| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༢. ཨབྷེཛྫཝགྒོ
2. Abhejjavaggo
༡. ཁུདྡཱནུཁུདྡཀཔཉྷོ
1. Khuddānukhuddakapañho
༡. ‘‘བྷནྟེ ནཱགསེན, བྷཱསིཏམྤེཏཾ བྷགཝཏཱ ‘ཨབྷིཉྙཱཡཱཧཾ, བྷིཀྑཝེ, དྷམྨཾ དེསེམི ནོ ཨནབྷིཉྙཱཡཱ’ཏི། པུན ཙ ཝིནཡཔཉྙཏྟིཡཱ ཨེཝཾ བྷཎིཏཾ ‘ཨཱཀངྑམཱནོ, ཨཱནནྡ, སངྒྷོ མམཙྩཡེན ཁུདྡཱནུཁུདྡཀཱནི སིཀྑཱཔདཱནི སམཱུཧནཏཱུ’ཏི། ཀིཾ ནུ ཁོ, བྷནྟེ ནཱགསེན, ཁུདྡཱནུཁུདྡཀཱནི སིཀྑཱཔདཱནི དུཔྤཉྙཏྟཱནི, ཨུདཱཧུ ཨཝཏྠུསྨིཾ ཨཛཱནིཏྭཱ པཉྙཏྟཱནི, ཡཾ བྷགཝཱ ཨཏྟནོ ཨཙྩཡེན ཁུདྡཱནུཁུདྡཀཱནི སིཀྑཱཔདཱནི སམཱུཧནཱཔེཏི? ཡདི, བྷནྟེ ནཱགསེན, བྷགཝཏཱ བྷཎིཏཾ ‘ཨབྷིཉྙཱཡཱཧཾ, བྷིཀྑཝེ, དྷམྨཾ དེསེམི ནོ ཨནབྷིཉྙཱཡཱ’ཏི, ཏེན ཧི ‘ཨཱཀངྑམཱནོ, ཨཱནནྡ, སངྒྷོ མམཙྩཡེན ཁུདྡཱནུཁུདྡཀཱནི སིཀྑཱཔདཱནི སམཱུཧནཏཱུ’ཏི ཡཾ ཝཙནཾ, ཏཾ མིཙྪཱ། ཡདི ཏཐཱགཏེ ཝིནཡཔཉྙཏྟིཡཱ ཨེཝཾ བྷཎིཏཾ ‘ཨཱཀངྑམཱནོ, ཨཱནནྡ, སངྒྷོ མམཙྩཡེན ཁུདྡཱནུཁུདྡཀཱནི སིཀྑཱཔདཱནི སམཱུཧནཏཱུ’ཏི ཏེན ཧི ‘ཨབྷིཉྙཱཡཱཧཾ, བྷིཀྑཝེ, དྷམྨཾ དེསེམི ནོ ཨནབྷིཉྙཱཡཱ’ཏི ཏམྤི ཝཙནཾ མིཙྪཱ། ཨཡམྤི ཨུབྷཏོ ཀོཊིཀོ པཉྷོ སུཁུམོ ནིཔུཎོ གམྦྷཱིརོ སུགམྦྷཱིརོ དུནྣིཛ྄ཛྷཱཔཡོ, སོ ཏཝཱནུཔྤཏྟོ, ཏཏྠ ཏེ ཉཱཎབལཝིཔྥཱརཾ དསྶེཧཱི’’ཏི།
1. ‘‘Bhante nāgasena, bhāsitampetaṃ bhagavatā ‘abhiññāyāhaṃ, bhikkhave, dhammaṃ desemi no anabhiññāyā’ti. Puna ca vinayapaññattiyā evaṃ bhaṇitaṃ ‘ākaṅkhamāno, ānanda, saṅgho mamaccayena khuddānukhuddakāni sikkhāpadāni samūhanatū’ti. Kiṃ nu kho, bhante nāgasena, khuddānukhuddakāni sikkhāpadāni duppaññattāni, udāhu avatthusmiṃ ajānitvā paññattāni, yaṃ bhagavā attano accayena khuddānukhuddakāni sikkhāpadāni samūhanāpeti? Yadi, bhante nāgasena, bhagavatā bhaṇitaṃ ‘abhiññāyāhaṃ, bhikkhave, dhammaṃ desemi no anabhiññāyā’ti, tena hi ‘ākaṅkhamāno, ānanda, saṅgho mamaccayena khuddānukhuddakāni sikkhāpadāni samūhanatū’ti yaṃ vacanaṃ, taṃ micchā. Yadi tathāgate vinayapaññattiyā evaṃ bhaṇitaṃ ‘ākaṅkhamāno, ānanda, saṅgho mamaccayena khuddānukhuddakāni sikkhāpadāni samūhanatū’ti tena hi ‘abhiññāyāhaṃ, bhikkhave, dhammaṃ desemi no anabhiññāyā’ti tampi vacanaṃ micchā. Ayampi ubhato koṭiko pañho sukhumo nipuṇo gambhīro sugambhīro dunnijjhāpayo, so tavānuppatto, tattha te ñāṇabalavipphāraṃ dassehī’’ti.
‘‘བྷཱསིཏམྤེཏཾ, མཧཱརཱཛ, བྷགཝཏཱ ‘ཨབྷིཉྙཱཡཱཧཾ, བྷིཀྑཝེ, དྷམྨཾ དེསེམི ནོ ཨནབྷིཉྙཱཡཱ’ཏི, ཝིནཡཔཉྙཏྟིཡཱཔི ཨེཝཾ བྷཎིཏཾ ‘ཨཱཀངྑམཱནོ, ཨཱནནྡ, སངྒྷོ མམཙྩཡེན ཁུདྡཱནུཁུདྡཀཱནི སིཀྑཱཔདཱནི སམཱུཧནཏཱུ’ཏི, ཏཾ པན, མཧཱརཱཛ, ཏཐཱགཏོ བྷིཀྑཱུ ཝཱིམཾསམཱནོ ཨཱཧ ‘ཨུཀྐལེསྶནྟི 1 ནུ ཁོ མམ སཱཝཀཱ མཡཱ ཝིསྶཛྫཱཔཱིཡམཱནཱ མམཙྩཡེན ཁུདྡཱནུཁུདྡཀཱནི སིཀྑཱཔདཱནི, ཨུདཱཧུ ཨཱདིཡིསྶནྟཱི’ཏི།
‘‘Bhāsitampetaṃ, mahārāja, bhagavatā ‘abhiññāyāhaṃ, bhikkhave, dhammaṃ desemi no anabhiññāyā’ti, vinayapaññattiyāpi evaṃ bhaṇitaṃ ‘ākaṅkhamāno, ānanda, saṅgho mamaccayena khuddānukhuddakāni sikkhāpadāni samūhanatū’ti, taṃ pana, mahārāja, tathāgato bhikkhū vīmaṃsamāno āha ‘ukkalessanti 2 nu kho mama sāvakā mayā vissajjāpīyamānā mamaccayena khuddānukhuddakāni sikkhāpadāni, udāhu ādiyissantī’ti.
‘‘ཡཐཱ, མཧཱརཱཛ, ཙཀྐཝཏྟཱི རཱཛཱ པུཏྟེ ཨེཝཾ ཝདེཡྻ ‘ཨཡཾ ཁོ, ཏཱཏཱ, མཧཱཛནཔདོ སབྦདིསཱསུ སཱགརཔརིཡནྟོ, དུཀྐརོ, ཏཱཏཱ, ཏཱཝཏཀེན བལེན དྷཱརེཏུཾ, ཨེཐ ཏུམྷེ, ཏཱཏཱ, མམཙྩཡེན པཙྩནྟེ པཙྩནྟེ དེསེ པཛཧཐཱ’ཏི། ཨཔི ནུ ཁོ ཏེ, མཧཱརཱཛ, ཀུམཱརཱ པིཏུཨཙྩཡེན ཧཏྠགཏེ ཛནཔདེ སབྦེ ཏེ པཙྩནྟེ པཙྩནྟེ དེསེ མུཉྩེཡྻུ’’ནྟི? ‘‘ན ཧི བྷནྟེ, རཱཛཏོ 3, བྷནྟེ, ལུདྡྷཏརཱ 4 ཀུམཱརཱ རཛྫལོབྷེན ཏདུཏྟརིཾ དིགུཎཏིགུཎཾ ཛནཔདཾ པརིགྒཎྷེཡྻུཾ 5, ཀིཾ པན ཏེ ཧཏྠགཏཾ ཛནཔདཾ མུཉྩེཡྻུ’’ནྟི? ‘‘ཨེཝམེཝ ཁོ, མཧཱརཱཛ, ཏཐཱགཏོ བྷིཀྑཱུ ཝཱིམཾསམཱནོ ཨེཝམཱཧ ‘ཨཱཀངྑམཱནོ, ཨཱནནྡ, སངྒྷོ མམཙྩཡེན ཁུདྡཱནུཁུདྡཀཱནི སིཀྑཱཔདཱནི སམཱུཧནཏཱུ’ཏི། དུཀྑཔརིམུཏྟིཡཱ, མཧཱརཱཛ, བུདྡྷཔུཏྟཱ དྷམྨལོབྷེན ཨཉྙམྤི ཨུཏྟརིཾ དིཡཌྜྷསིཀྑཱཔདསཏཾ གོཔེཡྻུཾ, ཀིཾ པན པཀཏིཔཉྙཏྟཾ སིཀྑཱཔདཾ མུཉྩེཡྻུ’’ནྟི?
‘‘Yathā, mahārāja, cakkavattī rājā putte evaṃ vadeyya ‘ayaṃ kho, tātā, mahājanapado sabbadisāsu sāgarapariyanto, dukkaro, tātā, tāvatakena balena dhāretuṃ, etha tumhe, tātā, mamaccayena paccante paccante dese pajahathā’ti. Api nu kho te, mahārāja, kumārā pituaccayena hatthagate janapade sabbe te paccante paccante dese muñceyyu’’nti? ‘‘Na hi bhante, rājato 6, bhante, luddhatarā 7 kumārā rajjalobhena taduttariṃ diguṇatiguṇaṃ janapadaṃ pariggaṇheyyuṃ 8, kiṃ pana te hatthagataṃ janapadaṃ muñceyyu’’nti? ‘‘Evameva kho, mahārāja, tathāgato bhikkhū vīmaṃsamāno evamāha ‘ākaṅkhamāno, ānanda, saṅgho mamaccayena khuddānukhuddakāni sikkhāpadāni samūhanatū’ti. Dukkhaparimuttiyā, mahārāja, buddhaputtā dhammalobhena aññampi uttariṃ diyaḍḍhasikkhāpadasataṃ gopeyyuṃ, kiṃ pana pakatipaññattaṃ sikkhāpadaṃ muñceyyu’’nti?
‘‘བྷནྟེ ནཱགསེན, ཡཾ བྷགཝཱ ཨཱཧ ‘ཁུདྡཱནུཁུདྡཀཱནི སིཀྑཱཔདཱནཱི’ཏི, ཨེཏྠཱཡཾ ཛནོ སམྨཱུལ༹ྷོ ཝིམཏིཛཱཏོ ཨདྷིཀཏོ སཾསཡཔཀྑནྡོ། ཀཏམཱནི ཏཱནི ཁུདྡཀཱནི སིཀྑཱཔདཱནི, ཀཏམཱནི ཨནུཁུདྡཀཱནི སིཀྑཱཔདཱནཱིཏི? དུཀྐཊཾ, མཧཱརཱཛ, ཁུདྡཀཾ སིཀྑཱཔདཾ, དུབྦྷཱསིཏཾ ཨནུཁུདྡཀཾ སིཀྑཱཔདཾ, ཨིམཱནི དྭེ ཁུདྡཱནུཁུདྡཀཱནི སིཀྑཱཔདཱནི, པུབྦཀེཧིཔི, མཧཱརཱཛ, མཧཱཐེརེཧི ཨེཏྠ ཝིམཏི ཨུཔྤཱདིཏཱ, ཏེཧིཔི ཨེཀཛ྄ཛྷཾ ན ཀཏོ དྷམྨསཎྛིཏིཔརིཡཱཡེ བྷགཝཏཱ ཨེསོ པཉྷོ ཨུཔདིཊྛོཏི། ཙིརནིཀྑིཏྟཾ, བྷནྟེ ནཱགསེན, ཛིནརཧསྶཾ ཨཛྫེཏརཧི ལོཀེ ཝིཝཊཾ པཱཀཊཾ ཀཏ’’ནྟི།
‘‘Bhante nāgasena, yaṃ bhagavā āha ‘khuddānukhuddakāni sikkhāpadānī’ti, etthāyaṃ jano sammūḷho vimatijāto adhikato saṃsayapakkhando. Katamāni tāni khuddakāni sikkhāpadāni, katamāni anukhuddakāni sikkhāpadānīti? Dukkaṭaṃ, mahārāja, khuddakaṃ sikkhāpadaṃ, dubbhāsitaṃ anukhuddakaṃ sikkhāpadaṃ, imāni dve khuddānukhuddakāni sikkhāpadāni, pubbakehipi, mahārāja, mahātherehi ettha vimati uppāditā, tehipi ekajjhaṃ na kato dhammasaṇṭhitipariyāye bhagavatā eso pañho upadiṭṭhoti. Ciranikkhittaṃ, bhante nāgasena, jinarahassaṃ ajjetarahi loke vivaṭaṃ pākaṭaṃ kata’’nti.
ཁུདྡཱནུཁུདྡཀཔཉྷོ པཋམོ།
Khuddānukhuddakapañho paṭhamo.
Footnotes:
