| Library / Tipiṭaka / तिपिटक • Tipiṭaka / अङ्गुत्तरनिकाय (टीका) • Aṅguttaranikāya (ṭīkā) |
७-१०. खिप्पनिसन्तिसुत्तादिवण्णना
7-10. Khippanisantisuttādivaṇṇanā
९७-१००. सत्तमे खिप्पनिसन्तीति खिप्पपञ्ञो। तेनाह ‘‘खिप्पनिसामनो’’तिआदि। अनुरूपधम्मन्ति लोकुत्तराधिगमस्स अनुच्छविकसभावं। कल्याणा सुन्दरा परिमण्डलपदब्यञ्जना वाचा अस्साति कल्याणवाचो। तेनाह ‘‘सुन्दरवचनो’’ति। कल्याणं मधुरं वाक्करणं उदाहारघोसो अस्साति कल्याणवाक्करणो। गुणपरिपुण्णभावेन पूरे पुण्णभावे भवाति पोरी, ताय पोरिया। तेनाह ‘‘गुणपरिपुण्णाया’’ति। पुरे भवत्ता पोरिया नागरिकित्थिया सुखुमालत्तनेन सदिसाति पोरी, ताय पोरिया। ‘‘सुखुमालत्तनेना’’ति इमिना तस्सा वाचाय मुदुसण्हभावो वुत्तो। अपलिबुद्धायाति पित्तसेम्हादीहि न पलिवेठिताय। अदोसायाति सन्दिद्धविलम्बितादिदोसरहिताय अगळितपदब्यञ्जनायाति अपतितपदब्यञ्जनाय अविरहितपदब्यञ्जनाय। उभयमेतं अनेलगलायाति इमस्सेव अत्थवचनं। अनेलगलायाति हि अनेलाय चेव अगलाय चाति अत्थो। अत्थं विञ्ञापेतुं समत्थायाति आदिमज्झपरियोसानं पाकटं कत्वा भासितत्थस्स विञ्ञापनसत्थाय। अट्ठमनवमदसमानि उत्तानत्थानेव।
97-100. Sattame khippanisantīti khippapañño. Tenāha ‘‘khippanisāmano’’tiādi. Anurūpadhammanti lokuttarādhigamassa anucchavikasabhāvaṃ. Kalyāṇā sundarā parimaṇḍalapadabyañjanā vācā assāti kalyāṇavāco. Tenāha ‘‘sundaravacano’’ti. Kalyāṇaṃ madhuraṃ vākkaraṇaṃ udāhāraghoso assāti kalyāṇavākkaraṇo. Guṇaparipuṇṇabhāvena pūre puṇṇabhāve bhavāti porī, tāya poriyā. Tenāha ‘‘guṇaparipuṇṇāyā’’ti. Pure bhavattā poriyā nāgarikitthiyā sukhumālattanena sadisāti porī, tāya poriyā. ‘‘Sukhumālattanenā’’ti iminā tassā vācāya mudusaṇhabhāvo vutto. Apalibuddhāyāti pittasemhādīhi na paliveṭhitāya. Adosāyāti sandiddhavilambitādidosarahitāya agaḷitapadabyañjanāyāti apatitapadabyañjanāya avirahitapadabyañjanāya. Ubhayametaṃ anelagalāyāti imasseva atthavacanaṃ. Anelagalāyāti hi anelāya ceva agalāya cāti attho. Atthaṃ viññāpetuṃ samatthāyāti ādimajjhapariyosānaṃ pākaṭaṃ katvā bhāsitatthassa viññāpanasatthāya. Aṭṭhamanavamadasamāni uttānatthāneva.
खिप्पनिसन्तिसुत्तादिवण्णना निट्ठिता।
Khippanisantisuttādivaṇṇanā niṭṭhitā.
असुरवग्गवण्णना निट्ठिता।
Asuravaggavaṇṇanā niṭṭhitā.
दुतियपण्णासकं निट्ठितं।
Dutiyapaṇṇāsakaṃ niṭṭhitaṃ.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / अङ्गुत्तरनिकाय • Aṅguttaranikāya
७. खिप्पनिसन्तिसुत्तं • 7. Khippanisantisuttaṃ
८. अत्तहितसुत्तं • 8. Attahitasuttaṃ
९. सिक्खापदसुत्तं • 9. Sikkhāpadasuttaṃ
१०. पोतलियसुत्तं • 10. Potaliyasuttaṃ
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / अङ्गुत्तरनिकाय (अट्ठकथा) • Aṅguttaranikāya (aṭṭhakathā)
७. खिप्पनिसन्तिसुत्तवण्णना • 7. Khippanisantisuttavaṇṇanā
८. अत्तहितसुत्तवण्णना • 8. Attahitasuttavaṇṇanā
१०. पोतलियसुत्तवण्णना • 10. Potaliyasuttavaṇṇanā
