| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၁၀. ခောမဒာယကတ္ထေရအပဒာနဝဏ္ဏနာ
10. Khomadāyakattheraapadānavaṇṇanā
နဂရေ ဗန္ဓုမတိယာတိအာဒိကံ အာယသ္မတော ခောမဒာယကတ္ထေရသ္သ အပဒာနံ။ အယမ္ပိ ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေ ဝိဝဋ္ဋူပနိသ္သယာနိ ပုညာနိ ဥပစိနန္တော ဝိပသ္သိသ္သ ဘဂဝတော ကာလေ ဧကသ္မိံ ကုလဂေဟေ နိဗ္ဗတ္တော ဝယပ္ပတ္တော သာသနေ အဘိပ္ပသန္နော ရတနတ္တယမာမကော ဝိပသ္သိသ္သ ဘဂဝတော သန္တိကေ ဓမ္မံ သုတ္ဝာ ပသန္နမာနသော ခောမဒုသ္သေန ပူဇံ အကာသိ။ သော တဒေဝ မူလံ ကတ္ဝာ ယာဝဇီဝံ ပုညာနိ ကတ္ဝာ တတော ဒေဝလောကေ နိဗ္ဗတ္တော။ ဆသု ဒေဝေသု အပရာပရံ ဒိဗ္ဗသုခံ အနုဘဝိတ္ဝာ တတော စဝိတ္ဝာ မနုသ္သလောကေ စက္ကဝတ္တိအာဒိအနေကဝိဓမနုသ္သသမ္ပတ္တိံ အနုဘဝိတ္ဝာ ပရိပာကဂတေ ပုညသမ္ဘာရေ ဣမသ္မိံ ဗုဒ္ဓုပ္ပာဒေ ကုလဂေဟေ နိဗ္ဗတ္တော ဝယပ္ပတ္တော သတ္ထု သန္တိကေ ဓမ္မံ သုတ္ဝာ ပဋိလဒ္ဓသဒ္ဓော ပဗ္ဗဇိတ္ဝာ ဝိပသ္သနံ ဝဍ္ဎေတ္ဝာ နစိရသ္သေဝ အရဟတ္တံ ပာပုဏိ။ ကတပုညနာမေန ခောမဒာယကတ္ထေရောတိ ပာကဋော။
Nagare bandhumatiyātiādikaṃ āyasmato khomadāyakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle ekasmiṃ kulagehe nibbatto vayappatto sāsane abhippasanno ratanattayamāmako vipassissa bhagavato santike dhammaṃ sutvā pasannamānaso khomadussena pūjaṃ akāsi. So tadeva mūlaṃ katvā yāvajīvaṃ puññāni katvā tato devaloke nibbatto. Chasu devesu aparāparaṃ dibbasukhaṃ anubhavitvā tato cavitvā manussaloke cakkavattiādianekavidhamanussasampattiṃ anubhavitvā paripākagate puññasambhāre imasmiṃ buddhuppāde kulagehe nibbatto vayappatto satthu santike dhammaṃ sutvā paṭiladdhasaddho pabbajitvā vipassanaṃ vaḍḍhetvā nacirasseva arahattaṃ pāpuṇi. Katapuññanāmena khomadāyakattheroti pākaṭo.
၁၈၄. သော အတ္တနော ပုဗ္ဗကမ္မံ သရိတ္ဝာ သောမနသ္သဇာတော ပုဗ္ဗစရိတာပဒာနံ ဒသ္သေန္တော နဂရေ ဗန္ဓုမတိယာတိအာဒိမာဟ။ တတ္ထ ဗန္ဓု ဝုစ္စတိ ဉာတကော, တေ ဗန္ဓူ ယသ္မိံ နဂရေ အညမညံ သင္ဃဋိတာ ဝသန္တိ, တံ နဂရံ ‘‘ဗန္ဓုမတီ’’တိ ဝုစ္စတိ။ ရောပေမိ ဗီဇသမ္ပဒန္တိ ဒာနသီလာဒိပုညဗီဇသမ္ပတ္တိံ ရောပေမိ ပဋ္ဌပေမီတိ အတ္ထော။
184. So attano pubbakammaṃ saritvā somanassajāto pubbacaritāpadānaṃ dassento nagare bandhumatiyātiādimāha. Tattha bandhu vuccati ñātako, te bandhū yasmiṃ nagare aññamaññaṃ saṅghaṭitā vasanti, taṃ nagaraṃ ‘‘bandhumatī’’ti vuccati. Ropemi bījasampadanti dānasīlādipuññabījasampattiṃ ropemi paṭṭhapemīti attho.
ခောမဒာယကတ္ထေရအပဒာနဝဏ္ဏနာ သမတ္တာ။
Khomadāyakattheraapadānavaṇṇanā samattā.
တတိယသ္သ သုဘူတိဝဂ္ဂသ္သ ဝဏ္ဏနာ သမတ္တာ။
Tatiyassa subhūtivaggassa vaṇṇanā samattā.
စတုဘာဏဝာရဝဏ္ဏနာ နိဋ္ဌိတာ။
Catubhāṇavāravaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၁၀. ခောမဒာယကတ္ထေရအပဒာနံ • 10. Khomadāyakattheraapadānaṃ
