| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৭. খেত্তূপমসুত্তং
7. Khettūpamasuttaṃ
৩৫৯. একং সমযং ভগৰা নাল়ন্দাযং ৰিহরতি পাৰারিকম্বৰনে। অথ খো অসিবন্ধকপুত্তো গামণি যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো অসিবন্ধকপুত্তো গামণি ভগৰন্তং এতদৰোচ – ‘‘ননু, ভন্তে, ভগৰা সব্বপাণভূতহিতানুকম্পী ৰিহরতী’’তি? ‘‘এৰং, গামণি, তথাগতো সব্বপাণভূতহিতানুকম্পী ৰিহরতী’’তি। ‘‘অথ কিঞ্চরহি, ভন্তে, ভগৰা একচ্চানং সক্কচ্চং ধম্মং দেসেতি, একচ্চানং নো তথা সক্কচ্চং ধম্মং দেসেতী’’তি? ‘‘তেন হি, গামণি, তঞ্ঞেৰেত্থ পটিপুচ্ছিস্সামি। যথা তে খমেয্য তথা নং ব্যাকরেয্যাসি। তং কিং মঞ্ঞসি, গামণি, ইধস্সু 1 কস্সকস্স গহপতিনো তীণি খেত্তানি – একং খেত্তং অগ্গং, একং খেত্তং মজ্ঝিমং, একং খেত্তং হীনং জঙ্গলং ঊসরং পাপভূমি। তং কিং মঞ্ঞসি, গামণি, অসু কস্সকো গহপতি বীজানি পতিট্ঠাপেতুকামো কত্থ পঠমং পতিট্ঠাপেয্য, যং ৰা অদুং খেত্তং অগ্গং , যং ৰা অদুং খেত্তং মজ্ঝিমং, যং ৰা অদুং খেত্তং হীনং জঙ্গলং ঊসরং পাপভূমী’’তি? ‘‘অসু, ভন্তে, কস্সকো গহপতি বীজানি পতিট্ঠাপেতুকামো যং অদুং খেত্তং অগ্গং তত্থ পতিট্ঠাপেয্য । তত্থ পতিট্ঠাপেত্ৰা যং অদুং খেত্তং মজ্ঝিমং তত্থ পতিট্ঠাপেয্য। তত্থ পতিট্ঠাপেত্ৰা যং অদুং খেত্তং হীনং জঙ্গলং ঊসরং পাপভূমি তত্থ পতিট্ঠাপেয্যপি, নোপি পতিট্ঠাপেয্য। তং কিস্স হেতু? অন্তমসো গোভত্তম্পি ভৰিস্সতী’’তি।
359. Ekaṃ samayaṃ bhagavā nāḷandāyaṃ viharati pāvārikambavane. Atha kho asibandhakaputto gāmaṇi yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho asibandhakaputto gāmaṇi bhagavantaṃ etadavoca – ‘‘nanu, bhante, bhagavā sabbapāṇabhūtahitānukampī viharatī’’ti? ‘‘Evaṃ, gāmaṇi, tathāgato sabbapāṇabhūtahitānukampī viharatī’’ti. ‘‘Atha kiñcarahi, bhante, bhagavā ekaccānaṃ sakkaccaṃ dhammaṃ deseti, ekaccānaṃ no tathā sakkaccaṃ dhammaṃ desetī’’ti? ‘‘Tena hi, gāmaṇi, taññevettha paṭipucchissāmi. Yathā te khameyya tathā naṃ byākareyyāsi. Taṃ kiṃ maññasi, gāmaṇi, idhassu 2 kassakassa gahapatino tīṇi khettāni – ekaṃ khettaṃ aggaṃ, ekaṃ khettaṃ majjhimaṃ, ekaṃ khettaṃ hīnaṃ jaṅgalaṃ ūsaraṃ pāpabhūmi. Taṃ kiṃ maññasi, gāmaṇi, asu kassako gahapati bījāni patiṭṭhāpetukāmo kattha paṭhamaṃ patiṭṭhāpeyya, yaṃ vā aduṃ khettaṃ aggaṃ , yaṃ vā aduṃ khettaṃ majjhimaṃ, yaṃ vā aduṃ khettaṃ hīnaṃ jaṅgalaṃ ūsaraṃ pāpabhūmī’’ti? ‘‘Asu, bhante, kassako gahapati bījāni patiṭṭhāpetukāmo yaṃ aduṃ khettaṃ aggaṃ tattha patiṭṭhāpeyya . Tattha patiṭṭhāpetvā yaṃ aduṃ khettaṃ majjhimaṃ tattha patiṭṭhāpeyya. Tattha patiṭṭhāpetvā yaṃ aduṃ khettaṃ hīnaṃ jaṅgalaṃ ūsaraṃ pāpabhūmi tattha patiṭṭhāpeyyapi, nopi patiṭṭhāpeyya. Taṃ kissa hetu? Antamaso gobhattampi bhavissatī’’ti.
‘‘সেয্যথাপি, গামণি, যং অদুং খেত্তং অগ্গং; এৰমেৰ ময্হং ভিক্খুভিক্খুনিযো। তেসাহং ধম্মং দেসেমি – আদিকল্যাণং মজ্ঝেকল্যাণং পরিযোসানকল্যাণং, সাত্থং সব্যঞ্জনং কেৰলপরিপুণ্ণং পরিসুদ্ধং ব্রহ্মচরিযং পকাসেমি। তং কিস্স হেতু? এতে হি, গামণি, মংদীপা মংলেণা মংতাণা মংসরণা ৰিহরন্তি। সেয্যথাপি, গামণি, যং অদুং খেত্তং মজ্ঝিমং; এৰমেৰ ময্হং উপাসকউপাসিকাযো। তেসং পাহং ধম্মং দেসেমি – আদিকল্যাণং মজ্ঝেকল্যাণং পরিযোসানকল্যাণং, সাত্থং সব্যঞ্জনং কেৰলপরিপুণ্ণং পরিসুদ্ধং ব্রহ্মচরিযং পকাসেমি। তং কিস্স হেতু? এতে হি, গামণি, মংদীপা মংলেণা মংতাণা মংসরণা ৰিহরন্তি। সেয্যথাপি, গামণি, যং অদুং খেত্তং হীনং জঙ্গলং ঊসরং পাপভূমি; এৰমেৰ ময্হং অঞ্ঞতিত্থিযা সমণব্রাহ্মণপরিব্বাজকা । তেসং পাহং ধম্মং দেসেমি – আদিকল্যাণং মজ্ঝেকল্যাণং পরিযোসানকল্যাণং সাত্থং সব্যঞ্জনং, কেৰলপরিপুণ্ণং পরিসুদ্ধং ব্রহ্মচরিযং পকাসেমি। তং কিস্স হেতু? অপ্পেৰ নাম একং পদম্পি আজানেয্যুং তং নেসং অস্স দীঘরত্তং হিতায সুখাযা’’তি।
‘‘Seyyathāpi, gāmaṇi, yaṃ aduṃ khettaṃ aggaṃ; evameva mayhaṃ bhikkhubhikkhuniyo. Tesāhaṃ dhammaṃ desemi – ādikalyāṇaṃ majjhekalyāṇaṃ pariyosānakalyāṇaṃ, sātthaṃ sabyañjanaṃ kevalaparipuṇṇaṃ parisuddhaṃ brahmacariyaṃ pakāsemi. Taṃ kissa hetu? Ete hi, gāmaṇi, maṃdīpā maṃleṇā maṃtāṇā maṃsaraṇā viharanti. Seyyathāpi, gāmaṇi, yaṃ aduṃ khettaṃ majjhimaṃ; evameva mayhaṃ upāsakaupāsikāyo. Tesaṃ pāhaṃ dhammaṃ desemi – ādikalyāṇaṃ majjhekalyāṇaṃ pariyosānakalyāṇaṃ, sātthaṃ sabyañjanaṃ kevalaparipuṇṇaṃ parisuddhaṃ brahmacariyaṃ pakāsemi. Taṃ kissa hetu? Ete hi, gāmaṇi, maṃdīpā maṃleṇā maṃtāṇā maṃsaraṇā viharanti. Seyyathāpi, gāmaṇi, yaṃ aduṃ khettaṃ hīnaṃ jaṅgalaṃ ūsaraṃ pāpabhūmi; evameva mayhaṃ aññatitthiyā samaṇabrāhmaṇaparibbājakā . Tesaṃ pāhaṃ dhammaṃ desemi – ādikalyāṇaṃ majjhekalyāṇaṃ pariyosānakalyāṇaṃ sātthaṃ sabyañjanaṃ, kevalaparipuṇṇaṃ parisuddhaṃ brahmacariyaṃ pakāsemi. Taṃ kissa hetu? Appeva nāma ekaṃ padampi ājāneyyuṃ taṃ nesaṃ assa dīgharattaṃ hitāya sukhāyā’’ti.
‘‘সেয্যথাপি, গামণি, পুরিসস্স তযো উদকমণিকা – একো উদকমণিকো অচ্ছিদ্দো অহারী অপরিহারী, একো উদকমণিকো অচ্ছিদ্দো হারী পরিহারী, একো উদকমণিকো ছিদ্দো হারী পরিহারী। তং কিং মঞ্ঞসি, গামণি, অসু পুরিসো উদকং নিক্খিপিতুকামো কত্থ পঠমং নিক্খিপেয্য, যো ৰা সো উদকমণিকো অচ্ছিদ্দো অহারী অপরিহারী, যো ৰা সো উদকমণিকো অচ্ছিদ্দো হারী পরিহারী, যো ৰা সো উদকমণিকো ছিদ্দো হারী পরিহারী’’তি? ‘‘অসু, ভন্তে, পুরিসো উদকং নিক্খিপিতুকামো, যো সো উদকমণিকো অচ্ছিদ্দো অহারী অপরিহারী তত্থ নিক্খিপেয্য, তত্থ নিক্খিপিত্ৰা, যো সো উদকমণিকো অচ্ছিদ্দো হারী পরিহারী তত্থ নিক্খিপেয্য, তত্থ নিক্খিপিত্ৰা, যো সো উদকমণিকো ছিদ্দো হারী পরিহারী তত্থ নিক্খিপেয্যপি, নোপি নিক্খিপেয্য। তং কিস্স হেতু? অন্তমসো ভণ্ডধোৰনম্পি ভৰিস্সতী’’তি।
‘‘Seyyathāpi, gāmaṇi, purisassa tayo udakamaṇikā – eko udakamaṇiko acchiddo ahārī aparihārī, eko udakamaṇiko acchiddo hārī parihārī, eko udakamaṇiko chiddo hārī parihārī. Taṃ kiṃ maññasi, gāmaṇi, asu puriso udakaṃ nikkhipitukāmo kattha paṭhamaṃ nikkhipeyya, yo vā so udakamaṇiko acchiddo ahārī aparihārī, yo vā so udakamaṇiko acchiddo hārī parihārī, yo vā so udakamaṇiko chiddo hārī parihārī’’ti? ‘‘Asu, bhante, puriso udakaṃ nikkhipitukāmo, yo so udakamaṇiko acchiddo ahārī aparihārī tattha nikkhipeyya, tattha nikkhipitvā, yo so udakamaṇiko acchiddo hārī parihārī tattha nikkhipeyya, tattha nikkhipitvā, yo so udakamaṇiko chiddo hārī parihārī tattha nikkhipeyyapi, nopi nikkhipeyya. Taṃ kissa hetu? Antamaso bhaṇḍadhovanampi bhavissatī’’ti.
‘‘সেয্যথাপি, গামণি, যো সো উদকমণিকো অচ্ছিদ্দো অহারী অপরিহারী; এৰমেৰ ময্হং ভিক্খুভিক্খুনিযো। তেসাহং ধম্মং দেসেমি – আদিকল্যাণং মজ্ঝেকল্যাণং পরিযোসানকল্যাণং সাত্থং সব্যঞ্জনং , কেৰলপরিপুণ্ণং পরিসুদ্ধং ব্রহ্মচরিযং পকাসেমি। তং কিস্স হেতু? এতে হি, গামণি, মংদীপা মংলেণা মংতাণা মংসরণা ৰিহরন্তি। সেয্যথাপি, গামণি, যো সো উদকমণিকো অচ্ছিদ্দো হারী পরিহারী; এৰমেৰ ময্হং উপাসকউপাসিকাযো। তেসাহং ধম্মং দেসেমি – আদিকল্যাণং মজ্ঝেকল্যাণং পরিযোসানকল্যাণং সাত্থং সব্যঞ্জনং, কেৰলপরিপুণ্ণং পরিসুদ্ধং ব্রহ্মচরিযং পকাসেমি। তং কিস্স হেতু? এতে হি, গামণি, মংদীপা মংলেণা মংতাণা মংসরণা ৰিহরন্তি। সেয্যথাপি, গামণি, যো সো উদকমণিকো ছিদ্দো হারী পরিহারী; এৰমেৰ ময্হং অঞ্ঞতিত্থিযা সমণব্রাহ্মণপরিব্বাজকা। তেসাহং ধম্মং দেসেমি – আদিকল্যাণং মজ্ঝেকল্যাণং পরিযোসানকল্যাণং সাত্থং সব্যঞ্জনং কেৰলপরিপুণ্ণং পরিসুদ্ধং ব্রহ্মচরিযং পকাসেমি। তং কিস্স হেতু? অপ্পেৰ নাম একং পদম্পি আজানেয্যুং, তং নেসং অস্স দীঘরত্তং হিতায সুখাযা’’তি। এৰং ৰুত্তে, অসিবন্ধকপুত্তো গামণি ভগৰন্তং এতদৰোচ – ‘‘অভিক্কন্তং, ভন্তে…পে॰… অজ্জতগ্গে পাণুপেতং সরণং গত’’ন্তি। সত্তমং।
‘‘Seyyathāpi, gāmaṇi, yo so udakamaṇiko acchiddo ahārī aparihārī; evameva mayhaṃ bhikkhubhikkhuniyo. Tesāhaṃ dhammaṃ desemi – ādikalyāṇaṃ majjhekalyāṇaṃ pariyosānakalyāṇaṃ sātthaṃ sabyañjanaṃ , kevalaparipuṇṇaṃ parisuddhaṃ brahmacariyaṃ pakāsemi. Taṃ kissa hetu? Ete hi, gāmaṇi, maṃdīpā maṃleṇā maṃtāṇā maṃsaraṇā viharanti. Seyyathāpi, gāmaṇi, yo so udakamaṇiko acchiddo hārī parihārī; evameva mayhaṃ upāsakaupāsikāyo. Tesāhaṃ dhammaṃ desemi – ādikalyāṇaṃ majjhekalyāṇaṃ pariyosānakalyāṇaṃ sātthaṃ sabyañjanaṃ, kevalaparipuṇṇaṃ parisuddhaṃ brahmacariyaṃ pakāsemi. Taṃ kissa hetu? Ete hi, gāmaṇi, maṃdīpā maṃleṇā maṃtāṇā maṃsaraṇā viharanti. Seyyathāpi, gāmaṇi, yo so udakamaṇiko chiddo hārī parihārī; evameva mayhaṃ aññatitthiyā samaṇabrāhmaṇaparibbājakā. Tesāhaṃ dhammaṃ desemi – ādikalyāṇaṃ majjhekalyāṇaṃ pariyosānakalyāṇaṃ sātthaṃ sabyañjanaṃ kevalaparipuṇṇaṃ parisuddhaṃ brahmacariyaṃ pakāsemi. Taṃ kissa hetu? Appeva nāma ekaṃ padampi ājāneyyuṃ, taṃ nesaṃ assa dīgharattaṃ hitāya sukhāyā’’ti. Evaṃ vutte, asibandhakaputto gāmaṇi bhagavantaṃ etadavoca – ‘‘abhikkantaṃ, bhante…pe… ajjatagge pāṇupetaṃ saraṇaṃ gata’’nti. Sattamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৭. খেত্তূপমসুত্তৰণ্ণনা • 7. Khettūpamasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৭. খেত্তূপমসুত্তৰণ্ণনা • 7. Khettūpamasuttavaṇṇanā
