| Library / Tipiṭaka / திபிடக • Tipiṭaka / வினயவினிச்ச²ய-டீகா • Vinayavinicchaya-ṭīkā |
கு²த்³த³கவத்து²க்க²ந்த⁴ககதா²வண்ணனா
Khuddakavatthukkhandhakakathāvaṇṇanā
2783. குட்டேதி இட்ட²காஸிலாதா³ருகுட்டானங் அஞ்ஞதரஸ்மிங். அட்டானேதி எத்த² அட்டானங் நாம ருக்கே² ப²லகங் விய தச்செ²த்வா அட்ட²பதா³காரேன ராஜியோ சி²ந்தி³த்வா நஹானதித்தே² நிக²ணந்தி, தத்த² சுண்ணானி ஆகிரித்வா மனுஸ்ஸா காயங் க⁴ங்ஸந்தி.
2783.Kuṭṭeti iṭṭhakāsilādārukuṭṭānaṃ aññatarasmiṃ. Aṭṭāneti ettha aṭṭānaṃ nāma rukkhe phalakaṃ viya tacchetvā aṭṭhapadākārena rājiyo chinditvā nahānatitthe nikhaṇanti, tattha cuṇṇāni ākiritvā manussā kāyaṃ ghaṃsanti.
2784. க³ந்த⁴ப்³ப³ஹத்தே²னாதி நஹானதித்தே² ட²பிதேன தா³ருமயஹத்தே²ன. தேன கிர சுண்ணானி க³ஹெத்வா மனுஸ்ஸா ஸரீரங் க⁴ங்ஸந்தி. குருவிந்த³கஸுத்தியாதி குருவிந்த³கபாஸாணசுண்ணானி லாகா²ய ப³ந்தி⁴த்வா கதகு³ளிககலாபகோ வுச்சதி, தங் உபோ⁴ஸு அந்தேஸு க³ஹெத்வா ஸரீரங் க⁴ங்ஸந்தி. மல்லகேனாதி மகரத³ந்தகங் சி²ந்தி³த்வா மல்லகமூலஸண்டா²னேன கதேன மல்லகேன, இத³ங் கி³லானஸ்ஸாபி ந வட்டதி. அஞ்ஞமஞ்ஞஞ்ச காயதோதி அஞ்ஞமஞ்ஞங் ஸரீரேன க⁴ங்ஸெய்ய.
2784.Gandhabbahatthenāti nahānatitthe ṭhapitena dārumayahatthena. Tena kira cuṇṇāni gahetvā manussā sarīraṃ ghaṃsanti. Kuruvindakasuttiyāti kuruvindakapāsāṇacuṇṇāni lākhāya bandhitvā kataguḷikakalāpako vuccati, taṃ ubhosu antesu gahetvā sarīraṃ ghaṃsanti. Mallakenāti makaradantakaṃ chinditvā mallakamūlasaṇṭhānena katena mallakena, idaṃ gilānassāpi na vaṭṭati. Aññamaññañca kāyatoti aññamaññaṃ sarīrena ghaṃseyya.
2785. அகதங் மல்லகங் நாம மகரத³ந்தே அச்சி²ந்தி³த்வா கதங், இத³ங் அகி³லானஸ்ஸ ந வட்டதி.
2785.Akataṃ mallakaṃ nāma makaradante acchinditvā kataṃ, idaṃ agilānassa na vaṭṭati.
2786. கபாலிட்ட²கக²ண்டா³னீதி கபாலக²ண்ட³இட்ட²கக²ண்டா³னி. ஸப்³ப³ஸ்ஸாதி கி³லானாகி³லானஸ்ஸ ஸரீரே க⁴ங்ஸித்வா உப்³ப³ட்டேதுங் வட்டதி. ‘‘புது²பாணிக’’ந்தி ஹத்த²பரிகம்மங் வுச்சதி, தஸ்மா ஸப்³ப³ஸ்ஸ ஹத்தே²ன பிட்டி²பரிகம்மங் காதுங் வட்டதி. ‘‘வத்த²வட்டீ’’தி இத³ங் பாளியங் வுத்தஉக்காஸிகஸ்ஸ பரியாயங், தஸ்மா நஹாயந்தஸ்ஸ யஸ்ஸ கஸ்ஸசி நஹானஸாடகவட்டியாபி க⁴ங்ஸிதுங் வட்டதி.
2786.Kapāliṭṭhakakhaṇḍānīti kapālakhaṇḍaiṭṭhakakhaṇḍāni. Sabbassāti gilānāgilānassa sarīre ghaṃsitvā ubbaṭṭetuṃ vaṭṭati. ‘‘Puthupāṇika’’nti hatthaparikammaṃ vuccati, tasmā sabbassa hatthena piṭṭhiparikammaṃ kātuṃ vaṭṭati. ‘‘Vatthavaṭṭī’’ti idaṃ pāḷiyaṃ vuttaukkāsikassa pariyāyaṃ, tasmā nahāyantassa yassa kassaci nahānasāṭakavaṭṭiyāpi ghaṃsituṃ vaṭṭati.
2787. பே²ணகங் நாம ஸமுத்³த³பே²ணங். கத²லந்தி கபாலக²ண்ட³ங். பாத³க⁴ங்ஸனே வுத்தா அனுஞ்ஞாதா. கதகங் நாம பது³மகண்ணிகாகாரங் பாத³க⁴ங்ஸனத்த²ங் கண்டகே உட்டா²பெத்வா கதங், ஏதங் நேவ படிக்³க³ஹேதுங், ந பரிபு⁴ஞ்ஜிதுங் வட்டதி.
2787.Pheṇakaṃ nāma samuddapheṇaṃ. Kathalanti kapālakhaṇḍaṃ. Pādaghaṃsane vuttā anuññātā. Katakaṃ nāma padumakaṇṇikākāraṃ pādaghaṃsanatthaṃ kaṇṭake uṭṭhāpetvā kataṃ, etaṃ neva paṭiggahetuṃ, na paribhuñjituṃ vaṭṭati.
2788. யங் கிஞ்சிபி அலங்காரந்தி ஹத்தூ²பகா³தி³அலங்காரேஸு யங் கிஞ்சி அலங்காரங்.
2788.Yaṃ kiñcipi alaṅkāranti hatthūpagādialaṅkāresu yaṃ kiñci alaṅkāraṃ.
2789. ஓஸண்டெ²ய்யாதி அலங்காரத்த²ங் ஸங்க²ரொந்தோ நமெய்ய. ஹத்த²ப²ணகேனாதி ஹத்தே²னேவ ப²ணகிச்சங் கரொந்தா அங்கு³லீஹி ஓஸண்டெ²ந்தி. ப²ணகேனாதி த³ந்தமயாதீ³ஸு யேன கேனசி. கொச்சே²னாதி உஸிரமயேன வா முஞ்ஜபப்³ப³ஜமயேன வா கொச்சே²ன.
2789.Osaṇṭheyyāti alaṅkāratthaṃ saṅkharonto nameyya. Hatthaphaṇakenāti hattheneva phaṇakiccaṃ karontā aṅgulīhi osaṇṭhenti. Phaṇakenāti dantamayādīsu yena kenaci. Kocchenāti usiramayena vā muñjapabbajamayena vā kocchena.
2790. ஸித்த²தேலோத³தேலேஹீதி ஸித்த²தேலஞ்ச உத³கதேலஞ்சாதி விக்³க³ஹோ, தேஹி. தத்த² ஸித்த²தேலங் நாம மது⁴ஸித்த²கனிய்யாஸாதி³ யங் கிஞ்சி சிக்கணங். சிக்கணங் நாம நிய்யாஸங். உத³கதேலங் நாம உத³கமிஸ்ஸகங் தேலங். கத்த²சி பொத்த²கேஸு ‘‘ஸிட்டா²’’தி பாடோ², ஸோயேவத்தோ². அனுலோமனிபாதத்த²ந்தி நலாடாபி⁴முக²ங் அனுலோமேன பாதனத்த²ங். உத்³த⁴லோமேனாதி உத்³த⁴க்³க³ங் ஹுத்வா டி²தலோமேன.
2790.Sitthatelodatelehīti sitthatelañca udakatelañcāti viggaho, tehi. Tattha sitthatelaṃ nāma madhusitthakaniyyāsādi yaṃ kiñci cikkaṇaṃ. Cikkaṇaṃ nāma niyyāsaṃ. Udakatelaṃ nāma udakamissakaṃ telaṃ. Katthaci potthakesu ‘‘siṭṭhā’’ti pāṭho, soyevattho. Anulomanipātatthanti nalāṭābhimukhaṃ anulomena pātanatthaṃ. Uddhalomenāti uddhaggaṃ hutvā ṭhitalomena.
2791. ஹத்த²ங் தேலேன தேமெத்வாதி கரதலங் தேலேன மக்கெ²த்வா. ஸிரோருஹா கேஸா. உண்ஹாபி⁴தத்தஸ்ஸாதி உண்ஹாபி⁴தத்தரஜஸிரஸ்ஸ. அல்லஹத்தே²ன ஸிரோருஹே புஞ்சி²துங் வட்டதீதி யோஜனா.
2791.Hatthaṃ telena temetvāti karatalaṃ telena makkhetvā. Siroruhā kesā. Uṇhābhitattassāti uṇhābhitattarajasirassa. Allahatthena siroruhe puñchituṃ vaṭṭatīti yojanā.
2792. ஆதா³ஸே உத³பத்தே வாதி எத்த² கங்ஸபத்தாதீ³னிபி, யேஸு முக²னிமித்தங் பஞ்ஞாயதி, ஸப்³பா³னி ஆதா³ஸஸங்க²மேவ க³ச்ச²ந்தி, கஞ்ஜியாதீ³னிபி ச உத³பத்தஸங்க²மேவ, தஸ்மா யத்த² கத்த²சி ஓலோகெந்தஸ்ஸ து³க்கடங்.
2792.Ādāseudapatte vāti ettha kaṃsapattādīnipi, yesu mukhanimittaṃ paññāyati, sabbāni ādāsasaṅkhameva gacchanti, kañjiyādīnipi ca udapattasaṅkhameva, tasmā yattha katthaci olokentassa dukkaṭaṃ.
2793. யேன ஹேதுனா முக²ங் ஓலோகெந்தஸ்ஸ அனாபத்தி, தங் த³ஸ்ஸேதுமாஹ ‘‘ஸஞ்ச²வி’’ந்திஆதி³. ஆபா³த⁴பச்சயா ‘‘மே முகே² வணோ ஸஞ்ச²வி நு கோ², உதா³ஹு ந ஸஞ்ச²வீ’’தி முக²ங் த³ட்டு²ஞ்ச ‘‘அஹங் ஜிண்ணோ நு கோ², உதா³ஹு நோ’’தி அத்தனோ ஆயுஸங்கா²ரஜானநத்த²ஞ்ச முக²ங் த³ட்டு²ங் வட்டதீதி யோஜனா.
2793. Yena hetunā mukhaṃ olokentassa anāpatti, taṃ dassetumāha ‘‘sañchavi’’ntiādi. Ābādhapaccayā ‘‘me mukhe vaṇo sañchavi nu kho, udāhu na sañchavī’’ti mukhaṃ daṭṭhuñca ‘‘ahaṃ jiṇṇo nu kho, udāhu no’’ti attano āyusaṅkhārajānanatthañca mukhaṃ daṭṭhuṃ vaṭṭatīti yojanā.
2794. நச்சங் வாதி யங் கிஞ்சி நச்சங் அந்தமஸோ மோரனச்சம்பி. கீ³தந்தி யங் கிஞ்சி நடகீ³தங் வா ஸாது⁴கீ³தங் வா அந்தமஸோ த³ந்தகீ³தம்பி, யங் ‘‘கா³யிஸ்ஸாமா’’தி புப்³ப³பா⁴கே³ ஓகூஜந்தா கரொந்தி, ஏதம்பி ந வட்டதி. வாதி³தந்தி யங் கிஞ்சி வாதி³தங். த³ட்டு²ங் வா பன ஸோதுங் வாதி நச்சங் த³ட்டு²ங் வா கீ³தங் வாதி³தங் ஸோதுங் வா.
2794.Naccaṃ vāti yaṃ kiñci naccaṃ antamaso moranaccampi. Gītanti yaṃ kiñci naṭagītaṃ vā sādhugītaṃ vā antamaso dantagītampi, yaṃ ‘‘gāyissāmā’’ti pubbabhāge okūjantā karonti, etampi na vaṭṭati. Vāditanti yaṃ kiñci vāditaṃ. Daṭṭhuṃ vā pana sotuṃ vāti naccaṃ daṭṭhuṃ vā gītaṃ vāditaṃ sotuṃ vā.
2795. ஸயங் நச்சந்தஸ்ஸ வா நச்சாபெந்தஸ்ஸ வா கா³யந்தஸ்ஸ வா கா³யாபெந்தஸ்ஸ வா வாதெ³ந்தஸ்ஸ வா வாதா³பெந்தஸ்ஸ வா து³க்கடமேவ அட்ட²கதா²ய (சூளவ॰ அட்ட²॰ 248) வுத்தந்தி ததே³கதே³ஸங் த³ஸ்ஸேதுமாஹ ‘‘த³ட்டு²மந்தமஸோ’’திஆதி³.
2795. Sayaṃ naccantassa vā naccāpentassa vā gāyantassa vā gāyāpentassa vā vādentassa vā vādāpentassa vā dukkaṭameva aṭṭhakathāya (cūḷava. aṭṭha. 248) vuttanti tadekadesaṃ dassetumāha ‘‘daṭṭhumantamaso’’tiādi.
2796. ஸுணாதீதி கீ³தங் வா வாதி³தங் வா. பஸ்ஸதீதி நச்சங் பஸ்ஸதி.
2796.Suṇātīti gītaṃ vā vāditaṃ vā. Passatīti naccaṃ passati.
2797. பஸ்ஸிஸ்ஸாமீதி எத்த² ‘‘ஸுணிஸ்ஸாமீ’’தி ஸேஸோ. ‘‘நச்சங் பஸ்ஸிஸ்ஸாமி, கீ³தங், வாதி³தங் வா ஸுணிஸ்ஸாமீ’’தி விஹாரதோ விஹாரங் க³ச்ச²தோ வாபி து³க்கடங் ஹோதீதி யோஜனா.
2797.Passissāmīti ettha ‘‘suṇissāmī’’ti seso. ‘‘Naccaṃ passissāmi, gītaṃ, vāditaṃ vā suṇissāmī’’ti vihārato vihāraṃ gacchato vāpi dukkaṭaṃ hotīti yojanā.
2798. உட்ட²ஹித்வான க³ச்ச²தோதி ‘‘நச்சங் பஸ்ஸிஸ்ஸாமீ’’தி, ‘‘கீ³தங், வாதி³தங் வா ஸுணிஸ்ஸாமீ’’தி நிஸின்னட்டா²னதோ உட்ட²ஹித்வா அந்தோவிஹாரேபி தங் தங் தி³ஸங் க³ச்ச²தோ ஆபத்தி ஹோதீதி யோஜனா. வீதி²யங் ட²த்வா கீ³வங் பஸாரெத்வா பஸ்ஸதோபி ச ஆபத்தீதி யோஜனா.
2798.Uṭṭhahitvāna gacchatoti ‘‘naccaṃ passissāmī’’ti, ‘‘gītaṃ, vāditaṃ vā suṇissāmī’’ti nisinnaṭṭhānato uṭṭhahitvā antovihārepi taṃ taṃ disaṃ gacchato āpatti hotīti yojanā. Vīthiyaṃ ṭhatvā gīvaṃ pasāretvā passatopi ca āpattīti yojanā.
2799. தீ³கா⁴தி த்³வங்கு³லதோ தீ³கா⁴. ந தா⁴ரெய்யாதி ந தா⁴ரேதப்³பா³. த்³வங்கு³லங் வா து³மாஸங் வாதி எத்த² த்³வே அங்கு³லானி பரிமாணங் ஏதஸ்ஸாதி த்³வங்கு³லோ, கேஸோ. த்³வே மாஸா உக்கட்ட²பரிச்சே²தோ³ அஸ்ஸாதி து³மாஸோ. கேஸங் தா⁴ரெந்தோ த்³வங்கு³லங் வா தா⁴ரெய்ய து³மாஸங் வா. ததோ உத்³த⁴ங் ந வட்டதீதி ததோ த்³வங்கு³லதோ வா து³மாஸதோ வா கேஸதோ உத்³த⁴ங் கேஸங் தா⁴ரேதுங் ந வட்டதி.
2799.Dīghāti dvaṅgulato dīghā. Na dhāreyyāti na dhāretabbā. Dvaṅgulaṃ vā dumāsaṃ vāti ettha dve aṅgulāni parimāṇaṃ etassāti dvaṅgulo, keso. Dve māsā ukkaṭṭhaparicchedo assāti dumāso. Kesaṃ dhārento dvaṅgulaṃ vā dhāreyya dumāsaṃ vā. Tato uddhaṃ na vaṭṭatīti tato dvaṅgulato vā dumāsato vā kesato uddhaṃ kesaṃ dhāretuṃ na vaṭṭati.
அத² வா த்³வே அங்கு³லானி ஸமாஹடானி த்³வங்கு³லங், த்³வே மாஸா ஸமாஹடா து³மாஸங், உப⁴யத்த² அச்சந்தஸங்யோகே³ உபயோக³வசனங். கேஸே தா⁴ரெந்தோ த்³வங்கு³லமத்தங் வா தா⁴ரெய்ய து³மாஸமத்தங் வா, ததோ காலபரிமாணதோ உத்³த⁴ங் கேஸே தா⁴ரேதுங் ந வட்டதீதி அத்தோ². ஸசே கேஸே அந்தொத்³வேமாஸே த்³வங்கு³லே பாபுணந்தி, அந்தொத்³வேமாஸேயேவ சி²ந்தி³தப்³பா³. த்³வங்கு³லே ஹி அதிக்கமேதுங் ந வட்டதி. ஸசேபி ந தீ³கா⁴, த்³வேமாஸதோ ஏகதி³வஸம்பி அதிக்கமேதுங் ந லப⁴தியேவ. ஏவமயங் உப⁴யேனபி உக்கட்ட²பரிச்சே²தே³னேவ வுத்தோ, ததோ ஓரங் பன நவட்டனபா⁴வோ நாம நத்தி².
Atha vā dve aṅgulāni samāhaṭāni dvaṅgulaṃ, dve māsā samāhaṭā dumāsaṃ, ubhayattha accantasaṃyoge upayogavacanaṃ. Kese dhārento dvaṅgulamattaṃ vā dhāreyya dumāsamattaṃ vā, tato kālaparimāṇato uddhaṃ kese dhāretuṃ na vaṭṭatīti attho. Sace kese antodvemāse dvaṅgule pāpuṇanti, antodvemāseyeva chinditabbā. Dvaṅgule hi atikkametuṃ na vaṭṭati. Sacepi na dīghā, dvemāsato ekadivasampi atikkametuṃ na labhatiyeva. Evamayaṃ ubhayenapi ukkaṭṭhaparicchedeneva vutto, tato oraṃ pana navaṭṭanabhāvo nāma natthi.
2800. தீ³கே⁴ நகே², தீ³கா⁴னி நாஸிகலோமானி ச ந தா⁴ரயேதி யோஜனா, ந தா⁴ரெய்ய, சி²ந்தெ³ய்யாதி அத்தோ². வீஸதிமட்ட²ந்தி வீஸதியா நகா²னங் மட்ட²ங் லிகி²தமட்ட²பா⁴வங் காதுங் பி⁴க்கு²னோ ந வட்டதீதி யோஜனா. ஸத்த²கேன தச்செ²த்வா சுண்ணகேன பமஜ்ஜித்வா ப²லிகமணீனங் விய உஜ்ஜலகரணங் லிகி²தமட்ட²ங் நாம. ‘‘அனுஜானாமி, பி⁴க்க²வே, மலமத்தங் அபகட்³டி⁴து’’ந்தி (சூளவ॰ 274) அனுஞ்ஞாதத்தா முக்³க³ப²லதசாதீ³ஹி நக²மலங் அபனேதுங் வட்டதி.
2800. Dīghe nakhe, dīghāni nāsikalomāni ca na dhārayeti yojanā, na dhāreyya, chindeyyāti attho. Vīsatimaṭṭhanti vīsatiyā nakhānaṃ maṭṭhaṃ likhitamaṭṭhabhāvaṃ kātuṃ bhikkhuno na vaṭṭatīti yojanā. Satthakena tacchetvā cuṇṇakena pamajjitvā phalikamaṇīnaṃ viya ujjalakaraṇaṃ likhitamaṭṭhaṃ nāma. ‘‘Anujānāmi, bhikkhave, malamattaṃ apakaḍḍhitu’’nti (cūḷava. 274) anuññātattā muggaphalatacādīhi nakhamalaṃ apanetuṃ vaṭṭati.
2801. கப்பாபெய்ய விஸுங் மஸ்ஸுந்தி யோ கேஸச்சி²ன்னோ விஸுங் மஸ்ஸுங் கப்பாபெய்ய. தா³டி²கங் ட²பெய்யாதி கேஸே சி²ந்தா³பெத்வா மஸ்ஸுங் அகப்பாபெத்வா விஸுங் ட²பெய்ய. ஸம்பா³தே⁴தி உபகச்ச²கமுத்தகரணஸங்கா²தே ஸம்பா³த⁴ட்டா²னே. லோமங் ஸங்ஹராபெய்யவாதி ஸத்தே²ன வா ஸண்டா³ஸேன வா அஞ்ஞேன யேன கேனசி பரேன சி²ந்தா³பெய்ய, ஸயங் வா சி²ந்தெ³ய்ய. ‘‘அனுஜானாமி, பி⁴க்க²வே, ஆபா³த⁴பச்சயா ஸம்பா³தே⁴ லோமங் ஸங்ஹராபேது’’ந்தி (சூளவ॰ 275) அனுஞ்ஞாதத்தா யதா²வுத்தஸம்பா³தே⁴ க³ண்ட³பிளகவணாதி³கே ஆபா³தே⁴ ஸதி லோமங் ஸங்ஹராபேதுங் வட்டதி.
2801.Kappāpeyyavisuṃ massunti yo kesacchinno visuṃ massuṃ kappāpeyya. Dāṭhikaṃ ṭhapeyyāti kese chindāpetvā massuṃ akappāpetvā visuṃ ṭhapeyya. Sambādheti upakacchakamuttakaraṇasaṅkhāte sambādhaṭṭhāne. Lomaṃ saṃharāpeyyavāti satthena vā saṇḍāsena vā aññena yena kenaci parena chindāpeyya, sayaṃ vā chindeyya. ‘‘Anujānāmi, bhikkhave, ābādhapaccayā sambādhe lomaṃ saṃharāpetu’’nti (cūḷava. 275) anuññātattā yathāvuttasambādhe gaṇḍapiḷakavaṇādike ābādhe sati lomaṃ saṃharāpetuṃ vaṭṭati.
2802. அகி³லானஸ்ஸ சி²ந்த³தோ து³க்கடங் வுத்தங். அஞ்ஞேன வா புக்³க³லேன ததா² கத்தரியா சி²ந்தா³பெந்தஸ்ஸ து³க்கடங் வுத்தந்தி ஸம்ப³ந்தோ⁴.
2802. Agilānassa chindato dukkaṭaṃ vuttaṃ. Aññena vā puggalena tathā kattariyā chindāpentassa dukkaṭaṃ vuttanti sambandho.
2803. ஸேஸங்க³சே²த³னேதி அங்கு³லியாதி³அவஸேஸஸரீராவயவானங் சே²த³னே. அத்தவதே⁴தி அத்துபக்கமேன வா ஆணத்தியா உபக்கமேன வா அத்தனோ ஜீவிதனாஸே.
2803.Sesaṅgachedaneti aṅguliyādiavasesasarīrāvayavānaṃ chedane. Attavadheti attupakkamena vā āṇattiyā upakkamena vā attano jīvitanāse.
2804. அங்க³ந்தி அங்க³ஜாததோ அவஸேஸங் ஸரீராவயவங். அஹிகீடாதி³த³ட்ட²ஸ்ஸ தப்படிகாரவஸேன அங்க³ங் சி²ந்த³தோ ந தோ³ஸோ. தாதி³ஸாபா³த⁴பச்சயா தப்படிகாரவஸேன அங்க³ங் சி²ந்த³தோ ந தோ³ஸோ. லோஹிதங் மோசெந்தஸ்ஸாபி ந தோ³ஸோதி யோஜனா.
2804.Aṅganti aṅgajātato avasesaṃ sarīrāvayavaṃ. Ahikīṭādidaṭṭhassa tappaṭikāravasena aṅgaṃ chindato na doso. Tādisābādhapaccayā tappaṭikāravasena aṅgaṃ chindato na doso. Lohitaṃ mocentassāpi na dosoti yojanā.
2805. அபரிஸ்ஸாவனோ பி⁴க்கு² ஸசே மக்³க³ங் க³ச்ச²தி, து³க்கடங். மக்³கே³ அத்³தா⁴னே தங் பரிஸ்ஸாவனங் யாசமானஸ்ஸ யோ ந த³தா³தி, தஸ்ஸ அத³த³தோ அதெ³ந்தஸ்ஸாபி ததே²வ து³க்கடமேவாதி யோஜனா. யோ பன அத்தனோ ஹத்தே² பரிஸ்ஸாவனே விஜ்ஜமானேபி யாசதி, தஸ்ஸ ந அகாமா தா³தப்³ப³ங்.
2805.Aparissāvano bhikkhu sace maggaṃ gacchati, dukkaṭaṃ. Magge addhāne taṃ parissāvanaṃ yācamānassa yo na dadāti, tassa adadato adentassāpi tatheva dukkaṭamevāti yojanā. Yo pana attano hatthe parissāvane vijjamānepi yācati, tassa na akāmā dātabbaṃ.
2806. ‘‘நக்³கோ³’’தி பத³ங் ‘‘ந பு⁴ஞ்ஜே’’திஆதி³ கிரியாபதே³ஹி பச்சேகங் யோஜேதப்³ப³ங். ந பு⁴ஞ்ஜேதி ப⁴த்தாதி³ங் பு⁴ஞ்ஜிதப்³ப³ங் ந பு⁴ஞ்ஜெய்ய. ந பிவேதி யாகு³ஆதி³ங் பாதப்³ப³ங் ந பிவெய்ய. ந ச கா²தே³தி மூலகா²த³னீயாதி³கங் கா²த³னீயங் ந கா²தெ³ய்ய. ந ஸாயயேதி பா²ணிதாதி³கங் ஸாயிதப்³ப³ஞ்ச ந ஸாயெய்ய ந லிஹெய்ய. ந த³தே³தி அஞ்ஞஸ்ஸ ப⁴த்தாதி³ங் கிஞ்சி ந த³தெ³ய்ய. ந க³ண்ஹெய்யாதி ததா² ஸயங் நக்³கோ³ ஹுத்வா ந படிக்³க³ண்ஹெய்ய. அஞ்ஜஸங் மக்³க³ங்.
2806.‘‘Naggo’’ti padaṃ ‘‘na bhuñje’’tiādi kiriyāpadehi paccekaṃ yojetabbaṃ. Na bhuñjeti bhattādiṃ bhuñjitabbaṃ na bhuñjeyya. Na piveti yāguādiṃ pātabbaṃ na piveyya. Na ca khādeti mūlakhādanīyādikaṃ khādanīyaṃ na khādeyya. Na sāyayeti phāṇitādikaṃ sāyitabbañca na sāyeyya na liheyya. Na dadeti aññassa bhattādiṃ kiñci na dadeyya. Na gaṇheyyāti tathā sayaṃ naggo hutvā na paṭiggaṇheyya. Añjasaṃ maggaṃ.
2807. பரிகம்மங் ந காதப்³ப³ந்தி பிட்டி²பரிகம்மாதி³பரிகம்மங் ந காதப்³ப³ங். காரயேதி ஸயங் நக்³கோ³ ஹுத்வா அஞ்ஞேன பிட்டி²பரிகம்மாதி³பரிகம்மங் ந காராபெய்யாதி அத்தோ².
2807.Parikammaṃ na kātabbanti piṭṭhiparikammādiparikammaṃ na kātabbaṃ. Kārayeti sayaṃ naggo hutvā aññena piṭṭhiparikammādiparikammaṃ na kārāpeyyāti attho.
2808. பிட்டி²கம்மாதி³கே பரிகம்மே ஜந்தாக⁴ராதி³கா திஸ்ஸோ படிச்சா²தீ³ வுத்தா ‘‘அனுஜானாமி, பி⁴க்க²வே, திஸ்ஸோ படிச்சா²தி³யோ ஜந்தாக⁴ரபடிச்சா²தி³ங் உத³கபடிச்சா²தி³ங் வத்த²படிச்சா²தி³’’ந்தி (சூளவ॰ 261) அனுஞ்ஞாதாதி யோஜனா. படிச்சா²தே³தி ஹிரிகோபினந்தி படிச்சா²தி³, ஜந்தாக⁴ரமேவ படிச்சா²தி³ ஜந்தாக⁴ரபடிச்சா²தி³. உத³கமேவ படிச்சா²தி³ உத³கபடிச்சா²தி³. வத்த²மேவ படிச்சா²தி³ வத்த²படிச்சா²தி³. ‘‘ஸப்³ப³த்த² பன வட்டதீ’’தி இமினா இதரபடிச்சா²தி³த்³வயங் பரிகம்மேயேவ வட்டதீதி தீ³பேதி. ஸப்³ப³த்தா²தி போ⁴ஜனாதி³ஸப்³ப³கிச்சேஸு.
2808. Piṭṭhikammādike parikamme jantāgharādikā tisso paṭicchādī vuttā ‘‘anujānāmi, bhikkhave, tisso paṭicchādiyo jantāgharapaṭicchādiṃ udakapaṭicchādiṃ vatthapaṭicchādi’’nti (cūḷava. 261) anuññātāti yojanā. Paṭicchādeti hirikopinanti paṭicchādi, jantāgharameva paṭicchādi jantāgharapaṭicchādi. Udakameva paṭicchādi udakapaṭicchādi. Vatthameva paṭicchādi vatthapaṭicchādi. ‘‘Sabbattha pana vaṭṭatī’’ti iminā itarapaṭicchādidvayaṃ parikammeyeva vaṭṭatīti dīpeti. Sabbatthāti bhojanādisabbakiccesu.
2809. யத்த² கத்த²சி பேளாயந்தி தம்ப³லோஹவட்டலோஹகங்ஸலோஹகாளலோஹஸுவண்ணரஜதாதீ³ஹி கதாய வா தா³ருமயாய வா யாய காயசி பேளாய ஆஸித்தகூபதா⁴னே. பு⁴ஞ்ஜிதுங் ந ச வட்டதீதி பா⁴ஜனங் ட²பெத்வா பு⁴ஞ்ஜிதுங் ந வட்டதி. யதா²ஹ – ‘‘ஆஸித்தகூபதா⁴னங் நாம தம்ப³லோஹேன வா ரஜதேன வா கதாய பேளாய ஏதங் அதி⁴வசனங், ‘ந பி⁴க்க²வே ஆஸித்தகூபதா⁴னே பு⁴ஞ்ஜிதப்³ப³’ந்தி ஸாமஞ்ஞேன படிக்கி²த்தத்தா பன தா³ருமயாபி ந வட்டதீ’’தி (சூளவ॰ அட்ட²॰ 264). ‘‘அனுஜானாமி பி⁴க்க²வே மளோரிக’’ந்தி (சூளவ॰ 264) அனுஞ்ஞாதத்தா மளோரிகாய ட²பெத்வா பு⁴ஞ்ஜிதுங் வட்டதி. ‘‘மளோரிகா’’தி ச த³ண்டா³தா⁴ரகோ வுச்சதி, யங் தயோ, சத்தாரோ, ப³ஹூ வா த³ண்ட³கே உபரி ச ஹெட்டா² ச வித்த²தங் மஜ்ஜே² ஸங்குசிதங் கத்வா ப³ந்தி⁴த்வா ஆதா⁴ரகங் கரொந்தி. யட்டி²ஆதா⁴ரகபண்ணாதா⁴ரகபச்சி²கபிட்ட²க⁴டககவாடகாதி³பா⁴ஜனமுக²உது³க்க²லாதீ³னிபி எத்தே²வ ஸங்க³ஹங் க³ச்ச²ந்தி. யட்டி²ஆதா⁴ரகோதி யட்டி²ங்யேவ உஜுகங் ட²பெத்வா ப³ந்தீ⁴கதஆதா⁴ரகோ.
2809.Yattha katthaci peḷāyanti tambalohavaṭṭalohakaṃsalohakāḷalohasuvaṇṇarajatādīhi katāya vā dārumayāya vā yāya kāyaci peḷāya āsittakūpadhāne. Bhuñjituṃ na ca vaṭṭatīti bhājanaṃ ṭhapetvā bhuñjituṃ na vaṭṭati. Yathāha – ‘‘āsittakūpadhānaṃ nāma tambalohena vā rajatena vā katāya peḷāya etaṃ adhivacanaṃ, ‘na bhikkhave āsittakūpadhāne bhuñjitabba’nti sāmaññena paṭikkhittattā pana dārumayāpi na vaṭṭatī’’ti (cūḷava. aṭṭha. 264). ‘‘Anujānāmi bhikkhave maḷorika’’nti (cūḷava. 264) anuññātattā maḷorikāya ṭhapetvā bhuñjituṃ vaṭṭati. ‘‘Maḷorikā’’ti ca daṇḍādhārako vuccati, yaṃ tayo, cattāro, bahū vā daṇḍake upari ca heṭṭhā ca vitthataṃ majjhe saṅkucitaṃ katvā bandhitvā ādhārakaṃ karonti. Yaṭṭhiādhārakapaṇṇādhārakapacchikapiṭṭhaghaṭakakavāṭakādibhājanamukhaudukkhalādīnipi ettheva saṅgahaṃ gacchanti. Yaṭṭhiādhārakoti yaṭṭhiṃyeva ujukaṃ ṭhapetvā bandhīkataādhārako.
ஏகபா⁴ஜனே விஸுங் விஸுங் போ⁴ஜனஸ்ஸாபி ஸம்ப⁴வதோ ‘‘பு⁴ஞ்ஜதோ ஏகபா⁴ஜனே’’தி எத்தகேயேவ வுத்தே தஸ்ஸாபி பஸங்கோ³ ஸியாதி தன்னிவத்தனத்த²மாஹ ‘‘ஏகதோ’’தி. ‘‘பு⁴ஞ்ஜதோ’’தி இத³ங் உபலக்க²ணங். ஏகதோ ஏகபா⁴ஜனே யாகு³ஆதி³பானம்பி ந வட்டதி. யதா²ஹ – ‘‘ந, பி⁴க்க²வே, ஏகதா²லகே பாதப்³ப³’’ந்தி (சூளவ॰ 264). அத² வா பு⁴ஞ்ஜதோதி அஜ்ஜோ²ஹாரஸாமஞ்ஞேன பானம்பி ஸங்க³ஹிதந்தி வேதி³தப்³ப³ங். அயமெத்த² வினிச்ச²யோ – ஸசே ஏகோ பி⁴க்கு² பா⁴ஜனதோ ப²லங் வா பூவங் வா க³ஹெத்வா க³ச்ச²தி, தஸ்மிங் அபக³தே இதரஸ்ஸ ஸேஸகங் பு⁴ஞ்ஜிதுங் வட்டதி. இதரஸ்ஸாபி தஸ்மிங் க²ணே புன க³ஹேதுங் வட்டதீதி.
Ekabhājane visuṃ visuṃ bhojanassāpi sambhavato ‘‘bhuñjato ekabhājane’’ti ettakeyeva vutte tassāpi pasaṅgo siyāti tannivattanatthamāha ‘‘ekato’’ti. ‘‘Bhuñjato’’ti idaṃ upalakkhaṇaṃ. Ekato ekabhājane yāguādipānampi na vaṭṭati. Yathāha – ‘‘na, bhikkhave, ekathālake pātabba’’nti (cūḷava. 264). Atha vā bhuñjatoti ajjhohārasāmaññena pānampi saṅgahitanti veditabbaṃ. Ayamettha vinicchayo – sace eko bhikkhu bhājanato phalaṃ vā pūvaṃ vā gahetvā gacchati, tasmiṃ apagate itarassa sesakaṃ bhuñjituṃ vaṭṭati. Itarassāpi tasmiṃ khaṇe puna gahetuṃ vaṭṭatīti.
2810. யே த்³வே வா தயோ வா பி⁴க்கூ² ஏகபாவுரணா வா ஏகத்த²ரணா வா ஏகத்த²ரணபாவுரணா வா நிபஜ்ஜந்தி, தேஸஞ்ச, யே ஏகமஞ்சேபி ஏகதோ நிபஜ்ஜந்தி, தேஸஞ்ச ஆபத்தி து³க்கடங் ஹோதீதி யோஜனா.
2810. Ye dve vā tayo vā bhikkhū ekapāvuraṇā vā ekattharaṇā vā ekattharaṇapāvuraṇā vā nipajjanti, tesañca, ye ekamañcepi ekato nipajjanti, tesañca āpatti dukkaṭaṃ hotīti yojanā.
2811. ஸங்கா⁴டிபல்லத்தி²கமுபாக³தோதி எத்த² ஸங்கா⁴டீதி ஸங்கா⁴டினாமேன அதி⁴ட்டி²தசீவரமாஹ. ஸங்கா⁴டிபல்லத்தி²கங் உபக³தேன யுத்தோ ஹுத்வாதி அத்தோ². ந நிஸீதெ³ய்யாதி விஹாரே வா அந்தரக⁴ரே வா யத்த² கத்த²சி ந நிஸீதெ³ய்ய. ‘‘ஸங்கா⁴டீதி நாமேன அதி⁴ட்டி²தசீவரவோஹாரப்பத்தமதி⁴ட்டி²தசீவரங் ‘ஸங்கா⁴டீ’தி வுத்த’’ந்தி நிஸ்ஸந்தே³ஹே, கு²த்³த³ஸிக்கா²வண்ணனாயம்பி ‘‘ஸங்கா⁴டியா ந பல்லத்தே²தி அதி⁴ட்டி²தசீவரேன விஹாரே வா அந்தரக⁴ரே வா பல்லத்தி²கோ ந காதப்³போ³’’தி வுத்தங். அட்ட²கதா²யங் பன ‘‘அந்தோகா³மே வாஸத்தா²ய உபக³தேன அதி⁴ட்டி²தங் ஸங்கா⁴டிங் வினா ஸேஸசீவரேஹி பல்லத்தி²காய நிஸீதி³துங் வட்டதீ’’தி வுத்தங்.
2811.Saṅghāṭipallatthikamupāgatoti ettha saṅghāṭīti saṅghāṭināmena adhiṭṭhitacīvaramāha. Saṅghāṭipallatthikaṃ upagatena yutto hutvāti attho. Na nisīdeyyāti vihāre vā antaraghare vā yattha katthaci na nisīdeyya. ‘‘Saṅghāṭīti nāmena adhiṭṭhitacīvaravohārappattamadhiṭṭhitacīvaraṃ ‘saṅghāṭī’ti vutta’’nti nissandehe, khuddasikkhāvaṇṇanāyampi ‘‘saṅghāṭiyā na pallattheti adhiṭṭhitacīvarena vihāre vā antaraghare vā pallatthiko na kātabbo’’ti vuttaṃ. Aṭṭhakathāyaṃ pana ‘‘antogāme vāsatthāya upagatena adhiṭṭhitaṃ saṅghāṭiṃ vinā sesacīvarehi pallatthikāya nisīdituṃ vaṭṭatī’’ti vuttaṃ.
கிஞ்சி கீளங் ந கீளெய்யாதி ஜுதகீளாதி³கங் யங் கிஞ்சி காயிகவாசஸிககீளிகங் ந கீளெய்ய. ந ச கா³ஹயேதி ந ச கா³ஹாபெய்ய, ந ஹராபெய்யாதி அத்தோ².
Kiñcikīḷaṃ na kīḷeyyāti jutakīḷādikaṃ yaṃ kiñci kāyikavācasikakīḷikaṃ na kīḷeyya. Na ca gāhayeti na ca gāhāpeyya, na harāpeyyāti attho.
2812. தா³டி²காயபீதி மஸ்ஸும்ஹி. உக்³க³தந்தி எத்த² ‘‘பீ³ப⁴ச்ச²’’ந்தி ஸேஸோ. அஞ்ஞந்தி அபலிதங். தாதி³ஸந்தி பீ³ப⁴ச்ச²ங்.
2812.Dāṭhikāyapīti massumhi. Uggatanti ettha ‘‘bībhaccha’’nti seso. Aññanti apalitaṃ. Tādisanti bībhacchaṃ.
2813. ‘‘அகி³லானோ’’தி இமினா கி³லானஸ்ஸ அனாபத்திபா⁴வங் தீ³பேதி. ‘‘தா⁴ரெய்யா’’தி இமினா ஸுத்³த⁴கத்துனித்³தே³ஸேன அகி³லானஸ்ஸபி பரங் தா⁴ராபனே, பரஸ்ஸ தா⁴ரணஸாதி³யனே ச அனாபத்தீதி விஞ்ஞாயதீதி. அத்தனோ கு³த்தத்த²ங், சீவராதீ³னங் கு³த்தத்த²ஞ்ச வட்டதீதி யோஜனா. தத்ராயங் வினிச்ச²யோ (சூளவ॰ அட்ட²॰ 270) – யஸ்ஸ காயதா³ஹோ வா பித்தகோபோ வா ஹோதி, சக்கு² வா து³ப்³ப³லங், அஞ்ஞோ வா கோசி ஆபா³தோ⁴ வினா ச²த்தேன உப்பஜ்ஜதி, தஸ்ஸ கா³மே வா அரஞ்ஞே வா ச²த்தங் வட்டதி. வாளமிக³சோரப⁴யேஸு அத்தகு³த்தத்த²ங், வஸ்ஸே பன சீவரகு³த்தத்த²ம்பி வட்டதி. ஏகபண்ணச்ச²த்தங் பன ஸப்³ப³த்தே²வ வட்டதி. ‘‘ஏகபண்ணச்ச²த்தங் நாம தாலபத்த’’ந்தி க³ண்டி²பதே³ஸு வுத்தந்தி.
2813.‘‘Agilāno’’ti iminā gilānassa anāpattibhāvaṃ dīpeti. ‘‘Dhāreyyā’’ti iminā suddhakattuniddesena agilānassapi paraṃ dhārāpane, parassa dhāraṇasādiyane ca anāpattīti viññāyatīti. Attano guttatthaṃ, cīvarādīnaṃ guttatthañca vaṭṭatīti yojanā. Tatrāyaṃ vinicchayo (cūḷava. aṭṭha. 270) – yassa kāyadāho vā pittakopo vā hoti, cakkhu vā dubbalaṃ, añño vā koci ābādho vinā chattena uppajjati, tassa gāme vā araññe vā chattaṃ vaṭṭati. Vāḷamigacorabhayesu attaguttatthaṃ, vasse pana cīvaraguttatthampi vaṭṭati. Ekapaṇṇacchattaṃ pana sabbattheva vaṭṭati. ‘‘Ekapaṇṇacchattaṃ nāma tālapatta’’nti gaṇṭhipadesu vuttanti.
2814. ஹத்தி²ஸொண்டா³காரோ அபே⁴தோ³பசாரேன ‘‘ஹத்தி²ஸொண்ட³’’ந்தி வுத்தோ. ஏவமுபரிபி. சீவரஸ்ஸ நாமதெ⁴ய்யங் ‘‘வஸன’’ந்தி இத³ங். ‘‘நிவாஸெந்தஸ்ஸ து³க்கட’’ந்தி பத³த்³வயஞ்ச ‘‘ஹத்தி²ஸொண்ட³’’ந்திஆதீ³ஹி ஸப்³ப³பதே³ஹி பச்சேகங் யோஜேதப்³ப³ங். வேல்லியந்தி எத்த² கா³தா²ப³ந்த⁴வஸேன ஸங்-ஸத்³த³லோபோ, ஸங்வேல்லியந்தி அத்தோ².
2814. Hatthisoṇḍākāro abhedopacārena ‘‘hatthisoṇḍa’’nti vutto. Evamuparipi. Cīvarassa nāmadheyyaṃ ‘‘vasana’’nti idaṃ. ‘‘Nivāsentassa dukkaṭa’’nti padadvayañca ‘‘hatthisoṇḍa’’ntiādīhi sabbapadehi paccekaṃ yojetabbaṃ. Velliyanti ettha gāthābandhavasena saṃ-saddalopo, saṃvelliyanti attho.
எத்த² ஹத்தி²ஸொண்ட³ங் (சூளவ॰ அட்ட²॰ 280) நாம நாபி⁴மூலதோ ஹத்தி²ஸொண்ட³ஸண்டா²னங் ஓலம்ப³கங் கத்வா நிவத்த²ங் சோளிகித்தீ²னங் நிவாஸனங் விய. சதுக்கண்ணங் நாம உபரிதோ த்³வே, ஹெட்ட²தோ த்³வேதி ஏவங் சத்தாரோ கண்ணே த³ஸ்ஸெத்வா நிவத்த²ங். மச்ச²வாளகங் நாம ஏகதோ த³ஸந்தங் ஏகதோ பாஸந்தங் ஓலம்பெ³த்வா நிவத்த²ங். ஸங்வேல்லியந்தி மல்லகம்மகாராத³யோ விய கச்ச²ங் ப³ந்தி⁴த்வா நிவாஸனங். தாலவண்டகங் நாம தாலவண்டாகாரேன ஸாடகங் ஓலம்பெ³த்வா நிவாஸனங். ச-ஸத்³தே³ன ஸதவலிகங் ஸங்க³ண்ஹாதி. ஸதவலிகங் நாம தீ³க⁴ஸாடகங் அனேகக்க²த்துங் ஓப⁴ஞ்ஜித்வா ஓவட்டிகங் கரொந்தேன நிவத்த²ங், வாமத³க்கி²ணபஸ்ஸேஸு வா நிரந்தரங் வலியோ த³ஸ்ஸெத்வா நிவத்த²ங். ஸசே பன ஜாணுதோ பட்டா²ய ஏகா வா த்³வே வா வலியோ பஞ்ஞாயந்தி, வட்டதி. ஏவங் நிவாஸேதுங் கி³லானஸ்ஸபி மக்³க³படிபன்னஸ்ஸபி ந வட்டதி.
Ettha hatthisoṇḍaṃ (cūḷava. aṭṭha. 280) nāma nābhimūlato hatthisoṇḍasaṇṭhānaṃ olambakaṃ katvā nivatthaṃ coḷikitthīnaṃ nivāsanaṃ viya. Catukkaṇṇaṃ nāma uparito dve, heṭṭhato dveti evaṃ cattāro kaṇṇe dassetvā nivatthaṃ. Macchavāḷakaṃ nāma ekato dasantaṃ ekato pāsantaṃ olambetvā nivatthaṃ. Saṃvelliyanti mallakammakārādayo viya kacchaṃ bandhitvā nivāsanaṃ. Tālavaṇṭakaṃ nāma tālavaṇṭākārena sāṭakaṃ olambetvā nivāsanaṃ. Ca-saddena satavalikaṃ saṅgaṇhāti. Satavalikaṃ nāma dīghasāṭakaṃ anekakkhattuṃ obhañjitvā ovaṭṭikaṃ karontena nivatthaṃ, vāmadakkhiṇapassesu vā nirantaraṃ valiyo dassetvā nivatthaṃ. Sace pana jāṇuto paṭṭhāya ekā vā dve vā valiyo paññāyanti, vaṭṭati. Evaṃ nivāsetuṃ gilānassapi maggapaṭipannassapi na vaṭṭati.
யம்பி மக்³க³ங் க³ச்ச²ந்தா ஏகங் வா த்³வே வா கோணே உக்கி²பித்வா அந்தரவாஸகஸ்ஸ உபரி லக்³கெ³ந்தி, அந்தோ வா ஏகங் காஸாவங் ததா² நிவாஸெத்வா ப³ஹி அபரங் நிவாஸெந்தி, ஸப்³ப³ங் ந வட்டதி. கி³லானோ பன அந்தோகாஸாவஸ்ஸ ஓவட்டிகங் த³ஸ்ஸெத்வா அபரங் உபரி நிவாஸேதுங் லப⁴தி. அகி³லானேன த்³வே நிவாஸெந்தேன ஸகு³ணங் கத்வா நிவாஸேதப்³பா³னி. இதி யஞ்ச இத⁴ படிக்கி²த்தங், யஞ்ச ஸேகி²யவண்ணனாயங், தங் ஸப்³ப³ங் வஜ்ஜெத்வா நிப்³பி³காரங் திமண்ட³லங் படிச்சா²தெ³ந்தேன பரிமண்ட³லங் நிவாஸேதப்³ப³ங். யங் கிஞ்சி விகாரங் கரொந்தோ து³க்கடா ந முச்சதி.
Yampi maggaṃ gacchantā ekaṃ vā dve vā koṇe ukkhipitvā antaravāsakassa upari laggenti, anto vā ekaṃ kāsāvaṃ tathā nivāsetvā bahi aparaṃ nivāsenti, sabbaṃ na vaṭṭati. Gilāno pana antokāsāvassa ovaṭṭikaṃ dassetvā aparaṃ upari nivāsetuṃ labhati. Agilānena dve nivāsentena saguṇaṃ katvā nivāsetabbāni. Iti yañca idha paṭikkhittaṃ, yañca sekhiyavaṇṇanāyaṃ, taṃ sabbaṃ vajjetvā nibbikāraṃ timaṇḍalaṃ paṭicchādentena parimaṇḍalaṃ nivāsetabbaṃ. Yaṃ kiñci vikāraṃ karonto dukkaṭā na muccati.
2815. கி³ஹிபாருபனந்தி ‘‘ஸேதபடபாருதங் (சூளவ॰ அட்ட²॰ 280) பரிப்³பா³ஜகபாருதங் ஏகஸாடகபாருதங் ஸொண்ட³பாருதங் அந்தேபுரிகபாருதங் மஹாஜெட்ட²கபாருதங் குடிபவேஸகபாருதங் ப்³ராஹ்மணபாருதங் பாளிகாரகபாருத’’ந்தி ஏவமாதி³பரிமண்ட³லலக்க²ணதோ அஞ்ஞதா² பாருதங், ஸப்³ப³மேதங் கி³ஹிபாருதங் நாம. தஸ்மா யதா² ஸேதபடா அட்³ட⁴பாலகனிக³ண்டா² பாருபந்தி, யதா² ச ஏகச்சே பரிப்³பா³ஜகா உரங் விவரித்வா த்³வீஸு அங்ஸகூடேஸு பாவுரணங் ட²பெந்தி, யதா² ச ஏகஸாடகா மனுஸ்ஸா நிவத்த²ஸாடகஸ்ஸ ஏகேனந்தேன பிட்டி²ங் பாருபித்வா உபோ⁴ கண்ணே உபோ⁴ஸு அங்ஸகூடேஸு ட²பெந்தி, யதா² ச ஸுராஸொண்டா³த³யோ ஸாடகேன கீ³வங் பரிக்கி²பந்தா உபோ⁴ அந்தே உத³ரே வா ஓலம்பெ³ந்தி, பிட்டி²யங் வா கி²பந்தி, யதா² ச அந்தேபுரிகாயோ அக்கி²தாரகமத்தங் த³ஸ்ஸெத்வா ஓகு³ண்டி²கங் பாருபந்தி, யதா² ச மஹாஜெட்டா² தீ³க⁴ஸாடகங் நிவாஸெத்வா தஸ்ஸேவ ஏகேனந்தேன ஸகலஸரீரங் பாருபந்தி, யதா² ச கஸ்ஸகா கெ²த்தகுடிங் பவிஸந்தா ஸாடகங் பலிவேடெ²த்வா உபகச்ச²கே பக்கி²பித்வா தஸ்ஸேவ ஏகேனந்தேன ஸரீரங் பாருபந்தி, யதா² ச ப்³ராஹ்மணா உபி⁴ன்னங் உபகச்ச²கானங் அந்தரேன ஸாடகங் பவேஸெத்வா அங்ஸகூடேஸு பக்கி²பந்தி, யதா² ச பாளிகாரகோ பி⁴க்கு² ஏகங்ஸபாருபனேன பாருதங் வாமபா³ஹங் விவரித்வா சீவரங் அங்ஸகூடங் ஆரோபேதி, ஏவங் அபாருபித்வா ஸப்³பே³பி ஏதே, அஞ்ஞே ச ஏவரூபே பாருபனதோ³ஸே வஜ்ஜெத்வா நிப்³பி³காரங் பரிமண்ட³லங் பாருபிதப்³ப³ங். ததா² அபாருபித்வா ஆராமே வா அந்தரக⁴ரே வா அனாத³ரேன யங் கிஞ்சி விகாரங் கரொந்தஸ்ஸ து³க்கடங். பரிமண்ட³லதோ விமுத்தலக்க²ணனிவாஸனபாருபனதோ³ஸே வஜ்ஜெத்வா பரிமண்ட³லபா⁴வோயேவ வுத்தலக்க²ணோ அதி⁴ப்பேதோதி அத்தோ².
2815.Gihipārupananti ‘‘setapaṭapārutaṃ (cūḷava. aṭṭha. 280) paribbājakapārutaṃ ekasāṭakapārutaṃ soṇḍapārutaṃ antepurikapārutaṃ mahājeṭṭhakapārutaṃ kuṭipavesakapārutaṃ brāhmaṇapārutaṃ pāḷikārakapāruta’’nti evamādiparimaṇḍalalakkhaṇato aññathā pārutaṃ, sabbametaṃ gihipārutaṃ nāma. Tasmā yathā setapaṭā aḍḍhapālakanigaṇṭhā pārupanti, yathā ca ekacce paribbājakā uraṃ vivaritvā dvīsu aṃsakūṭesu pāvuraṇaṃ ṭhapenti, yathā ca ekasāṭakā manussā nivatthasāṭakassa ekenantena piṭṭhiṃ pārupitvā ubho kaṇṇe ubhosu aṃsakūṭesu ṭhapenti, yathā ca surāsoṇḍādayo sāṭakena gīvaṃ parikkhipantā ubho ante udare vā olambenti, piṭṭhiyaṃ vā khipanti, yathā ca antepurikāyo akkhitārakamattaṃ dassetvā oguṇṭhikaṃ pārupanti, yathā ca mahājeṭṭhā dīghasāṭakaṃ nivāsetvā tasseva ekenantena sakalasarīraṃ pārupanti, yathā ca kassakā khettakuṭiṃ pavisantā sāṭakaṃ paliveṭhetvā upakacchake pakkhipitvā tasseva ekenantena sarīraṃ pārupanti, yathā ca brāhmaṇā ubhinnaṃ upakacchakānaṃ antarena sāṭakaṃ pavesetvā aṃsakūṭesu pakkhipanti, yathā ca pāḷikārako bhikkhu ekaṃsapārupanena pārutaṃ vāmabāhaṃ vivaritvā cīvaraṃ aṃsakūṭaṃ āropeti, evaṃ apārupitvā sabbepi ete, aññe ca evarūpe pārupanadose vajjetvā nibbikāraṃ parimaṇḍalaṃ pārupitabbaṃ. Tathā apārupitvā ārāme vā antaraghare vā anādarena yaṃ kiñci vikāraṃ karontassa dukkaṭaṃ. Parimaṇḍalato vimuttalakkhaṇanivāsanapārupanadose vajjetvā parimaṇḍalabhāvoyeva vuttalakkhaṇo adhippetoti attho.
2816. லோகாயதங் ந வாசெய்யாதி ‘‘ஸப்³ப³ங் உச்சி²ட்ட²ங், ஸப்³ப³ங் அனுச்சி²ட்ட²ங், ஸேதோ காகோ, காளோ ப³கோ இமினா ச இமினா ச காரணேனா’’தி ஏவமாதி³னிரத்த²ககாரணபடிஸங்யுத்தங் தித்தி²யஸத்த²ங் அஞ்ஞேஸங் ந வாசெய்ய. ந ச தங் பரியாபுணேதி தங் லோகாயதங் ந ச பரியாபுணெய்ய ந உக்³க³ண்ஹெய்ய. திரச்சா²னவிஜ்ஜாதி ஹத்தி²ஸிப்பஅஸ்ஸஸிப்பத⁴னுஸிப்பாதி³கா பரோபகா⁴தகரா விஜ்ஜா ச. பி⁴க்கு²னா ந பரியாபுணிதப்³பா³, ந வாசேதப்³பா³தி யோஜனா.
2816.Lokāyataṃ na vāceyyāti ‘‘sabbaṃ ucchiṭṭhaṃ, sabbaṃ anucchiṭṭhaṃ, seto kāko, kāḷo bako iminā ca iminā ca kāraṇenā’’ti evamādiniratthakakāraṇapaṭisaṃyuttaṃ titthiyasatthaṃ aññesaṃ na vāceyya. Na ca taṃ pariyāpuṇeti taṃ lokāyataṃ na ca pariyāpuṇeyya na uggaṇheyya. Tiracchānavijjāti hatthisippaassasippadhanusippādikā paropaghātakarā vijjā ca. Bhikkhunā na pariyāpuṇitabbā, na vācetabbāti yojanā.
2817. ஸப்³பா³சாமரிபீ³ஜனீதி ஸேதாதி³வண்ணேஹி ஸப்³பே³ஹி சமரவாலேஹி கதா பீ³ஜனீ. ந சாலிம்பெய்ய தா³யங் வாதி த³வடா³ஹாதி³உபத்³த³வனிவாரணாய அனுஞ்ஞாதங் படக்³கி³தா³னகாரணங் வினா அரஞ்ஞங் அக்³கி³னா ந ஆலிம்பெய்ய. த³வடா³ஹே பன ஆக³ச்ச²ந்தே அனுபஸம்பன்னே அஸதி படக்³கி³ங் தா³துங், அப்பஹரிதகரணேன வா பரிகா²க²ணனேன வா பரித்தாணங் காதுங், ஸேனாஸனங் பத்தங் வா அப்பத்தங் வா அக்³கி³ங் அல்லஸாக²ங் ப⁴ஞ்ஜித்வா நிப்³பா³பேதுஞ்ச லப⁴தி. உத³கேன பன கப்பியேனேவ லப⁴தி, நேதரேன. அனுபஸம்பன்னே பன ஸதி தேனேவ கப்பியவோஹாரேன காராபேதப்³ப³ங். முக²ங் ந ச லஞ்ஜேதி மனோஸிலாதி³னா முக²ங் ந லிம்பெய்ய, திலகேன அங்க³ங் ந கரெய்யாதி அத்தோ².
2817.Sabbācāmaribījanīti setādivaṇṇehi sabbehi camaravālehi katā bījanī. Na cālimpeyya dāyaṃ vāti davaḍāhādiupaddavanivāraṇāya anuññātaṃ paṭaggidānakāraṇaṃ vinā araññaṃ agginā na ālimpeyya. Davaḍāhe pana āgacchante anupasampanne asati paṭaggiṃ dātuṃ, appaharitakaraṇena vā parikhākhaṇanena vā parittāṇaṃ kātuṃ, senāsanaṃ pattaṃ vā appattaṃ vā aggiṃ allasākhaṃ bhañjitvā nibbāpetuñca labhati. Udakena pana kappiyeneva labhati, netarena. Anupasampanne pana sati teneva kappiyavohārena kārāpetabbaṃ. Mukhaṃ na ca lañjeti manosilādinā mukhaṃ na limpeyya, tilakena aṅgaṃ na kareyyāti attho.
2818. உப⁴தோகாஜந்தி உப⁴தோகோடியா பா⁴ரவஹனகோடிகாஜங். அந்தரகாஜகந்தி உப⁴யகோடியா டி²தவாஹகேஹி வஹிதப்³ப³ங் மஜ்ஜே²பா⁴ரயுத்தகாஜங். ஸீஸக்க²ந்த⁴கடிபா⁴ராத³யோ ஹெட்டா² வுத்தலக்க²ணாவ.
2818.Ubhatokājanti ubhatokoṭiyā bhāravahanakoṭikājaṃ. Antarakājakanti ubhayakoṭiyā ṭhitavāhakehi vahitabbaṃ majjhebhārayuttakājaṃ. Sīsakkhandhakaṭibhārādayo heṭṭhā vuttalakkhaṇāva.
2819. யோ பி⁴க்கு² வட்³ட⁴கிஅங்கு³லேன அட்ட²ங்கு³லாதி⁴கங் வா தேனேவ அங்கு³லேன சதுரங்கு³லபச்சி²மங் வா த³ந்தகட்ட²ங் கா²த³தி, ஏவங் கா²த³தோ தஸ்ஸ ஆபத்தி து³க்கடங் ஹோதீதி யோஜனா.
2819. Yo bhikkhu vaḍḍhakiaṅgulena aṭṭhaṅgulādhikaṃ vā teneva aṅgulena caturaṅgulapacchimaṃ vā dantakaṭṭhaṃ khādati, evaṃ khādato tassa āpatti dukkaṭaṃ hotīti yojanā.
2820. கிச்சே ஸதிபீதி ஸுக்க²கட்டா²தி³க்³க³ஹணகிச்சே பன ஸதி. போரிஸந்தி புரிஸப்பமாணங், ப்³யாமமத்தந்தி வுத்தங் ஹோதி. ஆபதா³ஸூதி வாளமிகா³த³யோ வா தி³ஸ்வா மக்³க³மூள்ஹோ வா தி³ஸா ஓலோகேதுகாமோ ஹுத்வா த³வடா³ஹங் வா உத³கோக⁴ங் வா ஆக³ச்ச²ந்தங் தி³ஸ்வா வா ஏவரூபாஸு ஆபதா³ஸு. வட்டதேவாபி⁴ரூஹிதுந்தி அதிஉச்சம்பி ருக்க²ங் ஆரோஹிதுங் வட்டதி ஏவ.
2820.Kicce satipīti sukkhakaṭṭhādiggahaṇakicce pana sati. Porisanti purisappamāṇaṃ, byāmamattanti vuttaṃ hoti. Āpadāsūti vāḷamigādayo vā disvā maggamūḷho vā disā oloketukāmo hutvā davaḍāhaṃ vā udakoghaṃ vā āgacchantaṃ disvā vā evarūpāsu āpadāsu. Vaṭṭatevābhirūhitunti atiuccampi rukkhaṃ ārohituṃ vaṭṭati eva.
2821. ஸசே அகல்லகோ கி³லானோ ந ஸியா, லஸுணங் மாக³த⁴ங் ஆமகங் ப⁴ண்டி³கலஸுணங் ந ச கா²தெ³ய்ய நேவ பரிபு⁴ஞ்ஜெய்யாதி யோஜனா. ப⁴ண்டி³கலஸுணங் நாம சதுமிஞ்ஜதோ பட்டா²ய ப³ஹுமிஞ்ஜங். பலண்டு³கப⁴ஞ்ஜனகாதி³லஸுணே மக³தே⁴ஸு ஜாதத்தேபி ந தோ³ஸோ. லஸுணவிபா⁴கோ³ ஹெட்டா² த³ஸ்ஸிதோயேவ. கி³லானஸ்ஸ பன லஸுணங் கா²தி³துங் வட்டதி. யதா²ஹ – ‘‘அனுஜானாமி, பி⁴க்க²வே, ஆபா³த⁴பச்சயா லஸுணங் கா²தி³து’’ந்தி (சூளவ॰ 289). ஆபா³த⁴பச்சயாதி யஸ்ஸ ஆபா³த⁴ஸ்ஸ லஸுணங் பே⁴ஸஜ்ஜங் ஹோதி, தப்பச்சயாதி அத்தோ². பு³த்³த⁴வசனந்தி ஸங்கீ³தித்தயாருள்ஹா பிடகத்தயபாளி. அஞ்ஞதா²தி ஸக்கடாதி³க²லிதவசனமயங் வாசனாமக்³க³ங் ந ரோபேதப்³ப³ங், ததா² ந ட²பேதப்³ப³ந்தி வுத்தங் ஹோதி.
2821. Sace akallako gilāno na siyā, lasuṇaṃ māgadhaṃ āmakaṃ bhaṇḍikalasuṇaṃ na ca khādeyya neva paribhuñjeyyāti yojanā. Bhaṇḍikalasuṇaṃ nāma catumiñjato paṭṭhāya bahumiñjaṃ. Palaṇḍukabhañjanakādilasuṇe magadhesu jātattepi na doso. Lasuṇavibhāgo heṭṭhā dassitoyeva. Gilānassa pana lasuṇaṃ khādituṃ vaṭṭati. Yathāha – ‘‘anujānāmi, bhikkhave, ābādhapaccayā lasuṇaṃ khāditu’’nti (cūḷava. 289). Ābādhapaccayāti yassa ābādhassa lasuṇaṃ bhesajjaṃ hoti, tappaccayāti attho. Buddhavacananti saṅgītittayāruḷhā piṭakattayapāḷi. Aññathāti sakkaṭādikhalitavacanamayaṃ vācanāmaggaṃ na ropetabbaṃ, tathā na ṭhapetabbanti vuttaṃ hoti.
2822. கி²பிதேதி யேன கேனசி கி²பிதே. ‘‘ஜீவா’’தி ந வத்தப்³ப³ந்தி யோஜனா. பி⁴க்கு²னா கி²பிதே கி³ஹினா ‘‘ஜீவதா²’’தி வுத்தேன புன ‘‘சிரங் ஜீவா’’தி வத்துங் வட்டதீதி யோஜனா. ‘‘சிர’’ந்தி பதே³ ஸதிபி வட்டதி.
2822.Khipiteti yena kenaci khipite. ‘‘Jīvā’’ti na vattabbanti yojanā. Bhikkhunā khipite gihinā ‘‘jīvathā’’ti vuttena puna ‘‘ciraṃ jīvā’’ti vattuṃ vaṭṭatīti yojanā. ‘‘Cira’’nti pade satipi vaṭṭati.
2823. ஆகோடெந்தஸ்ஸாதி காயேன வா காயபடிப³த்³தா⁴தீ³ஹி வா பஹரந்தஸ்ஸ. புப்ப²ஸங்கிண்ணேதி புப்ப²ஸந்த²தே.
2823.Ākoṭentassāti kāyena vā kāyapaṭibaddhādīhi vā paharantassa. Pupphasaṃkiṇṇeti pupphasanthate.
2824. ந்ஹாபிதா புப்³ப³கா ஏதஸ்ஸாதி ந்ஹாபிதபுப்³ப³கோ, ந்ஹாபிதஜாதிகோதி அத்தோ². கு²ரப⁴ண்ட³ந்தி ந்ஹாபிதபரிக்கா²ரங். ந க³ண்ஹெய்யாதி ந பரிஹரெய்ய. ஸசே யோ ந்ஹாபிதஜாதிகோ ஹோதி, ஸோ கு²ரப⁴ண்ட³ங் க³ஹெத்வா ந ஹரெய்யாதி அத்தோ². அஞ்ஞஸ்ஸ ஹத்த²தோ க³ஹெத்வா கேஸச்சே²தா³தி³ காதுங் வட்டதி. உண்ணீதி கேஸகம்ப³லங் வினா உண்ணமயா பாவுரணஜாதி. ‘‘கோ³னகங் குத்தகங் சித்தக’’மிச்சாதி³னா வுத்தபே⁴த³வந்ததாய ஆஹ ‘‘ஸப்³பா³’’தி. உண்ணமயங் அந்தோகரித்வா பாருபிதுங் வட்டதீதி ஆஹ ‘‘பா³ஹிரலோமிகா’’தி. யதா²ஹ – ‘‘ந, பி⁴க்க²வே, பா³ஹிரலோமீ உண்ணீதா⁴ரேதப்³பா³’’தி (சூளவ॰ 249). ஸிக்கா²பத³ட்ட²கதா²யங் ‘‘உண்ணலோமானி ப³ஹி கத்வா உண்ணபாவாரங் பாருபந்தி, ததா² தா⁴ரெந்தஸ்ஸ து³க்கடங். லோமானி அந்தோ கத்வா பாருபிதுங் வட்டதீ’’தி (சூளவ॰ அட்ட²॰ 249).
2824. Nhāpitā pubbakā etassāti nhāpitapubbako, nhāpitajātikoti attho. Khurabhaṇḍanti nhāpitaparikkhāraṃ. Na gaṇheyyāti na parihareyya. Sace yo nhāpitajātiko hoti, so khurabhaṇḍaṃ gahetvā na hareyyāti attho. Aññassa hatthato gahetvā kesacchedādi kātuṃ vaṭṭati. Uṇṇīti kesakambalaṃ vinā uṇṇamayā pāvuraṇajāti. ‘‘Gonakaṃ kuttakaṃ cittaka’’miccādinā vuttabhedavantatāya āha ‘‘sabbā’’ti. Uṇṇamayaṃ antokaritvā pārupituṃ vaṭṭatīti āha ‘‘bāhiralomikā’’ti. Yathāha – ‘‘na, bhikkhave, bāhiralomī uṇṇīdhāretabbā’’ti (cūḷava. 249). Sikkhāpadaṭṭhakathāyaṃ ‘‘uṇṇalomāni bahi katvā uṇṇapāvāraṃ pārupanti, tathā dhārentassa dukkaṭaṃ. Lomāni anto katvā pārupituṃ vaṭṭatī’’ti (cūḷava. aṭṭha. 249).
2825. அங்க³ராக³ங் நாம குங்குமாதி³. கரொந்தஸ்ஸாதி அப்³ப⁴ஞ்ஜந்தஸ்ஸ. அகாயப³ந்த⁴னஸ்ஸ கா³மங் பவிஸதோபி து³க்கடங் ஸமுதீ³ரிதந்தி யோஜனா. எத்த² ச அஸதியா அப³ந்தி⁴த்வா நிக்க²ந்தேன யத்த² ஸரதி, தத்த² ப³ந்தி⁴தப்³ப³ங். ‘‘ஆஸனஸாலாய ப³ந்தி⁴ஸ்ஸாமீ’’தி க³ந்துங் வட்டதி. ஸரித்வா யாவ ந ப³ந்த⁴தி, ந தாவ பிண்டா³ய சரிதப்³ப³ங்.
2825.Aṅgarāgaṃ nāma kuṅkumādi. Karontassāti abbhañjantassa. Akāyabandhanassa gāmaṃ pavisatopi dukkaṭaṃ samudīritanti yojanā. Ettha ca asatiyā abandhitvā nikkhantena yattha sarati, tattha bandhitabbaṃ. ‘‘Āsanasālāya bandhissāmī’’ti gantuṃ vaṭṭati. Saritvā yāva na bandhati, na tāva piṇḍāya caritabbaṃ.
2826. ஸப்³ப³ங் ஆயுத⁴ங் வினா ஸப்³ப³ங் லோஹஜங் லோஹமயப⁴ண்ட³ஞ்ச பத்தங், ஸங்கமனீயபாது³கங், யதா²வுத்தலக்க²ணங் பல்லங்கங், ஆஸந்தி³ஞ்ச வினா ஸப்³ப³ங் தா³ருஜங் தா³ருமயப⁴ண்ட³ஞ்ச வுத்தலக்க²ணமேவ கதகங் , கும்ப⁴காரிகங் த⁴னியஸ்ஸேவ ஸப்³ப³மத்திகாமயங் குடிஞ்ச வினா ஸப்³ப³ங் மத்திகாமயங் ப⁴ண்ட³ஞ்ச கப்பியந்தி யோஜனா.
2826. Sabbaṃ āyudhaṃ vinā sabbaṃ lohajaṃ lohamayabhaṇḍañca pattaṃ, saṅkamanīyapādukaṃ, yathāvuttalakkhaṇaṃ pallaṅkaṃ, āsandiñca vinā sabbaṃ dārujaṃ dārumayabhaṇḍañca vuttalakkhaṇameva katakaṃ, kumbhakārikaṃ dhaniyasseva sabbamattikāmayaṃ kuṭiñca vinā sabbaṃ mattikāmayaṃ bhaṇḍañca kappiyanti yojanā.
கு²த்³த³கவத்து²க்க²ந்த⁴ககதா²வண்ணனா.
Khuddakavatthukkhandhakakathāvaṇṇanā.
