| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
5. கு²த்³த³கவத்து²க்க²ந்த⁴கோ
5. Khuddakavatthukkhandhako
கு²த்³த³கவத்து²கதா²வண்ணனா
Khuddakavatthukathāvaṇṇanā
243. கு²த்³த³கவத்து²க்க²ந்த⁴கே அட்ட²பதா³காரேனாதி ஜூதப²லகே அட்ட²க³ப்³ப⁴ராஜிஆகாரேன. மல்லகமூலஸண்டா²னேனாதி கே²ளமல்லகமூலஸண்டா²னேன. இத³ஞ்ச வட்டாதா⁴ரகங் ஸந்தா⁴ய வுத்தங், கண்டகே உட்டா²பெத்வா கதவட்டகபாலஸ்ஸேதங் அதி⁴வசனங்.
243. Khuddakavatthukkhandhake aṭṭhapadākārenāti jūtaphalake aṭṭhagabbharājiākārena. Mallakamūlasaṇṭhānenāti kheḷamallakamūlasaṇṭhānena. Idañca vaṭṭādhārakaṃ sandhāya vuttaṃ, kaṇṭake uṭṭhāpetvā katavaṭṭakapālassetaṃ adhivacanaṃ.
244. புது²பாணிகந்தி முட்டி²ங் அகத்வா விகஸிதஹத்த²தலேஹி பிட்டி²பரிகம்மங் வுச்சதி. ஏதமேவ ஸந்தா⁴ய ‘‘ஹத்த²பரிகம்ம’’ந்தி வுத்தங்.
244.Puthupāṇikanti muṭṭhiṃ akatvā vikasitahatthatalehi piṭṭhiparikammaṃ vuccati. Etameva sandhāya ‘‘hatthaparikamma’’nti vuttaṃ.
245. முத்தோலம்ப³காதீ³னந்தி ஆதி³-ஸத்³தே³ன குண்ட³லாதி³ங் ஸங்க³ண்ஹாதி. பலம்ப³கஸுத்தந்தி ப்³ராஹ்மணானங் யஞ்ஞோபசிதஸுத்தாதி³ஆகாரங் வுச்சதி. வலயந்தி ஹத்த²பாத³வலயங்.
245.Muttolambakādīnanti ādi-saddena kuṇḍalādiṃ saṅgaṇhāti. Palambakasuttanti brāhmaṇānaṃ yaññopacitasuttādiākāraṃ vuccati. Valayanti hatthapādavalayaṃ.
246. த்³வங்கு³லேதி உபயோக³ப³ஹுவசனங், த்³வங்கு³லப்பமாணங் அதிக்காமேதுங் ந வட்டதீதி அத்தோ². எத்த² ச து³மாஸஸ்ஸ வா த்³வங்கு³லஸ்ஸ வா அதிக்கந்தபா⁴வங் அஜானந்தஸ்ஸாபி கேஸமஸ்ஸுக³ணனாய அசித்தகாபத்தியோ ஹொந்தீதி வத³ந்தி.
246.Dvaṅguleti upayogabahuvacanaṃ, dvaṅgulappamāṇaṃ atikkāmetuṃ na vaṭṭatīti attho. Ettha ca dumāsassa vā dvaṅgulassa vā atikkantabhāvaṃ ajānantassāpi kesamassugaṇanāya acittakāpattiyo hontīti vadanti.
கொச்சே²னாதி உஸீரதிணாதீ³னி ப³ந்தி⁴த்வா ஸமங் சி²ந்தி³த்வா க³ஹிதகொச்சே²ன. சிக்கலேனாதி ஸிலேஸயுத்ததேலேன. உண்ஹாபி⁴தத்தரஜஸிரானம்பீதி உண்ஹாபி⁴தத்தானங் ரஜோகிண்ணஸிரானங். அத்³த³ஹத்தே²னாதி அல்லஹத்தே²ன.
Kocchenāti usīratiṇādīni bandhitvā samaṃ chinditvā gahitakocchena. Cikkalenāti silesayuttatelena. Uṇhābhitattarajasirānampīti uṇhābhitattānaṃ rajokiṇṇasirānaṃ. Addahatthenāti allahatthena.
248-9. ஸாது⁴கீ³தந்தி அனிச்சதாதி³படிஸஞ்ஞுத்தங் கீ³தங். சதுரஸ்ஸேன வத்தேனாதி பரிபுண்ணேன உச்சாரணவத்தேன. தரங்க³வத்தாதீ³னங் ஸப்³பே³ஸம்பி ஸாமஞ்ஞலக்க²ணங் த³ஸ்ஸேதுங் ‘‘ஸப்³பே³ஸங்…பே॰… லக்க²ண’’ந்தி வுத்தங். யத்தகாஹி மத்தாஹி அக்க²ரங் பரிபுண்ணங் ஹோதி, ததோபி அதி⁴கமத்தாயுத்தங் கத்வா கத²னங் விகாரகத²னங் நாம, ததா² அகத்வா கத²னமேவ லக்க²ணந்தி அத்தோ². பா³ஹிரலோமிந்தி பா⁴வனபுங்ஸகனித்³தே³ஸோ, யதா² ப³ஹித்³தா⁴ லோமானி தி³ஸ்ஸந்தி, ஏவங் தா⁴ரெந்தஸ்ஸ து³க்கடந்தி அத்தோ².
248-9.Sādhugītanti aniccatādipaṭisaññuttaṃ gītaṃ. Caturassena vattenāti paripuṇṇena uccāraṇavattena. Taraṅgavattādīnaṃ sabbesampi sāmaññalakkhaṇaṃ dassetuṃ ‘‘sabbesaṃ…pe… lakkhaṇa’’nti vuttaṃ. Yattakāhi mattāhi akkharaṃ paripuṇṇaṃ hoti, tatopi adhikamattāyuttaṃ katvā kathanaṃ vikārakathanaṃ nāma, tathā akatvā kathanameva lakkhaṇanti attho. Bāhiralominti bhāvanapuṃsakaniddeso, yathā bahiddhā lomāni dissanti, evaṃ dhārentassa dukkaṭanti attho.
250. பாளியங் தருணஞ்ஞேவ அம்ப³ந்தி தருணங் அஸஞ்ஜாதபீ³ஜங் ஏவ அம்ப³ப²லங். பாதாபெத்வாதி சி²ந்தா³பெத்வாவ. ‘‘மத்தாவண்ணிதா’’தி இத³ங் ‘‘பரே நிந்த³ந்தீ’’தி ஸாஸனஹிதேஸிதாய வுத்தங். ந பரியாபுணிங்ஸூதி நாஸிக்கி²ங்ஸு.
250. Pāḷiyaṃ taruṇaññeva ambanti taruṇaṃ asañjātabījaṃ eva ambaphalaṃ. Pātāpetvāti chindāpetvāva. ‘‘Mattāvaṇṇitā’’ti idaṃ ‘‘pare nindantī’’ti sāsanahitesitāya vuttaṃ. Na pariyāpuṇiṃsūti nāsikkhiṃsu.
251. சத்தாரி அஹிராஜகுலானீதி ஸப்³பே³ஸங் அஹிபே⁴தா³னங் சதூஸு ஏவ ஸங்க³ஹதோ வுத்தங். அத்தபரித்தங் காதுந்தி அத்தனோ பரித்தாணங் காதுங்.
251.Cattāri ahirājakulānīti sabbesaṃ ahibhedānaṃ catūsu eva saṅgahato vuttaṃ. Attaparittaṃ kātunti attano parittāṇaṃ kātuṃ.
விரூபக்கே²ஹி மே மெத்தந்தி விரூபக்க²ஜாதிகேஹி நாகே³ஹி ஸஹ மய்ஹங் மித்தபா⁴வோ ஹோது, மெத்தா ஹோதூதி அத்தோ², தே ஸுகி²தா நித்³து³க்கா² அவேரா ஹொந்தூதி அதி⁴ப்பாயோ. ஏவஞ்ஹி மெத்தாப²ரணங் ஹோதி. ஸேஸேஸுபி ஏஸேவ நயோ. அபாத³கேஹீதி அஹிகுலேஹி ஸஹ ஸப்³ப³ஸத்தேஸு ஓதி⁴ஸோ மெத்தாப²ரணத³ஸ்ஸனங். மா மங் அபாத³கோ ஹிங்ஸீதி தாய மெத்தாய அத்தரக்கா²விதா⁴னத³ஸ்ஸனங்.
Virūpakkhehi me mettanti virūpakkhajātikehi nāgehi saha mayhaṃ mittabhāvo hotu, mettā hotūti attho, te sukhitā niddukkhā averā hontūti adhippāyo. Evañhi mettāpharaṇaṃ hoti. Sesesupi eseva nayo. Apādakehīti ahikulehi saha sabbasattesu odhiso mettāpharaṇadassanaṃ. Mā maṃ apādako hiṃsīti tāya mettāya attarakkhāvidhānadassanaṃ.
ஸப்³பே³ ஸத்தாதிஆதி³ அத்தானங் உபமங் கத்வா ஸப்³ப³ஸத்தேஸு அனோதி⁴ஸோ மெத்தாப²ரணத³ஸ்ஸனங். தத்த² மா கஞ்சி பாபமாக³மாதி கஞ்சி ஸத்தங் லாமகங் து³க்க²ஹேது, து³க்க²ஞ்ச மா ஆக³ச்ச²து.
Sabbe sattātiādi attānaṃ upamaṃ katvā sabbasattesu anodhiso mettāpharaṇadassanaṃ. Tattha mā kañci pāpamāgamāti kañci sattaṃ lāmakaṃ dukkhahetu, dukkhañca mā āgacchatu.
ஏவங் மெத்தாய அத்தகு³த்திங் த³ஸ்ஸெத்வா இதா³னி ரதனத்தயானுஸ்ஸரணேன த³ஸ்ஸேதுங் ‘‘அப்பமாணோ’’திஆதி³ வுத்தங். தத்த² பமாணகரத⁴ம்மா அகுஸலா, தப்³பி³பாகா ச பமாணா, தப்படிபக்கா² ஸீலாத³யோ கு³ணா, தப்³பி³பாகா ச லோகியலோகுத்தரப²லானி அப்பமாணா, தே அஸ்ஸ அத்தீ²தி அப்பமாணோ, அப்பமாணா வா அபரிமெய்யகு³ணா அஸ்ஸாதிபி அப்பமாணோ. பமாணவந்தானீதி யதா²வுத்தபமாணகரத⁴ம்மயுத்தானி. அஹிவிச்சி²காதி ஸரீஸபானஞ்ஞேவ பபே⁴த³த³ஸ்ஸனங். உண்ணனாபீ⁴தி லோமஸனாபி⁴கோ மக்கடோ. ஸரபூ³தி க⁴ரகோ³ளிகா.
Evaṃ mettāya attaguttiṃ dassetvā idāni ratanattayānussaraṇena dassetuṃ ‘‘appamāṇo’’tiādi vuttaṃ. Tattha pamāṇakaradhammā akusalā, tabbipākā ca pamāṇā, tappaṭipakkhā sīlādayo guṇā, tabbipākā ca lokiyalokuttaraphalāni appamāṇā, te assa atthīti appamāṇo, appamāṇā vā aparimeyyaguṇā assātipi appamāṇo. Pamāṇavantānīti yathāvuttapamāṇakaradhammayuttāni. Ahivicchikāti sarīsapānaññeva pabhedadassanaṃ. Uṇṇanābhīti lomasanābhiko makkaṭo. Sarabūti gharagoḷikā.
படிக்கமந்தூதி அபக³ச்ச²ந்து, மா மங் விஹேஸயிங்ஸூதி அத்தோ². ஸோஹங் நமோதி எத்த² ‘‘கரோமீ’’தி பாட²ஸேஸோ. யஸ்மா மயா மெத்தாதீ³ஹி தும்ஹாகஞ்ச மய்ஹஞ்ச ரக்கா² கதா, யஸ்மா ச ஸோஹங் ப⁴க³வதோ நமோ கரோமி, விபஸ்ஸீஆதீ³னங் ஸத்தன்னம்பி நமோ கரோமி, தஸ்மா படிக்கமந்து பூ⁴தானீதி யோஜனா.
Paṭikkamantūti apagacchantu, mā maṃ vihesayiṃsūti attho. Sohaṃ namoti ettha ‘‘karomī’’ti pāṭhaseso. Yasmā mayā mettādīhi tumhākañca mayhañca rakkhā katā, yasmā ca sohaṃ bhagavato namo karomi, vipassīādīnaṃ sattannampi namo karomi, tasmā paṭikkamantu bhūtānīti yojanā.
அஞ்ஞம்ஹீதி காமராகே³ அஸுப⁴மனஸிகாராதி³னா சே²தப்³பே³தி அத்தோ². அங்க³ஜாதந்தி பீ³ஜவிரஹிதங் புரிஸனிமித்தங். பீ³ஜே ஹி சி²ன்னே ஓபக்கமிகபண்ட³கோ நாம அப⁴ப்³போ³ ஹோதீதி வத³ந்தி. ஏகே பன ‘‘பீ³ஜஸ்ஸாபி சே²த³னக்க²ணே து³க்கடாபத்தி ஏவ கமேன புரிஸிந்த்³ரியாதி³கே அந்தரஹிதே பண்ட³கோ நாம அப⁴ப்³போ³ ஹோதி, ததா³ லிங்க³னாஸனாய நாஸேதப்³போ³’’தி வத³ந்தி. தாதி³ஸங் வா து³க்க²ங் உப்பாதெ³ந்தஸ்ஸாதி முட்டி²ப்பஹாராதீ³ஹி அத்தனோ து³க்க²ங் உப்பாதெ³ந்தஸ்ஸ.
Aññamhīti kāmarāge asubhamanasikārādinā chetabbeti attho. Aṅgajātanti bījavirahitaṃ purisanimittaṃ. Bīje hi chinne opakkamikapaṇḍako nāma abhabbo hotīti vadanti. Eke pana ‘‘bījassāpi chedanakkhaṇe dukkaṭāpatti eva kamena purisindriyādike antarahite paṇḍako nāma abhabbo hoti, tadā liṅganāsanāya nāsetabbo’’ti vadanti. Tādisaṃ vā dukkhaṃ uppādentassāti muṭṭhippahārādīhi attano dukkhaṃ uppādentassa.
252. பாளியங் துய்ஹேஸோ பத்தோதி ‘‘யோ ச அரஹா சேவ இத்³தி⁴மா ச, தஸ்ஸ தி³ன்னமேவா’’தி ஸெட்டி²னா வுத்தங், தங் ஸந்தா⁴ய வத³தி. தங் பத்தங் க³ஹெத்வா திக்க²த்துங் ராஜக³ஹங் அனுபரியாயீதி எத்த² வேளுபரம்பராய ப³த்³த⁴பத்தஸ்ஸ உபரிபா⁴கே³ ஆகாஸே நக³ரங் திக்க²த்துங் அனுபரியாயித்வா டி²தபா⁴வங் ஸந்தா⁴ய ‘‘பத்தங் க³ஹெத்வா’’தி வுத்தங், ந பன தே²ரோ ஹத்தே²ன பத்தங் ஸயமேவ அக்³க³ஹேஸி. கேசி பன வத³ந்தி ‘‘இத்³தி⁴ப³லேன தங் பத்தங் வேளுபரம்பரதோ முஞ்சித்வா தே²ரங் அனுப³ந்த⁴மானோ அட்டா²ஸி, ஸோ ச அனேன ஹத்தே²ன க³ஹிதோ விய அஹோஸீ’’தி. ததா² டி²தமேவ பன ஸந்தா⁴ய ‘‘பா⁴ரத்³வாஜஸ்ஸ ஹத்த²தோ பத்தங் க³ஹெத்வா’’தி வுத்தங். தே ச மனுஸ்ஸா…பே॰… அனுப³ந்தி⁴ங்ஸூதி யே ச மனுஸ்ஸா பட²மங் பாடிஹாரியங் நாத்³த³ஸங்ஸு, தே அம்ஹாகம்பி பாடிஹாரியங் த³ஸ்ஸேஹீதி தே²ரமனுப³ந்தி⁴ங்ஸு. தே²ரோ ச ஸீஹப்³யக்³கா⁴தி³ரூபங் க³ஹெத்வா விகுப்³ப³னித்³தி⁴ங் த³ஸ்ஸேதி, தே ச அச்ச²ரியப்³பு⁴தஜாதா உச்சாஸத்³தா³ மஹாஸத்³தா³ அஹேஸுங். தேனாஹ ‘‘கிங் நு கோ² ஸோ, ஆனந்த³, உச்சாஸத்³தோ³ மஹாஸத்³தோ³’’தி. இத்³தி⁴பாடிஹாரியங் ந த³ஸ்ஸேதப்³ப³ந்தி எத்த² ‘‘யோ பகதிவண்ணங் விஜஹித்வா குமாரவண்ணங் வா த³ஸ்ஸேதி, நாக³வண்ணங் வா…பே॰… விவித⁴ம்பி ஸேனாப்³யூஹங் த³ஸ்ஸேதீ’’தி (படி॰ ம॰ 3.13) ஏவமாக³தா அத்தனோ ஸரீரஸ்ஸ விகாராபாத³னவஸப்பவத்தா விகுப்³ப³னித்³தி⁴ அதி⁴ப்பேதாதி ஆஹ ‘‘அதி⁴ட்டா²னித்³தி⁴ பன அப்படிக்கி²த்தா’’தி. பகதியா ஏகோ ப³ஹுகங் ஆவஜ்ஜதி, ஸதங் வா ஸஹஸ்ஸங் வா ஸதஸஹஸ்ஸங் வா ஆவஜ்ஜெத்வா ஞாணேன அதி⁴ட்டா²தி ‘‘ப³ஹுகோ ஹோமீ’’தி (படி॰ ம॰ 3.10) ஏவங் த³ஸ்ஸிதா அதி⁴ட்டா²னவஸேன நிப்ப²ன்னா அதி⁴ட்டா²னித்³தி⁴ நாம. கி³ஹிவிகடானீதி கி³ஹிஸந்தகானி.
252. Pāḷiyaṃ tuyheso pattoti ‘‘yo ca arahā ceva iddhimā ca, tassa dinnamevā’’ti seṭṭhinā vuttaṃ, taṃ sandhāya vadati. Taṃ pattaṃ gahetvā tikkhattuṃ rājagahaṃ anupariyāyīti ettha veḷuparamparāya baddhapattassa uparibhāge ākāse nagaraṃ tikkhattuṃ anupariyāyitvā ṭhitabhāvaṃ sandhāya ‘‘pattaṃ gahetvā’’ti vuttaṃ, na pana thero hatthena pattaṃ sayameva aggahesi. Keci pana vadanti ‘‘iddhibalena taṃ pattaṃ veḷuparamparato muñcitvā theraṃ anubandhamāno aṭṭhāsi, so ca anena hatthena gahito viya ahosī’’ti. Tathā ṭhitameva pana sandhāya ‘‘bhāradvājassa hatthato pattaṃ gahetvā’’ti vuttaṃ. Te ca manussā…pe… anubandhiṃsūti ye ca manussā paṭhamaṃ pāṭihāriyaṃ nāddasaṃsu, te amhākampi pāṭihāriyaṃ dassehīti theramanubandhiṃsu. Thero ca sīhabyagghādirūpaṃ gahetvā vikubbaniddhiṃ dasseti, te ca acchariyabbhutajātā uccāsaddā mahāsaddā ahesuṃ. Tenāha ‘‘kiṃ nu kho so, ānanda, uccāsaddo mahāsaddo’’ti. Iddhipāṭihāriyaṃ na dassetabbanti ettha ‘‘yo pakativaṇṇaṃ vijahitvā kumāravaṇṇaṃ vā dasseti, nāgavaṇṇaṃ vā…pe… vividhampi senābyūhaṃ dassetī’’ti (paṭi. ma. 3.13) evamāgatā attano sarīrassa vikārāpādanavasappavattā vikubbaniddhi adhippetāti āha ‘‘adhiṭṭhāniddhi pana appaṭikkhittā’’ti. Pakatiyā eko bahukaṃ āvajjati, sataṃ vā sahassaṃ vā satasahassaṃ vā āvajjetvā ñāṇena adhiṭṭhāti ‘‘bahuko homī’’ti (paṭi. ma. 3.10) evaṃ dassitā adhiṭṭhānavasena nipphannā adhiṭṭhāniddhi nāma. Gihivikaṭānīti gihisantakāni.
253. பாளியங் ந அச்சு²பியந்தீதி ந பு²ஸிதானி ஹொந்தி. ரூபகாகிண்ணானீதி இத்தி²ரூபாதீ³ஹி ஆகிண்ணானி.
253. Pāḷiyaṃ na acchupiyantīti na phusitāni honti. Rūpakākiṇṇānīti itthirūpādīhi ākiṇṇāni.
254. பூ⁴மிஆதா⁴ரகேதி த³ந்தாதீ³ஹி கதே வலயாதா⁴ரகே. ஏதஸ்ஸ வலயாதா⁴ரகஸ்ஸ அனுச்சதாய ட²பிதா பத்தா ந பரிபதந்தீதி ‘‘தயோ பத்தே ட²பேதுங் வட்டதீ’’தி வுத்தங். அனுச்சதஞ்ஹி ஸந்தா⁴ய அயங் ‘‘பூ⁴மிஆதா⁴ரகோ’’தி வுத்தோ. தா³ருஆதா⁴ரகத³ண்டா³தா⁴ரகேஸூதி ஏகதா³ருனா கதஆதா⁴ரகே, ப³ஹூஹி த³ண்டே³ஹி கதஆதா⁴ரகே ச. ஏதே ச உச்சதரா ஹொந்தி பத்தேஹி ஸஹ பதனஸபா⁴வா. தேன ‘‘ஸுஸஜ்ஜிதேஸூ’’தி வுத்தங். ப⁴மகோடிஸதி³ஸோதி யத்த² த⁴மகரணாதி³ங் பவேஸெத்வா லிக²ந்தி, தஸ்ஸ ப⁴மகஸ்ஸ கோடியா ஸதி³ஸோ. தாதி³ஸஸ்ஸ தா³ருஆதா⁴ரகஸ்ஸ அவித்தி²ண்ணதாய ட²பிதோபி பத்தோ பததீதி ‘‘அனோகாஸோ’’தி வுத்தோ.
254.Bhūmiādhāraketi dantādīhi kate valayādhārake. Etassa valayādhārakassa anuccatāya ṭhapitā pattā na paripatantīti ‘‘tayo patteṭhapetuṃ vaṭṭatī’’ti vuttaṃ. Anuccatañhi sandhāya ayaṃ ‘‘bhūmiādhārako’’ti vutto. Dāruādhārakadaṇḍādhārakesūti ekadārunā kataādhārake, bahūhi daṇḍehi kataādhārake ca. Ete ca uccatarā honti pattehi saha patanasabhāvā. Tena ‘‘susajjitesū’’ti vuttaṃ. Bhamakoṭisadisoti yattha dhamakaraṇādiṃ pavesetvā likhanti, tassa bhamakassa koṭiyā sadiso. Tādisassa dāruādhārakassa avitthiṇṇatāya ṭhapitopi patto patatīti ‘‘anokāso’’ti vutto.
ஆலிந்த³கமிட்³டி⁴காதீ³னந்தி பமுக²மிட்³டி⁴காதீ³னங், உச்சவத்து²கானந்தி அத்தோ². பா³ஹிரபஸ்ஸேதி பாஸாதா³தீ³னங் ப³ஹிகுட்டே. தனுகமிட்³டி⁴காயாதி வேதி³காய. ஸப்³ப³த்த² பன ஹத்த²ப்பமாணதோ அப்³ப⁴ந்தரே ட²பேதுங் வட்டதி. ஆதா⁴ரே பன ததோ ப³ஹிபி வட்டதி.
Ālindakamiḍḍhikādīnanti pamukhamiḍḍhikādīnaṃ, uccavatthukānanti attho. Bāhirapasseti pāsādādīnaṃ bahikuṭṭe. Tanukamiḍḍhikāyāti vedikāya. Sabbattha pana hatthappamāṇato abbhantare ṭhapetuṃ vaṭṭati. Ādhāre pana tato bahipi vaṭṭati.
பாளியங் ஒட்டோ²தி முக²வட்டி. பத்தமாளகந்தி உபசிகானங் அனுட்ட²ஹனத்தா²ய பூ⁴மிதோ உச்சதரங் கதங் வேதி³காகாரமாளகங். மஹாமுக²குண்ட³ஸண்டா²னாதி மஹாமுக²சாடிஸண்டா²னா. லக்³கெ³ந்தஸ்ஸ து³க்கடந்தி கேவலங் பத்தங் லக்³கெ³ந்தஸ்ஸ, ந த²விகாய லக்³கெ³ந்தஸ்ஸாதி வத³ந்தி. வீமங்ஸிதப்³ப³ங். அஞ்ஞேன பன ப⁴ண்ட³கேனாதி அஞ்ஞேன பா⁴ரப³ந்த⁴னேன ப⁴ண்ட³கேன. ‘‘ப³ந்தி⁴த்வா ஓலம்பே³து’’ந்தி வுத்தத்தா பத்தத்த²விகாய அங்ஸப³த்³த⁴கோ யதா² லக்³கி³தட்டா²னதோ ந பரிக³ளதி, ததா² ஸப்³ப³தா²பி ப³ந்தி⁴த்வா ட²பேதுங் வட்டதி. ப³ந்தி⁴த்வாபி உபரி ட²பேதுங் ந வட்டதீதி உபரி நிஸீத³ந்தா ஒத்த²ரித்வா பி⁴ந்த³ந்தீதி வுத்தங். தத்த² ட²பேதுங் வட்டதீதி நிஸீத³னஸங்காபா⁴வதோ வுத்தங். ப³ந்தி⁴த்வா வாதி ப³ந்தி⁴த்வா ட²பிதச²த்தே வா. யோ கோசீதி ப⁴த்தபூரோபி துச்ச²பத்தோபி.
Pāḷiyaṃ oṭṭhoti mukhavaṭṭi. Pattamāḷakanti upacikānaṃ anuṭṭhahanatthāya bhūmito uccataraṃ kataṃ vedikākāramāḷakaṃ. Mahāmukhakuṇḍasaṇṭhānāti mahāmukhacāṭisaṇṭhānā. Laggentassa dukkaṭanti kevalaṃ pattaṃ laggentassa, na thavikāya laggentassāti vadanti. Vīmaṃsitabbaṃ. Aññena pana bhaṇḍakenāti aññena bhārabandhanena bhaṇḍakena. ‘‘Bandhitvā olambetu’’nti vuttattā pattatthavikāya aṃsabaddhako yathā laggitaṭṭhānato na parigaḷati, tathā sabbathāpi bandhitvā ṭhapetuṃ vaṭṭati. Bandhitvāpi upari ṭhapetuṃ na vaṭṭatīti upari nisīdantā ottharitvā bhindantīti vuttaṃ. Tattha ṭhapetuṃ vaṭṭatīti nisīdanasaṅkābhāvato vuttaṃ. Bandhitvā vāti bandhitvā ṭhapitachatte vā. Yo kocīti bhattapūropi tucchapattopi.
255. பரிஹரிதுந்தி தி³வஸே தி³வஸே பிண்டா³ய சரணத்தா²ய ட²பேதுங். பத்தங் அலப⁴ந்தேன பன ஏகதி³வஸங் பிண்டா³ய சரித்வா பு⁴ஞ்ஜித்வா ச²ட்³டே³துங் வட்டதி. தேனாஹ ‘‘தாவகாலிகங் பரிபு⁴ஞ்ஜிதுங் வட்டதீ’’தி. பண்ணபுடாதீ³ஸுபி ஏஸேவ நயோ. அபு⁴ங் மேதி அபூ⁴தி மய்ஹங், வினாஸோ மய்ஹந்தி அத்தோ². பாளியங் பிஸாசோ வதமந்தி பிஸாசோ வதாயங், அயமேவ வா பாடோ². பிஸாசில்லிகாதி பிஸாசதா³ரகா. ச²வஸீஸஸ்ஸ பத்தோதி ச²வஸீஸமயோ பத்தோ. பகதிவிகாரஸம்ப³ந்தே⁴ சேதங் ஸாமிவசனங்.
255.Pariharitunti divase divase piṇḍāya caraṇatthāya ṭhapetuṃ. Pattaṃ alabhantena pana ekadivasaṃ piṇḍāya caritvā bhuñjitvā chaḍḍetuṃ vaṭṭati. Tenāha ‘‘tāvakālikaṃ paribhuñjituṃ vaṭṭatī’’ti. Paṇṇapuṭādīsupi eseva nayo. Abhuṃ meti abhūti mayhaṃ, vināso mayhanti attho. Pāḷiyaṃ pisāco vatamanti pisāco vatāyaṃ, ayameva vā pāṭho. Pisācillikāti pisācadārakā. Chavasīsassa pattoti chavasīsamayo patto. Pakativikārasambandhe cetaṃ sāmivacanaṃ.
சப்³பெ³த்வாதி நிட்டு²பி⁴த்வா. ‘‘படிக்³க³ஹங் கத்வா’’தி வுத்தத்தா உச்சி²ட்ட²ஹத்தே²ன உத³கங் க³ஹெத்வா பத்தங் பரிப்போ²ஸித்வா தோ⁴வனக⁴ங்ஸனவஸேன ஹத்த²ங் தோ⁴விதுங் வட்டதி, எத்தகேன பத்தங் படிக்³க³ஹங் கத்வா ஹத்தோ² தோ⁴விதோ நாம ந ஹோதி. ஏகங் உத³கக³ண்டு³ஸங் க³ஹெத்வாதி பத்தங் அபு²ஸித்வா தத்த² உத³கமேவ உச்சி²ட்ட²ஹத்தே²ன உக்கி²பித்வா க³ண்டு³ஸங் கத்வா, வாமஹத்தே²னேவ வா பத்தங் உக்கி²பித்வா முகே²ன க³ண்டு³ஸங் க³ஹேதும்பி வட்டதி. ப³ஹி உத³கேன விக்கா²லெத்வாதி த்³வீஸு அங்கு³லீஸு ஆமிஸமத்தங் விக்கா²லெத்வா ப³ஹி க³ஹேதும்பி வட்டதி. படிகா²தி³துகாமோதி எத்த² ந ஸயங் கா²தி³துகாமோபி அஞ்ஞேஸங் கா²த³னாரஹங் ட²பேதுங் லப⁴தி . தத்தே²வ கத்வாதி பத்தேயேவ யதா²ட²பிதட்டா²னதோ அனுத்³த⁴ரித்வா. லுஞ்சித்வாதி ததோ மங்ஸமேவ நிரவஸேஸங் உப்பட்டெத்வா.
Cabbetvāti niṭṭhubhitvā. ‘‘Paṭiggahaṃ katvā’’ti vuttattā ucchiṭṭhahatthena udakaṃ gahetvā pattaṃ paripphositvā dhovanaghaṃsanavasena hatthaṃ dhovituṃ vaṭṭati, ettakena pattaṃ paṭiggahaṃ katvā hattho dhovito nāma na hoti. Ekaṃ udakagaṇḍusaṃ gahetvāti pattaṃ aphusitvā tattha udakameva ucchiṭṭhahatthena ukkhipitvā gaṇḍusaṃ katvā, vāmahattheneva vā pattaṃ ukkhipitvā mukhena gaṇḍusaṃ gahetumpi vaṭṭati. Bahi udakena vikkhāletvāti dvīsu aṅgulīsu āmisamattaṃ vikkhāletvā bahi gahetumpi vaṭṭati. Paṭikhāditukāmoti ettha na sayaṃ khāditukāmopi aññesaṃ khādanārahaṃ ṭhapetuṃ labhati . Tattheva katvāti patteyeva yathāṭhapitaṭṭhānato anuddharitvā. Luñcitvāti tato maṃsameva niravasesaṃ uppaṭṭetvā.
256. கிண்ணசுண்ணேனாதி ஸுராகிண்ணசுண்ணேன. மக்கே²துந்தி ஸூசிங் மக்கே²துங். நிஸ்ஸேணிம்பீதி சதூஹி த³ண்டே³ஹி சீவரப்பமாணேன ஆயதசதுரஸ்ஸங் கத்வா ப³த்³த⁴படலம்பி. எத்த² ஹி சீவரகோடியோ ஸமகங் ப³ந்தி⁴த்வா சீவரங் யதா²ஸுக²ங் ஸிப்³ப³ந்தி. தத்த² அத்த²ரிதப்³ப³ந்தி தஸ்ஸா நிஸ்ஸேணியா உபரி சீவரஸ்ஸ உபத்த²ம்ப⁴னத்தா²ய அத்த²ரிதப்³ப³ங். கதி²னஸங்கா²தாய நிஸ்ஸேணியா சீவரஸ்ஸ ப³ந்த⁴னகரஜ்ஜு கதி²னரஜ்ஜூதி மஜ்ஜி²மபத³லோபீஸமாஸோதி ஆஹ ‘‘யாயா’’திஆதி³. தத்த² யஸ்மா த்³வின்னங் படலானங் ஏகஸ்மிங் அதி⁴கே ஜாதே தத்த² வலியோ ஹொந்தி, தஸ்மா து³பட்டசீவரஸ்ஸ படலத்³வயம்பி ஸமகங் கத்வா ப³ந்த⁴னகரஜ்ஜு கதி²னரஜ்ஜூதி வேதி³தப்³ப³ங்.
256.Kiṇṇacuṇṇenāti surākiṇṇacuṇṇena. Makkhetunti sūciṃ makkhetuṃ. Nisseṇimpīti catūhi daṇḍehi cīvarappamāṇena āyatacaturassaṃ katvā baddhapaṭalampi. Ettha hi cīvarakoṭiyo samakaṃ bandhitvā cīvaraṃ yathāsukhaṃ sibbanti. Tattha attharitabbanti tassā nisseṇiyā upari cīvarassa upatthambhanatthāya attharitabbaṃ. Kathinasaṅkhātāya nisseṇiyā cīvarassa bandhanakarajju kathinarajjūti majjhimapadalopīsamāsoti āha ‘‘yāyā’’tiādi. Tattha yasmā dvinnaṃ paṭalānaṃ ekasmiṃ adhike jāte tattha valiyo honti, tasmā dupaṭṭacīvarassa paṭaladvayampi samakaṃ katvā bandhanakarajju kathinarajjūti veditabbaṃ.
பாளியங் கதி²னஸ்ஸ அந்தோ ஜீரதீதி கதி²னே ப³த்³த⁴ஸ்ஸ சீவரஸ்ஸ பரியந்தோ ஜீரதி. கதி²னநிஸ்ஸிதஞ்ஹி சீவரங் இத⁴ நிஸ்ஸயவோஹாரேன ‘‘கதி²ன’’ந்தி வுத்தங் ‘‘மஞ்சா கோ⁴ஸந்தீ’’திஆதீ³ஸு விய. அனுவாதங் பரிப⁴ண்ட³ந்தி கதி²னே ப³ந்த⁴னரஜ்ஜூஹி சீவரஸ்ஸ ஸமந்தா பரியந்தஸ்ஸ அஜீரணத்த²ங் யேஹி கேஹிசி சோளகேஹி தீ³க⁴தோ அனுவாதங், திரியதோ பரிப⁴ண்ட³ஞ்ச ஸிப்³பி³த்வா காதுங் யத்த² ரஜ்ஜுகே பவேஸெத்வா த³ண்டே³ஸு பலிவேடெ²த்வா சீவரஸமகங் ஆகட்³டி⁴துங் ஸக்கா, தாதி³ஸந்தி அத்தோ². கேசி பன ‘‘கதி²னஸங்கா²தேஸு கிலஞ்ஜாதீ³ஸு ஏவ அஜீரணத்தா²ய அனுவாதபரிப⁴ண்ட³கரணங் அனுஞ்ஞாத’’ந்தி வத³ந்தி. தஸ்ஸ மஜ்ஜே²தி புராணகதி²னஸ்ஸேவ அந்தோ. பி⁴க்கு²னோ பமாணேனாதி பி⁴க்கு²னோ சீவரஸ்ஸ பமாணேன. அஞ்ஞங் நிஸ்ஸேணிந்தி தீ³க⁴தோ ச திரியதோ ச அஞ்ஞங் த³ண்ட³ங் ட²பெத்வா ப³ந்தி⁴துங்.
Pāḷiyaṃ kathinassa anto jīratīti kathine baddhassa cīvarassa pariyanto jīrati. Kathinanissitañhi cīvaraṃ idha nissayavohārena ‘‘kathina’’nti vuttaṃ ‘‘mañcā ghosantī’’tiādīsu viya. Anuvātaṃ paribhaṇḍanti kathine bandhanarajjūhi cīvarassa samantā pariyantassa ajīraṇatthaṃ yehi kehici coḷakehi dīghato anuvātaṃ, tiriyato paribhaṇḍañca sibbitvā kātuṃ yattha rajjuke pavesetvā daṇḍesu paliveṭhetvā cīvarasamakaṃ ākaḍḍhituṃ sakkā, tādisanti attho. Keci pana ‘‘kathinasaṅkhātesu kilañjādīsu eva ajīraṇatthāya anuvātaparibhaṇḍakaraṇaṃ anuññāta’’nti vadanti. Tassa majjheti purāṇakathinasseva anto. Bhikkhuno pamāṇenāti bhikkhuno cīvarassa pamāṇena. Aññaṃ nisseṇinti dīghato ca tiriyato ca aññaṃ daṇḍaṃ ṭhapetvā bandhituṃ.
பி³த³லகந்தி தி³கு³ணகரணஸங்கா²தகிரியாவிஸேஸஸ்ஸ அதி⁴வசனங். தேனாஹ ‘‘து³கு³ணகரண’’ந்தி. பவேஸனஸலாகந்தி வலீனங் அக்³க³ஹணத்தா²ய பவேஸனகவேளுஸலாகாதி³. பாளியங் படிக்³க³ஹந்தி அங்கு³லிகஞ்சுகங்.
Bidalakanti diguṇakaraṇasaṅkhātakiriyāvisesassa adhivacanaṃ. Tenāha ‘‘duguṇakaraṇa’’nti. Pavesanasalākanti valīnaṃ aggahaṇatthāya pavesanakaveḷusalākādi. Pāḷiyaṃ paṭiggahanti aṅgulikañcukaṃ.
257. பாதி நாம ப⁴ண்ட³ட்ட²பனகோ பா⁴ஜனவிஸேஸோ. பாளியங் படிக்³க³ஹத²விகந்தி பாதிஆதி³பா⁴ஜனத்த²விகங். சினிதுந்தி உச்சவத்து²பரியந்தஸ்ஸ அபதனத்தா²ய இட்ட²காதீ³ஹி சினிதுங். ஆலம்ப³னபா³ஹந்தி ஆலம்ப³னரஜ்ஜுத³ண்டா³தி³. பரிபி⁴ஜ்ஜதீதி கடஸாராதி³கங் கதி²னமஜ்ஜே² ப⁴ங்க³ங் ஹோதி. உஸ்ஸாபெத்வாதி த³ண்ட³கதி²னங் ஸந்தா⁴ய வுத்தங்.
257.Pāti nāma bhaṇḍaṭṭhapanako bhājanaviseso. Pāḷiyaṃ paṭiggahathavikanti pātiādibhājanatthavikaṃ. Cinitunti uccavatthupariyantassa apatanatthāya iṭṭhakādīhi cinituṃ. Ālambanabāhanti ālambanarajjudaṇḍādi. Paribhijjatīti kaṭasārādikaṃ kathinamajjhe bhaṅgaṃ hoti. Ussāpetvāti daṇḍakathinaṃ sandhāya vuttaṃ.
258-9. உத³கங் அகப்பியந்தி ஸப்பாணகங். உபனந்தீ⁴தி வேரங் ப³ந்தி⁴. அத்³தா⁴னமக்³கோ³ படிபஜ்ஜிதப்³போ³தி எத்த² அத்³த⁴யோஜனங் அத்³தா⁴னமக்³கோ³ நாம, தங் படிபஜ்ஜிதுகாமஸ்ஸ ஸஞ்சிச்ச விஹாரூபசாராதிக்கமனே ஆபத்தி. அஸஞ்சிச்ச க³தஸ்ஸ பன யத்த² ஸரதி, தத்த² ட²த்வா ஸங்கா⁴டிகண்ணாதி³ங் அனதி⁴ட்ட²ஹித்வா க³மனே பத³வாரேன ஆபத்தீதி வேதி³தப்³ப³ங். ந ஸம்மதீதி ந பஹோதி.
258-9.Udakaṃakappiyanti sappāṇakaṃ. Upanandhīti veraṃ bandhi. Addhānamaggo paṭipajjitabboti ettha addhayojanaṃ addhānamaggo nāma, taṃ paṭipajjitukāmassa sañcicca vihārūpacārātikkamane āpatti. Asañcicca gatassa pana yattha sarati, tattha ṭhatvā saṅghāṭikaṇṇādiṃ anadhiṭṭhahitvā gamane padavārena āpattīti veditabbaṃ. Na sammatīti na pahoti.
260. அபி⁴ஸன்னகாயாதி ஸெம்ஹாதி³தோ³ஸஸன்னிசிதகாயா. தத்த² மஜ்ஜே²தி அக்³க³ளபாஸகஸ்ஸ மஜ்ஜே². உபரீதி அக்³க³ளபாஸகஸ்ஸ உபரிபா⁴கே³. உத³கட்ட²பனட்டா²னந்தி உத³கட்ட²பனத்தா²ய பரிச்சி²ந்தி³த்வா கதட்டா²னங்.
260.Abhisannakāyāti semhādidosasannicitakāyā. Tattha majjheti aggaḷapāsakassa majjhe. Uparīti aggaḷapāsakassa uparibhāge. Udakaṭṭhapanaṭṭhānanti udakaṭṭhapanatthāya paricchinditvā kataṭṭhānaṃ.
261. பாளியங் உத³பானந்தி கூபங். நீசவத்து²கோதி கூபஸ்ஸ ஸமந்தா கூலட்டா²னங், பூ⁴மிஸமங் திட்ட²தீதி அத்தோ². உத³கேன ஒத்த²ரிய்யதீதி ஸமந்தா வஸ்ஸோத³கங் ஆக³ந்த்வா கூபே பததீதி அத்தோ².
261. Pāḷiyaṃ udapānanti kūpaṃ. Nīcavatthukoti kūpassa samantā kūlaṭṭhānaṃ, bhūmisamaṃ tiṭṭhatīti attho. Udakena otthariyyatīti samantā vassodakaṃ āgantvā kūpe patatīti attho.
262. வாஹெந்தீதி உஸ்ஸிஞ்சந்தி. அரஹடக⁴டியந்தங் நாம சக்கஸண்டா²னங் அனேகாரங் அரே அரே க⁴டிகானி ப³ந்தி⁴த்வா ஏகேன, த்³வீஹி வா பரிப்³ப⁴மியமானயந்தங்.
262.Vāhentīti ussiñcanti. Arahaṭaghaṭiyantaṃ nāma cakkasaṇṭhānaṃ anekāraṃ are are ghaṭikāni bandhitvā ekena, dvīhi vā paribbhamiyamānayantaṃ.
263. ஆவித்³த⁴பக்க²பாஸகந்தி கண்ணிகமண்ட³லஸ்ஸ ஸமந்தா ட²பிதபக்க²பாஸகங். மண்ட³லேதி கண்ணிகமண்ட³லே. பக்க²பாஸகே ட²பெத்வாதி ஸமந்தா சதுரஸ்ஸாகாரேன ப²லகாதீ³னி ட²பெத்வா.
263.Āviddhapakkhapāsakanti kaṇṇikamaṇḍalassa samantā ṭhapitapakkhapāsakaṃ. Maṇḍaleti kaṇṇikamaṇḍale. Pakkhapāsake ṭhapetvāti samantā caturassākārena phalakādīni ṭhapetvā.
264. நமதகங் நாம ஸந்த²தஸதி³ஸந்தி கேசி வத³ந்தி. கேசி பன ‘‘ருக்க²தசமய’’ந்தி. சம்மக²ண்ட³பரிஹாரேனாதி அனதி⁴ட்ட²ஹித்வா ஸயனாஸனவிதி⁴னாதி அத்தோ². பேளாயாதி அட்ட²ங்ஸஸோளஸங்ஸாதி³ஆகாரேன கதாய பா⁴ஜனாகாராய பேளாய. யத்த² உண்ஹபாயாஸாதி³ங் பக்கி²பித்வா உபரி போ⁴ஜனபாதிங் ட²பெந்தி ப⁴த்தஸ்ஸ உண்ஹபா⁴வாவிக³மனத்த²ங், தாதி³ஸஸ்ஸ பா⁴ஜனாகாரஸ்ஸ ஆதா⁴ரஸ்ஸேதங் அதி⁴வசனங். தேனேவ பாளியங் ‘‘ஆஸித்தகூபதா⁴ன’’ந்தி வுத்தங். தஸ்ஸ ச பாயாஸாதீ³ஹி ஆஸித்தகாதா⁴ரோதி அத்தோ². இத³ஞ்ச ஆஸித்தகூபதா⁴னங் பச்சந்தேஸு ந ஜானந்தி காதுங், மஜ்ஜி²மதே³ஸேயேவ கரொந்தி. கேசி பன ‘‘கி³ஹிபரிபோ⁴கோ³ அயோமயாதி³ ஸப்³போ³பி ஆதா⁴ரோ ஆஸித்தகூபதா⁴னமேவ அனுலோமேதீ’’தி வத³ந்தி, ஏகே பன ‘‘கப்பியலோஹமயோ ஆதா⁴ரோ மளோரிகமேவ அனுலோமேதீ’’தி. வீமங்ஸித்வா க³ஹேதப்³ப³ங். புப்³பே³ பத்தகு³த்தியா ஆதா⁴ரோ அனுஞ்ஞாதோ. இதா³னி பு⁴ஞ்ஜிதுங் மளோரிகா அனுஞ்ஞாதா. சி²த்³த³ந்தி சி²த்³த³யுத்தங். வித்³த⁴ந்தி அந்தோவினிவித்³த⁴சி²த்³த³ங். ஆவித்³த⁴ந்தி ஸமந்ததோ சி²த்³த³ங்.
264.Namatakaṃ nāma santhatasadisanti keci vadanti. Keci pana ‘‘rukkhatacamaya’’nti. Cammakhaṇḍaparihārenāti anadhiṭṭhahitvā sayanāsanavidhināti attho. Peḷāyāti aṭṭhaṃsasoḷasaṃsādiākārena katāya bhājanākārāya peḷāya. Yattha uṇhapāyāsādiṃ pakkhipitvā upari bhojanapātiṃ ṭhapenti bhattassa uṇhabhāvāvigamanatthaṃ, tādisassa bhājanākārassa ādhārassetaṃ adhivacanaṃ. Teneva pāḷiyaṃ ‘‘āsittakūpadhāna’’nti vuttaṃ. Tassa ca pāyāsādīhi āsittakādhāroti attho. Idañca āsittakūpadhānaṃ paccantesu na jānanti kātuṃ, majjhimadeseyeva karonti. Keci pana ‘‘gihiparibhogo ayomayādi sabbopi ādhāro āsittakūpadhānameva anulometī’’ti vadanti, eke pana ‘‘kappiyalohamayo ādhāro maḷorikameva anulometī’’ti. Vīmaṃsitvā gahetabbaṃ. Pubbe pattaguttiyā ādhāro anuññāto. Idāni bhuñjituṃ maḷorikā anuññātā. Chiddanti chiddayuttaṃ. Viddhanti antovinividdhachiddaṃ. Āviddhanti samantato chiddaṃ.
265. பத்தங் நிக்குஜ்ஜிதுந்தி எத்த² கம்மவாசாய அஸம்போ⁴க³கரணவஸேனேவ நிக்குஜ்ஜனங், ந பத்தானங் அதோ⁴முக²ட்ட²பனேன. தேனாஹ ‘‘அஸம்போ⁴க³ங் ஸங்கே⁴ன கரோதூ’’திஆதி³, தங் வட்³ட⁴ங் கம்மவாசாய ஸங்கே⁴ன ஸத்³தி⁴ங் அஸம்போ⁴க³ங் ஸங்கோ⁴ கரோதூதி அத்தோ².
265.Pattaṃ nikkujjitunti ettha kammavācāya asambhogakaraṇavaseneva nikkujjanaṃ, na pattānaṃ adhomukhaṭṭhapanena. Tenāha ‘‘asambhogaṃ saṅghena karotū’’tiādi, taṃ vaḍḍhaṃ kammavācāya saṅghena saddhiṃ asambhogaṃ saṅgho karotūti attho.
பத்தங் நிக்குஜ்ஜெய்யாதி வட்³ட⁴ஸ்ஸ பத்தனிக்குஜ்ஜனத³ண்ட³கம்மங் கரெய்ய. அஸம்போ⁴க³ங் ஸங்கே⁴ன கரணந்தி ஸங்கே⁴ன வட்³ட⁴ஸ்ஸ அஸம்போ⁴க³கரணங். யதா² அஸம்போ⁴கோ³ ஹோதி, ததா² கரணந்தி அத்தோ². நிக்குஜ்ஜிதோ…பே॰… அஸம்போ⁴க³ங் ஸங்கே⁴னாதி எத்த² ஸங்கே⁴ன அஸம்போ⁴கோ³ ஹோதீதி அத்தோ² த³ட்ட²ப்³போ³. ஏவங் ப⁴க³வதா அஸம்போ⁴க³கரணஸ்ஸ ஆணத்தத்தா, கம்மவாசாய ச ஸாவிதத்தா, அட்ட²கதா²யஞ்ச ‘‘கோசி தெ³ய்யத⁴ம்மோ ந க³ஹேதப்³போ³’’தி வுத்தத்தா பத்தே நிக்குஜ்ஜிதே தஸ்ஸ ஸந்தகங் ஞத்வா க³ண்ஹந்தஸ்ஸ து³க்கடமேவாதி க³ஹேதப்³ப³ங்.
Pattaṃ nikkujjeyyāti vaḍḍhassa pattanikkujjanadaṇḍakammaṃ kareyya. Asambhogaṃ saṅghena karaṇanti saṅghena vaḍḍhassa asambhogakaraṇaṃ. Yathā asambhogo hoti, tathā karaṇanti attho. Nikkujjito…pe… asambhogaṃ saṅghenāti ettha saṅghena asambhogo hotīti attho daṭṭhabbo. Evaṃ bhagavatā asambhogakaraṇassa āṇattattā, kammavācāya ca sāvitattā, aṭṭhakathāyañca ‘‘koci deyyadhammo na gahetabbo’’ti vuttattā patte nikkujjite tassa santakaṃ ñatvā gaṇhantassa dukkaṭamevāti gahetabbaṃ.
அச்சயோதி ஞாயப்படிபத்திங் அதிக்கமித்வா பவத்தி, அபராதோ⁴தி அத்தோ². மங் அச்சக³மாதி மங் அதிக்கம்ம பவத்தோ. தங் தே மயங் படிக்³க³ண்ஹாமாதி தங் தே அபராத⁴ங் மயங் க²மாம. பி⁴க்கூ²னங் அலாபா⁴ய பரிஸக்கதீதிஆதீ³ஸு அலாபா⁴ய பரிஸக்கனாதி³தோ விரதோதி ஏவமத்தோ² க³ஹேதப்³போ³. அஸம்போ⁴க³ங் பி⁴க்கு²ஸங்கே⁴னாதி எத்த² ‘‘கதோ’’தி பாட²ஸேஸோ.
Accayoti ñāyappaṭipattiṃ atikkamitvā pavatti, aparādhoti attho. Maṃ accagamāti maṃ atikkamma pavatto. Taṃ te mayaṃ paṭiggaṇhāmāti taṃ te aparādhaṃ mayaṃ khamāma. Bhikkhūnaṃ alābhāya parisakkatītiādīsu alābhāya parisakkanādito viratoti evamattho gahetabbo. Asambhogaṃ bhikkhusaṅghenāti ettha ‘‘kato’’ti pāṭhaseso.
268. யாவ பச்சி²மா ஸோபானகளேவராதி பட²மஸோபானப²லகங் ஸந்தா⁴ய வுத்தங். தஞ்ஹி பச்சா² து³ஸ்ஸேன ஸந்த²தத்தா ஏவ வுத்தங். ‘‘பச்சி²மங் ஜனதங் ததா²க³தோ அனுகம்பதீ’’தி இத³ங் தே²ரோ அனாக³தே பி⁴க்கூ²னங் சேலபடிகஸ்ஸ அக்கமனபச்சயா அபவாத³ங் ஸிக்கா²பத³பஞ்ஞத்தியா நிவாரணேன ப⁴க³வதோ அனுகம்பங் ஸந்தா⁴யாஹ. அபக³தக³ப்³பா⁴தி விஜாதபுத்தா. தேனாஹ ‘‘மங்க³லத்தா²யா’’தி.
268.Yāva pacchimā sopānakaḷevarāti paṭhamasopānaphalakaṃ sandhāya vuttaṃ. Tañhi pacchā dussena santhatattā eva vuttaṃ. ‘‘Pacchimaṃ janataṃ tathāgato anukampatī’’ti idaṃ thero anāgate bhikkhūnaṃ celapaṭikassa akkamanapaccayā apavādaṃ sikkhāpadapaññattiyā nivāraṇena bhagavato anukampaṃ sandhāyāha. Apagatagabbhāti vijātaputtā. Tenāha ‘‘maṅgalatthāyā’’ti.
269-270. பீ³ஜனிந்தி சதுரஸ்ஸபீ³ஜனிங். ஏகபண்ணச்ச²த்தந்தி தாலபண்ணாதி³னா ஏகேன பத்தேன கதச²த்தங்.
269-270.Bījaninti caturassabījaniṃ. Ekapaṇṇacchattanti tālapaṇṇādinā ekena pattena katachattaṃ.
274-5. அனுரக்க²ணத்த²ந்தி பரிக்³க³ஹெத்வா கோ³பனத்த²ங். தீ³க⁴ங் காரெந்தீதி கேஸேஹி ஸத்³தி⁴ங் அச்சி²ந்தி³த்வா ட²பாபெந்தி. சதுகோணந்தி யதா² உபரி நலாடந்தேஸு த்³வே, ஹெட்டா² ஹனுகபஸ்ஸே த்³வேதி சத்தாரோ கோணா பஞ்ஞாயந்தி, ஏவங் சதுரஸ்ஸங் கத்வா கப்பாபனங். பாளியங் தா³டி²கங் ட²பாபெந்தீதி உத்தரொட்டே² மஸ்ஸுங் அச்சி²ந்தி³த்வா ட²பாபெந்தி. ருதீ⁴தி கு²த்³த³கவணங்.
274-5.Anurakkhaṇatthanti pariggahetvā gopanatthaṃ. Dīghaṃ kārentīti kesehi saddhiṃ acchinditvā ṭhapāpenti. Catukoṇanti yathā upari nalāṭantesu dve, heṭṭhā hanukapasse dveti cattāro koṇā paññāyanti, evaṃ caturassaṃ katvā kappāpanaṃ. Pāḷiyaṃ dāṭhikaṃ ṭhapāpentīti uttaroṭṭhe massuṃ acchinditvā ṭhapāpenti. Rudhīti khuddakavaṇaṃ.
277. பாளியங் லோஹப⁴ண்ட³கங்ஸப⁴ண்ட³ஸன்னிசயோதி லோஹப⁴ண்ட³ஸ்ஸ, கங்ஸப⁴ண்ட³ஸ்ஸ ச ஸன்னிசயோதி அத்தோ². ப³ந்த⁴னமத்தந்தி வாஸித³ண்டா³தீ³னங் கோடீஸு அபாதனத்த²ங் லோஹேஹி ப³ந்த⁴னங். தந்தகந்தி ஆயோக³வாயனத்த²ங் ததா³காரேன பஸாரிததந்தங்.
277. Pāḷiyaṃ lohabhaṇḍakaṃsabhaṇḍasannicayoti lohabhaṇḍassa, kaṃsabhaṇḍassa ca sannicayoti attho. Bandhanamattanti vāsidaṇḍādīnaṃ koṭīsu apātanatthaṃ lohehi bandhanaṃ. Tantakanti āyogavāyanatthaṃ tadākārena pasāritatantaṃ.
278. ‘‘யத்த² ஸரதி, தத்த² ப³ந்தி⁴தப்³ப³’’ந்தி ஏதேன அஸஞ்சிச்ச காயப³ந்த⁴னங் அப³ந்தி⁴த்வா பவிட்ட²ஸ்ஸ அனாபத்தீதி த³ஸ்ஸேதி. முரஜவட்டிஸண்டா²னங் வேடெ²த்வா கதந்தி ஏவங் ப³ஹுரஜ்ஜுகே ஏகதோ கத்வா நானாவண்ணேஹி ஸுத்தேஹி கதந்தி கேசி வத³ந்தி. ஏகவண்ணஸுத்தேனாபி வலயக⁴டகாதி³விகாரங் த³ஸ்ஸெத்வா வேடி²தம்பி முரஜமேவ. விகாரங் பன அத³ஸ்ஸெத்வா மட்ட²ங் கத்வா நிரந்தரங் வேடி²தங் வட்டதி. தேனேவ து³தியபாராஜிகஸங்வண்ணனாயங் வுத்தங் ‘‘ப³ஹுரஜ்ஜுகே ஏகதோ கத்வா ஏகேன நிரந்தரங் வேடெ²த்வா கதங் ‘ப³ஹுரஜ்ஜுக’ந்தி ந வத்தப்³ப³ங், வட்டதீ’’தி. முத்³தி³ககாயப³ந்த⁴னங் நாம சதுரஸ்ஸங் அகத்வா ஸஜ்ஜிதங். பாமங்க³த³ஸா சதுரஸ்ஸா. முதி³ங்க³ஸண்டா²னேனாதி வரகஸீஸாகாரேன. பாஸந்தோதி த³ஸாபரியோஸானங்.
278.‘‘Yattha sarati, tattha bandhitabba’’nti etena asañcicca kāyabandhanaṃ abandhitvā paviṭṭhassa anāpattīti dasseti. Murajavaṭṭisaṇṭhānaṃ veṭhetvā katanti evaṃ bahurajjuke ekato katvā nānāvaṇṇehi suttehi katanti keci vadanti. Ekavaṇṇasuttenāpi valayaghaṭakādivikāraṃ dassetvā veṭhitampi murajameva. Vikāraṃ pana adassetvā maṭṭhaṃ katvā nirantaraṃ veṭhitaṃ vaṭṭati. Teneva dutiyapārājikasaṃvaṇṇanāyaṃ vuttaṃ ‘‘bahurajjuke ekato katvā ekena nirantaraṃ veṭhetvā kataṃ ‘bahurajjuka’nti na vattabbaṃ, vaṭṭatī’’ti. Muddikakāyabandhanaṃ nāma caturassaṃ akatvā sajjitaṃ. Pāmaṅgadasā caturassā. Mudiṅgasaṇṭhānenāti varakasīsākārena. Pāsantoti dasāpariyosānaṃ.
279. பாளியங் க³ண்டி²கப²லகங் பாஸகப²லகந்தி எத்த² தா³ருத³ந்தாதி³மயேஸு ப²லகேஸு க³ண்டி²கபாஸகானி அப்பெத்வா சீவரே ட²பேதுங் அனுஞ்ஞாதங். கொட்டோ விவரியதீதி அனுவாதோ விவரியதி.
279. Pāḷiyaṃ gaṇṭhikaphalakaṃ pāsakaphalakanti ettha dārudantādimayesu phalakesu gaṇṭhikapāsakāni appetvā cīvare ṭhapetuṃ anuññātaṃ. Koṭṭo vivariyatīti anuvāto vivariyati.
280-1. பாளிகாரகோதி பி⁴க்கூ²னங் யதா²வுட்³ட⁴ங் பாளியா பதிட்டா²பகோ. தஸ்ஸாபி ததா² பாருபிதுங் ந வட்டதி. பாளியங் முண்ட³வட்டீதி மல்லாத³யோ.
280-1.Pāḷikārakoti bhikkhūnaṃ yathāvuḍḍhaṃ pāḷiyā patiṭṭhāpako. Tassāpi tathā pārupituṃ na vaṭṭati. Pāḷiyaṃ muṇḍavaṭṭīti mallādayo.
282. பமாணங்கு³லேனாதி வட்³ட⁴கீஅங்கு³லேன. கேசி பன ‘‘பகதிஅங்கு³லேனா’’தி வத³ந்தி, தங் சதுரங்கு³லபச்சி²மகவசனேன ந ஸமேதி. ந ஹி பகதங்கு³லேன சதுரங்கு³லப்பமாணங் த³ந்தகட்ட²ங் கண்டே² அவிலக்³க³ங் கா²தி³துங் ஸகாதி.
282.Pamāṇaṅgulenāti vaḍḍhakīaṅgulena. Keci pana ‘‘pakatiaṅgulenā’’ti vadanti, taṃ caturaṅgulapacchimakavacanena na sameti. Na hi pakataṅgulena caturaṅgulappamāṇaṃ dantakaṭṭhaṃ kaṇṭhe avilaggaṃ khādituṃ sakāti.
285. பாளியங் ஸகாய நிருத்தியா பு³த்³த⁴வசனங் தூ³ஸெந்தீதி மாக³த⁴பா⁴ஸாய ஸப்³பே³ஸங் வத்துங் ஸுகரதாய ஹீனஜச்சாபி உக்³க³ண்ஹந்தா தூ³ஸெந்தீதி அத்தோ².
285. Pāḷiyaṃ sakāya niruttiyā buddhavacanaṃ dūsentīti māgadhabhāsāya sabbesaṃ vattuṃ sukaratāya hīnajaccāpi uggaṇhantā dūsentīti attho.
289. மா பி⁴க்கூ² ப்³யாபா³த⁴யிங்ஸூதி லஸுணக³ந்தே⁴ன பி⁴க்கூ² மா பா³த⁴யிங்ஸு.
289.Mā bhikkhū byābādhayiṃsūti lasuṇagandhena bhikkhū mā bādhayiṃsu.
291. அவலேக²னபீட²ரோதி அவலேக²னகட்டா²னங் ட²பனபா⁴ஜனவிஸேஸோ. அபிதா⁴னந்தி பிதா⁴னப²லகாதி³.
291.Avalekhanapīṭharoti avalekhanakaṭṭhānaṃ ṭhapanabhājanaviseso. Apidhānanti pidhānaphalakādi.
கு²த்³த³கவத்து²கதா²வண்ணனா நிட்டி²தா.
Khuddakavatthukathāvaṇṇanā niṭṭhitā.
கு²த்³த³கவத்து²க்க²ந்த⁴கவண்ணனானயோ நிட்டி²தோ.
Khuddakavatthukkhandhakavaṇṇanānayo niṭṭhito.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi / கு²த்³த³கவத்தூ²னி • Khuddakavatthūni
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / கு²த்³த³கவத்து²கதா² • Khuddakavatthukathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / கு²த்³த³கவத்து²கதா²வண்ணனா • Khuddakavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / கு²த்³த³கவத்து²கதா²வண்ணனா • Khuddakavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / கு²த்³த³கவத்து²கதா² • Khuddakavatthukathā
