| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
கெ²த்தட்ட²கதா²வண்ணனா
Khettaṭṭhakathāvaṇṇanā
104. கெ²த்தட்ட²கதா²யங் ஸத்த த⁴ஞ்ஞானீதி ஸாலிவீஹியவகங்கு³குத்³ரூஸவரககோ³து⁴மானங் வஸேன ஸத்த த⁴ஞ்ஞானி . நிரும்பி⁴த்வா வாதிஆதீ³ஸு ‘‘க³ண்ஹந்தஸ்ஸா’’தி பச்சேகங் யோஜேதப்³ப³ங். தத்த² நிரும்பி⁴த்வா க³ஹணங் நாம வீஹிஸீஸங் அச்சி²ந்தி³த்வா யதா²டி²தமேவ ஹத்தே²ன க³ஹெத்வா ஆகட்³டி⁴த்வா பீ³ஜமத்தஸ்ஸேவ க³ஹணங். ஏகமேகந்தி ஏகமேகங் வீஹிஸீஸங். உப்பாடெத்வா வாதி முக்³க³மாஸாதீ³னி உத்³த⁴ரித்வா வா. யஸ்மிங் பீ³ஜே வாதிஆதி³ நிரும்பி⁴த்வா க³ஹணாதீ³ஸு யதா²க்கமங் யோஜேதப்³ப³ங். ஸாலிஸீஸாதீ³னி நிரும்பி⁴த்வா க³ண்ஹந்தஸ்ஸ யஸ்மிங் பீ³ஜே வத்து² பூரதி, ஏகமேகங் ஹத்தே²னேவ சி²ந்தி³த்வா க³ண்ஹந்தஸ்ஸ யஸ்மிங் ஸீஸே வத்து² பூரதி, அஸிதேன லாயித்வா க³ண்ஹந்தஸ்ஸ யஸ்ஸங் முட்டி²யங் வத்து² பூரதி, ப³ஹூனி ஏகதோ உப்பாடெத்வா க³ண்ஹந்தஸ்ஸ யஸ்மிங் முக்³க³மாஸாதி³ப²லே வத்து² பூரதீதி ஏவமெத்த² யதா²க்கமோ வேதி³தப்³போ³. ‘‘தஸ்மிங் ப³ந்த⁴னா மோசிதமத்தே’’தி வசனதோ தஸ்மிங் பீ³ஜாதி³ம்ஹி ப³ந்த⁴னா மோசிதே ஸதி ததோ அனபனீதேபி பாராஜிகமேவாதி த³ட்ட²ப்³ப³ங். அச்சி²ஜ்ஜமானோதி அச்சி²ன்னோ ஹுத்வா டி²தோ. ஜடிதானீதி சி²ந்தி³தானி அச்சி²ன்னேஹி ஸத்³தி⁴ங் ஜடிதானி ஹொந்தீதி அத்தோ². ஸபு⁴ஸந்தி பலாலஸஹிதங். அபு⁴ஸந்தி பலாலரஹிதங்.
104. Khettaṭṭhakathāyaṃ satta dhaññānīti sālivīhiyavakaṅgukudrūsavarakagodhumānaṃ vasena satta dhaññāni . Nirumbhitvā vātiādīsu ‘‘gaṇhantassā’’ti paccekaṃ yojetabbaṃ. Tattha nirumbhitvā gahaṇaṃ nāma vīhisīsaṃ acchinditvā yathāṭhitameva hatthena gahetvā ākaḍḍhitvā bījamattasseva gahaṇaṃ. Ekamekanti ekamekaṃ vīhisīsaṃ. Uppāṭetvā vāti muggamāsādīni uddharitvā vā. Yasmiṃ bīje vātiādi nirumbhitvā gahaṇādīsu yathākkamaṃ yojetabbaṃ. Sālisīsādīni nirumbhitvā gaṇhantassa yasmiṃ bīje vatthu pūrati, ekamekaṃ hattheneva chinditvā gaṇhantassa yasmiṃ sīse vatthu pūrati, asitena lāyitvā gaṇhantassa yassaṃ muṭṭhiyaṃ vatthu pūrati, bahūni ekato uppāṭetvā gaṇhantassa yasmiṃ muggamāsādiphale vatthu pūratīti evamettha yathākkamo veditabbo. ‘‘Tasmiṃ bandhanā mocitamatte’’ti vacanato tasmiṃ bījādimhi bandhanā mocite sati tato anapanītepi pārājikamevāti daṭṭhabbaṃ. Acchijjamānoti acchinno hutvā ṭhito. Jaṭitānīti chinditāni acchinnehi saddhiṃ jaṭitāni hontīti attho. Sabhusanti palālasahitaṃ. Abhusanti palālarahitaṃ.
கீ²லேனாதி கா²ணுகேன. எத்த² ச கீ²லஸங்கமனாதீ³ஸு உப⁴யங் ஸம்ப⁴வதி ஸஹபயோகோ³ து⁴ரனிக்கே²போ ச. யதா³ ஹி பரஸ்ஸ கெ²த்தாதீ³ஸு ஏகதே³ஸங் கீ²லஸங்கமனாதி³வஸேன அத்தனோ ஸந்தகங் கரோதி, ததா³ ஸதிபி பட²மதரங் ஸாமிகானங் து⁴ரனிக்கே²பே கீ²லஸங்கமனாதி³ஸஹபயோக³ங் வினா ந ஹோதீதி ஸஹபயோகே³னேவ பாராஜிகங். தேனேவ மாதிகாட்ட²கதா²யங் (கங்கா²॰ அட்ட²॰ து³தியபாராஜிகவண்ணனா) வுத்தங் ‘‘டா²னாசாவனவஸேன கீ²லாதீ³னி ஸங்காமெத்வா கெ²த்தாதி³க்³க³ஹணவஸேன ச ஸஹபயோகோ³ வேதி³தப்³போ³’’தி. யதா³ பன அஸதி து⁴ரனிக்கே²பே கீ²லஸங்கமனாதி³மத்தங் கதங், ததா³ வினா து⁴ரனிக்கே²பேன ந ஹோதீதி து⁴ரனிக்கே²பேனேவ பாராஜிகங். தேனேவெத்த² ‘‘தஞ்ச கோ² ஸாமிகானங் து⁴ரனிக்கே²பேனா’’தி வுத்தங். ஏவங் ஸப்³ப³த்தா²தி யதா²வுத்தமத்த²ங் ரஜ்ஜுஸங்கமனாதீ³ஸுபி அதிதி³ஸதி.
Khīlenāti khāṇukena. Ettha ca khīlasaṅkamanādīsu ubhayaṃ sambhavati sahapayogo dhuranikkhepo ca. Yadā hi parassa khettādīsu ekadesaṃ khīlasaṅkamanādivasena attano santakaṃ karoti, tadā satipi paṭhamataraṃ sāmikānaṃ dhuranikkhepe khīlasaṅkamanādisahapayogaṃ vinā na hotīti sahapayogeneva pārājikaṃ. Teneva mātikāṭṭhakathāyaṃ (kaṅkhā. aṭṭha. dutiyapārājikavaṇṇanā) vuttaṃ ‘‘ṭhānācāvanavasena khīlādīni saṅkāmetvā khettādiggahaṇavasena ca sahapayogo veditabbo’’ti. Yadā pana asati dhuranikkhepe khīlasaṅkamanādimattaṃ kataṃ, tadā vinā dhuranikkhepena na hotīti dhuranikkhepeneva pārājikaṃ. Tenevettha ‘‘tañca kho sāmikānaṃ dhuranikkhepenā’’ti vuttaṃ. Evaṃ sabbatthāti yathāvuttamatthaṃ rajjusaṅkamanādīsupi atidisati.
யட்டி²ந்தி மானத³ண்ட³ங். ஏகஸ்மிங் அனாக³தே து²ல்லச்சயங், தஸ்மிங் ஆக³தே பாராஜிகந்தி எத்த² ஸசே தா³ரூனி நிக²ணித்வா தத்தகேனேவ க³ண்ஹிதுகாமோ ஹோதி, அவஸானே தா³ரும்ஹி பாராஜிகங். ஸசே தத்த² ஸாகா²யோபி கத்வா க³ஹேதுகாமோ ஹோதி, அவஸானஸாகா²ய பாராஜிகந்தி வேதி³தப்³ப³ங். தத்தகேன அஸக்கொந்தோதி தா³ரூனி நிக²ணித்வா வதிங் காதுங் அஸக்கொந்தோ. கெ²த்தமரியாத³ந்தி வுத்தமேவத்த²ங் விபா⁴வேதுங் ‘‘கேதா³ரபாளி’’ந்தி வுத்தங். வித்த²தங் கரோதீதி புப்³பே³ விஜ்ஜமானமேவ மரியாத³ங் வித்தி²ண்ணங் கரோதி. அகதங் வா பன பதிட்ட²பேதீதி புப்³பே³ அகதங் வா மரியாத³ங் ட²பேதி.
Yaṭṭhinti mānadaṇḍaṃ. Ekasmiṃ anāgate thullaccayaṃ, tasmiṃ āgate pārājikanti ettha sace dārūni nikhaṇitvā tattakeneva gaṇhitukāmo hoti, avasāne dārumhi pārājikaṃ. Sace tattha sākhāyopi katvā gahetukāmo hoti, avasānasākhāya pārājikanti veditabbaṃ. Tattakena asakkontoti dārūni nikhaṇitvā vatiṃ kātuṃ asakkonto. Khettamariyādanti vuttamevatthaṃ vibhāvetuṃ ‘‘kedārapāḷi’’nti vuttaṃ. Vitthataṃ karotīti pubbe vijjamānameva mariyādaṃ vitthiṇṇaṃ karoti. Akataṃ vā pana patiṭṭhapetīti pubbe akataṃ vā mariyādaṃ ṭhapeti.
கெ²த்தட்ட²கதா²வண்ணனா நிட்டி²தா.
Khettaṭṭhakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. து³தியபாராஜிகங் • 2. Dutiyapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. து³தியபாராஜிகங் • 2. Dutiyapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பூ⁴மட்ட²கதா²தி³வண்ணனா • Bhūmaṭṭhakathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / கெ²த்தட்ட²கதா²வண்ணனா • Khettaṭṭhakathāvaṇṇanā
