| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ • Saṃyuttanikāya |
೪. ಖೀರರುಕ್ಖೋಪಮಸುತ್ತಂ
4. Khīrarukkhopamasuttaṃ
೨೩೧. ‘‘ಯಸ್ಸ ಕಸ್ಸಚಿ, ಭಿಕ್ಖವೇ, ಭಿಕ್ಖುಸ್ಸ ವಾ ಭಿಕ್ಖುನಿಯಾ ವಾ ಚಕ್ಖುವಿಞ್ಞೇಯ್ಯೇಸು ರೂಪೇಸು ಯೋ ರಾಗೋ ಸೋ ಅತ್ಥಿ, ಯೋ ದೋಸೋ ಸೋ ಅತ್ಥಿ, ಯೋ ಮೋಹೋ ಸೋ ಅತ್ಥಿ, ಯೋ ರಾಗೋ ಸೋ ಅಪ್ಪಹೀನೋ, ಯೋ ದೋಸೋ ಸೋ ಅಪ್ಪಹೀನೋ, ಯೋ ಮೋಹೋ ಸೋ ಅಪ್ಪಹೀನೋ ತಸ್ಸ ಪರಿತ್ತಾ ಚೇಪಿ ಚಕ್ಖುವಿಞ್ಞೇಯ್ಯಾ ರೂಪಾ ಚಕ್ಖುಸ್ಸ ಆಪಾಥಂ ಆಗಚ್ಛನ್ತಿ ಪರಿಯಾದಿಯನ್ತೇವಸ್ಸ ಚಿತ್ತಂ; ಕೋ ಪನ ವಾದೋ ಅಧಿಮತ್ತಾನಂ! ತಂ ಕಿಸ್ಸ ಹೇತು? ಯೋ, ಭಿಕ್ಖವೇ, ರಾಗೋ, ಸೋ ಅತ್ಥಿ, ಯೋ ದೋಸೋ ಸೋ ಅತ್ಥಿ, ಯೋ ಮೋಹೋ ಸೋ ಅತ್ಥಿ, ಯೋ ರಾಗೋ ಸೋ ಅಪ್ಪಹೀನೋ, ಯೋ ದೋಸೋ ಸೋ ಅಪ್ಪಹೀನೋ, ಯೋ ಮೋಹೋ ಸೋ ಅಪ್ಪಹೀನೋ…ಪೇ॰…।
231. ‘‘Yassa kassaci, bhikkhave, bhikkhussa vā bhikkhuniyā vā cakkhuviññeyyesu rūpesu yo rāgo so atthi, yo doso so atthi, yo moho so atthi, yo rāgo so appahīno, yo doso so appahīno, yo moho so appahīno tassa parittā cepi cakkhuviññeyyā rūpā cakkhussa āpāthaṃ āgacchanti pariyādiyantevassa cittaṃ; ko pana vādo adhimattānaṃ! Taṃ kissa hetu? Yo, bhikkhave, rāgo, so atthi, yo doso so atthi, yo moho so atthi, yo rāgo so appahīno, yo doso so appahīno, yo moho so appahīno…pe….
‘‘ಯಸ್ಸ ಕಸ್ಸಚಿ, ಭಿಕ್ಖವೇ, ಭಿಕ್ಖುಸ್ಸ ವಾ ಭಿಕ್ಖುನಿಯಾ ವಾ ಜಿವ್ಹಾವಿಞ್ಞೇಯ್ಯೇಸು ರಸೇಸು ಯೋ ರಾಗೋ ಸೋ ಅತ್ಥಿ…ಪೇ॰…।
‘‘Yassa kassaci, bhikkhave, bhikkhussa vā bhikkhuniyā vā jivhāviññeyyesu rasesu yo rāgo so atthi…pe….
‘‘ಯಸ್ಸ ಕಸ್ಸಚಿ, ಭಿಕ್ಖವೇ, ಭಿಕ್ಖುಸ್ಸ ವಾ ಭಿಕ್ಖುನಿಯಾ ವಾ ಮನೋವಿಞ್ಞೇಯ್ಯೇಸು ಧಮ್ಮೇಸು ಯೋ ರಾಗೋ ಸೋ ಅತ್ಥಿ, ಯೋ ದೋಸೋ ಸೋ ಅತ್ಥಿ, ಯೋ ಮೋಹೋ ಸೋ ಅತ್ಥಿ, ಯೋ ರಾಗೋ ಸೋ ಅಪ್ಪಹೀನೋ, ಯೋ ದೋಸೋ ಸೋ ಅಪ್ಪಹೀನೋ, ಯೋ ಮೋಹೋ ಸೋ ಅಪ್ಪಹೀನೋ, ತಸ್ಸ ಪರಿತ್ತಾ ಚೇಪಿ ಮನೋವಿಞ್ಞೇಯ್ಯಾ ಧಮ್ಮಾ ಮನಸ್ಸ ಆಪಾಥಂ ಆಗಚ್ಛನ್ತಿ ಪರಿಯಾದಿಯನ್ತೇವಸ್ಸ ಚಿತ್ತಂ; ಕೋ ಪನ ವಾದೋ ಅಧಿಮತ್ತಾನಂ! ತಂ ಕಿಸ್ಸ ಹೇತು? ಯೋ, ಭಿಕ್ಖವೇ, ರಾಗೋ, ಸೋ ಅತ್ಥಿ, ಯೋ ದೋಸೋ ಸೋ ಅತ್ಥಿ, ಯೋ ಮೋಹೋ ಸೋ ಅತ್ಥಿ, ಯೋ ರಾಗೋ ಸೋ ಅಪ್ಪಹೀನೋ, ಯೋ ದೋಸೋ ಸೋ ಅಪ್ಪಹೀನೋ, ಯೋ ಮೋಹೋ ಸೋ ಅಪ್ಪಹೀನೋ।
‘‘Yassa kassaci, bhikkhave, bhikkhussa vā bhikkhuniyā vā manoviññeyyesu dhammesu yo rāgo so atthi, yo doso so atthi, yo moho so atthi, yo rāgo so appahīno, yo doso so appahīno, yo moho so appahīno, tassa parittā cepi manoviññeyyā dhammā manassa āpāthaṃ āgacchanti pariyādiyantevassa cittaṃ; ko pana vādo adhimattānaṃ! Taṃ kissa hetu? Yo, bhikkhave, rāgo, so atthi, yo doso so atthi, yo moho so atthi, yo rāgo so appahīno, yo doso so appahīno, yo moho so appahīno.
‘‘ಸೇಯ್ಯಥಾಪಿ , ಭಿಕ್ಖವೇ, ಖೀರರುಕ್ಖೋ ಅಸ್ಸತ್ಥೋ ವಾ ನಿಗ್ರೋಧೋ ವಾ ಪಿಲಕ್ಖೋ ವಾ ಉದುಮ್ಬರೋ ವಾ ದಹರೋ ತರುಣೋ ಕೋಮಾರಕೋ। ತಮೇನಂ ಪುರಿಸೋ ತಿಣ್ಹಾಯ ಕುಠಾರಿಯಾ ಯತೋ ಯತೋ ಆಭಿನ್ದೇಯ್ಯ 1 ಆಗಚ್ಛೇಯ್ಯ ಖೀರ’’ನ್ತಿ? ‘‘ಏವಂ, ಭನ್ತೇ’’। ‘‘ತಂ ಕಿಸ್ಸ ಹೇತು’’? ‘‘ಯಞ್ಹಿ, ಭನ್ತೇ, ಖೀರಂ ತಂ ಅತ್ಥೀ’’ತಿ।
‘‘Seyyathāpi , bhikkhave, khīrarukkho assattho vā nigrodho vā pilakkho vā udumbaro vā daharo taruṇo komārako. Tamenaṃ puriso tiṇhāya kuṭhāriyā yato yato ābhindeyya 2 āgaccheyya khīra’’nti? ‘‘Evaṃ, bhante’’. ‘‘Taṃ kissa hetu’’? ‘‘Yañhi, bhante, khīraṃ taṃ atthī’’ti.
‘‘ಏವಮೇವ ಖೋ, ಭಿಕ್ಖವೇ, ಯಸ್ಸ ಕಸ್ಸಚಿ ಭಿಕ್ಖುಸ್ಸ ವಾ ಭಿಕ್ಖುನಿಯಾ ವಾ ಚಕ್ಖುವಿಞ್ಞೇಯ್ಯೇಸು ರೂಪೇಸು ಯೋ ರಾಗೋ ಸೋ ಅತ್ಥಿ, ಯೋ ದೋಸೋ ಸೋ ಅತ್ಥಿ, ಯೋ ಮೋಹೋ ಸೋ ಅತ್ಥಿ, ಯೋ ರಾಗೋ ಸೋ ಅಪ್ಪಹೀನೋ, ಯೋ ದೋಸೋ ಸೋ ಅಪ್ಪಹೀನೋ, ಯೋ ಮೋಹೋ ಸೋ ಅಪ್ಪಹೀನೋ, ತಸ್ಸ ಪರಿತ್ತಾ ಚೇಪಿ ಚಕ್ಖುವಿಞ್ಞೇಯ್ಯಾ ರೂಪಾ ಚಕ್ಖುಸ್ಸ ಆಪಾಥಂ ಆಗಚ್ಛನ್ತಿ ಪರಿಯಾದಿಯನ್ತೇವಸ್ಸ ಚಿತ್ತಂ; ಕೋ ಪನ ವಾದೋ ಅಧಿಮತ್ತಾನಂ! ತಂ ಕಿಸ್ಸ ಹೇತು? ಯೋ, ಭಿಕ್ಖವೇ, ರಾಗೋ ಸೋ ಅತ್ಥಿ, ಯೋ ದೋಸೋ ಸೋ ಅತ್ಥಿ , ಯೋ ಮೋಹೋ ಸೋ ಅತ್ಥಿ, ಯೋ ರಾಗೋ ಸೋ ಅಪ್ಪಹೀನೋ, ಯೋ ದೋಸೋ ಸೋ ಅಪ್ಪಹೀನೋ, ಯೋ ಮೋಹೋ ಸೋ ಅಪ್ಪಹೀನೋ…ಪೇ॰…।
‘‘Evameva kho, bhikkhave, yassa kassaci bhikkhussa vā bhikkhuniyā vā cakkhuviññeyyesu rūpesu yo rāgo so atthi, yo doso so atthi, yo moho so atthi, yo rāgo so appahīno, yo doso so appahīno, yo moho so appahīno, tassa parittā cepi cakkhuviññeyyā rūpā cakkhussa āpāthaṃ āgacchanti pariyādiyantevassa cittaṃ; ko pana vādo adhimattānaṃ! Taṃ kissa hetu? Yo, bhikkhave, rāgo so atthi, yo doso so atthi , yo moho so atthi, yo rāgo so appahīno, yo doso so appahīno, yo moho so appahīno…pe….
‘‘ಯಸ್ಸ ಕಸ್ಸಚಿ, ಭಿಕ್ಖವೇ, ಭಿಕ್ಖುಸ್ಸ ವಾ ಭಿಕ್ಖುನಿಯಾ ವಾ ಜಿವ್ಹಾವಿಞ್ಞೇಯ್ಯೇಸು ರಸೇಸು ಯೋ ರಾಗೋ ಸೋ ಅತ್ಥಿ…ಪೇ॰…।
‘‘Yassa kassaci, bhikkhave, bhikkhussa vā bhikkhuniyā vā jivhāviññeyyesu rasesu yo rāgo so atthi…pe….
‘‘ಯಸ್ಸ ಕಸ್ಸಚಿ, ಭಿಕ್ಖವೇ, ಭಿಕ್ಖುಸ್ಸ ವಾ ಭಿಕ್ಖುನಿಯಾ ವಾ ಮನೋವಿಞ್ಞೇಯ್ಯೇಸು ಧಮ್ಮೇಸು ಯೋ ರಾಗೋ ಸೋ ಅತ್ಥಿ, ಯೋ ದೋಸೋ ಸೋ ಅತ್ಥಿ, ಯೋ ಮೋಹೋ ಸೋ ಅತ್ಥಿ, ಯೋ ರಾಗೋ ಸೋ ಅಪ್ಪಹೀನೋ, ಯೋ ದೋಸೋ ಸೋ ಅಪ್ಪಹೀನೋ, ಯೋ ಮೋಹೋ ಸೋ ಅಪ್ಪಹೀನೋ, ತಸ್ಸ ಪರಿತ್ತಾ ಚೇಪಿ ಮನೋವಿಞ್ಞೇಯ್ಯಾ ಧಮ್ಮಾ ಮನಸ್ಸ ಆಪಾಥಂ ಆಗಚ್ಛನ್ತಿ ಪರಿಯಾದಿಯನ್ತೇವಸ್ಸ ಚಿತ್ತಂ; ಕೋ ಪನ ವಾದೋ ಅಧಿಮತ್ತಾನಂ! ತಂ ಕಿಸ್ಸ ಹೇತು? ಯೋ, ಭಿಕ್ಖವೇ, ರಾಗೋ ಸೋ ಅತ್ಥಿ, ಯೋ ದೋಸೋ ಸೋ ಅತ್ಥಿ, ಯೋ ಮೋಹೋ ಸೋ ಅತ್ಥಿ, ಯೋ ರಾಗೋ ಸೋ ಅಪ್ಪಹೀನೋ, ಯೋ ದೋಸೋ ಸೋ ಅಪ್ಪಹೀನೋ, ಯೋ ಮೋಹೋ ಸೋ ಅಪ್ಪಹೀನೋ।
‘‘Yassa kassaci, bhikkhave, bhikkhussa vā bhikkhuniyā vā manoviññeyyesu dhammesu yo rāgo so atthi, yo doso so atthi, yo moho so atthi, yo rāgo so appahīno, yo doso so appahīno, yo moho so appahīno, tassa parittā cepi manoviññeyyā dhammā manassa āpāthaṃ āgacchanti pariyādiyantevassa cittaṃ; ko pana vādo adhimattānaṃ! Taṃ kissa hetu? Yo, bhikkhave, rāgo so atthi, yo doso so atthi, yo moho so atthi, yo rāgo so appahīno, yo doso so appahīno, yo moho so appahīno.
‘‘ಯಸ್ಸ ಕಸ್ಸಚಿ, ಭಿಕ್ಖವೇ, ಭಿಕ್ಖುಸ್ಸ ವಾ ಭಿಕ್ಖುನಿಯಾ ವಾ ಚಕ್ಖುವಿಞ್ಞೇಯ್ಯೇಸು ರೂಪೇಸು ಯೋ ರಾಗೋ ಸೋ ನತ್ಥಿ, ಯೋ ದೋಸೋ ಸೋ ನತ್ಥಿ, ಯೋ ಮೋಹೋ ಸೋ ನತ್ಥಿ, ಯೋ ರಾಗೋ ಸೋ ಪಹೀನೋ, ಯೋ ದೋಸೋ ಸೋ ಪಹೀನೋ, ಯೋ ಮೋಹೋ ಸೋ ಪಹೀನೋ, ತಸ್ಸ ಅಧಿಮತ್ತಾ ಚೇಪಿ ಚಕ್ಖುವಿಞ್ಞೇಯ್ಯಾ ರೂಪಾ ಚಕ್ಖುಸ್ಸ ಆಪಾಥಂ ಆಗಚ್ಛನ್ತಿ ನೇವಸ್ಸ ಚಿತ್ತಂ ಪರಿಯಾದಿಯನ್ತಿ; ಕೋ ಪನ ವಾದೋ ಪರಿತ್ತಾನಂ! ತಂ ಕಿಸ್ಸ ಹೇತು? ಯೋ, ಭಿಕ್ಖವೇ, ರಾಗೋ ಸೋ ನತ್ಥಿ, ಯೋ ದೋಸೋ ಸೋ ನತ್ಥಿ, ಯೋ ಮೋಹೋ ಸೋ ನತ್ಥಿ, ಯೋ ರಾಗೋ ಸೋ ಪಹೀನೋ, ಯೋ ದೋಸೋ ಸೋ ಪಹೀನೋ, ಯೋ ಮೋಹೋ ಸೋ ಪಹೀನೋ…ಪೇ॰…।
‘‘Yassa kassaci, bhikkhave, bhikkhussa vā bhikkhuniyā vā cakkhuviññeyyesu rūpesu yo rāgo so natthi, yo doso so natthi, yo moho so natthi, yo rāgo so pahīno, yo doso so pahīno, yo moho so pahīno, tassa adhimattā cepi cakkhuviññeyyā rūpā cakkhussa āpāthaṃ āgacchanti nevassa cittaṃ pariyādiyanti; ko pana vādo parittānaṃ! Taṃ kissa hetu? Yo, bhikkhave, rāgo so natthi, yo doso so natthi, yo moho so natthi, yo rāgo so pahīno, yo doso so pahīno, yo moho so pahīno…pe….
‘‘ಯಸ್ಸ ಕಸ್ಸಚಿ, ಭಿಕ್ಖವೇ, ಭಿಕ್ಖುಸ್ಸ ವಾ ಭಿಕ್ಖುನಿಯಾ ವಾ ಜಿವ್ಹಾವಿಞ್ಞೇಯ್ಯೇಸು ರಸೇಸು…ಪೇ॰… ಮನೋವಿಞ್ಞೇಯ್ಯೇಸು ಧಮ್ಮೇಸು ಯೋ ರಾಗೋ ಸೋ ನತ್ಥಿ, ಯೋ ದೋಸೋ ಸೋ ನತ್ಥಿ, ಯೋ ಮೋಹೋ ಸೋ ನತ್ಥಿ, ಯೋ ರಾಗೋ ಸೋ ಪಹೀನೋ, ಯೋ ದೋಸೋ ಸೋ ಪಹೀನೋ, ಯೋ ಮೋಹೋ ಸೋ ಪಹೀನೋ, ತಸ್ಸ ಅಧಿಮತ್ತಾ ಚೇಪಿ ಮನೋವಿಞ್ಞೇಯ್ಯಾ ಧಮ್ಮಾ ಮನಸ್ಸ ಆಪಾಥಂ ಆಗಚ್ಛನ್ತಿ ನೇವಸ್ಸ ಚಿತ್ತಂ ಪರಿಯಾದಿಯನ್ತಿ; ಕೋ ಪನ ವಾದೋ ಪರಿತ್ತಾನಂ! ತಂ ಕಿಸ್ಸ ಹೇತು? ಯೋ, ಭಿಕ್ಖವೇ, ರಾಗೋ ಸೋ ನತ್ಥಿ, ಯೋ ದೋಸೋ ಸೋ ನತ್ಥಿ, ಯೋ ಮೋಹೋ ಸೋ ನತ್ಥಿ, ಯೋ ರಾಗೋ ಸೋ ಪಹೀನೋ, ಯೋ ದೋಸೋ ಸೋ ಪಹೀನೋ, ಯೋ ಮೋಹೋ ಸೋ ಪಹೀನೋ। ಸೇಯ್ಯಥಾಪಿ , ಭಿಕ್ಖವೇ, ಖೀರರುಕ್ಖೋ ಅಸ್ಸತ್ಥೋ ವಾ ನಿಗ್ರೋಧೋ ವಾ ಪಿಲಕ್ಖೋ ವಾ ಉದುಮ್ಬರೋ ವಾ ಸುಕ್ಖೋ ಕೋಲಾಪೋ ತೇರೋವಸ್ಸಿಕೋ। ತಮೇನಂ ಪುರಿಸೋ ತಿಣ್ಹಾಯ ಕುಠಾರಿಯಾ ಯತೋ ಯತೋ ಆಭಿನ್ದೇಯ್ಯ ಆಗಚ್ಛೇಯ್ಯ ಖೀರ’’ನ್ತಿ? ‘‘ನೋ ಹೇತಂ, ಭನ್ತೇ’’। ‘‘ತಂ ಕಿಸ್ಸ ಹೇತು’’? ‘‘ಯಞ್ಹಿ, ಭನ್ತೇ, ಖೀರಂ ತಂ ನತ್ಥೀ’’ತಿ।
‘‘Yassa kassaci, bhikkhave, bhikkhussa vā bhikkhuniyā vā jivhāviññeyyesu rasesu…pe… manoviññeyyesu dhammesu yo rāgo so natthi, yo doso so natthi, yo moho so natthi, yo rāgo so pahīno, yo doso so pahīno, yo moho so pahīno, tassa adhimattā cepi manoviññeyyā dhammā manassa āpāthaṃ āgacchanti nevassa cittaṃ pariyādiyanti; ko pana vādo parittānaṃ! Taṃ kissa hetu? Yo, bhikkhave, rāgo so natthi, yo doso so natthi, yo moho so natthi, yo rāgo so pahīno, yo doso so pahīno, yo moho so pahīno. Seyyathāpi , bhikkhave, khīrarukkho assattho vā nigrodho vā pilakkho vā udumbaro vā sukkho kolāpo terovassiko. Tamenaṃ puriso tiṇhāya kuṭhāriyā yato yato ābhindeyya āgaccheyya khīra’’nti? ‘‘No hetaṃ, bhante’’. ‘‘Taṃ kissa hetu’’? ‘‘Yañhi, bhante, khīraṃ taṃ natthī’’ti.
‘‘ಏವಮೇವ ಖೋ, ಭಿಕ್ಖವೇ, ಯಸ್ಸ ಕಸ್ಸಚಿ ಭಿಕ್ಖುಸ್ಸ ವಾ ಭಿಕ್ಖುನಿಯಾ ವಾ ಚಕ್ಖುವಿಞ್ಞೇಯ್ಯೇಸು ರೂಪೇಸು ಯೋ ರಾಗೋ ಸೋ ನತ್ಥಿ, ಯೋ ದೋಸೋ ಸೋ ನತ್ಥಿ, ಯೋ ಮೋಹೋ ಸೋ ನತ್ಥಿ, ಯೋ ರಾಗೋ ಸೋ ಪಹೀನೋ, ಯೋ ದೋಸೋ ಸೋ ಪಹೀನೋ, ಯೋ ಮೋಹೋ ಸೋ ಪಹೀನೋ, ತಸ್ಸ ಅಧಿಮತ್ತಾ ಚೇಪಿ ಚಕ್ಖುವಿಞ್ಞೇಯ್ಯಾ ರೂಪಾ ಚಕ್ಖುಸ್ಸ ಆಪಾಥಂ ಆಗಚ್ಛನ್ತಿ ನೇವಸ್ಸ ಚಿತ್ತಂ ಪರಿಯಾದಿಯನ್ತಿ; ಕೋ ಪನ ವಾದೋ ಪರಿತ್ತಾನಂ! ತಂ ಕಿಸ್ಸ ಹೇತು? ಯೋ, ಭಿಕ್ಖವೇ, ರಾಗೋ ಸೋ ನತ್ಥಿ, ಯೋ ದೋಸೋ ಸೋ ನತ್ಥಿ, ಯೋ ಮೋಹೋ ಸೋ ನತ್ಥಿ, ಯೋ ರಾಗೋ ಸೋ ಪಹೀನೋ, ಯೋ ದೋಸೋ ಸೋ ಪಹೀನೋ, ಯೋ ಮೋಹೋ ಸೋ ಪಹೀನೋ…ಪೇ॰…।
‘‘Evameva kho, bhikkhave, yassa kassaci bhikkhussa vā bhikkhuniyā vā cakkhuviññeyyesu rūpesu yo rāgo so natthi, yo doso so natthi, yo moho so natthi, yo rāgo so pahīno, yo doso so pahīno, yo moho so pahīno, tassa adhimattā cepi cakkhuviññeyyā rūpā cakkhussa āpāthaṃ āgacchanti nevassa cittaṃ pariyādiyanti; ko pana vādo parittānaṃ! Taṃ kissa hetu? Yo, bhikkhave, rāgo so natthi, yo doso so natthi, yo moho so natthi, yo rāgo so pahīno, yo doso so pahīno, yo moho so pahīno…pe….
‘‘ಯಸ್ಸ ಕಸ್ಸಚಿ, ಭಿಕ್ಖವೇ, ಭಿಕ್ಖುಸ್ಸ ವಾ ಭಿಕ್ಖುನಿಯಾ ವಾ ಜಿವ್ಹಾವಿಞ್ಞೇಯ್ಯೇಸು ರಸೇಸು…ಪೇ॰…।
‘‘Yassa kassaci, bhikkhave, bhikkhussa vā bhikkhuniyā vā jivhāviññeyyesu rasesu…pe….
‘‘ಯಸ್ಸ ಕಸ್ಸಚಿ, ಭಿಕ್ಖವೇ, ಭಿಕ್ಖುಸ್ಸ ವಾ ಭಿಕ್ಖುನಿಯಾ ವಾ ಮನೋವಿಞ್ಞೇಯ್ಯೇಸು ಧಮ್ಮೇಸು ಯೋ ರಾಗೋ ಸೋ ನತ್ಥಿ, ಯೋ ದೋಸೋ ಸೋ ನತ್ಥಿ, ಯೋ ಮೋಹೋ ಸೋ ನತ್ಥಿ, ಯೋ ರಾಗೋ ಸೋ ಪಹೀನೋ, ಯೋ ದೋಸೋ ಸೋ ಪಹೀನೋ, ಯೋ ಮೋಹೋ ಸೋ ಪಹೀನೋ, ತಸ್ಸ ಅಧಿಮತ್ತಾ ಚೇಪಿ ಮನೋವಿಞ್ಞೇಯ್ಯಾ ಧಮ್ಮಾ ಮನಸ್ಸ ಆಪಾಥಂ ಆಗಚ್ಛನ್ತಿ, ನೇವಸ್ಸ ಚಿತ್ತಂ ಪರಿಯಾದಿಯನ್ತಿ; ಕೋ ಪನ ವಾದೋ ಪರಿತ್ತಾನಂ! ತಂ ಕಿಸ್ಸ ಹೇತು? ಯೋ, ಭಿಕ್ಖವೇ, ರಾಗೋ ಸೋ ನತ್ಥಿ , ಯೋ ದೋಸೋ ಸೋ ನತ್ಥಿ, ಯೋ ಮೋಹೋ ಸೋ ನತ್ಥಿ, ಯೋ ರಾಗೋ ಸೋ ಪಹೀನೋ, ಯೋ ದೋಸೋ ಸೋ ಪಹೀನೋ, ಯೋ ಮೋಹೋ ಸೋ ಪಹೀನೋ’’ತಿ। ಚತುತ್ಥಂ।
‘‘Yassa kassaci, bhikkhave, bhikkhussa vā bhikkhuniyā vā manoviññeyyesu dhammesu yo rāgo so natthi, yo doso so natthi, yo moho so natthi, yo rāgo so pahīno, yo doso so pahīno, yo moho so pahīno, tassa adhimattā cepi manoviññeyyā dhammā manassa āpāthaṃ āgacchanti, nevassa cittaṃ pariyādiyanti; ko pana vādo parittānaṃ! Taṃ kissa hetu? Yo, bhikkhave, rāgo so natthi , yo doso so natthi, yo moho so natthi, yo rāgo so pahīno, yo doso so pahīno, yo moho so pahīno’’ti. Catutthaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೪-೬. ಖೀರರುಕ್ಖೋಪಮಸುತ್ತಾದಿವಣ್ಣನಾ • 4-6. Khīrarukkhopamasuttādivaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೪-೬. ಖೀರರುಕ್ಖೋಪಮಸುತ್ತಾದಿವಣ್ಣನಾ • 4-6. Khīrarukkhopamasuttādivaṇṇanā
