| Library / Tipiṭaka / তিপিটক • Tipiṭaka / ৰিনযৰিনিচ্ছয-টীকা • Vinayavinicchaya-ṭīkā |
খুদ্দকৰত্থুক্খন্ধককথাৰণ্ণনা
Khuddakavatthukkhandhakakathāvaṇṇanā
২৭৮৩. কুট্টেতি ইট্ঠকাসিলাদারুকুট্টানং অঞ্ঞতরস্মিং। অট্টানেতি এত্থ অট্টানং নাম রুক্খে ফলকং ৰিয তচ্ছেত্ৰা অট্ঠপদাকারেন রাজিযো ছিন্দিত্ৰা নহানতিত্থে নিখণন্তি, তত্থ চুণ্ণানি আকিরিত্ৰা মনুস্সা কাযং ঘংসন্তি।
2783.Kuṭṭeti iṭṭhakāsilādārukuṭṭānaṃ aññatarasmiṃ. Aṭṭāneti ettha aṭṭānaṃ nāma rukkhe phalakaṃ viya tacchetvā aṭṭhapadākārena rājiyo chinditvā nahānatitthe nikhaṇanti, tattha cuṇṇāni ākiritvā manussā kāyaṃ ghaṃsanti.
২৭৮৪. গন্ধব্বহত্থেনাতি নহানতিত্থে ঠপিতেন দারুমযহত্থেন। তেন কির চুণ্ণানি গহেত্ৰা মনুস্সা সরীরং ঘংসন্তি। কুরুৰিন্দকসুত্তিযাতি কুরুৰিন্দকপাসাণচুণ্ণানি লাখায বন্ধিত্ৰা কতগুল়িককলাপকো ৰুচ্চতি, তং উভোসু অন্তেসু গহেত্ৰা সরীরং ঘংসন্তি। মল্লকেনাতি মকরদন্তকং ছিন্দিত্ৰা মল্লকমূলসণ্ঠানেন কতেন মল্লকেন, ইদং গিলানস্সাপি ন ৰট্টতি। অঞ্ঞমঞ্ঞঞ্চ কাযতোতি অঞ্ঞমঞ্ঞং সরীরেন ঘংসেয্য।
2784.Gandhabbahatthenāti nahānatitthe ṭhapitena dārumayahatthena. Tena kira cuṇṇāni gahetvā manussā sarīraṃ ghaṃsanti. Kuruvindakasuttiyāti kuruvindakapāsāṇacuṇṇāni lākhāya bandhitvā kataguḷikakalāpako vuccati, taṃ ubhosu antesu gahetvā sarīraṃ ghaṃsanti. Mallakenāti makaradantakaṃ chinditvā mallakamūlasaṇṭhānena katena mallakena, idaṃ gilānassāpi na vaṭṭati. Aññamaññañca kāyatoti aññamaññaṃ sarīrena ghaṃseyya.
২৭৮৫. অকতং মল্লকং নাম মকরদন্তে অচ্ছিন্দিত্ৰা কতং, ইদং অগিলানস্স ন ৰট্টতি।
2785.Akataṃ mallakaṃ nāma makaradante acchinditvā kataṃ, idaṃ agilānassa na vaṭṭati.
২৭৮৬. কপালিট্ঠকখণ্ডানীতি কপালখণ্ডইট্ঠকখণ্ডানি। সব্বস্সাতি গিলানাগিলানস্স সরীরে ঘংসিত্ৰা উব্বট্টেতুং ৰট্টতি। ‘‘পুথুপাণিক’’ন্তি হত্থপরিকম্মং ৰুচ্চতি, তস্মা সব্বস্স হত্থেন পিট্ঠিপরিকম্মং কাতুং ৰট্টতি। ‘‘ৰত্থৰট্টী’’তি ইদং পাল়িযং ৰুত্তউক্কাসিকস্স পরিযাযং, তস্মা নহাযন্তস্স যস্স কস্সচি নহানসাটকৰট্টিযাপি ঘংসিতুং ৰট্টতি।
2786.Kapāliṭṭhakakhaṇḍānīti kapālakhaṇḍaiṭṭhakakhaṇḍāni. Sabbassāti gilānāgilānassa sarīre ghaṃsitvā ubbaṭṭetuṃ vaṭṭati. ‘‘Puthupāṇika’’nti hatthaparikammaṃ vuccati, tasmā sabbassa hatthena piṭṭhiparikammaṃ kātuṃ vaṭṭati. ‘‘Vatthavaṭṭī’’ti idaṃ pāḷiyaṃ vuttaukkāsikassa pariyāyaṃ, tasmā nahāyantassa yassa kassaci nahānasāṭakavaṭṭiyāpi ghaṃsituṃ vaṭṭati.
২৭৮৭. ফেণকং নাম সমুদ্দফেণং। কথলন্তি কপালখণ্ডং। পাদঘংসনে ৰুত্তা অনুঞ্ঞাতা। কতকং নাম পদুমকণ্ণিকাকারং পাদঘংসনত্থং কণ্টকে উট্ঠাপেত্ৰা কতং, এতং নেৰ পটিগ্গহেতুং, ন পরিভুঞ্জিতুং ৰট্টতি।
2787.Pheṇakaṃ nāma samuddapheṇaṃ. Kathalanti kapālakhaṇḍaṃ. Pādaghaṃsane vuttā anuññātā. Katakaṃ nāma padumakaṇṇikākāraṃ pādaghaṃsanatthaṃ kaṇṭake uṭṭhāpetvā kataṃ, etaṃ neva paṭiggahetuṃ, na paribhuñjituṃ vaṭṭati.
২৭৮৮. যং কিঞ্চিপি অলঙ্কারন্তি হত্থূপগাদিঅলঙ্কারেসু যং কিঞ্চি অলঙ্কারং।
2788.Yaṃ kiñcipi alaṅkāranti hatthūpagādialaṅkāresu yaṃ kiñci alaṅkāraṃ.
২৭৮৯. ওসণ্ঠেয্যাতি অলঙ্কারত্থং সঙ্খরোন্তো নমেয্য। হত্থফণকেনাতি হত্থেনেৰ ফণকিচ্চং করোন্তা অঙ্গুলীহি ওসণ্ঠেন্তি। ফণকেনাতি দন্তমযাদীসু যেন কেনচি। কোচ্ছেনাতি উসিরমযেন ৰা মুঞ্জপব্বজমযেন ৰা কোচ্ছেন।
2789.Osaṇṭheyyāti alaṅkāratthaṃ saṅkharonto nameyya. Hatthaphaṇakenāti hattheneva phaṇakiccaṃ karontā aṅgulīhi osaṇṭhenti. Phaṇakenāti dantamayādīsu yena kenaci. Kocchenāti usiramayena vā muñjapabbajamayena vā kocchena.
২৭৯০. সিত্থতেলোদতেলেহীতি সিত্থতেলঞ্চ উদকতেলঞ্চাতি ৰিগ্গহো, তেহি। তত্থ সিত্থতেলং নাম মধুসিত্থকনিয্যাসাদি যং কিঞ্চি চিক্কণং। চিক্কণং নাম নিয্যাসং। উদকতেলং নাম উদকমিস্সকং তেলং। কত্থচি পোত্থকেসু ‘‘সিট্ঠা’’তি পাঠো, সোযেৰত্থো। অনুলোমনিপাতত্থন্তি নলাটাভিমুখং অনুলোমেন পাতনত্থং। উদ্ধলোমেনাতি উদ্ধগ্গং হুত্ৰা ঠিতলোমেন।
2790.Sitthatelodatelehīti sitthatelañca udakatelañcāti viggaho, tehi. Tattha sitthatelaṃ nāma madhusitthakaniyyāsādi yaṃ kiñci cikkaṇaṃ. Cikkaṇaṃ nāma niyyāsaṃ. Udakatelaṃ nāma udakamissakaṃ telaṃ. Katthaci potthakesu ‘‘siṭṭhā’’ti pāṭho, soyevattho. Anulomanipātatthanti nalāṭābhimukhaṃ anulomena pātanatthaṃ. Uddhalomenāti uddhaggaṃ hutvā ṭhitalomena.
২৭৯১. হত্থং তেলেন তেমেত্ৰাতি করতলং তেলেন মক্খেত্ৰা। সিরোরুহা কেসা। উণ্হাভিতত্তস্সাতি উণ্হাভিতত্তরজসিরস্স। অল্লহত্থেন সিরোরুহে পুঞ্ছিতুং ৰট্টতীতি যোজনা।
2791.Hatthaṃ telena temetvāti karatalaṃ telena makkhetvā. Siroruhā kesā. Uṇhābhitattassāti uṇhābhitattarajasirassa. Allahatthena siroruhe puñchituṃ vaṭṭatīti yojanā.
২৭৯২. আদাসে উদপত্তে ৰাতি এত্থ কংসপত্তাদীনিপি, যেসু মুখনিমিত্তং পঞ্ঞাযতি, সব্বানি আদাসসঙ্খমেৰ গচ্ছন্তি, কঞ্জিযাদীনিপি চ উদপত্তসঙ্খমেৰ, তস্মা যত্থ কত্থচি ওলোকেন্তস্স দুক্কটং।
2792.Ādāseudapatte vāti ettha kaṃsapattādīnipi, yesu mukhanimittaṃ paññāyati, sabbāni ādāsasaṅkhameva gacchanti, kañjiyādīnipi ca udapattasaṅkhameva, tasmā yattha katthaci olokentassa dukkaṭaṃ.
২৭৯৩. যেন হেতুনা মুখং ওলোকেন্তস্স অনাপত্তি, তং দস্সেতুমাহ ‘‘সঞ্ছৰি’’ন্তিআদি। আবাধপচ্চযা ‘‘মে মুখে ৰণো সঞ্ছৰি নু খো, উদাহু ন সঞ্ছৰী’’তি মুখং দট্ঠুঞ্চ ‘‘অহং জিণ্ণো নু খো, উদাহু নো’’তি অত্তনো আযুসঙ্খারজাননত্থঞ্চ মুখং দট্ঠুং ৰট্টতীতি যোজনা।
2793. Yena hetunā mukhaṃ olokentassa anāpatti, taṃ dassetumāha ‘‘sañchavi’’ntiādi. Ābādhapaccayā ‘‘me mukhe vaṇo sañchavi nu kho, udāhu na sañchavī’’ti mukhaṃ daṭṭhuñca ‘‘ahaṃ jiṇṇo nu kho, udāhu no’’ti attano āyusaṅkhārajānanatthañca mukhaṃ daṭṭhuṃ vaṭṭatīti yojanā.
২৭৯৪. নচ্চং ৰাতি যং কিঞ্চি নচ্চং অন্তমসো মোরনচ্চম্পি। গীতন্তি যং কিঞ্চি নটগীতং ৰা সাধুগীতং ৰা অন্তমসো দন্তগীতম্পি, যং ‘‘গাযিস্সামা’’তি পুব্বভাগে ওকূজন্তা করোন্তি, এতম্পি ন ৰট্টতি। ৰাদিতন্তি যং কিঞ্চি ৰাদিতং। দট্ঠুং ৰা পন সোতুং ৰাতি নচ্চং দট্ঠুং ৰা গীতং ৰাদিতং সোতুং ৰা।
2794.Naccaṃ vāti yaṃ kiñci naccaṃ antamaso moranaccampi. Gītanti yaṃ kiñci naṭagītaṃ vā sādhugītaṃ vā antamaso dantagītampi, yaṃ ‘‘gāyissāmā’’ti pubbabhāge okūjantā karonti, etampi na vaṭṭati. Vāditanti yaṃ kiñci vāditaṃ. Daṭṭhuṃ vā pana sotuṃ vāti naccaṃ daṭṭhuṃ vā gītaṃ vāditaṃ sotuṃ vā.
২৭৯৫. সযং নচ্চন্তস্স ৰা নচ্চাপেন্তস্স ৰা গাযন্তস্স ৰা গাযাপেন্তস্স ৰা ৰাদেন্তস্স ৰা ৰাদাপেন্তস্স ৰা দুক্কটমেৰ অট্ঠকথায (চূল়ৰ॰ অট্ঠ॰ ২৪৮) ৰুত্তন্তি তদেকদেসং দস্সেতুমাহ ‘‘দট্ঠুমন্তমসো’’তিআদি।
2795. Sayaṃ naccantassa vā naccāpentassa vā gāyantassa vā gāyāpentassa vā vādentassa vā vādāpentassa vā dukkaṭameva aṭṭhakathāya (cūḷava. aṭṭha. 248) vuttanti tadekadesaṃ dassetumāha ‘‘daṭṭhumantamaso’’tiādi.
২৭৯৬. সুণাতীতি গীতং ৰা ৰাদিতং ৰা। পস্সতীতি নচ্চং পস্সতি।
2796.Suṇātīti gītaṃ vā vāditaṃ vā. Passatīti naccaṃ passati.
২৭৯৭. পস্সিস্সামীতি এত্থ ‘‘সুণিস্সামী’’তি সেসো। ‘‘নচ্চং পস্সিস্সামি, গীতং, ৰাদিতং ৰা সুণিস্সামী’’তি ৰিহারতো ৰিহারং গচ্ছতো ৰাপি দুক্কটং হোতীতি যোজনা।
2797.Passissāmīti ettha ‘‘suṇissāmī’’ti seso. ‘‘Naccaṃ passissāmi, gītaṃ, vāditaṃ vā suṇissāmī’’ti vihārato vihāraṃ gacchato vāpi dukkaṭaṃ hotīti yojanā.
২৭৯৮. উট্ঠহিত্ৰান গচ্ছতোতি ‘‘নচ্চং পস্সিস্সামী’’তি, ‘‘গীতং, ৰাদিতং ৰা সুণিস্সামী’’তি নিসিন্নট্ঠানতো উট্ঠহিত্ৰা অন্তোৰিহারেপি তং তং দিসং গচ্ছতো আপত্তি হোতীতি যোজনা। ৰীথিযং ঠত্ৰা গীৰং পসারেত্ৰা পস্সতোপি চ আপত্তীতি যোজনা।
2798.Uṭṭhahitvāna gacchatoti ‘‘naccaṃ passissāmī’’ti, ‘‘gītaṃ, vāditaṃ vā suṇissāmī’’ti nisinnaṭṭhānato uṭṭhahitvā antovihārepi taṃ taṃ disaṃ gacchato āpatti hotīti yojanā. Vīthiyaṃ ṭhatvā gīvaṃ pasāretvā passatopi ca āpattīti yojanā.
২৭৯৯. দীঘাতি দ্ৰঙ্গুলতো দীঘা। ন ধারেয্যাতি ন ধারেতব্বা। দ্ৰঙ্গুলং ৰা দুমাসং ৰাতি এত্থ দ্ৰে অঙ্গুলানি পরিমাণং এতস্সাতি দ্ৰঙ্গুলো, কেসো। দ্ৰে মাসা উক্কট্ঠপরিচ্ছেদো অস্সাতি দুমাসো। কেসং ধারেন্তো দ্ৰঙ্গুলং ৰা ধারেয্য দুমাসং ৰা। ততো উদ্ধং ন ৰট্টতীতি ততো দ্ৰঙ্গুলতো ৰা দুমাসতো ৰা কেসতো উদ্ধং কেসং ধারেতুং ন ৰট্টতি।
2799.Dīghāti dvaṅgulato dīghā. Na dhāreyyāti na dhāretabbā. Dvaṅgulaṃ vā dumāsaṃ vāti ettha dve aṅgulāni parimāṇaṃ etassāti dvaṅgulo, keso. Dve māsā ukkaṭṭhaparicchedo assāti dumāso. Kesaṃ dhārento dvaṅgulaṃ vā dhāreyya dumāsaṃ vā. Tato uddhaṃ na vaṭṭatīti tato dvaṅgulato vā dumāsato vā kesato uddhaṃ kesaṃ dhāretuṃ na vaṭṭati.
অথ ৰা দ্ৰে অঙ্গুলানি সমাহটানি দ্ৰঙ্গুলং, দ্ৰে মাসা সমাহটা দুমাসং, উভযত্থ অচ্চন্তসংযোগে উপযোগৰচনং। কেসে ধারেন্তো দ্ৰঙ্গুলমত্তং ৰা ধারেয্য দুমাসমত্তং ৰা, ততো কালপরিমাণতো উদ্ধং কেসে ধারেতুং ন ৰট্টতীতি অত্থো। সচে কেসে অন্তোদ্ৰেমাসে দ্ৰঙ্গুলে পাপুণন্তি, অন্তোদ্ৰেমাসেযেৰ ছিন্দিতব্বা। দ্ৰঙ্গুলে হি অতিক্কমেতুং ন ৰট্টতি। সচেপি ন দীঘা, দ্ৰেমাসতো একদিৰসম্পি অতিক্কমেতুং ন লভতিযেৰ। এৰমযং উভযেনপি উক্কট্ঠপরিচ্ছেদেনেৰ ৰুত্তো, ততো ওরং পন নৰট্টনভাৰো নাম নত্থি।
Atha vā dve aṅgulāni samāhaṭāni dvaṅgulaṃ, dve māsā samāhaṭā dumāsaṃ, ubhayattha accantasaṃyoge upayogavacanaṃ. Kese dhārento dvaṅgulamattaṃ vā dhāreyya dumāsamattaṃ vā, tato kālaparimāṇato uddhaṃ kese dhāretuṃ na vaṭṭatīti attho. Sace kese antodvemāse dvaṅgule pāpuṇanti, antodvemāseyeva chinditabbā. Dvaṅgule hi atikkametuṃ na vaṭṭati. Sacepi na dīghā, dvemāsato ekadivasampi atikkametuṃ na labhatiyeva. Evamayaṃ ubhayenapi ukkaṭṭhaparicchedeneva vutto, tato oraṃ pana navaṭṭanabhāvo nāma natthi.
২৮০০. দীঘে নখে, দীঘানি নাসিকলোমানি চ ন ধারযেতি যোজনা, ন ধারেয্য, ছিন্দেয্যাতি অত্থো। ৰীসতিমট্ঠন্তি ৰীসতিযা নখানং মট্ঠং লিখিতমট্ঠভাৰং কাতুং ভিক্খুনো ন ৰট্টতীতি যোজনা। সত্থকেন তচ্ছেত্ৰা চুণ্ণকেন পমজ্জিত্ৰা ফলিকমণীনং ৰিয উজ্জলকরণং লিখিতমট্ঠং নাম। ‘‘অনুজানামি, ভিক্খৰে, মলমত্তং অপকড্ঢিতু’’ন্তি (চূল়ৰ॰ ২৭৪) অনুঞ্ঞাতত্তা মুগ্গফলতচাদীহি নখমলং অপনেতুং ৰট্টতি।
2800. Dīghe nakhe, dīghāni nāsikalomāni ca na dhārayeti yojanā, na dhāreyya, chindeyyāti attho. Vīsatimaṭṭhanti vīsatiyā nakhānaṃ maṭṭhaṃ likhitamaṭṭhabhāvaṃ kātuṃ bhikkhuno na vaṭṭatīti yojanā. Satthakena tacchetvā cuṇṇakena pamajjitvā phalikamaṇīnaṃ viya ujjalakaraṇaṃ likhitamaṭṭhaṃ nāma. ‘‘Anujānāmi, bhikkhave, malamattaṃ apakaḍḍhitu’’nti (cūḷava. 274) anuññātattā muggaphalatacādīhi nakhamalaṃ apanetuṃ vaṭṭati.
২৮০১. কপ্পাপেয্য ৰিসুং মস্সুন্তি যো কেসচ্ছিন্নো ৰিসুং মস্সুং কপ্পাপেয্য। দাঠিকং ঠপেয্যাতি কেসে ছিন্দাপেত্ৰা মস্সুং অকপ্পাপেত্ৰা ৰিসুং ঠপেয্য। সম্বাধেতি উপকচ্ছকমুত্তকরণসঙ্খাতে সম্বাধট্ঠানে। লোমং সংহরাপেয্যৰাতি সত্থেন ৰা সণ্ডাসেন ৰা অঞ্ঞেন যেন কেনচি পরেন ছিন্দাপেয্য, সযং ৰা ছিন্দেয্য। ‘‘অনুজানামি, ভিক্খৰে, আবাধপচ্চযা সম্বাধে লোমং সংহরাপেতু’’ন্তি (চূল়ৰ॰ ২৭৫) অনুঞ্ঞাতত্তা যথাৰুত্তসম্বাধে গণ্ডপিল়কৰণাদিকে আবাধে সতি লোমং সংহরাপেতুং ৰট্টতি।
2801.Kappāpeyyavisuṃ massunti yo kesacchinno visuṃ massuṃ kappāpeyya. Dāṭhikaṃ ṭhapeyyāti kese chindāpetvā massuṃ akappāpetvā visuṃ ṭhapeyya. Sambādheti upakacchakamuttakaraṇasaṅkhāte sambādhaṭṭhāne. Lomaṃ saṃharāpeyyavāti satthena vā saṇḍāsena vā aññena yena kenaci parena chindāpeyya, sayaṃ vā chindeyya. ‘‘Anujānāmi, bhikkhave, ābādhapaccayā sambādhe lomaṃ saṃharāpetu’’nti (cūḷava. 275) anuññātattā yathāvuttasambādhe gaṇḍapiḷakavaṇādike ābādhe sati lomaṃ saṃharāpetuṃ vaṭṭati.
২৮০২. অগিলানস্স ছিন্দতো দুক্কটং ৰুত্তং। অঞ্ঞেন ৰা পুগ্গলেন তথা কত্তরিযা ছিন্দাপেন্তস্স দুক্কটং ৰুত্তন্তি সম্বন্ধো।
2802. Agilānassa chindato dukkaṭaṃ vuttaṃ. Aññena vā puggalena tathā kattariyā chindāpentassa dukkaṭaṃ vuttanti sambandho.
২৮০৩. সেসঙ্গছেদনেতি অঙ্গুলিযাদিঅৰসেসসরীরাৰযৰানং ছেদনে। অত্তৰধেতি অত্তুপক্কমেন ৰা আণত্তিযা উপক্কমেন ৰা অত্তনো জীৰিতনাসে।
2803.Sesaṅgachedaneti aṅguliyādiavasesasarīrāvayavānaṃ chedane. Attavadheti attupakkamena vā āṇattiyā upakkamena vā attano jīvitanāse.
২৮০৪. অঙ্গন্তি অঙ্গজাততো অৰসেসং সরীরাৰযৰং। অহিকীটাদিদট্ঠস্স তপ্পটিকারৰসেন অঙ্গং ছিন্দতো ন দোসো। তাদিসাবাধপচ্চযা তপ্পটিকারৰসেন অঙ্গং ছিন্দতো ন দোসো। লোহিতং মোচেন্তস্সাপি ন দোসোতি যোজনা।
2804.Aṅganti aṅgajātato avasesaṃ sarīrāvayavaṃ. Ahikīṭādidaṭṭhassa tappaṭikāravasena aṅgaṃ chindato na doso. Tādisābādhapaccayā tappaṭikāravasena aṅgaṃ chindato na doso. Lohitaṃ mocentassāpi na dosoti yojanā.
২৮০৫. অপরিস্সাৰনো ভিক্খু সচে মগ্গং গচ্ছতি, দুক্কটং। মগ্গে অদ্ধানে তং পরিস্সাৰনং যাচমানস্স যো ন দদাতি, তস্স অদদতো অদেন্তস্সাপি তথেৰ দুক্কটমেৰাতি যোজনা। যো পন অত্তনো হত্থে পরিস্সাৰনে ৰিজ্জমানেপি যাচতি, তস্স ন অকামা দাতব্বং।
2805.Aparissāvano bhikkhu sace maggaṃ gacchati, dukkaṭaṃ. Magge addhāne taṃ parissāvanaṃ yācamānassa yo na dadāti, tassa adadato adentassāpi tatheva dukkaṭamevāti yojanā. Yo pana attano hatthe parissāvane vijjamānepi yācati, tassa na akāmā dātabbaṃ.
২৮০৬. ‘‘নগ্গো’’তি পদং ‘‘ন ভুঞ্জে’’তিআদি কিরিযাপদেহি পচ্চেকং যোজেতব্বং। ন ভুঞ্জেতি ভত্তাদিং ভুঞ্জিতব্বং ন ভুঞ্জেয্য। ন পিৰেতি যাগুআদিং পাতব্বং ন পিৰেয্য। ন চ খাদেতি মূলখাদনীযাদিকং খাদনীযং ন খাদেয্য। ন সাযযেতি ফাণিতাদিকং সাযিতব্বঞ্চ ন সাযেয্য ন লিহেয্য। ন দদেতি অঞ্ঞস্স ভত্তাদিং কিঞ্চি ন দদেয্য। ন গণ্হেয্যাতি তথা সযং নগ্গো হুত্ৰা ন পটিগ্গণ্হেয্য। অঞ্জসং মগ্গং।
2806.‘‘Naggo’’ti padaṃ ‘‘na bhuñje’’tiādi kiriyāpadehi paccekaṃ yojetabbaṃ. Na bhuñjeti bhattādiṃ bhuñjitabbaṃ na bhuñjeyya. Na piveti yāguādiṃ pātabbaṃ na piveyya. Na ca khādeti mūlakhādanīyādikaṃ khādanīyaṃ na khādeyya. Na sāyayeti phāṇitādikaṃ sāyitabbañca na sāyeyya na liheyya. Na dadeti aññassa bhattādiṃ kiñci na dadeyya. Na gaṇheyyāti tathā sayaṃ naggo hutvā na paṭiggaṇheyya. Añjasaṃ maggaṃ.
২৮০৭. পরিকম্মং ন কাতব্বন্তি পিট্ঠিপরিকম্মাদিপরিকম্মং ন কাতব্বং। কারযেতি সযং নগ্গো হুত্ৰা অঞ্ঞেন পিট্ঠিপরিকম্মাদিপরিকম্মং ন কারাপেয্যাতি অত্থো।
2807.Parikammaṃ na kātabbanti piṭṭhiparikammādiparikammaṃ na kātabbaṃ. Kārayeti sayaṃ naggo hutvā aññena piṭṭhiparikammādiparikammaṃ na kārāpeyyāti attho.
২৮০৮. পিট্ঠিকম্মাদিকে পরিকম্মে জন্তাঘরাদিকা তিস্সো পটিচ্ছাদী ৰুত্তা ‘‘অনুজানামি, ভিক্খৰে, তিস্সো পটিচ্ছাদিযো জন্তাঘরপটিচ্ছাদিং উদকপটিচ্ছাদিং ৰত্থপটিচ্ছাদি’’ন্তি (চূল়ৰ॰ ২৬১) অনুঞ্ঞাতাতি যোজনা। পটিচ্ছাদেতি হিরিকোপিনন্তি পটিচ্ছাদি, জন্তাঘরমেৰ পটিচ্ছাদি জন্তাঘরপটিচ্ছাদি। উদকমেৰ পটিচ্ছাদি উদকপটিচ্ছাদি। ৰত্থমেৰ পটিচ্ছাদি ৰত্থপটিচ্ছাদি। ‘‘সব্বত্থ পন ৰট্টতী’’তি ইমিনা ইতরপটিচ্ছাদিদ্ৰযং পরিকম্মেযেৰ ৰট্টতীতি দীপেতি। সব্বত্থাতি ভোজনাদিসব্বকিচ্চেসু।
2808. Piṭṭhikammādike parikamme jantāgharādikā tisso paṭicchādī vuttā ‘‘anujānāmi, bhikkhave, tisso paṭicchādiyo jantāgharapaṭicchādiṃ udakapaṭicchādiṃ vatthapaṭicchādi’’nti (cūḷava. 261) anuññātāti yojanā. Paṭicchādeti hirikopinanti paṭicchādi, jantāgharameva paṭicchādi jantāgharapaṭicchādi. Udakameva paṭicchādi udakapaṭicchādi. Vatthameva paṭicchādi vatthapaṭicchādi. ‘‘Sabbattha pana vaṭṭatī’’ti iminā itarapaṭicchādidvayaṃ parikammeyeva vaṭṭatīti dīpeti. Sabbatthāti bhojanādisabbakiccesu.
২৮০৯. যত্থ কত্থচি পেল়াযন্তি তম্বলোহৰট্টলোহকংসলোহকাল়লোহসুৰণ্ণরজতাদীহি কতায ৰা দারুমযায ৰা যায কাযচি পেল়ায আসিত্তকূপধানে। ভুঞ্জিতুং ন চ ৰট্টতীতি ভাজনং ঠপেত্ৰা ভুঞ্জিতুং ন ৰট্টতি। যথাহ – ‘‘আসিত্তকূপধানং নাম তম্বলোহেন ৰা রজতেন ৰা কতায পেল়ায এতং অধিৰচনং, ‘ন ভিক্খৰে আসিত্তকূপধানে ভুঞ্জিতব্ব’ন্তি সামঞ্ঞেন পটিক্খিত্তত্তা পন দারুমযাপি ন ৰট্টতী’’তি (চূল়ৰ॰ অট্ঠ॰ ২৬৪)। ‘‘অনুজানামি ভিক্খৰে মল়োরিক’’ন্তি (চূল়ৰ॰ ২৬৪) অনুঞ্ঞাতত্তা মল়োরিকায ঠপেত্ৰা ভুঞ্জিতুং ৰট্টতি। ‘‘মল়োরিকা’’তি চ দণ্ডাধারকো ৰুচ্চতি, যং তযো, চত্তারো, বহূ ৰা দণ্ডকে উপরি চ হেট্ঠা চ ৰিত্থতং মজ্ঝে সঙ্কুচিতং কত্ৰা বন্ধিত্ৰা আধারকং করোন্তি। যট্ঠিআধারকপণ্ণাধারকপচ্ছিকপিট্ঠঘটককৰাটকাদিভাজনমুখউদুক্খলাদীনিপি এত্থেৰ সঙ্গহং গচ্ছন্তি। যট্ঠিআধারকোতি যট্ঠিংযেৰ উজুকং ঠপেত্ৰা বন্ধীকতআধারকো।
2809.Yattha katthaci peḷāyanti tambalohavaṭṭalohakaṃsalohakāḷalohasuvaṇṇarajatādīhi katāya vā dārumayāya vā yāya kāyaci peḷāya āsittakūpadhāne. Bhuñjituṃ na ca vaṭṭatīti bhājanaṃ ṭhapetvā bhuñjituṃ na vaṭṭati. Yathāha – ‘‘āsittakūpadhānaṃ nāma tambalohena vā rajatena vā katāya peḷāya etaṃ adhivacanaṃ, ‘na bhikkhave āsittakūpadhāne bhuñjitabba’nti sāmaññena paṭikkhittattā pana dārumayāpi na vaṭṭatī’’ti (cūḷava. aṭṭha. 264). ‘‘Anujānāmi bhikkhave maḷorika’’nti (cūḷava. 264) anuññātattā maḷorikāya ṭhapetvā bhuñjituṃ vaṭṭati. ‘‘Maḷorikā’’ti ca daṇḍādhārako vuccati, yaṃ tayo, cattāro, bahū vā daṇḍake upari ca heṭṭhā ca vitthataṃ majjhe saṅkucitaṃ katvā bandhitvā ādhārakaṃ karonti. Yaṭṭhiādhārakapaṇṇādhārakapacchikapiṭṭhaghaṭakakavāṭakādibhājanamukhaudukkhalādīnipi ettheva saṅgahaṃ gacchanti. Yaṭṭhiādhārakoti yaṭṭhiṃyeva ujukaṃ ṭhapetvā bandhīkataādhārako.
একভাজনে ৰিসুং ৰিসুং ভোজনস্সাপি সম্ভৰতো ‘‘ভুঞ্জতো একভাজনে’’তি এত্তকেযেৰ ৰুত্তে তস্সাপি পসঙ্গো সিযাতি তন্নিৰত্তনত্থমাহ ‘‘একতো’’তি। ‘‘ভুঞ্জতো’’তি ইদং উপলক্খণং। একতো একভাজনে যাগুআদিপানম্পি ন ৰট্টতি। যথাহ – ‘‘ন, ভিক্খৰে, একথালকে পাতব্ব’’ন্তি (চূল়ৰ॰ ২৬৪)। অথ ৰা ভুঞ্জতোতি অজ্ঝোহারসামঞ্ঞেন পানম্পি সঙ্গহিতন্তি ৰেদিতব্বং। অযমেত্থ ৰিনিচ্ছযো – সচে একো ভিক্খু ভাজনতো ফলং ৰা পূৰং ৰা গহেত্ৰা গচ্ছতি, তস্মিং অপগতে ইতরস্স সেসকং ভুঞ্জিতুং ৰট্টতি। ইতরস্সাপি তস্মিং খণে পুন গহেতুং ৰট্টতীতি।
Ekabhājane visuṃ visuṃ bhojanassāpi sambhavato ‘‘bhuñjato ekabhājane’’ti ettakeyeva vutte tassāpi pasaṅgo siyāti tannivattanatthamāha ‘‘ekato’’ti. ‘‘Bhuñjato’’ti idaṃ upalakkhaṇaṃ. Ekato ekabhājane yāguādipānampi na vaṭṭati. Yathāha – ‘‘na, bhikkhave, ekathālake pātabba’’nti (cūḷava. 264). Atha vā bhuñjatoti ajjhohārasāmaññena pānampi saṅgahitanti veditabbaṃ. Ayamettha vinicchayo – sace eko bhikkhu bhājanato phalaṃ vā pūvaṃ vā gahetvā gacchati, tasmiṃ apagate itarassa sesakaṃ bhuñjituṃ vaṭṭati. Itarassāpi tasmiṃ khaṇe puna gahetuṃ vaṭṭatīti.
২৮১০. যে দ্ৰে ৰা তযো ৰা ভিক্খূ একপাৰুরণা ৰা একত্থরণা ৰা একত্থরণপাৰুরণা ৰা নিপজ্জন্তি, তেসঞ্চ, যে একমঞ্চেপি একতো নিপজ্জন্তি, তেসঞ্চ আপত্তি দুক্কটং হোতীতি যোজনা।
2810. Ye dve vā tayo vā bhikkhū ekapāvuraṇā vā ekattharaṇā vā ekattharaṇapāvuraṇā vā nipajjanti, tesañca, ye ekamañcepi ekato nipajjanti, tesañca āpatti dukkaṭaṃ hotīti yojanā.
২৮১১. সঙ্ঘাটিপল্লত্থিকমুপাগতোতি এত্থ সঙ্ঘাটীতি সঙ্ঘাটিনামেন অধিট্ঠিতচীৰরমাহ। সঙ্ঘাটিপল্লত্থিকং উপগতেন যুত্তো হুত্ৰাতি অত্থো। ন নিসীদেয্যাতি ৰিহারে ৰা অন্তরঘরে ৰা যত্থ কত্থচি ন নিসীদেয্য। ‘‘সঙ্ঘাটীতি নামেন অধিট্ঠিতচীৰরৰোহারপ্পত্তমধিট্ঠিতচীৰরং ‘সঙ্ঘাটী’তি ৰুত্ত’’ন্তি নিস্সন্দেহে, খুদ্দসিক্খাৰণ্ণনাযম্পি ‘‘সঙ্ঘাটিযা ন পল্লত্থেতি অধিট্ঠিতচীৰরেন ৰিহারে ৰা অন্তরঘরে ৰা পল্লত্থিকো ন কাতব্বো’’তি ৰুত্তং। অট্ঠকথাযং পন ‘‘অন্তোগামে ৰাসত্থায উপগতেন অধিট্ঠিতং সঙ্ঘাটিং ৰিনা সেসচীৰরেহি পল্লত্থিকায নিসীদিতুং ৰট্টতী’’তি ৰুত্তং।
2811.Saṅghāṭipallatthikamupāgatoti ettha saṅghāṭīti saṅghāṭināmena adhiṭṭhitacīvaramāha. Saṅghāṭipallatthikaṃ upagatena yutto hutvāti attho. Na nisīdeyyāti vihāre vā antaraghare vā yattha katthaci na nisīdeyya. ‘‘Saṅghāṭīti nāmena adhiṭṭhitacīvaravohārappattamadhiṭṭhitacīvaraṃ ‘saṅghāṭī’ti vutta’’nti nissandehe, khuddasikkhāvaṇṇanāyampi ‘‘saṅghāṭiyā na pallattheti adhiṭṭhitacīvarena vihāre vā antaraghare vā pallatthiko na kātabbo’’ti vuttaṃ. Aṭṭhakathāyaṃ pana ‘‘antogāme vāsatthāya upagatena adhiṭṭhitaṃ saṅghāṭiṃ vinā sesacīvarehi pallatthikāya nisīdituṃ vaṭṭatī’’ti vuttaṃ.
কিঞ্চি কীল়ং ন কীল়েয্যাতি জুতকীল়াদিকং যং কিঞ্চি কাযিকৰাচসিককীল়িকং ন কীল়েয্য। ন চ গাহযেতি ন চ গাহাপেয্য, ন হরাপেয্যাতি অত্থো।
Kiñcikīḷaṃ na kīḷeyyāti jutakīḷādikaṃ yaṃ kiñci kāyikavācasikakīḷikaṃ na kīḷeyya. Na ca gāhayeti na ca gāhāpeyya, na harāpeyyāti attho.
২৮১২. দাঠিকাযপীতি মস্সুম্হি। উগ্গতন্তি এত্থ ‘‘বীভচ্ছ’’ন্তি সেসো। অঞ্ঞন্তি অপলিতং। তাদিসন্তি বীভচ্ছং।
2812.Dāṭhikāyapīti massumhi. Uggatanti ettha ‘‘bībhaccha’’nti seso. Aññanti apalitaṃ. Tādisanti bībhacchaṃ.
২৮১৩. ‘‘অগিলানো’’তি ইমিনা গিলানস্স অনাপত্তিভাৰং দীপেতি। ‘‘ধারেয্যা’’তি ইমিনা সুদ্ধকত্তুনিদ্দেসেন অগিলানস্সপি পরং ধারাপনে, পরস্স ধারণসাদিযনে চ অনাপত্তীতি ৰিঞ্ঞাযতীতি। অত্তনো গুত্তত্থং, চীৰরাদীনং গুত্তত্থঞ্চ ৰট্টতীতি যোজনা। তত্রাযং ৰিনিচ্ছযো (চূল়ৰ॰ অট্ঠ॰ ২৭০) – যস্স কাযদাহো ৰা পিত্তকোপো ৰা হোতি, চক্খু ৰা দুব্বলং, অঞ্ঞো ৰা কোচি আবাধো ৰিনা ছত্তেন উপ্পজ্জতি, তস্স গামে ৰা অরঞ্ঞে ৰা ছত্তং ৰট্টতি। ৰাল়মিগচোরভযেসু অত্তগুত্তত্থং, ৰস্সে পন চীৰরগুত্তত্থম্পি ৰট্টতি। একপণ্ণচ্ছত্তং পন সব্বত্থেৰ ৰট্টতি। ‘‘একপণ্ণচ্ছত্তং নাম তালপত্ত’’ন্তি গণ্ঠিপদেসু ৰুত্তন্তি।
2813.‘‘Agilāno’’ti iminā gilānassa anāpattibhāvaṃ dīpeti. ‘‘Dhāreyyā’’ti iminā suddhakattuniddesena agilānassapi paraṃ dhārāpane, parassa dhāraṇasādiyane ca anāpattīti viññāyatīti. Attano guttatthaṃ, cīvarādīnaṃ guttatthañca vaṭṭatīti yojanā. Tatrāyaṃ vinicchayo (cūḷava. aṭṭha. 270) – yassa kāyadāho vā pittakopo vā hoti, cakkhu vā dubbalaṃ, añño vā koci ābādho vinā chattena uppajjati, tassa gāme vā araññe vā chattaṃ vaṭṭati. Vāḷamigacorabhayesu attaguttatthaṃ, vasse pana cīvaraguttatthampi vaṭṭati. Ekapaṇṇacchattaṃ pana sabbattheva vaṭṭati. ‘‘Ekapaṇṇacchattaṃ nāma tālapatta’’nti gaṇṭhipadesu vuttanti.
২৮১৪. হত্থিসোণ্ডাকারো অভেদোপচারেন ‘‘হত্থিসোণ্ড’’ন্তি ৰুত্তো। এৰমুপরিপি। চীৰরস্স নামধেয্যং ‘‘ৰসন’’ন্তি ইদং। ‘‘নিৰাসেন্তস্স দুক্কট’’ন্তি পদদ্ৰযঞ্চ ‘‘হত্থিসোণ্ড’’ন্তিআদীহি সব্বপদেহি পচ্চেকং যোজেতব্বং। ৰেল্লিযন্তি এত্থ গাথাবন্ধৰসেন সং-সদ্দলোপো, সংৰেল্লিযন্তি অত্থো।
2814. Hatthisoṇḍākāro abhedopacārena ‘‘hatthisoṇḍa’’nti vutto. Evamuparipi. Cīvarassa nāmadheyyaṃ ‘‘vasana’’nti idaṃ. ‘‘Nivāsentassa dukkaṭa’’nti padadvayañca ‘‘hatthisoṇḍa’’ntiādīhi sabbapadehi paccekaṃ yojetabbaṃ. Velliyanti ettha gāthābandhavasena saṃ-saddalopo, saṃvelliyanti attho.
এত্থ হত্থিসোণ্ডং (চূল়ৰ॰ অট্ঠ॰ ২৮০) নাম নাভিমূলতো হত্থিসোণ্ডসণ্ঠানং ওলম্বকং কত্ৰা নিৰত্থং চোল়িকিত্থীনং নিৰাসনং ৰিয। চতুক্কণ্ণং নাম উপরিতো দ্ৰে, হেট্ঠতো দ্ৰেতি এৰং চত্তারো কণ্ণে দস্সেত্ৰা নিৰত্থং। মচ্ছৰাল়কং নাম একতো দসন্তং একতো পাসন্তং ওলম্বেত্ৰা নিৰত্থং। সংৰেল্লিযন্তি মল্লকম্মকারাদযো ৰিয কচ্ছং বন্ধিত্ৰা নিৰাসনং। তালৰণ্টকং নাম তালৰণ্টাকারেন সাটকং ওলম্বেত্ৰা নিৰাসনং। চ-সদ্দেন সতৰলিকং সঙ্গণ্হাতি। সতৰলিকং নাম দীঘসাটকং অনেকক্খত্তুং ওভঞ্জিত্ৰা ওৰট্টিকং করোন্তেন নিৰত্থং, ৰামদক্খিণপস্সেসু ৰা নিরন্তরং ৰলিযো দস্সেত্ৰা নিৰত্থং। সচে পন জাণুতো পট্ঠায একা ৰা দ্ৰে ৰা ৰলিযো পঞ্ঞাযন্তি, ৰট্টতি। এৰং নিৰাসেতুং গিলানস্সপি মগ্গপটিপন্নস্সপি ন ৰট্টতি।
Ettha hatthisoṇḍaṃ (cūḷava. aṭṭha. 280) nāma nābhimūlato hatthisoṇḍasaṇṭhānaṃ olambakaṃ katvā nivatthaṃ coḷikitthīnaṃ nivāsanaṃ viya. Catukkaṇṇaṃ nāma uparito dve, heṭṭhato dveti evaṃ cattāro kaṇṇe dassetvā nivatthaṃ. Macchavāḷakaṃ nāma ekato dasantaṃ ekato pāsantaṃ olambetvā nivatthaṃ. Saṃvelliyanti mallakammakārādayo viya kacchaṃ bandhitvā nivāsanaṃ. Tālavaṇṭakaṃ nāma tālavaṇṭākārena sāṭakaṃ olambetvā nivāsanaṃ. Ca-saddena satavalikaṃ saṅgaṇhāti. Satavalikaṃ nāma dīghasāṭakaṃ anekakkhattuṃ obhañjitvā ovaṭṭikaṃ karontena nivatthaṃ, vāmadakkhiṇapassesu vā nirantaraṃ valiyo dassetvā nivatthaṃ. Sace pana jāṇuto paṭṭhāya ekā vā dve vā valiyo paññāyanti, vaṭṭati. Evaṃ nivāsetuṃ gilānassapi maggapaṭipannassapi na vaṭṭati.
যম্পি মগ্গং গচ্ছন্তা একং ৰা দ্ৰে ৰা কোণে উক্খিপিত্ৰা অন্তরৰাসকস্স উপরি লগ্গেন্তি, অন্তো ৰা একং কাসাৰং তথা নিৰাসেত্ৰা বহি অপরং নিৰাসেন্তি, সব্বং ন ৰট্টতি। গিলানো পন অন্তোকাসাৰস্স ওৰট্টিকং দস্সেত্ৰা অপরং উপরি নিৰাসেতুং লভতি। অগিলানেন দ্ৰে নিৰাসেন্তেন সগুণং কত্ৰা নিৰাসেতব্বানি। ইতি যঞ্চ ইধ পটিক্খিত্তং, যঞ্চ সেখিযৰণ্ণনাযং, তং সব্বং ৰজ্জেত্ৰা নিব্বিকারং তিমণ্ডলং পটিচ্ছাদেন্তেন পরিমণ্ডলং নিৰাসেতব্বং। যং কিঞ্চি ৰিকারং করোন্তো দুক্কটা ন মুচ্চতি।
Yampi maggaṃ gacchantā ekaṃ vā dve vā koṇe ukkhipitvā antaravāsakassa upari laggenti, anto vā ekaṃ kāsāvaṃ tathā nivāsetvā bahi aparaṃ nivāsenti, sabbaṃ na vaṭṭati. Gilāno pana antokāsāvassa ovaṭṭikaṃ dassetvā aparaṃ upari nivāsetuṃ labhati. Agilānena dve nivāsentena saguṇaṃ katvā nivāsetabbāni. Iti yañca idha paṭikkhittaṃ, yañca sekhiyavaṇṇanāyaṃ, taṃ sabbaṃ vajjetvā nibbikāraṃ timaṇḍalaṃ paṭicchādentena parimaṇḍalaṃ nivāsetabbaṃ. Yaṃ kiñci vikāraṃ karonto dukkaṭā na muccati.
২৮১৫. গিহিপারুপনন্তি ‘‘সেতপটপারুতং (চূল়ৰ॰ অট্ঠ॰ ২৮০) পরিব্বাজকপারুতং একসাটকপারুতং সোণ্ডপারুতং অন্তেপুরিকপারুতং মহাজেট্ঠকপারুতং কুটিপৰেসকপারুতং ব্রাহ্মণপারুতং পাল়িকারকপারুত’’ন্তি এৰমাদিপরিমণ্ডললক্খণতো অঞ্ঞথা পারুতং, সব্বমেতং গিহিপারুতং নাম। তস্মা যথা সেতপটা অড্ঢপালকনিগণ্ঠা পারুপন্তি, যথা চ একচ্চে পরিব্বাজকা উরং ৰিৰরিত্ৰা দ্ৰীসু অংসকূটেসু পাৰুরণং ঠপেন্তি, যথা চ একসাটকা মনুস্সা নিৰত্থসাটকস্স একেনন্তেন পিট্ঠিং পারুপিত্ৰা উভো কণ্ণে উভোসু অংসকূটেসু ঠপেন্তি, যথা চ সুরাসোণ্ডাদযো সাটকেন গীৰং পরিক্খিপন্তা উভো অন্তে উদরে ৰা ওলম্বেন্তি, পিট্ঠিযং ৰা খিপন্তি, যথা চ অন্তেপুরিকাযো অক্খিতারকমত্তং দস্সেত্ৰা ওগুণ্ঠিকং পারুপন্তি, যথা চ মহাজেট্ঠা দীঘসাটকং নিৰাসেত্ৰা তস্সেৰ একেনন্তেন সকলসরীরং পারুপন্তি, যথা চ কস্সকা খেত্তকুটিং পৰিসন্তা সাটকং পলিৰেঠেত্ৰা উপকচ্ছকে পক্খিপিত্ৰা তস্সেৰ একেনন্তেন সরীরং পারুপন্তি, যথা চ ব্রাহ্মণা উভিন্নং উপকচ্ছকানং অন্তরেন সাটকং পৰেসেত্ৰা অংসকূটেসু পক্খিপন্তি, যথা চ পাল়িকারকো ভিক্খু একংসপারুপনেন পারুতং ৰামবাহং ৰিৰরিত্ৰা চীৰরং অংসকূটং আরোপেতি, এৰং অপারুপিত্ৰা সব্বেপি এতে, অঞ্ঞে চ এৰরূপে পারুপনদোসে ৰজ্জেত্ৰা নিব্বিকারং পরিমণ্ডলং পারুপিতব্বং। তথা অপারুপিত্ৰা আরামে ৰা অন্তরঘরে ৰা অনাদরেন যং কিঞ্চি ৰিকারং করোন্তস্স দুক্কটং। পরিমণ্ডলতো ৰিমুত্তলক্খণনিৰাসনপারুপনদোসে ৰজ্জেত্ৰা পরিমণ্ডলভাৰোযেৰ ৰুত্তলক্খণো অধিপ্পেতোতি অত্থো।
2815.Gihipārupananti ‘‘setapaṭapārutaṃ (cūḷava. aṭṭha. 280) paribbājakapārutaṃ ekasāṭakapārutaṃ soṇḍapārutaṃ antepurikapārutaṃ mahājeṭṭhakapārutaṃ kuṭipavesakapārutaṃ brāhmaṇapārutaṃ pāḷikārakapāruta’’nti evamādiparimaṇḍalalakkhaṇato aññathā pārutaṃ, sabbametaṃ gihipārutaṃ nāma. Tasmā yathā setapaṭā aḍḍhapālakanigaṇṭhā pārupanti, yathā ca ekacce paribbājakā uraṃ vivaritvā dvīsu aṃsakūṭesu pāvuraṇaṃ ṭhapenti, yathā ca ekasāṭakā manussā nivatthasāṭakassa ekenantena piṭṭhiṃ pārupitvā ubho kaṇṇe ubhosu aṃsakūṭesu ṭhapenti, yathā ca surāsoṇḍādayo sāṭakena gīvaṃ parikkhipantā ubho ante udare vā olambenti, piṭṭhiyaṃ vā khipanti, yathā ca antepurikāyo akkhitārakamattaṃ dassetvā oguṇṭhikaṃ pārupanti, yathā ca mahājeṭṭhā dīghasāṭakaṃ nivāsetvā tasseva ekenantena sakalasarīraṃ pārupanti, yathā ca kassakā khettakuṭiṃ pavisantā sāṭakaṃ paliveṭhetvā upakacchake pakkhipitvā tasseva ekenantena sarīraṃ pārupanti, yathā ca brāhmaṇā ubhinnaṃ upakacchakānaṃ antarena sāṭakaṃ pavesetvā aṃsakūṭesu pakkhipanti, yathā ca pāḷikārako bhikkhu ekaṃsapārupanena pārutaṃ vāmabāhaṃ vivaritvā cīvaraṃ aṃsakūṭaṃ āropeti, evaṃ apārupitvā sabbepi ete, aññe ca evarūpe pārupanadose vajjetvā nibbikāraṃ parimaṇḍalaṃ pārupitabbaṃ. Tathā apārupitvā ārāme vā antaraghare vā anādarena yaṃ kiñci vikāraṃ karontassa dukkaṭaṃ. Parimaṇḍalato vimuttalakkhaṇanivāsanapārupanadose vajjetvā parimaṇḍalabhāvoyeva vuttalakkhaṇo adhippetoti attho.
২৮১৬. লোকাযতং ন ৰাচেয্যাতি ‘‘সব্বং উচ্ছিট্ঠং, সব্বং অনুচ্ছিট্ঠং, সেতো কাকো, কাল়ো বকো ইমিনা চ ইমিনা চ কারণেনা’’তি এৰমাদিনিরত্থককারণপটিসংযুত্তং তিত্থিযসত্থং অঞ্ঞেসং ন ৰাচেয্য। ন চ তং পরিযাপুণেতি তং লোকাযতং ন চ পরিযাপুণেয্য ন উগ্গণ্হেয্য। তিরচ্ছানৰিজ্জাতি হত্থিসিপ্পঅস্সসিপ্পধনুসিপ্পাদিকা পরোপঘাতকরা ৰিজ্জা চ। ভিক্খুনা ন পরিযাপুণিতব্বা, ন ৰাচেতব্বাতি যোজনা।
2816.Lokāyataṃ na vāceyyāti ‘‘sabbaṃ ucchiṭṭhaṃ, sabbaṃ anucchiṭṭhaṃ, seto kāko, kāḷo bako iminā ca iminā ca kāraṇenā’’ti evamādiniratthakakāraṇapaṭisaṃyuttaṃ titthiyasatthaṃ aññesaṃ na vāceyya. Na ca taṃ pariyāpuṇeti taṃ lokāyataṃ na ca pariyāpuṇeyya na uggaṇheyya. Tiracchānavijjāti hatthisippaassasippadhanusippādikā paropaghātakarā vijjā ca. Bhikkhunā na pariyāpuṇitabbā, na vācetabbāti yojanā.
২৮১৭. সব্বাচামরিবীজনীতি সেতাদিৰণ্ণেহি সব্বেহি চমরৰালেহি কতা বীজনী। ন চালিম্পেয্য দাযং ৰাতি দৰডাহাদিউপদ্দৰনিৰারণায অনুঞ্ঞাতং পটগ্গিদানকারণং ৰিনা অরঞ্ঞং অগ্গিনা ন আলিম্পেয্য। দৰডাহে পন আগচ্ছন্তে অনুপসম্পন্নে অসতি পটগ্গিং দাতুং, অপ্পহরিতকরণেন ৰা পরিখাখণনেন ৰা পরিত্তাণং কাতুং, সেনাসনং পত্তং ৰা অপ্পত্তং ৰা অগ্গিং অল্লসাখং ভঞ্জিত্ৰা নিব্বাপেতুঞ্চ লভতি। উদকেন পন কপ্পিযেনেৰ লভতি, নেতরেন। অনুপসম্পন্নে পন সতি তেনেৰ কপ্পিযৰোহারেন কারাপেতব্বং। মুখং ন চ লঞ্জেতি মনোসিলাদিনা মুখং ন লিম্পেয্য, তিলকেন অঙ্গং ন করেয্যাতি অত্থো।
2817.Sabbācāmaribījanīti setādivaṇṇehi sabbehi camaravālehi katā bījanī. Na cālimpeyya dāyaṃ vāti davaḍāhādiupaddavanivāraṇāya anuññātaṃ paṭaggidānakāraṇaṃ vinā araññaṃ agginā na ālimpeyya. Davaḍāhe pana āgacchante anupasampanne asati paṭaggiṃ dātuṃ, appaharitakaraṇena vā parikhākhaṇanena vā parittāṇaṃ kātuṃ, senāsanaṃ pattaṃ vā appattaṃ vā aggiṃ allasākhaṃ bhañjitvā nibbāpetuñca labhati. Udakena pana kappiyeneva labhati, netarena. Anupasampanne pana sati teneva kappiyavohārena kārāpetabbaṃ. Mukhaṃ na ca lañjeti manosilādinā mukhaṃ na limpeyya, tilakena aṅgaṃ na kareyyāti attho.
২৮১৮. উভতোকাজন্তি উভতোকোটিযা ভারৰহনকোটিকাজং। অন্তরকাজকন্তি উভযকোটিযা ঠিতৰাহকেহি ৰহিতব্বং মজ্ঝেভারযুত্তকাজং। সীসক্খন্ধকটিভারাদযো হেট্ঠা ৰুত্তলক্খণাৰ।
2818.Ubhatokājanti ubhatokoṭiyā bhāravahanakoṭikājaṃ. Antarakājakanti ubhayakoṭiyā ṭhitavāhakehi vahitabbaṃ majjhebhārayuttakājaṃ. Sīsakkhandhakaṭibhārādayo heṭṭhā vuttalakkhaṇāva.
২৮১৯. যো ভিক্খু ৰড্ঢকিঅঙ্গুলেন অট্ঠঙ্গুলাধিকং ৰা তেনেৰ অঙ্গুলেন চতুরঙ্গুলপচ্ছিমং ৰা দন্তকট্ঠং খাদতি, এৰং খাদতো তস্স আপত্তি দুক্কটং হোতীতি যোজনা।
2819. Yo bhikkhu vaḍḍhakiaṅgulena aṭṭhaṅgulādhikaṃ vā teneva aṅgulena caturaṅgulapacchimaṃ vā dantakaṭṭhaṃ khādati, evaṃ khādato tassa āpatti dukkaṭaṃ hotīti yojanā.
২৮২০. কিচ্চে সতিপীতি সুক্খকট্ঠাদিগ্গহণকিচ্চে পন সতি। পোরিসন্তি পুরিসপ্পমাণং, ব্যামমত্তন্তি ৰুত্তং হোতি। আপদাসূতি ৰাল়মিগাদযো ৰা দিস্ৰা মগ্গমূল়্হো ৰা দিসা ওলোকেতুকামো হুত্ৰা দৰডাহং ৰা উদকোঘং ৰা আগচ্ছন্তং দিস্ৰা ৰা এৰরূপাসু আপদাসু। ৰট্টতেৰাভিরূহিতুন্তি অতিউচ্চম্পি রুক্খং আরোহিতুং ৰট্টতি এৰ।
2820.Kicce satipīti sukkhakaṭṭhādiggahaṇakicce pana sati. Porisanti purisappamāṇaṃ, byāmamattanti vuttaṃ hoti. Āpadāsūti vāḷamigādayo vā disvā maggamūḷho vā disā oloketukāmo hutvā davaḍāhaṃ vā udakoghaṃ vā āgacchantaṃ disvā vā evarūpāsu āpadāsu. Vaṭṭatevābhirūhitunti atiuccampi rukkhaṃ ārohituṃ vaṭṭati eva.
২৮২১. সচে অকল্লকো গিলানো ন সিযা, লসুণং মাগধং আমকং ভণ্ডিকলসুণং ন চ খাদেয্য নেৰ পরিভুঞ্জেয্যাতি যোজনা। ভণ্ডিকলসুণং নাম চতুমিঞ্জতো পট্ঠায বহুমিঞ্জং। পলণ্ডুকভঞ্জনকাদিলসুণে মগধেসু জাতত্তেপি ন দোসো। লসুণৰিভাগো হেট্ঠা দস্সিতোযেৰ। গিলানস্স পন লসুণং খাদিতুং ৰট্টতি। যথাহ – ‘‘অনুজানামি, ভিক্খৰে, আবাধপচ্চযা লসুণং খাদিতু’’ন্তি (চূল়ৰ॰ ২৮৯)। আবাধপচ্চযাতি যস্স আবাধস্স লসুণং ভেসজ্জং হোতি, তপ্পচ্চযাতি অত্থো। বুদ্ধৰচনন্তি সঙ্গীতিত্তযারুল়্হা পিটকত্তযপাল়ি। অঞ্ঞথাতি সক্কটাদিখলিতৰচনমযং ৰাচনামগ্গং ন রোপেতব্বং, তথা ন ঠপেতব্বন্তি ৰুত্তং হোতি।
2821. Sace akallako gilāno na siyā, lasuṇaṃ māgadhaṃ āmakaṃ bhaṇḍikalasuṇaṃ na ca khādeyya neva paribhuñjeyyāti yojanā. Bhaṇḍikalasuṇaṃ nāma catumiñjato paṭṭhāya bahumiñjaṃ. Palaṇḍukabhañjanakādilasuṇe magadhesu jātattepi na doso. Lasuṇavibhāgo heṭṭhā dassitoyeva. Gilānassa pana lasuṇaṃ khādituṃ vaṭṭati. Yathāha – ‘‘anujānāmi, bhikkhave, ābādhapaccayā lasuṇaṃ khāditu’’nti (cūḷava. 289). Ābādhapaccayāti yassa ābādhassa lasuṇaṃ bhesajjaṃ hoti, tappaccayāti attho. Buddhavacananti saṅgītittayāruḷhā piṭakattayapāḷi. Aññathāti sakkaṭādikhalitavacanamayaṃ vācanāmaggaṃ na ropetabbaṃ, tathā na ṭhapetabbanti vuttaṃ hoti.
২৮২২. খিপিতেতি যেন কেনচি খিপিতে। ‘‘জীৰা’’তি ন ৰত্তব্বন্তি যোজনা। ভিক্খুনা খিপিতে গিহিনা ‘‘জীৰথা’’তি ৰুত্তেন পুন ‘‘চিরং জীৰা’’তি ৰত্তুং ৰট্টতীতি যোজনা। ‘‘চির’’ন্তি পদে সতিপি ৰট্টতি।
2822.Khipiteti yena kenaci khipite. ‘‘Jīvā’’ti na vattabbanti yojanā. Bhikkhunā khipite gihinā ‘‘jīvathā’’ti vuttena puna ‘‘ciraṃ jīvā’’ti vattuṃ vaṭṭatīti yojanā. ‘‘Cira’’nti pade satipi vaṭṭati.
২৮২৩. আকোটেন্তস্সাতি কাযেন ৰা কাযপটিবদ্ধাদীহি ৰা পহরন্তস্স। পুপ্ফসংকিণ্ণেতি পুপ্ফসন্থতে।
2823.Ākoṭentassāti kāyena vā kāyapaṭibaddhādīhi vā paharantassa. Pupphasaṃkiṇṇeti pupphasanthate.
২৮২৪. ন্হাপিতা পুব্বকা এতস্সাতি ন্হাপিতপুব্বকো, ন্হাপিতজাতিকোতি অত্থো। খুরভণ্ডন্তি ন্হাপিতপরিক্খারং। ন গণ্হেয্যাতি ন পরিহরেয্য। সচে যো ন্হাপিতজাতিকো হোতি, সো খুরভণ্ডং গহেত্ৰা ন হরেয্যাতি অত্থো। অঞ্ঞস্স হত্থতো গহেত্ৰা কেসচ্ছেদাদি কাতুং ৰট্টতি। উণ্ণীতি কেসকম্বলং ৰিনা উণ্ণমযা পাৰুরণজাতি। ‘‘গোনকং কুত্তকং চিত্তক’’মিচ্চাদিনা ৰুত্তভেদৰন্ততায আহ ‘‘সব্বা’’তি। উণ্ণমযং অন্তোকরিত্ৰা পারুপিতুং ৰট্টতীতি আহ ‘‘বাহিরলোমিকা’’তি। যথাহ – ‘‘ন, ভিক্খৰে, বাহিরলোমী উণ্ণীধারেতব্বা’’তি (চূল়ৰ॰ ২৪৯)। সিক্খাপদট্ঠকথাযং ‘‘উণ্ণলোমানি বহি কত্ৰা উণ্ণপাৰারং পারুপন্তি, তথা ধারেন্তস্স দুক্কটং। লোমানি অন্তো কত্ৰা পারুপিতুং ৰট্টতী’’তি (চূল়ৰ॰ অট্ঠ॰ ২৪৯)।
2824. Nhāpitā pubbakā etassāti nhāpitapubbako, nhāpitajātikoti attho. Khurabhaṇḍanti nhāpitaparikkhāraṃ. Na gaṇheyyāti na parihareyya. Sace yo nhāpitajātiko hoti, so khurabhaṇḍaṃ gahetvā na hareyyāti attho. Aññassa hatthato gahetvā kesacchedādi kātuṃ vaṭṭati. Uṇṇīti kesakambalaṃ vinā uṇṇamayā pāvuraṇajāti. ‘‘Gonakaṃ kuttakaṃ cittaka’’miccādinā vuttabhedavantatāya āha ‘‘sabbā’’ti. Uṇṇamayaṃ antokaritvā pārupituṃ vaṭṭatīti āha ‘‘bāhiralomikā’’ti. Yathāha – ‘‘na, bhikkhave, bāhiralomī uṇṇīdhāretabbā’’ti (cūḷava. 249). Sikkhāpadaṭṭhakathāyaṃ ‘‘uṇṇalomāni bahi katvā uṇṇapāvāraṃ pārupanti, tathā dhārentassa dukkaṭaṃ. Lomāni anto katvā pārupituṃ vaṭṭatī’’ti (cūḷava. aṭṭha. 249).
২৮২৫. অঙ্গরাগং নাম কুঙ্কুমাদি। করোন্তস্সাতি অব্ভঞ্জন্তস্স। অকাযবন্ধনস্স গামং পৰিসতোপি দুক্কটং সমুদীরিতন্তি যোজনা। এত্থ চ অসতিযা অবন্ধিত্ৰা নিক্খন্তেন যত্থ সরতি, তত্থ বন্ধিতব্বং। ‘‘আসনসালায বন্ধিস্সামী’’তি গন্তুং ৰট্টতি। সরিত্ৰা যাৰ ন বন্ধতি, ন তাৰ পিণ্ডায চরিতব্বং।
2825.Aṅgarāgaṃ nāma kuṅkumādi. Karontassāti abbhañjantassa. Akāyabandhanassa gāmaṃ pavisatopi dukkaṭaṃ samudīritanti yojanā. Ettha ca asatiyā abandhitvā nikkhantena yattha sarati, tattha bandhitabbaṃ. ‘‘Āsanasālāya bandhissāmī’’ti gantuṃ vaṭṭati. Saritvā yāva na bandhati, na tāva piṇḍāya caritabbaṃ.
২৮২৬. সব্বং আযুধং ৰিনা সব্বং লোহজং লোহমযভণ্ডঞ্চ পত্তং, সঙ্কমনীযপাদুকং, যথাৰুত্তলক্খণং পল্লঙ্কং, আসন্দিঞ্চ ৰিনা সব্বং দারুজং দারুমযভণ্ডঞ্চ ৰুত্তলক্খণমেৰ কতকং , কুম্ভকারিকং ধনিযস্সেৰ সব্বমত্তিকামযং কুটিঞ্চ ৰিনা সব্বং মত্তিকামযং ভণ্ডঞ্চ কপ্পিযন্তি যোজনা।
2826. Sabbaṃ āyudhaṃ vinā sabbaṃ lohajaṃ lohamayabhaṇḍañca pattaṃ, saṅkamanīyapādukaṃ, yathāvuttalakkhaṇaṃ pallaṅkaṃ, āsandiñca vinā sabbaṃ dārujaṃ dārumayabhaṇḍañca vuttalakkhaṇameva katakaṃ, kumbhakārikaṃ dhaniyasseva sabbamattikāmayaṃ kuṭiñca vinā sabbaṃ mattikāmayaṃ bhaṇḍañca kappiyanti yojanā.
খুদ্দকৰত্থুক্খন্ধককথাৰণ্ণনা।
Khuddakavatthukkhandhakakathāvaṇṇanā.
