| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೧೦. ಖೋಮದಾಯಕತ್ಥೇರಅಪದಾನವಣ್ಣನಾ
10. Khomadāyakattheraapadānavaṇṇanā
ನಗರೇ ಬನ್ಧುಮತಿಯಾತಿಆದಿಕಂ ಆಯಸ್ಮತೋ ಖೋಮದಾಯಕತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರೋ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ವಿಪಸ್ಸಿಸ್ಸ ಭಗವತೋ ಕಾಲೇ ಏಕಸ್ಮಿಂ ಕುಲಗೇಹೇ ನಿಬ್ಬತ್ತೋ ವಯಪ್ಪತ್ತೋ ಸಾಸನೇ ಅಭಿಪ್ಪಸನ್ನೋ ರತನತ್ತಯಮಾಮಕೋ ವಿಪಸ್ಸಿಸ್ಸ ಭಗವತೋ ಸನ್ತಿಕೇ ಧಮ್ಮಂ ಸುತ್ವಾ ಪಸನ್ನಮಾನಸೋ ಖೋಮದುಸ್ಸೇನ ಪೂಜಂ ಅಕಾಸಿ। ಸೋ ತದೇವ ಮೂಲಂ ಕತ್ವಾ ಯಾವಜೀವಂ ಪುಞ್ಞಾನಿ ಕತ್ವಾ ತತೋ ದೇವಲೋಕೇ ನಿಬ್ಬತ್ತೋ। ಛಸು ದೇವೇಸು ಅಪರಾಪರಂ ದಿಬ್ಬಸುಖಂ ಅನುಭವಿತ್ವಾ ತತೋ ಚವಿತ್ವಾ ಮನುಸ್ಸಲೋಕೇ ಚಕ್ಕವತ್ತಿಆದಿಅನೇಕವಿಧಮನುಸ್ಸಸಮ್ಪತ್ತಿಂ ಅನುಭವಿತ್ವಾ ಪರಿಪಾಕಗತೇ ಪುಞ್ಞಸಮ್ಭಾರೇ ಇಮಸ್ಮಿಂ ಬುದ್ಧುಪ್ಪಾದೇ ಕುಲಗೇಹೇ ನಿಬ್ಬತ್ತೋ ವಯಪ್ಪತ್ತೋ ಸತ್ಥು ಸನ್ತಿಕೇ ಧಮ್ಮಂ ಸುತ್ವಾ ಪಟಿಲದ್ಧಸದ್ಧೋ ಪಬ್ಬಜಿತ್ವಾ ವಿಪಸ್ಸನಂ ವಡ್ಢೇತ್ವಾ ನಚಿರಸ್ಸೇವ ಅರಹತ್ತಂ ಪಾಪುಣಿ। ಕತಪುಞ್ಞನಾಮೇನ ಖೋಮದಾಯಕತ್ಥೇರೋತಿ ಪಾಕಟೋ।
Nagare bandhumatiyātiādikaṃ āyasmato khomadāyakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle ekasmiṃ kulagehe nibbatto vayappatto sāsane abhippasanno ratanattayamāmako vipassissa bhagavato santike dhammaṃ sutvā pasannamānaso khomadussena pūjaṃ akāsi. So tadeva mūlaṃ katvā yāvajīvaṃ puññāni katvā tato devaloke nibbatto. Chasu devesu aparāparaṃ dibbasukhaṃ anubhavitvā tato cavitvā manussaloke cakkavattiādianekavidhamanussasampattiṃ anubhavitvā paripākagate puññasambhāre imasmiṃ buddhuppāde kulagehe nibbatto vayappatto satthu santike dhammaṃ sutvā paṭiladdhasaddho pabbajitvā vipassanaṃ vaḍḍhetvā nacirasseva arahattaṃ pāpuṇi. Katapuññanāmena khomadāyakattheroti pākaṭo.
೧೮೪. ಸೋ ಅತ್ತನೋ ಪುಬ್ಬಕಮ್ಮಂ ಸರಿತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ದಸ್ಸೇನ್ತೋ ನಗರೇ ಬನ್ಧುಮತಿಯಾತಿಆದಿಮಾಹ। ತತ್ಥ ಬನ್ಧು ವುಚ್ಚತಿ ಞಾತಕೋ, ತೇ ಬನ್ಧೂ ಯಸ್ಮಿಂ ನಗರೇ ಅಞ್ಞಮಞ್ಞಂ ಸಙ್ಘಟಿತಾ ವಸನ್ತಿ, ತಂ ನಗರಂ ‘‘ಬನ್ಧುಮತೀ’’ತಿ ವುಚ್ಚತಿ। ರೋಪೇಮಿ ಬೀಜಸಮ್ಪದನ್ತಿ ದಾನಸೀಲಾದಿಪುಞ್ಞಬೀಜಸಮ್ಪತ್ತಿಂ ರೋಪೇಮಿ ಪಟ್ಠಪೇಮೀತಿ ಅತ್ಥೋ।
184. So attano pubbakammaṃ saritvā somanassajāto pubbacaritāpadānaṃ dassento nagare bandhumatiyātiādimāha. Tattha bandhu vuccati ñātako, te bandhū yasmiṃ nagare aññamaññaṃ saṅghaṭitā vasanti, taṃ nagaraṃ ‘‘bandhumatī’’ti vuccati. Ropemi bījasampadanti dānasīlādipuññabījasampattiṃ ropemi paṭṭhapemīti attho.
ಖೋಮದಾಯಕತ್ಥೇರಅಪದಾನವಣ್ಣನಾ ಸಮತ್ತಾ।
Khomadāyakattheraapadānavaṇṇanā samattā.
ತತಿಯಸ್ಸ ಸುಭೂತಿವಗ್ಗಸ್ಸ ವಣ್ಣನಾ ಸಮತ್ತಾ।
Tatiyassa subhūtivaggassa vaṇṇanā samattā.
ಚತುಭಾಣವಾರವಣ್ಣನಾ ನಿಟ್ಠಿತಾ।
Catubhāṇavāravaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೧೦. ಖೋಮದಾಯಕತ್ಥೇರಅಪದಾನಂ • 10. Khomadāyakattheraapadānaṃ
