuttaṃ bahu hoti, bahu vuttaṃ bahutaraṃ hoti, evameva kho, mahārāja, yoginā yogāvacarena uṭṭhānasampannena vipulaphaladāyinā bhavitabbaṃ, dāyakānaṃ hāsajanakena bhavitabbaṃ, yathā appaṃ dinnaṃ bahu hoti, bahu dinnaṃ bahutaraṃ hoti. Idaṃ, mahārāja, khettassa tatiyaṃ aṅgaṃ gahetabbaṃ. Bhāsitampetaṃ, mahārāja, therena upālinā vinayadharena –
‘‘‘ඛෙත්‌තූපමෙන භවිතබ්‌බං, උට්‌ඨානවිපුලදායිනා;
‘‘‘Khettūpamena bhavitabbaṃ, uṭṭhānavipuladāyinā;
එස ඛෙත්‌තවරො නාම, යො දදාති විපුලං ඵල’’’න්‌ති.
Esa khettavaro nāma, yo dadāti vipulaṃ phala’’’nti.
ඛෙත්‌තඞ්‌ගපඤ්‌හො චතුත්‌ථො.
Khettaṅgapañho catuttho.
