| Library / Tipiṭaka / திபிடக • Tipiṭaka / சூளவக்³க³-அட்ட²கதா² • Cūḷavagga-aṭṭhakathā |
5. கு²த்³த³கவத்து²க்க²ந்த⁴கங்
5. Khuddakavatthukkhandhakaṃ
கு²த்³த³கவத்து²கதா²
Khuddakavatthukathā
243. கு²த்³த³கவத்து²க்க²ந்த⁴கே – மல்லமுட்டி²காதி முட்டி²கமல்லா. கா³மமுத்³த³வாதி ச²விராக³மண்ட³னானுயுத்தா நாக³ரிகமனுஸ்ஸா. கா³மமொத்³த³வாதிபி பாடோ²; ஏஸேவத்தோ². த²ம்பே⁴தி ந்ஹானதித்தே² நிக²ணித்வா ட²பிதத்த²ம்பே⁴.
243. Khuddakavatthukkhandhake – mallamuṭṭhikāti muṭṭhikamallā. Gāmamuddavāti chavirāgamaṇḍanānuyuttā nāgarikamanussā. Gāmamoddavātipi pāṭho; esevattho. Thambheti nhānatitthe nikhaṇitvā ṭhapitatthambhe.
குட்டேதி இட்ட²காஸிலாதா³ருகுட்டானங் அஞ்ஞதரஸ்மிங். அட்டானே ந்ஹாயந்தீதி எத்த² அட்டானங் நாம ருக்க²ங் ப²லகங் விய தச்செ²த்வா அட்ட²பதா³காரேன ராஜியோ சி²ந்தி³த்வா ந்ஹானதித்தே² நிக²ணந்தி, தத்த² சுண்ணானி ஆகிரித்வா மனுஸ்ஸா காயங் க⁴ங்ஸந்தி. க³ந்த⁴ப்³ப³ஹத்த²கேனாதி ந்ஹானதித்தே² ட²பிதேன தா³ருமயஹத்தே²ன, தேன கிர சுண்ணானி க³ஹெத்வா மனுஸ்ஸா ஸரீரங் க⁴ங்ஸந்தி . குருவிந்த³கஸுத்தியாதி குருவிந்த³கபாஸாணசுண்ணானி லாகா²ய ப³ந்தி⁴த்வா கதகு³ளிககலாபகோ வுச்சதி, தங் உபோ⁴ஸு அந்தேஸு க³ஹெத்வா ஸரீரங் க⁴ங்ஸந்தி. விக்³க³ய்ஹ பரிகம்மங் காராபெந்தீதி அஞ்ஞமஞ்ஞங் ஸரீரேன ஸரீரங் க⁴ங்ஸந்தி. மல்லகங் நாம மகரத³ந்தகே சி²ந்தி³த்வா மல்லகமூலஸண்டா²னேன கதங் மல்லகந்தி வுச்சதி, இத³ங் கி³லானஸ்ஸாபி ந வட்டதி.
Kuṭṭeti iṭṭhakāsilādārukuṭṭānaṃ aññatarasmiṃ. Aṭṭāne nhāyantīti ettha aṭṭānaṃ nāma rukkhaṃ phalakaṃ viya tacchetvā aṭṭhapadākārena rājiyo chinditvā nhānatitthe nikhaṇanti, tattha cuṇṇāni ākiritvā manussā kāyaṃ ghaṃsanti. Gandhabbahatthakenāti nhānatitthe ṭhapitena dārumayahatthena, tena kira cuṇṇāni gahetvā manussā sarīraṃ ghaṃsanti . Kuruvindakasuttiyāti kuruvindakapāsāṇacuṇṇāni lākhāya bandhitvā kataguḷikakalāpako vuccati, taṃ ubhosu antesu gahetvā sarīraṃ ghaṃsanti. Viggayha parikammaṃ kārāpentīti aññamaññaṃ sarīrena sarīraṃ ghaṃsanti. Mallakaṃ nāma makaradantake chinditvā mallakamūlasaṇṭhānena kataṃ mallakanti vuccati, idaṃ gilānassāpi na vaṭṭati.
244. அகதமல்லகங் நாம த³ந்தே அச்சி²ந்தி³த்வா கதங், இத³ங் அகி³லானஸ்ஸேவ ந வட்டதி; இட்ட²காக²ண்ட³ங் பன கபாலக²ண்ட³ங் வா வட்டதி. உக்காஸிகந்தி வத்த²வட்டிங்; தஸ்மா ந்ஹாயந்தஸ்ஸ யஸ்ஸ கஸ்ஸசி ந்ஹானஸாடகவட்டியா பிட்டி²ங் க⁴ங்ஸிதுங் வட்டதி. புது²பாணிகந்தி ஹத்த²பரிகம்மங் வுச்சதி, தஸ்மா ஸப்³பே³ஸங் ஹத்தே²ன பிட்டி²பரிகம்மங் காதுங் வட்டதி.
244.Akatamallakaṃ nāma dante acchinditvā kataṃ, idaṃ agilānasseva na vaṭṭati; iṭṭhakākhaṇḍaṃ pana kapālakhaṇḍaṃ vā vaṭṭati. Ukkāsikanti vatthavaṭṭiṃ; tasmā nhāyantassa yassa kassaci nhānasāṭakavaṭṭiyā piṭṭhiṃ ghaṃsituṃ vaṭṭati. Puthupāṇikanti hatthaparikammaṃ vuccati, tasmā sabbesaṃ hatthena piṭṭhiparikammaṃ kātuṃ vaṭṭati.
245. வல்லிகாதி கண்ணதோ நிக்க²ந்தமுத்தோலம்ப³காதீ³னங் ஏதங் அதி⁴வசனங்; ந கேவலஞ்ச வல்லிகா ஏவ, யங்கிஞ்சி கண்ணபிளந்த⁴னங் அந்தமஸோ தாலபண்ணம்பி ந வட்டதி. பாமங்க³ந்தி யங்கிஞ்சி பலம்ப³கஸுத்தங். கண்ட²ஸுத்தகந்தி யங்கிஞ்சி கீ³வூபக³ஆப⁴ரணங். கடிஸுத்தகந்தி யங்கிஞ்சி கடிபிளந்த⁴னங் அந்தமஸோ ஸுத்ததந்துமத்தம்பி. ஓவட்டிகந்தி வலயங். காயூராதீ³னி பாகடானேவ, அக்க²கானங் ஹெட்டா² பா³ஹாப⁴ரணங் யங்கிஞ்சி ஆப⁴ரணங் ந வட்டதி.
245.Vallikāti kaṇṇato nikkhantamuttolambakādīnaṃ etaṃ adhivacanaṃ; na kevalañca vallikā eva, yaṃkiñci kaṇṇapiḷandhanaṃ antamaso tālapaṇṇampi na vaṭṭati. Pāmaṅganti yaṃkiñci palambakasuttaṃ. Kaṇṭhasuttakanti yaṃkiñci gīvūpagaābharaṇaṃ. Kaṭisuttakanti yaṃkiñci kaṭipiḷandhanaṃ antamaso suttatantumattampi. Ovaṭṭikanti valayaṃ. Kāyūrādīni pākaṭāneva, akkhakānaṃ heṭṭhā bāhābharaṇaṃ yaṃkiñci ābharaṇaṃ na vaṭṭati.
246. து³மாஸிகங் வா து³வங்கு³லங் வாதி எத்த² ஸசே கேஸா அந்தொத்³வேமாஸே த்³வங்கு³லங் பாபுணந்தி, அந்தொத்³வேமாஸேவ சி²ந்தி³தப்³பா³. த்³வங்கு³லேஹி அதிக்காமேதுங் ந வட்டதி. ஸசேபி ந தீ³கா⁴, த்³வேமாஸதோ ஏகதி³வஸம்பி அதிக்காமேதுங் ந வட்டதியேவ; ஏவமயங் உப⁴யேனபி உக்கட்ட²பரிச்சே²தோ³வ வுத்தோ, ததோ ஓரங் பன நவட்டனபா⁴வோ நாம நத்தி².
246.Dumāsikaṃvā duvaṅgulaṃ vāti ettha sace kesā antodvemāse dvaṅgulaṃ pāpuṇanti, antodvemāseva chinditabbā. Dvaṅgulehi atikkāmetuṃ na vaṭṭati. Sacepi na dīghā, dvemāsato ekadivasampi atikkāmetuṃ na vaṭṭatiyeva; evamayaṃ ubhayenapi ukkaṭṭhaparicchedova vutto, tato oraṃ pana navaṭṭanabhāvo nāma natthi.
கொச்சே²ன ஓஸண்டெ²ந்தீதி கொச்சே²ன ஓலிகி²த்வா ஸன்னிஸீதா³பெந்தி. ப²ணகேனாதி த³ந்தமயாதீ³ஸு யேன கேனசி. ஹத்த²ப²ணகேனாதி ஹத்தே²னேவ ப²ணகிச்சங் கரொந்தா அங்கு³லீஹி ஓஸண்டெ²ந்தி. ஸித்த²தேலகேனாதி மது⁴ஸித்த²கனிய்யாஸாதீ³ஸு யேன கேனசி சிக்கலேன. உத³கதேலகேனாதி உத³கமிஸ்ஸகேன தேலேன. மண்ட³னத்தா²ய ஸப்³ப³த்த² து³க்கடங், உத்³த⁴லோமேன பன அனுலோமனிபாதனத்த²ங் ஹத்த²ங் தேமெத்வா ஸீஸங் புஞ்சி²தப்³ப³ங். உண்ஹாபி⁴தத்தரஜஸிரானம்பி அல்லஹத்தே²ன புஞ்சி²துங் வட்டதி.
Kocchena osaṇṭhentīti kocchena olikhitvā sannisīdāpenti. Phaṇakenāti dantamayādīsu yena kenaci. Hatthaphaṇakenāti hattheneva phaṇakiccaṃ karontā aṅgulīhi osaṇṭhenti. Sitthatelakenāti madhusitthakaniyyāsādīsu yena kenaci cikkalena. Udakatelakenāti udakamissakena telena. Maṇḍanatthāya sabbattha dukkaṭaṃ, uddhalomena pana anulomanipātanatthaṃ hatthaṃ temetvā sīsaṃ puñchitabbaṃ. Uṇhābhitattarajasirānampi allahatthena puñchituṃ vaṭṭati.
247. ந பி⁴க்க²வே ஆதா³ஸே வா உத³கபத்தே வாதி எத்த² கங்ஸபத்தாதீ³னிபி யேஸு முக²னிமித்தங் பஞ்ஞாயதி, ஸப்³பா³னி ஆதா³ஸஸங்க²மேவ க³ச்ச²ந்தி. கஞ்ஜியாதீ³னிபி ச உத³கபத்தஸங்க²மேவ. தஸ்மா யத்த² கத்த²சி ஓலோகெந்தஸ்ஸ து³க்கடங். ஆபா³த⁴பச்சயாதி ‘‘ஸஞ்ச²வி நு கோ² மே வணோ, உதா³ஹு ந தாவா’’தி ஜானநத்த²ங்; ‘‘ஜிண்ணோ நு கொ²ம்ஹி நோ’’தி ஏவங் ஆயுஸங்கா²ரங் ஓலோகனத்த²ம்பி வட்டதீதி வுத்தங்.
247.Na bhikkhave ādāse vā udakapatte vāti ettha kaṃsapattādīnipi yesu mukhanimittaṃ paññāyati, sabbāni ādāsasaṅkhameva gacchanti. Kañjiyādīnipi ca udakapattasaṅkhameva. Tasmā yattha katthaci olokentassa dukkaṭaṃ. Ābādhapaccayāti ‘‘sañchavi nu kho me vaṇo, udāhu na tāvā’’ti jānanatthaṃ; ‘‘jiṇṇo nu khomhi no’’ti evaṃ āyusaṅkhāraṃ olokanatthampi vaṭṭatīti vuttaṃ.
முக²ங் ஆலிம்பந்தீதி விப்பஸன்னச²விராக³கரேஹி முகா²லேபனேஹி ஆலிம்பந்தி. உம்மத்³தெ³ந்தீதி நானாஉம்மத்³த³னேஹி உம்மத்³தெ³ந்தி. சுண்ணெந்தீதி முக²சுண்ணகேன மக்கெ²ந்தி. மனோஸிலிகாய முக²ங் லஞ்செ²ந்தீதி மனோஸிலாய திலகாதீ³னி லஞ்ச²னானி கரொந்தி, தானி ஹரிதாலாதீ³ஹிபி ந வட்டந்தியேவ. அங்க³ராகா³த³யோ பாகடாயேவ. ஸப்³ப³த்த² து³க்கடங்.
Mukhaṃ ālimpantīti vippasannachavirāgakarehi mukhālepanehi ālimpanti. Ummaddentīti nānāummaddanehi ummaddenti. Cuṇṇentīti mukhacuṇṇakena makkhenti. Manosilikāya mukhaṃ lañchentīti manosilāya tilakādīni lañchanāni karonti, tāni haritālādīhipi na vaṭṭantiyeva. Aṅgarāgādayo pākaṭāyeva. Sabbattha dukkaṭaṃ.
248. ந பி⁴க்க²வே நச்சங் வாதிஆதீ³ஸு யங்கிஞ்சி நச்சங் அந்தமஸோ மோரனச்சம்பி த³ஸ்ஸனாய க³ச்ச²ந்தஸ்ஸ து³க்கடங். ஸயம்பி நச்சந்தஸ்ஸ வா நச்சாபெந்தஸ்ஸ வா து³க்கடமேவ. கீ³தம்பி யங்கிஞ்சி நடகீ³தங் வா ஸாது⁴கீ³தங் வா அந்தமஸோ த³ந்தகீ³தம்பி ‘‘யங் கா³யிஸ்ஸாமா’’தி புப்³ப³பா⁴கே³ ஓகூஜந்தா கரொந்தி, ஏதம்பி ந வட்டதி. ஸயங் கா³யந்தஸ்ஸாபி கா³யாபெந்தஸ்ஸாபி து³க்கடமேவ. வாதி³தம்பி யங்கிஞ்சி ந வட்டதி. யங் பன நிட்டு²ப⁴ந்தோ வா ஸாஸங்கே வா டி²தோ அச்ச²ரிகங் வா போ²டேதி , பாணிங் வா பஹரதி, தத்த² அனாபத்தி. ஸப்³ப³ங் அந்தராராமே டி²தஸ்ஸ பஸ்ஸதோ அனாபத்தி. ‘‘பஸ்ஸிஸ்ஸாமீ’’தி விஹாரதோ விஹாரங் க³ச்ச²ந்தஸ்ஸ ஆபத்தியேவ. ஆஸனஸாலாய நிஸின்னோ பஸ்ஸதி, அனாபத்தி. ‘‘பஸ்ஸிஸ்ஸாமீ’’தி உட்ட²ஹித்வா க³ச்ச²தோ ஆபத்தி. வீதி²யங் ட²த்வா கீ³வங் பரிவத்தெத்வா பஸ்ஸதோபி ஆபத்தியேவ.
248.Nabhikkhave naccaṃ vātiādīsu yaṃkiñci naccaṃ antamaso moranaccampi dassanāya gacchantassa dukkaṭaṃ. Sayampi naccantassa vā naccāpentassa vā dukkaṭameva. Gītampi yaṃkiñci naṭagītaṃ vā sādhugītaṃ vā antamaso dantagītampi ‘‘yaṃ gāyissāmā’’ti pubbabhāge okūjantā karonti, etampi na vaṭṭati. Sayaṃ gāyantassāpi gāyāpentassāpi dukkaṭameva. Vāditampi yaṃkiñci na vaṭṭati. Yaṃ pana niṭṭhubhanto vā sāsaṅke vā ṭhito accharikaṃ vā phoṭeti , pāṇiṃ vā paharati, tattha anāpatti. Sabbaṃ antarārāme ṭhitassa passato anāpatti. ‘‘Passissāmī’’ti vihārato vihāraṃ gacchantassa āpattiyeva. Āsanasālāya nisinno passati, anāpatti. ‘‘Passissāmī’’ti uṭṭhahitvā gacchato āpatti. Vīthiyaṃ ṭhatvā gīvaṃ parivattetvā passatopi āpattiyeva.
249. ஸரகுத்திந்தி ஸரகிரியங். ப⁴ங்கோ³ ஹோதீதி அலத்³த⁴ங் உப்பாதே³துங் ந ஸக்கோதி; லத்³த⁴ங் ஸமாபஜ்ஜிதுங். பச்சி²மா ஜனதாதி அம்ஹாகங் ஆசரியாபி உபஜ்ஜா²யாபி ஏவங் கா³யிங்ஸூதி பச்சி²மோ ஜனோ தி³ட்டா²னுக³திங் ஆபஜ்ஜதி; ததே²வ கா³யதி. ந பி⁴க்க²வே ஆயதகேனாதி எத்த² ஆயதகோ நாம தங் தங் வத்தங் பி⁴ந்தி³த்வா அக்க²ரானி வினாஸெத்வா பவத்தோ. த⁴ம்மே பன ஸுத்தந்தவத்தங் நாம அத்தி², ஜாதகவத்தங் நாம அத்தி², கா³தா²வத்தங் நாம அத்தி², தங் வினாஸெத்வா அதிதீ³க⁴ங் காதுங் ந வட்டதி. சதுரஸ்ஸேன வத்தேன பரிமண்ட³லானி பத³ப்³யஞ்ஜனானி த³ஸ்ஸேதப்³பா³னி. ஸரப⁴ஞ்ஞந்தி ஸரேன ப⁴ணனங். ஸரப⁴ஞ்ஞே கிர தரங்க³வத்ததோ⁴தகவத்தக³லிதவத்தாதீ³னி த்³வத்திங்ஸ வத்தானி அத்தி². தேஸு யங் இச்ச²தி, தங் காதுங் லப⁴தி. ஸப்³பே³ஸங் பத³ப்³யஞ்ஜனங் அவினாஸெத்வா விகாரங் அகத்வா ஸமணஸாருப்பேன சதுரஸ்ஸேன நயேன பவத்தனங்யேவ லக்க²ணங்.
249.Sarakuttinti sarakiriyaṃ. Bhaṅgo hotīti aladdhaṃ uppādetuṃ na sakkoti; laddhaṃ samāpajjituṃ. Pacchimā janatāti amhākaṃ ācariyāpi upajjhāyāpi evaṃ gāyiṃsūti pacchimo jano diṭṭhānugatiṃ āpajjati; tatheva gāyati. Na bhikkhave āyatakenāti ettha āyatako nāma taṃ taṃ vattaṃ bhinditvā akkharāni vināsetvā pavatto. Dhamme pana suttantavattaṃ nāma atthi, jātakavattaṃ nāma atthi, gāthāvattaṃ nāma atthi, taṃ vināsetvā atidīghaṃ kātuṃ na vaṭṭati. Caturassena vattena parimaṇḍalāni padabyañjanāni dassetabbāni. Sarabhaññanti sarena bhaṇanaṃ. Sarabhaññe kira taraṅgavattadhotakavattagalitavattādīni dvattiṃsa vattāni atthi. Tesu yaṃ icchati, taṃ kātuṃ labhati. Sabbesaṃ padabyañjanaṃ avināsetvā vikāraṃ akatvā samaṇasāruppena caturassena nayena pavattanaṃyeva lakkhaṇaṃ.
பா³ஹிரலோமிங் உண்ணிந்தி உண்ணலோமானி ப³ஹி கத்வா உண்ணபாவாரங் பாருபந்தி; ததா² தா⁴ரெந்தஸ்ஸ து³க்கடங். லோமானி அந்தோ கத்வா பாருபிதுங் வட்டதி. ஸமணகப்பகதா² பூ⁴தகா³மஸிக்கா²பத³வண்ணனாயங் வுத்தா.
Bāhiralomiṃ uṇṇinti uṇṇalomāni bahi katvā uṇṇapāvāraṃ pārupanti; tathā dhārentassa dukkaṭaṃ. Lomāni anto katvā pārupituṃ vaṭṭati. Samaṇakappakathā bhūtagāmasikkhāpadavaṇṇanāyaṃ vuttā.
251. ந பி⁴க்க²வே அத்தனோ அங்க³ஜாதந்தி அங்க³ஜாதங் சி²ந்த³ந்தஸ்ஸேவ து²ல்லச்சயங். அஞ்ஞங் பன கண்ணனாஸாஅங்கு³லிஆதி³ங் யங்கிஞ்சி சி²ந்த³ந்தஸ்ஸ தாதி³ஸங் வா து³க்க²ங் உப்பாதெ³ந்தஸ்ஸ து³க்கடங். அஹிகீடத³ட்டா²தீ³ஸு பன அஞ்ஞஆபா³த⁴பச்சயா வா லோஹிதங் வா மோசெந்தஸ்ஸ சி²ந்த³ந்தஸ்ஸ வா அனாபத்தி.
251.Na bhikkhave attano aṅgajātanti aṅgajātaṃ chindantasseva thullaccayaṃ. Aññaṃ pana kaṇṇanāsāaṅguliādiṃ yaṃkiñci chindantassa tādisaṃ vā dukkhaṃ uppādentassa dukkaṭaṃ. Ahikīṭadaṭṭhādīsu pana aññaābādhapaccayā vā lohitaṃ vā mocentassa chindantassa vā anāpatti.
252. சந்த³னக³ண்டி² உப்பன்னா ஹோதீதி சந்த³னக⁴டிகா உப்பன்னா ஹோதி. ஸோ கிர உத்³த⁴ஞ்ச அதோ⁴ ச ஜாலானி பரிக்கி²பாபெத்வா க³ங்கா³ய நதி³யா கீளதி, தஸ்ஸ நதீ³ஸோதேன வுய்ஹமானா சந்த³னக³ண்டி² ஆக³ந்த்வா ஜாலே லக்³கா³, தமஸ்ஸ புரிஸா ஆஹரித்வா அத³ங்ஸு; ஏவங் ஸா உப்பன்னா ஹோதி. இத்³தி⁴பாடிஹாரியந்தி எத்த² விகுப்³ப³னித்³தி⁴பாடிஹாரியங் படிக்கி²த்தங், அதி⁴ட்டா²னித்³தி⁴ பன அப்படிக்கி²த்தாதி வேதி³தப்³பா³.
252.Candanagaṇṭhi uppannāhotīti candanaghaṭikā uppannā hoti. So kira uddhañca adho ca jālāni parikkhipāpetvā gaṅgāya nadiyā kīḷati, tassa nadīsotena vuyhamānā candanagaṇṭhi āgantvā jāle laggā, tamassa purisā āharitvā adaṃsu; evaṃ sā uppannā hoti. Iddhipāṭihāriyanti ettha vikubbaniddhipāṭihāriyaṃ paṭikkhittaṃ, adhiṭṭhāniddhi pana appaṭikkhittāti veditabbā.
ந பி⁴க்க²வே ஸோவண்ணமயோ பத்தோதிஆதீ³ஸு ஸசேபி கி³ஹீ ப⁴த்தக்³கே³ ஸுவண்ணதட்டிகாதீ³ஸு ப்³யஞ்ஜனங் கத்வா உபனாமெந்தி, ஆமஸிதும்பி ந வட்டதி. ப²லிகமயகாசமயகங்ஸமயானி பன தட்டிகாதீ³னி பா⁴ஜனானி புக்³க³லிகபரிபோ⁴கே³னேவ ந வட்டந்தி, ஸங்கி⁴கபரிபோ⁴கே³ன வா கி³ஹிவிகடானி வா வட்டந்தி. ‘‘தம்ப³லோஹமயோபி பத்தோவ ந வட்டதி, தா²லகங் பன வட்டதீ’’தி இத³ங் ஸப்³ப³ங் குருந்தி³யங் வுத்தங். மணிமயோதி எத்த² பன இந்த³னீலாதி³மணிமயோ வுத்தோ. கங்ஸமயோதி எத்த² வட்டலோஹமயோபி ஸங்க³ஹிதோ.
Na bhikkhave sovaṇṇamayo pattotiādīsu sacepi gihī bhattagge suvaṇṇataṭṭikādīsu byañjanaṃ katvā upanāmenti, āmasitumpi na vaṭṭati. Phalikamayakācamayakaṃsamayāni pana taṭṭikādīni bhājanāni puggalikaparibhogeneva na vaṭṭanti, saṅghikaparibhogena vā gihivikaṭāni vā vaṭṭanti. ‘‘Tambalohamayopi pattova na vaṭṭati, thālakaṃ pana vaṭṭatī’’ti idaṃ sabbaṃ kurundiyaṃ vuttaṃ. Maṇimayoti ettha pana indanīlādimaṇimayo vutto. Kaṃsamayoti ettha vaṭṭalohamayopi saṅgahito.
253. லிகி²துந்தி தனுகரணத்தா²யேதங் வுத்தங். பகதிமண்ட³லந்தி மகரத³ந்தச்சி²ன்னகமண்ட³லமேவ.
253.Likhitunti tanukaraṇatthāyetaṃ vuttaṃ. Pakatimaṇḍalanti makaradantacchinnakamaṇḍalameva.
254. ஆவட்டித்வாதி அஞ்ஞமஞ்ஞங் பஹரித்வா. பத்தாதா⁴ரகந்தி எத்த² ‘‘த³ந்தவல்லிவெத்தாதீ³ஹி கதே பூ⁴மிஆதா⁴ரகே தயோ, தா³ருஆதா⁴ரகே த்³வே பத்தே உபரூபரி ட²பேதுங் வட்டதீ’’தி குருந்தி³யங் வுத்தங். மஹாஅட்ட²கதா²யங் பன வுத்தங் – ‘‘பூ⁴மிஆதா⁴ரகே திண்ணங் பத்தானங் அனோகாஸோ, த்³வே ட²பேதுங் வட்டதி. தா³ருஆதா⁴ரகத³ண்டா³தா⁴ரகேஸுபி ஸுஸஜ்ஜிதேஸு ஏஸேவ நயோ. ப⁴மகோடிஸதி³ஸோ பன தா³ருஆதா⁴ரகோ தீஹி த³ண்ட³கேஹி ப³த்³தோ⁴ த³ண்ட³காதா⁴ரோ ச ஏகஸ்ஸபி பத்தஸ்ஸ அனோகாஸோ, தத்த² ட²பெத்வாபி ஹத்தே²ன க³ஹெத்வா ஏவ நிஸீதி³தப்³ப³ங். பூ⁴மியங் பன நிக்குஜ்ஜித்வா ஏகமேவ ட²பேதப்³ப³’’ந்தி.
254.Āvaṭṭitvāti aññamaññaṃ paharitvā. Pattādhārakanti ettha ‘‘dantavallivettādīhi kate bhūmiādhārake tayo, dāruādhārake dve patte uparūpari ṭhapetuṃ vaṭṭatī’’ti kurundiyaṃ vuttaṃ. Mahāaṭṭhakathāyaṃ pana vuttaṃ – ‘‘bhūmiādhārake tiṇṇaṃ pattānaṃ anokāso, dve ṭhapetuṃ vaṭṭati. Dāruādhārakadaṇḍādhārakesupi susajjitesu eseva nayo. Bhamakoṭisadiso pana dāruādhārako tīhi daṇḍakehi baddho daṇḍakādhāro ca ekassapi pattassa anokāso, tattha ṭhapetvāpi hatthena gahetvā eva nisīditabbaṃ. Bhūmiyaṃ pana nikkujjitvā ekameva ṭhapetabba’’nti.
மிட்³ட⁴ந்தேதி ஆலிந்த³கமிட்³டி⁴காதீ³னங் அந்தே. ஸசே பன பரிவத்தெத்வா தத்தே²வ பதிட்டா²தி, ஏவரூபாய வித்தி²ண்ணாய மிட்³டி⁴யா ட²பேதுங் வட்டதி. பரிப⁴ண்ட³ந்தேதி பா³ஹிரபஸ்ஸே கதாய தனுகமிட்³டி⁴காய அந்தே. மிட்³டி⁴யங் வுத்தனயேனேவெத்தா²பி வினிச்ச²யோ வேதி³தப்³போ³.
Miḍḍhanteti ālindakamiḍḍhikādīnaṃ ante. Sace pana parivattetvā tattheva patiṭṭhāti, evarūpāya vitthiṇṇāya miḍḍhiyā ṭhapetuṃ vaṭṭati. Paribhaṇḍanteti bāhirapasse katāya tanukamiḍḍhikāya ante. Miḍḍhiyaṃ vuttanayenevetthāpi vinicchayo veditabbo.
சோளகந்தி யங் பத்த²ரித்வா பத்தோ ட²பீயதி; தஸ்மிங் பன அஸதி கடஸாரகே வா தட்டிகாய வா மத்திகாபரிப⁴ண்ட³கதாய பூ⁴மியா வா யத்த² ந து³ஸ்ஸதி, ததா²ரூபாய வாலிகாய வா ட²பேதுங் வட்டதி. பங்ஸுரஜாதீ³ஸு பன க²ரபூ⁴மியங் வா ட²பெந்தஸ்ஸ து³க்கடங். பத்தமாளகங் இட்ட²காஹி வா தா³ரூஹி வா காதுங் வட்டதி . பத்தகுண்டோ³லிகாதி மஹாமுக²குண்ட³ஸண்டா²னா ப⁴ண்ட³குக்க²லிகா வுச்சதி. யோ லக்³கெ³ய்யாதி யத்த² கத்த²சி லக்³கெ³ந்தஸ்ஸ து³க்கடமேவ. சீவரவங்ஸேபி ப³ந்தி⁴த்வா ட²பேதுங் ந வட்டதி. ப⁴ண்ட³கட்ட²பனத்த²மேவ வா கதங் ஹோது நிஸீத³னஸயனத்த²ங் வா யத்த² கத்த²சி மஞ்சே வா பீடே² வா ட²பெந்தஸ்ஸ து³க்கடங், அஞ்ஞேன பன ப⁴ண்ட³கேன ஸத்³தி⁴ங் ப³ந்தி⁴த்வா ட²பேதுங் வட்டதி. அடனியங் ப³ந்தி⁴த்வா ஓலம்பே³துங் வா வட்டதி, ப³ந்தி⁴த்வாபி உபரி ட²பேதுங் ந வட்டதியேவ. ஸசே பன மஞ்சோ வா பீட²ங் வா உக்கி²பித்வா சீவரவங்ஸாதீ³ஸு அட்டகச²ன்னேன ட²பிதங் ஹோதி, தத்த² ட²பேதுங் வட்டதி. அங்ஸவத்³த⁴னகேன அங்ஸகூடே லக்³கெ³த்வா அங்கே ட²பேதுங் வட்டதி. ச²த்தே ப⁴த்தபூரோபி அங்ஸகூடே லக்³கி³தபத்தோபி ட²பேதுங் ந வட்டதி, ப⁴ண்ட³கேன பன ஸத்³தி⁴ங் ப³ந்தி⁴த்வா வா அட்டகங் கத்வா வா ட²பிதே யோ கோசி ட²பேதுங் வட்டதி.
Coḷakanti yaṃ pattharitvā patto ṭhapīyati; tasmiṃ pana asati kaṭasārake vā taṭṭikāya vā mattikāparibhaṇḍakatāya bhūmiyā vā yattha na dussati, tathārūpāya vālikāya vā ṭhapetuṃ vaṭṭati. Paṃsurajādīsu pana kharabhūmiyaṃ vā ṭhapentassa dukkaṭaṃ. Pattamāḷakaṃ iṭṭhakāhi vā dārūhi vā kātuṃ vaṭṭati . Pattakuṇḍolikāti mahāmukhakuṇḍasaṇṭhānā bhaṇḍakukkhalikā vuccati. Yo laggeyyāti yattha katthaci laggentassa dukkaṭameva. Cīvaravaṃsepi bandhitvā ṭhapetuṃ na vaṭṭati. Bhaṇḍakaṭṭhapanatthameva vā kataṃ hotu nisīdanasayanatthaṃ vā yattha katthaci mañce vā pīṭhe vā ṭhapentassa dukkaṭaṃ, aññena pana bhaṇḍakena saddhiṃ bandhitvā ṭhapetuṃ vaṭṭati. Aṭaniyaṃ bandhitvā olambetuṃ vā vaṭṭati, bandhitvāpi upari ṭhapetuṃ na vaṭṭatiyeva. Sace pana mañco vā pīṭhaṃ vā ukkhipitvā cīvaravaṃsādīsu aṭṭakachannena ṭhapitaṃ hoti, tattha ṭhapetuṃ vaṭṭati. Aṃsavaddhanakena aṃsakūṭe laggetvā aṅke ṭhapetuṃ vaṭṭati. Chatte bhattapūropi aṃsakūṭe laggitapattopi ṭhapetuṃ na vaṭṭati, bhaṇḍakena pana saddhiṃ bandhitvā vā aṭṭakaṃ katvā vā ṭhapite yo koci ṭhapetuṃ vaṭṭati.
255. பத்தஹத்தே²னாதி எத்த² ந கேவலங் யஸ்ஸ பத்தோ ஹத்தே², ஸோ ஏவ பத்தஹத்தோ², ந கேவலஞ்ச கவாடமேவ பணாமேதுங் ந லப⁴தி; அபிச கோ² பன ஹத்தே² வா பிட்டி²பாதே³ வா யத்த² கத்த²சி ஸரீராவயவே பத்தஸ்மிங் ஸதி ஹத்தே²ன வா பாதே³ன வா ஸீஸேன வா யேன கேனசி ஸரீராவயவேன கவாடங் வா பணாமேதுங் க⁴டிகங் வா உக்கி²பிதுங் ஸூசிங் வா குஞ்சிகாய அபாபுரிதுங் ந லப⁴தி. அங்ஸகூடே பன பத்தங் லக்³கெ³த்வா யதா²ஸுக²ங் அவாபுரிதுங் லப⁴தி.
255.Pattahatthenāti ettha na kevalaṃ yassa patto hatthe, so eva pattahattho, na kevalañca kavāṭameva paṇāmetuṃ na labhati; apica kho pana hatthe vā piṭṭhipāde vā yattha katthaci sarīrāvayave pattasmiṃ sati hatthena vā pādena vā sīsena vā yena kenaci sarīrāvayavena kavāṭaṃ vā paṇāmetuṃ ghaṭikaṃ vā ukkhipituṃ sūciṃ vā kuñcikāya apāpurituṃ na labhati. Aṃsakūṭe pana pattaṃ laggetvā yathāsukhaṃ avāpurituṃ labhati.
தும்ப³கடாஹந்தி லாபு³கடாஹங் வுச்சதி, தங் பரிஹரிதுங் ந வட்டதி. லபி⁴த்வா பன தாவகாலிகங் பரிபு⁴ஞ்ஜிதுங் வட்டதி. க⁴டிகடாஹேபி ஏஸேவ நயோ. க⁴டிகடாஹந்தி க⁴டிகபாலங். அபு⁴ங் மேதி உத்ராஸவசனமேதங். ஸப்³ப³பங்ஸுகூலிகேனாதி எத்த² சீவரஞ்ச மஞ்சபீட²ஞ்ச பங்ஸுகூலங் வட்டதி, அஜ்ஜோ²ஹரணீயங் பன தி³ன்னகமேவ க³ஹேதப்³ப³ங்.
Tumbakaṭāhanti lābukaṭāhaṃ vuccati, taṃ pariharituṃ na vaṭṭati. Labhitvā pana tāvakālikaṃ paribhuñjituṃ vaṭṭati. Ghaṭikaṭāhepi eseva nayo. Ghaṭikaṭāhanti ghaṭikapālaṃ. Abhuṃ meti utrāsavacanametaṃ. Sabbapaṃsukūlikenāti ettha cīvarañca mañcapīṭhañca paṃsukūlaṃ vaṭṭati, ajjhoharaṇīyaṃ pana dinnakameva gahetabbaṃ.
சலகானீதி சப்³பெ³த்வா அபவித்³தா⁴மிஸானி. அட்டி²கானீதி மச்ச²மங்ஸஅட்டி²கானி. உச்சி²ட்டோ²த³கந்தி முக²விக்கா²லனோத³கங். ஏதேஸு யங்கிஞ்சி பத்தேன நீஹரந்தஸ்ஸ து³க்கடங். பத்தங் படிக்³க³ஹங் கத்வா ஹத்த²ங் தோ⁴விதும்பி ந லப⁴தி. ஹத்த²தோ⁴தபாத³தோ⁴தஉத³கம்பி பத்தே ஆகிரித்வா நீஹரிதுங் ந வட்டதி. அனுச்சி²ட்ட²ங் ஸுத்³த⁴பத்தங் உச்சி²ட்ட²ஹத்தே²ன க³ண்ஹிதுங் ந வட்டதி, வாமஹத்தே²ன பனெத்த² உத³கங் ஆஸிஞ்சித்வா ஏகங் உத³கக³ண்டு³ஸங் க³ஹெத்வா உச்சி²ட்ட²ஹத்தே²ன க³ண்ஹிதுங் வட்டதி. எத்தாவதாபி ஹி ஸோ உச்சி²ட்ட²பத்தோ ஹோதி, ஹத்த²ங் பன ப³ஹி உத³கேன விக்கா²லெத்வா க³ஹேதுங் வட்டதி. மச்ச²மங்ஸப²லாப²லாதீ³னி கா²த³ந்தோ யங் தத்த² அட்டி²ங் வா சலகங் வா ச²ட்³டே³துகாமோ ஹோதி, தங் பத்தே ட²பேதுங் ந லப⁴தி. யங் பன படிகா²தி³துகாமோ ஹோதி, தங் பத்தே ட²பேதுங் லப⁴தி. அட்டி²ககண்டகாதீ³னி தத்தே²வ கத்வா ஹத்தே²ன லுஞ்சித்வா கா²தி³துங் வட்டதி. முக²தோ நீஹடங் பன யங்கிஞ்சி புன கா²தி³துகாமோ ஹோதி, தங் பத்தே ட²பேதுங் ந லப⁴தி. ஸிங்கி³வேரனாளிகேரக²ண்டா³னி ட³ங்ஸித்வா புன ட²பேதுங் லப⁴தி.
Calakānīti cabbetvā apaviddhāmisāni. Aṭṭhikānīti macchamaṃsaaṭṭhikāni. Ucchiṭṭhodakanti mukhavikkhālanodakaṃ. Etesu yaṃkiñci pattena nīharantassa dukkaṭaṃ. Pattaṃ paṭiggahaṃ katvā hatthaṃ dhovitumpi na labhati. Hatthadhotapādadhotaudakampi patte ākiritvā nīharituṃ na vaṭṭati. Anucchiṭṭhaṃ suddhapattaṃ ucchiṭṭhahatthena gaṇhituṃ na vaṭṭati, vāmahatthena panettha udakaṃ āsiñcitvā ekaṃ udakagaṇḍusaṃ gahetvā ucchiṭṭhahatthena gaṇhituṃ vaṭṭati. Ettāvatāpi hi so ucchiṭṭhapatto hoti, hatthaṃ pana bahi udakena vikkhāletvā gahetuṃ vaṭṭati. Macchamaṃsaphalāphalādīni khādanto yaṃ tattha aṭṭhiṃ vā calakaṃ vā chaḍḍetukāmo hoti, taṃ patte ṭhapetuṃ na labhati. Yaṃ pana paṭikhāditukāmo hoti, taṃ patte ṭhapetuṃ labhati. Aṭṭhikakaṇṭakādīni tattheva katvā hatthena luñcitvā khādituṃ vaṭṭati. Mukhato nīhaṭaṃ pana yaṃkiñci puna khāditukāmo hoti, taṃ patte ṭhapetuṃ na labhati. Siṅgiveranāḷikerakhaṇḍāni ḍaṃsitvā puna ṭhapetuṃ labhati.
256. நமதகந்தி ஸத்த²கவேட²னகங் பிலோதிகக²ண்ட³ங். த³ண்ட³ஸத்த²கந்தி பிப்ப²லகங் வா அஞ்ஞம்பி வா யங்கிஞ்சி த³ண்ட³ங் யோஜெத்வா கதஸத்த²கங்.
256.Namatakanti satthakaveṭhanakaṃ pilotikakhaṇḍaṃ. Daṇḍasatthakanti pipphalakaṃ vā aññampi vā yaṃkiñci daṇḍaṃ yojetvā katasatthakaṃ.
கண்ணகிதா ஹொந்தீதி மலக்³க³ஹிதா ஹொந்தி. கிண்ணேன பூரேதுந்தி கிண்ணசுண்ணேன பூரேதுங். ஸத்துயாதி ஹலித்³தி³மிஸ்ஸகேன பிட்ட²சுண்ணேன. ஸரிதகந்தி பாஸாணசுண்ணங் வுச்சதி; தேன பூரேதுங் அனுஜானாமீதி அத்தோ². மது⁴ஸித்த²கேன ஸாரேதுந்தி மது⁴ஸித்த²கேன மக்கே²துங். ஸரிதகங் பரிபி⁴ஜ்ஜதீதி தங் மக்கி²தமது⁴ஸித்த²கங் பி⁴ஜ்ஜதி. ஸரிதஸிபாடிகந்தி மது⁴ஸித்த²கபிலோதிகங்; ஸத்த²கோஸகஸிபாடியா பன ஸரிதஸிபாடிகாய அனுலோமாதி குருந்தி³யங் வுத்தங். கதி²னந்தி நிஸ்ஸேணிம்பி தத்த² அத்த²ரிதப்³ப³கடஸாரககிலஞ்ஜானங் அஞ்ஞதரம்பி. கதி²னரஜ்ஜுந்தி யாய து³பட்டசீவரங் ஸிப்³ப³ந்தா கதி²னே சீவரம்பி ப³ந்த⁴ந்தி. கதி²னங் நப்பஹோதீதி தீ³க⁴ஸ்ஸ பி⁴க்கு²னோ பமாணேன கதங் கதி²னங்; தத்த² ரஸ்ஸஸ்ஸ பி⁴க்கு²னோ சீவரங் பத்த²ரியமானங் நப்பஹோதி, அந்தோயேவ ஹோதி; த³ண்ட³கே ந பாபுணாதீதி அத்தோ². த³ண்ட³கதி²னந்தி தஸ்ஸ மஜ்ஜே² இதரஸ்ஸ பி⁴க்கு²னோ பமாணேன அஞ்ஞங் நிஸ்ஸேணிங் ப³ந்தி⁴துங் அனுஜானாமீதி அத்தோ².
Kaṇṇakitā hontīti malaggahitā honti. Kiṇṇena pūretunti kiṇṇacuṇṇena pūretuṃ. Sattuyāti haliddimissakena piṭṭhacuṇṇena. Saritakanti pāsāṇacuṇṇaṃ vuccati; tena pūretuṃ anujānāmīti attho. Madhusitthakena sāretunti madhusitthakena makkhetuṃ. Saritakaṃ paribhijjatīti taṃ makkhitamadhusitthakaṃ bhijjati. Saritasipāṭikanti madhusitthakapilotikaṃ; satthakosakasipāṭiyā pana saritasipāṭikāya anulomāti kurundiyaṃ vuttaṃ. Kathinanti nisseṇimpi tattha attharitabbakaṭasārakakilañjānaṃ aññatarampi. Kathinarajjunti yāya dupaṭṭacīvaraṃ sibbantā kathine cīvarampi bandhanti. Kathinaṃ nappahotīti dīghassa bhikkhuno pamāṇena kataṃ kathinaṃ; tattha rassassa bhikkhuno cīvaraṃ patthariyamānaṃ nappahoti, antoyeva hoti; daṇḍake na pāpuṇātīti attho. Daṇḍakathinanti tassa majjhe itarassa bhikkhuno pamāṇena aññaṃ nisseṇiṃ bandhituṃ anujānāmīti attho.
பி³த³லகந்தி த³ண்ட³கதி²னப்பமாணேன கடஸாரகஸ்ஸ பரியந்தே படிஸங்ஹரித்வா து³கு³ணகரணங். ஸலாகந்தி து³பட்டசீவரஸ்ஸ அந்தரே பவேஸனஸலாகங். வினந்த⁴னரஜ்ஜுந்தி மஹானிஸ்ஸேணியா ஸத்³தி⁴ங் கு²த்³த³கங் நிஸ்ஸேணிங் வினந்தி⁴துங் ரஜ்ஜுங். வினந்த⁴னஸுத்தந்தி கு²த்³த³கனிஸ்ஸேணியா சீவரங் வினந்தி⁴துங் ஸுத்தகங். வினந்தி⁴த்வா சீவரங் ஸிப்³பே³துந்தி தேன ஸுத்தகேன தத்த² சீவரங் வினந்தி⁴த்வா ஸிப்³பி³துங். விஸமா ஹொந்தீதி காசி கு²த்³த³கா ஹொந்தி, காசி மஹந்தா. களிம்ப⁴கந்தி பமாணஸஞ்ஞாகரணங் யங்கிஞ்சி தாலபண்ணாதி³ங். மோக⁴ஸுத்தகந்தி வட்³ட⁴கீனங் தா³ரூஸு காளஸுத்தேன விய ஹலித்³தி³ஸுத்தேன ஸஞ்ஞாகரணங் . அங்கு³லியா படிக்³க³ண்ஹந்தீதி ஸூசிமுக²ங் அங்கு³லியா படிச்ச²ந்தி. படிக்³க³ஹந்தி அங்கு³லிகோஸகங்.
Bidalakanti daṇḍakathinappamāṇena kaṭasārakassa pariyante paṭisaṃharitvā duguṇakaraṇaṃ. Salākanti dupaṭṭacīvarassa antare pavesanasalākaṃ. Vinandhanarajjunti mahānisseṇiyā saddhiṃ khuddakaṃ nisseṇiṃ vinandhituṃ rajjuṃ. Vinandhanasuttanti khuddakanisseṇiyā cīvaraṃ vinandhituṃ suttakaṃ. Vinandhitvā cīvaraṃ sibbetunti tena suttakena tattha cīvaraṃ vinandhitvā sibbituṃ. Visamā hontīti kāci khuddakā honti, kāci mahantā. Kaḷimbhakanti pamāṇasaññākaraṇaṃ yaṃkiñci tālapaṇṇādiṃ. Moghasuttakanti vaḍḍhakīnaṃ dārūsu kāḷasuttena viya haliddisuttena saññākaraṇaṃ . Aṅguliyā paṭiggaṇhantīti sūcimukhaṃ aṅguliyā paṭicchanti. Paṭiggahanti aṅgulikosakaṃ.
257. ஆவேஸனவித்த²கங் நாம யங்கிஞ்சி பாதிசங்கோடகாதி³. உச்சவத்து²கந்தி பங்ஸுங் ஆகிரித்வா உச்சவத்து²கங் காதுங் அனுஜானாமீதி அத்தோ². ஓகு³ம்பெ²த்வா உல்லித்தாவலித்தங் காதுந்தி ச²த³னங் ஓது⁴னித்வா க⁴னத³ண்ட³கங் கத்வா அந்தோ சேவ ப³ஹி ச மத்திகாய லிம்பிதுந்தி அத்தோ². கோ³க⁴ங்ஸிகாயாதி வேளுங் வா ருக்க²த³ண்ட³ங் வா அந்தோகத்வா தேன ஸத்³தி⁴ங் ஸங்க⁴ரிதுந்தி அத்தோ². ப³ந்த⁴னரஜ்ஜுந்தி ததா² ஸங்க⁴ரிதஸ்ஸ ப³ந்த⁴னரஜ்ஜுங்.
257.Āvesanavitthakaṃ nāma yaṃkiñci pāticaṅkoṭakādi. Uccavatthukanti paṃsuṃ ākiritvā uccavatthukaṃ kātuṃ anujānāmīti attho. Ogumphetvā ullittāvalittaṃ kātunti chadanaṃ odhunitvā ghanadaṇḍakaṃ katvā anto ceva bahi ca mattikāya limpitunti attho. Goghaṃsikāyāti veḷuṃ vā rukkhadaṇḍaṃ vā antokatvā tena saddhiṃ saṅgharitunti attho. Bandhanarajjunti tathā saṅgharitassa bandhanarajjuṃ.
258. கடச்சு²பரிஸ்ஸாவனங் நாம தீஸு த³ண்ட³கேஸு வினந்தி⁴த்வா கதங்.
258.Kaṭacchuparissāvanaṃ nāma tīsu daṇḍakesu vinandhitvā kataṃ.
259. யோ ந த³தெ³ய்யாதி அபரிஸ்ஸாவனகஸ்ஸேவ யோ ந த³தா³தி, தஸ்ஸ ஆபத்தி. யோ பன அத்தனோ ஹத்தே² பரிஸ்ஸாவனே விஜ்ஜமானேபி யாசதி, தஸ்ஸ ந அகாமா தா³தப்³ப³ங். த³ண்ட³பரிஸ்ஸாவனந்தி ரஜகானங் கா²ரபரிஸ்ஸாவனங் விய சதூஸு பாதே³ஸு ப³த்³த⁴னிஸ்ஸேணிகாய ஸாடகங் ப³ந்தி⁴த்வா மஜ்ஜே²த³ண்ட³கே உத³கங் ஆஸிஞ்சிதப்³ப³ங், தங் உபோ⁴பி கொட்டா²ஸே பூரெத்வா பரிஸ்ஸவதி. ஒத்த²ரகங் நாம யங் உத³கே ஒத்த²ரித்வா க⁴டகேன உத³கங் க³ண்ஹந்தி, தஞ்ஹி சதூஸு த³ண்ட³கேஸு வத்த²ங் ப³ந்தி⁴த்வா உத³கே சத்தாரோ கா²ணுகே நிக²ணித்வா தேஸு ப³ந்தி⁴த்வா ஸப்³ப³பரியந்தே உத³கதோ மோசெத்வா மஜ்ஜே² ஒத்த²ரித்வா க⁴டேன உத³கங் க³ண்ஹந்தி. மகஸகுடிகாதி சீவரகுடிகா வுச்சதி.
259.Yo na dadeyyāti aparissāvanakasseva yo na dadāti, tassa āpatti. Yo pana attano hatthe parissāvane vijjamānepi yācati, tassa na akāmā dātabbaṃ. Daṇḍaparissāvananti rajakānaṃ khāraparissāvanaṃ viya catūsu pādesu baddhanisseṇikāya sāṭakaṃ bandhitvā majjhedaṇḍake udakaṃ āsiñcitabbaṃ, taṃ ubhopi koṭṭhāse pūretvā parissavati. Ottharakaṃ nāma yaṃ udake ottharitvā ghaṭakena udakaṃ gaṇhanti, tañhi catūsu daṇḍakesu vatthaṃ bandhitvā udake cattāro khāṇuke nikhaṇitvā tesu bandhitvā sabbapariyante udakato mocetvā majjhe ottharitvā ghaṭena udakaṃ gaṇhanti. Makasakuṭikāti cīvarakuṭikā vuccati.
260. அபி⁴ஸன்னகாயாதி ஸெம்ஹாதி³தோ³ஸுஸ்ஸன்னகாயா. அக்³க³ளவட்டி நாம த்³வாரபா³ஹாய ஸமப்பமாணோயேவ அக்³க³ளத்த²ம்போ⁴ வுச்சதி, யத்த² தீணி சத்தாரி சி²த்³தா³னி கத்வா ஸூசியோ தெ³ந்தி. கபிஸீஸகங் நாம த்³வாரபா³ஹங் விஜ்ஜி²த்வா தத்த² பவேஸிதோ அக்³க³ளபாஸகோ வுச்சதி. ஸூசிகாதி தத்த² மஜ்ஜே² சி²த்³த³ங் கத்வா பவேஸிதா. க⁴டிகாதி உபரி யோஜிதா. மண்ட³லிகங் காதுந்தி நீசவத்து²கங் சினிதுங். தூ⁴மனெத்தந்தி தூ⁴மனிக்க²மனசி²த்³த³ங். வாஸேதுந்தி க³ந்தே⁴ன வாஸேதுங். உத³கட்டா²னந்தி உத³கத்த²பனட்டா²னங். தத்த² க⁴டேன உத³கங் ட²பெத்வா ஸராவகேன வளஞ்ஜேதப்³ப³ங். கொட்ட²கோதி த்³வாரகொட்ட²கோ.
260.Abhisannakāyāti semhādidosussannakāyā. Aggaḷavaṭṭi nāma dvārabāhāya samappamāṇoyeva aggaḷatthambho vuccati, yattha tīṇi cattāri chiddāni katvā sūciyo denti. Kapisīsakaṃ nāma dvārabāhaṃ vijjhitvā tattha pavesito aggaḷapāsako vuccati. Sūcikāti tattha majjhe chiddaṃ katvā pavesitā. Ghaṭikāti upari yojitā. Maṇḍalikaṃ kātunti nīcavatthukaṃ cinituṃ. Dhūmanettanti dhūmanikkhamanachiddaṃ. Vāsetunti gandhena vāsetuṃ. Udakaṭṭhānanti udakatthapanaṭṭhānaṃ. Tattha ghaṭena udakaṃ ṭhapetvā sarāvakena vaḷañjetabbaṃ. Koṭṭhakoti dvārakoṭṭhako.
261. திஸ்ஸோ படிச்சா²தி³யோதி எத்த² ஜந்தாக⁴ரபடிச்சா²தி³ ச உத³கபடிச்சா²தி³ ச பரிகம்மங் கரொந்தஸ்ஸேவ வட்டதி, ஸேஸேஸு அபி⁴வாத³னாதீ³ஸு ந வட்டதி. வத்த²படிச்சா²தி³ ஸப்³ப³கம்மேஸு வட்டதி. உத³கங் ந ஹோதீதி ந்ஹானோத³கங் ந ஹோதி.
261.Tissopaṭicchādiyoti ettha jantāgharapaṭicchādi ca udakapaṭicchādi ca parikammaṃ karontasseva vaṭṭati, sesesu abhivādanādīsu na vaṭṭati. Vatthapaṭicchādi sabbakammesu vaṭṭati. Udakaṃ na hotīti nhānodakaṃ na hoti.
262. துலந்தி பண்ணிகானங் விய உத³கஉப்³பா³ஹனகதுலங். கரகடகோ வுச்சதி கோ³ணே வா யோஜெத்வா ஹத்தே²ஹி வா க³ஹெத்வா தீ³க⁴வரத்தாதீ³ஹி ஆகட்³ட⁴னயந்தங். சக்கவட்டகந்தி அரஹடக⁴டியந்தங். சம்மக²ண்ட³ங் நாம துலாய வா கரகடகே வா யோஜேதப்³ப³கங் சம்மபா⁴ஜனங். பாகடா ஹோதீதி அபரிக்கி²த்தா ஹோதி. உத³கபுஞ்ச²னீதி த³ண்ட³மயாபி விஸாணமயாபி தா³ருமயாபி வட்டதி, தஸ்ஸா அஸதி சோளகேனாபி உத³கங் பச்சுத்³த⁴ரிதுங் வட்டதி.
262.Tulanti paṇṇikānaṃ viya udakaubbāhanakatulaṃ. Karakaṭako vuccati goṇe vā yojetvā hatthehi vā gahetvā dīghavarattādīhi ākaḍḍhanayantaṃ. Cakkavaṭṭakanti arahaṭaghaṭiyantaṃ. Cammakhaṇḍaṃ nāma tulāya vā karakaṭake vā yojetabbakaṃ cammabhājanaṃ. Pākaṭā hotīti aparikkhittā hoti. Udakapuñchanīti daṇḍamayāpi visāṇamayāpi dārumayāpi vaṭṭati, tassā asati coḷakenāpi udakaṃ paccuddharituṃ vaṭṭati.
263. உத³கமாதிகந்தி உத³கஸ்ஸ ஆக³மனமாதிகங். நில்லேக²ஜந்தாக⁴ரங் நாம ஆவித்³த⁴பக்க²பாஸகங் வுச்சதி, கோ³பானஸீனங் உபரி மண்ட³லே பக்க²பாஸகே ட²பெத்வா கதகூடச்ச²த³னஸ்ஸேதங் நாமங். சாதுமாஸங் நிஸீத³னேனாதி நிஸீத³னேன சத்தாரோ மாஸே ந விப்பவஸிதப்³ப³ந்தி அத்தோ².
263.Udakamātikanti udakassa āgamanamātikaṃ. Nillekhajantāgharaṃ nāma āviddhapakkhapāsakaṃ vuccati, gopānasīnaṃ upari maṇḍale pakkhapāsake ṭhapetvā katakūṭacchadanassetaṃ nāmaṃ. Cātumāsaṃ nisīdanenāti nisīdanena cattāro māse na vippavasitabbanti attho.
264. புப்பா²பி⁴கிண்ணேஸூதி புப்பே²ஹி ஸந்த²தேஸு. நமதகங் நாம ஏளகலோமேஹி கதங் அவாயிமங் சம்மக²ண்ட³பரிஹாரேன பரிபு⁴ஞ்ஜிதப்³ப³ங். ஆஸித்தகூபதா⁴னங் நாம தம்ப³லோஹேன வா ரஜதேன வா கதாய பேளாய ஏதங் அதி⁴வசனங், படிக்கி²த்தத்தா பன தா³ருமயாபி ந வட்டதி. மளோரிகாதி த³ண்ட³தா⁴ரகோ வுச்சதி. யட்டி²ஆதா⁴ரகபண்ணாதா⁴ரகபச்சி²கபிட்டா²னிபி எத்தே²வ பவிட்டா²னி. ஆதா⁴ரகஸங்கே²பக³மனதோ ஹி பட்டா²ய சி²த்³த³ங் வித்³த⁴ம்பி அவித்³த⁴ம்பி வட்டதியேவ. ஏகபா⁴ஜனேதி எத்த² ஸசே ஏகோ பி⁴க்கு² பா⁴ஜனதோ ப²லங் வா பூவங் வா க³ஹெத்வா க³ச்ச²தி, தஸ்மிங் அபக³தே இதரஸ்ஸ ஸேஸகங் பு⁴ஞ்ஜிதுங் வட்டதி. இதரஸ்ஸாபி தஸ்மிங் கீ²ணே புன க³ஹேதுங் வட்டதி.
264.Pupphābhikiṇṇesūti pupphehi santhatesu. Namatakaṃ nāma eḷakalomehi kataṃ avāyimaṃ cammakhaṇḍaparihārena paribhuñjitabbaṃ. Āsittakūpadhānaṃ nāma tambalohena vā rajatena vā katāya peḷāya etaṃ adhivacanaṃ, paṭikkhittattā pana dārumayāpi na vaṭṭati. Maḷorikāti daṇḍadhārako vuccati. Yaṭṭhiādhārakapaṇṇādhārakapacchikapiṭṭhānipi ettheva paviṭṭhāni. Ādhārakasaṅkhepagamanato hi paṭṭhāya chiddaṃ viddhampi aviddhampi vaṭṭatiyeva. Ekabhājaneti ettha sace eko bhikkhu bhājanato phalaṃ vā pūvaṃ vā gahetvā gacchati, tasmiṃ apagate itarassa sesakaṃ bhuñjituṃ vaṭṭati. Itarassāpi tasmiṃ khīṇe puna gahetuṃ vaṭṭati.
265. அட்ட²ஹங்கே³ஹீதி எத்த² ஏகேகேனபி அங்கே³ன ஸமன்னாக³தஸ்ஸ அந்தோஸீமாய வா நிஸ்ஸீமங் க³ந்த்வா நதீ³ஆதீ³ஸு வா நிக்குஜ்ஜிதுங் வட்டதியேவ. ஏவங் நிக்குஜ்ஜிதே பன பத்தே தஸ்ஸ கே³ஹே கோசி தெ³ய்யத⁴ம்மோ ந க³ஹேதப்³போ³ – ‘‘அஸுகஸ்ஸ கே³ஹே பி⁴க்க²ங் மா க³ண்ஹித்தா²’’தி அஞ்ஞேஸு விஹாரேஸுபி பேஸேதப்³ப³ங். உக்குஜ்ஜனகாலே பன யாவததியங் யாசாபெத்வா ஹத்த²பாஸங் விஜஹாபெத்வா ஞத்திது³தியகம்மேன உக்குஜ்ஜிதப்³போ³.
265.Aṭṭhahaṅgehīti ettha ekekenapi aṅgena samannāgatassa antosīmāya vā nissīmaṃ gantvā nadīādīsu vā nikkujjituṃ vaṭṭatiyeva. Evaṃ nikkujjite pana patte tassa gehe koci deyyadhammo na gahetabbo – ‘‘asukassa gehe bhikkhaṃ mā gaṇhitthā’’ti aññesu vihāresupi pesetabbaṃ. Ukkujjanakāle pana yāvatatiyaṃ yācāpetvā hatthapāsaṃ vijahāpetvā ñattidutiyakammena ukkujjitabbo.
268. புரக்க²த்வாதி அக்³க³தோ கத்வா. ஸங்ஹரந்தூதி ஸங்ஹரியந்து. சேலபடிகந்தி சேலஸந்த²ரங். ஸோ கிர ‘‘ஸசே அஹங் புத்தங் லச்சா²மி, அக்கமிஸ்ஸதி மே ப⁴க³வா சேலபடிக’’ந்தி இமினா அஜ்ஜா²ஸயேன ஸந்த²ரி, அப⁴ப்³போ³ சேஸ புத்தலாபா⁴ய; தஸ்மா ப⁴க³வா ந அக்கமி. யதி³ அக்கமெய்ய, பச்சா² புத்தங் அலப⁴ந்தோ ‘‘நாயங் ஸப்³ப³ஞ்ஞூ’’தி தி³ட்டி²ங் க³ண்ஹெய்ய. இத³ங் தாவ ப⁴க³வதோ அனக்கமனே காரணங். யஸ்மா பன பி⁴க்கூ²பி யே அஜானந்தா அக்கமெய்யுங், தே கி³ஹீனங் பரிபூ⁴தா ப⁴வெய்யுங்; தஸ்மா பி⁴க்கூ² பரிப⁴வதோ மோசேதுங் ஸிக்கா²பத³ங் பஞ்ஞபேஸி. இத³ங் ஸிக்கா²பத³பஞ்ஞாபனே காரணங்.
268.Purakkhatvāti aggato katvā. Saṃharantūti saṃhariyantu. Celapaṭikanti celasantharaṃ. So kira ‘‘sace ahaṃ puttaṃ lacchāmi, akkamissati me bhagavā celapaṭika’’nti iminā ajjhāsayena santhari, abhabbo cesa puttalābhāya; tasmā bhagavā na akkami. Yadi akkameyya, pacchā puttaṃ alabhanto ‘‘nāyaṃ sabbaññū’’ti diṭṭhiṃ gaṇheyya. Idaṃ tāva bhagavato anakkamane kāraṇaṃ. Yasmā pana bhikkhūpi ye ajānantā akkameyyuṃ, te gihīnaṃ paribhūtā bhaveyyuṃ; tasmā bhikkhū paribhavato mocetuṃ sikkhāpadaṃ paññapesi. Idaṃ sikkhāpadapaññāpane kāraṇaṃ.
மங்க³லத்தா²ய யாசியமானேனாதி அபக³தக³ப்³பா⁴ வா ஹோது க³ருக³ப்³பா⁴ வா, ஏவரூபேஸு டா²னேஸு மங்க³லத்தா²ய யாசியமானேன அக்கமிதுங் வட்டதி. தோ⁴தபாத³கங் நாம பாத³தோ⁴வனட்டா²னே தோ⁴தேஹி பாதே³ஹி அக்கமனத்தா²ய பச்சத்த²ரணங் அத்த²தங் ஹோதி, தங் அக்கமிதுங் வட்டதி.
Maṅgalatthāya yāciyamānenāti apagatagabbhā vā hotu garugabbhā vā, evarūpesu ṭhānesu maṅgalatthāya yāciyamānena akkamituṃ vaṭṭati. Dhotapādakaṃ nāma pādadhovanaṭṭhāne dhotehi pādehi akkamanatthāya paccattharaṇaṃ atthataṃ hoti, taṃ akkamituṃ vaṭṭati.
269. கதகங் நாம பது³மகண்ணிகாகாரங் பாத³க⁴ங்ஸனத்த²ங் கண்டகே உட்டா²பெத்வா கதங். தங் வட்டங் வா ஹோது சதுரஸ்ஸாதி³பே⁴த³ங் வா, பா³ஹுலிகானுயோக³த்தா படிக்கி²த்தமேவ, நேவ படிக்³க³ஹேதுங் ந பரிபு⁴ஞ்ஜிதுங் வட்டதி. ஸக்க²ராதி பாஸாணோ வுச்சதி; பாஸாணபே²ணகோபி வட்டதி. விதூ⁴பனந்தி வீஜனீ வுச்சதி . தாலவண்டங் பன தாலபண்ணேஹி வா கதங் ஹோது வேளுத³ந்தவிலீவேஹி வா மோரபிஞ்சே²ஹி வா சம்மவிகதீஹி வா ஸப்³ப³ங் வட்டதி. மகஸபீ³ஜனீ த³ந்தமயவிஸாணமயத³ண்ட³காபி வட்டதி, வாகமயபீ³ஜனியா கேதகபாரோஹகுந்தாலபண்ணாதி³மயாபி ஸங்க³ஹிதா.
269.Katakaṃ nāma padumakaṇṇikākāraṃ pādaghaṃsanatthaṃ kaṇṭake uṭṭhāpetvā kataṃ. Taṃ vaṭṭaṃ vā hotu caturassādibhedaṃ vā, bāhulikānuyogattā paṭikkhittameva, neva paṭiggahetuṃ na paribhuñjituṃ vaṭṭati. Sakkharāti pāsāṇo vuccati; pāsāṇapheṇakopi vaṭṭati. Vidhūpananti vījanī vuccati . Tālavaṇṭaṃ pana tālapaṇṇehi vā kataṃ hotu veḷudantavilīvehi vā morapiñchehi vā cammavikatīhi vā sabbaṃ vaṭṭati. Makasabījanī dantamayavisāṇamayadaṇḍakāpi vaṭṭati, vākamayabījaniyā ketakapārohakuntālapaṇṇādimayāpi saṅgahitā.
270. கி³லானஸ்ஸ ச²த்தந்தி எத்த² யஸ்ஸ காயடா³ஹோ வா பித்தகோபோ வா ஹோதி, சக்கு² வா து³ப்³ப³லங், அஞ்ஞோ வா கோசி ஆபா³தோ⁴ வினா ச²த்தேன உப்பஜ்ஜதி, தஸ்ஸ கா³மே வா அரஞ்ஞே வா ச²த்தங் வட்டதி. வஸ்ஸே பன சீவரகு³த்தத்த²ங் வாளமிக³சோரப⁴யேஸு ச அத்தகு³த்தத்த²ம்பி வட்டதி. ஏகபண்ணச்ச²த்தங் பன ஸப்³ப³த்தே²வ வட்டதி.
270.Gilānassa chattanti ettha yassa kāyaḍāho vā pittakopo vā hoti, cakkhu vā dubbalaṃ, añño vā koci ābādho vinā chattena uppajjati, tassa gāme vā araññe vā chattaṃ vaṭṭati. Vasse pana cīvaraguttatthaṃ vāḷamigacorabhayesu ca attaguttatthampi vaṭṭati. Ekapaṇṇacchattaṃ pana sabbattheva vaṭṭati.
அஸிஸ்ஸாதி அஸி அஸ்ஸ. விஜ்ஜோதலதீதி விஜ்ஜோததி. த³ண்ட³ஸம்முதிந்தி எத்த² பமாணயுத்தோ சதுஹத்தோ²யேவ த³ண்டோ³ ஸம்மன்னித்வா தா³தப்³போ³. ததோ ஊனாதிரித்தோ வினாபி ஸம்முதியா ஸப்³பே³ஸங் வட்டதி. ஸிக்கா பன அகி³லானஸ்ஸ ந வட்டதி, கி³லானஸ்ஸாபி ஸம்மன்னித்வாவ தா³தப்³பா³.
Asissāti asi assa. Vijjotalatīti vijjotati. Daṇḍasammutinti ettha pamāṇayutto catuhatthoyeva daṇḍo sammannitvā dātabbo. Tato ūnātiritto vināpi sammutiyā sabbesaṃ vaṭṭati. Sikkā pana agilānassa na vaṭṭati, gilānassāpi sammannitvāva dātabbā.
273. ரோமந்த²கஸ்ஸாதி எத்த² ட²பெத்வா ரோமந்த²கங் ஸேஸானங் ஆக³தங் உக்³கா³ரங் முகே² ஸந்தா⁴ரெத்வா கி³லந்தானங் ஆபத்தி. ஸசே பன அஸந்தா⁴ரிதமேவ பரக³லங் க³ச்ச²தி, வட்டதி.
273.Romanthakassāti ettha ṭhapetvā romanthakaṃ sesānaṃ āgataṃ uggāraṃ mukhe sandhāretvā gilantānaṃ āpatti. Sace pana asandhāritameva paragalaṃ gacchati, vaṭṭati.
யங் தி³ய்யமானந்தி யங் தா³யகேஹி தி³ய்யமானங் படிக்³க³ஹிதபா⁴ஜனதோ ப³ஹி பதிதங், தங் பி⁴க்கு²னா ஸாமங் க³ஹெத்வா பரிபு⁴ஞ்ஜிதுங் அனுஜானாமீதி அத்தோ². இத³ங் போ⁴ஜனவக்³கே³ வண்ணிதமேவ.
Yaṃ diyyamānanti yaṃ dāyakehi diyyamānaṃ paṭiggahitabhājanato bahi patitaṃ, taṃ bhikkhunā sāmaṃ gahetvā paribhuñjituṃ anujānāmīti attho. Idaṃ bhojanavagge vaṇṇitameva.
274. குப்பங் கரிஸ்ஸாமீதி ஸத்³த³ங் கரிஸ்ஸாமி. நகா²தீ³ஹி நக²ச்சே²த³னே ஆபத்தி நத்தி², அனுரக்க²ணத்த²ங் பன நக²ச்சே²த³னங் அனுஞ்ஞாதங். வீஸதிமட்ட²ந்தி வீஸதிபி நகே² லிகி²தமட்டே² காராபெந்தி. மலமத்தந்தி நக²தோ மலமத்தங் அபகட்³டி⁴துங் அனுஜானாமீதி அத்தோ².
274.Kuppaṃ karissāmīti saddaṃ karissāmi. Nakhādīhi nakhacchedane āpatti natthi, anurakkhaṇatthaṃ pana nakhacchedanaṃ anuññātaṃ. Vīsatimaṭṭhanti vīsatipi nakhe likhitamaṭṭhe kārāpenti. Malamattanti nakhato malamattaṃ apakaḍḍhituṃ anujānāmīti attho.
275. கு²ரஸிபாடிகந்தி கு²ரகோஸகங் . மஸ்ஸுங் கப்பாபெந்தீதி கத்தரியா மஸ்ஸுங் சே²தா³பெந்தி. மஸ்ஸுங் வட்³டா⁴பெந்தீதி மஸ்ஸுங் தீ³க⁴ங் காரெந்தி. கோ³லோமிகந்தி ஹனுகம்ஹி தீ³க⁴ங் கத்வா ட²பிதங் ஏளகமஸ்ஸு வுச்சதி. சதுரஸ்ஸகந்தி சதுகோணங். பரிமுக²ந்தி உரே லோமஸங்ஹரணங். அட்³ட⁴து³கந்தி உத³ரே லோமராஜிட்ட²பனங். ஆபத்தி து³க்கடஸ்ஸாதி மஸ்ஸுகப்பாபனாதீ³ஸு ஸப்³ப³த்த² ஆபத்தி து³க்கடஸ்ஸ. ஆபா³த⁴ப்பச்சயா ஸம்பா³தே⁴ லோமந்தி க³ண்ட³வணருதி⁴ஆதி³ஆபா³த⁴ப்பச்சயா. கத்தரிகாயாதி க³ண்ட³வணருதி⁴ஸீஸரோகா³பா³த⁴ப்பச்சயா. ஸக்க²ராதீ³ஹி நாஸிகாலோமக்³கா³ஹாபனே ஆபத்தி நத்தி². அனுரக்க²ணத்த²ங் பன ஸண்டா³ஸோ அனுஞ்ஞாதோ. ந பி⁴க்க²வே பலிதங் கா³ஹாபேதப்³ப³ந்தி எத்த² யங் ப⁴முகாய வா நலாடே வா தா³டி²காய வா உக்³க³ந்த்வா பீ³ப⁴ச்ச²ங் டி²தங், தாதி³ஸங் லோமங் பலிதங் வா அபலிதங் வா கா³ஹாபேதுங் வட்டதி.
275.Khurasipāṭikanti khurakosakaṃ . Massuṃ kappāpentīti kattariyā massuṃ chedāpenti. Massuṃ vaḍḍhāpentīti massuṃ dīghaṃ kārenti. Golomikanti hanukamhi dīghaṃ katvā ṭhapitaṃ eḷakamassu vuccati. Caturassakanti catukoṇaṃ. Parimukhanti ure lomasaṃharaṇaṃ. Aḍḍhadukanti udare lomarājiṭṭhapanaṃ. Āpatti dukkaṭassāti massukappāpanādīsu sabbattha āpatti dukkaṭassa. Ābādhappaccayā sambādhe lomanti gaṇḍavaṇarudhiādiābādhappaccayā. Kattarikāyāti gaṇḍavaṇarudhisīsarogābādhappaccayā. Sakkharādīhi nāsikālomaggāhāpane āpatti natthi. Anurakkhaṇatthaṃ pana saṇḍāso anuññāto. Na bhikkhave palitaṃ gāhāpetabbanti ettha yaṃ bhamukāya vā nalāṭe vā dāṭhikāya vā uggantvā bībhacchaṃ ṭhitaṃ, tādisaṃ lomaṃ palitaṃ vā apalitaṃ vā gāhāpetuṃ vaṭṭati.
277. கங்ஸபத்த²ரிகாதி கங்ஸப⁴ண்ட³வாணிஜா. ப³ந்த⁴னமத்தந்தி வாஸிகத்தரயட்டி²ஆதீ³னங் ப³ந்த⁴னமத்தங்.
277.Kaṃsapattharikāti kaṃsabhaṇḍavāṇijā. Bandhanamattanti vāsikattarayaṭṭhiādīnaṃ bandhanamattaṃ.
278. ந பி⁴க்க²வே அகாயப³ந்த⁴னேனாதி எத்த² அப³ந்தி⁴த்வா நிக்க²மந்தேன யத்த² ஸரதி, தத்த² ப³ந்தி⁴தப்³ப³ங். ஆஸனஸாலாய ப³ந்தி⁴ஸ்ஸாமீதி க³ந்துங் வட்டதி. ஸரித்வா யாவ ந ப³ந்த⁴தி, ந தாவ பிண்டா³ய சரிதப்³ப³ங். கலாபு³கங் நாம ப³ஹுரஜ்ஜுகங். தெ³ட்³டு³ப⁴கங் நாம உத³கஸப்பஸீஸஸதி³ஸங். முரஜங் நாம முரஜவட்டிஸண்டா²னங் வேடெ²த்வா கதங். மத்³த³வீணங் நாம பாமங்க³ஸண்டா²னங். ஈதி³ஸஞ்ஹி ஏகம்பி ந வட்டதி, பகே³வ ப³ஹூனி. பட்டிகங் ஸூகரந்தகந்தி எத்த² பகதிவீதா வா மச்ச²கண்டகவாயிமா வா பட்டிகா வட்டதி, ஸேஸா குஞ்ஜரச்சி²காதி³பே⁴தா³ ந வட்டந்தி. ஸூகரந்தகங் நாம குஞ்ஜிகாகோஸகஸண்டா²னங் ஹோதி. ஏகரஜ்ஜுகங் பன முத்³தி³ககாயப³ந்த⁴னஞ்ச ஸூகரந்தகங் அனுலோமேதி. அனுஜானாமி பி⁴க்க²வே முரஜங் மத்³த³வீணந்தி இத³ங் த³ஸாஸுயேவ அனுஞ்ஞாதங் . பாமங்க³த³ஸா செத்த² சதுன்னங் உபரி ந வட்டதி. ஸோப⁴ணங் நாம வேடெ²த்வா முக²வட்டிஸிப்³ப³னங். கு³ணகங் நாம முதி³ங்க³ஸண்டா²னேன ஸிப்³ப³னங்; ஏவங் ஸிப்³பி³தா ஹி அந்தா தி²ரா ஹொந்தி. பவனந்தோதி பாஸந்தோ வுச்சதி.
278.Nabhikkhave akāyabandhanenāti ettha abandhitvā nikkhamantena yattha sarati, tattha bandhitabbaṃ. Āsanasālāya bandhissāmīti gantuṃ vaṭṭati. Saritvā yāva na bandhati, na tāva piṇḍāya caritabbaṃ. Kalābukaṃ nāma bahurajjukaṃ. Deḍḍubhakaṃ nāma udakasappasīsasadisaṃ. Murajaṃ nāma murajavaṭṭisaṇṭhānaṃ veṭhetvā kataṃ. Maddavīṇaṃ nāma pāmaṅgasaṇṭhānaṃ. Īdisañhi ekampi na vaṭṭati, pageva bahūni. Paṭṭikaṃ sūkarantakanti ettha pakativītā vā macchakaṇṭakavāyimā vā paṭṭikā vaṭṭati, sesā kuñjaracchikādibhedā na vaṭṭanti. Sūkarantakaṃ nāma kuñjikākosakasaṇṭhānaṃ hoti. Ekarajjukaṃ pana muddikakāyabandhanañca sūkarantakaṃ anulometi. Anujānāmi bhikkhave murajaṃ maddavīṇanti idaṃ dasāsuyeva anuññātaṃ . Pāmaṅgadasā cettha catunnaṃ upari na vaṭṭati. Sobhaṇaṃ nāma veṭhetvā mukhavaṭṭisibbanaṃ. Guṇakaṃ nāma mudiṅgasaṇṭhānena sibbanaṃ; evaṃ sibbitā hi antā thirā honti. Pavanantoti pāsanto vuccati.
280. ஹத்தி²ஸொண்ட³கங் நாம நாபி⁴மூலதோ ஹத்தி²ஸொண்ட³ஸண்டா²னங் ஓலம்ப³கங் கத்வா நிவத்த²ங் சோளிகஇத்தீ²னங் நிவாஸனங் விய. மச்ச²வாளகங் நாம ஏகதோ த³ஸந்தங் ஏகதோ பாஸந்தங் ஓலம்பெ³த்வா நிவத்த²ங். சதுகண்ணகங் நாம உபரி த்³வே, ஹெட்ட²தோ த்³வேதி ஏவங் சத்தாரோ கண்ணே த³ஸ்ஸெத்வா நிவத்த²ங். தாலவண்டகங் நாம தாலவண்டாகாரேன ஸாடகங் ஓலம்பெ³த்வா நிவாஸனங். ஸதவலிகங் நாம தீ³க⁴ஸாடகங் அனேகக்க²த்துங் ஓப⁴ஞ்ஜித்வா ஓவட்டிகங் கரொந்தேன நிவத்த²ங், வாமத³க்கி²ணபஸ்ஸேஸு வா நிரந்தரங் வலியோ த³ஸ்ஸெத்வா நிவத்த²ங். ஸசே பன ஜாணுதோ பட்டா²ய ஏகா வா த்³வே வா வலியோ பஞ்ஞாயந்தி, வட்டதி.
280.Hatthisoṇḍakaṃ nāma nābhimūlato hatthisoṇḍasaṇṭhānaṃ olambakaṃ katvā nivatthaṃ coḷikaitthīnaṃ nivāsanaṃ viya. Macchavāḷakaṃ nāma ekato dasantaṃ ekato pāsantaṃ olambetvā nivatthaṃ. Catukaṇṇakaṃ nāma upari dve, heṭṭhato dveti evaṃ cattāro kaṇṇe dassetvā nivatthaṃ. Tālavaṇṭakaṃ nāma tālavaṇṭākārena sāṭakaṃ olambetvā nivāsanaṃ. Satavalikaṃ nāma dīghasāṭakaṃ anekakkhattuṃ obhañjitvā ovaṭṭikaṃ karontena nivatthaṃ, vāmadakkhiṇapassesu vā nirantaraṃ valiyo dassetvā nivatthaṃ. Sace pana jāṇuto paṭṭhāya ekā vā dve vā valiyo paññāyanti, vaṭṭati.
ஸங்வேல்லியங் நிவாஸெந்தீதி மல்லகம்மகாராத³யோ விய கச்ச²ங் ப³ந்தி⁴த்வா நிவாஸெந்தி; ஏவங் நிவாஸேதுங் கி³லானஸ்ஸபி மக்³க³ப்படிபன்னஸ்ஸபி ந வட்டதி. யம்பி மக்³க³ங் க³ச்ச²ந்தா ஏகங் வா த்³வே வா கோணே உக்கி²பித்வா அந்தரவாஸகஸ்ஸ உபரி லக்³கெ³ந்தி, அந்தோ வா ஏகங் காஸாவங் ததா² நிவாஸெத்வா ப³ஹி அபரங் நிவாஸெந்தி, ஸப்³ப³ங் ந வட்டதி. கி³லானோ பன அந்தோ காஸாவஸ்ஸ ஓவட்டிகங் த³ஸ்ஸெத்வா அபரங் உபரி நிவாஸேதுங் லப⁴தி. அகி³லானேன த்³வே நிவாஸெந்தேன ஸகு³ணங் கத்வா நிவாஸேதப்³பா³னி. இதி யஞ்ச இத⁴ படிக்கி²த்தங், யஞ்ச ஸேகி²யவண்ணனாயங்; தங் ஸப்³ப³ங் வஜ்ஜெத்வா நிப்³பி³காரங் திமண்ட³லங் படிச்சா²தெ³ந்தேன பரிமண்ட³லங் நிவாஸேதப்³ப³ங். யங்கிஞ்சி விகாரங் கரொந்தோ து³க்கடா ந முச்சதி. ந பி⁴க்க²வே கி³ஹிபாருதங் பாருபிதப்³ப³ந்தி ஏவங் படிக்கி²த்தங் கி³ஹிபாருதங் அபாருபித்வா, உபோ⁴ கண்ணே ஸமங் கத்வா பாருபனங் பரிமண்ட³லபாருபனங் நாம, தங் பாருபிதப்³ப³ங்.
Saṃvelliyaṃ nivāsentīti mallakammakārādayo viya kacchaṃ bandhitvā nivāsenti; evaṃ nivāsetuṃ gilānassapi maggappaṭipannassapi na vaṭṭati. Yampi maggaṃ gacchantā ekaṃ vā dve vā koṇe ukkhipitvā antaravāsakassa upari laggenti, anto vā ekaṃ kāsāvaṃ tathā nivāsetvā bahi aparaṃ nivāsenti, sabbaṃ na vaṭṭati. Gilāno pana anto kāsāvassa ovaṭṭikaṃ dassetvā aparaṃ upari nivāsetuṃ labhati. Agilānena dve nivāsentena saguṇaṃ katvā nivāsetabbāni. Iti yañca idha paṭikkhittaṃ, yañca sekhiyavaṇṇanāyaṃ; taṃ sabbaṃ vajjetvā nibbikāraṃ timaṇḍalaṃ paṭicchādentena parimaṇḍalaṃ nivāsetabbaṃ. Yaṃkiñci vikāraṃ karonto dukkaṭā na muccati. Na bhikkhave gihipārutaṃ pārupitabbanti evaṃ paṭikkhittaṃ gihipārutaṃ apārupitvā, ubho kaṇṇe samaṃ katvā pārupanaṃ parimaṇḍalapārupanaṃ nāma, taṃ pārupitabbaṃ.
தத்த² யங்கிஞ்சி ஸேதபடபாருதங் பரிப்³பா³ஜகபாருதங் ஏகஸாடகபாருதங் ஸொண்ட³பாருதங் அந்தேபுரிகபாருதங் மஹாஜெட்ட²கபாருதங் குடிபவேஸகபாருதங் ப்³ராஹ்மணபாருதங் பாளிகாரகபாருதந்தி ஏவமாதி³ பரிமண்ட³லலக்க²ணதோ அஞ்ஞதா² பாருதங், ஸப்³ப³மேதங் கி³ஹிபாருதங் நாம. தஸ்மா யதா² ஸேதபடா அட்³ட⁴பாலகனிக³ண்டா² பாருபந்தி, யதா² ச ஏகச்சே பரிப்³பா³ஜகா உரங் விவரித்வா த்³வீஸு அங்ஸகூடேஸு பாவுரணங் ட²பெந்தி, யதா² ச ஏகஸாடகா மனுஸ்ஸா நிவத்த²ஸாடகஸ்ஸ ஏகேனந்தேன பிட்டி²ங் பாருபித்வா உபோ⁴ கண்ணே உபோ⁴ஸு அங்ஸகூடேஸு ட²பெந்தி, யதா² ச ஸுராஸொண்டா³த³யோ ஸாடகேன கீ³வங் பரிக்கி²பந்தா உபோ⁴ அந்தே உத³ரே வா ஓலம்பெ³ந்தி; பிட்டி²யங் வா கி²பந்தி, யதா² ச அந்தேபுரிகாயோ அக்கி²தாரகமத்தங் த³ஸ்ஸெத்வா ஓகு³ண்டி²கங் பாருபந்தி, யதா² ச மஹாஜெட்டா² தீ³க⁴ஸாடகங் நிவாஸெத்வா தஸ்ஸேவ ஏகேனந்தேன ஸகலஸரீரங் பாருபந்தி, யதா² ச கஸ்ஸகா கெ²த்தகுடிங் பவிஸந்தா ஸாடகங் பலிவேடெ²த்வா உபகச்ச²கே பக்கி²பித்வா தஸ்ஸேவ ஏகேனந்தேன ஸரீரங் பாருபந்தி, யதா² ச ப்³ராஹ்மணா உபி⁴ன்னங் உபகச்ச²கானங் அந்தரேன ஸாடகங் பவேஸெத்வா அங்ஸகூடேஸு பக்கி²பந்தி, யதா² ச பாளிகாரகோ பி⁴க்கு² ஏகங்ஸபாருபனேன பாருதங் வாமபா³ஹுங் விவரித்வா சீவரங் அங்ஸகூடங் ஆரோபேதி; ஏவங் அபாருபித்வா ஸப்³பே³பி ஏதே அஞ்ஞே ச ஏவரூபே பாருபனதோ³ஸே வஜ்ஜெத்வா நிப்³பி³காரங் பரிமண்ட³லங் பாருபிதப்³ப³ங். ததா² அபாருபித்வா ஆராமே வா அந்தரக⁴ரே வா அனாத³ரேன யங்கிஞ்சி விகாரங் கரொந்தஸ்ஸ து³க்கடங்.
Tattha yaṃkiñci setapaṭapārutaṃ paribbājakapārutaṃ ekasāṭakapārutaṃ soṇḍapārutaṃ antepurikapārutaṃ mahājeṭṭhakapārutaṃ kuṭipavesakapārutaṃ brāhmaṇapārutaṃ pāḷikārakapārutanti evamādi parimaṇḍalalakkhaṇato aññathā pārutaṃ, sabbametaṃ gihipārutaṃ nāma. Tasmā yathā setapaṭā aḍḍhapālakanigaṇṭhā pārupanti, yathā ca ekacce paribbājakā uraṃ vivaritvā dvīsu aṃsakūṭesu pāvuraṇaṃ ṭhapenti, yathā ca ekasāṭakā manussā nivatthasāṭakassa ekenantena piṭṭhiṃ pārupitvā ubho kaṇṇe ubhosu aṃsakūṭesu ṭhapenti, yathā ca surāsoṇḍādayo sāṭakena gīvaṃ parikkhipantā ubho ante udare vā olambenti; piṭṭhiyaṃ vā khipanti, yathā ca antepurikāyo akkhitārakamattaṃ dassetvā oguṇṭhikaṃ pārupanti, yathā ca mahājeṭṭhā dīghasāṭakaṃ nivāsetvā tasseva ekenantena sakalasarīraṃ pārupanti, yathā ca kassakā khettakuṭiṃ pavisantā sāṭakaṃ paliveṭhetvā upakacchake pakkhipitvā tasseva ekenantena sarīraṃ pārupanti, yathā ca brāhmaṇā ubhinnaṃ upakacchakānaṃ antarena sāṭakaṃ pavesetvā aṃsakūṭesu pakkhipanti, yathā ca pāḷikārako bhikkhu ekaṃsapārupanena pārutaṃ vāmabāhuṃ vivaritvā cīvaraṃ aṃsakūṭaṃ āropeti; evaṃ apārupitvā sabbepi ete aññe ca evarūpe pārupanadose vajjetvā nibbikāraṃ parimaṇḍalaṃ pārupitabbaṃ. Tathā apārupitvā ārāme vā antaraghare vā anādarena yaṃkiñci vikāraṃ karontassa dukkaṭaṃ.
281. முண்ட³வட்டீதி யதா² ரஞ்ஞோ குஹிஞ்சி க³ச்ச²தோ பரிக்கா²ரப⁴ண்ட³வஹனமனுஸ்ஸாதி அதி⁴ப்பாயோ. அந்தராகாஜந்தி மஜ்ஜே² லக்³கெ³த்வா த்³வீஹி வஹிதப்³ப³பா⁴ரங்.
281.Muṇḍavaṭṭīti yathā rañño kuhiñci gacchato parikkhārabhaṇḍavahanamanussāti adhippāyo. Antarākājanti majjhe laggetvā dvīhi vahitabbabhāraṃ.
282. அசக்கு²ஸ்ஸந்தி சக்கூ²னங் ஹிதங் ந ஹோதி; பரிஹானிங் ஜனேதி. நச்சா²தே³தீதி ந ருச்சதி. அட்ட²ங்கு³லபரமந்தி மனுஸ்ஸானங் பமாணங்கு³லேன அட்ட²ங்கு³லபரமங். அதிமடாஹகந்தி அதிகு²த்³த³கங்.
282.Acakkhussanti cakkhūnaṃ hitaṃ na hoti; parihāniṃ janeti. Nacchādetīti na ruccati. Aṭṭhaṅgulaparamanti manussānaṃ pamāṇaṅgulena aṭṭhaṅgulaparamaṃ. Atimaṭāhakanti atikhuddakaṃ.
283. தா³யங் ஆலிம்பெந்தீதி திணவனாதீ³ஸு அக்³கி³ங் தெ³ந்தி. படக்³கி³ந்தி படிஅக்³கி³ங். பரித்தந்தி அப்பஹரிதகரணேன வா பரிகா²க²ணனேன வா பரித்தாணங். எத்த² பன அனுபஸம்பன்னே ஸதி ஸயங் அக்³கி³ங் தா³துங் ந லப⁴தி, அஸதி அக்³கி³ம்பி தா³துங் லப⁴தி, பூ⁴மிங் தச்செ²த்வா திணானிபி ஹரிதுங், பரிக²ம்பி க²ணிதுங், அல்லஸாக²ங் ப⁴ஞ்ஜித்வாபி அக்³கி³ங் நிப்³பா³பேதுங் லப⁴தி, ஸேனாஸனங் பத்தங் வா அப்பத்தங் வா ததா² நிப்³பா³பேதுங் லப⁴தியேவ. உத³கேன பன கப்பியேனேவ லப⁴தி, ந இதரேன.
283.Dāyaṃ ālimpentīti tiṇavanādīsu aggiṃ denti. Paṭagginti paṭiaggiṃ. Parittanti appaharitakaraṇena vā parikhākhaṇanena vā parittāṇaṃ. Ettha pana anupasampanne sati sayaṃ aggiṃ dātuṃ na labhati, asati aggimpi dātuṃ labhati, bhūmiṃ tacchetvā tiṇānipi harituṃ, parikhampi khaṇituṃ, allasākhaṃ bhañjitvāpi aggiṃ nibbāpetuṃ labhati, senāsanaṃ pattaṃ vā appattaṃ vā tathā nibbāpetuṃ labhatiyeva. Udakena pana kappiyeneva labhati, na itarena.
284. ஸதி கரணீயேதி ஸுக்க²கட்டா²தி³க்³க³ஹணகிச்சே ஸதி. போரிஸியந்தி புரிஸப்பமாணங். ஆபதா³ஸூதி வாளமிகா³த³யோ வா தி³ஸ்வா மக்³க³மூள்ஹோ வா தி³ஸா ஓலோகேதுகாமோ ஹுத்வா த³வடா³ஹங் வா உத³கோக⁴ங் வா ஆக³ச்ச²ந்தங் தி³ஸ்வா ஏவரூபாஸு ஆபதா³ஸு அதிஉச்சம்பி ருக்க²ங் ஆரோஹிதுங் வட்டதி.
284.Sati karaṇīyeti sukkhakaṭṭhādiggahaṇakicce sati. Porisiyanti purisappamāṇaṃ. Āpadāsūti vāḷamigādayo vā disvā maggamūḷho vā disā oloketukāmo hutvā davaḍāhaṃ vā udakoghaṃ vā āgacchantaṃ disvā evarūpāsu āpadāsu atiuccampi rukkhaṃ ārohituṃ vaṭṭati.
285. கல்யாணவாக்கரணாதி மது⁴ரஸத்³தா³. ச²ந்த³ஸோ ஆரோபேமாதி வேத³ங் விய ஸக்கதபா⁴ஸாய வாசனாமக்³க³ங் ஆரோபேம. ஸகாய நிருத்தியாதி எத்த² ஸகா நிருத்தி நாம ஸம்மாஸம்பு³த்³தே⁴ன வுத்தப்பகாரோ மாக³தி⁴கோ வோஹாரோ.
285.Kalyāṇavākkaraṇāti madhurasaddā. Chandaso āropemāti vedaṃ viya sakkatabhāsāya vācanāmaggaṃ āropema. Sakāya niruttiyāti ettha sakā nirutti nāma sammāsambuddhena vuttappakāro māgadhiko vohāro.
286. லோகாயதங் நாம ஸப்³ப³ங் உச்சி²ட்ட²ங், ஸப்³ப³ங் அனுச்சி²ட்ட²ங், ஸேதோ காகோ, காளோ ப³கோ; இமினா ச இமினா ச காரணேனாதி ஏவமாதி³னிரத்த²ககாரணபடிஸங்யுத்தங் தித்தி²யஸத்த²ங்.
286.Lokāyataṃ nāma sabbaṃ ucchiṭṭhaṃ, sabbaṃ anucchiṭṭhaṃ, seto kāko, kāḷo bako; iminā ca iminā ca kāraṇenāti evamādiniratthakakāraṇapaṭisaṃyuttaṃ titthiyasatthaṃ.
288. அந்தரா அஹோஸீதி அந்தரிதா அஹோஸி படிச்ச²ன்னா.
288.Antarā ahosīti antaritā ahosi paṭicchannā.
289. ஆபா³த⁴ப்பச்சயாதி யஸ்ஸ ஆபா³த⁴ஸ்ஸ லஸுணங் பே⁴ஸஜ்ஜங்; தப்பச்சயாதி அத்தோ².
289.Ābādhappaccayāti yassa ābādhassa lasuṇaṃ bhesajjaṃ; tappaccayāti attho.
290. பஸ்ஸாவபாது³கந்தி எத்த² பாது³கா இட்ட²காஹிபி ஸிலாஹிபி தா³ரூஹிபி காதுங் வட்டதி. வச்சபாது³காயபி ஏஸேவ நயோ. பரிவேணந்தி வச்சகுடிபரிக்கே²பப்³ப⁴ந்தரங்.
290.Passāvapādukanti ettha pādukā iṭṭhakāhipi silāhipi dārūhipi kātuṃ vaṭṭati. Vaccapādukāyapi eseva nayo. Pariveṇanti vaccakuṭiparikkhepabbhantaraṃ.
293. யதா²த⁴ம்மோ காரேதப்³போ³தி து³க்கடவத்து²ம்ஹி து³க்கடேன பாசித்தியவத்து²ம்ஹி பாசித்தியேன காரேதப்³போ³. பஹரணத்த²ங் கதங் பஹரணீதி வுச்சதி, யஸ்ஸ கஸ்ஸசி ஆவுத⁴ஸங்கா²தஸ்ஸேதங் அதி⁴வசனங், தங் ட²பெத்வா அஞ்ஞங் ஸப்³ப³ங் லோஹப⁴ண்ட³ங் அனுஜானாமீதி அத்தோ². கதகஞ்ச கும்ப⁴காரிகஞ்சாதி எத்த² கதகங் வுத்தமேவ. கும்ப⁴காரிகஞ்சாதி த⁴னியஸ்ஸேவ ஸப்³ப³மத்திகாமயகுடி வுச்சதி. ஸேஸங் ஸப்³ப³த்த² உத்தானமேவாதி.
293.Yathādhammokāretabboti dukkaṭavatthumhi dukkaṭena pācittiyavatthumhi pācittiyena kāretabbo. Paharaṇatthaṃ kataṃ paharaṇīti vuccati, yassa kassaci āvudhasaṅkhātassetaṃ adhivacanaṃ, taṃ ṭhapetvā aññaṃ sabbaṃ lohabhaṇḍaṃ anujānāmīti attho. Katakañca kumbhakārikañcāti ettha katakaṃ vuttameva. Kumbhakārikañcāti dhaniyasseva sabbamattikāmayakuṭi vuccati. Sesaṃ sabbattha uttānamevāti.
கு²த்³த³கவத்து²கதா² நிட்டி²தா.
Khuddakavatthukathā niṭṭhitā.
கு²த்³த³கவத்து²க்க²ந்த⁴கவண்ணனா நிட்டி²தா.
Khuddakavatthukkhandhakavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi / கு²த்³த³கவத்தூ²னி • Khuddakavatthūni
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / கு²த்³த³கவத்து²கதா²வண்ணனா • Khuddakavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / கு²த்³த³கவத்து²கதா²வண்ணனா • Khuddakavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / கு²த்³த³கவத்து²கதா²வண்ணனா • Khuddakavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / கு²த்³த³கவத்து²கதா² • Khuddakavatthukathā
