| Library / Tipiṭaka / ཏིཔིཊཀ • Tipiṭaka / ཀཐཱཝཏྠུཔཱལི༹ • Kathāvatthupāḷi |
༡༩. ཨེཀཱུནཝཱིསཏིམཝགྒོ
19. Ekūnavīsatimavaggo
(༡༨༦) ༡. ཀིལེསཛཧནཀཐཱ
(186) 1. Kilesajahanakathā
༨༢༨. ཨཏཱིཏེ ཀིལེསེ ཛཧཏཱིཏི? ཨཱམནྟཱ། ནིརུདྡྷཾ ནིརོདྷེཏི, ཝིགཏཾ ཝིགམེཏི, ཁཱིཎཾ ཁེཔེཏི, ཨཏྠངྒཏཾ ཨཏྠངྒམེཏི, ཨབྦྷཏྠངྒཏཾ ཨབྦྷཏྠངྒམེཏཱིཏི? ན ཧེཝཾ ཝཏྟབྦེ…པེ॰… ཨཏཱིཏེ ཀིལེསེ ཛཧཏཱིཏི? ཨཱམནྟཱ། ནནུ ཨཏཱིཏཾ ནིརུདྡྷནྟི? ཨཱམནྟཱ། ཧཉྩི ཨཏཱིཏཾ ནིརུདྡྷཾ , ནོ ཙ ཝཏ རེ ཝཏྟབྦེ – ‘‘ཨཏཱིཏེ ཀིལེསེ ཛཧཏཱི’’ཏི། ཨཏཱིཏེ ཀིལེསེ ཛཧཏཱིཏི? ཨཱམནྟཱ། ནནུ ཨཏཱིཏཾ ནཏྠཱིཏི? ཨཱམནྟཱ། ཧཉྩི ཨཏཱིཏཾ ནཏྠི, ནོ ཙ ཝཏ རེ ཝཏྟབྦེ – ‘‘ཨཏཱིཏེ ཀིལེསེ ཛཧཏཱི’’ཏི།
828. Atīte kilese jahatīti? Āmantā. Niruddhaṃ nirodheti, vigataṃ vigameti, khīṇaṃ khepeti, atthaṅgataṃ atthaṅgameti, abbhatthaṅgataṃ abbhatthaṅgametīti? Na hevaṃ vattabbe…pe… atīte kilese jahatīti? Āmantā. Nanu atītaṃ niruddhanti? Āmantā. Hañci atītaṃ niruddhaṃ , no ca vata re vattabbe – ‘‘atīte kilese jahatī’’ti. Atīte kilese jahatīti? Āmantā. Nanu atītaṃ natthīti? Āmantā. Hañci atītaṃ natthi, no ca vata re vattabbe – ‘‘atīte kilese jahatī’’ti.
༨༢༩. ཨནཱགཏེ ཀིལེསེ ཛཧཏཱིཏི? ཨཱམནྟཱ། ཨཛཱཏཾ ཨཛནེཏི, ཨསཉྫཱཏཾ ཨསཉྫནེཏི, ཨནིབྦཏྟཾ ཨནིབྦཏྟེཏི, ཨཔཱཏུབྷཱུཏཾ ཨཔཱཏུབྷཱཝེཏཱིཏི? ན ཧེཝཾ ཝཏྟབྦེ…པེ॰… ཨནཱགཏེ ཀིལེསེ ཛཧཏཱིཏི? ཨཱམནྟཱ། ནནུ ཨནཱགཏཾ ཨཛཱཏནྟི? ཨཱམནྟཱ། ཧཉྩི ཨནཱགཏཾ ཨཛཱཏཾ, ནོ ཙ ཝཏ རེ ཝཏྟབྦེ – ‘‘ཨནཱགཏེ ཀིལེསེ ཛཧཏཱི’’ཏི ། ཨནཱགཏེ ཀིལེསེ ཛཧཏཱིཏི? ཨཱམནྟཱ། ནནུ ཨནཱགཏཾ ནཏྠཱིཏི? ཨཱམནྟཱ། ཧཉྩི ཨནཱགཏཾ ནཏྠི, ནོ ཙ ཝཏ རེ ཝཏྟབྦེ – ‘‘ཨནཱགཏེ ཀིལེསེ ཛཧཏཱི’’ཏི།
829. Anāgate kilese jahatīti? Āmantā. Ajātaṃ ajaneti, asañjātaṃ asañjaneti, anibbattaṃ anibbatteti, apātubhūtaṃ apātubhāvetīti? Na hevaṃ vattabbe…pe… anāgate kilese jahatīti? Āmantā. Nanu anāgataṃ ajātanti? Āmantā. Hañci anāgataṃ ajātaṃ, no ca vata re vattabbe – ‘‘anāgate kilese jahatī’’ti . Anāgate kilese jahatīti? Āmantā. Nanu anāgataṃ natthīti? Āmantā. Hañci anāgataṃ natthi, no ca vata re vattabbe – ‘‘anāgate kilese jahatī’’ti.
༨༣༠. པཙྩུཔྤནྣེ ཀིལེསེ ཛཧཏཱིཏི? ཨཱམནྟཱ། རཏྟོ རཱགཾ ཛཧཏི, དུཊྛོ དོསཾ ཛཧཏི, མཱུལ༹ྷོ མོཧཾ ཛཧཏི, ཀིལིཊྛོ ཀིལེསེ ཛཧཏཱིཏི? ན ཧེཝཾ ཝཏྟབྦེ…པེ॰… རཱགེན རཱགཾ ཛཧཏི, དོསེན དོསཾ ཛཧཏི, མོཧེན མོཧཾ ཛཧཏི, ཀིལེསེཧི ཀིལེསེ ཛཧཏཱིཏི? ན ཧེཝཾ ཝཏྟབྦེ…པེ॰…།
830. Paccuppanne kilese jahatīti? Āmantā. Ratto rāgaṃ jahati, duṭṭho dosaṃ jahati, mūḷho mohaṃ jahati, kiliṭṭho kilese jahatīti? Na hevaṃ vattabbe…pe… rāgena rāgaṃ jahati, dosena dosaṃ jahati, mohena mohaṃ jahati, kilesehi kilese jahatīti? Na hevaṃ vattabbe…pe….
རཱགོ ཙིཏྟསམྤཡུཏྟོ, མགྒོ ཙིཏྟསམྤཡུཏྟོཏི? ཨཱམནྟཱ། དྭིནྣཾ ཙིཏྟཱནཾ སམོདྷཱནཾ ཧོཏཱིཏི? ན ཧེཝཾ ཝཏྟབྦེ…པེ॰…།
Rāgo cittasampayutto, maggo cittasampayuttoti? Āmantā. Dvinnaṃ cittānaṃ samodhānaṃ hotīti? Na hevaṃ vattabbe…pe….
རཱགོ ཨཀུསལོ, མགྒོ ཀུསལོཏི? ཨཱམནྟཱ། ཀུསལཱཀུསལཱ སཱཝཛྫཱནཝཛྫཱ ཧཱིནཔཎཱིཏཱ ཀཎྷསུཀྐསཔྤཊིབྷཱགཱ དྷམྨཱ སམྨུཁཱིབྷཱཝཾ ཨཱགཙྪནྟཱིཏི? ན ཧེཝཾ ཝཏྟབྦེ…པེ॰…།
Rāgo akusalo, maggo kusaloti? Āmantā. Kusalākusalā sāvajjānavajjā hīnapaṇītā kaṇhasukkasappaṭibhāgā dhammā sammukhībhāvaṃ āgacchantīti? Na hevaṃ vattabbe…pe….
ཀུསལཱཀུསལཱ སཱཝཛྫཱནཝཛྫཱ ཧཱིནཔཎཱིཏཱ ཀཎྷསུཀྐསཔྤཊིབྷཱགཱ དྷམྨཱ སམྨུཁཱིབྷཱཝཾ ཨཱགཙྪནྟཱིཏི? ཨཱམནྟཱ། ནནུ ཝུཏྟཾ བྷགཝཏཱ – ‘‘ཙཏྟཱརིམཱནི, བྷིཀྑཝེ, སུཝིདཱུརཝིདཱུརཱནི! ཀཏམཱནི ཙཏྟཱརི? ནབྷཉྩ, བྷིཀྑཝེ, པཐཝཱི ཙ – ཨིདཾ པཋམཾ སུཝིདཱུརཝིདཱུརཾ…པེ॰… ཏསྨཱ སཏཾ དྷམྨོ ཨསབྦྷི ཨཱརཀཱ’’ཏི། ཨཏྠེཝ སུཏྟནྟོཏི? ཨཱམནྟཱ། ཏེན ཧི ན ཝཏྟབྦཾ – ‘‘ཀུསལཱཀུསལཱ…པེ॰… སམྨུཁཱིབྷཱཝཾ ཨཱགཙྪནྟཱི’’ཏི།
Kusalākusalā sāvajjānavajjā hīnapaṇītā kaṇhasukkasappaṭibhāgā dhammā sammukhībhāvaṃ āgacchantīti? Āmantā. Nanu vuttaṃ bhagavatā – ‘‘cattārimāni, bhikkhave, suvidūravidūrāni! Katamāni cattāri? Nabhañca, bhikkhave, pathavī ca – idaṃ paṭhamaṃ suvidūravidūraṃ…pe… tasmā sataṃ dhammo asabbhi ārakā’’ti. Attheva suttantoti? Āmantā. Tena hi na vattabbaṃ – ‘‘kusalākusalā…pe… sammukhībhāvaṃ āgacchantī’’ti.
༨༣༡. ན ཝཏྟབྦཾ – ‘‘ཨཏཱིཏེ ཀིལེསེ ཛཧཏི, ཨནཱགཏེ ཀིལེསེ ཛཧཏི, པཙྩུཔྤནྣེ ཀིལེསེ ཛཧཏཱི’’ཏི? ཨཱམནྟཱ། ནཏྠི ཀིལེསེ ཛཧཏཱིཏི ? ན ཧེཝཾ ཝཏྟབྦེ…པེ॰… ཏེན ཧི ཨཏཱིཏེ ཀིལེསེ ཛཧཏི, ཨནཱགཏེ ཀིལེསེ ཛཧཏི, པཙྩུཔྤནྣེ ཀིལེསེ ཛཧཏཱིཏི།
831. Na vattabbaṃ – ‘‘atīte kilese jahati, anāgate kilese jahati, paccuppanne kilese jahatī’’ti? Āmantā. Natthi kilese jahatīti ? Na hevaṃ vattabbe…pe… tena hi atīte kilese jahati, anāgate kilese jahati, paccuppanne kilese jahatīti.
ཀིལེསཛཧནཀཐཱ ནིཊྛིཏཱ།
Kilesajahanakathā niṭṭhitā.
Related texts:
ཨཊྛཀཐཱ • Aṭṭhakathā / ཨབྷིདྷམྨཔིཊཀ (ཨཊྛཀཐཱ) • Abhidhammapiṭaka (aṭṭhakathā) / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā / ༡. ཀིལེསཔཛཧནཀཐཱཝཎྞནཱ • 1. Kilesapajahanakathāvaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-མཱུལཊཱིཀཱ • Pañcapakaraṇa-mūlaṭīkā / ༡. ཀིལེསཔཛཧནཀཐཱཝཎྞནཱ • 1. Kilesapajahanakathāvaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-ཨནུཊཱིཀཱ • Pañcapakaraṇa-anuṭīkā / ༡. ཀིལེསཔཛཧནཀཐཱཝཎྞནཱ • 1. Kilesapajahanakathāvaṇṇanā
