| Library / Tipiṭaka / တိပိဋက • Tipiṭaka / ကထာဝတ္ထုပာဠိ • Kathāvatthupāḷi |
၁၉. ဧကူနဝီသတိမဝဂ္ဂော
19. Ekūnavīsatimavaggo
(၁၈၆) ၁. ကိလေသဇဟနကထာ
(186) 1. Kilesajahanakathā
၈၂၈. အတီတေ ကိလေသေ ဇဟတီတိ? အာမန္တာ။ နိရုဒ္ဓံ နိရောဓေတိ, ဝိဂတံ ဝိဂမေတိ, ခီဏံ ခေပေတိ, အတ္ထင္ဂတံ အတ္ထင္ဂမေတိ, အဗ္ဘတ္ထင္ဂတံ အဗ္ဘတ္ထင္ဂမေတီတိ? န ဟေဝံ ဝတ္တဗ္ဗေ။ပေ.။ အတီတေ ကိလေသေ ဇဟတီတိ? အာမန္တာ။ နနု အတီတံ နိရုဒ္ဓန္တိ? အာမန္တာ။ ဟဉ္စိ အတီတံ နိရုဒ္ဓံ , နော စ ဝတ ရေ ဝတ္တဗ္ဗေ – ‘‘အတီတေ ကိလေသေ ဇဟတီ’’တိ။ အတီတေ ကိလေသေ ဇဟတီတိ? အာမန္တာ။ နနု အတီတံ နတ္ထီတိ? အာမန္တာ။ ဟဉ္စိ အတီတံ နတ္ထိ, နော စ ဝတ ရေ ဝတ္တဗ္ဗေ – ‘‘အတီတေ ကိလေသေ ဇဟတီ’’တိ။
828. Atīte kilese jahatīti? Āmantā. Niruddhaṃ nirodheti, vigataṃ vigameti, khīṇaṃ khepeti, atthaṅgataṃ atthaṅgameti, abbhatthaṅgataṃ abbhatthaṅgametīti? Na hevaṃ vattabbe…pe… atīte kilese jahatīti? Āmantā. Nanu atītaṃ niruddhanti? Āmantā. Hañci atītaṃ niruddhaṃ , no ca vata re vattabbe – ‘‘atīte kilese jahatī’’ti. Atīte kilese jahatīti? Āmantā. Nanu atītaṃ natthīti? Āmantā. Hañci atītaṃ natthi, no ca vata re vattabbe – ‘‘atīte kilese jahatī’’ti.
၈၂၉. အနာဂတေ ကိလေသေ ဇဟတီတိ? အာမန္တာ။ အဇာတံ အဇနေတိ, အသဉ္ဇာတံ အသဉ္ဇနေတိ, အနိဗ္ဗတ္တံ အနိဗ္ဗတ္တေတိ, အပာတုဘူတံ အပာတုဘာဝေတီတိ? န ဟေဝံ ဝတ္တဗ္ဗေ။ပေ.။ အနာဂတေ ကိလေသေ ဇဟတီတိ? အာမန္တာ။ နနု အနာဂတံ အဇာတန္တိ? အာမန္တာ။ ဟဉ္စိ အနာဂတံ အဇာတံ, နော စ ဝတ ရေ ဝတ္တဗ္ဗေ – ‘‘အနာဂတေ ကိလေသေ ဇဟတီ’’တိ ။ အနာဂတေ ကိလေသေ ဇဟတီတိ? အာမန္တာ။ နနု အနာဂတံ နတ္ထီတိ? အာမန္တာ။ ဟဉ္စိ အနာဂတံ နတ္ထိ, နော စ ဝတ ရေ ဝတ္တဗ္ဗေ – ‘‘အနာဂတေ ကိလေသေ ဇဟတီ’’တိ။
829. Anāgate kilese jahatīti? Āmantā. Ajātaṃ ajaneti, asañjātaṃ asañjaneti, anibbattaṃ anibbatteti, apātubhūtaṃ apātubhāvetīti? Na hevaṃ vattabbe…pe… anāgate kilese jahatīti? Āmantā. Nanu anāgataṃ ajātanti? Āmantā. Hañci anāgataṃ ajātaṃ, no ca vata re vattabbe – ‘‘anāgate kilese jahatī’’ti . Anāgate kilese jahatīti? Āmantā. Nanu anāgataṃ natthīti? Āmantā. Hañci anāgataṃ natthi, no ca vata re vattabbe – ‘‘anāgate kilese jahatī’’ti.
၈၃၀. ပစ္စုပ္ပန္နေ ကိလေသေ ဇဟတီတိ? အာမန္တာ။ ရတ္တော ရာဂံ ဇဟတိ, ဒုဋ္ဌော ဒောသံ ဇဟတိ, မူဠ္ဟော မောဟံ ဇဟတိ, ကိလိဋ္ဌော ကိလေသေ ဇဟတီတိ? န ဟေဝံ ဝတ္တဗ္ဗေ။ပေ.။ ရာဂေန ရာဂံ ဇဟတိ, ဒောသေန ဒောသံ ဇဟတိ, မောဟေန မောဟံ ဇဟတိ, ကိလေသေဟိ ကိလေသေ ဇဟတီတိ? န ဟေဝံ ဝတ္တဗ္ဗေ။ပေ.။။
830. Paccuppanne kilese jahatīti? Āmantā. Ratto rāgaṃ jahati, duṭṭho dosaṃ jahati, mūḷho mohaṃ jahati, kiliṭṭho kilese jahatīti? Na hevaṃ vattabbe…pe… rāgena rāgaṃ jahati, dosena dosaṃ jahati, mohena mohaṃ jahati, kilesehi kilese jahatīti? Na hevaṃ vattabbe…pe….
ရာဂော စိတ္တသမ္ပယုတ္တော, မဂ္ဂော စိတ္တသမ္ပယုတ္တောတိ? အာမန္တာ။ ဒ္ဝိန္နံ စိတ္တာနံ သမောဓာနံ ဟောတီတိ? န ဟေဝံ ဝတ္တဗ္ဗေ။ပေ.။။
Rāgo cittasampayutto, maggo cittasampayuttoti? Āmantā. Dvinnaṃ cittānaṃ samodhānaṃ hotīti? Na hevaṃ vattabbe…pe….
ရာဂော အကုသလော, မဂ္ဂော ကုသလောတိ? အာမန္တာ။ ကုသလာကုသလာ သာဝဇ္ဇာနဝဇ္ဇာ ဟီနပဏီတာ ကဏ္ဟသုက္ကသပ္ပဋိဘာဂာ ဓမ္မာ သမ္မုခီဘာဝံ အာဂစ္ဆန္တီတိ? န ဟေဝံ ဝတ္တဗ္ဗေ။ပေ.။။
Rāgo akusalo, maggo kusaloti? Āmantā. Kusalākusalā sāvajjānavajjā hīnapaṇītā kaṇhasukkasappaṭibhāgā dhammā sammukhībhāvaṃ āgacchantīti? Na hevaṃ vattabbe…pe….
ကုသလာကုသလာ သာဝဇ္ဇာနဝဇ္ဇာ ဟီနပဏီတာ ကဏ္ဟသုက္ကသပ္ပဋိဘာဂာ ဓမ္မာ သမ္မုခီဘာဝံ အာဂစ္ဆန္တီတိ? အာမန္တာ။ နနု ဝုတ္တံ ဘဂဝတာ – ‘‘စတ္တာရိမာနိ, ဘိက္ခဝေ, သုဝိဒူရဝိဒူရာနိ! ကတမာနိ စတ္တာရိ? နဘဉ္စ, ဘိက္ခဝေ, ပထဝီ စ – ဣဒံ ပဌမံ သုဝိဒူရဝိဒူရံ။ပေ.။ တသ္မာ သတံ ဓမ္မော အသဗ္ဘိ အာရကာ’’တိ။ အတ္ထေဝ သုတ္တန္တောတိ? အာမန္တာ။ တေန ဟိ န ဝတ္တဗ္ဗံ – ‘‘ကုသလာကုသလာ။ပေ.။ သမ္မုခီဘာဝံ အာဂစ္ဆန္တီ’’တိ။
Kusalākusalā sāvajjānavajjā hīnapaṇītā kaṇhasukkasappaṭibhāgā dhammā sammukhībhāvaṃ āgacchantīti? Āmantā. Nanu vuttaṃ bhagavatā – ‘‘cattārimāni, bhikkhave, suvidūravidūrāni! Katamāni cattāri? Nabhañca, bhikkhave, pathavī ca – idaṃ paṭhamaṃ suvidūravidūraṃ…pe… tasmā sataṃ dhammo asabbhi ārakā’’ti. Attheva suttantoti? Āmantā. Tena hi na vattabbaṃ – ‘‘kusalākusalā…pe… sammukhībhāvaṃ āgacchantī’’ti.
၈၃၁. န ဝတ္တဗ္ဗံ – ‘‘အတီတေ ကိလေသေ ဇဟတိ, အနာဂတေ ကိလေသေ ဇဟတိ, ပစ္စုပ္ပန္နေ ကိလေသေ ဇဟတီ’’တိ? အာမန္တာ။ နတ္ထိ ကိလေသေ ဇဟတီတိ ? န ဟေဝံ ဝတ္တဗ္ဗေ။ပေ.။ တေန ဟိ အတီတေ ကိလေသေ ဇဟတိ, အနာဂတေ ကိလေသေ ဇဟတိ, ပစ္စုပ္ပန္နေ ကိလေသေ ဇဟတီတိ။
831. Na vattabbaṃ – ‘‘atīte kilese jahati, anāgate kilese jahati, paccuppanne kilese jahatī’’ti? Āmantā. Natthi kilese jahatīti ? Na hevaṃ vattabbe…pe… tena hi atīte kilese jahati, anāgate kilese jahati, paccuppanne kilese jahatīti.
ကိလေသဇဟနကထာ နိဋ္ဌိတာ။
Kilesajahanakathā niṭṭhitā.
Related texts:
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၁. ကိလေသပဇဟနကထာဝဏ္ဏနာ • 1. Kilesapajahanakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၁. ကိလေသပဇဟနကထာဝဏ္ဏနာ • 1. Kilesapajahanakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၁. ကိလေသပဇဟနကထာဝဏ္ဏနာ • 1. Kilesapajahanakathāvaṇṇanā
