| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
4. கெ²த்தஸுத்தவண்ணனா
4. Khettasuttavaṇṇanā
34. சதுத்தே² ந மஹப்ப²லங் ஹோதீதி த⁴ஞ்ஞப²லேன மஹப்ப²லங் ந ஹோதி. ந மஹஸ்ஸாத³ந்தி யம்பிஸ்ஸ ப²லங் ஹோதி, தஸ்ஸ அஸ்ஸாதோ³ ந மஹா ஹோதி மந்த³ஸ்ஸாத³ங் ந மது⁴ரங். ந பா²திஸெய்யந்தி ஸெய்யாபிஸ்ஸ ந ஹோதி வுட்³டி⁴, தஸ்ஸ மஹந்தங் வீஹித²ம்ப⁴ஸன்னிவேஸங் ந ஹோதீதி அத்தோ². உன்னாமனின்னாமீதி த²லனின்னவஸேன விஸமதலங். தத்த² த²லே உத³கங் ந ஸண்டா²தி, நின்னே அதிப³ஹு திட்ட²தி. பாஸாணஸக்க²ரிகந்தி பத்த²ரித்வா டி²தபிட்டி²பாஸாணேஹி ச கு²த்³த³கபாஸாணேஹி ச ஸக்க²ராஹி ச ஸமன்னாக³தங். ஊஸரந்தி உப்³பி⁴ன்னலோணங். ந ச க³ம்பீ⁴ரஸிதந்தி த²த்³த⁴பூ⁴மிதாய க³ம்பீ⁴ரானுக³தங், நங்க³லமக்³க³ங் கத்வா கஸிதுங் ந ஸக்கா ஹோதி, உத்தானநங்க³லமக்³க³மேவ ஹோதி. ந ஆயஸம்பன்னந்தி ந உத³காக³மனஸம்பன்னங். ந அபாயஸம்பன்னந்தி பச்சா²பா⁴கே³ உத³கனிக்³க³மனமக்³க³ஸம்பன்னங் ந ஹோதி. ந மாதிகாஸம்பன்னந்தி ந கு²த்³த³கமஹந்தீஹி உத³கமாதிகாஹி ஸம்பன்னங் ஹோதி . ந மரியாத³ஸம்பன்னந்தி ந கேதா³ரமரியாதா³ஹி ஸம்பன்னங். ந மஹப்ப²லந்திஆதீ³னி ஸப்³பா³னி விபாகப²லவஸேனேவ வேதி³தப்³பா³னி.
34. Catutthe na mahapphalaṃ hotīti dhaññaphalena mahapphalaṃ na hoti. Na mahassādanti yampissa phalaṃ hoti, tassa assādo na mahā hoti mandassādaṃ na madhuraṃ. Na phātiseyyanti seyyāpissa na hoti vuḍḍhi, tassa mahantaṃ vīhithambhasannivesaṃ na hotīti attho. Unnāmaninnāmīti thalaninnavasena visamatalaṃ. Tattha thale udakaṃ na saṇṭhāti, ninne atibahu tiṭṭhati. Pāsāṇasakkharikanti pattharitvā ṭhitapiṭṭhipāsāṇehi ca khuddakapāsāṇehi ca sakkharāhi ca samannāgataṃ. Ūsaranti ubbhinnaloṇaṃ. Na ca gambhīrasitanti thaddhabhūmitāya gambhīrānugataṃ, naṅgalamaggaṃ katvā kasituṃ na sakkā hoti, uttānanaṅgalamaggameva hoti. Na āyasampannanti na udakāgamanasampannaṃ. Na apāyasampannanti pacchābhāge udakaniggamanamaggasampannaṃ na hoti. Na mātikāsampannanti na khuddakamahantīhi udakamātikāhi sampannaṃ hoti . Na mariyādasampannanti na kedāramariyādāhi sampannaṃ. Na mahapphalantiādīni sabbāni vipākaphalavaseneva veditabbāni.
ஸம்பன்னேதி பரிபுண்ணே ஸம்பத்தியுத்தே. பவுத்தா பீ³ஜஸம்பதா³தி ஸம்பன்னங் பீ³ஜங் ரோபிதங். தே³வே ஸம்பாத³யந்தம்ஹீதி தே³வே ஸம்மா வஸ்ஸந்தே. அனீதிஸம்பதா³ ஹோதீதி கீடகிமிஆதி³பாணகஈதியா அபா⁴வோ ஏகா ஸம்பதா³ ஹோதி. விரூள்ஹீதி வட்³டி⁴ து³தியா ஸம்பதா³ ஹோதி. வேபுல்லந்தி விபுலபா⁴வோ ததியா ஸம்பதா³ ஹோதி. ப²லந்தி பரிபுண்ணப²லங் சதுத்தீ² ஸம்பதா³ ஹோதி. ஸம்பன்னஸீலேஸூதி பரிபுண்ணஸீலேஸு. போ⁴ஜனஸம்பதா³தி ஸம்பன்னங் விவித⁴போ⁴ஜனங். ஸம்பதா³னந்தி திவித⁴ங் குஸலஸம்பத³ங். உபனேதீதி ஸா போ⁴ஜனஸம்பதா³ உபனயதி. கஸ்மா? ஸம்பன்னஞ்ஹிஸ்ஸ தங் கதங், யஸ்மாஸ்ஸ தங் கதகம்மங் ஸம்பன்னங் பரிபுண்ணந்தி அத்தோ². ஸம்பன்னத்தூ²தா⁴தி ஸம்பன்னோ அத்து² இத⁴. விஜ்ஜாசரணஸம்பன்னோதி தீஹி விஜ்ஜாஹி ச பஞ்சத³ஸஹி சரணத⁴ம்மேஹி ச ஸமன்னாக³தோ. லத்³தா⁴தி ஏவரூபோ புக்³க³லோ சித்தஸ்ஸ ஸம்பத³ங் அவேகல்லபரிபுண்ணபா⁴வங் லபி⁴த்வா. கரோதி கம்மஸம்பத³ந்தி பரிபுண்ணகம்மங் கரோதி. லப⁴தி சத்த²ஸம்பத³ந்தி அத்த²ஞ்ச பரிபுண்ணங் லப⁴தி. தி³ட்டி²ஸம்பத³ந்தி விபஸ்ஸனாதி³ட்டி²ங். மக்³க³ஸம்பத³ந்தி ஸோதாபத்திமக்³க³ங். யாதி ஸம்பன்னமானஸோதி பரிபுண்ணசித்தோ ஹுத்வா அரஹத்தங் யாதி. ஸா ஹோதி ஸப்³ப³ஸம்பதா³தி ஸா ஸப்³ப³து³க்கே²ஹி விமுத்தி ஸப்³ப³ஸம்பதா³ நாம ஹோதீதி.
Sampanneti paripuṇṇe sampattiyutte. Pavuttā bījasampadāti sampannaṃ bījaṃ ropitaṃ. Devesampādayantamhīti deve sammā vassante. Anītisampadā hotīti kīṭakimiādipāṇakaītiyā abhāvo ekā sampadā hoti. Virūḷhīti vaḍḍhi dutiyā sampadā hoti. Vepullanti vipulabhāvo tatiyā sampadā hoti. Phalanti paripuṇṇaphalaṃ catutthī sampadā hoti. Sampannasīlesūti paripuṇṇasīlesu. Bhojanasampadāti sampannaṃ vividhabhojanaṃ. Sampadānanti tividhaṃ kusalasampadaṃ. Upanetīti sā bhojanasampadā upanayati. Kasmā? Sampannañhissa taṃ kataṃ, yasmāssa taṃ katakammaṃ sampannaṃ paripuṇṇanti attho. Sampannatthūdhāti sampanno atthu idha. Vijjācaraṇasampannoti tīhi vijjāhi ca pañcadasahi caraṇadhammehi ca samannāgato. Laddhāti evarūpo puggalo cittassa sampadaṃ avekallaparipuṇṇabhāvaṃ labhitvā. Karoti kammasampadanti paripuṇṇakammaṃ karoti. Labhati catthasampadanti atthañca paripuṇṇaṃ labhati. Diṭṭhisampadanti vipassanādiṭṭhiṃ. Maggasampadanti sotāpattimaggaṃ. Yāti sampannamānasoti paripuṇṇacitto hutvā arahattaṃ yāti. Sā hoti sabbasampadāti sā sabbadukkhehi vimutti sabbasampadā nāma hotīti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 4. கெ²த்தஸுத்தங் • 4. Khettasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-4. பட²மதா³னஸுத்தாதி³வண்ணனா • 1-4. Paṭhamadānasuttādivaṇṇanā
