| Library / Tipiṭaka / ติปิฎก • Tipiṭaka / กถาวตฺถุปาฬิ • Kathāvatthupāḷi |
๑๙. เอกูนวีสติมวโคฺค
19. Ekūnavīsatimavaggo
(๑๘๖) ๑. กิเลสชหนกถา
(186) 1. Kilesajahanakathā
๘๒๘. อตีเต กิเลเส ชหตีติ? อามนฺตาฯ นิรุทฺธํ นิโรเธติ, วิคตํ วิคเมติ, ขีณํ เขเปติ, อตฺถงฺคตํ อตฺถงฺคเมติ, อพฺภตฺถงฺคตํ อพฺภตฺถงฺคเมตีติ? น เหวํ วตฺตเพฺพ…เป.… อตีเต กิเลเส ชหตีติ? อามนฺตาฯ นนุ อตีตํ นิรุทฺธนฺติ? อามนฺตาฯ หญฺจิ อตีตํ นิรุทฺธํ , โน จ วต เร วตฺตเพฺพ – ‘‘อตีเต กิเลเส ชหตี’’ติฯ อตีเต กิเลเส ชหตีติ? อามนฺตาฯ นนุ อตีตํ นตฺถีติ? อามนฺตาฯ หญฺจิ อตีตํ นตฺถิ, โน จ วต เร วตฺตเพฺพ – ‘‘อตีเต กิเลเส ชหตี’’ติฯ
828. Atīte kilese jahatīti? Āmantā. Niruddhaṃ nirodheti, vigataṃ vigameti, khīṇaṃ khepeti, atthaṅgataṃ atthaṅgameti, abbhatthaṅgataṃ abbhatthaṅgametīti? Na hevaṃ vattabbe…pe… atīte kilese jahatīti? Āmantā. Nanu atītaṃ niruddhanti? Āmantā. Hañci atītaṃ niruddhaṃ , no ca vata re vattabbe – ‘‘atīte kilese jahatī’’ti. Atīte kilese jahatīti? Āmantā. Nanu atītaṃ natthīti? Āmantā. Hañci atītaṃ natthi, no ca vata re vattabbe – ‘‘atīte kilese jahatī’’ti.
๘๒๙. อนาคเต กิเลเส ชหตีติ? อามนฺตาฯ อชาตํ อชเนติ, อสญฺชาตํ อสญฺชเนติ, อนิพฺพตฺตํ อนิพฺพเตฺตติ, อปาตุภูตํ อปาตุภาเวตีติ? น เหวํ วตฺตเพฺพ…เป.… อนาคเต กิเลเส ชหตีติ? อามนฺตาฯ นนุ อนาคตํ อชาตนฺติ? อามนฺตาฯ หญฺจิ อนาคตํ อชาตํ, โน จ วต เร วตฺตเพฺพ – ‘‘อนาคเต กิเลเส ชหตี’’ติ ฯ อนาคเต กิเลเส ชหตีติ? อามนฺตาฯ นนุ อนาคตํ นตฺถีติ? อามนฺตาฯ หญฺจิ อนาคตํ นตฺถิ, โน จ วต เร วตฺตเพฺพ – ‘‘อนาคเต กิเลเส ชหตี’’ติฯ
829. Anāgate kilese jahatīti? Āmantā. Ajātaṃ ajaneti, asañjātaṃ asañjaneti, anibbattaṃ anibbatteti, apātubhūtaṃ apātubhāvetīti? Na hevaṃ vattabbe…pe… anāgate kilese jahatīti? Āmantā. Nanu anāgataṃ ajātanti? Āmantā. Hañci anāgataṃ ajātaṃ, no ca vata re vattabbe – ‘‘anāgate kilese jahatī’’ti . Anāgate kilese jahatīti? Āmantā. Nanu anāgataṃ natthīti? Āmantā. Hañci anāgataṃ natthi, no ca vata re vattabbe – ‘‘anāgate kilese jahatī’’ti.
๘๓๐. ปจฺจุปฺปเนฺน กิเลเส ชหตีติ? อามนฺตาฯ รโตฺต ราคํ ชหติ, ทุโฎฺฐ โทสํ ชหติ, มูโฬฺห โมหํ ชหติ, กิลิโฎฺฐ กิเลเส ชหตีติ? น เหวํ วตฺตเพฺพ…เป.… ราเคน ราคํ ชหติ, โทเสน โทสํ ชหติ, โมเหน โมหํ ชหติ, กิเลเสหิ กิเลเส ชหตีติ? น เหวํ วตฺตเพฺพ…เป.…ฯ
830. Paccuppanne kilese jahatīti? Āmantā. Ratto rāgaṃ jahati, duṭṭho dosaṃ jahati, mūḷho mohaṃ jahati, kiliṭṭho kilese jahatīti? Na hevaṃ vattabbe…pe… rāgena rāgaṃ jahati, dosena dosaṃ jahati, mohena mohaṃ jahati, kilesehi kilese jahatīti? Na hevaṃ vattabbe…pe….
ราโค จิตฺตสมฺปยุโตฺต, มโคฺค จิตฺตสมฺปยุโตฺตติ? อามนฺตาฯ ทฺวินฺนํ จิตฺตานํ สโมธานํ โหตีติ? น เหวํ วตฺตเพฺพ…เป.…ฯ
Rāgo cittasampayutto, maggo cittasampayuttoti? Āmantā. Dvinnaṃ cittānaṃ samodhānaṃ hotīti? Na hevaṃ vattabbe…pe….
ราโค อกุสโล, มโคฺค กุสโลติ? อามนฺตาฯ กุสลากุสลา สาวชฺชานวชฺชา หีนปณีตา กณฺหสุกฺกสปฺปฎิภาคา ธมฺมา สมฺมุขีภาวํ อาคจฺฉนฺตีติ? น เหวํ วตฺตเพฺพ…เป.…ฯ
Rāgo akusalo, maggo kusaloti? Āmantā. Kusalākusalā sāvajjānavajjā hīnapaṇītā kaṇhasukkasappaṭibhāgā dhammā sammukhībhāvaṃ āgacchantīti? Na hevaṃ vattabbe…pe….
กุสลากุสลา สาวชฺชานวชฺชา หีนปณีตา กณฺหสุกฺกสปฺปฎิภาคา ธมฺมา สมฺมุขีภาวํ อาคจฺฉนฺตีติ? อามนฺตาฯ นนุ วุตฺตํ ภควตา – ‘‘จตฺตาริมานิ, ภิกฺขเว, สุวิทูรวิทูรานิ! กตมานิ จตฺตาริ? นภญฺจ, ภิกฺขเว, ปถวี จ – อิทํ ปฐมํ สุวิทูรวิทูรํ…เป.… ตสฺมา สตํ ธโมฺม อสพฺภิ อารกา’’ติฯ อเตฺถว สุตฺตโนฺตติ? อามนฺตาฯ เตน หิ น วตฺตพฺพํ – ‘‘กุสลากุสลา…เป.… สมฺมุขีภาวํ อาคจฺฉนฺตี’’ติฯ
Kusalākusalā sāvajjānavajjā hīnapaṇītā kaṇhasukkasappaṭibhāgā dhammā sammukhībhāvaṃ āgacchantīti? Āmantā. Nanu vuttaṃ bhagavatā – ‘‘cattārimāni, bhikkhave, suvidūravidūrāni! Katamāni cattāri? Nabhañca, bhikkhave, pathavī ca – idaṃ paṭhamaṃ suvidūravidūraṃ…pe… tasmā sataṃ dhammo asabbhi ārakā’’ti. Attheva suttantoti? Āmantā. Tena hi na vattabbaṃ – ‘‘kusalākusalā…pe… sammukhībhāvaṃ āgacchantī’’ti.
๘๓๑. น วตฺตพฺพํ – ‘‘อตีเต กิเลเส ชหติ, อนาคเต กิเลเส ชหติ, ปจฺจุปฺปเนฺน กิเลเส ชหตี’’ติ? อามนฺตาฯ นตฺถิ กิเลเส ชหตีติ ? น เหวํ วตฺตเพฺพ…เป.… เตน หิ อตีเต กิเลเส ชหติ, อนาคเต กิเลเส ชหติ, ปจฺจุปฺปเนฺน กิเลเส ชหตีติฯ
831. Na vattabbaṃ – ‘‘atīte kilese jahati, anāgate kilese jahati, paccuppanne kilese jahatī’’ti? Āmantā. Natthi kilese jahatīti ? Na hevaṃ vattabbe…pe… tena hi atīte kilese jahati, anāgate kilese jahati, paccuppanne kilese jahatīti.
กิเลสชหนกถา นิฎฺฐิตาฯ
Kilesajahanakathā niṭṭhitā.
Related texts:
อฎฺฐกถา • Aṭṭhakathā / อภิธมฺมปิฎก (อฎฺฐกถา) • Abhidhammapiṭaka (aṭṭhakathā) / ปญฺจปกรณ-อฎฺฐกถา • Pañcapakaraṇa-aṭṭhakathā / ๑. กิเลสปชหนกถาวณฺณนา • 1. Kilesapajahanakathāvaṇṇanā
ฎีกา • Tīkā / อภิธมฺมปิฎก (ฎีกา) • Abhidhammapiṭaka (ṭīkā) / ปญฺจปกรณ-มูลฎีกา • Pañcapakaraṇa-mūlaṭīkā / ๑. กิเลสปชหนกถาวณฺณนา • 1. Kilesapajahanakathāvaṇṇanā
ฎีกา • Tīkā / อภิธมฺมปิฎก (ฎีกา) • Abhidhammapiṭaka (ṭīkā) / ปญฺจปกรณ-อนุฎีกา • Pañcapakaraṇa-anuṭīkā / ๑. กิเลสปชหนกถาวณฺณนา • 1. Kilesapajahanakathāvaṇṇanā
