| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
১০. খোমদাযকত্থেরঅপদানৰণ্ণনা
10. Khomadāyakattheraapadānavaṇṇanā
নগরে বন্ধুমতিযাতিআদিকং আযস্মতো খোমদাযকত্থেরস্স অপদানং। অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো ৰিপস্সিস্স ভগৰতো কালে একস্মিং কুলগেহে নিব্বত্তো ৰযপ্পত্তো সাসনে অভিপ্পসন্নো রতনত্তযমামকো ৰিপস্সিস্স ভগৰতো সন্তিকে ধম্মং সুত্ৰা পসন্নমানসো খোমদুস্সেন পূজং অকাসি। সো তদেৰ মূলং কত্ৰা যাৰজীৰং পুঞ্ঞানি কত্ৰা ততো দেৰলোকে নিব্বত্তো। ছসু দেৰেসু অপরাপরং দিব্বসুখং অনুভৰিত্ৰা ততো চৰিত্ৰা মনুস্সলোকে চক্কৰত্তিআদিঅনেকৰিধমনুস্সসম্পত্তিং অনুভৰিত্ৰা পরিপাকগতে পুঞ্ঞসম্ভারে ইমস্মিং বুদ্ধুপ্পাদে কুলগেহে নিব্বত্তো ৰযপ্পত্তো সত্থু সন্তিকে ধম্মং সুত্ৰা পটিলদ্ধসদ্ধো পব্বজিত্ৰা ৰিপস্সনং ৰড্ঢেত্ৰা নচিরস্সেৰ অরহত্তং পাপুণি। কতপুঞ্ঞনামেন খোমদাযকত্থেরোতি পাকটো।
Nagare bandhumatiyātiādikaṃ āyasmato khomadāyakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle ekasmiṃ kulagehe nibbatto vayappatto sāsane abhippasanno ratanattayamāmako vipassissa bhagavato santike dhammaṃ sutvā pasannamānaso khomadussena pūjaṃ akāsi. So tadeva mūlaṃ katvā yāvajīvaṃ puññāni katvā tato devaloke nibbatto. Chasu devesu aparāparaṃ dibbasukhaṃ anubhavitvā tato cavitvā manussaloke cakkavattiādianekavidhamanussasampattiṃ anubhavitvā paripākagate puññasambhāre imasmiṃ buddhuppāde kulagehe nibbatto vayappatto satthu santike dhammaṃ sutvā paṭiladdhasaddho pabbajitvā vipassanaṃ vaḍḍhetvā nacirasseva arahattaṃ pāpuṇi. Katapuññanāmena khomadāyakattheroti pākaṭo.
১৮৪. সো অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং দস্সেন্তো নগরে বন্ধুমতিযাতিআদিমাহ। তত্থ বন্ধু ৰুচ্চতি ঞাতকো, তে বন্ধূ যস্মিং নগরে অঞ্ঞমঞ্ঞং সঙ্ঘটিতা ৰসন্তি, তং নগরং ‘‘বন্ধুমতী’’তি ৰুচ্চতি। রোপেমি বীজসম্পদন্তি দানসীলাদিপুঞ্ঞবীজসম্পত্তিং রোপেমি পট্ঠপেমীতি অত্থো।
184. So attano pubbakammaṃ saritvā somanassajāto pubbacaritāpadānaṃ dassento nagare bandhumatiyātiādimāha. Tattha bandhu vuccati ñātako, te bandhū yasmiṃ nagare aññamaññaṃ saṅghaṭitā vasanti, taṃ nagaraṃ ‘‘bandhumatī’’ti vuccati. Ropemi bījasampadanti dānasīlādipuññabījasampattiṃ ropemi paṭṭhapemīti attho.
খোমদাযকত্থেরঅপদানৰণ্ণনা সমত্তা।
Khomadāyakattheraapadānavaṇṇanā samattā.
ততিযস্স সুভূতিৰগ্গস্স ৰণ্ণনা সমত্তা।
Tatiyassa subhūtivaggassa vaṇṇanā samattā.
চতুভাণৰারৰণ্ণনা নিট্ঠিতা।
Catubhāṇavāravaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ১০. খোমদাযকত্থেরঅপদানং • 10. Khomadāyakattheraapadānaṃ
