| Library / Tipiṭaka / တိပိဋက • Tipiṭaka / စူဠဝဂ္ဂပာဠိ • Cūḷavaggapāḷi |
၂. ခုဒ္ဒာနုခုဒ္ဒကသိက္ခာပဒကထာ
2. Khuddānukhuddakasikkhāpadakathā
၄၄၁. အထ ခော အာယသ္မာ အာနန္ဒော ထေရေ ဘိက္ခူ ဧတဒဝောစ – ‘‘ဘဂဝာ မံ, ဘန္တေ, ပရိနိဗ္ဗာနကာလေ ဧဝမာဟ – ‘အာကင္ခမာနော, အာနန္ဒ, သင္ဃော မမစ္စယေန ခုဒ္ဒာနုခုဒ္ဒကာနိ သိက္ခာပဒာနိ သမူဟနေယ္ယာ’’’တိ။ ‘‘ပုစ္ဆိ ပန တ္ဝံ, အာဝုသော အာနန္ဒ, ဘဂဝန္တံ – ‘ကတမာနိ ပန, ဘန္တေ, ခုဒ္ဒာနုခုဒ္ဒကာနိ သိက္ခာပဒာနီ’’’တိ? ‘‘န ခောဟံ, ဘန္တေ, ဘဂဝန္တံ ပုစ္ဆိံ – ‘ကတမာနိ ပန, ဘန္တေ, ခုဒ္ဒာနုခုဒ္ဒကာနိ သိက္ခာပဒာနီ’’တိ။ ဧကစ္စေ ထေရာ ဧဝမာဟံသု – ‘‘စတ္တာရိ ပာရာဇိကာနိ ဌပေတ္ဝာ, အဝသေသာနိ ခုဒ္ဒာနုခုဒ္ဒကာနိ သိက္ခာပဒာနီ’’တိ။ ဧကစ္စေ ထေရာ ဧဝမာဟံသု – ‘‘စတ္တာရိ ပာရာဇိကာနိ ဌပေတ္ဝာ , တေရသ သင္ဃာဒိသေသေ ဌပေတ္ဝာ, အဝသေသာနိ ခုဒ္ဒာနုခုဒ္ဒကာနိ သိက္ခာပဒာနီ’’တိ။ ဧကစ္စေ ထေရာ ဧဝမာဟံသု – ‘‘စတ္တာရိ ပာရာဇိကာနိ ဌပေတ္ဝာ, တေရသ သင္ဃာဒိသေသေ ဌပေတ္ဝာ, ဒ္ဝေ အနိယတေ ဌပေတ္ဝာ, အဝသေသာနိ ခုဒ္ဒာနုခုဒ္ဒကာနိ သိက္ခာပဒာနီ’’တိ။ ဧကစ္စေ ထေရာ ဧဝမာဟံသု – ‘‘စတ္တာရိ ပာရာဇိကာနိ ဌပေတ္ဝာ, တေရသ သင္ဃာဒိသေသေ ဌပေတ္ဝာ, ဒ္ဝေ အနိယတေ ဌပေတ္ဝာ, တိံသ နိသ္သဂ္ဂိယေ ပာစိတ္တိယေ ဌပေတ္ဝာ, အဝသေသာနိ ခုဒ္ဒာနုခုဒ္ဒကာနိ သိက္ခာပဒာနီ’’တိ။ ဧကစ္စေ ထေရာ ဧဝမာဟံသု – ‘‘စတ္တာရိ ပာရာဇိကာနိ ဌပေတ္ဝာ, တေရသ သင္ဃာဒိသေသေ ဌပေတ္ဝာ, ဒ္ဝေ အနိယတေ ဌပေတ္ဝာ, တိံသ နိသ္သဂ္ဂိယေ ပာစိတ္တိယေ ဌပေတ္ဝာ, ဒ္ဝေနဝုတိ ပာစိတ္တိယေ ဌပေတ္ဝာ, အဝသေသာနိ ခုဒ္ဒာနုခုဒ္ဒကာနိ သိက္ခာပဒာနီ’’တိ။ ဧကစ္စေ ထေရာ ဧဝမာဟံသု – ‘‘စတ္တာရိ ပာရာဇိကာနိ ဌပေတ္ဝာ, တေရသ သင္ဃာဒိသေသေ ဌပေတ္ဝာ, ဒ္ဝေ အနိယတေ ဌပေတ္ဝာ, တိံသ နိသ္သဂ္ဂိယေ ပာစိတ္တိယေ ဌပေတ္ဝာ, ဒ္ဝေနဝုတိ ပာစိတ္တိယေ ဌပေတ္ဝာ, စတ္တာရော ပာဋိဒေသနီယေ ဌပေတ္ဝာ, အဝသေသာနိ ခုဒ္ဒာနုခုဒ္ဒကာနိ သိက္ခာပဒာနီ’’တိ။
441. Atha kho āyasmā ānando there bhikkhū etadavoca – ‘‘bhagavā maṃ, bhante, parinibbānakāle evamāha – ‘ākaṅkhamāno, ānanda, saṅgho mamaccayena khuddānukhuddakāni sikkhāpadāni samūhaneyyā’’’ti. ‘‘Pucchi pana tvaṃ, āvuso ānanda, bhagavantaṃ – ‘katamāni pana, bhante, khuddānukhuddakāni sikkhāpadānī’’’ti? ‘‘Na khohaṃ, bhante, bhagavantaṃ pucchiṃ – ‘katamāni pana, bhante, khuddānukhuddakāni sikkhāpadānī’’ti. Ekacce therā evamāhaṃsu – ‘‘cattāri pārājikāni ṭhapetvā, avasesāni khuddānukhuddakāni sikkhāpadānī’’ti. Ekacce therā evamāhaṃsu – ‘‘cattāri pārājikāni ṭhapetvā , terasa saṅghādisese ṭhapetvā, avasesāni khuddānukhuddakāni sikkhāpadānī’’ti. Ekacce therā evamāhaṃsu – ‘‘cattāri pārājikāni ṭhapetvā, terasa saṅghādisese ṭhapetvā, dve aniyate ṭhapetvā, avasesāni khuddānukhuddakāni sikkhāpadānī’’ti. Ekacce therā evamāhaṃsu – ‘‘cattāri pārājikāni ṭhapetvā, terasa saṅghādisese ṭhapetvā, dve aniyate ṭhapetvā, tiṃsa nissaggiye pācittiye ṭhapetvā, avasesāni khuddānukhuddakāni sikkhāpadānī’’ti. Ekacce therā evamāhaṃsu – ‘‘cattāri pārājikāni ṭhapetvā, terasa saṅghādisese ṭhapetvā, dve aniyate ṭhapetvā, tiṃsa nissaggiye pācittiye ṭhapetvā, dvenavuti pācittiye ṭhapetvā, avasesāni khuddānukhuddakāni sikkhāpadānī’’ti. Ekacce therā evamāhaṃsu – ‘‘cattāri pārājikāni ṭhapetvā, terasa saṅghādisese ṭhapetvā, dve aniyate ṭhapetvā, tiṃsa nissaggiye pācittiye ṭhapetvā, dvenavuti pācittiye ṭhapetvā, cattāro pāṭidesanīye ṭhapetvā, avasesāni khuddānukhuddakāni sikkhāpadānī’’ti.
၄၄၂. အထ ခော အာယသ္မာ မဟာကသ္သပော သင္ဃံ ဉာပေသိ –
442. Atha kho āyasmā mahākassapo saṅghaṃ ñāpesi –
‘‘သုဏာတု မေ, အာဝုသော, သင္ဃော။ သန္တမ္ဟာကံ သိက္ခာပဒာနိ ဂိဟိဂတာနိ။ ဂိဟိနောပိ ဇာနန္တိ – ‘ဣဒံ ဝော သမဏာနံ သက္ယပုတ္တိယာနံ ကပ္ပတိ, ဣဒံ ဝော န ကပ္ပတီ’တိ။ သစေ မယံ ခုဒ္ဒာနုခုဒ္ဒကာနိ သိက္ခာပဒာနိ သမူဟနိသ္သာမ, ဘဝိသ္သန္တိ ဝတ္တာရော – ‘ဓူမကာလိကံ သမဏေန ဂောတမေန သာဝကာနံ သိက္ခာပဒံ ပညတ္တံ။ ယာဝိမေသံ သတ္ထာ အဋ္ဌာသိ တာဝိမေ သိက္ခာပဒေသု သိက္ခိံသု။ ယတော ဣမေသံ သတ္ထာ ပရိနိဗ္ဗုတော, န ဒာနိမေ သိက္ခာပဒေသု သိက္ခန္တီ’တိ။ ယဒိ သင္ဃသ္သ ပတ္တကလ္လံ, သင္ဃော အပ္ပညတ္တံ နပ္ပညပေယ္ယ, ပညတ္တံ န သမုစ္ဆိန္ဒေယ္ယ, ယထာပညတ္တေသု သိက္ခာပဒေသု သမာဒာယ ဝတ္တေယ္ယ။ ဧသာ ဉတ္တိ။
‘‘Suṇātu me, āvuso, saṅgho. Santamhākaṃ sikkhāpadāni gihigatāni. Gihinopi jānanti – ‘idaṃ vo samaṇānaṃ sakyaputtiyānaṃ kappati, idaṃ vo na kappatī’ti. Sace mayaṃ khuddānukhuddakāni sikkhāpadāni samūhanissāma, bhavissanti vattāro – ‘dhūmakālikaṃ samaṇena gotamena sāvakānaṃ sikkhāpadaṃ paññattaṃ. Yāvimesaṃ satthā aṭṭhāsi tāvime sikkhāpadesu sikkhiṃsu. Yato imesaṃ satthā parinibbuto, na dānime sikkhāpadesu sikkhantī’ti. Yadi saṅghassa pattakallaṃ, saṅgho appaññattaṃ nappaññapeyya, paññattaṃ na samucchindeyya, yathāpaññattesu sikkhāpadesu samādāya vatteyya. Esā ñatti.
‘‘သုဏာတု မေ, အာဝုသော, သင္ဃော။ သန္တမ္ဟာကံ သိက္ခာပဒာနိ ဂိဟိဂတာနိ။ ဂိဟိနောပိ ဇာနန္တိ – ‘ဣဒံ ဝော သမဏာနံ သက္ယပုတ္တိယာနံ ကပ္ပတိ, ဣဒံ ဝော န ကပ္ပတီ’တိ။ သစေ မယံ ခုဒ္ဒာနုခုဒ္ဒကာနိ သိက္ခာပဒာနိ သမူဟနိသ္သာမ, ဘဝိသ္သန္တိ ဝတ္တာရော – ‘ဓူမကာလိကံ သမဏေန ဂောတမေန သာဝကာနံ သိက္ခာပဒံ ပညတ္တံ ။ ယာဝိမေသံ သတ္ထာ အဋ္ဌာသိ တာဝိမေ သိက္ခာပဒေသု သိက္ခိံသု။ ယတော ဣမေသံ သတ္ထာ ပရိနိဗ္ဗုတော, န ဒာနိမေ သိက္ခာပဒေသု သိက္ခန္တီ’တိ။ သင္ဃော အပ္ပညတ္တံ နပ္ပညပေတိ, ပညတ္တံ န သမုစ္ဆိန္ဒတိ, ယထာပညတ္တေသု သိက္ခာပဒေသု သမာဒာယ ဝတ္တတိ။ ယသ္သာယသ္မတော ခမတိ အပ္ပညတ္တသ္သ အပ္ပညာပနာ, ပညတ္တသ္သ အသမုစ္ဆေဒော, ယထာပညတ္တေသု သိက္ခာပဒေသု သမာဒာယ ဝတ္တနာ, သော တုဏ္ဟသ္သ; ယသ္သ နက္ခမတိ, သော ဘာသေယ္ယ။
‘‘Suṇātu me, āvuso, saṅgho. Santamhākaṃ sikkhāpadāni gihigatāni. Gihinopi jānanti – ‘idaṃ vo samaṇānaṃ sakyaputtiyānaṃ kappati, idaṃ vo na kappatī’ti. Sace mayaṃ khuddānukhuddakāni sikkhāpadāni samūhanissāma, bhavissanti vattāro – ‘dhūmakālikaṃ samaṇena gotamena sāvakānaṃ sikkhāpadaṃ paññattaṃ . Yāvimesaṃ satthā aṭṭhāsi tāvime sikkhāpadesu sikkhiṃsu. Yato imesaṃ satthā parinibbuto, na dānime sikkhāpadesu sikkhantī’ti. Saṅgho appaññattaṃ nappaññapeti, paññattaṃ na samucchindati, yathāpaññattesu sikkhāpadesu samādāya vattati. Yassāyasmato khamati appaññattassa appaññāpanā, paññattassa asamucchedo, yathāpaññattesu sikkhāpadesu samādāya vattanā, so tuṇhassa; yassa nakkhamati, so bhāseyya.
‘‘သင္ဃော အပ္ပညတ္တံ နပ္ပညပေတိ, ပညတ္တံ န သမုစ္ဆိန္ဒတိ, ယထာပညတ္တေသု သိက္ခာပဒေသု သမာဒာယ ဝတ္တတိ။ ခမတိ သင္ဃသ္သ, တသ္မာ တုဏ္ဟီ, ဧဝမေတံ ဓာရယာမီ’’တိ။
‘‘Saṅgho appaññattaṃ nappaññapeti, paññattaṃ na samucchindati, yathāpaññattesu sikkhāpadesu samādāya vattati. Khamati saṅghassa, tasmā tuṇhī, evametaṃ dhārayāmī’’ti.
၄၄၃. အထ ခော ထေရာ ဘိက္ခူ အာယသ္မန္တံ အာနန္ဒံ ဧတဒဝောစုံ – ‘‘ဣဒံ တေ, အာဝုသော အာနန္ဒ, ဒုက္ကဋံ, ယံ တ္ဝံ ဘဂဝန္တံ န ပုစ္ဆိ – ‘ကတမာနိ ပန, ဘန္တေ, ခုဒ္ဒာနုခုဒ္ဒကာနိ သိက္ခာပဒာနီ’တိ။ ဒေသေဟိ တံ ဒုက္ကဋ’’န္တိ။ ‘‘အဟံ ခော, ဘန္တေ, အသ္သတိယာ ဘဂဝန္တံ န ပုစ္ဆိံ – ‘ကတမာနိ ပန, ဘန္တေ, ခုဒ္ဒာနုခုဒ္ဒကာနိ သိက္ခာပဒာနီ’တိ။ နာဟံ တံ ဒုက္ကဋံ ပသ္သာမိ, အပိ စာယသ္မန္တာနံ သဒ္ဓာယ ဒေသေမိ တံ ဒုက္ကဋ’’န္တိ။ ‘‘ဣဒမ္ပိ တေ, အာဝုသော အာနန္ဒ, ဒုက္ကဋံ, ယံ တ္ဝံ ဘဂဝတော ဝသ္သိကသာဋိကံ အက္ကမိတ္ဝာ သိဗ္ဗေသိ။ ဒေသေဟိ တံ ဒုက္ကဋ’’န္တိ။ ‘‘အဟံ ခော, ဘန္တေ, န အဂာရဝေန ဘဂဝတော ဝသ္သိကသာဋိကံ အက္ကမိတ္ဝာ သိဗ္ဗေသိံ။ နာဟံ တံ ဒုက္ကဋံ ပသ္သာမိ, အပိ စာယသ္မန္တာနံ သဒ္ဓာယ ဒေသေမိ တံ ဒုက္ကဋ’’န္တိ။ ‘‘ဣဒမ္ပိ တေ, အာဝုသော အာနန္ဒ, ဒုက္ကဋံ, ယံ တ္ဝံ မာတုဂာမေဟိ ဘဂဝတော သရီရံ ပဌမံ ဝန္ဒာပေသိ, တာသံ ရောဒန္တီနံ ဘဂဝတော သရီရံ အသ္သုကေန မက္ခိတံ။ ဒေသေဟိ တံ ဒုက္ကဋ’’န္တိ။ အဟံ ခော, ဘန္တေ – မာယိမာသံ 1 ဝိကာလေ အဟေသုန္တိ – မာတုဂာမေဟိ ဘဂဝတော သရီရံ ပဌမံ ဝန္ဒာပေသိံ။ နာဟံ တံ ဒုက္ကဋံ ပသ္သာမိ, အပိ စာယသ္မန္တာနံ သဒ္ဓာယ ဒေသေမိ တံ ဒုက္ကဋ’’န္တိ။ ‘‘ဣဒမ္ပိ တေ, အာဝုသော အာနန္ဒ, ဒုက္ကဋံ, ယံ တ္ဝံ ဘဂဝတာ ဩဠာရိကေ နိမိတ္တေ ကယိရမာနေ, ဩဠာရိကေ ဩဘာသေ ကယိရမာနေ, န ဘဂဝန္တံ ယာစိ – ‘တိဋ္ဌတု ဘဂဝာ ကပ္ပံ, တိဋ္ဌတု သုဂတော ကပ္ပံ, ဗဟုဇနဟိတာယ ဗဟုဇနသုခာယ လောကာနုကမ္ပာယ အတ္ထာယ ဟိတာယ သုခာယ ဒေဝမနုသ္သာန’န္တိ။ ဒေသေဟိ တံ ဒုက္ကဋ’’န္တိ။ ‘‘အဟံ ခော, ဘန္တေ, မာရေန ပရိယုဋ္ဌိတစိတ္တော န ဘဂဝန္တံ ယာစိံ – ‘တိဋ္ဌတု ဘဂဝာ ကပ္ပံ, တိဋ္ဌတု သုဂတော ကပ္ပံ, ဗဟုဇနဟိတာယ ဗဟုဇနသုခာယ လောကာနုကမ္ပာယ အတ္ထာယ ဟိတာယ သုခာယ ဒေဝမနုသ္သာန’န္တိ။ နာဟံ တံ ဒုက္ကဋံ ပသ္သာမိ, အပိ စာယသ္မန္တာနံ သဒ္ဓာယ ဒေသေမိ တံ ဒုက္ကဋ’’န္တိ။ ‘‘ဣဒမ္ပိ တေ, အာဝုသော အာနန္ဒ, ဒုက္ကဋံ ယံ တ္ဝံ မာတုဂာမသ္သ တထာဂတပ္ပဝေဒိတေ ဓမ္မဝိနယေ ပဗ္ဗဇ္ဇံ ဥသ္သုက္ကံ အကာသိ။ ဒေသေဟိ တံ ဒုက္ကဋ’’န္တိ။ ‘‘အဟံ ခော, ဘန္တေ, အယံ မဟာပဇာပတိ ဂောတမီ ဘဂဝတော မာတုစ္ဆာ အာပာဒိကာ ပောသိကာ ခီရသ္သ ဒာယိကာ ဘဂဝန္တံ ဇနေတ္တိယာ ကာလင္ကတာယ ထညံ ပာယေသီတိ မာတုဂာမသ္သ တထာဂတပ္ပဝေဒိတေ ဓမ္မဝိနယေ ပဗ္ဗဇ္ဇံ ဥသ္သုက္ကံ အကာသိံ။ နာဟံ တံ ဒုက္ကဋံ ပသ္သာမိ, အပိ စာယသ္မန္တာနံ သဒ္ဓာယ ဒေသေမိ တံ ဒုက္ကဋ’’န္တိ။
443. Atha kho therā bhikkhū āyasmantaṃ ānandaṃ etadavocuṃ – ‘‘idaṃ te, āvuso ānanda, dukkaṭaṃ, yaṃ tvaṃ bhagavantaṃ na pucchi – ‘katamāni pana, bhante, khuddānukhuddakāni sikkhāpadānī’ti. Desehi taṃ dukkaṭa’’nti. ‘‘Ahaṃ kho, bhante, assatiyā bhagavantaṃ na pucchiṃ – ‘katamāni pana, bhante, khuddānukhuddakāni sikkhāpadānī’ti. Nāhaṃ taṃ dukkaṭaṃ passāmi, api cāyasmantānaṃ saddhāya desemi taṃ dukkaṭa’’nti. ‘‘Idampi te, āvuso ānanda, dukkaṭaṃ, yaṃ tvaṃ bhagavato vassikasāṭikaṃ akkamitvā sibbesi. Desehi taṃ dukkaṭa’’nti. ‘‘Ahaṃ kho, bhante, na agāravena bhagavato vassikasāṭikaṃ akkamitvā sibbesiṃ. Nāhaṃ taṃ dukkaṭaṃ passāmi, api cāyasmantānaṃ saddhāya desemi taṃ dukkaṭa’’nti. ‘‘Idampi te, āvuso ānanda, dukkaṭaṃ, yaṃ tvaṃ mātugāmehi bhagavato sarīraṃ paṭhamaṃ vandāpesi, tāsaṃ rodantīnaṃ bhagavato sarīraṃ assukena makkhitaṃ. Desehi taṃ dukkaṭa’’nti. Ahaṃ kho, bhante – māyimāsaṃ 2 vikāle ahesunti – mātugāmehi bhagavato sarīraṃ paṭhamaṃ vandāpesiṃ. Nāhaṃ taṃ dukkaṭaṃ passāmi, api cāyasmantānaṃ saddhāya desemi taṃ dukkaṭa’’nti. ‘‘Idampi te, āvuso ānanda, dukkaṭaṃ, yaṃ tvaṃ bhagavatā oḷārike nimitte kayiramāne, oḷārike obhāse kayiramāne, na bhagavantaṃ yāci – ‘tiṭṭhatu bhagavā kappaṃ, tiṭṭhatu sugato kappaṃ, bahujanahitāya bahujanasukhāya lokānukampāya atthāya hitāya sukhāya devamanussāna’nti. Desehi taṃ dukkaṭa’’nti. ‘‘Ahaṃ kho, bhante, mārena pariyuṭṭhitacitto na bhagavantaṃ yāciṃ – ‘tiṭṭhatu bhagavā kappaṃ, tiṭṭhatu sugato kappaṃ, bahujanahitāya bahujanasukhāya lokānukampāya atthāya hitāya sukhāya devamanussāna’nti. Nāhaṃ taṃ dukkaṭaṃ passāmi, api cāyasmantānaṃ saddhāya desemi taṃ dukkaṭa’’nti. ‘‘Idampi te, āvuso ānanda, dukkaṭaṃ yaṃ tvaṃ mātugāmassa tathāgatappavedite dhammavinaye pabbajjaṃ ussukkaṃ akāsi. Desehi taṃ dukkaṭa’’nti. ‘‘Ahaṃ kho, bhante, ayaṃ mahāpajāpati gotamī bhagavato mātucchā āpādikā posikā khīrassa dāyikā bhagavantaṃ janettiyā kālaṅkatāya thaññaṃ pāyesīti mātugāmassa tathāgatappavedite dhammavinaye pabbajjaṃ ussukkaṃ akāsiṃ. Nāhaṃ taṃ dukkaṭaṃ passāmi, api cāyasmantānaṃ saddhāya desemi taṃ dukkaṭa’’nti.
၄၄၄. တေန ခော ပန သမယေန အာယသ္မာ ပုရာဏော ဒက္ခိဏာဂိရိသ္မိံ စာရိကံ စရတိ မဟတာ ဘိက္ခုသင္ဃေန သဒ္ဓိံ ပဉ္စမတ္တေဟိ ဘိက္ခုသတေဟိ။ အထ ခော အာယသ္မာ ပုရာဏော ထေရေဟိ ဘိက္ခူဟိ ဓမ္မေ စ ဝိနယေ စ သင္ဂီတေ ဒက္ခိဏာဂိရိသ္မိံ ယထာဘိရန္တံ ဝိဟရိတ္ဝာ ယေန ရာဇဂဟံ ယေန ဝေဠုဝနံ ကလန္ဒကနိဝာပော ယေန ထေရာ ဘိက္ခူ တေနုပသင္ကမိ, ဥပသင္ကမိတ္ဝာ ထေရေဟိ ဘိက္ခူဟိ သဒ္ဓိံ ပဋိသမ္မောဒိတ္ဝာ ဧကမန္တံ နိသီဒိ။ ဧကမန္တံ နိသိန္နံ ခော အာယသ္မန္တံ ပုရာဏံ ထေရာ ဘိက္ခူ ဧတဒဝောစုံ – ‘‘ထေရေဟိ, အာဝုသော ပုရာဏ, ဓမ္မော စ ဝိနယော စ သင္ဂီတော။ ဥပေဟိ တံ သင္ဂီတိ’’န္တိ။ ‘‘သုသင္ဂီတာဝုသော, ထေရေဟိ ဓမ္မော စ ဝိနယော စ။ အပိစ ယထေဝ မယာ ဘဂဝတော သမ္မုခာ သုတံ, သမ္မုခာ ပဋိဂ္ဂဟိတံ, တထေဝာဟံ ဓာရေသ္သာမီ’’တိ။
444. Tena kho pana samayena āyasmā purāṇo dakkhiṇāgirismiṃ cārikaṃ carati mahatā bhikkhusaṅghena saddhiṃ pañcamattehi bhikkhusatehi. Atha kho āyasmā purāṇo therehi bhikkhūhi dhamme ca vinaye ca saṅgīte dakkhiṇāgirismiṃ yathābhirantaṃ viharitvā yena rājagahaṃ yena veḷuvanaṃ kalandakanivāpo yena therā bhikkhū tenupasaṅkami, upasaṅkamitvā therehi bhikkhūhi saddhiṃ paṭisammoditvā ekamantaṃ nisīdi. Ekamantaṃ nisinnaṃ kho āyasmantaṃ purāṇaṃ therā bhikkhū etadavocuṃ – ‘‘therehi, āvuso purāṇa, dhammo ca vinayo ca saṅgīto. Upehi taṃ saṅgīti’’nti. ‘‘Susaṅgītāvuso, therehi dhammo ca vinayo ca. Apica yatheva mayā bhagavato sammukhā sutaṃ, sammukhā paṭiggahitaṃ, tathevāhaṃ dhāressāmī’’ti.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / စူဠဝဂ္ဂ-အဋ္ဌကထာ • Cūḷavagga-aṭṭhakathā / ခုဒ္ဒာနုခုဒ္ဒကသိက္ခာပဒကထာ • Khuddānukhuddakasikkhāpadakathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ခုဒ္ဒာနုခုဒ္ဒကသိက္ခာပဒကထာဝဏ္ဏနာ • Khuddānukhuddakasikkhāpadakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ခုဒ္ဒာနုခုဒ္ဒကကထာဝဏ္ဏနာ • Khuddānukhuddakakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ခုဒ္ဒာနုခုဒ္ဒကသိက္ခာပဒကထာဝဏ္ဏနာ • Khuddānukhuddakasikkhāpadakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၁. ခုဒ္ဒာနုခုဒ္ဒကသိက္ခာပဒကထာ • 1. Khuddānukhuddakasikkhāpadakathā
