| Library / Tipiṭaka / তিপিটক • Tipiṭaka / ৰজিরবুদ্ধি-টীকা • Vajirabuddhi-ṭīkā |
৫. খুদ্দকৰত্থুক্খন্ধকৰণ্ণনা
5. Khuddakavatthukkhandhakavaṇṇanā
খুদ্দকৰত্থুকথাৰণ্ণনা
Khuddakavatthukathāvaṇṇanā
২৪৪. পুথুপাণিনা কত্তব্বং কম্মং পুথুপাণিকং।
244. Puthupāṇinā kattabbaṃ kammaṃ puthupāṇikaṃ.
২৪৫. ‘‘কণ্ণতো নিক্খন্তমুত্তোলম্বকাদীনং কুণ্ডলাদীন’’ন্তি লিখিতং। ‘‘কাযূর’’ন্তি পাল়িপাঠো। ‘‘কেযূরাদীনী’’তি আচরিযেনুদ্ধটং।
245. ‘‘Kaṇṇato nikkhantamuttolambakādīnaṃ kuṇḍalādīna’’nti likhitaṃ. ‘‘Kāyūra’’nti pāḷipāṭho. ‘‘Keyūrādīnī’’ti ācariyenuddhaṭaṃ.
২৪৮. ‘‘সাধুগীতং নাম পরিনিব্বুতট্ঠানে গীত’’ন্তি লিখিতং। দন্তগীতং গাযিতুকামানং ৰাক্ককরণীযং। দন্তগীতস্স ৰিভাৰনত্থং ‘‘যং গাযিস্সামা’’তিআদিমাহ।
248.‘‘Sādhugītaṃ nāma parinibbutaṭṭhāne gīta’’nti likhitaṃ. Dantagītaṃ gāyitukāmānaṃ vākkakaraṇīyaṃ. Dantagītassa vibhāvanatthaṃ ‘‘yaṃ gāyissāmā’’tiādimāha.
২৪৯. চতুরস্সৰত্তং নাম চতুপ্পাদগাথাৰত্তং। ‘‘তরঙ্গৰত্তাদীনি উচ্চারণৰিধানানি নট্ঠপযোগানী’’তি লিখিতং। বাহিরলোমিন্তি ভাৰনপুংসকং, যথা তস্স উণ্ণপাৰারস্স বহিদ্ধা লোমানি দিস্সন্তি, তথা ধারেন্তস্স দুক্কটন্তি ৰুত্তং হোতি।
249.Caturassavattaṃ nāma catuppādagāthāvattaṃ. ‘‘Taraṅgavattādīni uccāraṇavidhānāni naṭṭhapayogānī’’ti likhitaṃ. Bāhiralominti bhāvanapuṃsakaṃ, yathā tassa uṇṇapāvārassa bahiddhā lomāni dissanti, tathā dhārentassa dukkaṭanti vuttaṃ hoti.
২৫১. ৰিরূপক্খেহীতিআদি সহযোগকরণৰচনং। সরবূতি গেহগোল়িকা। সা কির সেতা সৰিসা হোতি। সোহন্তি যস্স মে এতেহি মেত্তং, সোহং নমো করোমি ভগৰতোতি সম্বন্ধো। অঞ্ঞম্হি…পে॰… ছেতব্বম্হীতি রাগানুসযে।
251.Virūpakkhehītiādi sahayogakaraṇavacanaṃ. Sarabūti gehagoḷikā. Sā kira setā savisā hoti. Sohanti yassa me etehi mettaṃ, sohaṃ namo karomi bhagavatoti sambandho. Aññamhi…pe… chetabbamhīti rāgānusaye.
২৫২. উট্টিত্ৰাতি পক্খিপিত্ৰা। ওতরতূতি ইদ্ধিযা ওতারেত্ৰা গণ্হাতু। অনুপরিযাযীতি অনুপরিব্ভমি।
252.Uṭṭitvāti pakkhipitvā. Otaratūti iddhiyā otāretvā gaṇhātu. Anupariyāyīti anuparibbhami.
২৫৩. ন অচ্ছুপিযন্তীতি ন লগ্গন্তি। রূপকাকিণ্ণানীতি ইত্থিরূপাদীহি ৰোকিণ্ণানি।
253.Na acchupiyantīti na lagganti. Rūpakākiṇṇānīti itthirūpādīhi vokiṇṇāni.
২৫৪. আলিন্দকমিড্ঢিকাদীনন্তি পমুখমিড্ঢিকাদীনং। পরিৰত্তেত্ৰা তত্থেৰাতি এত্থ ‘‘পরিৰত্তেত্ৰা ততিযৰারে তত্থেৰ মিড্ঢিযা পতিট্ঠাতী’’তি লিখিতং। পরিভণ্ডং নাম গেহস্স বহি কুট্টপাদস্স থিরভাৰত্থং কতা তনুকমিড্ঢিকা ৰুচ্চতি। এত্থ ‘‘পরিৰট্টিত্ৰা পত্তো ভিজ্জতীতি অধিকরণভেদাসঙ্কায অভাৰে ঠানে ঠপেতুং ৰট্টতী’’তি লিখিতং। পত্তমাল়কো ৰট্টিত্ৰা পত্তানং অপতনত্থং ৰট্টং ৰা চতুরস্সং ৰা ইট্ঠকাদীহি পরিক্খিপিত্ৰা মাল়কচ্ছন্নেন কতো। ‘‘পত্তমণ্ডলিকা পত্তপচ্ছিকা তালপত্তাদীহি কতা’’তি চ লিখিতং। মিড্ঢন্তে আধারকে ঠপেতুং ৰট্টতি পত্তসন্ধারণত্থং ৰুত্তত্তা। মঞ্চে আধারকেপি ন ৰট্টতি নিসীদনপচ্চযা ৰারিতত্তা। আসন্নভূমিকত্তা ওলম্বেতুং ৰট্টতি।
254.Ālindakamiḍḍhikādīnanti pamukhamiḍḍhikādīnaṃ. Parivattetvā tatthevāti ettha ‘‘parivattetvā tatiyavāre tattheva miḍḍhiyā patiṭṭhātī’’ti likhitaṃ. Paribhaṇḍaṃ nāma gehassa bahi kuṭṭapādassa thirabhāvatthaṃ katā tanukamiḍḍhikā vuccati. Ettha ‘‘parivaṭṭitvā patto bhijjatīti adhikaraṇabhedāsaṅkāya abhāve ṭhāne ṭhapetuṃ vaṭṭatī’’ti likhitaṃ. Pattamāḷako vaṭṭitvā pattānaṃ apatanatthaṃ vaṭṭaṃ vā caturassaṃ vā iṭṭhakādīhi parikkhipitvā māḷakacchannena kato. ‘‘Pattamaṇḍalikā pattapacchikā tālapattādīhi katā’’ti ca likhitaṃ. Miḍḍhante ādhārake ṭhapetuṃ vaṭṭati pattasandhāraṇatthaṃ vuttattā. Mañce ādhārakepi na vaṭṭati nisīdanapaccayā vāritattā. Āsannabhūmikattā olambetuṃ vaṭṭati.
২৫৫. ‘‘অংসকূটে লগ্গেত্ৰাতি ৰচনতো অগ্গহত্থে লগ্গেত্ৰা অঙ্কে ঠপেতুং ন ৰট্টতী’’তি কেচি ৰদন্তি, ন সুন্দরং, ‘‘ন কেৰলং যস্স পত্তো’’তিআদি যদি হত্থেন গহিতপত্তে ভেদসঞ্ঞা, পগেৰ অঞ্ঞেন সরীরাৰযৰেনাতি কত্ৰা ৰুত্তং। পাল়িযং পন পচুরৰোহারৰসেন ৰুত্তং। ঘটিকপালমযং ঘটিকটাহং। ছৰসীসস্স পত্তন্তি ‘‘সিলাপুত্তকস্স সরীরং, খীরস্স ধারাতিআদিৰোহারৰসেন ৰুত্তং। মঞ্চে নিসীদিতুং আগতোতি অত্থো। ‘‘পিসাচিল্লিকাতি পিসাচদারকা’’তিপি ৰদন্তি। দিন্নকমেৰ পটিগ্গহিতমেৰ। চব্বেত্ৰাতি খাদিত্ৰা। অট্ঠিকানি চ কণ্টকানি চ অট্ঠিককণ্টকানি। ‘‘এতেসু সব্বেসু পণ্ণত্তিং জানাতু ৰা, মা ৰা, আপত্তিযেৰা’’তি লিখিতং।
255. ‘‘Aṃsakūṭe laggetvāti vacanato aggahatthe laggetvā aṅke ṭhapetuṃ na vaṭṭatī’’ti keci vadanti, na sundaraṃ, ‘‘na kevalaṃ yassa patto’’tiādi yadi hatthena gahitapatte bhedasaññā, pageva aññena sarīrāvayavenāti katvā vuttaṃ. Pāḷiyaṃ pana pacuravohāravasena vuttaṃ. Ghaṭikapālamayaṃ ghaṭikaṭāhaṃ. Chavasīsassa pattanti ‘‘silāputtakassa sarīraṃ, khīrassa dhārātiādivohāravasena vuttaṃ. Mañce nisīdituṃ āgatoti attho. ‘‘Pisācillikāti pisācadārakā’’tipi vadanti. Dinnakameva paṭiggahitameva. Cabbetvāti khāditvā. Aṭṭhikāni ca kaṇṭakāni ca aṭṭhikakaṇṭakāni. ‘‘Etesu sabbesu paṇṇattiṃ jānātu vā, mā vā, āpattiyevā’’ti likhitaṃ.
২৫৬. ৰিপ্ফাল়েত্ৰাতি ফাল়েত্ৰা। কিণ্ণেন পূরেতুন্তি সুরাকিণ্ণেন পূরেতুং। বিদলকং নাম দিগুণকরণসঙ্খাতস্স কিরিযাৰিসেসস্স অধিৰচনং। কস্স দিগুণকরণং? যেন কিলঞ্জাদিনা মহন্তং কথিনমত্থতং, তস্স। তঞ্হি দণ্ডকথিনপ্পমাণেন পরিযন্তে সংহরিত্ৰা দিগুণং কাতব্বং। অঞ্ঞথা খুদ্দকচীৰরস্স অনুৰাতপরিভণ্ডাদিৰিধানকরণে হত্থস্স ওকাসো ন হোতি। সলাকায সতি দ্ৰিন্নং চীৰরানং অঞ্ঞতরং ঞত্ৰা সিব্বিতাসিব্বিতং সুখং পঞ্ঞাযতি। দণ্ডকথিনে কতে ন বহূহি সহাযেহি পযোজনং। ‘‘অসংকুটিত্ৰা চীৰরং সমং হোতি। কোণাপি সমা হোন্তী’’তি লিখিতং, ‘‘হলিদ্দিসুত্তেন সঞ্ঞাকরণ’’ন্তি ৰুত্তত্তা হলিদ্দিসুত্তেন চীৰরং সিব্বেতুম্পি ৰট্টতীতি সিদ্ধং। তত্থ হি কেচি অকপ্পিযসঞ্ঞিনো। পটিগ্গহো নাম অঙ্গুলিকোসো।
256.Vipphāḷetvāti phāḷetvā. Kiṇṇena pūretunti surākiṇṇena pūretuṃ. Bidalakaṃ nāma diguṇakaraṇasaṅkhātassa kiriyāvisesassa adhivacanaṃ. Kassa diguṇakaraṇaṃ? Yena kilañjādinā mahantaṃ kathinamatthataṃ, tassa. Tañhi daṇḍakathinappamāṇena pariyante saṃharitvā diguṇaṃ kātabbaṃ. Aññathā khuddakacīvarassa anuvātaparibhaṇḍādividhānakaraṇe hatthassa okāso na hoti. Salākāya sati dvinnaṃ cīvarānaṃ aññataraṃ ñatvā sibbitāsibbitaṃ sukhaṃ paññāyati. Daṇḍakathine kate na bahūhi sahāyehi payojanaṃ. ‘‘Asaṃkuṭitvā cīvaraṃ samaṃ hoti. Koṇāpi samā hontī’’ti likhitaṃ, ‘‘haliddisuttena saññākaraṇa’’nti vuttattā haliddisuttena cīvaraṃ sibbetumpi vaṭṭatīti siddhaṃ. Tattha hi keci akappiyasaññino. Paṭiggaho nāma aṅgulikoso.
২৫৭-৮. পাতীতি পটিগ্গহসণ্ঠানং। পটিগ্গহত্থৰিকন্তি অঙ্গুলিকোসত্থৰিকং। সূচিসত্থকানং পুব্বে আৰেসনত্থৰিকায অনুঞ্ঞাতত্তা ‘‘অনুজানামি, ভিক্খৰে, ভেসজ্জত্থৰিক’’ন্তি ৰুত্তং। এত্থ সূচিসত্থকাদীনিপি ঠপেতব্বানীতি নিদানং সূচেতি। সচেপি উপনন্দো ভিক্খু অলজ্জী, তথাপি সন্তকমেতং অমূলচ্ছেদকতভিক্খুনো লজ্জিনোপি সমানস্স কপ্পতীতি যুজ্জতি। ন সম্মতীতি ন পহোতি।
257-8.Pātīti paṭiggahasaṇṭhānaṃ. Paṭiggahatthavikanti aṅgulikosatthavikaṃ. Sūcisatthakānaṃ pubbe āvesanatthavikāya anuññātattā ‘‘anujānāmi, bhikkhave, bhesajjatthavika’’nti vuttaṃ. Ettha sūcisatthakādīnipi ṭhapetabbānīti nidānaṃ sūceti. Sacepi upanando bhikkhu alajjī, tathāpi santakametaṃ amūlacchedakatabhikkhuno lajjinopi samānassa kappatīti yujjati. Na sammatīti na pahoti.
২৬০-১. বহি কুট্টস্স সমন্ততো নীচৰত্থুকং কত্ৰা ঠিতং ‘‘মণ্ডলিক’’ন্তি ৰুচ্চতি। জন্তাঘরপ্পটিচ্ছাদিনা ছন্নস্স নগ্গিযং যস্স ন পঞ্ঞাযতি, তস্সেৰ পরিকম্মং কাতব্বং। এস নযো উদকৰত্থপটিচ্ছাদীসুপি।
260-1. Bahi kuṭṭassa samantato nīcavatthukaṃ katvā ṭhitaṃ ‘‘maṇḍalika’’nti vuccati. Jantāgharappaṭicchādinā channassa naggiyaṃ yassa na paññāyati, tasseva parikammaṃ kātabbaṃ. Esa nayo udakavatthapaṭicchādīsupi.
২৬২-৩. পণিযা নাম পণিযকারকা। আকড্ঢনযন্তং আকড্ঢিযমানং কূপস্স উপরিভাগে পরিব্ভমতি। অরহটঘটিযন্তং সকটচক্কসণ্ঠানযন্তং। তস্স অরে অরে ঘটিকানি বন্ধিত্ৰা একেন, দ্ৰীহি ৰা পরিব্ভমিযমানস্স উদকনিব্বাহনং ৰেদিতব্বং। আৰিদ্ধপক্খপাসং নাম যত্থ মণ্ডলাকারেন পক্খপাসা বজ্ঝন্তি আৰিদ্ধৰত্থতা ৰিয আৰিদ্ধপক্খপাসকা। পুব্বে পত্তসঙ্গোপনত্থং, ইদানি ঠপেতব্বং ভুঞ্জিতুং আধারকো অনুঞ্ঞাতো।
262-3.Paṇiyā nāma paṇiyakārakā. Ākaḍḍhanayantaṃ ākaḍḍhiyamānaṃ kūpassa uparibhāge paribbhamati. Arahaṭaghaṭiyantaṃ sakaṭacakkasaṇṭhānayantaṃ. Tassa are are ghaṭikāni bandhitvā ekena, dvīhi vā paribbhamiyamānassa udakanibbāhanaṃ veditabbaṃ. Āviddhapakkhapāsaṃ nāma yattha maṇḍalākārena pakkhapāsā bajjhanti āviddhavatthatā viya āviddhapakkhapāsakā. Pubbe pattasaṅgopanatthaṃ, idāni ṭhapetabbaṃ bhuñjituṃ ādhārako anuññāto.
২৭৩. পরগলং গচ্ছতীতি ইমস্স পযোগাভাৰা ৰট্টতি। কম্মসতেনাতি মহতা উস্সাহেন।
273.Paragalaṃgacchatīti imassa payogābhāvā vaṭṭati. Kammasatenāti mahatā ussāhena.
২৭৭-৮. লোহভণ্ডং নাম কংসতো সেসলোহভণ্ডং। মুদ্দিককাযবন্ধনং নাম চতুরস্সং অকত্ৰা সজ্জিতং। পামঙ্গদসা চতুরস্সা। মুদিঙ্গসণ্ঠানেনাতি সঙ্ঘাটিযা মুদিঙ্গসিব্বনাকারেন ৰরকসীসাকারেন। পৰনন্তোতি পাসন্তো। ‘‘দসামূল’’ন্তি চ লিখিতং। অকাযবন্ধনেন সঞ্চিচ্চ ৰা অসঞ্চিচ্চ ৰা গামপ্পৰেসনে আপত্তি। ‘‘সরিতট্ঠানতো বন্ধিত্ৰা পৰিসিতব্বং, নিৰত্তিতব্বং ৰা’’তি লিখিতং।
277-8.Lohabhaṇḍaṃ nāma kaṃsato sesalohabhaṇḍaṃ. Muddikakāyabandhanaṃ nāma caturassaṃ akatvā sajjitaṃ. Pāmaṅgadasā caturassā. Mudiṅgasaṇṭhānenāti saṅghāṭiyā mudiṅgasibbanākārena varakasīsākārena. Pavanantoti pāsanto. ‘‘Dasāmūla’’nti ca likhitaṃ. Akāyabandhanena sañcicca vā asañcicca vā gāmappavesane āpatti. ‘‘Saritaṭṭhānato bandhitvā pavisitabbaṃ, nivattitabbaṃ vā’’ti likhitaṃ.
২৭৯. সত্তঙ্গুলং ৰা অট্ঠঙ্গুলং ৰাতি এত্থ ‘‘সুগতঙ্গুলেনা’’তি অৰুত্তত্তা পকতিঅঙ্গুলেন সারুপ্পত্থায ৰড্ঢেত্ৰাপি করোন্তি চে, ন দোসো।
279. Sattaṅgulaṃ vā aṭṭhaṅgulaṃ vāti ettha ‘‘sugataṅgulenā’’ti avuttattā pakatiaṅgulena sāruppatthāya vaḍḍhetvāpi karonti ce, na doso.
২৮০. তালৰণ্টাকারেন সীহল়িত্থীনং ৰিয।
280. Tālavaṇṭākārena sīhaḷitthīnaṃ viya.
খুদ্দকৰত্থুক্খন্ধকৰণ্ণনা নিট্ঠিতা।
Khuddakavatthukkhandhakavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi / খুদ্দকৰত্থূনি • Khuddakavatthūni
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā / খুদ্দকৰত্থুকথা • Khuddakavatthukathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / খুদ্দকৰত্থুকথাৰণ্ণনা • Khuddakavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / খুদ্দকৰত্থুকথাৰণ্ণনা • Khuddakavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / খুদ্দকৰত্থুকথা • Khuddakavatthukathā
