| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၁၂. ခောမဒုသ္သသုတ္တဝဏ္ဏနာ
12. Khomadussasuttavaṇṇanā
၂၀၈. ဒ္ဝာဒသမေ ခောမဒုသ္သံ နာမာတိ ခောမဒုသ္သာနံ ဥသ္သန္နတ္တာ ဧဝံလဒ္ဓနာမံ။ သဘာယန္တိ သာလာယံ။ ဖုသာယတီတိ ဖုသိတာနိ မုဉ္စတိ ဝသ္သတိ။ သတ္ထာ ကိရ တံ သဘံ ဥပသင္ကမိတုကာမော – ‘‘မယိ ဧဝမေဝံ ဥပသင္ကမန္တေ အဖာသုကဓာတုကံ ဟောတိ, ဧကံ ကာရဏံ ပဋိစ္စ ဥပသင္ကမိသ္သာမီ’’တိ အဓိဋ္ဌာနဝသေန ဝုဋ္ဌိံ ဥပ္ပာဒေသိ။ သဘာဓမ္မန္တိ သုခနိသိန္နေ ကိရ အသဉ္စာလေတ္ဝာ ဧကပသ္သေန ပဝိသနံ တေသံ သဘာဓမ္မော နာမ, န မဟာဇနံ စာလေတ္ဝာ ဥဇုကမေဝ ပဝိသနံ။ ဘဂဝာ စ ဥဇုကမေဝ အာဂစ္ဆတိ, တေန တေ ကုပိတာ ဘဂဝန္တံ ဟီဠေန္တာ ‘‘ကေ စ မုဏ္ဍကာ သမဏကာ, ကေ စ သဘာဓမ္မံ ဇာနိသ္သန္တီ’’တိ အာဟံသု။ သန္တောတိ ပဏ္ဍိတာ သပ္ပုရိသာ။ ပဟာယာတိ ဧတေ ရာဂာဒယော ဇဟိတ္ဝာ ရာဂာဒိဝိနယာယ ဓမ္မံ ဘဏန္တိ, တသ္မာ တေ သန္တော နာမာတိ။ ဒ္ဝာဒသမံ။
208. Dvādasame khomadussaṃ nāmāti khomadussānaṃ ussannattā evaṃladdhanāmaṃ. Sabhāyanti sālāyaṃ. Phusāyatīti phusitāni muñcati vassati. Satthā kira taṃ sabhaṃ upasaṅkamitukāmo – ‘‘mayi evamevaṃ upasaṅkamante aphāsukadhātukaṃ hoti, ekaṃ kāraṇaṃ paṭicca upasaṅkamissāmī’’ti adhiṭṭhānavasena vuṭṭhiṃ uppādesi. Sabhādhammanti sukhanisinne kira asañcāletvā ekapassena pavisanaṃ tesaṃ sabhādhammo nāma, na mahājanaṃ cāletvā ujukameva pavisanaṃ. Bhagavā ca ujukameva āgacchati, tena te kupitā bhagavantaṃ hīḷentā ‘‘ke ca muṇḍakā samaṇakā, ke ca sabhādhammaṃ jānissantī’’ti āhaṃsu. Santoti paṇḍitā sappurisā. Pahāyāti ete rāgādayo jahitvā rāgādivinayāya dhammaṃ bhaṇanti, tasmā te santo nāmāti. Dvādasamaṃ.
ဥပာသကဝဂ္ဂော ဒုတိယော။
Upāsakavaggo dutiyo.
ဣတိ သာရတ္ထပ္ပကာသိနိယာ
Iti sāratthappakāsiniyā
သံယုတ္တနိကာယ-အဋ္ဌကထာယ
Saṃyuttanikāya-aṭṭhakathāya
ဗ္ရာဟ္မဏသံယုတ္တဝဏ္ဏနာ နိဋ္ဌိတာ။
Brāhmaṇasaṃyuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁၂. ခောမဒုသ္သသုတ္တံ • 12. Khomadussasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁၂. ခောမဒုသ္သသုတ္တဝဏ္ဏနာ • 12. Khomadussasuttavaṇṇanā
