| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
১৯. একূনৰীসতিমৰগ্গো
19. Ekūnavīsatimavaggo
(১৮৬) ১. কিলেসজহনকথা
(186) 1. Kilesajahanakathā
৮২৮. অতীতে কিলেসে জহতীতি? আমন্তা। নিরুদ্ধং নিরোধেতি, ৰিগতং ৰিগমেতি, খীণং খেপেতি, অত্থঙ্গতং অত্থঙ্গমেতি, অব্ভত্থঙ্গতং অব্ভত্থঙ্গমেতীতি? ন হেৰং ৰত্তব্বে…পে॰… অতীতে কিলেসে জহতীতি? আমন্তা। ননু অতীতং নিরুদ্ধন্তি? আমন্তা। হঞ্চি অতীতং নিরুদ্ধং , নো চ ৰত রে ৰত্তব্বে – ‘‘অতীতে কিলেসে জহতী’’তি। অতীতে কিলেসে জহতীতি? আমন্তা। ননু অতীতং নত্থীতি? আমন্তা। হঞ্চি অতীতং নত্থি, নো চ ৰত রে ৰত্তব্বে – ‘‘অতীতে কিলেসে জহতী’’তি।
828. Atīte kilese jahatīti? Āmantā. Niruddhaṃ nirodheti, vigataṃ vigameti, khīṇaṃ khepeti, atthaṅgataṃ atthaṅgameti, abbhatthaṅgataṃ abbhatthaṅgametīti? Na hevaṃ vattabbe…pe… atīte kilese jahatīti? Āmantā. Nanu atītaṃ niruddhanti? Āmantā. Hañci atītaṃ niruddhaṃ , no ca vata re vattabbe – ‘‘atīte kilese jahatī’’ti. Atīte kilese jahatīti? Āmantā. Nanu atītaṃ natthīti? Āmantā. Hañci atītaṃ natthi, no ca vata re vattabbe – ‘‘atīte kilese jahatī’’ti.
৮২৯. অনাগতে কিলেসে জহতীতি? আমন্তা। অজাতং অজনেতি, অসঞ্জাতং অসঞ্জনেতি, অনিব্বত্তং অনিব্বত্তেতি, অপাতুভূতং অপাতুভাৰেতীতি? ন হেৰং ৰত্তব্বে…পে॰… অনাগতে কিলেসে জহতীতি? আমন্তা। ননু অনাগতং অজাতন্তি? আমন্তা। হঞ্চি অনাগতং অজাতং, নো চ ৰত রে ৰত্তব্বে – ‘‘অনাগতে কিলেসে জহতী’’তি । অনাগতে কিলেসে জহতীতি? আমন্তা। ননু অনাগতং নত্থীতি? আমন্তা। হঞ্চি অনাগতং নত্থি, নো চ ৰত রে ৰত্তব্বে – ‘‘অনাগতে কিলেসে জহতী’’তি।
829. Anāgate kilese jahatīti? Āmantā. Ajātaṃ ajaneti, asañjātaṃ asañjaneti, anibbattaṃ anibbatteti, apātubhūtaṃ apātubhāvetīti? Na hevaṃ vattabbe…pe… anāgate kilese jahatīti? Āmantā. Nanu anāgataṃ ajātanti? Āmantā. Hañci anāgataṃ ajātaṃ, no ca vata re vattabbe – ‘‘anāgate kilese jahatī’’ti . Anāgate kilese jahatīti? Āmantā. Nanu anāgataṃ natthīti? Āmantā. Hañci anāgataṃ natthi, no ca vata re vattabbe – ‘‘anāgate kilese jahatī’’ti.
৮৩০. পচ্চুপ্পন্নে কিলেসে জহতীতি? আমন্তা। রত্তো রাগং জহতি, দুট্ঠো দোসং জহতি, মূল়্হো মোহং জহতি, কিলিট্ঠো কিলেসে জহতীতি? ন হেৰং ৰত্তব্বে…পে॰… রাগেন রাগং জহতি, দোসেন দোসং জহতি, মোহেন মোহং জহতি, কিলেসেহি কিলেসে জহতীতি? ন হেৰং ৰত্তব্বে…পে॰…।
830. Paccuppanne kilese jahatīti? Āmantā. Ratto rāgaṃ jahati, duṭṭho dosaṃ jahati, mūḷho mohaṃ jahati, kiliṭṭho kilese jahatīti? Na hevaṃ vattabbe…pe… rāgena rāgaṃ jahati, dosena dosaṃ jahati, mohena mohaṃ jahati, kilesehi kilese jahatīti? Na hevaṃ vattabbe…pe….
রাগো চিত্তসম্পযুত্তো, মগ্গো চিত্তসম্পযুত্তোতি? আমন্তা। দ্ৰিন্নং চিত্তানং সমোধানং হোতীতি? ন হেৰং ৰত্তব্বে…পে॰…।
Rāgo cittasampayutto, maggo cittasampayuttoti? Āmantā. Dvinnaṃ cittānaṃ samodhānaṃ hotīti? Na hevaṃ vattabbe…pe….
রাগো অকুসলো, মগ্গো কুসলোতি? আমন্তা। কুসলাকুসলা সাৰজ্জানৰজ্জা হীনপণীতা কণ্হসুক্কসপ্পটিভাগা ধম্মা সম্মুখীভাৰং আগচ্ছন্তীতি? ন হেৰং ৰত্তব্বে…পে॰…।
Rāgo akusalo, maggo kusaloti? Āmantā. Kusalākusalā sāvajjānavajjā hīnapaṇītā kaṇhasukkasappaṭibhāgā dhammā sammukhībhāvaṃ āgacchantīti? Na hevaṃ vattabbe…pe….
কুসলাকুসলা সাৰজ্জানৰজ্জা হীনপণীতা কণ্হসুক্কসপ্পটিভাগা ধম্মা সম্মুখীভাৰং আগচ্ছন্তীতি? আমন্তা। ননু ৰুত্তং ভগৰতা – ‘‘চত্তারিমানি, ভিক্খৰে, সুৰিদূরৰিদূরানি! কতমানি চত্তারি? নভঞ্চ, ভিক্খৰে, পথৰী চ – ইদং পঠমং সুৰিদূরৰিদূরং…পে॰… তস্মা সতং ধম্মো অসব্ভি আরকা’’তি। অত্থেৰ সুত্তন্তোতি? আমন্তা। তেন হি ন ৰত্তব্বং – ‘‘কুসলাকুসলা…পে॰… সম্মুখীভাৰং আগচ্ছন্তী’’তি।
Kusalākusalā sāvajjānavajjā hīnapaṇītā kaṇhasukkasappaṭibhāgā dhammā sammukhībhāvaṃ āgacchantīti? Āmantā. Nanu vuttaṃ bhagavatā – ‘‘cattārimāni, bhikkhave, suvidūravidūrāni! Katamāni cattāri? Nabhañca, bhikkhave, pathavī ca – idaṃ paṭhamaṃ suvidūravidūraṃ…pe… tasmā sataṃ dhammo asabbhi ārakā’’ti. Attheva suttantoti? Āmantā. Tena hi na vattabbaṃ – ‘‘kusalākusalā…pe… sammukhībhāvaṃ āgacchantī’’ti.
৮৩১. ন ৰত্তব্বং – ‘‘অতীতে কিলেসে জহতি, অনাগতে কিলেসে জহতি, পচ্চুপ্পন্নে কিলেসে জহতী’’তি? আমন্তা। নত্থি কিলেসে জহতীতি ? ন হেৰং ৰত্তব্বে…পে॰… তেন হি অতীতে কিলেসে জহতি, অনাগতে কিলেসে জহতি, পচ্চুপ্পন্নে কিলেসে জহতীতি।
831. Na vattabbaṃ – ‘‘atīte kilese jahati, anāgate kilese jahati, paccuppanne kilese jahatī’’ti? Āmantā. Natthi kilese jahatīti ? Na hevaṃ vattabbe…pe… tena hi atīte kilese jahati, anāgate kilese jahati, paccuppanne kilese jahatīti.
কিলেসজহনকথা নিট্ঠিতা।
Kilesajahanakathā niṭṭhitā.
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ১. কিলেসপজহনকথাৰণ্ণনা • 1. Kilesapajahanakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ১. কিলেসপজহনকথাৰণ্ণনা • 1. Kilesapajahanakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ১. কিলেসপজহনকথাৰণ্ণনা • 1. Kilesapajahanakathāvaṇṇanā
