| Library / Tipiṭaka / തിപിടക • Tipiṭaka / അപദാന-അട്ഠകഥാ • Apadāna-aṭṭhakathā |
൧൦. ഖോമദായകത്ഥേരഅപദാനവണ്ണനാ
10. Khomadāyakattheraapadānavaṇṇanā
നഗരേ ബന്ധുമതിയാതിആദികം ആയസ്മതോ ഖോമദായകത്ഥേരസ്സ അപദാനം. അയമ്പി പുരിമബുദ്ധേസു കതാധികാരോ തത്ഥ തത്ഥ ഭവേ വിവട്ടൂപനിസ്സയാനി പുഞ്ഞാനി ഉപചിനന്തോ വിപസ്സിസ്സ ഭഗവതോ കാലേ ഏകസ്മിം കുലഗേഹേ നിബ്ബത്തോ വയപ്പത്തോ സാസനേ അഭിപ്പസന്നോ രതനത്തയമാമകോ വിപസ്സിസ്സ ഭഗവതോ സന്തികേ ധമ്മം സുത്വാ പസന്നമാനസോ ഖോമദുസ്സേന പൂജം അകാസി. സോ തദേവ മൂലം കത്വാ യാവജീവം പുഞ്ഞാനി കത്വാ തതോ ദേവലോകേ നിബ്ബത്തോ. ഛസു ദേവേസു അപരാപരം ദിബ്ബസുഖം അനുഭവിത്വാ തതോ ചവിത്വാ മനുസ്സലോകേ ചക്കവത്തിആദിഅനേകവിധമനുസ്സസമ്പത്തിം അനുഭവിത്വാ പരിപാകഗതേ പുഞ്ഞസമ്ഭാരേ ഇമസ്മിം ബുദ്ധുപ്പാദേ കുലഗേഹേ നിബ്ബത്തോ വയപ്പത്തോ സത്ഥു സന്തികേ ധമ്മം സുത്വാ പടിലദ്ധസദ്ധോ പബ്ബജിത്വാ വിപസ്സനം വഡ്ഢേത്വാ നചിരസ്സേവ അരഹത്തം പാപുണി. കതപുഞ്ഞനാമേന ഖോമദായകത്ഥേരോതി പാകടോ.
Nagare bandhumatiyātiādikaṃ āyasmato khomadāyakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle ekasmiṃ kulagehe nibbatto vayappatto sāsane abhippasanno ratanattayamāmako vipassissa bhagavato santike dhammaṃ sutvā pasannamānaso khomadussena pūjaṃ akāsi. So tadeva mūlaṃ katvā yāvajīvaṃ puññāni katvā tato devaloke nibbatto. Chasu devesu aparāparaṃ dibbasukhaṃ anubhavitvā tato cavitvā manussaloke cakkavattiādianekavidhamanussasampattiṃ anubhavitvā paripākagate puññasambhāre imasmiṃ buddhuppāde kulagehe nibbatto vayappatto satthu santike dhammaṃ sutvā paṭiladdhasaddho pabbajitvā vipassanaṃ vaḍḍhetvā nacirasseva arahattaṃ pāpuṇi. Katapuññanāmena khomadāyakattheroti pākaṭo.
൧൮൪. സോ അത്തനോ പുബ്ബകമ്മം സരിത്വാ സോമനസ്സജാതോ പുബ്ബചരിതാപദാനം ദസ്സേന്തോ നഗരേ ബന്ധുമതിയാതിആദിമാഹ. തത്ഥ ബന്ധു വുച്ചതി ഞാതകോ, തേ ബന്ധൂ യസ്മിം നഗരേ അഞ്ഞമഞ്ഞം സങ്ഘടിതാ വസന്തി, തം നഗരം ‘‘ബന്ധുമതീ’’തി വുച്ചതി. രോപേമി ബീജസമ്പദന്തി ദാനസീലാദിപുഞ്ഞബീജസമ്പത്തിം രോപേമി പട്ഠപേമീതി അത്ഥോ.
184. So attano pubbakammaṃ saritvā somanassajāto pubbacaritāpadānaṃ dassento nagare bandhumatiyātiādimāha. Tattha bandhu vuccati ñātako, te bandhū yasmiṃ nagare aññamaññaṃ saṅghaṭitā vasanti, taṃ nagaraṃ ‘‘bandhumatī’’ti vuccati. Ropemi bījasampadanti dānasīlādipuññabījasampattiṃ ropemi paṭṭhapemīti attho.
ഖോമദായകത്ഥേരഅപദാനവണ്ണനാ സമത്താ.
Khomadāyakattheraapadānavaṇṇanā samattā.
തതിയസ്സ സുഭൂതിവഗ്ഗസ്സ വണ്ണനാ സമത്താ.
Tatiyassa subhūtivaggassa vaṇṇanā samattā.
ചതുഭാണവാരവണ്ണനാ നിട്ഠിതാ.
Catubhāṇavāravaṇṇanā niṭṭhitā.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / ഖുദ്ദകനികായ • Khuddakanikāya / അപദാനപാളി • Apadānapāḷi / ൧൦. ഖോമദായകത്ഥേരഅപദാനം • 10. Khomadāyakattheraapadānaṃ
