| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
৭-১০. খিপ্পনিসন্তিসুত্তাদিৰণ্ণনা
7-10. Khippanisantisuttādivaṇṇanā
৯৭-১০০. সত্তমে খিপ্পনিসন্তীতি খিপ্পপঞ্ঞো। তেনাহ ‘‘খিপ্পনিসামনো’’তিআদি। অনুরূপধম্মন্তি লোকুত্তরাধিগমস্স অনুচ্ছৰিকসভাৰং। কল্যাণা সুন্দরা পরিমণ্ডলপদব্যঞ্জনা ৰাচা অস্সাতি কল্যাণৰাচো। তেনাহ ‘‘সুন্দরৰচনো’’তি। কল্যাণং মধুরং ৰাক্করণং উদাহারঘোসো অস্সাতি কল্যাণৰাক্করণো। গুণপরিপুণ্ণভাৰেন পূরে পুণ্ণভাৰে ভৰাতি পোরী, তায পোরিযা। তেনাহ ‘‘গুণপরিপুণ্ণাযা’’তি। পুরে ভৰত্তা পোরিযা নাগরিকিত্থিযা সুখুমালত্তনেন সদিসাতি পোরী, তায পোরিযা। ‘‘সুখুমালত্তনেনা’’তি ইমিনা তস্সা ৰাচায মুদুসণ্হভাৰো ৰুত্তো। অপলিবুদ্ধাযাতি পিত্তসেম্হাদীহি ন পলিৰেঠিতায। অদোসাযাতি সন্দিদ্ধৰিলম্বিতাদিদোসরহিতায অগল়িতপদব্যঞ্জনাযাতি অপতিতপদব্যঞ্জনায অৰিরহিতপদব্যঞ্জনায। উভযমেতং অনেলগলাযাতি ইমস্সেৰ অত্থৰচনং। অনেলগলাযাতি হি অনেলায চেৰ অগলায চাতি অত্থো। অত্থং ৰিঞ্ঞাপেতুং সমত্থাযাতি আদিমজ্ঝপরিযোসানং পাকটং কত্ৰা ভাসিতত্থস্স ৰিঞ্ঞাপনসত্থায। অট্ঠমনৰমদসমানি উত্তানত্থানেৰ।
97-100. Sattame khippanisantīti khippapañño. Tenāha ‘‘khippanisāmano’’tiādi. Anurūpadhammanti lokuttarādhigamassa anucchavikasabhāvaṃ. Kalyāṇā sundarā parimaṇḍalapadabyañjanā vācā assāti kalyāṇavāco. Tenāha ‘‘sundaravacano’’ti. Kalyāṇaṃ madhuraṃ vākkaraṇaṃ udāhāraghoso assāti kalyāṇavākkaraṇo. Guṇaparipuṇṇabhāvena pūre puṇṇabhāve bhavāti porī, tāya poriyā. Tenāha ‘‘guṇaparipuṇṇāyā’’ti. Pure bhavattā poriyā nāgarikitthiyā sukhumālattanena sadisāti porī, tāya poriyā. ‘‘Sukhumālattanenā’’ti iminā tassā vācāya mudusaṇhabhāvo vutto. Apalibuddhāyāti pittasemhādīhi na paliveṭhitāya. Adosāyāti sandiddhavilambitādidosarahitāya agaḷitapadabyañjanāyāti apatitapadabyañjanāya avirahitapadabyañjanāya. Ubhayametaṃ anelagalāyāti imasseva atthavacanaṃ. Anelagalāyāti hi anelāya ceva agalāya cāti attho. Atthaṃ viññāpetuṃ samatthāyāti ādimajjhapariyosānaṃ pākaṭaṃ katvā bhāsitatthassa viññāpanasatthāya. Aṭṭhamanavamadasamāni uttānatthāneva.
খিপ্পনিসন্তিসুত্তাদিৰণ্ণনা নিট্ঠিতা।
Khippanisantisuttādivaṇṇanā niṭṭhitā.
অসুরৰগ্গৰণ্ণনা নিট্ঠিতা।
Asuravaggavaṇṇanā niṭṭhitā.
দুতিযপণ্ণাসকং নিট্ঠিতং।
Dutiyapaṇṇāsakaṃ niṭṭhitaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya
৭. খিপ্পনিসন্তিসুত্তং • 7. Khippanisantisuttaṃ
৮. অত্তহিতসুত্তং • 8. Attahitasuttaṃ
৯. সিক্খাপদসুত্তং • 9. Sikkhāpadasuttaṃ
১০. পোতলিযসুত্তং • 10. Potaliyasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā)
৭. খিপ্পনিসন্তিসুত্তৰণ্ণনা • 7. Khippanisantisuttavaṇṇanā
৮. অত্তহিতসুত্তৰণ্ণনা • 8. Attahitasuttavaṇṇanā
১০. পোতলিযসুত্তৰণ্ণনা • 10. Potaliyasuttavaṇṇanā
