| Library / Tipiṭaka / д̇ибидага • Tipiṭaka / саарад̇т̇ад̣̇ийбаний-дийгаа • Sāratthadīpanī-ṭīkā |
5. куд̣̇д̣̇агавад̇т̇угканд̇хагам̣
5. Khuddakavatthukkhandhakaṃ
куд̣̇д̣̇агавад̇т̇угат̇ааван̣н̣анаа
Khuddakavatthukathāvaṇṇanā
243. куд̣̇д̣̇агавад̇т̇угканд̇хагз адтабад̣̇аагаарзнаад̇и адтабад̣̇апалагаагаарзна, ж̇ууд̇апалагасад̣̇исанд̇и вуд̇д̇ам̣ ход̇и. маллагамууласан̣таанзнаад̇и кзл̣амаллагамууласан̣таанзна.
243. Khuddakavatthukkhandhake aṭṭhapadākārenāti aṭṭhapadaphalakākārena, jūtaphalakasadisanti vuttaṃ hoti. Mallakamūlasaṇṭhānenāti kheḷamallakamūlasaṇṭhānena.
245. муд̇д̇оламб̣агаад̣̇ийнанд̇и аад̣̇и-сад̣̇д̣̇зна гун̣д̣алаад̣̇им̣ сан̇г̇ан̣хаад̇и. баламб̣агасуд̇д̇анд̇и яан̃н̃обажид̇аагаарзна оламб̣агасуд̇д̇ам̣.
245.Muttolambakādīnanti ādi-saddena kuṇḍalādiṃ saṅgaṇhāti. Palambakasuttanti yaññopacitākārena olambakasuttaṃ.
246. жиггалзнаад̇и силзсзна.
246.Cikkalenāti silesena.
248. саад̇хуг̇ийд̇анд̇и анижжад̇аад̣̇ибадисам̣яуд̇д̇аг̇ийд̇ам̣.
248.Sādhugītanti aniccatādipaṭisaṃyuttagītaṃ.
249. жад̇урассзна вад̇д̇знаад̇и барибун̣н̣зна ужжааран̣авад̇д̇зна. д̇аран̇г̇авад̇д̇аад̣̇ийнам̣ ужжааран̣авид̇хаанаани надтаббаяог̇аани. б̣аахираломинд̇и бхааванабум̣саганид̣̇д̣̇зсо, яат̇аа д̇асса ун̣н̣абааваарасса б̣ахид̣̇д̇хаа ломаани д̣̇иссанд̇и, д̇ат̇аа д̇хаарзнд̇асса д̣̇уггаданд̇и вуд̇д̇ам̣ ход̇и.
249.Caturassena vattenāti paripuṇṇena uccāraṇavattena. Taraṅgavattādīnaṃ uccāraṇavidhānāni naṭṭhappayogāni. Bāhiralominti bhāvanapuṃsakaniddeso, yathā tassa uṇṇapāvārassa bahiddhā lomāni dissanti, tathā dhārentassa dukkaṭanti vuttaṃ hoti.
251. имаани жад̇д̇аари ахирааж̇агулаанийд̇и (а. ни. адта. 2.4.67) ид̣̇ам̣ д̣̇адтависз санд̇хааяа вуд̇д̇ам̣. яз хи гзжи д̣̇адтависаа, саб̣б̣з д̇з имзсам̣ жад̇уннам̣ ахирааж̇агулаанам̣ аб̣бханд̇араг̇ад̇аава хонд̇и. ад̇д̇аг̇уд̇д̇ияаад̇и ад̇д̇ано г̇уд̇д̇ад̇т̇ааяа. ад̇д̇арагкааяаад̇и ад̇д̇ано рагкан̣ад̇т̇ааяа. ад̇д̇абарид̇д̇ам̣гаад̇унд̇и ад̇д̇ано барид̇д̇аан̣ад̇т̇ааяа ад̇д̇абарид̇д̇ам̣ наама гаад̇ум̣ ануж̇аанаамийд̇и ад̇т̇о.
251.Imāni cattāri ahirājakulānīti (a. ni. aṭṭha. 2.4.67) idaṃ daṭṭhavise sandhāya vuttaṃ. Ye hi keci daṭṭhavisā, sabbe te imesaṃ catunnaṃ ahirājakulānaṃ abbhantaragatāva honti. Attaguttiyāti attano guttatthāya. Attarakkhāyāti attano rakkhaṇatthāya. Attaparittaṃkātunti attano parittāṇatthāya attaparittaṃ nāma kātuṃ anujānāmīti attho.
ид̣̇аани яат̇аа д̇ам̣ барид̇д̇ам̣ гаад̇аб̣б̣ам̣, д̇ам̣ д̣̇ассзд̇ум̣ ‘‘зван̃жа бана бхигкавз’’д̇иаад̣̇имааха. д̇ад̇т̇а (ж̇аа. адта. 2.2.105) вируубагкзхийд̇и вируубагканааг̇агулзхи. сзсзсуби зсзва наяо. сахаяог̇з жзд̇ам̣ гаран̣аважанам̣, зд̇зхи саха маяхам̣ мид̇д̇абхаавод̇и вуд̇д̇ам̣ ход̇и абаад̣̇агзхийд̇и абаад̣̇агасад̇д̇зхи. сзсзсуби зсзва наяо. саб̣б̣з сад̇д̇аад̇и ид̇о буб̣б̣з зд̇д̇агзна таанзна од̣̇иссагамзд̇д̇ам̣ гат̇зд̇ваа ид̣̇аани анод̣̇иссагамзд̇д̇ам̣ гат̇зд̇ум̣ ид̣̇амаарад̣̇д̇хам̣. д̇ад̇т̇а сад̇д̇аа баан̣аа бхууд̇аад̇и саб̣б̣аанзд̇аани буг̇г̇алавзважанаанзва. бхад̣̇раани бассанд̇ууд̇и бхад̣̇раани аарамман̣аани бассанд̇у. маа ган̃жи баабамааг̇амаад̇и ган̃жи сад̇д̇ам̣ баабагам̣ лаамагам̣ маа ааг̇ажчад̇у.
Idāni yathā taṃ parittaṃ kātabbaṃ, taṃ dassetuṃ ‘‘evañca pana bhikkhave’’tiādimāha. Tattha (jā. aṭṭha. 2.2.105) virūpakkhehīti virūpakkhanāgakulehi. Sesesupi eseva nayo. Sahayoge cetaṃ karaṇavacanaṃ, etehi saha mayhaṃ mittabhāvoti vuttaṃ hoti apādakehīti apādakasattehi. Sesesupi eseva nayo. Sabbe sattāti ito pubbe ettakena ṭhānena odissakamettaṃ kathetvā idāni anodissakamettaṃ kathetuṃ idamāraddhaṃ. Tattha sattā pāṇā bhūtāti sabbānetāni puggalavevacanāneva. Bhadrāni passantūti bhadrāni ārammaṇāni passantu. Mā kañci pāpamāgamāti kañci sattaṃ pāpakaṃ lāmakaṃ mā āgacchatu.
аббамаан̣о б̣уд̣̇д̇ход̇и зд̇т̇а б̣уд̣̇д̇ход̇и б̣уд̣̇д̇хаг̇ун̣аа взд̣̇ид̇аб̣б̣аа, д̇з хи аббамаан̣аа наама. сзсад̣̇ваязсуби зсзва наяо, бамаан̣аванд̇аанийд̇и г̇ун̣аббамаан̣зна яуд̇д̇аани. ун̣н̣анаабхийд̇и ломасанаабхиго маггадаго. сараб̣ууд̇и гхараг̇ол̣игаа. гад̇аа мз рагкаа гад̇ам̣ мз барид̇д̇анд̇и маяаа зд̇д̇агасса ж̇анасса рагкаа жа барид̇д̇аан̣ан̃жа гад̇ам̣. бадиггаманд̇у бхууд̇аанийд̇и саб̣б̣зби мз гад̇абарид̇д̇аан̣аа сад̇д̇аа абаг̇ажчанд̇у, маа мам̣ вихзтаяим̣сууд̇и ад̇т̇о. соханд̇и яасса мама зд̇зхи саб̣б̣зхиби мзд̇д̇ам̣, со ахам̣ бхаг̇авад̇о намо гароми, вибассийаад̣̇ийнан̃жа сад̇д̇аннам̣ саммаасамб̣уд̣̇д̇хаанам̣ намо гаромийд̇и самб̣анд̇хо.
Appamāṇo buddhoti ettha buddhoti buddhaguṇā veditabbā, te hi appamāṇā nāma. Sesadvayesupi eseva nayo, pamāṇavantānīti guṇappamāṇena yuttāni. Uṇṇanābhīti lomasanābhiko makkaṭako. Sarabūti gharagoḷikā. Katā me rakkhā kataṃ me parittanti mayā ettakassa janassa rakkhā ca parittāṇañca kataṃ. Paṭikkamantu bhūtānīti sabbepi me kataparittāṇā sattā apagacchantu, mā maṃ viheṭhayiṃsūti attho. Sohanti yassa mama etehi sabbehipi mettaṃ, so ahaṃ bhagavato namo karomi, vipassīādīnañca sattannaṃ sammāsambuddhānaṃ namo karomīti sambandho.
ан̃н̃амхи чзд̇аб̣б̣амхийд̇и рааг̇аанусаяам̣ санд̇хааяа вад̣̇ад̇и. д̇аад̣̇исам̣ ваа д̣̇угканд̇и мудтиаад̣̇ийхи д̣̇угкам̣ уббаад̣̇знд̇асса.
Aññamhi chetabbamhīti rāgānusayaṃ sandhāya vadati. Tādisaṃ vā dukkhanti muṭṭhiādīhi dukkhaṃ uppādentassa.
252. ж̇аалаани баригкибаабзд̇ваад̇и бариссаяаможанад̇т̇ан̃жзва бамаад̣̇зна г̇ал̣ид̇аанам̣ аабхаран̣аад̣̇ийнам̣ рагкан̣ад̇т̇ан̃жа ж̇аалаани гаран̣д̣агаагаарзна баригкибаабзд̇ваа. жанд̣̇анаг̇ан̣ти ааг̇анд̇ваа ж̇аалз лаг̇г̇аад̇и зго гира рад̇д̇ажанд̣̇анаругко г̇ан̇г̇ааяа убарид̇ийрз ж̇аад̇о г̇ан̇г̇од̣̇агзна д̇ход̇амууло бад̇ид̇ваа д̇ад̇т̇а д̇ад̇т̇а баасаан̣зсу самбхиж̇ж̇амаано виббагири. д̇ад̇о згаа гхадаббамаан̣аа гхадигаа баасаан̣зсу гхам̣сияамаанаа уд̣̇агауумийхи бот̇ияамаанаа мадтаа худ̇ваа анубуб̣б̣зна вуяхамаанаа сзваалабарияонад̣̇д̇хаа ааг̇анд̇ваа д̇асмим̣ ж̇аалз лаг̇г̇и. д̇ам̣ санд̇хааязд̇ам̣ вуд̇д̇ам̣. лзканд̇и ликид̇аг̇ахид̇ам̣ жун̣н̣ам̣. уд̣д̣ид̇ваад̇и взл̣убарамбарааяа уд̣̇д̇хам̣ баабзд̇ваа, удтаабзд̇ваад̇и вуд̇д̇ам̣ ход̇и. охарад̇ууд̇и ид̣̇д̇хияаа од̇аарзд̇ваа г̇ан̣хад̇у.
252.Jālāni parikkhipāpetvāti parissayamocanatthañceva pamādena gaḷitānaṃ ābharaṇādīnaṃ rakkhaṇatthañca jālāni karaṇḍakākārena parikkhipāpetvā. Candanagaṇṭhi āgantvā jāle laggāti eko kira rattacandanarukkho gaṅgāya uparitīre jāto gaṅgodakena dhotamūlo patitvā tattha tattha pāsāṇesu sambhijjamāno vippakiri. Tato ekā ghaṭappamāṇā ghaṭikā pāsāṇesu ghaṃsiyamānā udakaūmīhi pothiyamānā maṭṭhā hutvā anupubbena vuyhamānā sevālapariyonaddhā āgantvā tasmiṃ jāle laggi. Taṃ sandhāyetaṃ vuttaṃ. Lekhanti likhitagahitaṃ cuṇṇaṃ. Uḍḍitvāti veḷuparamparāya uddhaṃ pāpetvā, uṭṭhāpetvāti vuttaṃ hoti. Oharatūti iddhiyā otāretvā gaṇhatu.
бууран̣агассабаад̣̇аяо ча сад̇т̇ааро. д̇ад̇т̇а (д̣̇ий. ни. адта. 1.151-152; ма. ни. адта. 1.312) бууран̣од̇и д̇асса сад̇т̇убадин̃н̃асса наамам̣. гассабод̇и г̇од̇д̇ам̣. со гира ан̃н̃ад̇арасса гуласса згуунад̣̇аасасад̇ам̣ буураяамаано ж̇аад̇о. д̇знасса ‘‘бууран̣о’’д̇и наамам̣ агам̣су. ман̇г̇алад̣̇аасад̇д̇аа жасса гад̇ам̣ ‘‘д̣̇уггада’’нд̇и вад̇д̇аа над̇т̇и, агад̇ам̣ ваа ‘‘на гад̇а’’нд̇и . со ‘‘гимахам̣ зд̇т̇а васаамий’’д̇и балааяи. ат̇асса жораа вад̇т̇аани ажчинд̣̇им̣су. со бан̣н̣зна ваа д̇ин̣зна ваа бадижчаад̣̇зд̇умби аж̇аананд̇о ж̇аад̇аруубзнзва згам̣ г̇аамам̣ баависи. мануссаа д̇ам̣ д̣̇исваа ‘‘аяам̣ саман̣о арахаа аббижчо, над̇т̇и иминаа сад̣̇исо’’д̇и буувабхад̇д̇аад̣̇ийни г̇ахзд̇ваа убасан̇гаманд̇и. со ‘‘маяхам̣ саадагам̣ анивад̇т̇абхаавзна ид̣̇ам̣ уббанна’’нд̇и д̇ад̇о бадтааяа саадагам̣ лабхид̇вааби на ниваасзси, д̇ад̣̇зва баб̣б̣аж̇ж̇ам̣ аг̇г̇ахзси. д̇асса санд̇игз ан̃н̃зби ан̃н̃збийд̇и бан̃жасад̇аа мануссаа баб̣б̣аж̇им̣су. звамаяам̣ г̇ан̣аажарияо худ̇ваа ‘‘сад̇т̇аа’’д̇и логз баагадо ахоси.
Pūraṇakassapādayo cha satthāro. Tattha (dī. ni. aṭṭha. 1.151-152; ma. ni. aṭṭha. 1.312) pūraṇoti tassa satthupaṭiññassa nāmaṃ. Kassapoti gottaṃ. So kira aññatarassa kulassa ekūnadāsasataṃ pūrayamāno jāto. Tenassa ‘‘pūraṇo’’ti nāmaṃ akaṃsu. Maṅgaladāsattā cassa kataṃ ‘‘dukkaṭa’’nti vattā natthi, akataṃ vā ‘‘na kata’’nti . So ‘‘kimahaṃ ettha vasāmī’’ti palāyi. Athassa corā vatthāni acchindiṃsu. So paṇṇena vā tiṇena vā paṭicchādetumpi ajānanto jātarūpeneva ekaṃ gāmaṃ pāvisi. Manussā taṃ disvā ‘‘ayaṃ samaṇo arahā appiccho, natthi iminā sadiso’’ti pūvabhattādīni gahetvā upasaṅkamanti. So ‘‘mayhaṃ sāṭakaṃ anivatthabhāvena idaṃ uppanna’’nti tato paṭṭhāya sāṭakaṃ labhitvāpi na nivāsesi, tadeva pabbajjaṃ aggahesi. Tassa santike aññepi aññepīti pañcasatā manussā pabbajiṃsu. Evamayaṃ gaṇācariyo hutvā ‘‘satthā’’ti loke pākaṭo ahosi.
магкалийд̇и д̇асса наамам̣. г̇осаалааяа ж̇аад̇ад̇д̇аа г̇осаалод̇и д̣̇уд̇ияанаамам̣. д̇ам̣ гира сагад̣̇д̣̇амааяа бхуумияаа д̇злагхадам̣ г̇ахзд̇ваа г̇ажчанд̇ам̣ ‘‘д̇аад̇а маа калий’’д̇и саамиго ааха. со бамаад̣̇зна калид̇ваа бад̇ид̇ваа саамигасса бхаязна балааяид̇ум̣ аарад̣̇д̇хо. саамиго убад̇хаавид̇ваа саадагаган̣н̣з аг̇г̇ахзси, со саадагам̣ чад̣д̣зд̇ваа ажзлаго худ̇ваа балааяи. сзсам̣ бууран̣асад̣̇исамзва.
Makkhalīti tassa nāmaṃ. Gosālāya jātattā gosāloti dutiyanāmaṃ. Taṃ kira sakaddamāya bhūmiyā telaghaṭaṃ gahetvā gacchantaṃ ‘‘tāta mā khalī’’ti sāmiko āha. So pamādena khalitvā patitvā sāmikassa bhayena palāyituṃ āraddho. Sāmiko upadhāvitvā sāṭakakaṇṇe aggahesi, so sāṭakaṃ chaḍḍetvā acelako hutvā palāyi. Sesaṃ pūraṇasadisameva.
аж̇ид̇од̇и д̇асса наамам̣. гзсагамб̣алам̣ д̇хаарзд̇ийд̇и гзсагамб̣ало. ид̇и наамад̣̇ваяам̣ сам̣санд̣̇ид̇ваа ‘‘аж̇ид̇о гзсагамб̣ало’’д̇и вужжад̇и. д̇ад̇т̇а гзсагамб̣ало наама мануссаанам̣ гзсзхи гад̇агамб̣ало. д̇ад̇о бадигидтад̇арам̣ вад̇т̇ам̣ наама над̇т̇и. яат̇ааха ‘‘сзяяат̇ааби, бхигкавз, яаани гаанижи д̇анд̇аавуд̇аанам̣ вад̇т̇аанам̣, гзсагамб̣ало д̇зсам̣ бадигидто агкааяад̇и. гзсагамб̣ало, бхигкавз, сийд̇з сийд̇о ун̣хз ун̣хо д̣̇уб̣б̣ан̣н̣о д̣̇уг̇г̇анд̇хо д̣̇угкасампассо’’д̇и (а. ни. 3.138).
Ajitoti tassa nāmaṃ. Kesakambalaṃ dhāretīti kesakambalo. Iti nāmadvayaṃ saṃsanditvā ‘‘ajito kesakambalo’’ti vuccati. Tattha kesakambalo nāma manussānaṃ kesehi katakambalo. Tato paṭikiṭṭhataraṃ vatthaṃ nāma natthi. Yathāha ‘‘seyyathāpi, bhikkhave, yāni kānici tantāvutānaṃ vatthānaṃ, kesakambalo tesaṃ paṭikiṭṭho akkhāyati. Kesakambalo, bhikkhave, sīte sīto uṇhe uṇho dubbaṇṇo duggandho dukkhasamphasso’’ti (a. ni. 3.138).
багуд̇ход̇и д̇асса наамам̣. гажжааяанод̇и г̇од̇д̇ам̣. ид̇и наамаг̇од̇д̇ам̣ сам̣санд̣̇ид̇ваа ‘‘багуд̇хо гажжааяано’’д̇и вужжад̇и. сийд̇ууд̣̇агабадигкид̇д̇аго зса, важжам̣ гад̇вааби уд̣̇агагижжам̣ на гарод̇и, ун̣ход̣̇агам̣ ваа ган̃ж̇ияам̣ ваа лабхид̇ваа гарод̇и, над̣̇им̣ ваа маг̇г̇од̣̇агам̣ ваа ад̇иггамма ‘‘сийлам̣ мз бхинна’’нд̇и ваалигат̇уубам̣ гад̇ваа сийлам̣ ад̇хидтааяа г̇ажчад̇и. зваруубаниссиригалад̣̇д̇хиго зса.
Pakudhoti tassa nāmaṃ. Kaccāyanoti gottaṃ. Iti nāmagottaṃ saṃsanditvā ‘‘pakudho kaccāyano’’ti vuccati. Sītūdakapaṭikkhittako esa, vaccaṃ katvāpi udakakiccaṃ na karoti, uṇhodakaṃ vā kañjiyaṃ vā labhitvā karoti, nadiṃ vā maggodakaṃ vā atikkamma ‘‘sīlaṃ me bhinna’’nti vālikathūpaṃ katvā sīlaṃ adhiṭṭhāya gacchati. Evarūpanissirikaladdhiko esa.
сан̃жаяод̇и д̇асса наамам̣. б̣зладтасса буд̇д̇о б̣зладтабуд̇д̇о. ‘‘амхаагам̣ г̇ан̣танагилзсо балиб̣унд̇ханагилзсо над̇т̇и, гилзсаг̇ан̣тирахид̇аа маяа’’нд̇и звам̣ваад̣̇ид̇ааяа лад̣̇д̇ханаамавасзна ниг̇ан̣то. наадасса буд̇д̇од̇и наадабуд̇д̇о.
Sañcayoti tassa nāmaṃ. Belaṭṭhassa putto belaṭṭhaputto. ‘‘Amhākaṃ gaṇṭhanakileso palibundhanakileso natthi, kilesagaṇṭhirahitā maya’’nti evaṃvāditāya laddhanāmavasena nigaṇṭho. Nāṭassa puttoti nāṭaputto.
бин̣д̣олабхаарад̣̇вааж̇од̇и (уд̣̇аа. адта. 36) бин̣д̣ам̣ уламаано бариязсамаано баб̣б̣аж̇ид̇од̇и бин̣д̣оло. со гира бариж̇ин̣н̣абхог̇о б̣раахман̣о худ̇ваа маханд̇ам̣ бхигкусан̇гхасса лаабхасаггаарам̣ д̣̇исваа бин̣д̣ад̇т̇ааяа нигкамид̇ваа баб̣б̣аж̇ид̇о. со маханд̇ам̣ габаллабад̇д̇ам̣ ‘‘бад̇д̇а’’нд̇и г̇ахзд̇ваа жарад̇и, габаллабуурам̣ яааг̇ум̣ бивад̇и, бхад̇д̇ам̣ бхун̃ж̇ад̇и, буувакаж̇ж̇аган̃жа каад̣̇ад̇и. ат̇асса махаг̇гхасабхаавам̣ сад̇т̇у аарожаяим̣су. сад̇т̇аа д̇асса бад̇д̇ад̇т̇авигам̣ наануж̇аани. т̇зро хздтааман̃жз бад̇д̇ам̣ нигуж̇ж̇ид̇ваа табзд̇и. со табзнд̇оби гхам̣сзнд̇ова бан̣аамзд̇ваа табзд̇и, г̇ан̣ханд̇оби гхам̣сзнд̇ова аагад̣дхид̇ваа г̇ан̣хаад̇и. д̇ам̣ г̇ажчанд̇з г̇ажчанд̇з гаалз гхам̣санзна баригкийн̣ам̣ наал̣игод̣̇анамад̇д̇ассзва г̇ан̣ханагам̣ ж̇аад̇ам̣. д̇ад̇о сад̇т̇у аарожзсум̣. ат̇асса сад̇т̇аа бад̇д̇ад̇т̇авигам̣ ануж̇аани. т̇зро абарзна самаязна инд̣̇рияабхааванам̣ бхаавзнд̇о аг̇г̇апалз арахад̇д̇з бад̇идтааси. ид̇и со буб̣б̣з сависзсам̣ бин̣д̣ад̇т̇ааяа улад̇ийд̇и бин̣д̣оло. г̇од̇д̇зна бана бхаарад̣̇вааж̇од̇и убхаяам̣ згад̇о гад̇ваа ‘‘бин̣д̣олабхаарад̣̇вааж̇о’’д̇и вужжад̇и.
Piṇḍolabhāradvājoti (udā. aṭṭha. 36) piṇḍaṃ ulamāno pariyesamāno pabbajitoti piṇḍolo. So kira parijiṇṇabhogo brāhmaṇo hutvā mahantaṃ bhikkhusaṅghassa lābhasakkāraṃ disvā piṇḍatthāya nikkhamitvā pabbajito. So mahantaṃ kapallapattaṃ ‘‘patta’’nti gahetvā carati, kapallapūraṃ yāguṃ pivati, bhattaṃ bhuñjati, pūvakhajjakañca khādati. Athassa mahagghasabhāvaṃ satthu ārocayiṃsu. Satthā tassa pattatthavikaṃ nānujāni. Thero heṭṭhāmañce pattaṃ nikujjitvā ṭhapeti. So ṭhapentopi ghaṃsentova paṇāmetvā ṭhapeti, gaṇhantopi ghaṃsentova ākaḍḍhitvā gaṇhāti. Taṃ gacchante gacchante kāle ghaṃsanena parikkhīṇaṃ nāḷikodanamattasseva gaṇhanakaṃ jātaṃ. Tato satthu ārocesuṃ. Athassa satthā pattatthavikaṃ anujāni. Thero aparena samayena indriyabhāvanaṃ bhāvento aggaphale arahatte patiṭṭhāsi. Iti so pubbe savisesaṃ piṇḍatthāya ulatīti piṇḍolo. Gottena pana bhāradvājoti ubhayaṃ ekato katvā ‘‘piṇḍolabhāradvājo’’ti vuccati.
‘‘ат̇а ко ааяасмаа бин̣д̣олабхаарад̣̇вааж̇о…бз… зд̇ад̣̇авожаа’’д̇и гасмаа звамаахам̣су? со гира (д̇ха. ба. адта. 2.180 д̣̇зворохан̣авад̇т̇у) сздти нзва саммаад̣̇идти, на мижчаад̣̇идти, маж̇жхад̇д̇ад̇хаад̇уго. со жинд̇зси ‘‘маяхам̣ г̇зхз жанд̣̇анам̣ б̣аху, гим̣ ну ко иминаа гариссаамий’’д̇и. ат̇асса зд̇ад̣̇ахоси ‘‘имасмим̣ логз ‘маяам̣ араханд̇о, маяам̣ араханд̇о’д̇и вад̇д̇ааро б̣ахуу, ахам̣ згам̣ араханд̇амби на ж̇аанаами, г̇зхз бхамам̣ яож̇зд̇ваа бад̇д̇ам̣ ликаабзд̇ваа сиггааяа табзд̇ваа взл̣убарамбарааяа садтихад̇т̇амад̇д̇з аагаасз оламб̣аабзд̇ваа ‘сажз арахаа ад̇т̇и, аагаасзнааг̇анд̇ваа г̇ан̣хаад̇уу’д̇и вагкаами. яо д̇ам̣ г̇ахзссад̇и, д̇асса сабуд̇д̇ад̣̇ааро саран̣ам̣ г̇амиссаамий’’д̇и. со жинд̇ид̇анияаамзнзва бад̇д̇ам̣ ликаабзд̇ваа взл̣убарамбарааяа уссаабзд̇ваа ‘‘яо имасмим̣ логз арахаа, со аагаасзна ааг̇анд̇ваа имам̣ бад̇д̇ам̣ г̇ан̣хаад̇уу’’д̇и ааха.
‘‘Atha kho āyasmā piṇḍolabhāradvājo…pe… etadavocā’’ti kasmā evamāhaṃsu? So kira (dha. pa. aṭṭha. 2.180 devorohaṇavatthu) seṭṭhi neva sammādiṭṭhi, na micchādiṭṭhi, majjhattadhātuko. So cintesi ‘‘mayhaṃ gehe candanaṃ bahu, kiṃ nu kho iminā karissāmī’’ti. Athassa etadahosi ‘‘imasmiṃ loke ‘mayaṃ arahanto, mayaṃ arahanto’ti vattāro bahū, ahaṃ ekaṃ arahantampi na jānāmi, gehe bhamaṃ yojetvā pattaṃ likhāpetvā sikkāya ṭhapetvā veḷuparamparāya saṭṭhihatthamatte ākāse olambāpetvā ‘sace arahā atthi, ākāsenāgantvā gaṇhātū’ti vakkhāmi. Yo taṃ gahessati, tassa saputtadāro saraṇaṃ gamissāmī’’ti. So cintitaniyāmeneva pattaṃ likhāpetvā veḷuparamparāya ussāpetvā ‘‘yo imasmiṃ loke arahā, so ākāsena āgantvā imaṃ pattaṃ gaṇhātū’’ti āha.
д̇ад̣̇аа ча сад̇т̇ааро ‘‘амхаагам̣ зса анужчавиго, амхаагамзва нам̣ д̣̇зхий’’д̇и вад̣̇им̣су. со ‘‘аагаасзнааг̇анд̇ваа г̇ан̣хат̇аа’’д̇и ааха. чадтз д̣̇ивасз ниг̇ан̣то наадабуд̇д̇о анд̇зваасигз бзсзси ‘‘г̇ажчат̇а сздтим̣ звам̣ вад̣̇зт̇а ‘амхаагам̣ аажарияассзва анужчавиго, маа аббамад̇д̇агасса гааран̣аа аагаасзна ааг̇аманам̣ гари, д̣̇зхи гира д̇з бад̇д̇а’нд̇и’’. д̇з г̇анд̇ваа сздтим̣ д̇ат̇аа вад̣̇им̣су. сздти ‘‘аагаасзнааг̇анд̇ваа г̇ан̣хид̇ум̣ самад̇т̇ова г̇ан̣хаад̇уу’’д̇и ааха. наадабуд̇д̇о саяам̣ г̇анд̇угаамо худ̇ваа анд̇зваасигаанам̣ сан̃н̃ам̣ ад̣̇ааси ‘‘ахам̣ згам̣ хад̇т̇ан̃жа баад̣̇ан̃жа угкибид̇ваа уббад̇ид̇угаамо вияа бхависсаами, д̇умхз мам̣ ‘аажарияа гим̣ гарот̇а, д̣̇аарумаяабад̇д̇асса гааран̣аа бадижчаннам̣ арахад̇д̇аг̇ун̣ам̣ махааж̇анасса маа д̣̇ассаяид̇т̇аа’д̇и вад̇ваа мам̣ хад̇т̇зсу жа баад̣̇зсу жа г̇ахзд̇ваа аагад̣дханд̇аа бхуумияам̣ баад̇зяяаат̇аа’’д̇и. со д̇ад̇т̇а г̇анд̇ваа сздтим̣ ааха ‘‘махаасздти аяам̣ бад̇д̇о ан̃н̃зсам̣ наанужчавиго, маа д̇з аббамад̇д̇агасса гааран̣аа мама аагаасз уббад̇анам̣ ружжи, д̣̇зхи мз бад̇д̇а’’нд̇и. бханд̇з, аагаасзна уббад̇ид̇ваава г̇ан̣хат̇аад̇и. д̇ад̇о наадабуд̇д̇о ‘‘д̇зна хи абзт̇а абзт̇аа’’д̇и анд̇зваасигз абанзд̇ваа ‘‘аагаасз уббад̇иссаамий’’д̇и згам̣ хад̇т̇ан̃жа баад̣̇ан̃жа угкиби. ат̇а нам̣ анд̇зваасигаа ‘‘аажарияа, гим̣ наамзд̇ам̣ гарот̇а, чавасса д̣̇аарумаяабад̇д̇асса гааран̣аа бадижчаннаг̇ун̣зна д̇умхзхи махааж̇анасса д̣̇ассид̇зна го ад̇т̇о’’д̇и д̇ам̣ хад̇т̇абаад̣̇зсу г̇ахзд̇ваа аагад̣дхид̇ваа бхуумияам̣ баад̇зсум̣. со сздтим̣ ааха ‘‘махаасздти, имз мз уббад̇ид̇ум̣ на д̣̇знд̇и, д̣̇зхи мз бад̇д̇а’’нд̇и. уббад̇ид̇ваава г̇ан̣хат̇а бханд̇зд̇и. звам̣ д̇ид̇т̇ияаа ча д̣̇ивасаани вааяамид̇вааби бад̇д̇ам̣ на лабхим̣суязва.
Tadā cha satthāro ‘‘amhākaṃ esa anucchaviko, amhākameva naṃ dehī’’ti vadiṃsu. So ‘‘ākāsenāgantvā gaṇhathā’’ti āha. Chaṭṭhe divase nigaṇṭho nāṭaputto antevāsike pesesi ‘‘gacchatha seṭṭhiṃ evaṃ vadetha ‘amhākaṃ ācariyasseva anucchaviko, mā appamattakassa kāraṇā ākāsena āgamanaṃ kari, dehi kira te patta’nti’’. Te gantvā seṭṭhiṃ tathā vadiṃsu. Seṭṭhi ‘‘ākāsenāgantvā gaṇhituṃ samatthova gaṇhātū’’ti āha. Nāṭaputto sayaṃ gantukāmo hutvā antevāsikānaṃ saññaṃ adāsi ‘‘ahaṃ ekaṃ hatthañca pādañca ukkhipitvā uppatitukāmo viya bhavissāmi, tumhe maṃ ‘ācariya kiṃ karotha, dārumayapattassa kāraṇā paṭicchannaṃ arahattaguṇaṃ mahājanassa mā dassayitthā’ti vatvā maṃ hatthesu ca pādesu ca gahetvā ākaḍḍhantā bhūmiyaṃ pāteyyāthā’’ti. So tattha gantvā seṭṭhiṃ āha ‘‘mahāseṭṭhi ayaṃ patto aññesaṃ nānucchaviko, mā te appamattakassa kāraṇā mama ākāse uppatanaṃ rucci, dehi me patta’’nti. Bhante, ākāsena uppatitvāva gaṇhathāti. Tato nāṭaputto ‘‘tena hi apetha apethā’’ti antevāsike apanetvā ‘‘ākāse uppatissāmī’’ti ekaṃ hatthañca pādañca ukkhipi. Atha naṃ antevāsikā ‘‘ācariya, kiṃ nāmetaṃ karotha, chavassa dārumayapattassa kāraṇā paṭicchannaguṇena tumhehi mahājanassa dassitena ko attho’’ti taṃ hatthapādesu gahetvā ākaḍḍhitvā bhūmiyaṃ pātesuṃ. So seṭṭhiṃ āha ‘‘mahāseṭṭhi, ime me uppatituṃ na denti, dehi me patta’’nti. Uppatitvāva gaṇhatha bhanteti. Evaṃ titthiyā cha divasāni vāyamitvāpi pattaṃ na labhiṃsuyeva.
ат̇а сад̇д̇амз д̣̇ивасз ааяасмад̇о жа мог̇г̇аллаанасса ааяасмад̇о жа бин̣д̣олабхаарад̣̇вааж̇асса ‘‘рааж̇аг̇ахз бин̣д̣ааяа жариссаамаа’’д̇и г̇анд̇ваа згасмим̣ бидтибаасаан̣з тад̇ваа жийварам̣ баарубанагаалз д̇худ̇д̇агаа гат̇ам̣ самудтаабзсум̣ ‘‘хамбхо буб̣б̣з ча сад̇т̇ааро ‘маяам̣ араханд̇аамхаа’д̇и вижарим̣су, рааж̇аг̇ахасздтино бана аж̇ж̇а сад̇д̇амо д̣̇ивасо бад̇д̇ам̣ уссаабзд̇ваа табаяад̇о ‘сажз арахаа ад̇т̇и, аагаасзнааг̇анд̇ваа г̇ан̣хаад̇уу’д̇и вад̣̇анд̇асса, згоби ‘ахам̣ арахаа’д̇и аагаасз уббад̇анд̇о над̇т̇и, аж̇ж̇а но логз араханд̇аанам̣ над̇т̇ибхааво н̃аад̇о’’д̇и. д̇ам̣ гат̇ам̣ суд̇ваа ааяасмаа махаамог̇г̇аллаано ааяасманд̇ам̣ бин̣д̣олабхаарад̣̇вааж̇ам̣ ааха ‘‘суд̇ам̣ д̇з, аавусо бхаарад̣̇вааж̇а, имзсам̣ важанам̣, имз б̣уд̣̇д̇хасаасанам̣ бариг̇г̇ан̣ханд̇аа вияа вад̣̇анд̇и, д̇ван̃жа махид̣̇д̇хиго махаанубхааво, г̇ажчзд̇ам̣ бад̇д̇ам̣ аагаасзна г̇анд̇ваа г̇ан̣хаахий’’д̇и. ‘‘аавусо мог̇г̇аллаана, д̇вам̣ ‘ид̣̇д̇химанд̇аанам̣ аг̇г̇о’д̇и баагадо, д̇вам̣ зд̇ам̣ г̇ан̣ха, д̇аяи бана аг̇г̇ан̣ханд̇з ахам̣ г̇ан̣хиссаамий’’д̇и ааха. ат̇а ааяасмаа махаамог̇г̇аллаано ‘‘г̇ан̣хаавусо’’д̇и ааха. ид̇и д̇з логасса араханд̇зхи асун̃н̃абхаавад̣̇ассанад̇т̇ам̣ звамаахам̣су.
Atha sattame divase āyasmato ca moggallānassa āyasmato ca piṇḍolabhāradvājassa ‘‘rājagahe piṇḍāya carissāmā’’ti gantvā ekasmiṃ piṭṭhipāsāṇe ṭhatvā cīvaraṃ pārupanakāle dhuttakā kathaṃ samuṭṭhāpesuṃ ‘‘hambho pubbe cha satthāro ‘mayaṃ arahantāmhā’ti vicariṃsu, rājagahaseṭṭhino pana ajja sattamo divaso pattaṃ ussāpetvā ṭhapayato ‘sace arahā atthi, ākāsenāgantvā gaṇhātū’ti vadantassa, ekopi ‘ahaṃ arahā’ti ākāse uppatanto natthi, ajja no loke arahantānaṃ natthibhāvo ñāto’’ti. Taṃ kathaṃ sutvā āyasmā mahāmoggallāno āyasmantaṃ piṇḍolabhāradvājaṃ āha ‘‘sutaṃ te, āvuso bhāradvāja, imesaṃ vacanaṃ, ime buddhasāsanaṃ pariggaṇhantā viya vadanti, tvañca mahiddhiko mahānubhāvo, gacchetaṃ pattaṃ ākāsena gantvā gaṇhāhī’’ti. ‘‘Āvuso moggallāna, tvaṃ ‘iddhimantānaṃ aggo’ti pākaṭo, tvaṃ etaṃ gaṇha, tayi pana aggaṇhante ahaṃ gaṇhissāmī’’ti āha. Atha āyasmā mahāmoggallāno ‘‘gaṇhāvuso’’ti āha. Iti te lokassa arahantehi asuññabhāvadassanatthaṃ evamāhaṃsu.
д̇игкад̇д̇ум̣ рааж̇аг̇ахам̣ анубарияааяийд̇и д̇игкад̇д̇ум̣ рааж̇аг̇ахам̣ ануг̇анд̇ваа бариб̣бхами. ‘‘сад̇д̇агкад̇д̇у’’нд̇иби вад̣̇анд̇и. т̇зро гира абхин̃н̃аабаад̣̇агам̣ жхаанам̣ самаабаж̇ж̇ид̇ваа удтааяа д̇иг̇аавуд̇ам̣ бидтибаасаан̣ам̣ анд̇анд̇зна барижчинд̣̇анд̇о д̇уулабижу вияа аагаасз удтаабзд̇ваа рааж̇аг̇аханаг̇арасса убари сад̇д̇агкад̇д̇ум̣ анубарияааяи. со д̇иг̇аавуд̇аббамаан̣асса наг̇арасса абид̇хаанам̣ вияа бан̃н̃ааяи. наг̇араваасино ‘‘баасаан̣о но авад̇т̇арид̇ваа г̇ан̣хаад̇ий’’д̇и бхийд̇аа суббаад̣̇ийни мад̇т̇агз гад̇ваа д̇ад̇т̇а д̇ад̇т̇а нилийяим̣су. сад̇д̇амз ваарз т̇зро бидтибаасаан̣ам̣ бхинд̣̇ид̇ваа ад̇д̇аанам̣ д̣̇ассзд̇и. махааж̇ано т̇зрам̣ д̣̇исваа ‘‘бханд̇з бин̣д̣олабхаарад̣̇вааж̇а, д̇ава баасаан̣ам̣ г̇аал̣хам̣ гад̇ваа г̇ан̣ха, маа но саб̣б̣з наасаяий’’д̇и ааха. т̇зро баасаан̣ам̣ баад̣̇анд̇зна кибид̇ваа виссаж̇ж̇зси. со г̇анд̇ваа яат̇аатаанзязва бад̇идтааси. т̇зро сздтисса г̇зхамад̇т̇агз адтааси. д̇ам̣ д̣̇исваа сздти урзна нибаж̇ж̇ид̇ваа ‘‘од̇ара саамий’’д̇и вад̇ваа аагаасад̇о од̇ин̣н̣ам̣ т̇зрам̣ нисийд̣̇аабзд̇ваа бад̇д̇ам̣ г̇ахзд̇ваа жад̇умад̇хурабун̣н̣ам̣ гад̇ваа т̇зрасса ад̣̇ааси. т̇зро бад̇д̇ам̣ г̇ахзд̇ваа вихаараабхимуко бааяааси. ат̇асса яз аран̃н̃аг̇ад̇аа баадихаарияам̣ наад̣̇д̣̇асам̣су, д̇з саннибад̇ид̇ваа ‘‘бханд̇з, амхаагамби баадихаарияам̣ д̣̇ассзхий’’д̇и т̇зрам̣ ануб̣анд̇хим̣су. со д̇зсам̣ д̇зсам̣ баадихаарияам̣ д̣̇ассзнд̇о вихаарам̣ аг̇амааси. сад̇т̇аа д̇ам̣ ануб̣анд̇хид̇ваа уннаад̣̇знд̇асса махааж̇анасса сад̣̇д̣̇ам̣ суд̇ваа ‘‘аананд̣̇а, гассзсо сад̣̇д̣̇о’’д̇и бужчи. д̇зна вуд̇д̇ам̣ ‘‘ассоси ко бхаг̇аваа…бз… гим̣ ну ко со, аананд̣̇а, ужжаасад̣̇д̣̇о махаасад̣̇д̣̇о’’д̇и.
Tikkhattuṃ rājagahaṃ anupariyāyīti tikkhattuṃ rājagahaṃ anugantvā paribbhami. ‘‘Sattakkhattu’’ntipi vadanti. Thero kira abhiññāpādakaṃ jhānaṃ samāpajjitvā uṭṭhāya tigāvutaṃ piṭṭhipāsāṇaṃ antantena paricchindanto tūlapicu viya ākāse uṭṭhāpetvā rājagahanagarassa upari sattakkhattuṃ anupariyāyi. So tigāvutappamāṇassa nagarassa apidhānaṃ viya paññāyi. Nagaravāsino ‘‘pāsāṇo no avattharitvā gaṇhātī’’ti bhītā suppādīni matthake katvā tattha tattha nilīyiṃsu. Sattame vāre thero piṭṭhipāsāṇaṃ bhinditvā attānaṃ dasseti. Mahājano theraṃ disvā ‘‘bhante piṇḍolabhāradvāja, tava pāsāṇaṃ gāḷhaṃ katvā gaṇha, mā no sabbe nāsayī’’ti āha. Thero pāsāṇaṃ pādantena khipitvā vissajjesi. So gantvā yathāṭhāneyeva patiṭṭhāsi. Thero seṭṭhissa gehamatthake aṭṭhāsi. Taṃ disvā seṭṭhi urena nipajjitvā ‘‘otara sāmī’’ti vatvā ākāsato otiṇṇaṃ theraṃ nisīdāpetvā pattaṃ gahetvā catumadhurapuṇṇaṃ katvā therassa adāsi. Thero pattaṃ gahetvā vihārābhimukho pāyāsi. Athassa ye araññagatā pāṭihāriyaṃ nāddasaṃsu, te sannipatitvā ‘‘bhante, amhākampi pāṭihāriyaṃ dassehī’’ti theraṃ anubandhiṃsu. So tesaṃ tesaṃ pāṭihāriyaṃ dassento vihāraṃ agamāsi. Satthā taṃ anubandhitvā unnādentassa mahājanassa saddaṃ sutvā ‘‘ānanda, kasseso saddo’’ti pucchi. Tena vuttaṃ ‘‘assosi kho bhagavā…pe… kiṃ nu kho so, ānanda, uccāsaddo mahāsaddo’’ti.
вигуб̣б̣анид̣̇д̇хияаа баадихаарияам̣ бадигкид̇д̇анд̇и зд̇т̇а вигуб̣б̣анид̣̇д̇хи наама ‘‘со багад̇иван̣н̣ам̣ виж̇ахид̇ваа гумаарагаван̣н̣ам̣ ваа д̣̇ассзд̇и нааг̇аван̣н̣ам̣ ваа, вивид̇хамби сзнааб̣яуухам̣ д̣̇ассзд̇ий’’д̇и (бади. ма. 3.13) звамааг̇ад̇аа багад̇иван̣н̣авиж̇аханавигааравасзна бавад̇д̇аа ид̣̇д̇хи. ад̇хидтаанид̣̇д̇хи бана ‘‘багад̇ияаа зго б̣ахугам̣ ааваж̇ж̇ад̇и сад̇ам̣ ваа сахассам̣ ваа сад̇асахассам̣ ваа, ааваж̇ж̇ид̇ваа н̃аан̣зна ад̇хидтаад̇и ‘б̣ахуго хомий’’’д̇и (бади. ма. 3.10 д̣̇асаид̣̇д̇хинид̣̇д̣̇зса) звам̣ вибхаж̇ид̇ваа д̣̇ассид̇аа ад̇хидтаанавасзна нибпаннаа ид̣̇д̇хи.
Vikubbaniddhiyā pāṭihāriyaṃ paṭikkhittanti ettha vikubbaniddhi nāma ‘‘so pakativaṇṇaṃ vijahitvā kumārakavaṇṇaṃ vā dasseti nāgavaṇṇaṃ vā, vividhampi senābyūhaṃ dassetī’’ti (paṭi. ma. 3.13) evamāgatā pakativaṇṇavijahanavikāravasena pavattā iddhi. Adhiṭṭhāniddhi pana ‘‘pakatiyā eko bahukaṃ āvajjati sataṃ vā sahassaṃ vā satasahassaṃ vā, āvajjitvā ñāṇena adhiṭṭhāti ‘bahuko homī’’’ti (paṭi. ma. 3.10 dasaiddhiniddesa) evaṃ vibhajitvā dassitā adhiṭṭhānavasena nipphannā iddhi.
253-254. на ажчубияанд̇ийд̇и на супассид̇аани хонд̇и. руубагаагин̣н̣аанийд̇и ид̇т̇ируубаад̣̇ийхи аагин̣н̣аани. бхуумиаад̇хаарагзд̇и валаяаад̇хаарагз. д̣̇ааруаад̇хаарагад̣̇ан̣д̣аад̇хаарагзсууд̇и згад̣̇аарунаа гад̇ааад̇хаарагз б̣ахуухи д̣̇ан̣д̣агзхи гад̇ааад̇хаарагз ваад̇и ад̇т̇о, д̇ийхи д̣̇ан̣д̣зхи гад̇о бана на ваддад̇и. бхуумияам̣ бана ниггуж̇ж̇ид̇ваа згамзва табзд̇аб̣б̣анд̇и зд̇т̇а д̣̇вз табзнд̇зна убари табид̇абад̇д̇ам̣ згзна бассзна бхуумияам̣ пусаабзд̇ваа табзд̇ум̣ ваддад̇ийд̇и вад̣̇анд̇и. аалинд̣̇агамид̣дхигаад̣̇ийнанд̇и бамукамид̣дхигаанам̣. баривад̇д̇ид̇ваа д̇ад̇т̇зва бад̇идтаад̇ийд̇и зд̇т̇а ‘‘баривад̇д̇ид̇ваа д̇ад̇ияаваарз д̇ад̇т̇зва мид̣дхияаа бад̇идтаад̇ий’’д̇и г̇ан̣тибад̣̇зсу вуд̇д̇ам̣. барибхан̣д̣ам̣ наама г̇зхасса б̣ахи гуддабаад̣̇асса т̇ирабхаавад̇т̇ам̣ гад̇аа д̇анугамид̣дхигаа вужжад̇и. д̇анугамид̣дхигааяаад̇и куд̣̇д̣̇агамид̣дхигааяа. мид̣дханд̇зби аад̇хаарагз табзд̇ум̣ ваддад̇и. ‘‘ануж̇аанаами, бхигкавз, аад̇хаарага’’нд̇и хи важанад̇о мид̣дхаад̣̇ийсу яад̇т̇а гад̇т̇ажи аад̇хаарагам̣ табзд̇ваа д̇ад̇т̇а бад̇д̇ам̣ табзд̇ум̣ ваддад̇и аад̇хаарагз табаногаасасса анияамид̇ад̇д̇аад̇и вад̣̇анд̇и. ‘‘бад̇д̇амаал̣о наама ваддзд̇ваа бад̇д̇аанам̣ аг̇аманад̇т̇ам̣ ваддам̣ ваа жад̇урассам̣ ваа идтагаад̣̇ийхи баригкибид̇ваа гад̇о’’д̇и г̇ан̣тибад̣̇зсу вуд̇д̇ам̣.
253-254.Na acchupiyantīti na suphassitāni honti. Rūpakākiṇṇānīti itthirūpādīhi ākiṇṇāni. Bhūmiādhāraketi valayādhārake. Dāruādhārakadaṇḍādhārakesūti ekadārunā kataādhārake bahūhi daṇḍakehi kataādhārake vāti attho, tīhi daṇḍehi kato pana na vaṭṭati. Bhūmiyaṃ pana nikkujjitvā ekameva ṭhapetabbanti ettha dve ṭhapentena upari ṭhapitapattaṃ ekena passena bhūmiyaṃ phusāpetvā ṭhapetuṃ vaṭṭatīti vadanti. Ālindakamiḍḍhikādīnanti pamukhamiḍḍhikānaṃ. Parivattitvā tattheva patiṭṭhātīti ettha ‘‘parivattitvā tatiyavāre tattheva miḍḍhiyā patiṭṭhātī’’ti gaṇṭhipadesu vuttaṃ. Paribhaṇḍaṃ nāma gehassa bahi kuṭṭapādassa thirabhāvatthaṃ katā tanukamiḍḍhikā vuccati. Tanukamiḍḍhikāyāti khuddakamiḍḍhikāya. Miḍḍhantepi ādhārake ṭhapetuṃ vaṭṭati. ‘‘Anujānāmi, bhikkhave, ādhāraka’’nti hi vacanato miḍḍhādīsu yattha katthaci ādhārakaṃ ṭhapetvā tattha pattaṃ ṭhapetuṃ vaṭṭati ādhārake ṭhapanokāsassa aniyamitattāti vadanti. ‘‘Pattamāḷo nāma vaṭṭetvā pattānaṃ agamanatthaṃ vaṭṭaṃ vā caturassaṃ vā iṭṭhakādīhi parikkhipitvā kato’’ti gaṇṭhipadesu vuttaṃ.
255. гхадиганд̇и убари яож̇ид̇ам̣ аг̇г̇ал̣ам̣. д̇аавагаалигам̣ барибхун̃ж̇ид̇ум̣ ваддад̇ийд̇и сагид̣̇зва г̇ахзд̇ваа д̇зна аамисам̣ барибхун̃ж̇ид̇ваа чад̣д̣зд̇ум̣ ваддад̇ийд̇и ад̇хиббааяо. гхадигадаахзд̇и бхааж̇анагабаалз. абхум̣ мзд̇и зд̇т̇а бхавад̇ийд̇и бхуу, вад̣дхи. на бхууд̇и абхуу, авад̣дхи. бхаяавасзна бана саа ид̇т̇ий ‘‘абху’’нд̇и ааха, винаасо маяханд̇и ад̇т̇о. чавасийсасса бад̇д̇анд̇и чавасийсамаяам̣ бад̇д̇ам̣. багад̇ивигаарасамб̣анд̇хз жзд̇ам̣ саамиважанам̣, абхзд̣̇зби ваа бхзд̣̇уубажаарзнааяам̣ вохааро ‘‘силаабуд̇д̇агасса сарийра’’нд̇иаад̣̇ийсу вияа.
255.Ghaṭikanti upari yojitaṃ aggaḷaṃ. Tāvakālikaṃ paribhuñjituṃ vaṭṭatīti sakideva gahetvā tena āmisaṃ paribhuñjitvā chaḍḍetuṃ vaṭṭatīti adhippāyo. Ghaṭikaṭāheti bhājanakapāle. Abhuṃ meti ettha bhavatīti bhū, vaḍḍhi. Na bhūti abhū, avaḍḍhi. Bhayavasena pana sā itthī ‘‘abhu’’nti āha, vināso mayhanti attho. Chavasīsassa pattanti chavasīsamayaṃ pattaṃ. Pakativikārasambandhe cetaṃ sāmivacanaṃ, abhedepi vā bhedūpacārenāyaṃ vohāro ‘‘silāputtakassa sarīra’’ntiādīsu viya.
жаб̣б̣зд̇ваад̇и каад̣̇ид̇ваа. згам̣ уд̣̇агаг̇ан̣д̣усам̣ г̇ахзд̇ваад̇и ваамахад̇т̇знзва бад̇д̇ам̣ угкибид̇ваа мукзна г̇ан̣д̣усам̣ г̇ахзд̇ваа. ужчидтахад̇т̇знаад̇и саамисзна хад̇т̇зна. зд̇д̇аавад̇аад̇и згаг̇ан̣д̣усаг̇ахан̣амад̇д̇зна. лун̃жид̇ваад̇и д̇ад̇о мам̣сам̣ уд̣̇д̇харид̇ваа. зд̇зсу саб̣б̣зсу бан̣н̣ад̇д̇им̣ ж̇аанаад̇у ваа маа ваа, аабад̇д̇иязва.
Cabbetvāti khāditvā. Ekaṃ udakagaṇḍusaṃ gahetvāti vāmahattheneva pattaṃ ukkhipitvā mukhena gaṇḍusaṃ gahetvā. Ucchiṭṭhahatthenāti sāmisena hatthena. Ettāvatāti ekagaṇḍusagahaṇamattena. Luñcitvāti tato maṃsaṃ uddharitvā. Etesu sabbesu paṇṇattiṃ jānātu vā mā vā, āpattiyeva.
256. гин̣н̣ажун̣н̣знаад̇и сураагин̣н̣ажун̣н̣зна. ‘‘ануваад̇ам̣ барибхан̣д̣анд̇и гилан̃ж̇аад̣̇ийсу гаронд̇ий’’д̇и г̇ан̣тибад̣̇зсу вуд̇д̇ам̣. б̣ид̣̇алаганд̇и д̣̇уг̇ун̣агаран̣асан̇каад̇асса гирияаависзсасса ад̇хиважанам̣. гасса д̣̇уг̇ун̣агаран̣ам̣? язна гилан̃ж̇аад̣̇инаа маханд̇ам̣ гат̇инам̣ ад̇т̇ад̇ам̣, д̇асса. д̇ан̃хи д̣̇ан̣д̣агат̇инаббамаан̣зна барияанд̇з сам̣харид̇ваа д̣̇уг̇ун̣ам̣ гаад̇аб̣б̣ам̣. бадиг̇г̇аханд̇и ан̇г̇улиган̃жугам̣.
256.Kiṇṇacuṇṇenāti surākiṇṇacuṇṇena. ‘‘Anuvātaṃ paribhaṇḍanti kilañjādīsu karontī’’ti gaṇṭhipadesu vuttaṃ. Bidalakanti duguṇakaraṇasaṅkhātassa kiriyāvisesassa adhivacanaṃ. Kassa duguṇakaraṇaṃ? Yena kilañjādinā mahantaṃ kathinaṃ atthataṃ, tassa. Tañhi daṇḍakathinappamāṇena pariyante saṃharitvā duguṇaṃ kātabbaṃ. Paṭiggahanti aṅgulikañcukaṃ.
257-259. баад̇и наама бадиг̇г̇ахан̣асан̣таанзна гад̇о бхааж̇анависзсо. на саммад̇ийд̇и наббаход̇и.
257-259.Pāti nāma paṭiggahaṇasaṇṭhānena kato bhājanaviseso. Na sammatīti nappahoti.
260-262. нийжавад̇т̇угам̣ жинид̇унд̇и б̣ахигуддасса саманд̇ад̇о нийжавад̇т̇угам̣ гад̇ваа жинид̇ум̣. арахадагхадияанд̇ам̣ наама сагадажаггасан̣таанам̣ арз арз гхадигаани б̣анд̇хид̇ваа згзна д̣̇вийхи ваа бариб̣бхамияамаанам̣ яанд̇ам̣.
260-262.Nīcavatthukaṃ cinitunti bahikuṭṭassa samantato nīcavatthukaṃ katvā cinituṃ. Arahaṭaghaṭiyantaṃ nāma sakaṭacakkasaṇṭhānaṃ are are ghaṭikāni bandhitvā ekena dvīhi vā paribbhamiyamānaṃ yantaṃ.
263. аавид̣̇д̇хабагкабаасаганд̇и ган̣н̣игаман̣д̣аласса саманд̇аа табид̇абагкабаасагам̣. ман̣д̣алзд̇и ган̣н̣игаман̣д̣алз. багкабаасагз табзд̇ваад̇и саманд̇аа багкабаасагапалагаани табзд̇ваа.
263.Āviddhapakkhapāsakanti kaṇṇikamaṇḍalassa samantā ṭhapitapakkhapāsakaṃ. Maṇḍaleti kaṇṇikamaṇḍale. Pakkhapāsake ṭhapetvāti samantā pakkhapāsakaphalakāni ṭhapetvā.
264. ‘‘намад̇агам̣ сант̇ад̇асад̣̇иса’’нд̇и г̇ан̣тибад̣̇зсу вуд̇д̇ам̣. жаммакан̣д̣абарихаарзна барибхун̃ж̇ид̇аб̣б̣анд̇и анад̇хидтахид̇ваа барибхун̃ж̇ид̇аб̣б̣ам̣. зд̇т̇зва бавидтаанийд̇и мал̣оригааяа зва анд̇ог̇ад̇хаани. буб̣б̣з бад̇д̇асан̇г̇обанад̇т̇ам̣ аад̇хаараго анун̃н̃аад̇о, ид̣̇аани бхун̃ж̇анад̇т̇ам̣.
264. ‘‘Namatakaṃ santhatasadisa’’nti gaṇṭhipadesu vuttaṃ. Cammakhaṇḍaparihārena paribhuñjitabbanti anadhiṭṭhahitvā paribhuñjitabbaṃ. Ettheva paviṭṭhānīti maḷorikāya eva antogadhāni. Pubbe pattasaṅgopanatthaṃ ādhārako anuññāto, idāni bhuñjanatthaṃ.
265. ниггуж̇ж̇ид̇аб̣б̣од̇и д̇зна д̣̇иннасса д̣̇зяяад̇хаммасса аббадиг̇г̇ахан̣ад̇т̇ам̣ бад̇д̇аниггуж̇ж̇анагаммаваажааяа ниггуж̇ж̇ид̇аб̣б̣о, на ад̇хомукатабанзна. д̇знзвааха ‘‘зван̃жа бана, бхигкавз, ниггуж̇ж̇ид̇аб̣б̣о’’д̇иаад̣̇и. алаабхааяаад̇и жад̇уннам̣ бажжаяаанам̣ алаабхад̇т̇ааяа. анад̇т̇ааяаад̇и убад̣̇д̣̇авааяа авад̣дхияаа.
265.Nikkujjitabboti tena dinnassa deyyadhammassa appaṭiggahaṇatthaṃ pattanikkujjanakammavācāya nikkujjitabbo, na adhomukhaṭhapanena. Tenevāha ‘‘evañca pana, bhikkhave, nikkujjitabbo’’tiādi. Alābhāyāti catunnaṃ paccayānaṃ alābhatthāya. Anatthāyāti upaddavāya avaḍḍhiyā.
266. басаад̣̇зссаамаад̇и ааяаажиссаама. зд̇ад̣̇авожаад̇и ‘‘аббад̇ируубам̣ маяаа гад̇ам̣, бхаг̇аваа бана маханд̇зби аг̇ун̣з ажинд̇зд̇ваа маяхам̣ ажжаяам̣ бадиг̇г̇ан̣хиссад̇ий’’д̇и ман̃н̃амаано зд̇ам̣ ‘‘ажжаяо мам̣ бханд̇з’’д̇иаад̣̇иважанам̣ авожа . д̇ад̇т̇а н̃ааяабадибад̇д̇им̣ ад̇ижжа зд̇и бавад̇д̇ад̇ийд̇и ажжаяо, абараад̇хо. мам̣ ажжаг̇амаад̇и мам̣ ад̇иггамма абхибхавид̇ваа бавад̇д̇о. бурисзна мад̣̇д̣̇ид̇ваа абхибхавид̇ваа бавад̇д̇ид̇оби хи абараад̇хо ад̇т̇ад̇о бурисам̣ ад̇ижжа абхибхавид̇ваа бавад̇д̇о наама ход̇и. бадиг̇г̇ан̣хаад̇ууд̇и камад̇у. ааяад̇им̣ сам̣варааяаад̇и анааг̇ад̇з сам̣варан̣ад̇т̇ааяа буна зваруубасса абараад̇хасса д̣̇осасса калид̇асса агаран̣ад̇т̇ааяа. д̇аг̇гхаад̇и згам̣сзна. яат̇аад̇хаммам̣ бадигаросийд̇и яат̇аа д̇хаммо тид̇о, д̇ат̇зва гароси, камаабзсийд̇и вуд̇д̇ам̣ ход̇и. д̇ам̣ д̇з маяам̣ бадиг̇г̇ан̣хаамаад̇и д̇ам̣ д̇ава абараад̇хам̣ маяам̣ камаама. вуд̣дхи хзсаа, аавусо вад̣дха, арияасса винаязд̇и зсаа, аавусо вад̣дха, арияасса винаяз б̣уд̣̇д̇хасса бхаг̇авад̇о саасанз вуд̣дхи наама. гад̇амаа? ажжаяам̣ ажжаяад̇о д̣̇исваа яат̇аад̇хаммам̣ бадигарид̇ваа ааяад̇им̣ сам̣вараабаж̇ж̇анаа. д̣̇зсанам̣ бана буг̇г̇алаад̇хидтаанам̣ гаронд̇о ‘‘яо ажжаяам̣ ажжаяад̇о д̣̇исваа яат̇аад̇хаммам̣ бадигарод̇и, ааяад̇им̣ сам̣варам̣ аабаж̇ж̇ад̇ий’’д̇и ааха.
266.Pasādessāmāti āyācissāma. Etadavocāti ‘‘appatirūpaṃ mayā kataṃ, bhagavā pana mahantepi aguṇe acintetvā mayhaṃ accayaṃ paṭiggaṇhissatī’’ti maññamāno etaṃ ‘‘accayo maṃ bhante’’tiādivacanaṃ avoca . Tattha ñāyapaṭipattiṃ aticca eti pavattatīti accayo, aparādho. Maṃ accagamāti maṃ atikkamma abhibhavitvā pavatto. Purisena madditvā abhibhavitvā pavattitopi hi aparādho atthato purisaṃ aticca abhibhavitvā pavatto nāma hoti. Paṭiggaṇhātūti khamatu. Āyatiṃ saṃvarāyāti anāgate saṃvaraṇatthāya puna evarūpassa aparādhassa dosassa khalitassa akaraṇatthāya. Tagghāti ekaṃsena. Yathādhammaṃ paṭikarosīti yathā dhammo ṭhito, tatheva karosi, khamāpesīti vuttaṃ hoti. Taṃ te mayaṃ paṭiggaṇhāmāti taṃ tava aparādhaṃ mayaṃ khamāma. Vuḍḍhi hesā, āvuso vaḍḍha, ariyassa vinayeti esā, āvuso vaḍḍha, ariyassa vinaye buddhassa bhagavato sāsane vuḍḍhi nāma. Katamā? Accayaṃ accayato disvā yathādhammaṃ paṭikaritvā āyatiṃ saṃvarāpajjanā. Desanaṃ pana puggalādhiṭṭhānaṃ karonto ‘‘yo accayaṃ accayato disvā yathādhammaṃ paṭikaroti, āyatiṃ saṃvaraṃ āpajjatī’’ti āha.
268. б̣од̇хирааж̇агумааравад̇т̇умхи (ма. ни. адта. 2.324 аад̣̇аяо) гоганад̣̇од̇и гоганад̣̇ам̣ вужжад̇и бад̣̇умам̣, со жа ман̇г̇алабаасаад̣̇о ологанабад̣̇умам̣ д̣̇ассзд̇ваа гад̇о, д̇асмаа ‘‘гоганад̣̇о’’д̇и сан̇кам̣ лабхи. яаава бажчимасобаанагал̣звараад̇и зд̇т̇а бажчимасобаанагал̣зваранд̇и батамасобаанапалагам̣ вуд̇д̇ам̣ д̇асса саб̣б̣абажчаа д̣̇уссзна сант̇ад̇ад̇д̇аа. убаримасобаанапалагад̇о бадтааяа хи собаанам̣ сант̇ад̇ам̣. ад̣̇д̣̇асаа код̇и ологанад̇т̇ам̣язва д̣̇ваарагодтагз тид̇о ад̣̇д̣̇аса.
268. Bodhirājakumāravatthumhi (ma. ni. aṭṭha. 2.324 ādayo) kokanadoti kokanadaṃ vuccati padumaṃ, so ca maṅgalapāsādo olokanapadumaṃ dassetvā kato, tasmā ‘‘kokanado’’ti saṅkhaṃ labhi. Yāva pacchimasopānakaḷevarāti ettha pacchimasopānakaḷevaranti paṭhamasopānaphalakaṃ vuttaṃ tassa sabbapacchā dussena santhatattā. Uparimasopānaphalakato paṭṭhāya hi sopānaṃ santhataṃ. Addasā khoti olokanatthaṃyeva dvārakoṭṭhake ṭhito addasa.
бхаг̇аваа д̇ун̣хий ахосийд̇и ‘‘гисса ну ко ад̇т̇ааяа рааж̇агумаарзна аяам̣ махаасаггааро гад̇о’’д̇и ааваж̇ж̇знд̇о буд̇д̇абад̇т̇анааяа гад̇абхаавам̣ ан̃н̃ааси. со хи рааж̇абуд̇д̇о абуд̇д̇аго. суд̇ан̃жаанзна ахоси ‘‘б̣уд̣̇д̇хаанам̣ гира ад̇хигаарам̣ гад̇ваа манасаа ижчид̇ам̣ лабханд̇ий’’д̇и. со ‘‘сажаахам̣ буд̇д̇ам̣ лабхиссаами, саммаасамб̣уд̣̇д̇хо имам̣ жзлабадигам̣ аггамиссад̇и. но жз лабхиссаами, на аггамиссад̇ий’’д̇и бад̇т̇анам̣ гад̇ваа сант̇араабзси. ат̇а бхаг̇аваа ‘‘ниб̣б̣ад̇д̇иссад̇и ну ко зд̇асса буд̇д̇о’’д̇и ааваж̇ж̇зд̇ваа ‘‘на ниб̣б̣ад̇д̇иссад̇ий’’д̇и ад̣̇д̣̇аса. буб̣б̣з гира со згасмим̣ д̣̇ийбз васамаано самаанажчанд̣̇зна сагун̣абод̇агз каад̣̇и. сажасса маад̇уг̇аамо бун̃н̃аваа бхавзяяа, буд̇д̇ам̣ лабхзяяа. убхохи бана самаанажчанд̣̇зхи худ̇ваа баабагаммам̣ гад̇ам̣, д̇знасса буд̇д̇о на ниб̣б̣ад̇д̇иссад̇ийд̇и ан̃н̃ааси. д̣̇уссз бана агганд̇з ‘‘б̣уд̣̇д̇хаанам̣ ад̇хигаарам̣ гад̇ваа бад̇т̇ид̇ам̣ лабханд̇ийд̇и логз ануссаво, маяаа жа махааад̇хигааро гад̇о, на жа буд̇д̇ам̣ лабхаами, д̇ужчам̣ ид̣̇ам̣ важана’’нд̇и мижчааг̇ахан̣ам̣ г̇ан̣хзяяа. д̇ид̇т̇ияааби ‘‘над̇т̇и саман̣аанам̣ агад̇д̇аб̣б̣ам̣ наама, жзлабадигам̣ мад̣̇д̣̇анд̇аа аахин̣д̣анд̇ий’’д̇и уж̇жхааязяяум̣. зд̇арахи жа аггаманд̇зсу б̣ахуу бхигкуу баражид̇д̇авид̣̇уно, д̇з бхаб̣б̣ад̇ам̣ ж̇аанид̇ваа аггамиссанд̇и, абхаб̣б̣ад̇ам̣ ж̇аанид̇ваа на аггамиссанд̇и. анааг̇ад̇з бана убаниссаяо манд̣̇о бхависсад̇и, анааг̇ад̇ам̣ на ж̇ааниссанд̇и, д̇зсу аггаманд̇зсу сажз бад̇т̇ид̇ам̣ иж̇жхиссад̇и, ижжзд̇ам̣ гусалам̣. но жз иж̇жхиссад̇и, ‘‘буб̣б̣з бхигкусан̇гхасса ад̇хигаарам̣ гад̇ваа ижчид̇ижчид̇ам̣ лабханд̇и, ид̣̇аани на лабханд̇и, д̇зязва ман̃н̃з бхигкуу бадибад̇д̇ибуурагаа ахзсум̣, имз бана бадибад̇д̇им̣ буурзд̇ум̣ на саггонд̇ий’’д̇и мануссаа виббадисаарино бхависсанд̇ийд̇и имзхи д̇ийхи гааран̣зхи бхаг̇аваа аггамид̇ум̣ анижчанд̇о д̇ун̣хий ахоси. бажчимам̣ ж̇анад̇ам̣ д̇ат̇ааг̇ад̇о анугамбад̇ийд̇и ид̣̇ам̣ бана т̇зро вуд̇д̇зсу гааран̣зсу д̇ад̇ияам̣ гааран̣ам̣ санд̇хааяааха. ман̇г̇алам̣ ижчанд̇ийд̇и ман̇г̇алигаа.
Bhagavā tuṇhī ahosīti ‘‘kissa nu kho atthāya rājakumārena ayaṃ mahāsakkāro kato’’ti āvajjento puttapatthanāya katabhāvaṃ aññāsi. So hi rājaputto aputtako. Sutañcānena ahosi ‘‘buddhānaṃ kira adhikāraṃ katvā manasā icchitaṃ labhantī’’ti. So ‘‘sacāhaṃ puttaṃ labhissāmi, sammāsambuddho imaṃ celapaṭikaṃ akkamissati. No ce labhissāmi, na akkamissatī’’ti patthanaṃ katvā santharāpesi. Atha bhagavā ‘‘nibbattissati nu kho etassa putto’’ti āvajjetvā ‘‘na nibbattissatī’’ti addasa. Pubbe kira so ekasmiṃ dīpe vasamāno samānacchandena sakuṇapotake khādi. Sacassa mātugāmo puññavā bhaveyya, puttaṃ labheyya. Ubhohi pana samānacchandehi hutvā pāpakammaṃ kataṃ, tenassa putto na nibbattissatīti aññāsi. Dusse pana akkante ‘‘buddhānaṃ adhikāraṃ katvā patthitaṃ labhantīti loke anussavo, mayā ca mahāadhikāro kato, na ca puttaṃ labhāmi, tucchaṃ idaṃ vacana’’nti micchāgahaṇaṃ gaṇheyya. Titthiyāpi ‘‘natthi samaṇānaṃ akattabbaṃ nāma, celapaṭikaṃ maddantā āhiṇḍantī’’ti ujjhāyeyyuṃ. Etarahi ca akkamantesu bahū bhikkhū paracittaviduno, te bhabbataṃ jānitvā akkamissanti, abhabbataṃ jānitvā na akkamissanti. Anāgate pana upanissayo mando bhavissati, anāgataṃ na jānissanti, tesu akkamantesu sace patthitaṃ ijjhissati, iccetaṃ kusalaṃ. No ce ijjhissati, ‘‘pubbe bhikkhusaṅghassa adhikāraṃ katvā icchiticchitaṃ labhanti, idāni na labhanti, teyeva maññe bhikkhū paṭipattipūrakā ahesuṃ, ime pana paṭipattiṃ pūretuṃ na sakkontī’’ti manussā vippaṭisārino bhavissantīti imehi tīhi kāraṇehi bhagavā akkamituṃ anicchanto tuṇhī ahosi. Pacchimaṃ janataṃ tathāgato anukampatīti idaṃ pana thero vuttesu kāraṇesu tatiyaṃ kāraṇaṃ sandhāyāha. Maṅgalaṃ icchantīti maṅgalikā.
269. б̣ийж̇анинд̇и жад̇урассаб̣ийж̇аним̣. д̇аалаван̣данд̇и д̇аалабад̇д̇аад̣̇ийхи гад̇ам̣ ман̣д̣алигаб̣ийж̇аним̣.
269.Bījaninti caturassabījaniṃ. Tālavaṇṭanti tālapattādīhi kataṃ maṇḍalikabījaniṃ.
270-275. ‘‘згабан̣н̣ажчад̇д̇ам̣ наама д̇аалабад̇д̇а’’нд̇и г̇ан̣тибад̣̇зсу вуд̇д̇ам̣. гаммасад̇знаад̇и зд̇т̇а сад̇а-сад̣̇д̣̇о анзгабарияааяо, анзгзна гаммзнаад̇и ад̇т̇о, махад̇аа уссаахзнаад̇и вуд̇д̇ам̣ ход̇и. руд̇хийд̇и куд̣̇д̣̇агаван̣ам̣.
270-275.‘‘Ekapaṇṇacchattaṃ nāma tālapatta’’nti gaṇṭhipadesu vuttaṃ. Kammasatenāti ettha sata-saddo anekapariyāyo, anekena kammenāti attho, mahatā ussāhenāti vuttaṃ hoti. Rudhīti khuddakavaṇaṃ.
278. ‘‘агааяаб̣анд̇ханзна сан̃жижжа асан̃жижжа ваа г̇аамаббавзсанз аабад̇д̇и. сарид̇адтаанад̇о б̣анд̇хид̇ваа бависид̇аб̣б̣ам̣ нивад̇д̇ид̇аб̣б̣ам̣ ваа’’д̇и г̇ан̣тибад̣̇зсу вуд̇д̇ам̣. мураж̇аваддисан̣таанам̣ взтзд̇ваа гад̇анд̇и б̣ахуу раж̇ж̇угз згад̇о гад̇ваа наанааван̣н̣зхи суд̇д̇зхи взтзд̇ваа мураж̇аваддисад̣̇исам̣ гад̇ам̣. д̇знзва д̣̇уд̇ияабаарааж̇игаван̣н̣анааяам̣ (баараа. адта. 1.85 баал̣имуд̇д̇агавинижчаяа) вуд̇д̇ам̣ ‘‘б̣ахуу раж̇ж̇угз згад̇о гад̇ваа згзна ниранд̇арам̣ взтзд̇ваа гад̇ам̣ б̣ахураж̇ж̇уганд̇и на вад̇д̇аб̣б̣ам̣, д̇ам̣ ваддад̇ий’’д̇и. д̇ад̇т̇а яам̣ вад̇д̇аб̣б̣ам̣, д̇ам̣ хздтаа вуд̇д̇амзва. муд̣̇д̣̇игагааяаб̣анд̇ханам̣ наама жад̇урассам̣ агад̇ваа саж̇ж̇ид̇ам̣. бааман̇г̇ад̣̇асаа жад̇урассаа. муд̣̇ин̇г̇асан̣таанзнаад̇и варагасийсаагаарзна. баасанд̇од̇и д̣̇асаамуулам̣.
278. ‘‘Akāyabandhanena sañcicca asañcicca vā gāmappavesane āpatti. Saritaṭṭhānato bandhitvā pavisitabbaṃ nivattitabbaṃ vā’’ti gaṇṭhipadesu vuttaṃ. Murajavaṭṭisaṇṭhānaṃ veṭhetvā katanti bahū rajjuke ekato katvā nānāvaṇṇehi suttehi veṭhetvā murajavaṭṭisadisaṃ kataṃ. Teneva dutiyapārājikavaṇṇanāyaṃ (pārā. aṭṭha. 1.85 pāḷimuttakavinicchaya) vuttaṃ ‘‘bahū rajjuke ekato katvā ekena nirantaraṃ veṭhetvā kataṃ bahurajjukanti na vattabbaṃ, taṃ vaṭṭatī’’ti. Tattha yaṃ vattabbaṃ, taṃ heṭṭhā vuttameva. Muddikakāyabandhanaṃ nāma caturassaṃ akatvā sajjitaṃ. Pāmaṅgadasā caturassā. Mudiṅgasaṇṭhānenāti varakasīsākārena. Pāsantoti dasāmūlaṃ.
280-282. мун̣д̣аваддийд̇и маллагаммагараад̣̇аяо. бамаан̣ан̇г̇улзнаад̇и вад̣дхагийан̇г̇улам̣ санд̇хааяа вуд̇д̇ам̣. сзсамзд̇т̇а баал̣ид̇о адтагат̇аад̇о жа сувин̃н̃зяяамзва.
280-282.Muṇḍavaṭṭīti mallakammakarādayo. Pamāṇaṅgulenāti vaḍḍhakīaṅgulaṃ sandhāya vuttaṃ. Sesamettha pāḷito aṭṭhakathāto ca suviññeyyameva.
куд̣̇д̣̇агавад̇т̇угканд̇хагаван̣н̣анаа нидтид̇аа.
Khuddakavatthukkhandhakavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / жуул̣аваг̇г̇абаал̣и • Cūḷavaggapāḷi / куд̣̇д̣̇агавад̇т̇ууни • Khuddakavatthūni
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / жуул̣аваг̇г̇а-адтагат̇аа • Cūḷavagga-aṭṭhakathā / куд̣̇д̣̇агавад̇т̇угат̇аа • Khuddakavatthukathā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / куд̣̇д̣̇агавад̇т̇угат̇ааван̣н̣анаа • Khuddakavatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / куд̣̇д̣̇агавад̇т̇угат̇ааван̣н̣анаа • Khuddakavatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / куд̣̇д̣̇агавад̇т̇угат̇аа • Khuddakavatthukathā
