| Library / Tipiṭaka / திபிடக • Tipiṭaka / சூளவக்³க³பாளி • Cūḷavaggapāḷi |
2. கு²த்³தா³னுகு²த்³த³கஸிக்கா²பத³கதா²
2. Khuddānukhuddakasikkhāpadakathā
441. அத² கோ² ஆயஸ்மா ஆனந்தோ³ தே²ரே பி⁴க்கூ² ஏதத³வோச – ‘‘ப⁴க³வா மங், ப⁴ந்தே, பரினிப்³பா³னகாலே ஏவமாஹ – ‘ஆகங்க²மானோ, ஆனந்த³, ஸங்கோ⁴ மமச்சயேன கு²த்³தா³னுகு²த்³த³கானி ஸிக்கா²பதா³னி ஸமூஹனெய்யா’’’தி. ‘‘புச்சி² பன த்வங், ஆவுஸோ ஆனந்த³, ப⁴க³வந்தங் – ‘கதமானி பன, ப⁴ந்தே, கு²த்³தா³னுகு²த்³த³கானி ஸிக்கா²பதா³னீ’’’தி? ‘‘ந கோ²ஹங், ப⁴ந்தே, ப⁴க³வந்தங் புச்சி²ங் – ‘கதமானி பன, ப⁴ந்தே, கு²த்³தா³னுகு²த்³த³கானி ஸிக்கா²பதா³னீ’’தி. ஏகச்சே தே²ரா ஏவமாஹங்ஸு – ‘‘சத்தாரி பாராஜிகானி ட²பெத்வா, அவஸேஸானி கு²த்³தா³னுகு²த்³த³கானி ஸிக்கா²பதா³னீ’’தி. ஏகச்சே தே²ரா ஏவமாஹங்ஸு – ‘‘சத்தாரி பாராஜிகானி ட²பெத்வா , தேரஸ ஸங்கா⁴தி³ஸேஸே ட²பெத்வா, அவஸேஸானி கு²த்³தா³னுகு²த்³த³கானி ஸிக்கா²பதா³னீ’’தி. ஏகச்சே தே²ரா ஏவமாஹங்ஸு – ‘‘சத்தாரி பாராஜிகானி ட²பெத்வா, தேரஸ ஸங்கா⁴தி³ஸேஸே ட²பெத்வா, த்³வே அனியதே ட²பெத்வா, அவஸேஸானி கு²த்³தா³னுகு²த்³த³கானி ஸிக்கா²பதா³னீ’’தி. ஏகச்சே தே²ரா ஏவமாஹங்ஸு – ‘‘சத்தாரி பாராஜிகானி ட²பெத்வா, தேரஸ ஸங்கா⁴தி³ஸேஸே ட²பெத்வா, த்³வே அனியதே ட²பெத்வா, திங்ஸ நிஸ்ஸக்³கி³யே பாசித்தியே ட²பெத்வா, அவஸேஸானி கு²த்³தா³னுகு²த்³த³கானி ஸிக்கா²பதா³னீ’’தி. ஏகச்சே தே²ரா ஏவமாஹங்ஸு – ‘‘சத்தாரி பாராஜிகானி ட²பெத்வா, தேரஸ ஸங்கா⁴தி³ஸேஸே ட²பெத்வா, த்³வே அனியதே ட²பெத்வா, திங்ஸ நிஸ்ஸக்³கி³யே பாசித்தியே ட²பெத்வா, த்³வேனவுதி பாசித்தியே ட²பெத்வா, அவஸேஸானி கு²த்³தா³னுகு²த்³த³கானி ஸிக்கா²பதா³னீ’’தி. ஏகச்சே தே²ரா ஏவமாஹங்ஸு – ‘‘சத்தாரி பாராஜிகானி ட²பெத்வா, தேரஸ ஸங்கா⁴தி³ஸேஸே ட²பெத்வா, த்³வே அனியதே ட²பெத்வா, திங்ஸ நிஸ்ஸக்³கி³யே பாசித்தியே ட²பெத்வா, த்³வேனவுதி பாசித்தியே ட²பெத்வா, சத்தாரோ பாடிதே³ஸனீயே ட²பெத்வா, அவஸேஸானி கு²த்³தா³னுகு²த்³த³கானி ஸிக்கா²பதா³னீ’’தி.
441. Atha kho āyasmā ānando there bhikkhū etadavoca – ‘‘bhagavā maṃ, bhante, parinibbānakāle evamāha – ‘ākaṅkhamāno, ānanda, saṅgho mamaccayena khuddānukhuddakāni sikkhāpadāni samūhaneyyā’’’ti. ‘‘Pucchi pana tvaṃ, āvuso ānanda, bhagavantaṃ – ‘katamāni pana, bhante, khuddānukhuddakāni sikkhāpadānī’’’ti? ‘‘Na khohaṃ, bhante, bhagavantaṃ pucchiṃ – ‘katamāni pana, bhante, khuddānukhuddakāni sikkhāpadānī’’ti. Ekacce therā evamāhaṃsu – ‘‘cattāri pārājikāni ṭhapetvā, avasesāni khuddānukhuddakāni sikkhāpadānī’’ti. Ekacce therā evamāhaṃsu – ‘‘cattāri pārājikāni ṭhapetvā , terasa saṅghādisese ṭhapetvā, avasesāni khuddānukhuddakāni sikkhāpadānī’’ti. Ekacce therā evamāhaṃsu – ‘‘cattāri pārājikāni ṭhapetvā, terasa saṅghādisese ṭhapetvā, dve aniyate ṭhapetvā, avasesāni khuddānukhuddakāni sikkhāpadānī’’ti. Ekacce therā evamāhaṃsu – ‘‘cattāri pārājikāni ṭhapetvā, terasa saṅghādisese ṭhapetvā, dve aniyate ṭhapetvā, tiṃsa nissaggiye pācittiye ṭhapetvā, avasesāni khuddānukhuddakāni sikkhāpadānī’’ti. Ekacce therā evamāhaṃsu – ‘‘cattāri pārājikāni ṭhapetvā, terasa saṅghādisese ṭhapetvā, dve aniyate ṭhapetvā, tiṃsa nissaggiye pācittiye ṭhapetvā, dvenavuti pācittiye ṭhapetvā, avasesāni khuddānukhuddakāni sikkhāpadānī’’ti. Ekacce therā evamāhaṃsu – ‘‘cattāri pārājikāni ṭhapetvā, terasa saṅghādisese ṭhapetvā, dve aniyate ṭhapetvā, tiṃsa nissaggiye pācittiye ṭhapetvā, dvenavuti pācittiye ṭhapetvā, cattāro pāṭidesanīye ṭhapetvā, avasesāni khuddānukhuddakāni sikkhāpadānī’’ti.
442. அத² கோ² ஆயஸ்மா மஹாகஸ்ஸபோ ஸங்க⁴ங் ஞாபேஸி –
442. Atha kho āyasmā mahākassapo saṅghaṃ ñāpesi –
‘‘ஸுணாது மே, ஆவுஸோ, ஸங்கோ⁴. ஸந்தம்ஹாகங் ஸிக்கா²பதா³னி கி³ஹிக³தானி. கி³ஹினோபி ஜானந்தி – ‘இத³ங் வோ ஸமணானங் ஸக்யபுத்தியானங் கப்பதி, இத³ங் வோ ந கப்பதீ’தி. ஸசே மயங் கு²த்³தா³னுகு²த்³த³கானி ஸிக்கா²பதா³னி ஸமூஹனிஸ்ஸாம, ப⁴விஸ்ஸந்தி வத்தாரோ – ‘தூ⁴மகாலிகங் ஸமணேன கோ³தமேன ஸாவகானங் ஸிக்கா²பத³ங் பஞ்ஞத்தங். யாவிமேஸங் ஸத்தா² அட்டா²ஸி தாவிமே ஸிக்கா²பதே³ஸு ஸிக்கி²ங்ஸு. யதோ இமேஸங் ஸத்தா² பரினிப்³பு³தோ, ந தா³னிமே ஸிக்கா²பதே³ஸு ஸிக்க²ந்தீ’தி. யதி³ ஸங்க⁴ஸ்ஸ பத்தகல்லங், ஸங்கோ⁴ அப்பஞ்ஞத்தங் நப்பஞ்ஞபெய்ய, பஞ்ஞத்தங் ந ஸமுச்சி²ந்தெ³ய்ய, யதா²பஞ்ஞத்தேஸு ஸிக்கா²பதே³ஸு ஸமாதா³ய வத்தெய்ய. ஏஸா ஞத்தி.
‘‘Suṇātu me, āvuso, saṅgho. Santamhākaṃ sikkhāpadāni gihigatāni. Gihinopi jānanti – ‘idaṃ vo samaṇānaṃ sakyaputtiyānaṃ kappati, idaṃ vo na kappatī’ti. Sace mayaṃ khuddānukhuddakāni sikkhāpadāni samūhanissāma, bhavissanti vattāro – ‘dhūmakālikaṃ samaṇena gotamena sāvakānaṃ sikkhāpadaṃ paññattaṃ. Yāvimesaṃ satthā aṭṭhāsi tāvime sikkhāpadesu sikkhiṃsu. Yato imesaṃ satthā parinibbuto, na dānime sikkhāpadesu sikkhantī’ti. Yadi saṅghassa pattakallaṃ, saṅgho appaññattaṃ nappaññapeyya, paññattaṃ na samucchindeyya, yathāpaññattesu sikkhāpadesu samādāya vatteyya. Esā ñatti.
‘‘ஸுணாது மே, ஆவுஸோ, ஸங்கோ⁴. ஸந்தம்ஹாகங் ஸிக்கா²பதா³னி கி³ஹிக³தானி. கி³ஹினோபி ஜானந்தி – ‘இத³ங் வோ ஸமணானங் ஸக்யபுத்தியானங் கப்பதி, இத³ங் வோ ந கப்பதீ’தி. ஸசே மயங் கு²த்³தா³னுகு²த்³த³கானி ஸிக்கா²பதா³னி ஸமூஹனிஸ்ஸாம, ப⁴விஸ்ஸந்தி வத்தாரோ – ‘தூ⁴மகாலிகங் ஸமணேன கோ³தமேன ஸாவகானங் ஸிக்கா²பத³ங் பஞ்ஞத்தங் . யாவிமேஸங் ஸத்தா² அட்டா²ஸி தாவிமே ஸிக்கா²பதே³ஸு ஸிக்கி²ங்ஸு. யதோ இமேஸங் ஸத்தா² பரினிப்³பு³தோ, ந தா³னிமே ஸிக்கா²பதே³ஸு ஸிக்க²ந்தீ’தி. ஸங்கோ⁴ அப்பஞ்ஞத்தங் நப்பஞ்ஞபேதி, பஞ்ஞத்தங் ந ஸமுச்சி²ந்த³தி, யதா²பஞ்ஞத்தேஸு ஸிக்கா²பதே³ஸு ஸமாதா³ய வத்ததி. யஸ்ஸாயஸ்மதோ க²மதி அப்பஞ்ஞத்தஸ்ஸ அப்பஞ்ஞாபனா, பஞ்ஞத்தஸ்ஸ அஸமுச்சே²தோ³, யதா²பஞ்ஞத்தேஸு ஸிக்கா²பதே³ஸு ஸமாதா³ய வத்தனா, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Suṇātu me, āvuso, saṅgho. Santamhākaṃ sikkhāpadāni gihigatāni. Gihinopi jānanti – ‘idaṃ vo samaṇānaṃ sakyaputtiyānaṃ kappati, idaṃ vo na kappatī’ti. Sace mayaṃ khuddānukhuddakāni sikkhāpadāni samūhanissāma, bhavissanti vattāro – ‘dhūmakālikaṃ samaṇena gotamena sāvakānaṃ sikkhāpadaṃ paññattaṃ . Yāvimesaṃ satthā aṭṭhāsi tāvime sikkhāpadesu sikkhiṃsu. Yato imesaṃ satthā parinibbuto, na dānime sikkhāpadesu sikkhantī’ti. Saṅgho appaññattaṃ nappaññapeti, paññattaṃ na samucchindati, yathāpaññattesu sikkhāpadesu samādāya vattati. Yassāyasmato khamati appaññattassa appaññāpanā, paññattassa asamucchedo, yathāpaññattesu sikkhāpadesu samādāya vattanā, so tuṇhassa; yassa nakkhamati, so bhāseyya.
‘‘ஸங்கோ⁴ அப்பஞ்ஞத்தங் நப்பஞ்ஞபேதி, பஞ்ஞத்தங் ந ஸமுச்சி²ந்த³தி, யதா²பஞ்ஞத்தேஸு ஸிக்கா²பதே³ஸு ஸமாதா³ய வத்ததி. க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.
‘‘Saṅgho appaññattaṃ nappaññapeti, paññattaṃ na samucchindati, yathāpaññattesu sikkhāpadesu samādāya vattati. Khamati saṅghassa, tasmā tuṇhī, evametaṃ dhārayāmī’’ti.
443. அத² கோ² தே²ரா பி⁴க்கூ² ஆயஸ்மந்தங் ஆனந்த³ங் ஏதத³வோசுங் – ‘‘இத³ங் தே, ஆவுஸோ ஆனந்த³, து³க்கடங், யங் த்வங் ப⁴க³வந்தங் ந புச்சி² – ‘கதமானி பன, ப⁴ந்தே, கு²த்³தா³னுகு²த்³த³கானி ஸிக்கா²பதா³னீ’தி. தே³ஸேஹி தங் து³க்கட’’ந்தி. ‘‘அஹங் கோ², ப⁴ந்தே, அஸ்ஸதியா ப⁴க³வந்தங் ந புச்சி²ங் – ‘கதமானி பன, ப⁴ந்தே, கு²த்³தா³னுகு²த்³த³கானி ஸிக்கா²பதா³னீ’தி. நாஹங் தங் து³க்கடங் பஸ்ஸாமி, அபி சாயஸ்மந்தானங் ஸத்³தா⁴ய தே³ஸேமி தங் து³க்கட’’ந்தி. ‘‘இத³ம்பி தே, ஆவுஸோ ஆனந்த³, து³க்கடங், யங் த்வங் ப⁴க³வதோ வஸ்ஸிகஸாடிகங் அக்கமித்வா ஸிப்³பே³ஸி. தே³ஸேஹி தங் து³க்கட’’ந்தி. ‘‘அஹங் கோ², ப⁴ந்தே, ந அகா³ரவேன ப⁴க³வதோ வஸ்ஸிகஸாடிகங் அக்கமித்வா ஸிப்³பே³ஸிங். நாஹங் தங் து³க்கடங் பஸ்ஸாமி, அபி சாயஸ்மந்தானங் ஸத்³தா⁴ய தே³ஸேமி தங் து³க்கட’’ந்தி. ‘‘இத³ம்பி தே, ஆவுஸோ ஆனந்த³, து³க்கடங், யங் த்வங் மாதுகா³மேஹி ப⁴க³வதோ ஸரீரங் பட²மங் வந்தா³பேஸி, தாஸங் ரோத³ந்தீனங் ப⁴க³வதோ ஸரீரங் அஸ்ஸுகேன மக்கி²தங். தே³ஸேஹி தங் து³க்கட’’ந்தி. அஹங் கோ², ப⁴ந்தே – மாயிமாஸங் 1 விகாலே அஹேஸுந்தி – மாதுகா³மேஹி ப⁴க³வதோ ஸரீரங் பட²மங் வந்தா³பேஸிங். நாஹங் தங் து³க்கடங் பஸ்ஸாமி, அபி சாயஸ்மந்தானங் ஸத்³தா⁴ய தே³ஸேமி தங் து³க்கட’’ந்தி. ‘‘இத³ம்பி தே, ஆவுஸோ ஆனந்த³, து³க்கடங், யங் த்வங் ப⁴க³வதா ஓளாரிகே நிமித்தே கயிரமானே, ஓளாரிகே ஓபா⁴ஸே கயிரமானே, ந ப⁴க³வந்தங் யாசி – ‘திட்ட²து ப⁴க³வா கப்பங், திட்ட²து ஸுக³தோ கப்பங், ப³ஹுஜனஹிதாய ப³ஹுஜனஸுகா²ய லோகானுகம்பாய அத்தா²ய ஹிதாய ஸுகா²ய தே³வமனுஸ்ஸான’ந்தி. தே³ஸேஹி தங் து³க்கட’’ந்தி. ‘‘அஹங் கோ², ப⁴ந்தே, மாரேன பரியுட்டி²தசித்தோ ந ப⁴க³வந்தங் யாசிங் – ‘திட்ட²து ப⁴க³வா கப்பங், திட்ட²து ஸுக³தோ கப்பங், ப³ஹுஜனஹிதாய ப³ஹுஜனஸுகா²ய லோகானுகம்பாய அத்தா²ய ஹிதாய ஸுகா²ய தே³வமனுஸ்ஸான’ந்தி. நாஹங் தங் து³க்கடங் பஸ்ஸாமி, அபி சாயஸ்மந்தானங் ஸத்³தா⁴ய தே³ஸேமி தங் து³க்கட’’ந்தி. ‘‘இத³ம்பி தே, ஆவுஸோ ஆனந்த³, து³க்கடங் யங் த்வங் மாதுகா³மஸ்ஸ ததா²க³தப்பவேதி³தே த⁴ம்மவினயே பப்³ப³ஜ்ஜங் உஸ்ஸுக்கங் அகாஸி. தே³ஸேஹி தங் து³க்கட’’ந்தி. ‘‘அஹங் கோ², ப⁴ந்தே, அயங் மஹாபஜாபதி கோ³தமீ ப⁴க³வதோ மாதுச்சா² ஆபாதி³கா போஸிகா கீ²ரஸ்ஸ தா³யிகா ப⁴க³வந்தங் ஜனெத்தியா காலங்கதாய த²ஞ்ஞங் பாயேஸீதி மாதுகா³மஸ்ஸ ததா²க³தப்பவேதி³தே த⁴ம்மவினயே பப்³ப³ஜ்ஜங் உஸ்ஸுக்கங் அகாஸிங். நாஹங் தங் து³க்கடங் பஸ்ஸாமி, அபி சாயஸ்மந்தானங் ஸத்³தா⁴ய தே³ஸேமி தங் து³க்கட’’ந்தி.
443. Atha kho therā bhikkhū āyasmantaṃ ānandaṃ etadavocuṃ – ‘‘idaṃ te, āvuso ānanda, dukkaṭaṃ, yaṃ tvaṃ bhagavantaṃ na pucchi – ‘katamāni pana, bhante, khuddānukhuddakāni sikkhāpadānī’ti. Desehi taṃ dukkaṭa’’nti. ‘‘Ahaṃ kho, bhante, assatiyā bhagavantaṃ na pucchiṃ – ‘katamāni pana, bhante, khuddānukhuddakāni sikkhāpadānī’ti. Nāhaṃ taṃ dukkaṭaṃ passāmi, api cāyasmantānaṃ saddhāya desemi taṃ dukkaṭa’’nti. ‘‘Idampi te, āvuso ānanda, dukkaṭaṃ, yaṃ tvaṃ bhagavato vassikasāṭikaṃ akkamitvā sibbesi. Desehi taṃ dukkaṭa’’nti. ‘‘Ahaṃ kho, bhante, na agāravena bhagavato vassikasāṭikaṃ akkamitvā sibbesiṃ. Nāhaṃ taṃ dukkaṭaṃ passāmi, api cāyasmantānaṃ saddhāya desemi taṃ dukkaṭa’’nti. ‘‘Idampi te, āvuso ānanda, dukkaṭaṃ, yaṃ tvaṃ mātugāmehi bhagavato sarīraṃ paṭhamaṃ vandāpesi, tāsaṃ rodantīnaṃ bhagavato sarīraṃ assukena makkhitaṃ. Desehi taṃ dukkaṭa’’nti. Ahaṃ kho, bhante – māyimāsaṃ 2 vikāle ahesunti – mātugāmehi bhagavato sarīraṃ paṭhamaṃ vandāpesiṃ. Nāhaṃ taṃ dukkaṭaṃ passāmi, api cāyasmantānaṃ saddhāya desemi taṃ dukkaṭa’’nti. ‘‘Idampi te, āvuso ānanda, dukkaṭaṃ, yaṃ tvaṃ bhagavatā oḷārike nimitte kayiramāne, oḷārike obhāse kayiramāne, na bhagavantaṃ yāci – ‘tiṭṭhatu bhagavā kappaṃ, tiṭṭhatu sugato kappaṃ, bahujanahitāya bahujanasukhāya lokānukampāya atthāya hitāya sukhāya devamanussāna’nti. Desehi taṃ dukkaṭa’’nti. ‘‘Ahaṃ kho, bhante, mārena pariyuṭṭhitacitto na bhagavantaṃ yāciṃ – ‘tiṭṭhatu bhagavā kappaṃ, tiṭṭhatu sugato kappaṃ, bahujanahitāya bahujanasukhāya lokānukampāya atthāya hitāya sukhāya devamanussāna’nti. Nāhaṃ taṃ dukkaṭaṃ passāmi, api cāyasmantānaṃ saddhāya desemi taṃ dukkaṭa’’nti. ‘‘Idampi te, āvuso ānanda, dukkaṭaṃ yaṃ tvaṃ mātugāmassa tathāgatappavedite dhammavinaye pabbajjaṃ ussukkaṃ akāsi. Desehi taṃ dukkaṭa’’nti. ‘‘Ahaṃ kho, bhante, ayaṃ mahāpajāpati gotamī bhagavato mātucchā āpādikā posikā khīrassa dāyikā bhagavantaṃ janettiyā kālaṅkatāya thaññaṃ pāyesīti mātugāmassa tathāgatappavedite dhammavinaye pabbajjaṃ ussukkaṃ akāsiṃ. Nāhaṃ taṃ dukkaṭaṃ passāmi, api cāyasmantānaṃ saddhāya desemi taṃ dukkaṭa’’nti.
444. தேன கோ² பன ஸமயேன ஆயஸ்மா புராணோ த³க்கி²ணாகி³ரிஸ்மிங் சாரிகங் சரதி மஹதா பி⁴க்கு²ஸங்கே⁴ன ஸத்³தி⁴ங் பஞ்சமத்தேஹி பி⁴க்கு²ஸதேஹி. அத² கோ² ஆயஸ்மா புராணோ தே²ரேஹி பி⁴க்கூ²ஹி த⁴ம்மே ச வினயே ச ஸங்கீ³தே த³க்கி²ணாகி³ரிஸ்மிங் யதா²பி⁴ரந்தங் விஹரித்வா யேன ராஜக³ஹங் யேன வேளுவனங் கலந்த³கனிவாபோ யேன தே²ரா பி⁴க்கூ² தேனுபஸங்கமி, உபஸங்கமித்வா தே²ரேஹி பி⁴க்கூ²ஹி ஸத்³தி⁴ங் படிஸம்மோதி³த்வா ஏகமந்தங் நிஸீதி³. ஏகமந்தங் நிஸின்னங் கோ² ஆயஸ்மந்தங் புராணங் தே²ரா பி⁴க்கூ² ஏதத³வோசுங் – ‘‘தே²ரேஹி, ஆவுஸோ புராண, த⁴ம்மோ ச வினயோ ச ஸங்கீ³தோ. உபேஹி தங் ஸங்கீ³தி’’ந்தி. ‘‘ஸுஸங்கீ³தாவுஸோ, தே²ரேஹி த⁴ம்மோ ச வினயோ ச. அபிச யதே²வ மயா ப⁴க³வதோ ஸம்முகா² ஸுதங், ஸம்முகா² படிக்³க³ஹிதங், ததே²வாஹங் தா⁴ரெஸ்ஸாமீ’’தி.
444. Tena kho pana samayena āyasmā purāṇo dakkhiṇāgirismiṃ cārikaṃ carati mahatā bhikkhusaṅghena saddhiṃ pañcamattehi bhikkhusatehi. Atha kho āyasmā purāṇo therehi bhikkhūhi dhamme ca vinaye ca saṅgīte dakkhiṇāgirismiṃ yathābhirantaṃ viharitvā yena rājagahaṃ yena veḷuvanaṃ kalandakanivāpo yena therā bhikkhū tenupasaṅkami, upasaṅkamitvā therehi bhikkhūhi saddhiṃ paṭisammoditvā ekamantaṃ nisīdi. Ekamantaṃ nisinnaṃ kho āyasmantaṃ purāṇaṃ therā bhikkhū etadavocuṃ – ‘‘therehi, āvuso purāṇa, dhammo ca vinayo ca saṅgīto. Upehi taṃ saṅgīti’’nti. ‘‘Susaṅgītāvuso, therehi dhammo ca vinayo ca. Apica yatheva mayā bhagavato sammukhā sutaṃ, sammukhā paṭiggahitaṃ, tathevāhaṃ dhāressāmī’’ti.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / கு²த்³தா³னுகு²த்³த³கஸிக்கா²பத³கதா² • Khuddānukhuddakasikkhāpadakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / கு²த்³தா³னுகு²த்³த³கஸிக்கா²பத³கதா²வண்ணனா • Khuddānukhuddakasikkhāpadakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / கு²த்³தா³னுகு²த்³த³ககதா²வண்ணனா • Khuddānukhuddakakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / கு²த்³தா³னுகு²த்³த³கஸிக்கா²பத³கதா²வண்ணனா • Khuddānukhuddakasikkhāpadakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 1. கு²த்³தா³னுகு²த்³த³கஸிக்கா²பத³கதா² • 1. Khuddānukhuddakasikkhāpadakathā
