Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya

    ၃. ခေတ္တသုတ္တံ

    3. Khettasuttaṃ

    ၈၄. ‘‘တီဏိမာနိ, ဘိက္ခဝေ, ကသ္သကသ္သ ဂဟပတိသ္သ ပုဗ္ဗေ ကရဏီယာနိ။ ကတမာနိ တီဏိ? ဣဓ, ဘိက္ခဝေ, ကသ္သကော ဂဟပတိ ပဋိကစ္စေဝ 1 ခေတ္တံ သုကဋ္ဌံ ကရောတိ သုမတိကတံ 2။ ပဋိကစ္စေဝ ခေတ္တံ သုကဋ္ဌံ ကရိတ္ဝာ သုမတိကတံ ကာလေန ဗီဇာနိ ပတိဋ္ဌာပေတိ။ ကာလေန ဗီဇာနိ ပတိဋ္ဌာပေတ္ဝာ သမယေန ဥဒကံ အဘိနေတိပိ အပနေတိပိ။ ဣမာနိ ခော, ဘိက္ခဝေ, တီဏိ ကသ္သကသ္သ ဂဟပတိသ္သ ပုဗ္ဗေ ကရဏီယာနိ။

    84. ‘‘Tīṇimāni, bhikkhave, kassakassa gahapatissa pubbe karaṇīyāni. Katamāni tīṇi? Idha, bhikkhave, kassako gahapati paṭikacceva 3 khettaṃ sukaṭṭhaṃ karoti sumatikataṃ 4. Paṭikacceva khettaṃ sukaṭṭhaṃ karitvā sumatikataṃ kālena bījāni patiṭṭhāpeti. Kālena bījāni patiṭṭhāpetvā samayena udakaṃ abhinetipi apanetipi. Imāni kho, bhikkhave, tīṇi kassakassa gahapatissa pubbe karaṇīyāni.

    ‘‘ဧဝမေဝံ ခော, ဘိက္ခဝေ, တီဏိမာနိ ဘိက္ခုသ္သ ပုဗ္ဗေ ကရဏီယာနိ။ ကတမာနိ တီဏိ? အဓိသီလသိက္ခာသမာဒာနံ, အဓိစိတ္တသိက္ခာသမာဒာနံ, အဓိပညာသိက္ခာသမာဒာနံ – ဣမာနိ ခော, ဘိက္ခဝေ, တီဏိ ဘိက္ခုသ္သ ပုဗ္ဗေ ကရဏီယာနိ။

    ‘‘Evamevaṃ kho, bhikkhave, tīṇimāni bhikkhussa pubbe karaṇīyāni. Katamāni tīṇi? Adhisīlasikkhāsamādānaṃ, adhicittasikkhāsamādānaṃ, adhipaññāsikkhāsamādānaṃ – imāni kho, bhikkhave, tīṇi bhikkhussa pubbe karaṇīyāni.

    ‘‘တသ္မာတိဟ, ဘိက္ခဝေ, ဧဝံ သိက္ခိတဗ္ဗံ – ‘တိဗ္ဗော နော ဆန္ဒော ဘဝိသ္သတိ အဓိသီလသိက္ခာသမာဒာနေ, တိဗ္ဗော နော ဆန္ဒော ဘဝိသ္သတိ အဓိစိတ္တသိက္ခာသမာဒာနေ, တိဗ္ဗော နော ဆန္ဒော ဘဝိသ္သတိ အဓိပညာသိက္ခာသမာဒာနေ’တိ။ ဧဝဉ္ဟိ ဝော, ဘိက္ခဝေ, သိက္ခိတဗ္ဗ’’န္တိ။ တတိယံ။

    ‘‘Tasmātiha, bhikkhave, evaṃ sikkhitabbaṃ – ‘tibbo no chando bhavissati adhisīlasikkhāsamādāne, tibbo no chando bhavissati adhicittasikkhāsamādāne, tibbo no chando bhavissati adhipaññāsikkhāsamādāne’ti. Evañhi vo, bhikkhave, sikkhitabba’’nti. Tatiyaṃ.




    Next: ၄. ဝဇ္ဇိပုတ္တသုတ္တံ • 4. Vajjiputtasuttaṃ




    Footnotes:
    1. ပဋိဂစ္စေဝ (သီ. ပီ.)
    2. သုမတ္တိကတံ (က.), ဧတ္ထ မတိသဒ္ဒော ကဋ္ဌခေတ္တသ္သ သမီကရဏသာဓနေ ဒာရုဘဏ္ဍေ ဝတ္တတီတိ သက္ကတအဘိဓာနေသု အာဂတံ။ တံ ‘‘မတိယာ သုဋ္ဌု သမီကတ’’န္တိ အဋ္ဌကထာယ သမေတိ
    3. paṭigacceva (sī. pī.)
    4. sumattikataṃ (ka.), ettha matisaddo kaṭṭhakhettassa samīkaraṇasādhane dārubhaṇḍe vattatīti sakkataabhidhānesu āgataṃ. taṃ ‘‘matiyā suṭṭhu samīkata’’nti aṭṭhakathāya sameti



    Related texts:



    အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၃. ခေတ္တသုတ္တဝဏ္ဏနာ • 3. Khettasuttavaṇṇanā

    ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁-၅. သမဏသုတ္တာဒိဝဏ္ဏနာ • 1-5. Samaṇasuttādivaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact