| Library / Tipiṭaka / តិបិដក • Tipiṭaka / អង្គុត្តរនិកាយ • Aṅguttaranikāya |
៤. ខេត្តសុត្តំ
4. Khettasuttaṃ
៣៤. ‘‘អដ្ឋង្គសមន្នាគតេ , ភិក្ខវេ, ខេត្តេ ពីជំ វុត្តំ ន មហប្ផលំ ហោតិ ន មហស្សាទំ ន ផាតិសេយ្យំ 1។ កថំ អដ្ឋង្គសមន្នាគតេ? ឥធ, ភិក្ខវេ, ខេត្តំ ឧន្នាមនិន្នាមិ ច ហោតិ, បាសាណសក្ខរិកញ្ច ហោតិ, ឩសរញ្ច ហោតិ, ន ច គម្ភីរសិតំ ហោតិ, ន អាយសម្បន្នំ ហោតិ, ន អបាយសម្បន្នំ ហោតិ, ន មាតិកាសម្បន្នំ ហោតិ, ន មរិយាទសម្បន្នំ ហោតិ។ ឯវំ អដ្ឋង្គសមន្នាគតេ, ភិក្ខវេ, ខេត្តេ ពីជំ វុត្តំ ន មហប្ផលំ ហោតិ ន មហស្សាទំ ន ផាតិសេយ្យំ។
34. ‘‘Aṭṭhaṅgasamannāgate , bhikkhave, khette bījaṃ vuttaṃ na mahapphalaṃ hoti na mahassādaṃ na phātiseyyaṃ 2. Kathaṃ aṭṭhaṅgasamannāgate? Idha, bhikkhave, khettaṃ unnāmaninnāmi ca hoti, pāsāṇasakkharikañca hoti, ūsarañca hoti, na ca gambhīrasitaṃ hoti, na āyasampannaṃ hoti, na apāyasampannaṃ hoti, na mātikāsampannaṃ hoti, na mariyādasampannaṃ hoti. Evaṃ aṭṭhaṅgasamannāgate, bhikkhave, khette bījaṃ vuttaṃ na mahapphalaṃ hoti na mahassādaṃ na phātiseyyaṃ.
‘‘ឯវមេវំ ខោ, ភិក្ខវេ, អដ្ឋង្គសមន្នាគតេសុ សមណព្រាហ្មណេសុ ទានំ ទិន្នំ ន មហប្ផលំ ហោតិ ន មហានិសំសំ ន មហាជុតិកំ ន មហាវិប្ផារំ។ កថំ អដ្ឋង្គសមន្នាគតេសុ? ឥធ, ភិក្ខវេ, សមណព្រាហ្មណា មិច្ឆាទិដ្ឋិកា ហោន្តិ, មិច្ឆាសង្កប្បា, មិច្ឆាវាចា, មិច្ឆាកម្មន្តា, មិច្ឆាអាជីវា, មិច្ឆាវាយាមា, មិច្ឆាសតិនោ, មិច្ឆាសមាធិនោ។ ឯវំ អដ្ឋង្គសមន្នាគតេសុ, ភិក្ខវេ, សមណព្រាហ្មណេសុ ទានំ ទិន្នំ ន មហប្ផលំ ហោតិ ន មហានិសំសំ ន មហាជុតិកំ ន មហាវិប្ផារំ។
‘‘Evamevaṃ kho, bhikkhave, aṭṭhaṅgasamannāgatesu samaṇabrāhmaṇesu dānaṃ dinnaṃ na mahapphalaṃ hoti na mahānisaṃsaṃ na mahājutikaṃ na mahāvipphāraṃ. Kathaṃ aṭṭhaṅgasamannāgatesu? Idha, bhikkhave, samaṇabrāhmaṇā micchādiṭṭhikā honti, micchāsaṅkappā, micchāvācā, micchākammantā, micchāājīvā, micchāvāyāmā, micchāsatino, micchāsamādhino. Evaṃ aṭṭhaṅgasamannāgatesu, bhikkhave, samaṇabrāhmaṇesu dānaṃ dinnaṃ na mahapphalaṃ hoti na mahānisaṃsaṃ na mahājutikaṃ na mahāvipphāraṃ.
‘‘អដ្ឋង្គសមន្នាគតេ, ភិក្ខវេ, ខេត្តេ ពីជំ វុត្តំ មហប្ផលំ ហោតិ មហស្សាទំ ផាតិសេយ្យំ។ កថំ អដ្ឋង្គសមន្នាគតេ? ឥធ, ភិក្ខវេ, ខេត្តំ អនុន្នាមានិន្នាមិ ច ហោតិ, អបាសាណសក្ខរិកញ្ច ហោតិ, អនូសរញ្ច ហោតិ, គម្ភីរសិតំ ហោតិ, អាយសម្បន្នំ ហោតិ, អបាយសម្បន្នំ ហោតិ, មាតិកាសម្បន្នំ ហោតិ, មរិយាទសម្បន្នំ ហោតិ។ ឯវំ អដ្ឋង្គសមន្នាគតេ, ភិក្ខវេ, ខេត្តេ ពីជំ វុត្តំ មហប្ផលំ ហោតិ មហស្សាទំ ផាតិសេយ្យំ។
‘‘Aṭṭhaṅgasamannāgate, bhikkhave, khette bījaṃ vuttaṃ mahapphalaṃ hoti mahassādaṃ phātiseyyaṃ. Kathaṃ aṭṭhaṅgasamannāgate? Idha, bhikkhave, khettaṃ anunnāmāninnāmi ca hoti, apāsāṇasakkharikañca hoti, anūsarañca hoti, gambhīrasitaṃ hoti, āyasampannaṃ hoti, apāyasampannaṃ hoti, mātikāsampannaṃ hoti, mariyādasampannaṃ hoti. Evaṃ aṭṭhaṅgasamannāgate, bhikkhave, khette bījaṃ vuttaṃ mahapphalaṃ hoti mahassādaṃ phātiseyyaṃ.
‘‘ឯវមេវំ ខោ, ភិក្ខវេ, អដ្ឋង្គសមន្នាគតេសុ សមណព្រាហ្មណេសុ ទានំ ទិន្នំ មហប្ផលំ ហោតិ មហានិសំសំ មហាជុតិកំ មហាវិប្ផារំ។ កថំ អដ្ឋង្គសមន្នាគតេសុ? ឥធ, ភិក្ខវេ, សមណព្រាហ្មណា សម្មាទិដ្ឋិកា ហោន្តិ, សម្មាសង្កប្បា, សម្មាវាចា, សម្មាកម្មន្តា, សម្មាអាជីវា, សម្មាវាយាមា, សម្មាសតិនោ, សម្មាសមាធិនោ។ ឯវំ អដ្ឋង្គសមន្នាគតេសុ, ភិក្ខវេ, សមណព្រាហ្មណេសុ ទានំ ទិន្នំ មហប្ផលំ ហោតិ មហានិសំសំ មហាជុតិកំ មហាវិប្ផារ’’ន្តិ។
‘‘Evamevaṃ kho, bhikkhave, aṭṭhaṅgasamannāgatesu samaṇabrāhmaṇesu dānaṃ dinnaṃ mahapphalaṃ hoti mahānisaṃsaṃ mahājutikaṃ mahāvipphāraṃ. Kathaṃ aṭṭhaṅgasamannāgatesu? Idha, bhikkhave, samaṇabrāhmaṇā sammādiṭṭhikā honti, sammāsaṅkappā, sammāvācā, sammākammantā, sammāājīvā, sammāvāyāmā, sammāsatino, sammāsamādhino. Evaṃ aṭṭhaṅgasamannāgatesu, bhikkhave, samaṇabrāhmaṇesu dānaṃ dinnaṃ mahapphalaṃ hoti mahānisaṃsaṃ mahājutikaṃ mahāvipphāra’’nti.
‘‘យថាបិ ខេត្តេ សម្បន្នេ, បវុត្តា ពីជសម្បទា;
‘‘Yathāpi khette sampanne, pavuttā bījasampadā;
‘‘អនីតិសម្បទា ហោតិ, វិរូឡ្ហី ភវតិ សម្បទា;
‘‘Anītisampadā hoti, virūḷhī bhavati sampadā;
វេបុល្លសម្បទា ហោតិ, ផលំ វេ ហោតិ សម្បទា។
Vepullasampadā hoti, phalaṃ ve hoti sampadā.
‘‘ឯវំ សម្បន្នសីលេសុ, ទិន្នា ភោជនសម្បទា;
‘‘Evaṃ sampannasīlesu, dinnā bhojanasampadā;
សម្បទានំ ឧបនេតិ, សម្បន្នំ ហិស្ស តំ កតំ។
Sampadānaṃ upaneti, sampannaṃ hissa taṃ kataṃ.
‘‘តស្មា សម្បទមាកង្ខី, សម្បន្នត្ថូធ បុគ្គលោ;
‘‘Tasmā sampadamākaṅkhī, sampannatthūdha puggalo;
សម្បន្នបញ្ញេ សេវេថ, ឯវំ ឥជ្ឈន្តិ សម្បទា។
Sampannapaññe sevetha, evaṃ ijjhanti sampadā.
‘‘វិជ្ជាចរណសម្បន្នេ, លទ្ធា ចិត្តស្ស សម្បទំ;
‘‘Vijjācaraṇasampanne, laddhā cittassa sampadaṃ;
ករោតិ កម្មសម្បទំ, លភតិ ចត្ថសម្បទំ។
Karoti kammasampadaṃ, labhati catthasampadaṃ.
‘‘លោកំ ញត្វា យថាភូតំ, បប្បុយ្យ ទិដ្ឋិសម្បទំ;
‘‘Lokaṃ ñatvā yathābhūtaṃ, pappuyya diṭṭhisampadaṃ;
មគ្គសម្បទមាគម្ម, យាតិ សម្បន្នមានសោ។
Maggasampadamāgamma, yāti sampannamānaso.
‘‘ឱធុនិត្វា មលំ សព្ពំ, បត្វា និព្ពានសម្បទំ;
‘‘Odhunitvā malaṃ sabbaṃ, patvā nibbānasampadaṃ;
មុច្ចតិ សព្ពទុក្ខេហិ, សា ហោតិ សព្ពសម្បទា’’តិ។ ចតុត្ថំ;
Muccati sabbadukkhehi, sā hoti sabbasampadā’’ti. catutthaṃ;
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ៤. ខេត្តសុត្តវណ្ណនា • 4. Khettasuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ១-៤. បឋមទានសុត្តាទិវណ្ណនា • 1-4. Paṭhamadānasuttādivaṇṇanā
