| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༤. ཁེཏྟངྒཔཉྷོ
4. Khettaṅgapañho
༤. ‘‘བྷནྟེ ནཱགསེན, ‘ཁེཏྟསྶ ཏཱིཎི ཨངྒཱནི གཧེཏབྦཱནཱི’ཏི ཡཾ ཝདེསི, ཀཏམཱནི ཏཱནི ཏཱིཎི ཨངྒཱནི གཧེཏབྦཱནཱི’’ཏི? ‘‘ཡཐཱ, མཧཱརཱཛ, ཁེཏྟཾ མཱཏིཀཱསམྤནྣཾ ཧོཏི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན སུཙརིཏཝཏྟཔྤཊིཝཏྟམཱཏིཀཱསམྤནྣེན བྷཝིཏབྦཾ། ཨིདཾ, མཧཱརཱཛ, ཁེཏྟསྶ པཋམཾ ཨངྒཾ གཧེཏབྦཾ།
4. ‘‘Bhante nāgasena, ‘khettassa tīṇi aṅgāni gahetabbānī’ti yaṃ vadesi, katamāni tāni tīṇi aṅgāni gahetabbānī’’ti? ‘‘Yathā, mahārāja, khettaṃ mātikāsampannaṃ hoti, evameva kho, mahārāja, yoginā yogāvacarena sucaritavattappaṭivattamātikāsampannena bhavitabbaṃ. Idaṃ, mahārāja, khettassa paṭhamaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, ཁེཏྟཾ མརིཡཱདཱསམྤནྣཾ ཧོཏི, ཏཱཡ ཙ མརིཡཱདཱཡ ཨུདཀཾ རཀྑིཏྭཱ དྷཉྙཾ པརིཔཱཙེཏི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན སཱིལཧིརིམརིཡཱདཱསམྤནྣེན བྷཝིཏབྦཾ, ཏཱཡ ཙ སཱིལཧིརིམརིཡཱདཱཡ སཱམཉྙཾ རཀྑིཏྭཱ ཙཏྟཱརི སཱམཉྙཕལཱནི གཧེཏབྦཱནི། ཨིདཾ, མཧཱརཱཛ, ཁེཏྟསྶ དུཏིཡཾ ཨངྒཾ གཧེཏབྦཾ།
‘‘Puna caparaṃ, mahārāja, khettaṃ mariyādāsampannaṃ hoti, tāya ca mariyādāya udakaṃ rakkhitvā dhaññaṃ paripāceti, evameva kho, mahārāja, yoginā yogāvacarena sīlahirimariyādāsampannena bhavitabbaṃ, tāya ca sīlahirimariyādāya sāmaññaṃ rakkhitvā cattāri sāmaññaphalāni gahetabbāni. Idaṃ, mahārāja, khettassa dutiyaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, ཁེཏྟཾ ཨུཊྛཱནསམྤནྣཾ ཧོཏི, ཀསྶཀསྶ ཧཱསཛནཀཾ ཨཔྤམྤི བཱིཛཾ ཝུཏྟཾ བཧུ ཧོཏི, བཧུ ཝུཏྟཾ བཧུཏརཾ ཧོཏི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན ཨུཊྛཱནསམྤནྣེན ཝིཔུལཕལདཱཡིནཱ བྷཝིཏབྦཾ, དཱཡཀཱནཾ ཧཱསཛནཀེན བྷཝིཏབྦཾ, ཡཐཱ ཨཔྤཾ དིནྣཾ བཧུ ཧོཏི, བཧུ དིནྣཾ བཧུཏརཾ ཧོཏི། ཨིདཾ, མཧཱརཱཛ, ཁེཏྟསྶ ཏཏིཡཾ ཨངྒཾ གཧེཏབྦཾ། བྷཱསིཏམྤེཏཾ, མཧཱརཱཛ, ཐེརེན ཨུཔཱལིནཱ ཝིནཡདྷརེན –
‘‘Puna caparaṃ, mahārāja, khettaṃ uṭṭhānasampannaṃ hoti, kassakassa hāsajanakaṃ appampi bījaṃ vuttaṃ bahu hoti, bahu vuttaṃ bahutaraṃ hoti, evameva kho, mahārāja, yoginā yogāvacarena uṭṭhānasampannena vipulaphaladāyinā bhavitabbaṃ, dāyakānaṃ hāsajanakena bhavitabbaṃ, yathā appaṃ dinnaṃ bahu hoti, bahu dinnaṃ bahutaraṃ hoti. Idaṃ, mahārāja, khettassa tatiyaṃ aṅgaṃ gahetabbaṃ. Bhāsitampetaṃ, mahārāja, therena upālinā vinayadharena –
‘‘‘ཁེཏྟཱུཔམེན བྷཝིཏབྦཾ, ཨུཊྛཱནཝིཔུལདཱཡིནཱ།
‘‘‘Khettūpamena bhavitabbaṃ, uṭṭhānavipuladāyinā;
ཨེས ཁེཏྟཝརོ ནཱམ, ཡོ དདཱཏི ཝིཔུལཾ ཕལ’’’ནྟི༎
Esa khettavaro nāma, yo dadāti vipulaṃ phala’’’nti.
ཁེཏྟངྒཔཉྷོ ཙཏུཏྠོ།
Khettaṅgapañho catuttho.
