| Library / Tipiṭaka / তিপিটক • Tipiṭaka / ৰিভঙ্গ-অনুটীকা • Vibhaṅga-anuṭīkā |
১৭. খুদ্দকৰত্থুৰিভঙ্গো
17. Khuddakavatthuvibhaṅgo
১. এককনিদ্দেসৰণ্ণনা
1. Ekakaniddesavaṇṇanā
৮৪৩-৪. অত্থিপটিচ্চং নামাতি অত্থিতা পটিচ্চত্থো নাম, অসতিপি সহজাতপুরেজাতাদিভাৰে যস্মিং সতি যং হোতি, সো তস্স পচ্চযোতি কত্ৰা যথা তথা অত্থিতামত্তং ইধ পটিচ্চত্থোতি অত্থো। তং পন পটিচ্চত্থং ব্যতিরেকমুখেন পাকটতরং কাতুং ‘‘যথা’’তিআদিমাহ। তত্থ নিস্সযাদিপচ্চযভাৰেন পটিচ্চাতি ৰুত্তন্তি নিস্সযাদিপচ্চযভাৰতো পচ্চযভূতং চক্খাদি ‘‘পটিচ্চা’’তি ৰুত্তং। একিস্সা সেণিযাতি অট্ঠারসসু সেণীসু মযং অমুকায সেণিযা জাতাম্হ, ন অঞ্ঞে ৰিয অপ্পঞ্ঞাতাতি এৰমেত্থ অত্থং ৰদন্তি।
843-4. Atthipaṭiccaṃnāmāti atthitā paṭiccattho nāma, asatipi sahajātapurejātādibhāve yasmiṃ sati yaṃ hoti, so tassa paccayoti katvā yathā tathā atthitāmattaṃ idha paṭiccatthoti attho. Taṃ pana paṭiccatthaṃ byatirekamukhena pākaṭataraṃ kātuṃ ‘‘yathā’’tiādimāha. Tattha nissayādipaccayabhāvena paṭiccāti vuttanti nissayādipaccayabhāvato paccayabhūtaṃ cakkhādi ‘‘paṭiccā’’ti vuttaṃ. Ekissā seṇiyāti aṭṭhārasasu seṇīsu mayaṃ amukāya seṇiyā jātāmha, na aññe viya appaññātāti evamettha atthaṃ vadanti.
পুরতো করণং পমুখভাৰকরণং। নিধানরাসীতি নিদহিত্ৰা ঠপিতধননিচযো। যসোতি ইস্সরিযং। তং পন যেসু ৰত্ততি, তেসু পট্ঠাপকআণাকরণেহি পাকটো হোতীতি ‘‘পট্ঠাপকমদো, আণাকরণমদো’’তি চ ৰুত্তং।
Purato karaṇaṃ pamukhabhāvakaraṇaṃ. Nidhānarāsīti nidahitvā ṭhapitadhananicayo. Yasoti issariyaṃ. Taṃ pana yesu vattati, tesu paṭṭhāpakaāṇākaraṇehi pākaṭo hotīti ‘‘paṭṭhāpakamado, āṇākaraṇamado’’ti ca vuttaṃ.
৮৪৫. ৰত্থুনাতি জাতিআদিপৰত্তিহেতুনা।
845. Vatthunāti jātiādipavattihetunā.
৮৪৬. পতিট্ঠাভাৰোতি কুসলকম্মেসু পতিট্ঠানাভাৰো, সো পন যস্মা কুসলকিরিযায ঠানং ন হোতি, তস্মা ‘‘কুসলকরণে অট্ঠান’’ন্তি আহ। পমাদসঙ্খাতস্স অত্থস্স এৰমাদিকো পরিযাযোতি যোজনা। আদি-সদ্দেন ‘‘ৰচীদুচ্চরিতে, মনোদুচ্চরিতে চিত্তস্স ৰোস্সগ্গো, মক্খো, পল়াসো’’তি চ এৰমাদিকস্স সঙ্গহো দট্ঠব্বো। ‘‘পমাদো পমজ্জনাদী’’তিআদিকো তদত্থপ্পকাসকো, ‘‘চিত্তস্স ৰোস্সগ্গো ৰোস্সগ্গানুপ্পাদন’’ন্তিআদিকো তপ্পরিযাযপ্পকাসকো ব্যঞ্জনপরিযাযো চ অপরিযন্তোতি সম্বন্ধো। ‘‘চত্তারো খন্ধে দস্সেতী’’তি ইমিনা সতিৰোস্সগ্গাকারপ্পৰত্তা চত্তারো অকুসলক্খন্ধা পমাদোতি ৰদতি।
846. Patiṭṭhābhāvoti kusalakammesu patiṭṭhānābhāvo, so pana yasmā kusalakiriyāya ṭhānaṃ na hoti, tasmā ‘‘kusalakaraṇe aṭṭhāna’’nti āha. Pamādasaṅkhātassa atthassa evamādiko pariyāyoti yojanā. Ādi-saddena ‘‘vacīduccarite, manoduccarite cittassa vossaggo, makkho, paḷāso’’ti ca evamādikassa saṅgaho daṭṭhabbo. ‘‘Pamādo pamajjanādī’’tiādiko tadatthappakāsako, ‘‘cittassa vossaggo vossaggānuppādana’’ntiādiko tappariyāyappakāsako byañjanapariyāyo ca apariyantoti sambandho. ‘‘Cattāro khandhe dassetī’’ti iminā sativossaggākārappavattā cattāro akusalakkhandhā pamādoti vadati.
৮৪৭. অনিৰাতৰুত্তিতায হেতুভূতো চিত্তসম্পগ্গহো মানৰিসেসো।
847. Anivātavuttitāya hetubhūto cittasampaggaho mānaviseso.
৮৪৮. উত্তরভাৰো উত্তরিযং, করণেন উত্তরিযং করণুত্তরিযং, সারম্ভেন পরস্স কিরিযতো উত্তরিকিরিযা।
848. Uttarabhāvo uttariyaṃ, karaṇena uttariyaṃ karaṇuttariyaṃ, sārambhena parassa kiriyato uttarikiriyā.
৮৪৯. নেরুত্তিকৰিধানেনাতি ই-কারচ্চ-কারানঞ্চ র-কারতাপাদনেন।
849. Neruttikavidhānenāti i-kāracca-kārānañca ra-kāratāpādanena.
অত্তহিতং অত্তাতি উত্তরপদলোপেন নিদ্দেসমাহ যথা ‘‘রূপভৰো রূপং, ভীমসেনো ভীমো’’তি চ। আদিন্নো, পত্তো ৰা অত্থো অত্তাতি নিরুত্তিনযেন পদসিদ্ধি ৰেদিতব্বা।
Attahitaṃ attāti uttarapadalopena niddesamāha yathā ‘‘rūpabhavo rūpaṃ, bhīmaseno bhīmo’’ti ca. Ādinno, patto vā attho attāti niruttinayena padasiddhi veditabbā.
মুদ্দিতস্সাতি অঙ্কিতস্স।
Mudditassāti aṅkitassa.
৮৫০. জানন্তস্সেৰ মহাজনস্স। উপাদানাদিপচ্চযেতি ইন্ধনুদকচীৰরাদিকে পারিপূরিহেতুকে।
850. Jānantasseva mahājanassa. Upādānādipaccayeti indhanudakacīvarādike pāripūrihetuke.
৮৫১. গণ্ঠিকা সযং গণ্ঠিকরণতো। পতিরূপৰচনতো, অঞ্ঞেসং গণ্ঠিভেদতো চ গণ্ঠিভূতা।
851. Gaṇṭhikā sayaṃ gaṇṭhikaraṇato. Patirūpavacanato, aññesaṃ gaṇṭhibhedato ca gaṇṭhibhūtā.
৮৫২. অভেজ্জন্তরতায সমাসেৰিততায সুট্ঠু আসেৰিততায।
852. Abhejjantaratāya samāsevitatāya suṭṭhu āsevitatāya.
৮৫৩. চিরকালপরিভাৰিতত্তেন তেমনকরণং অল্লভাৰকরণং, লোভৰসেন অৰস্সৰনন্তি অত্থো।
853. Cirakālaparibhāvitattena temanakaraṇaṃ allabhāvakaraṇaṃ, lobhavasena avassavananti attho.
এৰং সন্তে কথং খীযনন্তি নিদ্দেসোতি আহ ‘‘খীযনন্তি চা’’তিআদি।
Evaṃ sante kathaṃ khīyananti niddesoti āha ‘‘khīyananti cā’’tiādi.
৮৫৪. চীৰরমণ্ডনাদীনন্তি চীৰরমণ্ডনা পত্তমণ্ডনা সেনাসনমণ্ডনাতি ইমেসং। ইদানি তং ৰিসেসনভাৰং যোজেত্ৰা দস্সেতুং ‘‘চীৰরেন হী’’তিআদি ৰুত্তং।
854. Cīvaramaṇḍanādīnanti cīvaramaṇḍanā pattamaṇḍanā senāsanamaṇḍanāti imesaṃ. Idāni taṃ visesanabhāvaṃ yojetvā dassetuṃ ‘‘cīvarena hī’’tiādi vuttaṃ.
৮৫৫. সভাগরহিতো, সভাগপটিপক্খো ৰা অসভাগো, অননুকূলানং পটিক্কূলতা ৰা। তেনাহ ‘‘মানথদ্ধতা, ৰিরোধো ৰা’’তি।
855. Sabhāgarahito, sabhāgapaṭipakkho vā asabhāgo, ananukūlānaṃ paṭikkūlatā vā. Tenāha ‘‘mānathaddhatā, virodho vā’’ti.
৮৫৬. সঙ্কম্পনা উক্কণ্ঠনাৰসেন অনৰট্ঠানং, অনৰধানং ৰা। তস্স তস্স আরম্মণস্স তণ্হাযনা।
856. Saṅkampanā ukkaṇṭhanāvasena anavaṭṭhānaṃ, anavadhānaṃ vā. Tassa tassa ārammaṇassa taṇhāyanā.
৮৫৭. কাযস্সাতি নামকাযস্স। তস্মিঞ্হি অৰিপ্ফারিকে রূপকাযোপি অৰিপ্ফারিকো হোতি।
857. Kāyassāti nāmakāyassa. Tasmiñhi avipphārike rūpakāyopi avipphāriko hoti.
৮৬০. রাগাদীনন্তি রাগমোহঅহিরিকানোত্তপ্পৰিচিকিচ্ছাদীনং।
860. Rāgādīnanti rāgamohaahirikānottappavicikicchādīnaṃ.
৮৬১. তিৰিধম্পি কুহনৰত্থুং দস্সেতুন্তি সম্বন্ধো। তত্থাতি মহানিদ্দেসে। ‘‘তত্থ কতমা কুহনা লাভসক্কারসিলোকসন্নিস্সিতস্সা’’তিআদিনা (ৰিভ॰ ৮৬১) ইধ খুদ্দকৰিভঙ্গে আগতং দেসনানযং নিস্সায মহানিদ্দেসদেসনা পৰত্তাতি আহ ‘‘নিস্সযভূতায ইমায পাল়িযা’’তি।
861. Tividhampi kuhanavatthuṃ dassetunti sambandho. Tatthāti mahāniddese. ‘‘Tattha katamā kuhanā lābhasakkārasilokasannissitassā’’tiādinā (vibha. 861) idha khuddakavibhaṅge āgataṃ desanānayaṃ nissāya mahāniddesadesanā pavattāti āha ‘‘nissayabhūtāya imāya pāḷiyā’’ti.
অন্তরহিতানীতি অন্তৰিকলানি ছিন্দন্তানি।
Antarahitānīti antavikalāni chindantāni.
লাভসক্কারসিলোকহেতু সম্ভাৰনাধিপ্পাযেন সংযতাকারদস্সনং কোহঞ্ঞন্তি আহ ‘‘পাপিচ্ছতায নিরত্থককাযৰচীৰিপ্ফন্দনিগ্গহণং কোরজ’’ন্তি। যো সংৰেগবহুলো কুক্কুচ্চকো পুব্বেনাপরং অত্তনোপি কিরিযং পরিসঙ্কন্তো পচ্চৰেক্খমানো তিট্ঠতি, তাদিসং ৰিয অত্তানং দস্সেন্তো ‘‘অতিপরিসঙ্কিতো’’তি ৰুত্তো।
Lābhasakkārasilokahetu sambhāvanādhippāyena saṃyatākāradassanaṃ kohaññanti āha ‘‘pāpicchatāya niratthakakāyavacīvipphandaniggahaṇaṃ koraja’’nti. Yo saṃvegabahulo kukkuccako pubbenāparaṃ attanopi kiriyaṃ parisaṅkanto paccavekkhamāno tiṭṭhati, tādisaṃ viya attānaṃ dassento ‘‘atiparisaṅkito’’ti vutto.
৮৬৪. পসংসামুখেন নিন্দনন্তি পসংসাৰত্থুতো খিপনং বহি ছড্ডনং যথা ‘‘অদাযকং অহো দানপতী’’তি।
864. Pasaṃsāmukhena nindananti pasaṃsāvatthuto khipanaṃ bahi chaḍḍanaṃ yathā ‘‘adāyakaṃ aho dānapatī’’ti.
৮৬৫. গৰেসনকম্মন্তি অপ্পকেন লাভেন মহন্তস্স পরিযেসনকব্যাপারো।
865. Gavesanakammanti appakena lābhena mahantassa pariyesanakabyāpāro.
৮৬৬. পোক্খরং ৰুচ্চতি সুন্দরং, ৰণ্ণস্স সুন্দরভাৰো ৰণ্ণপারিপূরী হোতীতি আহ ‘‘ৰণ্ণপারিপূরী ৰা ৰণ্ণপোক্খরতা’’তি।
866. Pokkharaṃ vuccati sundaraṃ, vaṇṇassa sundarabhāvo vaṇṇapāripūrī hotīti āha ‘‘vaṇṇapāripūrī vā vaṇṇapokkharatā’’ti.
৮৭৯. সেয্যমানাদিনিদ্দেসেসূতি ‘‘তত্থ কতমো সেয্যস্স ‘সেয্যোহমস্মী’তি মানো’’তিআদিনা (ৰিভ॰ ৮৬৯) নিদ্দিট্ঠেসু নৰসু মাননিদ্দেসেসু। ‘‘সেয্যাদিপুগ্গলো’’তি ইদং তত্থ পাল়িযং সেয্যাদীনং নৰন্নং পুগ্গলানং আমট্ঠত্তা ৰুত্তং। ইধ পন পুগ্গলামসনে সতি সেয্যপুগ্গলো চ আমসিতব্বো সিযা। তেনেৰাহ ‘‘সেয্যমানভাৰেপী’’তি। সেয্যমানভাৰেপীতি পি-সদ্দো আকড্ঢকো অসেয্যমাননিদ্দেসেপি পুগ্গলামসনস্স কতত্তা। যস্স কস্সচীতি সেয্যাদীসু যস্স কস্সচি পুগ্গলস্স।
879. Seyyamānādiniddesesūti ‘‘tattha katamo seyyassa ‘seyyohamasmī’ti māno’’tiādinā (vibha. 869) niddiṭṭhesu navasu mānaniddesesu. ‘‘Seyyādipuggalo’’ti idaṃ tattha pāḷiyaṃ seyyādīnaṃ navannaṃ puggalānaṃ āmaṭṭhattā vuttaṃ. Idha pana puggalāmasane sati seyyapuggalo ca āmasitabbo siyā. Tenevāha ‘‘seyyamānabhāvepī’’ti. Seyyamānabhāvepīti pi-saddo ākaḍḍhako aseyyamānaniddesepi puggalāmasanassa katattā. Yassa kassacīti seyyādīsu yassa kassaci puggalassa.
৮৮০. পুরিমমানস্সাতি পুব্বে পৰত্তস্স সদিসমানস্স, হীনমানস্স ৰা, সদিসমানৰসেনেৰ পন পাল়ি আগতা।
880. Purimamānassāti pubbe pavattassa sadisamānassa, hīnamānassa vā, sadisamānavaseneva pana pāḷi āgatā.
৮৮১. ‘‘মিগানং কোত্থুকো অন্তো, পক্খীনং পন ৰাযসো’’তি (জা॰ ১.৩.১৩৫) ৰচনতো আহ ‘‘পক্খিজাতীসু ৰাযসো অন্তো লামকো’’তি।
881. ‘‘Migānaṃ kotthuko anto, pakkhīnaṃ pana vāyaso’’ti (jā. 1.3.135) vacanato āha ‘‘pakkhijātīsu vāyaso anto lāmako’’ti.
৮৮২. ৰিরাগন্তি অরহত্তং।
882. Virāganti arahattaṃ.
৮৮৩. মানসম্পযুত্তচ্ছন্দো তণ্হাছন্দো। মানসভাৰং অনুগতো সেয্যাদিতো সম্পগ্গণ্হনৰসেন পৰত্তো মানসম্পযুত্তকত্তুকম্যতাছন্দো ৰা মানচ্ছন্দো।
883. Mānasampayuttacchando taṇhāchando. Mānasabhāvaṃ anugato seyyādito sampaggaṇhanavasena pavatto mānasampayuttakattukamyatāchando vā mānacchando.
৮৮৪. তত্থাতি তস্মিং ৰিলম্বনে নিপ্ফাদেতব্বে। যুত্তং অনুচ্ছৰিকং। মুত্তং ৰিস্সট্ঠং। সিলিট্ঠং সহিতং, অত্থদ্ৰযৰিভাৰকং ৰা।
884. Tatthāti tasmiṃ vilambane nipphādetabbe. Yuttaṃ anucchavikaṃ. Muttaṃ vissaṭṭhaṃ. Siliṭṭhaṃ sahitaṃ, atthadvayavibhāvakaṃ vā.
৮৮৮. অনুদ্দযস্সেৰাতি মেত্তাযন্তস্স ৰিয অনুকম্পন্তস্স ৰিয ৰিকপ্পনাতি আহ ‘‘সহনন্দিতাদিকস্সা’’তি, মেত্তাদিপতিরূপেন পৰত্তগেহসিতসিনেহস্সাতি অত্থো। তেনাহ ‘‘তাদিসো রাগো’’তি। অত্থো যুজ্জতীতি এৰম্পি ‘‘তত্থা’’তি পাল়িপদস্স অত্থো যুজ্জতি। পরানুদ্দযতাহেতুকো হি পরানুদ্দযতাসহিতো সো ৰিতক্কোতি।
888. Anuddayassevāti mettāyantassa viya anukampantassa viya vikappanāti āha ‘‘sahananditādikassā’’ti, mettādipatirūpena pavattagehasitasinehassāti attho. Tenāha ‘‘tādisorāgo’’ti. Attho yujjatīti evampi ‘‘tatthā’’ti pāḷipadassa attho yujjati. Parānuddayatāhetuko hi parānuddayatāsahito so vitakkoti.
৮৯০. কামগুণপারিপূরিযা যেভুয্যেন লোকো সম্ভাৰেতীতি আহ ‘‘অনৰঞ্ঞত্তত্থমেৰ কামগুণে চ পত্থেতী’’তি।
890. Kāmaguṇapāripūriyā yebhuyyena loko sambhāvetīti āha ‘‘anavaññattatthameva kāmaguṇe ca patthetī’’ti.
এককনিদ্দেসৰণ্ণনা নিট্ঠিতা।
Ekakaniddesavaṇṇanā niṭṭhitā.
২. দুকনিদ্দেসৰণ্ণনা
2. Dukaniddesavaṇṇanā
৮৯১. বন্ধতীতি কুজ্ঝনাকারং বন্ধতি ঘটেতি। উপনাহো হি আঘাতৰত্থুনা চিত্তং বন্ধন্তো ৰিয হোতি, যতো অঞ্ঞথা পৰত্তিত্ৰাপি অৰিদিতে উপনাহে আঘাতৰত্থুসন্নিস্সিতোৰ হোতি।
891. Bandhatīti kujjhanākāraṃ bandhati ghaṭeti. Upanāho hi āghātavatthunā cittaṃ bandhanto viya hoti, yato aññathā pavattitvāpi avidite upanāhe āghātavatthusannissitova hoti.
৮৯২. দন্তেহি ছিন্দিত্ৰাতি দন্তেহি ছিন্দিত্ৰা ৰিয একদেসং অপনেত্ৰা একদেসং গহেত্ৰাতি অধিপ্পাযো।
892. Dantehichinditvāti dantehi chinditvā viya ekadesaṃ apanetvā ekadesaṃ gahetvāti adhippāyo.
৮৯৪. অচ্চযং কত্ৰাতি ৰীতিক্কমং কত্ৰা। পটিচ্ছাদনেতি অত্তনা কতস্স অচ্চযস্স পটিচ্ছাদনে। ৰোচ্ছিন্দনং ৰীতিক্কমকিরিযায অপ্পটিজানৰসেন উপচ্ছিন্দনং, ৰোচ্ছিন্দনেন ছাদনা ৰোচ্ছিন্দনছাদনা।
894. Accayaṃ katvāti vītikkamaṃ katvā. Paṭicchādaneti attanā katassa accayassa paṭicchādane. Vocchindanaṃ vītikkamakiriyāya appaṭijānavasena upacchindanaṃ, vocchindanena chādanā vocchindanachādanā.
অসম্মাভাসনে সঠ-সদ্দো লোকে নিরুল়্হোতি আহ ‘‘যো ন সম্মা ভাসতি, সো সঠো’’তি। সঠস্স যক্খসূকরসদিসতং দস্সেন্তো ‘‘কুচ্ছি ৰা পিঠি ৰা জানিতুং ন সক্কা’’তি আহ, ইন্দজালসদিসো ৰা এসো দট্ঠব্বো।
Asammābhāsane saṭha-saddo loke niruḷhoti āha ‘‘yo na sammā bhāsati, so saṭho’’ti. Saṭhassa yakkhasūkarasadisataṃ dassento ‘‘kucchi vā piṭhi vā jānituṃ na sakkā’’ti āha, indajālasadiso vā eso daṭṭhabbo.
যো সব্বথা ৰিপন্নজ্ঝাসযোপি সমানো কাযৰচীভেদমত্তেন অত্তানং সম্পন্নং ৰিয দস্সেত্ৰা লোকং ৰঞ্চেন্তো অঞ্ঞথা সন্তং অঞ্ঞথা পৰেদেতি। তেনাহ ‘‘তেনেতং সাঠেয্যং মাযাতো বলৰতরা ৰঞ্চনাতি দট্ঠব্ব’’ন্তি। সন্তদোসপটিচ্ছাদনমেৰ হি মাযা। তেনেৰাতি বলৰতরৰঞ্চনাভাৰেনেৰ। দল়্হকেরাটিযঞ্হি ‘‘পরিক্খততা’’তি ৰুত্তং।
Yo sabbathā vipannajjhāsayopi samāno kāyavacībhedamattena attānaṃ sampannaṃ viya dassetvā lokaṃ vañcento aññathā santaṃ aññathā pavedeti. Tenāha ‘‘tenetaṃ sāṭheyyaṃ māyāto balavatarā vañcanāti daṭṭhabba’’nti. Santadosapaṭicchādanameva hi māyā. Tenevāti balavataravañcanābhāveneva. Daḷhakerāṭiyañhi ‘‘parikkhatatā’’ti vuttaṃ.
৯০৮. অভাৰেপীতি পি-সদ্দেন ‘‘কো পন ৰাদো ভাৰে’’তি দস্সেতি। যদিপি হি পুথুজ্জনানং, একচ্চানঞ্চ সেক্খানং যথারহং অত্তাভিনিৰেসাদীহি কতূপকারং রূপরাগাদিসংযোজনকিচ্চং সাধেতি, একচ্চানং পন ৰিনা এৰ তেহীতি কস্সচিপি কিলেসস্স অৰিক্খম্ভিতত্তা কথঞ্চিপি অৰিমুত্তো কামভৰো অজ্ঝত্তগ্গহণস্স ৰিসেসপচ্চযোতি ‘‘অজ্ঝত্ত’’ন্তি ৰুচ্চতি, তদভাৰতো ‘‘বহিদ্ধা’’তি লদ্ধৰোহারে রূপারূপভৰে কেৰলম্পি সংযোজনকিচ্চং সাধেন্তং পৰত্ততীতি, ততো এৰ রূপারূপাৰচরসত্তানং বহিদ্ধাসংযোজনভাৰহেতজাতন্তি চ ‘‘বহিদ্ধাসংযোজন’’ন্তি ৰুচ্চতীতি ইমমত্থমাহ ‘‘সক্কাযদিট্ঠাদীনং…পে॰… যোজনং নামা’’তি।
908. Abhāvepīti pi-saddena ‘‘ko pana vādo bhāve’’ti dasseti. Yadipi hi puthujjanānaṃ, ekaccānañca sekkhānaṃ yathārahaṃ attābhinivesādīhi katūpakāraṃ rūparāgādisaṃyojanakiccaṃ sādheti, ekaccānaṃ pana vinā eva tehīti kassacipi kilesassa avikkhambhitattā kathañcipi avimutto kāmabhavo ajjhattaggahaṇassa visesapaccayoti ‘‘ajjhatta’’nti vuccati, tadabhāvato ‘‘bahiddhā’’ti laddhavohāre rūpārūpabhave kevalampi saṃyojanakiccaṃ sādhentaṃ pavattatīti, tato eva rūpārūpāvacarasattānaṃ bahiddhāsaṃyojanabhāvahetajātanti ca ‘‘bahiddhāsaṃyojana’’nti vuccatīti imamatthamāha ‘‘sakkāyadiṭṭhādīnaṃ…pe… yojanaṃ nāmā’’ti.
দুকনিদ্দেসৰণ্ণনা নিট্ঠিতা।
Dukaniddesavaṇṇanā niṭṭhitā.
৩. তিকনিদ্দেসৰণ্ণনা
3. Tikaniddesavaṇṇanā
৯০৯. অৰিজ্জাভৰতণ্হাহি ৰিয ইস্সামচ্ছরিযদোমনস্সাদিসহাযভূতেন দোসেনপি ভৰাভিসঙ্খরণং হোতীতি ‘‘অকুসলমূলানেৰ ৰট্টমূলানী’’তি। তেনাহ ‘‘তীহি…পে॰… কথিতো’’তি।
909. Avijjābhavataṇhāhi viya issāmacchariyadomanassādisahāyabhūtena dosenapi bhavābhisaṅkharaṇaṃ hotīti ‘‘akusalamūlāneva vaṭṭamūlānī’’ti. Tenāha ‘‘tīhi…pe… kathito’’ti.
৯১৯. রূপারূপাৰচরৰিপাকানং সন্তপণীতভাৰেন উল়ারতমত্তা তত্থ সাতিসযো ভৰরাগো ৰুত্তো।
919. Rūpārūpāvacaravipākānaṃ santapaṇītabhāvena uḷāratamattā tattha sātisayo bhavarāgo vutto.
৯২০. মানেন ঠপনাতি মানেন সেয্যাদিৰসেন অত্তনো ঠপনা। ঠপনাতি চ দহনা, পগ্গণ্হনা ৰা।
920. Mānena ṭhapanāti mānena seyyādivasena attano ṭhapanā. Ṭhapanāti ca dahanā, paggaṇhanā vā.
৯২১. তংসম্পযুত্তাতি দোসসম্পযুত্তা।
921. Taṃsampayuttāti dosasampayuttā.
৯২২. তেসং ৰণ্ণভেদন্তি তেসং জীৰানং ৰণ্ণৰিসেসং, তেসং ৰা তথা কথেন্তানং সুত্ৰা। ব্যাপীতি সকললোকব্যাপী, সকলসরীরব্যাপী ৰা। পরিমণ্ডলোতি পরমাণুপ্পমাণো হুত্ৰা পরিমণ্ডলো। আদি-সদ্দেন অঙ্গুট্ঠপ্পমাণো ৰযপ্পমাণোতিআদিকং সঙ্গণ্হাতি।
922. Tesaṃ vaṇṇabhedanti tesaṃ jīvānaṃ vaṇṇavisesaṃ, tesaṃ vā tathā kathentānaṃ sutvā. Byāpīti sakalalokabyāpī, sakalasarīrabyāpī vā. Parimaṇḍaloti paramāṇuppamāṇo hutvā parimaṇḍalo. Ādi-saddena aṅguṭṭhappamāṇo vayappamāṇotiādikaṃ saṅgaṇhāti.
৯২৩. উতুৰিপরিণামজো সীতাদিউতুৰিপরিৰত্তজাতো। ওপক্কমিকো অত্তনো, পরস্স ৰা তাদিসউপক্কমনিব্বত্তো। ৰিসমপরিহারজো চিরাসনচিরট্ঠানাদিনা কাযস্স ৰিসমপরিহরণতো জাতো। সন্নিপাতজো সঞ্চযতো পট্ঠায পচ্চেকং ৰিসমাকারতো দোসত্তযসমোধানতো জাতো। কম্মসমুট্ঠানো উতুৰিপরিণামাদীহি ৰিনা কম্মতো সমুট্ঠিতো। পিত্তসেম্হৰাতসমুট্ঠানা পন পিত্তাদীনং অধিকভাৰেনেৰ ৰুত্তা। সব্বস্সাপি হি রোগস্স দোসত্তযং আসন্নকারণং দোসপ্পকোপেন ৰিনা অভাৰতো। কম্মং পধানকারণং কতোকাসে এৰ তস্মিং উপ্পজ্জনতো, ইতরং পন তস্স সহকারিকারণং দট্ঠব্বং। তযিদং পুব্বেকতহেতুৰাদিনো পটিক্খিপন্তি। উপপজ্জৰেদনীযফলম্পি পুব্বেকতহেতুকপক্খিকমেৰ অতীতদ্ধিকত্তা কম্মস্সাতি অরুচিসূচনত্থং কির-সদ্দগ্গহণং করোতি ‘‘উপপজ্জৰেদনীযঞ্চ কির পটিক্খিপন্তী’’তি।
923. Utuvipariṇāmajo sītādiutuviparivattajāto. Opakkamiko attano, parassa vā tādisaupakkamanibbatto. Visamaparihārajo cirāsanaciraṭṭhānādinā kāyassa visamapariharaṇato jāto. Sannipātajo sañcayato paṭṭhāya paccekaṃ visamākārato dosattayasamodhānato jāto. Kammasamuṭṭhāno utuvipariṇāmādīhi vinā kammato samuṭṭhito. Pittasemhavātasamuṭṭhānā pana pittādīnaṃ adhikabhāveneva vuttā. Sabbassāpi hi rogassa dosattayaṃ āsannakāraṇaṃ dosappakopena vinā abhāvato. Kammaṃ padhānakāraṇaṃ katokāse eva tasmiṃ uppajjanato, itaraṃ pana tassa sahakārikāraṇaṃ daṭṭhabbaṃ. Tayidaṃ pubbekatahetuvādino paṭikkhipanti. Upapajjavedanīyaphalampi pubbekatahetukapakkhikameva atītaddhikattā kammassāti arucisūcanatthaṃ kira-saddaggahaṇaṃ karoti ‘‘upapajjavedanīyañca kira paṭikkhipantī’’ti.
৯২৪. দাহকারণতাযাতি রাগাদিদসৰিধগ্গিদাহস্স, নরকগ্গিদাহস্স চ কারণতায।
924. Dāhakāraṇatāyāti rāgādidasavidhaggidāhassa, narakaggidāhassa ca kāraṇatāya.
৯২৬. পুথুনিমিত্তসভাৰেসূতি পুথু নানাকিলেসাদীনং কারণসভাৰেসু।
926. Puthunimittasabhāvesūti puthu nānākilesādīnaṃ kāraṇasabhāvesu.
৯৩১. অদ্দনং অদ্দা মদ্দৰো, অনেকত্থত্তা ধাতূনং তপ্পটিক্খেপেন অনদ্দাতি আহ ‘‘অমুদুতা ৰা অনদ্দা’’তি।
931. Addanaṃ addā maddavo, anekatthattā dhātūnaṃ tappaṭikkhepena anaddāti āha ‘‘amudutā vā anaddā’’ti.
৯৩৬. অযোনিসোমনসিকারহেতুকত্তা আৰজ্জনায অকুসলানুকূলকিচ্চতা দট্ঠব্বা।
936. Ayonisomanasikārahetukattā āvajjanāya akusalānukūlakiccatā daṭṭhabbā.
তিকনিদ্দেসৰণ্ণনা নিট্ঠিতা।
Tikaniddesavaṇṇanā niṭṭhitā.
৪. চতুক্কনিদ্দেসৰণ্ণনা
4. Catukkaniddesavaṇṇanā
৯৩৯. এৰং-সদ্দেনাতি নিদস্সনত্থেন এৰং-সদ্দেনাতি অধিপ্পাযো। ভৰো এৰ অভিৰুদ্ধো অভৰো যথা ‘‘অসেক্খা ধম্মা’’তি (ধ॰ স॰ তিকমাতিকা ১১)। দুতিযস্মিং পক্খে ভৰাভৰসদ্দেন সম্পত্তিৰিপত্তিযো, ৰুদ্ধিহানিযো ৰা ৰুত্তাতি ৰেদিতব্বা।
939. Evaṃ-saddenāti nidassanatthena evaṃ-saddenāti adhippāyo. Bhavo eva abhivuddho abhavo yathā ‘‘asekkhā dhammā’’ti (dha. sa. tikamātikā 11). Dutiyasmiṃ pakkhe bhavābhavasaddena sampattivipattiyo, vuddhihāniyo vā vuttāti veditabbā.
অগতিযাতি অযুত্তগতিযা, অপ্পতিরূপকিরিযাযাতি অত্থো।
Agatiyāti ayuttagatiyā, appatirūpakiriyāyāti attho.
কোধূপাযাস…পে॰… মাতুগামা ৰা ঊমিআদিভযন্তি যোজনা। পঞ্চকামগুণমাতুগামগ্গহণেতি পঞ্চকামগুণগ্গহণে, মাতুগামগ্গহণে চ।
Kodhūpāyāsa…pe… mātugāmā vā ūmiādibhayanti yojanā. Pañcakāmaguṇamātugāmaggahaṇeti pañcakāmaguṇaggahaṇe, mātugāmaggahaṇe ca.
‘‘সযংকতং সুখদুক্খ’’ন্তিআদিকা দিট্ঠি যদিপি অঞ্ঞেসম্পি দিট্ঠিগতিকানং অত্থেৰ, তিম্বরুকো পন তথাদিট্ঠিকো ভগৰন্তং উপসঙ্কমিত্ৰা পুচ্ছীতি সা দিট্ঠি ‘‘তিম্বরুকদিট্ঠী’’তি (সং॰ নি॰ ২.১৮) ৰুত্তা। তেনাহ ‘‘তিম্বরুকো…পে॰… আগতত্তা’’তি।
‘‘Sayaṃkataṃ sukhadukkha’’ntiādikā diṭṭhi yadipi aññesampi diṭṭhigatikānaṃ attheva, timbaruko pana tathādiṭṭhiko bhagavantaṃ upasaṅkamitvā pucchīti sā diṭṭhi ‘‘timbarukadiṭṭhī’’ti (saṃ. ni. 2.18) vuttā. Tenāha ‘‘timbaruko…pe… āgatattā’’ti.
চতুক্কনিদ্দেসৰণ্ণনা নিট্ঠিতা।
Catukkaniddesavaṇṇanā niṭṭhitā.
৫. পঞ্চকনিদ্দেসৰণ্ণনা
5. Pañcakaniddesavaṇṇanā
৯৪০. আগমনস্স পটিসন্ধিগ্গহণৰসেনাতি অধিপ্পাযো।
940. Āgamanassa paṭisandhiggahaṇavasenāti adhippāyo.
৯৪১. উপচযনতোতি ৰড্ঢনতো। অঞ্ঞথাতি লাভতো তক্কনতো চ অঞ্ঞপ্পকারো গহিতোতি তং দস্সেন্তো ‘‘সদ্ধারুচিআদীহী’’তি আহ। অনুস্সৰতো হি সদ্দহনং, রুচ্চনং পন জাতিস্সরঞাণতোপি হোতি। আদি-সদ্দেন খন্তিআদীনং সঙ্গহো।
941. Upacayanatoti vaḍḍhanato. Aññathāti lābhato takkanato ca aññappakāro gahitoti taṃ dassento ‘‘saddhāruciādīhī’’ti āha. Anussavato hi saddahanaṃ, ruccanaṃ pana jātissarañāṇatopi hoti. Ādi-saddena khantiādīnaṃ saṅgaho.
৯৪২. অক্খন্তি মূলং এতেসন্তি অক্খন্তিমূলকা। দুক্কটদুব্ভাসিততাদিদোসা তাদিসানি কাযৰচীমনোদুচ্চরিতানি।
942. Akkhanti mūlaṃ etesanti akkhantimūlakā. Dukkaṭadubbhāsitatādidosā tādisāni kāyavacīmanoduccaritāni.
৯৪৩. উদগ্গতাসঙ্খাতো অৰূপসমো ন উদ্ধচ্চসঙ্খাতোতি পীতিযা এৰ সৰিপ্ফারিকতাসঙ্খাতং অসন্তসভাৰং আহ। অৰূপসমহেতুভূতোতি ৰিক্খেপহেতুভূতো। পীতিযা আকারোতি পীতিযা পৰত্তিআকারো।
943. Udaggatāsaṅkhāto avūpasamo na uddhaccasaṅkhātoti pītiyā eva savipphārikatāsaṅkhātaṃ asantasabhāvaṃ āha. Avūpasamahetubhūtoti vikkhepahetubhūto. Pītiyā ākāroti pītiyā pavattiākāro.
পঞ্চকনিদ্দেসৰণ্ণনা নিট্ঠিতা।
Pañcakaniddesavaṇṇanā niṭṭhitā.
৬. ছক্কনিদ্দেসৰণ্ণনা
6. Chakkaniddesavaṇṇanā
৯৪৪. তেনাতি কোধাদীনংযেৰ ৰিৰাদমূলত্তা।
944. Tenāti kodhādīnaṃyeva vivādamūlattā.
৯৪৫. কুসলানুযোগে সাতচ্চং কুসলানুযোগসাতচ্চং।
945. Kusalānuyoge sātaccaṃ kusalānuyogasātaccaṃ.
গণেন সত্তসমূহেন সঙ্গণি সন্নিপতনং যেন সদ্ধিং, তেন সঙ্গতি গণসঙ্গণিকা। কস্সচি ঘাসচ্ছাদনাদিকস্স।
Gaṇena sattasamūhena saṅgaṇi sannipatanaṃ yena saddhiṃ, tena saṅgati gaṇasaṅgaṇikā. Kassaci ghāsacchādanādikassa.
৯৪৬. উপৰিতক্কেতীতি আরম্মণং উপেচ্চ তক্কেতি।
946. Upavitakketīti ārammaṇaṃ upecca takketi.
৯৪৮. অধিচ্চসমুপ্পন্নিকোতি ‘‘অধিচ্চসমুপ্পন্নো অত্তা চ লোকো চা’’তি এৰংৰাদী।
948. Adhiccasamuppannikoti ‘‘adhiccasamuppanno attā ca loko cā’’ti evaṃvādī.
ছক্কনিদ্দেসৰণ্ণনা নিট্ঠিতা।
Chakkaniddesavaṇṇanā niṭṭhitā.
৮. অট্ঠকনিদ্দেসৰণ্ণনা
8. Aṭṭhakaniddesavaṇṇanā
৯৫২. ওসীদনাকারেনাতি কত্তব্বকম্মে অনুস্সহনাকারেন।
952. Osīdanākārenāti kattabbakamme anussahanākārena.
৯৫৮. তে অভিনিৰেসা অসঞ্ঞীৰাদা ৰদন্তি এতেহীতি।
958. Te abhinivesā asaññīvādā vadanti etehīti.
অট্ঠকনিদ্দেসৰণ্ণনা নিট্ঠিতা।
Aṭṭhakaniddesavaṇṇanā niṭṭhitā.
৯. নৰকনিদ্দেসৰণ্ণনা
9. Navakaniddesavaṇṇanā
৯৬০-৯৬৩. দসমস্সাতি অট্ঠানঘাতস্স।
960-963. Dasamassāti aṭṭhānaghātassa.
অজ্ঝত্তন্তি গোচরজ্ঝত্তং অধিপ্পেতং। এতস্স গাথাৰচনস্স। নিট্ঠপেত্ৰাতি অভিনিৰিস্স।
Ajjhattanti gocarajjhattaṃ adhippetaṃ. Etassa gāthāvacanassa. Niṭṭhapetvāti abhinivissa.
৯৬৪. অঞ্ঞেসং ফস্সাদীনং সঙ্খতভাৰে যথাসকংপচ্চযেহি। যেনাকারেন মানস্স সাতিসযা পৰত্তি, তং দস্সেতুং ‘‘অহন্তি, অস্মীতি চা’’তি ৰুত্তং। অত্তনোতি দিট্ঠিগতপরিকপ্পিতস্স অত্তনো। যথা মানস্স সম্পগ্গহৰসেন, এৰং তণ্হায মমত্তৰসেন, দিট্ঠিযা নিচ্চাদিৰসেন পৰত্তি ৰিসেসৰতী সমানেপি অনাগতকালামসনেতি আহ ‘‘ভৰিস্সন্তী…পে॰… ৰুত্তো’’তি। ‘‘অহমস্মী’’তি পন পৰত্তমানস্সেৰ ভৰতীতি সব্বপদসাধারণস্স মানস্সেৰ ৰসেন ইঞ্জিতাদিতা অট্ঠকথাযং ৰুত্তা।
964. Aññesaṃ phassādīnaṃ saṅkhatabhāve yathāsakaṃpaccayehi. Yenākārena mānassa sātisayā pavatti, taṃ dassetuṃ ‘‘ahanti, asmīti cā’’ti vuttaṃ. Attanoti diṭṭhigataparikappitassa attano. Yathā mānassa sampaggahavasena, evaṃ taṇhāya mamattavasena, diṭṭhiyā niccādivasena pavatti visesavatī samānepi anāgatakālāmasaneti āha ‘‘bhavissantī…pe… vutto’’ti. ‘‘Ahamasmī’’ti pana pavattamānasseva bhavatīti sabbapadasādhāraṇassa mānasseva vasena iñjitāditā aṭṭhakathāyaṃ vuttā.
নৰকনিদ্দেসৰণ্ণনা নিট্ঠিতা।
Navakaniddesavaṇṇanā niṭṭhitā.
১০. দসকনিদ্দেসৰণ্ণনা
10. Dasakaniddesavaṇṇanā
৯৭০. সঙ্কপ্পনন্তি ‘‘কুসলতা’’তি ৰুত্তপদস্স অত্থৰচনং। তস্সা উপাযচিন্তায। মিচ্ছাভাৰো সাৰজ্জভাৰো। তদাকারো মোহোতি যথাৰুত্তাকারেন পৰত্তে চিত্তুপ্পাদে মোহো। তস্সাপি যথাৰুত্তপচ্চৰেক্খণাযপি যথাকতপাপেপি। অধিমানসম্পযুত্তং সঞ্জাননং পকতিপুরিসন্তরদস্সনাদিৰসেন পৰত্তং দিট্ঠিসম্পযুত্তচিত্তং ফলং ৰিয ৰিমুত্তন্তি গহিতং দট্ঠব্বং।
970. Saṅkappananti ‘‘kusalatā’’ti vuttapadassa atthavacanaṃ. Tassā upāyacintāya. Micchābhāvo sāvajjabhāvo. Tadākāro mohoti yathāvuttākārena pavatte cittuppāde moho. Tassāpi yathāvuttapaccavekkhaṇāyapi yathākatapāpepi. Adhimānasampayuttaṃ sañjānanaṃ pakatipurisantaradassanādivasena pavattaṃ diṭṭhisampayuttacittaṃ phalaṃ viya vimuttanti gahitaṃ daṭṭhabbaṃ.
দসকনিদ্দেসৰণ্ণনা নিট্ঠিতা।
Dasakaniddesavaṇṇanā niṭṭhitā.
তণ্হাৰিচরিতনিদ্দেসৰণ্ণনা
Taṇhāvicaritaniddesavaṇṇanā
৯৭৩. ৰিসেসং অকত্ৰাতি অনুপনিধানং, সমতো চ অসমতো চ উপনিধানন্তি ইমং ৰিভাগং অকত্ৰা, যো ‘‘ইত্থং, এৰং, অঞ্ঞথা’’তি পদেহি পকাসিতো।
973. Visesaṃakatvāti anupanidhānaṃ, samato ca asamato ca upanidhānanti imaṃ vibhāgaṃ akatvā, yo ‘‘itthaṃ, evaṃ, aññathā’’ti padehi pakāsito.
ৰিসেসস্সাতি ‘‘ইত্থং, এৰং, অঞ্ঞথা’’তি যথাৰুত্তস্সেৰ ৰিসেসস্স। দিট্ঠিযাতি দিট্ঠিযা গহিতায তদৰিনাভাৰিনী তণ্হা দস্সিতা। সীসসীসমূলকেহীতি চতূহি সীসেহি, দ্ৰাদসহি চ সীসমূলকেহি। সযমেৰ চ তণ্হা দস্সিতাতি যোজনা। যদি দিট্ঠিমানগাহোপি ইধাধিপ্পেতো, যতো ‘‘তণ্হামানদিট্ঠিৰসেন সমূহগাহতো’’তি (ৰিভ॰ অট্ঠ॰ ৯৭৩) অট্ঠকথাযং ৰুত্তং, কথং ‘‘তণ্হাৰিচরিতানী’’তি ৰচনন্তি আহ ‘‘দিট্ঠিমানেসূ’’তিআদি। তংমূলকত্তাতি তণ্হামূলকত্তা।
Visesassāti ‘‘itthaṃ, evaṃ, aññathā’’ti yathāvuttasseva visesassa. Diṭṭhiyāti diṭṭhiyā gahitāya tadavinābhāvinī taṇhā dassitā. Sīsasīsamūlakehīti catūhi sīsehi, dvādasahi ca sīsamūlakehi. Sayameva ca taṇhā dassitāti yojanā. Yadi diṭṭhimānagāhopi idhādhippeto, yato ‘‘taṇhāmānadiṭṭhivasena samūhagāhato’’ti (vibha. aṭṭha. 973) aṭṭhakathāyaṃ vuttaṃ, kathaṃ ‘‘taṇhāvicaritānī’’ti vacananti āha ‘‘diṭṭhimānesū’’tiādi. Taṃmūlakattāti taṇhāmūlakattā.
৯৭৪. ন অৰক্করীযতীতি অনৰকারী, তং অনৰকারিং কত্ৰা, তং পদন্তরেন ৰিভাৰেন্তো ‘‘অনৰক্করি, তং কত্ৰা’’তি আহ। ৰিক্খেপনং অৰযৰতো ৰিভাগো। অত্ততো অৰিনিব্ভুজিত্ৰাতি য্ৰাযং দিট্ঠিগতিকপরিকপ্পিতো অত্তা, ততো অৰিসুং কত্ৰা।
974. Na avakkarīyatīti anavakārī, taṃ anavakāriṃ katvā, taṃ padantarena vibhāvento ‘‘anavakkari, taṃ katvā’’ti āha. Vikkhepanaṃ avayavato vibhāgo. Attato avinibbhujitvāti yvāyaṃ diṭṭhigatikaparikappito attā, tato avisuṃ katvā.
৯৭৬. বহিকতানি রূপাদীনি উপগন্ত্ৰা পৰত্তা তণ্হা উপাদাযাতি ৰুত্তাতি যোজনা।
976. Bahikatāni rūpādīni upagantvā pavattā taṇhā upādāyāti vuttāti yojanā.
একচ্চস্স পুগ্গলস্স একস্মিং অত্তভাৰে কস্সচি তণ্হাৰিচরিতস্স অসম্ভৰো, কস্সচিদেৰ সম্ভৰোতি আহ ‘‘কস্সচি সম্ভৰদস্সনত্থং ৰুত্ত’’ন্তি।
Ekaccassa puggalassa ekasmiṃ attabhāve kassaci taṇhāvicaritassa asambhavo, kassacideva sambhavoti āha ‘‘kassaci sambhavadassanatthaṃ vutta’’nti.
তণ্হাৰিচরিতনিদ্দেসৰণ্ণনা নিট্ঠিতা।
Taṇhāvicaritaniddesavaṇṇanā niṭṭhitā.
খুদ্দকৰত্থুৰিভঙ্গৰণ্ণনা নিট্ঠিতা।
Khuddakavatthuvibhaṅgavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / ৰিভঙ্গপাল়ি • Vibhaṅgapāḷi / ১৭. খুদ্দকৰত্থুৰিভঙ্গো • 17. Khuddakavatthuvibhaṅgo
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / সম্মোহৰিনোদনী-অট্ঠকথা • Sammohavinodanī-aṭṭhakathā
১. এককমাতিকাদিৰণ্ণনা • 1. Ekakamātikādivaṇṇanā
(২.) দুকনিদ্দেসৰণ্ণনা • (2.) Dukaniddesavaṇṇanā
(৩.) তিকনিদ্দেসৰণ্ণনা • (3.) Tikaniddesavaṇṇanā
(৪.) চতুক্কনিদ্দেসৰণ্ণনা • (4.) Catukkaniddesavaṇṇanā
(৫.) পঞ্চকনিদ্দেসৰণ্ণনা • (5.) Pañcakaniddesavaṇṇanā
(৬.) ছক্কনিদ্দেসৰণ্ণনা • (6.) Chakkaniddesavaṇṇanā
(৮.) অট্ঠকনিদ্দেসৰণ্ণনা • (8.) Aṭṭhakaniddesavaṇṇanā
(৯.) নৰকনিদ্দেসৰণ্ণনা • (9.) Navakaniddesavaṇṇanā
(১০.) দসকনিদ্দেসৰণ্ণনা • (10.) Dasakaniddesavaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ৰিভঙ্গ-মূলটীকা • Vibhaṅga-mūlaṭīkā / ১৭. খুদ্দকৰত্থুৰিভঙ্গো • 17. Khuddakavatthuvibhaṅgo
