| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
9. கி²ப்பனிஸந்திஸுத்தவண்ணனா
9. Khippanisantisuttavaṇṇanā
169. நவமே கி²ப்பங் நிஸாமயதி உபதா⁴ரேதீதி கி²ப்பனிஸந்தி. ஸுக்³க³ஹிதங் கத்வா க³ண்ஹாதீதி ஸுக்³க³ஹிதக்³கா³ஹீ. அத்த²குஸலோதி அட்ட²கதா²ய சே²கோ. த⁴ம்மகுஸலோதி பாளியங் சே²கோ. நிருத்திகுஸலோதி நிருத்திவசனேஸு சே²கோ. ப்³யஞ்ஜனகுஸலோதி அக்க²ரப்பபே⁴தே³ சே²கோ. புப்³பா³பரகுஸலோதி அத்த²புப்³பா³பரங், த⁴ம்மபுப்³பா³பரங், அக்க²ரபுப்³பா³பரங், ப்³யஞ்ஜனபுப்³பா³பரங், அனுஸந்தி⁴புப்³பா³பரந்தி இமஸ்மிங் பஞ்சவிதே⁴ புப்³பா³பரே சே²கோ. தத்த² அத்த²புப்³பா³பரகுஸலோதி ஹெட்டா² அத்தே²ன உபரி அத்த²ங் ஜானாதி, உபரி அத்தே²ன ஹெட்டா² அத்த²ங் ஜானாதி. கத²ங்? ஸோ ஹி ஹெட்டா² அத்த²ங் ட²பெத்வா உபரி அத்தே² வுத்தே ‘‘ஹெட்டா² அத்தோ² அத்தீ²’’தி ஜானாதி. உபரி அத்த²ங் ட²பெத்வா ஹெட்டா² அத்தே² வுத்தேபி ‘‘உபரி அத்தோ² அத்தீ²’’தி ஜானாதி. உப⁴தோ ட²பெத்வா மஜ்ஜே² அத்தே² வுத்தே ‘‘உப⁴தோ அத்தோ² அத்தீ²’’தி ஜானாதி. மஜ்ஜே² அத்த²ங் ட²பெத்வா உப⁴தோபா⁴கே³ஸு அத்தே² வுத்தே ‘‘மஜ்ஜே² அத்தோ² அத்தீ²’’தி ஜானாதி. த⁴ம்மபுப்³பா³பராதீ³ஸுபி ஏஸேவ நயோ. அனுஸந்தி⁴புப்³பா³பரே பன ஸீலங் ஆதி³ங் கத்வா ஆரத்³தே⁴ ஸுத்தந்தே மத்த²கே ச²ஸு அபி⁴ஞ்ஞாஸு ஆக³தாஸு ‘‘யதா²னுஸந்தி⁴ங் யதா²னுபரிச்சே²த³ங் ஸுத்தந்தோ க³தோ’’தி ஜானாதி. தி³ட்டி²வஸேன ஆரத்³தே⁴ உபரி ஸச்சேஸு ஆக³தேஸுபி ‘‘யதா²னுஸந்தி⁴னா க³தோ’’தி ஜானாதி. கலஹப⁴ண்ட³னவஸேன ஆரத்³தே⁴ உபரி ஸாரணீயத⁴ம்மேஸு ஆக³தேஸுபி, த்³வத்திங்ஸதிரச்சா²னகதா²வஸேன ஆரத்³தே⁴ உபரி த³ஸகதா²வத்தூ²ஸு (அ॰ நி॰ 10.69; உதா³॰31) ஆக³தேஸுபி ‘‘யதா²னுஸந்தி⁴னா க³தோ’’தி ஜானாதீதி.
169. Navame khippaṃ nisāmayati upadhāretīti khippanisanti. Suggahitaṃ katvā gaṇhātīti suggahitaggāhī. Atthakusaloti aṭṭhakathāya cheko. Dhammakusaloti pāḷiyaṃ cheko. Niruttikusaloti niruttivacanesu cheko. Byañjanakusaloti akkharappabhede cheko. Pubbāparakusaloti atthapubbāparaṃ, dhammapubbāparaṃ, akkharapubbāparaṃ, byañjanapubbāparaṃ, anusandhipubbāparanti imasmiṃ pañcavidhe pubbāpare cheko. Tattha atthapubbāparakusaloti heṭṭhā atthena upari atthaṃ jānāti, upari atthena heṭṭhā atthaṃ jānāti. Kathaṃ? So hi heṭṭhā atthaṃ ṭhapetvā upari atthe vutte ‘‘heṭṭhā attho atthī’’ti jānāti. Upari atthaṃ ṭhapetvā heṭṭhā atthe vuttepi ‘‘upari attho atthī’’ti jānāti. Ubhato ṭhapetvā majjhe atthe vutte ‘‘ubhato attho atthī’’ti jānāti. Majjhe atthaṃ ṭhapetvā ubhatobhāgesu atthe vutte ‘‘majjhe attho atthī’’ti jānāti. Dhammapubbāparādīsupi eseva nayo. Anusandhipubbāpare pana sīlaṃ ādiṃ katvā āraddhe suttante matthake chasu abhiññāsu āgatāsu ‘‘yathānusandhiṃ yathānuparicchedaṃ suttanto gato’’ti jānāti. Diṭṭhivasena āraddhe upari saccesu āgatesupi ‘‘yathānusandhinā gato’’ti jānāti. Kalahabhaṇḍanavasena āraddhe upari sāraṇīyadhammesu āgatesupi, dvattiṃsatiracchānakathāvasena āraddhe upari dasakathāvatthūsu (a. ni. 10.69; udā.31) āgatesupi ‘‘yathānusandhinā gato’’ti jānātīti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 9. கி²ப்பனிஸந்திஸுத்தங் • 9. Khippanisantisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 7-9. சோத³னாஸுத்தாதி³வண்ணனா • 7-9. Codanāsuttādivaṇṇanā
