| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৪. খেত্তসুত্তং
4. Khettasuttaṃ
৩৪. ‘‘অট্ঠঙ্গসমন্নাগতে , ভিক্খৰে, খেত্তে বীজং ৰুত্তং ন মহপ্ফলং হোতি ন মহস্সাদং ন ফাতিসেয্যং 1। কথং অট্ঠঙ্গসমন্নাগতে? ইধ, ভিক্খৰে, খেত্তং উন্নামনিন্নামি চ হোতি, পাসাণসক্খরিকঞ্চ হোতি, ঊসরঞ্চ হোতি, ন চ গম্ভীরসিতং হোতি, ন আযসম্পন্নং হোতি, ন অপাযসম্পন্নং হোতি, ন মাতিকাসম্পন্নং হোতি, ন মরিযাদসম্পন্নং হোতি। এৰং অট্ঠঙ্গসমন্নাগতে, ভিক্খৰে, খেত্তে বীজং ৰুত্তং ন মহপ্ফলং হোতি ন মহস্সাদং ন ফাতিসেয্যং।
34. ‘‘Aṭṭhaṅgasamannāgate , bhikkhave, khette bījaṃ vuttaṃ na mahapphalaṃ hoti na mahassādaṃ na phātiseyyaṃ 2. Kathaṃ aṭṭhaṅgasamannāgate? Idha, bhikkhave, khettaṃ unnāmaninnāmi ca hoti, pāsāṇasakkharikañca hoti, ūsarañca hoti, na ca gambhīrasitaṃ hoti, na āyasampannaṃ hoti, na apāyasampannaṃ hoti, na mātikāsampannaṃ hoti, na mariyādasampannaṃ hoti. Evaṃ aṭṭhaṅgasamannāgate, bhikkhave, khette bījaṃ vuttaṃ na mahapphalaṃ hoti na mahassādaṃ na phātiseyyaṃ.
‘‘এৰমেৰং খো, ভিক্খৰে, অট্ঠঙ্গসমন্নাগতেসু সমণব্রাহ্মণেসু দানং দিন্নং ন মহপ্ফলং হোতি ন মহানিসংসং ন মহাজুতিকং ন মহাৰিপ্ফারং। কথং অট্ঠঙ্গসমন্নাগতেসু? ইধ, ভিক্খৰে, সমণব্রাহ্মণা মিচ্ছাদিট্ঠিকা হোন্তি, মিচ্ছাসঙ্কপ্পা, মিচ্ছাৰাচা, মিচ্ছাকম্মন্তা, মিচ্ছাআজীৰা, মিচ্ছাৰাযামা, মিচ্ছাসতিনো, মিচ্ছাসমাধিনো। এৰং অট্ঠঙ্গসমন্নাগতেসু, ভিক্খৰে, সমণব্রাহ্মণেসু দানং দিন্নং ন মহপ্ফলং হোতি ন মহানিসংসং ন মহাজুতিকং ন মহাৰিপ্ফারং।
‘‘Evamevaṃ kho, bhikkhave, aṭṭhaṅgasamannāgatesu samaṇabrāhmaṇesu dānaṃ dinnaṃ na mahapphalaṃ hoti na mahānisaṃsaṃ na mahājutikaṃ na mahāvipphāraṃ. Kathaṃ aṭṭhaṅgasamannāgatesu? Idha, bhikkhave, samaṇabrāhmaṇā micchādiṭṭhikā honti, micchāsaṅkappā, micchāvācā, micchākammantā, micchāājīvā, micchāvāyāmā, micchāsatino, micchāsamādhino. Evaṃ aṭṭhaṅgasamannāgatesu, bhikkhave, samaṇabrāhmaṇesu dānaṃ dinnaṃ na mahapphalaṃ hoti na mahānisaṃsaṃ na mahājutikaṃ na mahāvipphāraṃ.
‘‘অট্ঠঙ্গসমন্নাগতে, ভিক্খৰে, খেত্তে বীজং ৰুত্তং মহপ্ফলং হোতি মহস্সাদং ফাতিসেয্যং। কথং অট্ঠঙ্গসমন্নাগতে? ইধ, ভিক্খৰে, খেত্তং অনুন্নামানিন্নামি চ হোতি, অপাসাণসক্খরিকঞ্চ হোতি, অনূসরঞ্চ হোতি, গম্ভীরসিতং হোতি, আযসম্পন্নং হোতি, অপাযসম্পন্নং হোতি, মাতিকাসম্পন্নং হোতি, মরিযাদসম্পন্নং হোতি। এৰং অট্ঠঙ্গসমন্নাগতে, ভিক্খৰে, খেত্তে বীজং ৰুত্তং মহপ্ফলং হোতি মহস্সাদং ফাতিসেয্যং।
‘‘Aṭṭhaṅgasamannāgate, bhikkhave, khette bījaṃ vuttaṃ mahapphalaṃ hoti mahassādaṃ phātiseyyaṃ. Kathaṃ aṭṭhaṅgasamannāgate? Idha, bhikkhave, khettaṃ anunnāmāninnāmi ca hoti, apāsāṇasakkharikañca hoti, anūsarañca hoti, gambhīrasitaṃ hoti, āyasampannaṃ hoti, apāyasampannaṃ hoti, mātikāsampannaṃ hoti, mariyādasampannaṃ hoti. Evaṃ aṭṭhaṅgasamannāgate, bhikkhave, khette bījaṃ vuttaṃ mahapphalaṃ hoti mahassādaṃ phātiseyyaṃ.
‘‘এৰমেৰং খো, ভিক্খৰে, অট্ঠঙ্গসমন্নাগতেসু সমণব্রাহ্মণেসু দানং দিন্নং মহপ্ফলং হোতি মহানিসংসং মহাজুতিকং মহাৰিপ্ফারং। কথং অট্ঠঙ্গসমন্নাগতেসু? ইধ, ভিক্খৰে, সমণব্রাহ্মণা সম্মাদিট্ঠিকা হোন্তি, সম্মাসঙ্কপ্পা, সম্মাৰাচা, সম্মাকম্মন্তা, সম্মাআজীৰা, সম্মাৰাযামা, সম্মাসতিনো, সম্মাসমাধিনো। এৰং অট্ঠঙ্গসমন্নাগতেসু, ভিক্খৰে, সমণব্রাহ্মণেসু দানং দিন্নং মহপ্ফলং হোতি মহানিসংসং মহাজুতিকং মহাৰিপ্ফার’’ন্তি।
‘‘Evamevaṃ kho, bhikkhave, aṭṭhaṅgasamannāgatesu samaṇabrāhmaṇesu dānaṃ dinnaṃ mahapphalaṃ hoti mahānisaṃsaṃ mahājutikaṃ mahāvipphāraṃ. Kathaṃ aṭṭhaṅgasamannāgatesu? Idha, bhikkhave, samaṇabrāhmaṇā sammādiṭṭhikā honti, sammāsaṅkappā, sammāvācā, sammākammantā, sammāājīvā, sammāvāyāmā, sammāsatino, sammāsamādhino. Evaṃ aṭṭhaṅgasamannāgatesu, bhikkhave, samaṇabrāhmaṇesu dānaṃ dinnaṃ mahapphalaṃ hoti mahānisaṃsaṃ mahājutikaṃ mahāvipphāra’’nti.
‘‘যথাপি খেত্তে সম্পন্নে, পৰুত্তা বীজসম্পদা।
‘‘Yathāpi khette sampanne, pavuttā bījasampadā;
‘‘অনীতিসম্পদা হোতি, ৰিরূল়্হী ভৰতি সম্পদা।
‘‘Anītisampadā hoti, virūḷhī bhavati sampadā;
ৰেপুল্লসম্পদা হোতি, ফলং ৰে হোতি সম্পদা॥
Vepullasampadā hoti, phalaṃ ve hoti sampadā.
‘‘এৰং সম্পন্নসীলেসু, দিন্না ভোজনসম্পদা।
‘‘Evaṃ sampannasīlesu, dinnā bhojanasampadā;
সম্পদানং উপনেতি, সম্পন্নং হিস্স তং কতং॥
Sampadānaṃ upaneti, sampannaṃ hissa taṃ kataṃ.
‘‘তস্মা সম্পদমাকঙ্খী, সম্পন্নত্থূধ পুগ্গলো।
‘‘Tasmā sampadamākaṅkhī, sampannatthūdha puggalo;
সম্পন্নপঞ্ঞে সেৰেথ, এৰং ইজ্ঝন্তি সম্পদা॥
Sampannapaññe sevetha, evaṃ ijjhanti sampadā.
‘‘ৰিজ্জাচরণসম্পন্নে, লদ্ধা চিত্তস্স সম্পদং।
‘‘Vijjācaraṇasampanne, laddhā cittassa sampadaṃ;
করোতি কম্মসম্পদং, লভতি চত্থসম্পদং॥
Karoti kammasampadaṃ, labhati catthasampadaṃ.
‘‘লোকং ঞত্ৰা যথাভূতং, পপ্পুয্য দিট্ঠিসম্পদং।
‘‘Lokaṃ ñatvā yathābhūtaṃ, pappuyya diṭṭhisampadaṃ;
মগ্গসম্পদমাগম্ম, যাতি সম্পন্নমানসো॥
Maggasampadamāgamma, yāti sampannamānaso.
‘‘ওধুনিত্ৰা মলং সব্বং, পত্ৰা নিব্বানসম্পদং।
‘‘Odhunitvā malaṃ sabbaṃ, patvā nibbānasampadaṃ;
মুচ্চতি সব্বদুক্খেহি, সা হোতি সব্বসম্পদা’’তি॥ চতুত্থং।
Muccati sabbadukkhehi, sā hoti sabbasampadā’’ti. catutthaṃ;
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৪. খেত্তসুত্তৰণ্ণনা • 4. Khettasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১-৪. পঠমদানসুত্তাদিৰণ্ণনা • 1-4. Paṭhamadānasuttādivaṇṇanā
