| Library / Tipiṭaka / තිපිටක • Tipiṭaka / චූළවග්‌ග-අට්‌ඨකථා • Cūḷavagga-aṭṭhakathā |
11. පඤ්‌චසතිකක්‌ඛන්‌ධකං
11. Pañcasatikakkhandhakaṃ
ඛුද්‌දානුඛුද්‌දකසික්‌ඛාපදකථා
Khuddānukhuddakasikkhāpadakathā
441. පඤ්‌චසතිකක්‌ඛන්‌ධකෙ – චත්‌තාරි පාරාජිකානි ඨපෙත්‌වා අවසෙසානි ඛුද්‌දානුඛුද්‌දකානීති එවමාදි එකසික්‌ඛාපදම්‌පි අපරිච්‌චජිත්‌වා සබ්‌බෙසං සඞ්‌ගහෙතබ්‌බභාවදස්‌සනත්‌ථං පරියායෙන වුත්‌තං. ඉදං වො සමණානන්‌ති ඉදං සමණානං. පදපූරණමත්‌තෙ වොකාරො.
441. Pañcasatikakkhandhake – cattāri pārājikāni ṭhapetvā avasesāni khuddānukhuddakānīti evamādi ekasikkhāpadampi apariccajitvā sabbesaṃ saṅgahetabbabhāvadassanatthaṃ pariyāyena vuttaṃ. Idaṃ vo samaṇānanti idaṃ samaṇānaṃ. Padapūraṇamatte vokāro.
443. ඉදම්‌පි තෙ ආවුසො ආනන්‌ද දුක්‌කටන්‌ති ‘‘ඉදං තයා දුට්‌ඨු කත’’න්‌ති කෙවලං ගරහන්‌තෙහි ථෙරෙහි වුත්‌තං , න ආපත්‌තිං සන්‌ධාය වුත්‌තං. න හි තෙ ආපත්‌තානාපත්‌තිං න ජානන්‌ති. ඉදානෙව චෙතං අනුස්‌සාවිතං – ‘‘සඞ්‌ඝො අපඤ්‌ඤත්‌තං න පඤ්‌ඤපෙති, පඤ්‌ඤත්‌තං න සමුච්‌ඡින්‌දතී’’ති. දෙසෙහි තං දුක්‌කටන්‌ති ඉදම්‌පි ච ‘‘ආම, භන්‌තෙ, දුට්‌ඨු මයා කත’’න්‌ති එවං පටිජානාහි, තං දුක්‌කටන්‌ති ඉදං සන්‌ධාය වුත්‌තං, න ආපත්‌තිදෙසනං. ථෙරො පන යස්‌මා අසතියා න පුච්‌ඡි න අනාදරෙන, තස්‌මා තත්‌ථ දුට්‌ඨුකතභාවම්‌පි අසල්‌ලක්‌ඛෙන්‌තො ‘‘නාහං තං දුක්‌කටං පස්‌සාමී’’ති වත්‌වා ථෙරෙසු ගාරවං දස්‌සෙන්‌තො ‘‘අපිචායස්‌මන්‌තානං සන්‌ධාය දෙසෙමි තං දුක්‌කට’’න්‌ති ආහ. යථා තුම්‌හෙ වදථ, තථා පටිජානාමීති වුත්‌තං හොති. එසෙව නයො අවසෙසෙසු චතූසු ඨානෙසු. සෙසමෙත්‌ථ යං වත්‌තබ්‌බං සියා, තං නිදානවණ්‌ණනායමෙව වුත්‌තං.
443.Idampi te āvuso ānanda dukkaṭanti ‘‘idaṃ tayā duṭṭhu kata’’nti kevalaṃ garahantehi therehi vuttaṃ , na āpattiṃ sandhāya vuttaṃ. Na hi te āpattānāpattiṃ na jānanti. Idāneva cetaṃ anussāvitaṃ – ‘‘saṅgho apaññattaṃ na paññapeti, paññattaṃ na samucchindatī’’ti. Desehi taṃ dukkaṭanti idampi ca ‘‘āma, bhante, duṭṭhu mayā kata’’nti evaṃ paṭijānāhi, taṃ dukkaṭanti idaṃ sandhāya vuttaṃ, na āpattidesanaṃ. Thero pana yasmā asatiyā na pucchi na anādarena, tasmā tattha duṭṭhukatabhāvampi asallakkhento ‘‘nāhaṃ taṃ dukkaṭaṃ passāmī’’ti vatvā theresu gāravaṃ dassento ‘‘apicāyasmantānaṃ sandhāya desemi taṃ dukkaṭa’’nti āha. Yathā tumhe vadatha, tathā paṭijānāmīti vuttaṃ hoti. Eseva nayo avasesesu catūsu ṭhānesu. Sesamettha yaṃ vattabbaṃ siyā, taṃ nidānavaṇṇanāyameva vuttaṃ.
ඛුද්‌දානුඛුද්‌දකසික්‌ඛාපදකථා නිට්‌ඨිතා.
Khuddānukhuddakasikkhāpadakathā niṭṭhitā.
පඤ්‌චසතිකක්‌ඛන්‌ධකවණ්‌ණනා නිට්‌ඨිතා.
Pañcasatikakkhandhakavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / චූළවග්‌ගපාළි • Cūḷavaggapāḷi / 2. ඛුද්‌දානුඛුද්‌දකසික්‌ඛාපදකථා • 2. Khuddānukhuddakasikkhāpadakathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / ඛුද්‌දානුඛුද්‌දකසික්‌ඛාපදකථාවණ්‌ණනා • Khuddānukhuddakasikkhāpadakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / ඛුද්‌දානුඛුද්‌දකකථාවණ්‌ණනා • Khuddānukhuddakakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / ඛුද්‌දානුඛුද්‌දකසික්‌ඛාපදකථාවණ්‌ණනා • Khuddānukhuddakasikkhāpadakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 1. ඛුද්‌දානුඛුද්‌දකසික්‌ඛාපදකථා • 1. Khuddānukhuddakasikkhāpadakathā
