| Library / Tipiṭaka / తిపిటక • Tipiṭaka / సంయుత్తనికాయ (టీకా) • Saṃyuttanikāya (ṭīkā) |
౭. ఖేత్తూపమసుత్తవణ్ణనా
7. Khettūpamasuttavaṇṇanā
౩౫౯. థద్ధన్తి కథినం లూఖం. ఊసరన్తి ఊసజాతం. చతూహిపి ఓఘేహి అనభిభవనీయతాయ అహం దీపో. సబ్బపరిస్సయేహి అనభిభవనీయతాయ అహం లేణో. సబ్బదుక్ఖపరిత్తాసనతో తాయనట్ఠేన అహం తాణం. సబ్బభయహింసనతో అహం సరణన్తి యోజేతబ్బం.
359.Thaddhanti kathinaṃ lūkhaṃ. Ūsaranti ūsajātaṃ. Catūhipi oghehi anabhibhavanīyatāya ahaṃ dīpo. Sabbaparissayehi anabhibhavanīyatāya ahaṃ leṇo. Sabbadukkhaparittāsanato tāyanaṭṭhena ahaṃ tāṇaṃ. Sabbabhayahiṃsanato ahaṃ saraṇanti yojetabbaṃ.
ఉదకమణికోతి మహన్తం ఉదకభాజనం. బహి విస్సన్దనవసేన ఉదకం న హరతీతి అహారీ, పరితో న పగ్ఘరతీతి అపరిహారీ. సక్కచ్చమేవ దేసేన్తి సద్ధమ్మగారవస్స సబ్బసత్తేసు మహాకరుణాయ చ బుద్ధానం సమానరసత్తా. చతస్సో పన పరిసా సత్థుగారవేన అత్తనో చ సద్ధాసమ్పన్నతాయ సద్దహిత్వా ఓకప్పేత్వా సుణన్తి, తస్మా తా దేసనాఫలేన యుజ్జన్తి. కిచ్చసిద్ధియా సత్థు దేసనా తత్థ సక్కచ్చదేసనా నామ జాతా.
Udakamaṇikoti mahantaṃ udakabhājanaṃ. Bahi vissandanavasena udakaṃ na haratīti ahārī, parito na paggharatīti aparihārī. Sakkaccameva desenti saddhammagāravassa sabbasattesu mahākaruṇāya ca buddhānaṃ samānarasattā. Catasso pana parisā satthugāravena attano ca saddhāsampannatāya saddahitvā okappetvā suṇanti, tasmā tā desanāphalena yujjanti. Kiccasiddhiyā satthu desanā tattha sakkaccadesanā nāma jātā.
ఖేత్తూపమసుత్తవణ్ణనా నిట్ఠితా.
Khettūpamasuttavaṇṇanā niṭṭhitā.
Related texts:
తిపిటక (మూల) • Tipiṭaka (Mūla) / సుత్తపిటక • Suttapiṭaka / సంయుత్తనికాయ • Saṃyuttanikāya / ౭. ఖేత్తూపమసుత్తం • 7. Khettūpamasuttaṃ
అట్ఠకథా • Aṭṭhakathā / సుత్తపిటక (అట్ఠకథా) • Suttapiṭaka (aṭṭhakathā) / సంయుత్తనికాయ (అట్ఠకథా) • Saṃyuttanikāya (aṭṭhakathā) / ౭. ఖేత్తూపమసుత్తవణ్ణనా • 7. Khettūpamasuttavaṇṇanā
