| Library / Tipiṭaka / তিপিটক • Tipiṭaka / চূল়ৰগ্গ-অট্ঠকথা • Cūḷavagga-aṭṭhakathā |
৫. খুদ্দকৰত্থুক্খন্ধকং
5. Khuddakavatthukkhandhakaṃ
খুদ্দকৰত্থুকথা
Khuddakavatthukathā
২৪৩. খুদ্দকৰত্থুক্খন্ধকে – মল্লমুট্ঠিকাতি মুট্ঠিকমল্লা। গামমুদ্দৰাতি ছৰিরাগমণ্ডনানুযুত্তা নাগরিকমনুস্সা। গামমোদ্দৰাতিপি পাঠো; এসেৰত্থো। থম্ভেতি ন্হানতিত্থে নিখণিত্ৰা ঠপিতত্থম্ভে।
243. Khuddakavatthukkhandhake – mallamuṭṭhikāti muṭṭhikamallā. Gāmamuddavāti chavirāgamaṇḍanānuyuttā nāgarikamanussā. Gāmamoddavātipi pāṭho; esevattho. Thambheti nhānatitthe nikhaṇitvā ṭhapitatthambhe.
কুট্টেতি ইট্ঠকাসিলাদারুকুট্টানং অঞ্ঞতরস্মিং। অট্টানে ন্হাযন্তীতি এত্থ অট্টানং নাম রুক্খং ফলকং ৰিয তচ্ছেত্ৰা অট্ঠপদাকারেন রাজিযো ছিন্দিত্ৰা ন্হানতিত্থে নিখণন্তি, তত্থ চুণ্ণানি আকিরিত্ৰা মনুস্সা কাযং ঘংসন্তি। গন্ধব্বহত্থকেনাতি ন্হানতিত্থে ঠপিতেন দারুমযহত্থেন, তেন কির চুণ্ণানি গহেত্ৰা মনুস্সা সরীরং ঘংসন্তি । কুরুৰিন্দকসুত্তিযাতি কুরুৰিন্দকপাসাণচুণ্ণানি লাখায বন্ধিত্ৰা কতগুল়িককলাপকো ৰুচ্চতি, তং উভোসু অন্তেসু গহেত্ৰা সরীরং ঘংসন্তি। ৰিগ্গয্হ পরিকম্মং কারাপেন্তীতি অঞ্ঞমঞ্ঞং সরীরেন সরীরং ঘংসন্তি। মল্লকং নাম মকরদন্তকে ছিন্দিত্ৰা মল্লকমূলসণ্ঠানেন কতং মল্লকন্তি ৰুচ্চতি, ইদং গিলানস্সাপি ন ৰট্টতি।
Kuṭṭeti iṭṭhakāsilādārukuṭṭānaṃ aññatarasmiṃ. Aṭṭāne nhāyantīti ettha aṭṭānaṃ nāma rukkhaṃ phalakaṃ viya tacchetvā aṭṭhapadākārena rājiyo chinditvā nhānatitthe nikhaṇanti, tattha cuṇṇāni ākiritvā manussā kāyaṃ ghaṃsanti. Gandhabbahatthakenāti nhānatitthe ṭhapitena dārumayahatthena, tena kira cuṇṇāni gahetvā manussā sarīraṃ ghaṃsanti . Kuruvindakasuttiyāti kuruvindakapāsāṇacuṇṇāni lākhāya bandhitvā kataguḷikakalāpako vuccati, taṃ ubhosu antesu gahetvā sarīraṃ ghaṃsanti. Viggayha parikammaṃ kārāpentīti aññamaññaṃ sarīrena sarīraṃ ghaṃsanti. Mallakaṃ nāma makaradantake chinditvā mallakamūlasaṇṭhānena kataṃ mallakanti vuccati, idaṃ gilānassāpi na vaṭṭati.
২৪৪. অকতমল্লকং নাম দন্তে অচ্ছিন্দিত্ৰা কতং, ইদং অগিলানস্সেৰ ন ৰট্টতি; ইট্ঠকাখণ্ডং পন কপালখণ্ডং ৰা ৰট্টতি। উক্কাসিকন্তি ৰত্থৰট্টিং; তস্মা ন্হাযন্তস্স যস্স কস্সচি ন্হানসাটকৰট্টিযা পিট্ঠিং ঘংসিতুং ৰট্টতি। পুথুপাণিকন্তি হত্থপরিকম্মং ৰুচ্চতি, তস্মা সব্বেসং হত্থেন পিট্ঠিপরিকম্মং কাতুং ৰট্টতি।
244.Akatamallakaṃ nāma dante acchinditvā kataṃ, idaṃ agilānasseva na vaṭṭati; iṭṭhakākhaṇḍaṃ pana kapālakhaṇḍaṃ vā vaṭṭati. Ukkāsikanti vatthavaṭṭiṃ; tasmā nhāyantassa yassa kassaci nhānasāṭakavaṭṭiyā piṭṭhiṃ ghaṃsituṃ vaṭṭati. Puthupāṇikanti hatthaparikammaṃ vuccati, tasmā sabbesaṃ hatthena piṭṭhiparikammaṃ kātuṃ vaṭṭati.
২৪৫. ৰল্লিকাতি কণ্ণতো নিক্খন্তমুত্তোলম্বকাদীনং এতং অধিৰচনং; ন কেৰলঞ্চ ৰল্লিকা এৰ, যংকিঞ্চি কণ্ণপিল়ন্ধনং অন্তমসো তালপণ্ণম্পি ন ৰট্টতি। পামঙ্গন্তি যংকিঞ্চি পলম্বকসুত্তং। কণ্ঠসুত্তকন্তি যংকিঞ্চি গীৰূপগআভরণং। কটিসুত্তকন্তি যংকিঞ্চি কটিপিল়ন্ধনং অন্তমসো সুত্ততন্তুমত্তম্পি। ওৰট্টিকন্তি ৰলযং। কাযূরাদীনি পাকটানেৰ, অক্খকানং হেট্ঠা বাহাভরণং যংকিঞ্চি আভরণং ন ৰট্টতি।
245.Vallikāti kaṇṇato nikkhantamuttolambakādīnaṃ etaṃ adhivacanaṃ; na kevalañca vallikā eva, yaṃkiñci kaṇṇapiḷandhanaṃ antamaso tālapaṇṇampi na vaṭṭati. Pāmaṅganti yaṃkiñci palambakasuttaṃ. Kaṇṭhasuttakanti yaṃkiñci gīvūpagaābharaṇaṃ. Kaṭisuttakanti yaṃkiñci kaṭipiḷandhanaṃ antamaso suttatantumattampi. Ovaṭṭikanti valayaṃ. Kāyūrādīni pākaṭāneva, akkhakānaṃ heṭṭhā bāhābharaṇaṃ yaṃkiñci ābharaṇaṃ na vaṭṭati.
২৪৬. দুমাসিকং ৰা দুৰঙ্গুলং ৰাতি এত্থ সচে কেসা অন্তোদ্ৰেমাসে দ্ৰঙ্গুলং পাপুণন্তি, অন্তোদ্ৰেমাসেৰ ছিন্দিতব্বা। দ্ৰঙ্গুলেহি অতিক্কামেতুং ন ৰট্টতি। সচেপি ন দীঘা, দ্ৰেমাসতো একদিৰসম্পি অতিক্কামেতুং ন ৰট্টতিযেৰ; এৰমযং উভযেনপি উক্কট্ঠপরিচ্ছেদোৰ ৰুত্তো, ততো ওরং পন নৰট্টনভাৰো নাম নত্থি।
246.Dumāsikaṃvā duvaṅgulaṃ vāti ettha sace kesā antodvemāse dvaṅgulaṃ pāpuṇanti, antodvemāseva chinditabbā. Dvaṅgulehi atikkāmetuṃ na vaṭṭati. Sacepi na dīghā, dvemāsato ekadivasampi atikkāmetuṃ na vaṭṭatiyeva; evamayaṃ ubhayenapi ukkaṭṭhaparicchedova vutto, tato oraṃ pana navaṭṭanabhāvo nāma natthi.
কোচ্ছেন ওসণ্ঠেন্তীতি কোচ্ছেন ওলিখিত্ৰা সন্নিসীদাপেন্তি। ফণকেনাতি দন্তমযাদীসু যেন কেনচি। হত্থফণকেনাতি হত্থেনেৰ ফণকিচ্চং করোন্তা অঙ্গুলীহি ওসণ্ঠেন্তি। সিত্থতেলকেনাতি মধুসিত্থকনিয্যাসাদীসু যেন কেনচি চিক্কলেন। উদকতেলকেনাতি উদকমিস্সকেন তেলেন। মণ্ডনত্থায সব্বত্থ দুক্কটং, উদ্ধলোমেন পন অনুলোমনিপাতনত্থং হত্থং তেমেত্ৰা সীসং পুঞ্ছিতব্বং। উণ্হাভিতত্তরজসিরানম্পি অল্লহত্থেন পুঞ্ছিতুং ৰট্টতি।
Kocchena osaṇṭhentīti kocchena olikhitvā sannisīdāpenti. Phaṇakenāti dantamayādīsu yena kenaci. Hatthaphaṇakenāti hattheneva phaṇakiccaṃ karontā aṅgulīhi osaṇṭhenti. Sitthatelakenāti madhusitthakaniyyāsādīsu yena kenaci cikkalena. Udakatelakenāti udakamissakena telena. Maṇḍanatthāya sabbattha dukkaṭaṃ, uddhalomena pana anulomanipātanatthaṃ hatthaṃ temetvā sīsaṃ puñchitabbaṃ. Uṇhābhitattarajasirānampi allahatthena puñchituṃ vaṭṭati.
২৪৭. ন ভিক্খৰে আদাসে ৰা উদকপত্তে ৰাতি এত্থ কংসপত্তাদীনিপি যেসু মুখনিমিত্তং পঞ্ঞাযতি, সব্বানি আদাসসঙ্খমেৰ গচ্ছন্তি। কঞ্জিযাদীনিপি চ উদকপত্তসঙ্খমেৰ। তস্মা যত্থ কত্থচি ওলোকেন্তস্স দুক্কটং। আবাধপচ্চযাতি ‘‘সঞ্ছৰি নু খো মে ৰণো, উদাহু ন তাৰা’’তি জাননত্থং; ‘‘জিণ্ণো নু খোম্হি নো’’তি এৰং আযুসঙ্খারং ওলোকনত্থম্পি ৰট্টতীতি ৰুত্তং।
247.Na bhikkhave ādāse vā udakapatte vāti ettha kaṃsapattādīnipi yesu mukhanimittaṃ paññāyati, sabbāni ādāsasaṅkhameva gacchanti. Kañjiyādīnipi ca udakapattasaṅkhameva. Tasmā yattha katthaci olokentassa dukkaṭaṃ. Ābādhapaccayāti ‘‘sañchavi nu kho me vaṇo, udāhu na tāvā’’ti jānanatthaṃ; ‘‘jiṇṇo nu khomhi no’’ti evaṃ āyusaṅkhāraṃ olokanatthampi vaṭṭatīti vuttaṃ.
মুখং আলিম্পন্তীতি ৰিপ্পসন্নছৰিরাগকরেহি মুখালেপনেহি আলিম্পন্তি। উম্মদ্দেন্তীতি নানাউম্মদ্দনেহি উম্মদ্দেন্তি। চুণ্ণেন্তীতি মুখচুণ্ণকেন মক্খেন্তি। মনোসিলিকায মুখং লঞ্ছেন্তীতি মনোসিলায তিলকাদীনি লঞ্ছনানি করোন্তি, তানি হরিতালাদীহিপি ন ৰট্টন্তিযেৰ। অঙ্গরাগাদযো পাকটাযেৰ। সব্বত্থ দুক্কটং।
Mukhaṃ ālimpantīti vippasannachavirāgakarehi mukhālepanehi ālimpanti. Ummaddentīti nānāummaddanehi ummaddenti. Cuṇṇentīti mukhacuṇṇakena makkhenti. Manosilikāya mukhaṃ lañchentīti manosilāya tilakādīni lañchanāni karonti, tāni haritālādīhipi na vaṭṭantiyeva. Aṅgarāgādayo pākaṭāyeva. Sabbattha dukkaṭaṃ.
২৪৮. ন ভিক্খৰে নচ্চং ৰাতিআদীসু যংকিঞ্চি নচ্চং অন্তমসো মোরনচ্চম্পি দস্সনায গচ্ছন্তস্স দুক্কটং। সযম্পি নচ্চন্তস্স ৰা নচ্চাপেন্তস্স ৰা দুক্কটমেৰ। গীতম্পি যংকিঞ্চি নটগীতং ৰা সাধুগীতং ৰা অন্তমসো দন্তগীতম্পি ‘‘যং গাযিস্সামা’’তি পুব্বভাগে ওকূজন্তা করোন্তি, এতম্পি ন ৰট্টতি। সযং গাযন্তস্সাপি গাযাপেন্তস্সাপি দুক্কটমেৰ। ৰাদিতম্পি যংকিঞ্চি ন ৰট্টতি। যং পন নিট্ঠুভন্তো ৰা সাসঙ্কে ৰা ঠিতো অচ্ছরিকং ৰা ফোটেতি , পাণিং ৰা পহরতি, তত্থ অনাপত্তি। সব্বং অন্তরারামে ঠিতস্স পস্সতো অনাপত্তি। ‘‘পস্সিস্সামী’’তি ৰিহারতো ৰিহারং গচ্ছন্তস্স আপত্তিযেৰ। আসনসালায নিসিন্নো পস্সতি, অনাপত্তি। ‘‘পস্সিস্সামী’’তি উট্ঠহিত্ৰা গচ্ছতো আপত্তি। ৰীথিযং ঠত্ৰা গীৰং পরিৰত্তেত্ৰা পস্সতোপি আপত্তিযেৰ।
248.Nabhikkhave naccaṃ vātiādīsu yaṃkiñci naccaṃ antamaso moranaccampi dassanāya gacchantassa dukkaṭaṃ. Sayampi naccantassa vā naccāpentassa vā dukkaṭameva. Gītampi yaṃkiñci naṭagītaṃ vā sādhugītaṃ vā antamaso dantagītampi ‘‘yaṃ gāyissāmā’’ti pubbabhāge okūjantā karonti, etampi na vaṭṭati. Sayaṃ gāyantassāpi gāyāpentassāpi dukkaṭameva. Vāditampi yaṃkiñci na vaṭṭati. Yaṃ pana niṭṭhubhanto vā sāsaṅke vā ṭhito accharikaṃ vā phoṭeti , pāṇiṃ vā paharati, tattha anāpatti. Sabbaṃ antarārāme ṭhitassa passato anāpatti. ‘‘Passissāmī’’ti vihārato vihāraṃ gacchantassa āpattiyeva. Āsanasālāya nisinno passati, anāpatti. ‘‘Passissāmī’’ti uṭṭhahitvā gacchato āpatti. Vīthiyaṃ ṭhatvā gīvaṃ parivattetvā passatopi āpattiyeva.
২৪৯. সরকুত্তিন্তি সরকিরিযং। ভঙ্গো হোতীতি অলদ্ধং উপ্পাদেতুং ন সক্কোতি; লদ্ধং সমাপজ্জিতুং। পচ্ছিমা জনতাতি অম্হাকং আচরিযাপি উপজ্ঝাযাপি এৰং গাযিংসূতি পচ্ছিমো জনো দিট্ঠানুগতিং আপজ্জতি; তথেৰ গাযতি। ন ভিক্খৰে আযতকেনাতি এত্থ আযতকো নাম তং তং ৰত্তং ভিন্দিত্ৰা অক্খরানি ৰিনাসেত্ৰা পৰত্তো। ধম্মে পন সুত্তন্তৰত্তং নাম অত্থি, জাতকৰত্তং নাম অত্থি, গাথাৰত্তং নাম অত্থি, তং ৰিনাসেত্ৰা অতিদীঘং কাতুং ন ৰট্টতি। চতুরস্সেন ৰত্তেন পরিমণ্ডলানি পদব্যঞ্জনানি দস্সেতব্বানি। সরভঞ্ঞন্তি সরেন ভণনং। সরভঞ্ঞে কির তরঙ্গৰত্তধোতকৰত্তগলিতৰত্তাদীনি দ্ৰত্তিংস ৰত্তানি অত্থি। তেসু যং ইচ্ছতি, তং কাতুং লভতি। সব্বেসং পদব্যঞ্জনং অৰিনাসেত্ৰা ৰিকারং অকত্ৰা সমণসারুপ্পেন চতুরস্সেন নযেন পৰত্তনংযেৰ লক্খণং।
249.Sarakuttinti sarakiriyaṃ. Bhaṅgo hotīti aladdhaṃ uppādetuṃ na sakkoti; laddhaṃ samāpajjituṃ. Pacchimā janatāti amhākaṃ ācariyāpi upajjhāyāpi evaṃ gāyiṃsūti pacchimo jano diṭṭhānugatiṃ āpajjati; tatheva gāyati. Na bhikkhave āyatakenāti ettha āyatako nāma taṃ taṃ vattaṃ bhinditvā akkharāni vināsetvā pavatto. Dhamme pana suttantavattaṃ nāma atthi, jātakavattaṃ nāma atthi, gāthāvattaṃ nāma atthi, taṃ vināsetvā atidīghaṃ kātuṃ na vaṭṭati. Caturassena vattena parimaṇḍalāni padabyañjanāni dassetabbāni. Sarabhaññanti sarena bhaṇanaṃ. Sarabhaññe kira taraṅgavattadhotakavattagalitavattādīni dvattiṃsa vattāni atthi. Tesu yaṃ icchati, taṃ kātuṃ labhati. Sabbesaṃ padabyañjanaṃ avināsetvā vikāraṃ akatvā samaṇasāruppena caturassena nayena pavattanaṃyeva lakkhaṇaṃ.
বাহিরলোমিং উণ্ণিন্তি উণ্ণলোমানি বহি কত্ৰা উণ্ণপাৰারং পারুপন্তি; তথা ধারেন্তস্স দুক্কটং। লোমানি অন্তো কত্ৰা পারুপিতুং ৰট্টতি। সমণকপ্পকথা ভূতগামসিক্খাপদৰণ্ণনাযং ৰুত্তা।
Bāhiralomiṃ uṇṇinti uṇṇalomāni bahi katvā uṇṇapāvāraṃ pārupanti; tathā dhārentassa dukkaṭaṃ. Lomāni anto katvā pārupituṃ vaṭṭati. Samaṇakappakathā bhūtagāmasikkhāpadavaṇṇanāyaṃ vuttā.
২৫১. ন ভিক্খৰে অত্তনো অঙ্গজাতন্তি অঙ্গজাতং ছিন্দন্তস্সেৰ থুল্লচ্চযং। অঞ্ঞং পন কণ্ণনাসাঅঙ্গুলিআদিং যংকিঞ্চি ছিন্দন্তস্স তাদিসং ৰা দুক্খং উপ্পাদেন্তস্স দুক্কটং। অহিকীটদট্ঠাদীসু পন অঞ্ঞআবাধপচ্চযা ৰা লোহিতং ৰা মোচেন্তস্স ছিন্দন্তস্স ৰা অনাপত্তি।
251.Na bhikkhave attano aṅgajātanti aṅgajātaṃ chindantasseva thullaccayaṃ. Aññaṃ pana kaṇṇanāsāaṅguliādiṃ yaṃkiñci chindantassa tādisaṃ vā dukkhaṃ uppādentassa dukkaṭaṃ. Ahikīṭadaṭṭhādīsu pana aññaābādhapaccayā vā lohitaṃ vā mocentassa chindantassa vā anāpatti.
২৫২. চন্দনগণ্ঠি উপ্পন্না হোতীতি চন্দনঘটিকা উপ্পন্না হোতি। সো কির উদ্ধঞ্চ অধো চ জালানি পরিক্খিপাপেত্ৰা গঙ্গায নদিযা কীল়তি, তস্স নদীসোতেন ৰুয্হমানা চন্দনগণ্ঠি আগন্ত্ৰা জালে লগ্গা, তমস্স পুরিসা আহরিত্ৰা অদংসু; এৰং সা উপ্পন্না হোতি। ইদ্ধিপাটিহারিযন্তি এত্থ ৰিকুব্বনিদ্ধিপাটিহারিযং পটিক্খিত্তং, অধিট্ঠানিদ্ধি পন অপ্পটিক্খিত্তাতি ৰেদিতব্বা।
252.Candanagaṇṭhi uppannāhotīti candanaghaṭikā uppannā hoti. So kira uddhañca adho ca jālāni parikkhipāpetvā gaṅgāya nadiyā kīḷati, tassa nadīsotena vuyhamānā candanagaṇṭhi āgantvā jāle laggā, tamassa purisā āharitvā adaṃsu; evaṃ sā uppannā hoti. Iddhipāṭihāriyanti ettha vikubbaniddhipāṭihāriyaṃ paṭikkhittaṃ, adhiṭṭhāniddhi pana appaṭikkhittāti veditabbā.
ন ভিক্খৰে সোৰণ্ণমযো পত্তোতিআদীসু সচেপি গিহী ভত্তগ্গে সুৰণ্ণতট্টিকাদীসু ব্যঞ্জনং কত্ৰা উপনামেন্তি, আমসিতুম্পি ন ৰট্টতি। ফলিকমযকাচমযকংসমযানি পন তট্টিকাদীনি ভাজনানি পুগ্গলিকপরিভোগেনেৰ ন ৰট্টন্তি, সঙ্ঘিকপরিভোগেন ৰা গিহিৰিকটানি ৰা ৰট্টন্তি। ‘‘তম্বলোহমযোপি পত্তোৰ ন ৰট্টতি, থালকং পন ৰট্টতী’’তি ইদং সব্বং কুরুন্দিযং ৰুত্তং। মণিমযোতি এত্থ পন ইন্দনীলাদিমণিমযো ৰুত্তো। কংসমযোতি এত্থ ৰট্টলোহমযোপি সঙ্গহিতো।
Na bhikkhave sovaṇṇamayo pattotiādīsu sacepi gihī bhattagge suvaṇṇataṭṭikādīsu byañjanaṃ katvā upanāmenti, āmasitumpi na vaṭṭati. Phalikamayakācamayakaṃsamayāni pana taṭṭikādīni bhājanāni puggalikaparibhogeneva na vaṭṭanti, saṅghikaparibhogena vā gihivikaṭāni vā vaṭṭanti. ‘‘Tambalohamayopi pattova na vaṭṭati, thālakaṃ pana vaṭṭatī’’ti idaṃ sabbaṃ kurundiyaṃ vuttaṃ. Maṇimayoti ettha pana indanīlādimaṇimayo vutto. Kaṃsamayoti ettha vaṭṭalohamayopi saṅgahito.
২৫৩. লিখিতুন্তি তনুকরণত্থাযেতং ৰুত্তং। পকতিমণ্ডলন্তি মকরদন্তচ্ছিন্নকমণ্ডলমেৰ।
253.Likhitunti tanukaraṇatthāyetaṃ vuttaṃ. Pakatimaṇḍalanti makaradantacchinnakamaṇḍalameva.
২৫৪. আৰট্টিত্ৰাতি অঞ্ঞমঞ্ঞং পহরিত্ৰা। পত্তাধারকন্তি এত্থ ‘‘দন্তৰল্লিৰেত্তাদীহি কতে ভূমিআধারকে তযো, দারুআধারকে দ্ৰে পত্তে উপরূপরি ঠপেতুং ৰট্টতী’’তি কুরুন্দিযং ৰুত্তং। মহাঅট্ঠকথাযং পন ৰুত্তং – ‘‘ভূমিআধারকে তিণ্ণং পত্তানং অনোকাসো, দ্ৰে ঠপেতুং ৰট্টতি। দারুআধারকদণ্ডাধারকেসুপি সুসজ্জিতেসু এসেৰ নযো। ভমকোটিসদিসো পন দারুআধারকো তীহি দণ্ডকেহি বদ্ধো দণ্ডকাধারো চ একস্সপি পত্তস্স অনোকাসো, তত্থ ঠপেত্ৰাপি হত্থেন গহেত্ৰা এৰ নিসীদিতব্বং। ভূমিযং পন নিক্কুজ্জিত্ৰা একমেৰ ঠপেতব্ব’’ন্তি।
254.Āvaṭṭitvāti aññamaññaṃ paharitvā. Pattādhārakanti ettha ‘‘dantavallivettādīhi kate bhūmiādhārake tayo, dāruādhārake dve patte uparūpari ṭhapetuṃ vaṭṭatī’’ti kurundiyaṃ vuttaṃ. Mahāaṭṭhakathāyaṃ pana vuttaṃ – ‘‘bhūmiādhārake tiṇṇaṃ pattānaṃ anokāso, dve ṭhapetuṃ vaṭṭati. Dāruādhārakadaṇḍādhārakesupi susajjitesu eseva nayo. Bhamakoṭisadiso pana dāruādhārako tīhi daṇḍakehi baddho daṇḍakādhāro ca ekassapi pattassa anokāso, tattha ṭhapetvāpi hatthena gahetvā eva nisīditabbaṃ. Bhūmiyaṃ pana nikkujjitvā ekameva ṭhapetabba’’nti.
মিড্ঢন্তেতি আলিন্দকমিড্ঢিকাদীনং অন্তে। সচে পন পরিৰত্তেত্ৰা তত্থেৰ পতিট্ঠাতি, এৰরূপায ৰিত্থিণ্ণায মিড্ঢিযা ঠপেতুং ৰট্টতি। পরিভণ্ডন্তেতি বাহিরপস্সে কতায তনুকমিড্ঢিকায অন্তে। মিড্ঢিযং ৰুত্তনযেনেৰেত্থাপি ৰিনিচ্ছযো ৰেদিতব্বো।
Miḍḍhanteti ālindakamiḍḍhikādīnaṃ ante. Sace pana parivattetvā tattheva patiṭṭhāti, evarūpāya vitthiṇṇāya miḍḍhiyā ṭhapetuṃ vaṭṭati. Paribhaṇḍanteti bāhirapasse katāya tanukamiḍḍhikāya ante. Miḍḍhiyaṃ vuttanayenevetthāpi vinicchayo veditabbo.
চোল়কন্তি যং পত্থরিত্ৰা পত্তো ঠপীযতি; তস্মিং পন অসতি কটসারকে ৰা তট্টিকায ৰা মত্তিকাপরিভণ্ডকতায ভূমিযা ৰা যত্থ ন দুস্সতি, তথারূপায ৰালিকায ৰা ঠপেতুং ৰট্টতি। পংসুরজাদীসু পন খরভূমিযং ৰা ঠপেন্তস্স দুক্কটং। পত্তমাল়কং ইট্ঠকাহি ৰা দারূহি ৰা কাতুং ৰট্টতি । পত্তকুণ্ডোলিকাতি মহামুখকুণ্ডসণ্ঠানা ভণ্ডকুক্খলিকা ৰুচ্চতি। যো লগ্গেয্যাতি যত্থ কত্থচি লগ্গেন্তস্স দুক্কটমেৰ। চীৰরৰংসেপি বন্ধিত্ৰা ঠপেতুং ন ৰট্টতি। ভণ্ডকট্ঠপনত্থমেৰ ৰা কতং হোতু নিসীদনসযনত্থং ৰা যত্থ কত্থচি মঞ্চে ৰা পীঠে ৰা ঠপেন্তস্স দুক্কটং, অঞ্ঞেন পন ভণ্ডকেন সদ্ধিং বন্ধিত্ৰা ঠপেতুং ৰট্টতি। অটনিযং বন্ধিত্ৰা ওলম্বেতুং ৰা ৰট্টতি, বন্ধিত্ৰাপি উপরি ঠপেতুং ন ৰট্টতিযেৰ। সচে পন মঞ্চো ৰা পীঠং ৰা উক্খিপিত্ৰা চীৰরৰংসাদীসু অট্টকছন্নেন ঠপিতং হোতি, তত্থ ঠপেতুং ৰট্টতি। অংসৰদ্ধনকেন অংসকূটে লগ্গেত্ৰা অঙ্কে ঠপেতুং ৰট্টতি। ছত্তে ভত্তপূরোপি অংসকূটে লগ্গিতপত্তোপি ঠপেতুং ন ৰট্টতি, ভণ্ডকেন পন সদ্ধিং বন্ধিত্ৰা ৰা অট্টকং কত্ৰা ৰা ঠপিতে যো কোচি ঠপেতুং ৰট্টতি।
Coḷakanti yaṃ pattharitvā patto ṭhapīyati; tasmiṃ pana asati kaṭasārake vā taṭṭikāya vā mattikāparibhaṇḍakatāya bhūmiyā vā yattha na dussati, tathārūpāya vālikāya vā ṭhapetuṃ vaṭṭati. Paṃsurajādīsu pana kharabhūmiyaṃ vā ṭhapentassa dukkaṭaṃ. Pattamāḷakaṃ iṭṭhakāhi vā dārūhi vā kātuṃ vaṭṭati . Pattakuṇḍolikāti mahāmukhakuṇḍasaṇṭhānā bhaṇḍakukkhalikā vuccati. Yo laggeyyāti yattha katthaci laggentassa dukkaṭameva. Cīvaravaṃsepi bandhitvā ṭhapetuṃ na vaṭṭati. Bhaṇḍakaṭṭhapanatthameva vā kataṃ hotu nisīdanasayanatthaṃ vā yattha katthaci mañce vā pīṭhe vā ṭhapentassa dukkaṭaṃ, aññena pana bhaṇḍakena saddhiṃ bandhitvā ṭhapetuṃ vaṭṭati. Aṭaniyaṃ bandhitvā olambetuṃ vā vaṭṭati, bandhitvāpi upari ṭhapetuṃ na vaṭṭatiyeva. Sace pana mañco vā pīṭhaṃ vā ukkhipitvā cīvaravaṃsādīsu aṭṭakachannena ṭhapitaṃ hoti, tattha ṭhapetuṃ vaṭṭati. Aṃsavaddhanakena aṃsakūṭe laggetvā aṅke ṭhapetuṃ vaṭṭati. Chatte bhattapūropi aṃsakūṭe laggitapattopi ṭhapetuṃ na vaṭṭati, bhaṇḍakena pana saddhiṃ bandhitvā vā aṭṭakaṃ katvā vā ṭhapite yo koci ṭhapetuṃ vaṭṭati.
২৫৫. পত্তহত্থেনাতি এত্থ ন কেৰলং যস্স পত্তো হত্থে, সো এৰ পত্তহত্থো, ন কেৰলঞ্চ কৰাটমেৰ পণামেতুং ন লভতি; অপিচ খো পন হত্থে ৰা পিট্ঠিপাদে ৰা যত্থ কত্থচি সরীরাৰযৰে পত্তস্মিং সতি হত্থেন ৰা পাদেন ৰা সীসেন ৰা যেন কেনচি সরীরাৰযৰেন কৰাটং ৰা পণামেতুং ঘটিকং ৰা উক্খিপিতুং সূচিং ৰা কুঞ্চিকায অপাপুরিতুং ন লভতি। অংসকূটে পন পত্তং লগ্গেত্ৰা যথাসুখং অৰাপুরিতুং লভতি।
255.Pattahatthenāti ettha na kevalaṃ yassa patto hatthe, so eva pattahattho, na kevalañca kavāṭameva paṇāmetuṃ na labhati; apica kho pana hatthe vā piṭṭhipāde vā yattha katthaci sarīrāvayave pattasmiṃ sati hatthena vā pādena vā sīsena vā yena kenaci sarīrāvayavena kavāṭaṃ vā paṇāmetuṃ ghaṭikaṃ vā ukkhipituṃ sūciṃ vā kuñcikāya apāpurituṃ na labhati. Aṃsakūṭe pana pattaṃ laggetvā yathāsukhaṃ avāpurituṃ labhati.
তুম্বকটাহন্তি লাবুকটাহং ৰুচ্চতি, তং পরিহরিতুং ন ৰট্টতি। লভিত্ৰা পন তাৰকালিকং পরিভুঞ্জিতুং ৰট্টতি। ঘটিকটাহেপি এসেৰ নযো। ঘটিকটাহন্তি ঘটিকপালং। অভুং মেতি উত্রাসৰচনমেতং। সব্বপংসুকূলিকেনাতি এত্থ চীৰরঞ্চ মঞ্চপীঠঞ্চ পংসুকূলং ৰট্টতি, অজ্ঝোহরণীযং পন দিন্নকমেৰ গহেতব্বং।
Tumbakaṭāhanti lābukaṭāhaṃ vuccati, taṃ pariharituṃ na vaṭṭati. Labhitvā pana tāvakālikaṃ paribhuñjituṃ vaṭṭati. Ghaṭikaṭāhepi eseva nayo. Ghaṭikaṭāhanti ghaṭikapālaṃ. Abhuṃ meti utrāsavacanametaṃ. Sabbapaṃsukūlikenāti ettha cīvarañca mañcapīṭhañca paṃsukūlaṃ vaṭṭati, ajjhoharaṇīyaṃ pana dinnakameva gahetabbaṃ.
চলকানীতি চব্বেত্ৰা অপৰিদ্ধামিসানি। অট্ঠিকানীতি মচ্ছমংসঅট্ঠিকানি। উচ্ছিট্ঠোদকন্তি মুখৰিক্খালনোদকং। এতেসু যংকিঞ্চি পত্তেন নীহরন্তস্স দুক্কটং। পত্তং পটিগ্গহং কত্ৰা হত্থং ধোৰিতুম্পি ন লভতি। হত্থধোতপাদধোতউদকম্পি পত্তে আকিরিত্ৰা নীহরিতুং ন ৰট্টতি। অনুচ্ছিট্ঠং সুদ্ধপত্তং উচ্ছিট্ঠহত্থেন গণ্হিতুং ন ৰট্টতি, ৰামহত্থেন পনেত্থ উদকং আসিঞ্চিত্ৰা একং উদকগণ্ডুসং গহেত্ৰা উচ্ছিট্ঠহত্থেন গণ্হিতুং ৰট্টতি। এত্তাৰতাপি হি সো উচ্ছিট্ঠপত্তো হোতি, হত্থং পন বহি উদকেন ৰিক্খালেত্ৰা গহেতুং ৰট্টতি। মচ্ছমংসফলাফলাদীনি খাদন্তো যং তত্থ অট্ঠিং ৰা চলকং ৰা ছড্ডেতুকামো হোতি, তং পত্তে ঠপেতুং ন লভতি। যং পন পটিখাদিতুকামো হোতি, তং পত্তে ঠপেতুং লভতি। অট্ঠিককণ্টকাদীনি তত্থেৰ কত্ৰা হত্থেন লুঞ্চিত্ৰা খাদিতুং ৰট্টতি। মুখতো নীহটং পন যংকিঞ্চি পুন খাদিতুকামো হোতি, তং পত্তে ঠপেতুং ন লভতি। সিঙ্গিৰেরনাল়িকেরখণ্ডানি ডংসিত্ৰা পুন ঠপেতুং লভতি।
Calakānīti cabbetvā apaviddhāmisāni. Aṭṭhikānīti macchamaṃsaaṭṭhikāni. Ucchiṭṭhodakanti mukhavikkhālanodakaṃ. Etesu yaṃkiñci pattena nīharantassa dukkaṭaṃ. Pattaṃ paṭiggahaṃ katvā hatthaṃ dhovitumpi na labhati. Hatthadhotapādadhotaudakampi patte ākiritvā nīharituṃ na vaṭṭati. Anucchiṭṭhaṃ suddhapattaṃ ucchiṭṭhahatthena gaṇhituṃ na vaṭṭati, vāmahatthena panettha udakaṃ āsiñcitvā ekaṃ udakagaṇḍusaṃ gahetvā ucchiṭṭhahatthena gaṇhituṃ vaṭṭati. Ettāvatāpi hi so ucchiṭṭhapatto hoti, hatthaṃ pana bahi udakena vikkhāletvā gahetuṃ vaṭṭati. Macchamaṃsaphalāphalādīni khādanto yaṃ tattha aṭṭhiṃ vā calakaṃ vā chaḍḍetukāmo hoti, taṃ patte ṭhapetuṃ na labhati. Yaṃ pana paṭikhāditukāmo hoti, taṃ patte ṭhapetuṃ labhati. Aṭṭhikakaṇṭakādīni tattheva katvā hatthena luñcitvā khādituṃ vaṭṭati. Mukhato nīhaṭaṃ pana yaṃkiñci puna khāditukāmo hoti, taṃ patte ṭhapetuṃ na labhati. Siṅgiveranāḷikerakhaṇḍāni ḍaṃsitvā puna ṭhapetuṃ labhati.
২৫৬. নমতকন্তি সত্থকৰেঠনকং পিলোতিকখণ্ডং। দণ্ডসত্থকন্তি পিপ্ফলকং ৰা অঞ্ঞম্পি ৰা যংকিঞ্চি দণ্ডং যোজেত্ৰা কতসত্থকং।
256.Namatakanti satthakaveṭhanakaṃ pilotikakhaṇḍaṃ. Daṇḍasatthakanti pipphalakaṃ vā aññampi vā yaṃkiñci daṇḍaṃ yojetvā katasatthakaṃ.
কণ্ণকিতা হোন্তীতি মলগ্গহিতা হোন্তি। কিণ্ণেন পূরেতুন্তি কিণ্ণচুণ্ণেন পূরেতুং। সত্তুযাতি হলিদ্দিমিস্সকেন পিট্ঠচুণ্ণেন। সরিতকন্তি পাসাণচুণ্ণং ৰুচ্চতি; তেন পূরেতুং অনুজানামীতি অত্থো। মধুসিত্থকেন সারেতুন্তি মধুসিত্থকেন মক্খেতুং। সরিতকং পরিভিজ্জতীতি তং মক্খিতমধুসিত্থকং ভিজ্জতি। সরিতসিপাটিকন্তি মধুসিত্থকপিলোতিকং; সত্থকোসকসিপাটিযা পন সরিতসিপাটিকায অনুলোমাতি কুরুন্দিযং ৰুত্তং। কথিনন্তি নিস্সেণিম্পি তত্থ অত্থরিতব্বকটসারককিলঞ্জানং অঞ্ঞতরম্পি। কথিনরজ্জুন্তি যায দুপট্টচীৰরং সিব্বন্তা কথিনে চীৰরম্পি বন্ধন্তি। কথিনং নপ্পহোতীতি দীঘস্স ভিক্খুনো পমাণেন কতং কথিনং; তত্থ রস্সস্স ভিক্খুনো চীৰরং পত্থরিযমানং নপ্পহোতি, অন্তোযেৰ হোতি; দণ্ডকে ন পাপুণাতীতি অত্থো। দণ্ডকথিনন্তি তস্স মজ্ঝে ইতরস্স ভিক্খুনো পমাণেন অঞ্ঞং নিস্সেণিং বন্ধিতুং অনুজানামীতি অত্থো।
Kaṇṇakitā hontīti malaggahitā honti. Kiṇṇena pūretunti kiṇṇacuṇṇena pūretuṃ. Sattuyāti haliddimissakena piṭṭhacuṇṇena. Saritakanti pāsāṇacuṇṇaṃ vuccati; tena pūretuṃ anujānāmīti attho. Madhusitthakena sāretunti madhusitthakena makkhetuṃ. Saritakaṃ paribhijjatīti taṃ makkhitamadhusitthakaṃ bhijjati. Saritasipāṭikanti madhusitthakapilotikaṃ; satthakosakasipāṭiyā pana saritasipāṭikāya anulomāti kurundiyaṃ vuttaṃ. Kathinanti nisseṇimpi tattha attharitabbakaṭasārakakilañjānaṃ aññatarampi. Kathinarajjunti yāya dupaṭṭacīvaraṃ sibbantā kathine cīvarampi bandhanti. Kathinaṃ nappahotīti dīghassa bhikkhuno pamāṇena kataṃ kathinaṃ; tattha rassassa bhikkhuno cīvaraṃ patthariyamānaṃ nappahoti, antoyeva hoti; daṇḍake na pāpuṇātīti attho. Daṇḍakathinanti tassa majjhe itarassa bhikkhuno pamāṇena aññaṃ nisseṇiṃ bandhituṃ anujānāmīti attho.
বিদলকন্তি দণ্ডকথিনপ্পমাণেন কটসারকস্স পরিযন্তে পটিসংহরিত্ৰা দুগুণকরণং। সলাকন্তি দুপট্টচীৰরস্স অন্তরে পৰেসনসলাকং। ৰিনন্ধনরজ্জুন্তি মহানিস্সেণিযা সদ্ধিং খুদ্দকং নিস্সেণিং ৰিনন্ধিতুং রজ্জুং। ৰিনন্ধনসুত্তন্তি খুদ্দকনিস্সেণিযা চীৰরং ৰিনন্ধিতুং সুত্তকং। ৰিনন্ধিত্ৰা চীৰরং সিব্বেতুন্তি তেন সুত্তকেন তত্থ চীৰরং ৰিনন্ধিত্ৰা সিব্বিতুং। ৰিসমা হোন্তীতি কাচি খুদ্দকা হোন্তি, কাচি মহন্তা। কল়িম্ভকন্তি পমাণসঞ্ঞাকরণং যংকিঞ্চি তালপণ্ণাদিং। মোঘসুত্তকন্তি ৰড্ঢকীনং দারূসু কাল়সুত্তেন ৰিয হলিদ্দিসুত্তেন সঞ্ঞাকরণং । অঙ্গুলিযা পটিগ্গণ্হন্তীতি সূচিমুখং অঙ্গুলিযা পটিচ্ছন্তি। পটিগ্গহন্তি অঙ্গুলিকোসকং।
Bidalakanti daṇḍakathinappamāṇena kaṭasārakassa pariyante paṭisaṃharitvā duguṇakaraṇaṃ. Salākanti dupaṭṭacīvarassa antare pavesanasalākaṃ. Vinandhanarajjunti mahānisseṇiyā saddhiṃ khuddakaṃ nisseṇiṃ vinandhituṃ rajjuṃ. Vinandhanasuttanti khuddakanisseṇiyā cīvaraṃ vinandhituṃ suttakaṃ. Vinandhitvā cīvaraṃ sibbetunti tena suttakena tattha cīvaraṃ vinandhitvā sibbituṃ. Visamā hontīti kāci khuddakā honti, kāci mahantā. Kaḷimbhakanti pamāṇasaññākaraṇaṃ yaṃkiñci tālapaṇṇādiṃ. Moghasuttakanti vaḍḍhakīnaṃ dārūsu kāḷasuttena viya haliddisuttena saññākaraṇaṃ . Aṅguliyā paṭiggaṇhantīti sūcimukhaṃ aṅguliyā paṭicchanti. Paṭiggahanti aṅgulikosakaṃ.
২৫৭. আৰেসনৰিত্থকং নাম যংকিঞ্চি পাতিচঙ্কোটকাদি। উচ্চৰত্থুকন্তি পংসুং আকিরিত্ৰা উচ্চৰত্থুকং কাতুং অনুজানামীতি অত্থো। ওগুম্ফেত্ৰা উল্লিত্তাৰলিত্তং কাতুন্তি ছদনং ওধুনিত্ৰা ঘনদণ্ডকং কত্ৰা অন্তো চেৰ বহি চ মত্তিকায লিম্পিতুন্তি অত্থো। গোঘংসিকাযাতি ৰেল়ুং ৰা রুক্খদণ্ডং ৰা অন্তোকত্ৰা তেন সদ্ধিং সঙ্ঘরিতুন্তি অত্থো। বন্ধনরজ্জুন্তি তথা সঙ্ঘরিতস্স বন্ধনরজ্জুং।
257.Āvesanavitthakaṃ nāma yaṃkiñci pāticaṅkoṭakādi. Uccavatthukanti paṃsuṃ ākiritvā uccavatthukaṃ kātuṃ anujānāmīti attho. Ogumphetvā ullittāvalittaṃ kātunti chadanaṃ odhunitvā ghanadaṇḍakaṃ katvā anto ceva bahi ca mattikāya limpitunti attho. Goghaṃsikāyāti veḷuṃ vā rukkhadaṇḍaṃ vā antokatvā tena saddhiṃ saṅgharitunti attho. Bandhanarajjunti tathā saṅgharitassa bandhanarajjuṃ.
২৫৮. কটচ্ছুপরিস্সাৰনং নাম তীসু দণ্ডকেসু ৰিনন্ধিত্ৰা কতং।
258.Kaṭacchuparissāvanaṃ nāma tīsu daṇḍakesu vinandhitvā kataṃ.
২৫৯. যো ন দদেয্যাতি অপরিস্সাৰনকস্সেৰ যো ন দদাতি, তস্স আপত্তি। যো পন অত্তনো হত্থে পরিস্সাৰনে ৰিজ্জমানেপি যাচতি, তস্স ন অকামা দাতব্বং। দণ্ডপরিস্সাৰনন্তি রজকানং খারপরিস্সাৰনং ৰিয চতূসু পাদেসু বদ্ধনিস্সেণিকায সাটকং বন্ধিত্ৰা মজ্ঝেদণ্ডকে উদকং আসিঞ্চিতব্বং, তং উভোপি কোট্ঠাসে পূরেত্ৰা পরিস্সৰতি। ওত্থরকং নাম যং উদকে ওত্থরিত্ৰা ঘটকেন উদকং গণ্হন্তি, তঞ্হি চতূসু দণ্ডকেসু ৰত্থং বন্ধিত্ৰা উদকে চত্তারো খাণুকে নিখণিত্ৰা তেসু বন্ধিত্ৰা সব্বপরিযন্তে উদকতো মোচেত্ৰা মজ্ঝে ওত্থরিত্ৰা ঘটেন উদকং গণ্হন্তি। মকসকুটিকাতি চীৰরকুটিকা ৰুচ্চতি।
259.Yo na dadeyyāti aparissāvanakasseva yo na dadāti, tassa āpatti. Yo pana attano hatthe parissāvane vijjamānepi yācati, tassa na akāmā dātabbaṃ. Daṇḍaparissāvananti rajakānaṃ khāraparissāvanaṃ viya catūsu pādesu baddhanisseṇikāya sāṭakaṃ bandhitvā majjhedaṇḍake udakaṃ āsiñcitabbaṃ, taṃ ubhopi koṭṭhāse pūretvā parissavati. Ottharakaṃ nāma yaṃ udake ottharitvā ghaṭakena udakaṃ gaṇhanti, tañhi catūsu daṇḍakesu vatthaṃ bandhitvā udake cattāro khāṇuke nikhaṇitvā tesu bandhitvā sabbapariyante udakato mocetvā majjhe ottharitvā ghaṭena udakaṃ gaṇhanti. Makasakuṭikāti cīvarakuṭikā vuccati.
২৬০. অভিসন্নকাযাতি সেম্হাদিদোসুস্সন্নকাযা। অগ্গল়ৰট্টি নাম দ্ৰারবাহায সমপ্পমাণোযেৰ অগ্গল়ত্থম্ভো ৰুচ্চতি, যত্থ তীণি চত্তারি ছিদ্দানি কত্ৰা সূচিযো দেন্তি। কপিসীসকং নাম দ্ৰারবাহং ৰিজ্ঝিত্ৰা তত্থ পৰেসিতো অগ্গল়পাসকো ৰুচ্চতি। সূচিকাতি তত্থ মজ্ঝে ছিদ্দং কত্ৰা পৰেসিতা। ঘটিকাতি উপরি যোজিতা। মণ্ডলিকং কাতুন্তি নীচৰত্থুকং চিনিতুং। ধূমনেত্তন্তি ধূমনিক্খমনছিদ্দং। ৰাসেতুন্তি গন্ধেন ৰাসেতুং। উদকট্ঠানন্তি উদকত্থপনট্ঠানং। তত্থ ঘটেন উদকং ঠপেত্ৰা সরাৰকেন ৰল়ঞ্জেতব্বং। কোট্ঠকোতি দ্ৰারকোট্ঠকো।
260.Abhisannakāyāti semhādidosussannakāyā. Aggaḷavaṭṭi nāma dvārabāhāya samappamāṇoyeva aggaḷatthambho vuccati, yattha tīṇi cattāri chiddāni katvā sūciyo denti. Kapisīsakaṃ nāma dvārabāhaṃ vijjhitvā tattha pavesito aggaḷapāsako vuccati. Sūcikāti tattha majjhe chiddaṃ katvā pavesitā. Ghaṭikāti upari yojitā. Maṇḍalikaṃ kātunti nīcavatthukaṃ cinituṃ. Dhūmanettanti dhūmanikkhamanachiddaṃ. Vāsetunti gandhena vāsetuṃ. Udakaṭṭhānanti udakatthapanaṭṭhānaṃ. Tattha ghaṭena udakaṃ ṭhapetvā sarāvakena vaḷañjetabbaṃ. Koṭṭhakoti dvārakoṭṭhako.
২৬১. তিস্সো পটিচ্ছাদিযোতি এত্থ জন্তাঘরপটিচ্ছাদি চ উদকপটিচ্ছাদি চ পরিকম্মং করোন্তস্সেৰ ৰট্টতি, সেসেসু অভিৰাদনাদীসু ন ৰট্টতি। ৰত্থপটিচ্ছাদি সব্বকম্মেসু ৰট্টতি। উদকং ন হোতীতি ন্হানোদকং ন হোতি।
261.Tissopaṭicchādiyoti ettha jantāgharapaṭicchādi ca udakapaṭicchādi ca parikammaṃ karontasseva vaṭṭati, sesesu abhivādanādīsu na vaṭṭati. Vatthapaṭicchādi sabbakammesu vaṭṭati. Udakaṃ na hotīti nhānodakaṃ na hoti.
২৬২. তুলন্তি পণ্ণিকানং ৰিয উদকউব্বাহনকতুলং। করকটকো ৰুচ্চতি গোণে ৰা যোজেত্ৰা হত্থেহি ৰা গহেত্ৰা দীঘৰরত্তাদীহি আকড্ঢনযন্তং। চক্কৰট্টকন্তি অরহটঘটিযন্তং। চম্মখণ্ডং নাম তুলায ৰা করকটকে ৰা যোজেতব্বকং চম্মভাজনং। পাকটা হোতীতি অপরিক্খিত্তা হোতি। উদকপুঞ্ছনীতি দণ্ডমযাপি ৰিসাণমযাপি দারুমযাপি ৰট্টতি, তস্সা অসতি চোল়কেনাপি উদকং পচ্চুদ্ধরিতুং ৰট্টতি।
262.Tulanti paṇṇikānaṃ viya udakaubbāhanakatulaṃ. Karakaṭako vuccati goṇe vā yojetvā hatthehi vā gahetvā dīghavarattādīhi ākaḍḍhanayantaṃ. Cakkavaṭṭakanti arahaṭaghaṭiyantaṃ. Cammakhaṇḍaṃ nāma tulāya vā karakaṭake vā yojetabbakaṃ cammabhājanaṃ. Pākaṭā hotīti aparikkhittā hoti. Udakapuñchanīti daṇḍamayāpi visāṇamayāpi dārumayāpi vaṭṭati, tassā asati coḷakenāpi udakaṃ paccuddharituṃ vaṭṭati.
২৬৩. উদকমাতিকন্তি উদকস্স আগমনমাতিকং। নিল্লেখজন্তাঘরং নাম আৰিদ্ধপক্খপাসকং ৰুচ্চতি, গোপানসীনং উপরি মণ্ডলে পক্খপাসকে ঠপেত্ৰা কতকূটচ্ছদনস্সেতং নামং। চাতুমাসং নিসীদনেনাতি নিসীদনেন চত্তারো মাসে ন ৰিপ্পৰসিতব্বন্তি অত্থো।
263.Udakamātikanti udakassa āgamanamātikaṃ. Nillekhajantāgharaṃ nāma āviddhapakkhapāsakaṃ vuccati, gopānasīnaṃ upari maṇḍale pakkhapāsake ṭhapetvā katakūṭacchadanassetaṃ nāmaṃ. Cātumāsaṃ nisīdanenāti nisīdanena cattāro māse na vippavasitabbanti attho.
২৬৪. পুপ্ফাভিকিণ্ণেসূতি পুপ্ফেহি সন্থতেসু। নমতকং নাম এল়কলোমেহি কতং অৰাযিমং চম্মখণ্ডপরিহারেন পরিভুঞ্জিতব্বং। আসিত্তকূপধানং নাম তম্বলোহেন ৰা রজতেন ৰা কতায পেল়ায এতং অধিৰচনং, পটিক্খিত্তত্তা পন দারুমযাপি ন ৰট্টতি। মল়োরিকাতি দণ্ডধারকো ৰুচ্চতি। যট্ঠিআধারকপণ্ণাধারকপচ্ছিকপিট্ঠানিপি এত্থেৰ পৰিট্ঠানি। আধারকসঙ্খেপগমনতো হি পট্ঠায ছিদ্দং ৰিদ্ধম্পি অৰিদ্ধম্পি ৰট্টতিযেৰ। একভাজনেতি এত্থ সচে একো ভিক্খু ভাজনতো ফলং ৰা পূৰং ৰা গহেত্ৰা গচ্ছতি, তস্মিং অপগতে ইতরস্স সেসকং ভুঞ্জিতুং ৰট্টতি। ইতরস্সাপি তস্মিং খীণে পুন গহেতুং ৰট্টতি।
264.Pupphābhikiṇṇesūti pupphehi santhatesu. Namatakaṃ nāma eḷakalomehi kataṃ avāyimaṃ cammakhaṇḍaparihārena paribhuñjitabbaṃ. Āsittakūpadhānaṃ nāma tambalohena vā rajatena vā katāya peḷāya etaṃ adhivacanaṃ, paṭikkhittattā pana dārumayāpi na vaṭṭati. Maḷorikāti daṇḍadhārako vuccati. Yaṭṭhiādhārakapaṇṇādhārakapacchikapiṭṭhānipi ettheva paviṭṭhāni. Ādhārakasaṅkhepagamanato hi paṭṭhāya chiddaṃ viddhampi aviddhampi vaṭṭatiyeva. Ekabhājaneti ettha sace eko bhikkhu bhājanato phalaṃ vā pūvaṃ vā gahetvā gacchati, tasmiṃ apagate itarassa sesakaṃ bhuñjituṃ vaṭṭati. Itarassāpi tasmiṃ khīṇe puna gahetuṃ vaṭṭati.
২৬৫. অট্ঠহঙ্গেহীতি এত্থ একেকেনপি অঙ্গেন সমন্নাগতস্স অন্তোসীমায ৰা নিস্সীমং গন্ত্ৰা নদীআদীসু ৰা নিক্কুজ্জিতুং ৰট্টতিযেৰ। এৰং নিক্কুজ্জিতে পন পত্তে তস্স গেহে কোচি দেয্যধম্মো ন গহেতব্বো – ‘‘অসুকস্স গেহে ভিক্খং মা গণ্হিত্থা’’তি অঞ্ঞেসু ৰিহারেসুপি পেসেতব্বং। উক্কুজ্জনকালে পন যাৰততিযং যাচাপেত্ৰা হত্থপাসং ৰিজহাপেত্ৰা ঞত্তিদুতিযকম্মেন উক্কুজ্জিতব্বো।
265.Aṭṭhahaṅgehīti ettha ekekenapi aṅgena samannāgatassa antosīmāya vā nissīmaṃ gantvā nadīādīsu vā nikkujjituṃ vaṭṭatiyeva. Evaṃ nikkujjite pana patte tassa gehe koci deyyadhammo na gahetabbo – ‘‘asukassa gehe bhikkhaṃ mā gaṇhitthā’’ti aññesu vihāresupi pesetabbaṃ. Ukkujjanakāle pana yāvatatiyaṃ yācāpetvā hatthapāsaṃ vijahāpetvā ñattidutiyakammena ukkujjitabbo.
২৬৮. পুরক্খত্ৰাতি অগ্গতো কত্ৰা। সংহরন্তূতি সংহরিযন্তু। চেলপটিকন্তি চেলসন্থরং। সো কির ‘‘সচে অহং পুত্তং লচ্ছামি, অক্কমিস্সতি মে ভগৰা চেলপটিক’’ন্তি ইমিনা অজ্ঝাসযেন সন্থরি, অভব্বো চেস পুত্তলাভায; তস্মা ভগৰা ন অক্কমি। যদি অক্কমেয্য, পচ্ছা পুত্তং অলভন্তো ‘‘নাযং সব্বঞ্ঞূ’’তি দিট্ঠিং গণ্হেয্য। ইদং তাৰ ভগৰতো অনক্কমনে কারণং। যস্মা পন ভিক্খূপি যে অজানন্তা অক্কমেয্যুং, তে গিহীনং পরিভূতা ভৰেয্যুং; তস্মা ভিক্খূ পরিভৰতো মোচেতুং সিক্খাপদং পঞ্ঞপেসি। ইদং সিক্খাপদপঞ্ঞাপনে কারণং।
268.Purakkhatvāti aggato katvā. Saṃharantūti saṃhariyantu. Celapaṭikanti celasantharaṃ. So kira ‘‘sace ahaṃ puttaṃ lacchāmi, akkamissati me bhagavā celapaṭika’’nti iminā ajjhāsayena santhari, abhabbo cesa puttalābhāya; tasmā bhagavā na akkami. Yadi akkameyya, pacchā puttaṃ alabhanto ‘‘nāyaṃ sabbaññū’’ti diṭṭhiṃ gaṇheyya. Idaṃ tāva bhagavato anakkamane kāraṇaṃ. Yasmā pana bhikkhūpi ye ajānantā akkameyyuṃ, te gihīnaṃ paribhūtā bhaveyyuṃ; tasmā bhikkhū paribhavato mocetuṃ sikkhāpadaṃ paññapesi. Idaṃ sikkhāpadapaññāpane kāraṇaṃ.
মঙ্গলত্থায যাচিযমানেনাতি অপগতগব্ভা ৰা হোতু গরুগব্ভা ৰা, এৰরূপেসু ঠানেসু মঙ্গলত্থায যাচিযমানেন অক্কমিতুং ৰট্টতি। ধোতপাদকং নাম পাদধোৰনট্ঠানে ধোতেহি পাদেহি অক্কমনত্থায পচ্চত্থরণং অত্থতং হোতি, তং অক্কমিতুং ৰট্টতি।
Maṅgalatthāya yāciyamānenāti apagatagabbhā vā hotu garugabbhā vā, evarūpesu ṭhānesu maṅgalatthāya yāciyamānena akkamituṃ vaṭṭati. Dhotapādakaṃ nāma pādadhovanaṭṭhāne dhotehi pādehi akkamanatthāya paccattharaṇaṃ atthataṃ hoti, taṃ akkamituṃ vaṭṭati.
২৬৯. কতকং নাম পদুমকণ্ণিকাকারং পাদঘংসনত্থং কণ্টকে উট্ঠাপেত্ৰা কতং। তং ৰট্টং ৰা হোতু চতুরস্সাদিভেদং ৰা, বাহুলিকানুযোগত্তা পটিক্খিত্তমেৰ, নেৰ পটিগ্গহেতুং ন পরিভুঞ্জিতুং ৰট্টতি। সক্খরাতি পাসাণো ৰুচ্চতি; পাসাণফেণকোপি ৰট্টতি। ৰিধূপনন্তি ৰীজনী ৰুচ্চতি । তালৰণ্টং পন তালপণ্ণেহি ৰা কতং হোতু ৰেল়ুদন্তৰিলীৰেহি ৰা মোরপিঞ্ছেহি ৰা চম্মৰিকতীহি ৰা সব্বং ৰট্টতি। মকসবীজনী দন্তমযৰিসাণমযদণ্ডকাপি ৰট্টতি, ৰাকমযবীজনিযা কেতকপারোহকুন্তালপণ্ণাদিমযাপি সঙ্গহিতা।
269.Katakaṃ nāma padumakaṇṇikākāraṃ pādaghaṃsanatthaṃ kaṇṭake uṭṭhāpetvā kataṃ. Taṃ vaṭṭaṃ vā hotu caturassādibhedaṃ vā, bāhulikānuyogattā paṭikkhittameva, neva paṭiggahetuṃ na paribhuñjituṃ vaṭṭati. Sakkharāti pāsāṇo vuccati; pāsāṇapheṇakopi vaṭṭati. Vidhūpananti vījanī vuccati . Tālavaṇṭaṃ pana tālapaṇṇehi vā kataṃ hotu veḷudantavilīvehi vā morapiñchehi vā cammavikatīhi vā sabbaṃ vaṭṭati. Makasabījanī dantamayavisāṇamayadaṇḍakāpi vaṭṭati, vākamayabījaniyā ketakapārohakuntālapaṇṇādimayāpi saṅgahitā.
২৭০. গিলানস্স ছত্তন্তি এত্থ যস্স কাযডাহো ৰা পিত্তকোপো ৰা হোতি, চক্খু ৰা দুব্বলং, অঞ্ঞো ৰা কোচি আবাধো ৰিনা ছত্তেন উপ্পজ্জতি, তস্স গামে ৰা অরঞ্ঞে ৰা ছত্তং ৰট্টতি। ৰস্সে পন চীৰরগুত্তত্থং ৰাল়মিগচোরভযেসু চ অত্তগুত্তত্থম্পি ৰট্টতি। একপণ্ণচ্ছত্তং পন সব্বত্থেৰ ৰট্টতি।
270.Gilānassa chattanti ettha yassa kāyaḍāho vā pittakopo vā hoti, cakkhu vā dubbalaṃ, añño vā koci ābādho vinā chattena uppajjati, tassa gāme vā araññe vā chattaṃ vaṭṭati. Vasse pana cīvaraguttatthaṃ vāḷamigacorabhayesu ca attaguttatthampi vaṭṭati. Ekapaṇṇacchattaṃ pana sabbattheva vaṭṭati.
অসিস্সাতি অসি অস্স। ৰিজ্জোতলতীতি ৰিজ্জোততি। দণ্ডসম্মুতিন্তি এত্থ পমাণযুত্তো চতুহত্থোযেৰ দণ্ডো সম্মন্নিত্ৰা দাতব্বো। ততো ঊনাতিরিত্তো ৰিনাপি সম্মুতিযা সব্বেসং ৰট্টতি। সিক্কা পন অগিলানস্স ন ৰট্টতি, গিলানস্সাপি সম্মন্নিত্ৰাৰ দাতব্বা।
Asissāti asi assa. Vijjotalatīti vijjotati. Daṇḍasammutinti ettha pamāṇayutto catuhatthoyeva daṇḍo sammannitvā dātabbo. Tato ūnātiritto vināpi sammutiyā sabbesaṃ vaṭṭati. Sikkā pana agilānassa na vaṭṭati, gilānassāpi sammannitvāva dātabbā.
২৭৩. রোমন্থকস্সাতি এত্থ ঠপেত্ৰা রোমন্থকং সেসানং আগতং উগ্গারং মুখে সন্ধারেত্ৰা গিলন্তানং আপত্তি। সচে পন অসন্ধারিতমেৰ পরগলং গচ্ছতি, ৰট্টতি।
273.Romanthakassāti ettha ṭhapetvā romanthakaṃ sesānaṃ āgataṃ uggāraṃ mukhe sandhāretvā gilantānaṃ āpatti. Sace pana asandhāritameva paragalaṃ gacchati, vaṭṭati.
যং দিয্যমানন্তি যং দাযকেহি দিয্যমানং পটিগ্গহিতভাজনতো বহি পতিতং, তং ভিক্খুনা সামং গহেত্ৰা পরিভুঞ্জিতুং অনুজানামীতি অত্থো। ইদং ভোজনৰগ্গে ৰণ্ণিতমেৰ।
Yaṃ diyyamānanti yaṃ dāyakehi diyyamānaṃ paṭiggahitabhājanato bahi patitaṃ, taṃ bhikkhunā sāmaṃ gahetvā paribhuñjituṃ anujānāmīti attho. Idaṃ bhojanavagge vaṇṇitameva.
২৭৪. কুপ্পং করিস্সামীতি সদ্দং করিস্সামি। নখাদীহি নখচ্ছেদনে আপত্তি নত্থি, অনুরক্খণত্থং পন নখচ্ছেদনং অনুঞ্ঞাতং। ৰীসতিমট্ঠন্তি ৰীসতিপি নখে লিখিতমট্ঠে কারাপেন্তি। মলমত্তন্তি নখতো মলমত্তং অপকড্ঢিতুং অনুজানামীতি অত্থো।
274.Kuppaṃ karissāmīti saddaṃ karissāmi. Nakhādīhi nakhacchedane āpatti natthi, anurakkhaṇatthaṃ pana nakhacchedanaṃ anuññātaṃ. Vīsatimaṭṭhanti vīsatipi nakhe likhitamaṭṭhe kārāpenti. Malamattanti nakhato malamattaṃ apakaḍḍhituṃ anujānāmīti attho.
২৭৫. খুরসিপাটিকন্তি খুরকোসকং । মস্সুং কপ্পাপেন্তীতি কত্তরিযা মস্সুং ছেদাপেন্তি। মস্সুং ৰড্ঢাপেন্তীতি মস্সুং দীঘং কারেন্তি। গোলোমিকন্তি হনুকম্হি দীঘং কত্ৰা ঠপিতং এল়কমস্সু ৰুচ্চতি। চতুরস্সকন্তি চতুকোণং। পরিমুখন্তি উরে লোমসংহরণং। অড্ঢদুকন্তি উদরে লোমরাজিট্ঠপনং। আপত্তি দুক্কটস্সাতি মস্সুকপ্পাপনাদীসু সব্বত্থ আপত্তি দুক্কটস্স। আবাধপ্পচ্চযা সম্বাধে লোমন্তি গণ্ডৰণরুধিআদিআবাধপ্পচ্চযা। কত্তরিকাযাতি গণ্ডৰণরুধিসীসরোগাবাধপ্পচ্চযা। সক্খরাদীহি নাসিকালোমগ্গাহাপনে আপত্তি নত্থি। অনুরক্খণত্থং পন সণ্ডাসো অনুঞ্ঞাতো। ন ভিক্খৰে পলিতং গাহাপেতব্বন্তি এত্থ যং ভমুকায ৰা নলাটে ৰা দাঠিকায ৰা উগ্গন্ত্ৰা বীভচ্ছং ঠিতং, তাদিসং লোমং পলিতং ৰা অপলিতং ৰা গাহাপেতুং ৰট্টতি।
275.Khurasipāṭikanti khurakosakaṃ . Massuṃ kappāpentīti kattariyā massuṃ chedāpenti. Massuṃ vaḍḍhāpentīti massuṃ dīghaṃ kārenti. Golomikanti hanukamhi dīghaṃ katvā ṭhapitaṃ eḷakamassu vuccati. Caturassakanti catukoṇaṃ. Parimukhanti ure lomasaṃharaṇaṃ. Aḍḍhadukanti udare lomarājiṭṭhapanaṃ. Āpatti dukkaṭassāti massukappāpanādīsu sabbattha āpatti dukkaṭassa. Ābādhappaccayā sambādhe lomanti gaṇḍavaṇarudhiādiābādhappaccayā. Kattarikāyāti gaṇḍavaṇarudhisīsarogābādhappaccayā. Sakkharādīhi nāsikālomaggāhāpane āpatti natthi. Anurakkhaṇatthaṃ pana saṇḍāso anuññāto. Na bhikkhave palitaṃ gāhāpetabbanti ettha yaṃ bhamukāya vā nalāṭe vā dāṭhikāya vā uggantvā bībhacchaṃ ṭhitaṃ, tādisaṃ lomaṃ palitaṃ vā apalitaṃ vā gāhāpetuṃ vaṭṭati.
২৭৭. কংসপত্থরিকাতি কংসভণ্ডৰাণিজা। বন্ধনমত্তন্তি ৰাসিকত্তরযট্ঠিআদীনং বন্ধনমত্তং।
277.Kaṃsapattharikāti kaṃsabhaṇḍavāṇijā. Bandhanamattanti vāsikattarayaṭṭhiādīnaṃ bandhanamattaṃ.
২৭৮. ন ভিক্খৰে অকাযবন্ধনেনাতি এত্থ অবন্ধিত্ৰা নিক্খমন্তেন যত্থ সরতি, তত্থ বন্ধিতব্বং। আসনসালায বন্ধিস্সামীতি গন্তুং ৰট্টতি। সরিত্ৰা যাৰ ন বন্ধতি, ন তাৰ পিণ্ডায চরিতব্বং। কলাবুকং নাম বহুরজ্জুকং। দেড্ডুভকং নাম উদকসপ্পসীসসদিসং। মুরজং নাম মুরজৰট্টিসণ্ঠানং ৰেঠেত্ৰা কতং। মদ্দৰীণং নাম পামঙ্গসণ্ঠানং। ঈদিসঞ্হি একম্পি ন ৰট্টতি, পগেৰ বহূনি। পট্টিকং সূকরন্তকন্তি এত্থ পকতিৰীতা ৰা মচ্ছকণ্টকৰাযিমা ৰা পট্টিকা ৰট্টতি, সেসা কুঞ্জরচ্ছিকাদিভেদা ন ৰট্টন্তি। সূকরন্তকং নাম কুঞ্জিকাকোসকসণ্ঠানং হোতি। একরজ্জুকং পন মুদ্দিককাযবন্ধনঞ্চ সূকরন্তকং অনুলোমেতি। অনুজানামি ভিক্খৰে মুরজং মদ্দৰীণন্তি ইদং দসাসুযেৰ অনুঞ্ঞাতং । পামঙ্গদসা চেত্থ চতুন্নং উপরি ন ৰট্টতি। সোভণং নাম ৰেঠেত্ৰা মুখৰট্টিসিব্বনং। গুণকং নাম মুদিঙ্গসণ্ঠানেন সিব্বনং; এৰং সিব্বিতা হি অন্তা থিরা হোন্তি। পৰনন্তোতি পাসন্তো ৰুচ্চতি।
278.Nabhikkhave akāyabandhanenāti ettha abandhitvā nikkhamantena yattha sarati, tattha bandhitabbaṃ. Āsanasālāya bandhissāmīti gantuṃ vaṭṭati. Saritvā yāva na bandhati, na tāva piṇḍāya caritabbaṃ. Kalābukaṃ nāma bahurajjukaṃ. Deḍḍubhakaṃ nāma udakasappasīsasadisaṃ. Murajaṃ nāma murajavaṭṭisaṇṭhānaṃ veṭhetvā kataṃ. Maddavīṇaṃ nāma pāmaṅgasaṇṭhānaṃ. Īdisañhi ekampi na vaṭṭati, pageva bahūni. Paṭṭikaṃ sūkarantakanti ettha pakativītā vā macchakaṇṭakavāyimā vā paṭṭikā vaṭṭati, sesā kuñjaracchikādibhedā na vaṭṭanti. Sūkarantakaṃ nāma kuñjikākosakasaṇṭhānaṃ hoti. Ekarajjukaṃ pana muddikakāyabandhanañca sūkarantakaṃ anulometi. Anujānāmi bhikkhave murajaṃ maddavīṇanti idaṃ dasāsuyeva anuññātaṃ . Pāmaṅgadasā cettha catunnaṃ upari na vaṭṭati. Sobhaṇaṃ nāma veṭhetvā mukhavaṭṭisibbanaṃ. Guṇakaṃ nāma mudiṅgasaṇṭhānena sibbanaṃ; evaṃ sibbitā hi antā thirā honti. Pavanantoti pāsanto vuccati.
২৮০. হত্থিসোণ্ডকং নাম নাভিমূলতো হত্থিসোণ্ডসণ্ঠানং ওলম্বকং কত্ৰা নিৰত্থং চোল়িকইত্থীনং নিৰাসনং ৰিয। মচ্ছৰাল়কং নাম একতো দসন্তং একতো পাসন্তং ওলম্বেত্ৰা নিৰত্থং। চতুকণ্ণকং নাম উপরি দ্ৰে, হেট্ঠতো দ্ৰেতি এৰং চত্তারো কণ্ণে দস্সেত্ৰা নিৰত্থং। তালৰণ্টকং নাম তালৰণ্টাকারেন সাটকং ওলম্বেত্ৰা নিৰাসনং। সতৰলিকং নাম দীঘসাটকং অনেকক্খত্তুং ওভঞ্জিত্ৰা ওৰট্টিকং করোন্তেন নিৰত্থং, ৰামদক্খিণপস্সেসু ৰা নিরন্তরং ৰলিযো দস্সেত্ৰা নিৰত্থং। সচে পন জাণুতো পট্ঠায একা ৰা দ্ৰে ৰা ৰলিযো পঞ্ঞাযন্তি, ৰট্টতি।
280.Hatthisoṇḍakaṃ nāma nābhimūlato hatthisoṇḍasaṇṭhānaṃ olambakaṃ katvā nivatthaṃ coḷikaitthīnaṃ nivāsanaṃ viya. Macchavāḷakaṃ nāma ekato dasantaṃ ekato pāsantaṃ olambetvā nivatthaṃ. Catukaṇṇakaṃ nāma upari dve, heṭṭhato dveti evaṃ cattāro kaṇṇe dassetvā nivatthaṃ. Tālavaṇṭakaṃ nāma tālavaṇṭākārena sāṭakaṃ olambetvā nivāsanaṃ. Satavalikaṃ nāma dīghasāṭakaṃ anekakkhattuṃ obhañjitvā ovaṭṭikaṃ karontena nivatthaṃ, vāmadakkhiṇapassesu vā nirantaraṃ valiyo dassetvā nivatthaṃ. Sace pana jāṇuto paṭṭhāya ekā vā dve vā valiyo paññāyanti, vaṭṭati.
সংৰেল্লিযং নিৰাসেন্তীতি মল্লকম্মকারাদযো ৰিয কচ্ছং বন্ধিত্ৰা নিৰাসেন্তি; এৰং নিৰাসেতুং গিলানস্সপি মগ্গপ্পটিপন্নস্সপি ন ৰট্টতি। যম্পি মগ্গং গচ্ছন্তা একং ৰা দ্ৰে ৰা কোণে উক্খিপিত্ৰা অন্তরৰাসকস্স উপরি লগ্গেন্তি, অন্তো ৰা একং কাসাৰং তথা নিৰাসেত্ৰা বহি অপরং নিৰাসেন্তি, সব্বং ন ৰট্টতি। গিলানো পন অন্তো কাসাৰস্স ওৰট্টিকং দস্সেত্ৰা অপরং উপরি নিৰাসেতুং লভতি। অগিলানেন দ্ৰে নিৰাসেন্তেন সগুণং কত্ৰা নিৰাসেতব্বানি। ইতি যঞ্চ ইধ পটিক্খিত্তং, যঞ্চ সেখিযৰণ্ণনাযং; তং সব্বং ৰজ্জেত্ৰা নিব্বিকারং তিমণ্ডলং পটিচ্ছাদেন্তেন পরিমণ্ডলং নিৰাসেতব্বং। যংকিঞ্চি ৰিকারং করোন্তো দুক্কটা ন মুচ্চতি। ন ভিক্খৰে গিহিপারুতং পারুপিতব্বন্তি এৰং পটিক্খিত্তং গিহিপারুতং অপারুপিত্ৰা, উভো কণ্ণে সমং কত্ৰা পারুপনং পরিমণ্ডলপারুপনং নাম, তং পারুপিতব্বং।
Saṃvelliyaṃ nivāsentīti mallakammakārādayo viya kacchaṃ bandhitvā nivāsenti; evaṃ nivāsetuṃ gilānassapi maggappaṭipannassapi na vaṭṭati. Yampi maggaṃ gacchantā ekaṃ vā dve vā koṇe ukkhipitvā antaravāsakassa upari laggenti, anto vā ekaṃ kāsāvaṃ tathā nivāsetvā bahi aparaṃ nivāsenti, sabbaṃ na vaṭṭati. Gilāno pana anto kāsāvassa ovaṭṭikaṃ dassetvā aparaṃ upari nivāsetuṃ labhati. Agilānena dve nivāsentena saguṇaṃ katvā nivāsetabbāni. Iti yañca idha paṭikkhittaṃ, yañca sekhiyavaṇṇanāyaṃ; taṃ sabbaṃ vajjetvā nibbikāraṃ timaṇḍalaṃ paṭicchādentena parimaṇḍalaṃ nivāsetabbaṃ. Yaṃkiñci vikāraṃ karonto dukkaṭā na muccati. Na bhikkhave gihipārutaṃ pārupitabbanti evaṃ paṭikkhittaṃ gihipārutaṃ apārupitvā, ubho kaṇṇe samaṃ katvā pārupanaṃ parimaṇḍalapārupanaṃ nāma, taṃ pārupitabbaṃ.
তত্থ যংকিঞ্চি সেতপটপারুতং পরিব্বাজকপারুতং একসাটকপারুতং সোণ্ডপারুতং অন্তেপুরিকপারুতং মহাজেট্ঠকপারুতং কুটিপৰেসকপারুতং ব্রাহ্মণপারুতং পাল়িকারকপারুতন্তি এৰমাদি পরিমণ্ডললক্খণতো অঞ্ঞথা পারুতং, সব্বমেতং গিহিপারুতং নাম। তস্মা যথা সেতপটা অড্ঢপালকনিগণ্ঠা পারুপন্তি, যথা চ একচ্চে পরিব্বাজকা উরং ৰিৰরিত্ৰা দ্ৰীসু অংসকূটেসু পাৰুরণং ঠপেন্তি, যথা চ একসাটকা মনুস্সা নিৰত্থসাটকস্স একেনন্তেন পিট্ঠিং পারুপিত্ৰা উভো কণ্ণে উভোসু অংসকূটেসু ঠপেন্তি, যথা চ সুরাসোণ্ডাদযো সাটকেন গীৰং পরিক্খিপন্তা উভো অন্তে উদরে ৰা ওলম্বেন্তি; পিট্ঠিযং ৰা খিপন্তি, যথা চ অন্তেপুরিকাযো অক্খিতারকমত্তং দস্সেত্ৰা ওগুণ্ঠিকং পারুপন্তি, যথা চ মহাজেট্ঠা দীঘসাটকং নিৰাসেত্ৰা তস্সেৰ একেনন্তেন সকলসরীরং পারুপন্তি, যথা চ কস্সকা খেত্তকুটিং পৰিসন্তা সাটকং পলিৰেঠেত্ৰা উপকচ্ছকে পক্খিপিত্ৰা তস্সেৰ একেনন্তেন সরীরং পারুপন্তি, যথা চ ব্রাহ্মণা উভিন্নং উপকচ্ছকানং অন্তরেন সাটকং পৰেসেত্ৰা অংসকূটেসু পক্খিপন্তি, যথা চ পাল়িকারকো ভিক্খু একংসপারুপনেন পারুতং ৰামবাহুং ৰিৰরিত্ৰা চীৰরং অংসকূটং আরোপেতি; এৰং অপারুপিত্ৰা সব্বেপি এতে অঞ্ঞে চ এৰরূপে পারুপনদোসে ৰজ্জেত্ৰা নিব্বিকারং পরিমণ্ডলং পারুপিতব্বং। তথা অপারুপিত্ৰা আরামে ৰা অন্তরঘরে ৰা অনাদরেন যংকিঞ্চি ৰিকারং করোন্তস্স দুক্কটং।
Tattha yaṃkiñci setapaṭapārutaṃ paribbājakapārutaṃ ekasāṭakapārutaṃ soṇḍapārutaṃ antepurikapārutaṃ mahājeṭṭhakapārutaṃ kuṭipavesakapārutaṃ brāhmaṇapārutaṃ pāḷikārakapārutanti evamādi parimaṇḍalalakkhaṇato aññathā pārutaṃ, sabbametaṃ gihipārutaṃ nāma. Tasmā yathā setapaṭā aḍḍhapālakanigaṇṭhā pārupanti, yathā ca ekacce paribbājakā uraṃ vivaritvā dvīsu aṃsakūṭesu pāvuraṇaṃ ṭhapenti, yathā ca ekasāṭakā manussā nivatthasāṭakassa ekenantena piṭṭhiṃ pārupitvā ubho kaṇṇe ubhosu aṃsakūṭesu ṭhapenti, yathā ca surāsoṇḍādayo sāṭakena gīvaṃ parikkhipantā ubho ante udare vā olambenti; piṭṭhiyaṃ vā khipanti, yathā ca antepurikāyo akkhitārakamattaṃ dassetvā oguṇṭhikaṃ pārupanti, yathā ca mahājeṭṭhā dīghasāṭakaṃ nivāsetvā tasseva ekenantena sakalasarīraṃ pārupanti, yathā ca kassakā khettakuṭiṃ pavisantā sāṭakaṃ paliveṭhetvā upakacchake pakkhipitvā tasseva ekenantena sarīraṃ pārupanti, yathā ca brāhmaṇā ubhinnaṃ upakacchakānaṃ antarena sāṭakaṃ pavesetvā aṃsakūṭesu pakkhipanti, yathā ca pāḷikārako bhikkhu ekaṃsapārupanena pārutaṃ vāmabāhuṃ vivaritvā cīvaraṃ aṃsakūṭaṃ āropeti; evaṃ apārupitvā sabbepi ete aññe ca evarūpe pārupanadose vajjetvā nibbikāraṃ parimaṇḍalaṃ pārupitabbaṃ. Tathā apārupitvā ārāme vā antaraghare vā anādarena yaṃkiñci vikāraṃ karontassa dukkaṭaṃ.
২৮১. মুণ্ডৰট্টীতি যথা রঞ্ঞো কুহিঞ্চি গচ্ছতো পরিক্খারভণ্ডৰহনমনুস্সাতি অধিপ্পাযো। অন্তরাকাজন্তি মজ্ঝে লগ্গেত্ৰা দ্ৰীহি ৰহিতব্বভারং।
281.Muṇḍavaṭṭīti yathā rañño kuhiñci gacchato parikkhārabhaṇḍavahanamanussāti adhippāyo. Antarākājanti majjhe laggetvā dvīhi vahitabbabhāraṃ.
২৮২. অচক্খুস্সন্তি চক্খূনং হিতং ন হোতি; পরিহানিং জনেতি। নচ্ছাদেতীতি ন রুচ্চতি। অট্ঠঙ্গুলপরমন্তি মনুস্সানং পমাণঙ্গুলেন অট্ঠঙ্গুলপরমং। অতিমটাহকন্তি অতিখুদ্দকং।
282.Acakkhussanti cakkhūnaṃ hitaṃ na hoti; parihāniṃ janeti. Nacchādetīti na ruccati. Aṭṭhaṅgulaparamanti manussānaṃ pamāṇaṅgulena aṭṭhaṅgulaparamaṃ. Atimaṭāhakanti atikhuddakaṃ.
২৮৩. দাযং আলিম্পেন্তীতি তিণৰনাদীসু অগ্গিং দেন্তি। পটগ্গিন্তি পটিঅগ্গিং। পরিত্তন্তি অপ্পহরিতকরণেন ৰা পরিখাখণনেন ৰা পরিত্তাণং। এত্থ পন অনুপসম্পন্নে সতি সযং অগ্গিং দাতুং ন লভতি, অসতি অগ্গিম্পি দাতুং লভতি, ভূমিং তচ্ছেত্ৰা তিণানিপি হরিতুং, পরিখম্পি খণিতুং, অল্লসাখং ভঞ্জিত্ৰাপি অগ্গিং নিব্বাপেতুং লভতি, সেনাসনং পত্তং ৰা অপ্পত্তং ৰা তথা নিব্বাপেতুং লভতিযেৰ। উদকেন পন কপ্পিযেনেৰ লভতি, ন ইতরেন।
283.Dāyaṃ ālimpentīti tiṇavanādīsu aggiṃ denti. Paṭagginti paṭiaggiṃ. Parittanti appaharitakaraṇena vā parikhākhaṇanena vā parittāṇaṃ. Ettha pana anupasampanne sati sayaṃ aggiṃ dātuṃ na labhati, asati aggimpi dātuṃ labhati, bhūmiṃ tacchetvā tiṇānipi harituṃ, parikhampi khaṇituṃ, allasākhaṃ bhañjitvāpi aggiṃ nibbāpetuṃ labhati, senāsanaṃ pattaṃ vā appattaṃ vā tathā nibbāpetuṃ labhatiyeva. Udakena pana kappiyeneva labhati, na itarena.
২৮৪. সতি করণীযেতি সুক্খকট্ঠাদিগ্গহণকিচ্চে সতি। পোরিসিযন্তি পুরিসপ্পমাণং। আপদাসূতি ৰাল়মিগাদযো ৰা দিস্ৰা মগ্গমূল়্হো ৰা দিসা ওলোকেতুকামো হুত্ৰা দৰডাহং ৰা উদকোঘং ৰা আগচ্ছন্তং দিস্ৰা এৰরূপাসু আপদাসু অতিউচ্চম্পি রুক্খং আরোহিতুং ৰট্টতি।
284.Sati karaṇīyeti sukkhakaṭṭhādiggahaṇakicce sati. Porisiyanti purisappamāṇaṃ. Āpadāsūti vāḷamigādayo vā disvā maggamūḷho vā disā oloketukāmo hutvā davaḍāhaṃ vā udakoghaṃ vā āgacchantaṃ disvā evarūpāsu āpadāsu atiuccampi rukkhaṃ ārohituṃ vaṭṭati.
২৮৫. কল্যাণৰাক্করণাতি মধুরসদ্দা। ছন্দসো আরোপেমাতি ৰেদং ৰিয সক্কতভাসায ৰাচনামগ্গং আরোপেম। সকায নিরুত্তিযাতি এত্থ সকা নিরুত্তি নাম সম্মাসম্বুদ্ধেন ৰুত্তপ্পকারো মাগধিকো ৰোহারো।
285.Kalyāṇavākkaraṇāti madhurasaddā. Chandaso āropemāti vedaṃ viya sakkatabhāsāya vācanāmaggaṃ āropema. Sakāya niruttiyāti ettha sakā nirutti nāma sammāsambuddhena vuttappakāro māgadhiko vohāro.
২৮৬. লোকাযতং নাম সব্বং উচ্ছিট্ঠং, সব্বং অনুচ্ছিট্ঠং, সেতো কাকো, কাল়ো বকো; ইমিনা চ ইমিনা চ কারণেনাতি এৰমাদিনিরত্থককারণপটিসংযুত্তং তিত্থিযসত্থং।
286.Lokāyataṃ nāma sabbaṃ ucchiṭṭhaṃ, sabbaṃ anucchiṭṭhaṃ, seto kāko, kāḷo bako; iminā ca iminā ca kāraṇenāti evamādiniratthakakāraṇapaṭisaṃyuttaṃ titthiyasatthaṃ.
২৮৮. অন্তরা অহোসীতি অন্তরিতা অহোসি পটিচ্ছন্না।
288.Antarā ahosīti antaritā ahosi paṭicchannā.
২৮৯. আবাধপ্পচ্চযাতি যস্স আবাধস্স লসুণং ভেসজ্জং; তপ্পচ্চযাতি অত্থো।
289.Ābādhappaccayāti yassa ābādhassa lasuṇaṃ bhesajjaṃ; tappaccayāti attho.
২৯০. পস্সাৰপাদুকন্তি এত্থ পাদুকা ইট্ঠকাহিপি সিলাহিপি দারূহিপি কাতুং ৰট্টতি। ৰচ্চপাদুকাযপি এসেৰ নযো। পরিৰেণন্তি ৰচ্চকুটিপরিক্খেপব্ভন্তরং।
290.Passāvapādukanti ettha pādukā iṭṭhakāhipi silāhipi dārūhipi kātuṃ vaṭṭati. Vaccapādukāyapi eseva nayo. Pariveṇanti vaccakuṭiparikkhepabbhantaraṃ.
২৯৩. যথাধম্মো কারেতব্বোতি দুক্কটৰত্থুম্হি দুক্কটেন পাচিত্তিযৰত্থুম্হি পাচিত্তিযেন কারেতব্বো। পহরণত্থং কতং পহরণীতি ৰুচ্চতি, যস্স কস্সচি আৰুধসঙ্খাতস্সেতং অধিৰচনং, তং ঠপেত্ৰা অঞ্ঞং সব্বং লোহভণ্ডং অনুজানামীতি অত্থো। কতকঞ্চ কুম্ভকারিকঞ্চাতি এত্থ কতকং ৰুত্তমেৰ। কুম্ভকারিকঞ্চাতি ধনিযস্সেৰ সব্বমত্তিকামযকুটি ৰুচ্চতি। সেসং সব্বত্থ উত্তানমেৰাতি।
293.Yathādhammokāretabboti dukkaṭavatthumhi dukkaṭena pācittiyavatthumhi pācittiyena kāretabbo. Paharaṇatthaṃ kataṃ paharaṇīti vuccati, yassa kassaci āvudhasaṅkhātassetaṃ adhivacanaṃ, taṃ ṭhapetvā aññaṃ sabbaṃ lohabhaṇḍaṃ anujānāmīti attho. Katakañca kumbhakārikañcāti ettha katakaṃ vuttameva. Kumbhakārikañcāti dhaniyasseva sabbamattikāmayakuṭi vuccati. Sesaṃ sabbattha uttānamevāti.
খুদ্দকৰত্থুকথা নিট্ঠিতা।
Khuddakavatthukathā niṭṭhitā.
খুদ্দকৰত্থুক্খন্ধকৰণ্ণনা নিট্ঠিতা।
Khuddakavatthukkhandhakavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi / খুদ্দকৰত্থূনি • Khuddakavatthūni
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / খুদ্দকৰত্থুকথাৰণ্ণনা • Khuddakavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / খুদ্দকৰত্থুকথাৰণ্ণনা • Khuddakavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / খুদ্দকৰত্থুকথাৰণ্ণনা • Khuddakavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / খুদ্দকৰত্থুকথা • Khuddakavatthukathā
