| Library / Tipiṭaka / တိပိဋက • Tipiṭaka / ပဉ္စပကရဏ-အဋ္ဌကထာ • Pañcapakaraṇa-aṭṭhakathā |
၁၉. ဧကူနဝီသတိမဝဂ္ဂော
19. Ekūnavīsatimavaggo
၁. ကိလေသပဇဟနကထာဝဏ္ဏနာ
1. Kilesapajahanakathāvaṇṇanā
၈၂၈-၈၃၁. ဣဒာနိ ကိလေသပဇဟနကထာ နာမ ဟောတိ။ တတ္ထ ‘‘ယသ္မာ ကိလေသပဟာနံ နာမ အတ္ထိ, ပဟီနကိလေသသ္သ စ အတီတာပိ ကိလေသာ ပဟီနာဝ ဟောန္တိ, အနာဂတာပိ, ပစ္စုပ္ပန္နာပိ, တသ္မာ အတီတေပိ ကိလေသေ ပဇဟတိ, အနာဂတေပိ, ပစ္စုပ္ပန္နေပီ’’တိ ယေသံ လဒ္ဓိ, သေယ္ယထာပိ ဧကစ္စာနံ ဥတ္တရာပထကာနံ; တေ သန္ဓာယ အတီတေတိအာဒိပုစ္ဆာ သကဝာဒိသ္သ, ပဋိညာ ဣတရသ္သ ။ သေသံ ယထာပာဠိမေဝ နိယ္ယာတိ။ နတ္ထိ ကိလေသေ ဇဟတီတိ ဣမသ္မိံ ပန ပရဝာဒိသ္သ ပဉ္ဟေ ယသ္မာ ကစဝရံ ပဇဟန္တသ္သ ကစဝရေ ဆဍ္ဍနဝာယာမော ဝိယ ကိလေသေ ပဇဟန္တသ္သ န အတီတာဒိဘေဒေသု ကိလေသေသု ဝာယာမော အတ္ထိ, နိဗ္ဗာနာရမ္မဏေ ပန အရိယမဂ္ဂေ ပဝတ္တိတေ ကိလေသာ အနုပ္ပန္နာယေဝ နုပ္ပဇ္ဇန္တီတိ ပဟီနာ နာမ ဟောန္တိ, တသ္မာ န ဟေဝန္တိ ပဋိက္ခိပတိ။ တေန ဟိ အတီတေ ကိလေသေ ပဇဟတီတိအာဒိ ပန ယသ္မာ ‘‘နတ္ထိ ကိလေသပဇဟနာ’’တိ န ဝတ္တဗ္ဗံ, တသ္မာ အတီတာဒိဘေဒေ ပဇဟတီတိ ဆလေန ဝုတ္တံ။
828-831. Idāni kilesapajahanakathā nāma hoti. Tattha ‘‘yasmā kilesapahānaṃ nāma atthi, pahīnakilesassa ca atītāpi kilesā pahīnāva honti, anāgatāpi, paccuppannāpi, tasmā atītepi kilese pajahati, anāgatepi, paccuppannepī’’ti yesaṃ laddhi, seyyathāpi ekaccānaṃ uttarāpathakānaṃ; te sandhāya atītetiādipucchā sakavādissa, paṭiññā itarassa . Sesaṃ yathāpāḷimeva niyyāti. Natthi kilese jahatīti imasmiṃ pana paravādissa pañhe yasmā kacavaraṃ pajahantassa kacavare chaḍḍanavāyāmo viya kilese pajahantassa na atītādibhedesu kilesesu vāyāmo atthi, nibbānārammaṇe pana ariyamagge pavattite kilesā anuppannāyeva nuppajjantīti pahīnā nāma honti, tasmā na hevanti paṭikkhipati. Tena hi atīte kilese pajahatītiādi pana yasmā ‘‘natthi kilesapajahanā’’ti na vattabbaṃ, tasmā atītādibhede pajahatīti chalena vuttaṃ.
ကိလေသပဇဟနကထာဝဏ္ဏနာ။
Kilesapajahanakathāvaṇṇanā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၁၈၆) ၁. ကိလေသဇဟနကထာ • (186) 1. Kilesajahanakathā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၁. ကိလေသပဇဟနကထာဝဏ္ဏနာ • 1. Kilesapajahanakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၁. ကိလေသပဇဟနကထာဝဏ္ဏနာ • 1. Kilesapajahanakathāvaṇṇanā
