| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༣. ཁཱིཎཱསཝསཏིསམྨོསཔཉྷོ
3. Khīṇāsavasatisammosapañho
༣. ‘‘བྷནྟེ ནཱགསེན, ཨཏྠི ཨརཧཏོ སཏིསམྨོསོ’’ཏི? ‘‘ཝིགཏསཏིསམྨོསཱ ཁོ, མཧཱརཱཛ, ཨརཧནྟོ, ནཏྠི ཨརཧནྟཱནཾ སཏིསམྨོསོ’’ཏི། ‘‘ཨཱཔཛྫེཡྻ པན, བྷནྟེ, ཨརཧཱ ཨཱཔཏྟི’’ནྟི? ‘‘ཨཱམ, མཧཱརཱཛཱ’’ཏི། ‘‘ཀིསྨིཾ ཝཏྠུསྨི’’ནྟི? ‘‘ཀུཊིཀཱརེ, མཧཱརཱཛ, སཉྩརིཏྟེ, ཝིཀཱལེ ཀཱལསཉྙཱཡ, པཝཱརིཏེ ཨཔྤཝཱརིཏསཉྙཱཡ, ཨནཏིརིཏྟེ ཨཏིརིཏྟསཉྙཱཡཱ’’ཏི།
3. ‘‘Bhante nāgasena, atthi arahato satisammoso’’ti? ‘‘Vigatasatisammosā kho, mahārāja, arahanto, natthi arahantānaṃ satisammoso’’ti. ‘‘Āpajjeyya pana, bhante, arahā āpatti’’nti? ‘‘Āma, mahārājā’’ti. ‘‘Kismiṃ vatthusmi’’nti? ‘‘Kuṭikāre, mahārāja, sañcaritte, vikāle kālasaññāya, pavārite appavāritasaññāya, anatiritte atirittasaññāyā’’ti.
‘‘བྷནྟེ ནཱགསེན, ཏུམྷེ བྷཎཐ ‘ཡེ ཨཱཔཏྟིཾ ཨཱཔཛྫནྟི, ཏེ དྭཱིཧི ཀཱརཎེཧི ཨཱཔཛྫནྟི ཨནཱདརིཡེན ཝཱ ཨཛཱནནེན ཝཱ’ཏི། ཨཔི ནུ ཁོ, བྷནྟེ, ཨརཧཏོ ཨནཱདརིཡཾ ཧོཏི, ཡཾ ཨརཧཱ ཨཱཔཏྟིཾ ཨཱཔཛྫཏཱི’’ཏི? ‘‘ན ཧི, མཧཱརཱཛཱ’’ཏི།
‘‘Bhante nāgasena, tumhe bhaṇatha ‘ye āpattiṃ āpajjanti, te dvīhi kāraṇehi āpajjanti anādariyena vā ajānanena vā’ti. Api nu kho, bhante, arahato anādariyaṃ hoti, yaṃ arahā āpattiṃ āpajjatī’’ti? ‘‘Na hi, mahārājā’’ti.
‘‘ཡདི, བྷནྟེ ནཱགསེན, ཨརཧཱ ཨཱཔཏྟིཾ ཨཱཔཛྫཏི, ནཏྠི ཙ ཨརཧཏོ ཨནཱདརིཡཾ, ཏེན ཧི ཨཏྠི ཨརཧཏོ སཏིསམྨོསོ’’ཏི? ‘‘ནཏྠི, མཧཱརཱཛ, ཨརཧཏོ སཏིསམྨོསོ, ཨཱཔཏྟིཉྩ ཨརཧཱ ཨཱཔཛྫཏཱི’’ཏི།
‘‘Yadi, bhante nāgasena, arahā āpattiṃ āpajjati, natthi ca arahato anādariyaṃ, tena hi atthi arahato satisammoso’’ti? ‘‘Natthi, mahārāja, arahato satisammoso, āpattiñca arahā āpajjatī’’ti.
‘‘ཏེན ཧི, བྷནྟེ, ཀཱརཎེན མཾ སཉྙཱཔེཧི, ཀིཾ ཏཏྠ ཀཱརཎ’’ནྟི? ‘‘དྭེམེ, མཧཱརཱཛ, ཀིལེསཱ ལོཀཝཛྫཾ པཎྞཏྟིཝཛྫཉྩཱཏི། ཀཏམཾ, མཧཱརཱཛ, ལོཀཝཛྫཾ? དས ཨཀུསལཀམྨཔཐཱ, ཨིདཾ ཝུཙྩཏི ལོཀཝཛྫཾ། ཀཏམཾ པཎྞཏྟིཝཛྫཾ? ཡཾ ལོཀེ ཨཏྠི སམཎཱནཾ ཨནནུཙྪཝིཀཾ ཨནནུལོམིཀཾ, གིཧཱིནཾ ཨནཝཛྫཾ། ཏཏྠ བྷགཝཱ སཱཝཀཱནཾ སིཀྑཱཔདཾ པཉྙཔེཏི ‘ཡཱཝཛཱིཝཾ ཨནཏིཀྐམནཱིཡ’ནྟི། ཝིཀཱལབྷོཛནཾ, མཧཱརཱཛ, ལོཀསྶ ཨནཝཛྫཾ, ཏཾ ཛིནསཱསནེ ཝཛྫཾ། བྷཱུཏགཱམཝིཀོཔནཾ, མཧཱརཱཛ, ལོཀསྶ ཨནཝཛྫཾ, ཏཾ ཛིནསཱསནེ ཝཛྫཾ། ཨུདཀེ ཧསྶདྷམྨཾ, མཧཱརཱཛ, ལོཀསྶ ཨནཝཛྫཾ, ཏཾ ཛིནསཱསནེ ཝཛྫཾ། ཨིཏི ཨེཝརཱུཔཱནི ཨེཝརཱུཔཱནི, མཧཱརཱཛ , ཛིནསཱསནེ ཝཛྫཱནི, ཨིདཾ ཝུཙྩཏི པཎྞཏྟིཝཛྫཾ།
‘‘Tena hi, bhante, kāraṇena maṃ saññāpehi, kiṃ tattha kāraṇa’’nti? ‘‘Dveme, mahārāja, kilesā lokavajjaṃ paṇṇattivajjañcāti. Katamaṃ, mahārāja, lokavajjaṃ? Dasa akusalakammapathā, idaṃ vuccati lokavajjaṃ. Katamaṃ paṇṇattivajjaṃ? Yaṃ loke atthi samaṇānaṃ ananucchavikaṃ ananulomikaṃ, gihīnaṃ anavajjaṃ. Tattha bhagavā sāvakānaṃ sikkhāpadaṃ paññapeti ‘yāvajīvaṃ anatikkamanīya’nti. Vikālabhojanaṃ, mahārāja, lokassa anavajjaṃ, taṃ jinasāsane vajjaṃ. Bhūtagāmavikopanaṃ, mahārāja, lokassa anavajjaṃ, taṃ jinasāsane vajjaṃ. Udake hassadhammaṃ, mahārāja, lokassa anavajjaṃ, taṃ jinasāsane vajjaṃ. Iti evarūpāni evarūpāni, mahārāja , jinasāsane vajjāni, idaṃ vuccati paṇṇattivajjaṃ.
‘‘ལོཀཝཛྫཾ ཨབྷབྦོ ཁཱིཎཱསཝོ ཏཾ ཨཛ྄ཛྷཱཙརིཏུཾ, ཡཾ ཀིལེསཾ པཎྞཏྟིཝཛྫཾ, ཏཾ ཨཛཱནནྟོ ཨཱཔཛྫེཡྻ། ཨཝིསཡོ, མཧཱརཱཛ, ཨེཀཙྩསྶ ཨརཧཏོ སབྦཾ ཛཱནིཏུཾ, ན ཧི ཏསྶ བལཾ ཨཏྠི སབྦཾ ཛཱནིཏུཾ། ཨནཉྙཱཏཾ, མཧཱརཱཛ, ཨརཧཏོ ཨིཏྠིཔུརིསཱནཾ ནཱམམྤི གོཏྟམྤི, མགྒོཔི ཏསྶ མཧིཡཱ ཨནཉྙཱཏོ; ཝིམུཏྟིཾ ཡེཝ, མཧཱརཱཛ, ཨེཀཙྩོ ཨརཧཱ ཛཱནེཡྻ; ཚལ༹བྷིཉྙོ ཨརཧཱ སཀཝིསཡཾ ཛཱནེཡྻ; སབྦཉྙཱུ, མཧཱརཱཛ, ཏཐཱགཏོཝ སབྦཾ ཛཱནཱཏཱི’’ཏི། ‘‘སཱདྷུ, བྷནྟེ ནཱགསེན, ཨེཝམེཏཾ ཏཐཱ སམྤཊིཙྪཱམཱི’’ཏི།
‘‘Lokavajjaṃ abhabbo khīṇāsavo taṃ ajjhācarituṃ, yaṃ kilesaṃ paṇṇattivajjaṃ, taṃ ajānanto āpajjeyya. Avisayo, mahārāja, ekaccassa arahato sabbaṃ jānituṃ, na hi tassa balaṃ atthi sabbaṃ jānituṃ. Anaññātaṃ, mahārāja, arahato itthipurisānaṃ nāmampi gottampi, maggopi tassa mahiyā anaññāto; vimuttiṃ yeva, mahārāja, ekacco arahā jāneyya; chaḷabhiñño arahā sakavisayaṃ jāneyya; sabbaññū, mahārāja, tathāgatova sabbaṃ jānātī’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
ཁཱིཎཱསཝསཏིསམྨོསཔཉྷོ ཏཏིཡོ།
Khīṇāsavasatisammosapañho tatiyo.
