| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
5. கிமத்தி²யஸுத்தங்
5. Kimatthiyasuttaṃ
5. ஸாவத்தி²னிதா³னங். அத² கோ² ஸம்ப³ஹுலா பி⁴க்கூ² யேன ப⁴க³வா தேனுபஸங்கமிங்ஸு…பே॰… ஏகமந்தங் நிஸீதி³ங்ஸு. ஏகமந்தங் நிஸின்னா கோ² தே பி⁴க்கூ² ப⁴க³வந்தங் ஏதத³வோசுங் –
5. Sāvatthinidānaṃ. Atha kho sambahulā bhikkhū yena bhagavā tenupasaṅkamiṃsu…pe… ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ –
‘‘இத⁴ நோ, ப⁴ந்தே, அஞ்ஞதித்தி²யா பரிப்³பா³ஜகா அம்ஹே ஏவங் புச்ச²ந்தி – ‘கிமத்தி²யங், ஆவுஸோ, ஸமணே கோ³தமே ப்³ரஹ்மசரியங் வுஸ்ஸதீ’தி? ஏவங் புட்டா² மயங், ப⁴ந்தே, தேஸங் அஞ்ஞதித்தி²யானங் பரிப்³பா³ஜகானங் ஏவங் ப்³யாகரோம – ‘து³க்க²ஸ்ஸ கோ², ஆவுஸோ, பரிஞ்ஞத்த²ங் ப⁴க³வதி ப்³ரஹ்மசரியங் வுஸ்ஸதீ’தி. கச்சி மயங், ப⁴ந்தே, ஏவங் புட்டா² ஏவங் ப்³யாகரமானா வுத்தவாதி³னோ சேவ ப⁴க³வதோ ஹோம, ந ச ப⁴க³வந்தங் அபூ⁴தேன அப்³பா⁴சிக்கா²ம, த⁴ம்மஸ்ஸ சானுத⁴ம்மங் ப்³யாகரோம, ந ச கோசி ஸஹத⁴ம்மிகோ வாதா³னுவாதோ³ கா³ரய்ஹங் டா²னங் ஆக³ச்ச²தீ’’தி?
‘‘Idha no, bhante, aññatitthiyā paribbājakā amhe evaṃ pucchanti – ‘kimatthiyaṃ, āvuso, samaṇe gotame brahmacariyaṃ vussatī’ti? Evaṃ puṭṭhā mayaṃ, bhante, tesaṃ aññatitthiyānaṃ paribbājakānaṃ evaṃ byākaroma – ‘dukkhassa kho, āvuso, pariññatthaṃ bhagavati brahmacariyaṃ vussatī’ti. Kacci mayaṃ, bhante, evaṃ puṭṭhā evaṃ byākaramānā vuttavādino ceva bhagavato homa, na ca bhagavantaṃ abhūtena abbhācikkhāma, dhammassa cānudhammaṃ byākaroma, na ca koci sahadhammiko vādānuvādo gārayhaṃ ṭhānaṃ āgacchatī’’ti?
‘‘தக்³க⁴ தும்ஹே, பி⁴க்க²வே, ஏவங் புட்டா² ஏவங் ப்³யாகரமானா வுத்தவாதி³னோ சேவ மே ஹோத², ந ச மங் அபூ⁴தேன அப்³பா⁴சிக்க²த², த⁴ம்மஸ்ஸ சானுத⁴ம்மங் ப்³யாகரோத², ந ச கோசி ஸஹத⁴ம்மிகோ வாதா³னுவாதோ³ கா³ரய்ஹங் டா²னங் ஆக³ச்ச²தி. து³க்க²ஸ்ஸ ஹி பரிஞ்ஞத்த²ங் மயி ப்³ரஹ்மசரியங் வுஸ்ஸதி. ஸசே வோ, பி⁴க்க²வே, அஞ்ஞதித்தி²யா பரிப்³பா³ஜகா ஏவங் புச்செ²ய்யுங் – ‘அத்தி² பனாவுஸோ, மக்³கோ³, அத்தி² படிபதா³ ஏதஸ்ஸ து³க்க²ஸ்ஸ பரிஞ்ஞாயா’தி, ஏவங் புட்டா² தும்ஹே, பி⁴க்க²வே, தேஸங் அஞ்ஞதித்தி²யானங் பரிப்³பா³ஜகானங் ஏவங் ப்³யாகரெய்யாத² – ‘அத்தி² கோ², ஆவுஸோ, மக்³கோ³, அத்தி² படிபதா³ ஏதஸ்ஸ து³க்க²ஸ்ஸ பரிஞ்ஞாயா’’’தி.
‘‘Taggha tumhe, bhikkhave, evaṃ puṭṭhā evaṃ byākaramānā vuttavādino ceva me hotha, na ca maṃ abhūtena abbhācikkhatha, dhammassa cānudhammaṃ byākarotha, na ca koci sahadhammiko vādānuvādo gārayhaṃ ṭhānaṃ āgacchati. Dukkhassa hi pariññatthaṃ mayi brahmacariyaṃ vussati. Sace vo, bhikkhave, aññatitthiyā paribbājakā evaṃ puccheyyuṃ – ‘atthi panāvuso, maggo, atthi paṭipadā etassa dukkhassa pariññāyā’ti, evaṃ puṭṭhā tumhe, bhikkhave, tesaṃ aññatitthiyānaṃ paribbājakānaṃ evaṃ byākareyyātha – ‘atthi kho, āvuso, maggo, atthi paṭipadā etassa dukkhassa pariññāyā’’’ti.
‘‘கதமோ ச, பி⁴க்க²வே, மக்³கோ³, கதமா படிபதா³ ஏதஸ்ஸ து³க்க²ஸ்ஸ பரிஞ்ஞாயாதி? அயமேவ அரியோ அட்ட²ங்கி³கோ மக்³கோ³, ஸெய்யதி²த³ங் – ஸம்மாதி³ட்டி²…பே॰… ஸம்மாஸமாதி⁴. அயங், பி⁴க்க²வே, மக்³கோ³, அயங் படிபதா³ ஏதஸ்ஸ து³க்க²ஸ்ஸ பரிஞ்ஞாயாதி. ஏவங் புட்டா² தும்ஹே, பி⁴க்க²வே, தேஸங் அஞ்ஞதித்தி²யானங் பரிப்³பா³ஜகானங் ஏவங் ப்³யாகரெய்யாதா²’’தி. பஞ்சமங்.
‘‘Katamo ca, bhikkhave, maggo, katamā paṭipadā etassa dukkhassa pariññāyāti? Ayameva ariyo aṭṭhaṅgiko maggo, seyyathidaṃ – sammādiṭṭhi…pe… sammāsamādhi. Ayaṃ, bhikkhave, maggo, ayaṃ paṭipadā etassa dukkhassa pariññāyāti. Evaṃ puṭṭhā tumhe, bhikkhave, tesaṃ aññatitthiyānaṃ paribbājakānaṃ evaṃ byākareyyāthā’’ti. Pañcamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 5-6. கிமத்தி²யஸுத்தாதி³வண்ணனா • 5-6. Kimatthiyasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 5-6. கிமத்தி²யஸுத்தாதி³வண்ணனா • 5-6. Kimatthiyasuttādivaṇṇanā
