| Library / Tipiṭaka / තිපිටක • Tipiṭaka / පඤ්‌චපකරණ-අට්‌ඨකථා • Pañcapakaraṇa-aṭṭhakathā |
19. එකූනවීසතිමවග්‌ගො
19. Ekūnavīsatimavaggo
1. කිලෙසපජහනකථාවණ්‌ණනා
1. Kilesapajahanakathāvaṇṇanā
828-831. ඉදානි කිලෙසපජහනකථා නාම හොති. තත්‌ථ ‘‘යස්‌මා කිලෙසපහානං නාම අත්‌ථි, පහීනකිලෙසස්‌ස ච අතීතාපි කිලෙසා පහීනාව හොන්‌ති, අනාගතාපි, පච්‌චුප්‌පන්‌නාපි, තස්‌මා අතීතෙපි කිලෙසෙ පජහති, අනාගතෙපි, පච්‌චුප්‌පන්‌නෙපී’’ති යෙසං ලද්‌ධි, සෙය්‍යථාපි එකච්‌චානං උත්‌තරාපථකානං; තෙ සන්‌ධාය අතීතෙතිආදිපුච්‌ඡා සකවාදිස්‌ස, පටිඤ්‌ඤා ඉතරස්‌ස . සෙසං යථාපාළිමෙව නිය්‍යාති. නත්‌ථි කිලෙසෙ ජහතීති ඉමස්‌මිං පන පරවාදිස්‌ස පඤ්‌හෙ යස්‌මා කචවරං පජහන්‌තස්‌ස කචවරෙ ඡඩ්‌ඩනවායාමො විය කිලෙසෙ පජහන්‌තස්‌ස න අතීතාදිභෙදෙසු කිලෙසෙසු වායාමො අත්‌ථි, නිබ්‌බානාරම්‌මණෙ පන අරියමග්‌ගෙ පවත්‌තිතෙ කිලෙසා අනුප්‌පන්‌නායෙව නුප්‌පජ්‌ජන්‌තීති පහීනා නාම හොන්‌ති, තස්‌මා න හෙවන්‌ති පටික්‌ඛිපති. තෙන හි අතීතෙ කිලෙසෙ පජහතීතිආදි පන යස්‌මා ‘‘නත්‌ථි කිලෙසපජහනා’’ති න වත්‌තබ්‌බං, තස්‌මා අතීතාදිභෙදෙ පජහතීති ඡලෙන වුත්‌තං.
828-831. Idāni kilesapajahanakathā nāma hoti. Tattha ‘‘yasmā kilesapahānaṃ nāma atthi, pahīnakilesassa ca atītāpi kilesā pahīnāva honti, anāgatāpi, paccuppannāpi, tasmā atītepi kilese pajahati, anāgatepi, paccuppannepī’’ti yesaṃ laddhi, seyyathāpi ekaccānaṃ uttarāpathakānaṃ; te sandhāya atītetiādipucchā sakavādissa, paṭiññā itarassa . Sesaṃ yathāpāḷimeva niyyāti. Natthi kilese jahatīti imasmiṃ pana paravādissa pañhe yasmā kacavaraṃ pajahantassa kacavare chaḍḍanavāyāmo viya kilese pajahantassa na atītādibhedesu kilesesu vāyāmo atthi, nibbānārammaṇe pana ariyamagge pavattite kilesā anuppannāyeva nuppajjantīti pahīnā nāma honti, tasmā na hevanti paṭikkhipati. Tena hi atīte kilese pajahatītiādi pana yasmā ‘‘natthi kilesapajahanā’’ti na vattabbaṃ, tasmā atītādibhede pajahatīti chalena vuttaṃ.
කිලෙසපජහනකථාවණ්‌ණනා.
Kilesapajahanakathāvaṇṇanā.
Related texts:
තිපිටක (මූල) • Tipiṭaka (Mūla) / අභිධම්‌මපිටක • Abhidhammapiṭaka / කථාවත්‌ථුපාළි • Kathāvatthupāḷi / (186) 1. කිලෙසජහනකථා • (186) 1. Kilesajahanakathā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 1. කිලෙසපජහනකථාවණ්‌ණනා • 1. Kilesapajahanakathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 1. කිලෙසපජහනකථාවණ්‌ණනා • 1. Kilesapajahanakathāvaṇṇanā
