| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৯. খিপ্পনিসন্তিসুত্তং
9. Khippanisantisuttaṃ
১৬৯. অথ খো আযস্মা আনন্দো যেনাযস্মা সারিপুত্তো তেনুপসঙ্কমি; উপসঙ্কমিত্ৰা আযস্মতা সারিপুত্তেন সদ্ধিং সম্মোদি। সম্মোদনীযং কথং সারণীযং 1 ৰীতিসারেত্ৰা একমন্তং নিসীদি। একমন্তং নিসিন্নো খো আযস্মা আনন্দো আযস্মন্তং সারিপুত্তং এতদৰোচ –
169. Atha kho āyasmā ānando yenāyasmā sāriputto tenupasaṅkami; upasaṅkamitvā āyasmatā sāriputtena saddhiṃ sammodi. Sammodanīyaṃ kathaṃ sāraṇīyaṃ 2 vītisāretvā ekamantaṃ nisīdi. Ekamantaṃ nisinno kho āyasmā ānando āyasmantaṃ sāriputtaṃ etadavoca –
‘‘কিত্তাৰতা নু খো, আৰুসো সারিপুত্ত, ভিক্খু খিপ্পনিসন্তি চ হোতি, কুসলেসু ধম্মেসু সুগ্গহিতগ্গাহী চ, বহুঞ্চ গণ্হাতি, গহিতঞ্চস্স নপ্পমুস্সতী’’তি? ‘‘আযস্মা খো আনন্দো বহুস্সুতো। পটিভাতু আযস্মন্তংযেৰ আনন্দ’’ন্তি। ‘‘তেনহাৰুসো সারিপুত্ত, সুণাহি, সাধুকং মনসি করোহি; ভাসিস্সামী’’তি। ‘‘এৰমাৰুসো’’তি খো আযস্মা সারিপুত্তো আযস্মতো আনন্দস্স পচ্চস্সোসি। আযস্মা আনন্দো এতদৰোচ –
‘‘Kittāvatā nu kho, āvuso sāriputta, bhikkhu khippanisanti ca hoti, kusalesu dhammesu suggahitaggāhī ca, bahuñca gaṇhāti, gahitañcassa nappamussatī’’ti? ‘‘Āyasmā kho ānando bahussuto. Paṭibhātu āyasmantaṃyeva ānanda’’nti. ‘‘Tenahāvuso sāriputta, suṇāhi, sādhukaṃ manasi karohi; bhāsissāmī’’ti. ‘‘Evamāvuso’’ti kho āyasmā sāriputto āyasmato ānandassa paccassosi. Āyasmā ānando etadavoca –
‘‘ইধাৰুসো সারিপুত্ত, ভিক্খু অত্থকুসলো চ হোতি, ধম্মকুসলো চ, ব্যঞ্জনকুসলো চ , নিরুত্তিকুসলো চ, পুব্বাপরকুসলো চ। এত্তাৰতা খো , আৰুসো সারিপুত্ত, ভিক্খু খিপ্পনিসন্তি চ হোতি কুসলেসু ধম্মেসু, সুগ্গহিতগ্গাহী চ, বহুঞ্চ গণ্হাতি, গহিতঞ্চস্স নপ্পমুস্সতী’’তি। ‘‘অচ্ছরিযং, আৰুসো! অব্ভুতং, আৰুসো!! যাৰ সুভাসিতং চিদং আযস্মতা আনন্দেন। ইমেহি চ মযং পঞ্চহি ধম্মেহি সমন্নাগতং আযস্মন্তং আনন্দং ধারেম – ‘আযস্মা আনন্দো অত্থকুসলো ধম্মকুসলো ব্যঞ্জনকুসলো নিরুত্তিকুসলো পুব্বাপরকুসলো’’’তি। নৰমং।
‘‘Idhāvuso sāriputta, bhikkhu atthakusalo ca hoti, dhammakusalo ca, byañjanakusalo ca , niruttikusalo ca, pubbāparakusalo ca. Ettāvatā kho , āvuso sāriputta, bhikkhu khippanisanti ca hoti kusalesu dhammesu, suggahitaggāhī ca, bahuñca gaṇhāti, gahitañcassa nappamussatī’’ti. ‘‘Acchariyaṃ, āvuso! Abbhutaṃ, āvuso!! Yāva subhāsitaṃ cidaṃ āyasmatā ānandena. Imehi ca mayaṃ pañcahi dhammehi samannāgataṃ āyasmantaṃ ānandaṃ dhārema – ‘āyasmā ānando atthakusalo dhammakusalo byañjanakusalo niruttikusalo pubbāparakusalo’’’ti. Navamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৯. খিপ্পনিসন্তিসুত্তৰণ্ণনা • 9. Khippanisantisuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৭-৯. চোদনাসুত্তাদিৰণ্ণনা • 7-9. Codanāsuttādivaṇṇanā
