| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
২. কিংদদসুত্তৰণ্ণনা
2. Kiṃdadasuttavaṇṇanā
৪২. দুতিযে অন্নদোতি যস্মা অতিবলৰাপি দ্ৰে তীণি ভত্তানি অভুত্ৰা উট্ঠাতুং ন সক্কোতি, ভুত্ৰা পন দুব্বলোপি হুত্ৰা বলসম্পন্নো হোতি, তস্মা ‘‘অন্নদো বলদো’’তি আহ। ৰত্থদোতি যস্মা সুরূপোপি দুচ্চোল়ো ৰা অচোল়ো ৰা ৰিরূপো হোতি ওহীল়িতো দুদ্দসিকো, ৰত্থচ্ছন্নো দেৰপুত্তো ৰিয সোভতি , তস্মা ‘‘ৰত্থদো হোতি ৰণ্ণদো’’তি আহ। যানদোতি হত্থিযানাদীনং দাযকো। তেসু পন –
42. Dutiye annadoti yasmā atibalavāpi dve tīṇi bhattāni abhutvā uṭṭhātuṃ na sakkoti, bhutvā pana dubbalopi hutvā balasampanno hoti, tasmā ‘‘annado balado’’ti āha. Vatthadoti yasmā surūpopi duccoḷo vā acoḷo vā virūpo hoti ohīḷito duddasiko, vatthacchanno devaputto viya sobhati , tasmā ‘‘vatthado hoti vaṇṇado’’ti āha. Yānadoti hatthiyānādīnaṃ dāyako. Tesu pana –
‘‘ন হত্থিযানং সমণস্স কপ্পতি,
‘‘Na hatthiyānaṃ samaṇassa kappati,
ন অস্সযানং, ন রথেন যাতুং।
Na assayānaṃ, na rathena yātuṃ;
ইদঞ্চ যানং সমণস্স কপ্পতি,
Idañca yānaṃ samaṇassa kappati,
উপাহনা রক্খতো সীলখন্ধ’’ন্তি॥
Upāhanā rakkhato sīlakhandha’’nti.
তস্মা ছত্তুপাহনকত্তরযট্ঠিমঞ্চপীঠানং দাযকো, যো চ মগ্গং সোধেতি, নিস্সেণিং করোতি, সেতুং করোতি, নাৰং পটিযাদেতি, সব্বোপি যানদোৰ হোতি। সুখদো হোতীতি যানস্স সুখাৰহনতো সুখদো নাম হোতি। চক্খুদোতি অন্ধকারে চক্খুমন্তানম্পি রূপদস্সনাভাৰতো দীপদো চক্খুদো নাম হোতি, অনুরুদ্ধত্থেরো ৰিয দিব্বচক্খু সম্পদম্পি লভতি।
Tasmā chattupāhanakattarayaṭṭhimañcapīṭhānaṃ dāyako, yo ca maggaṃ sodheti, nisseṇiṃ karoti, setuṃ karoti, nāvaṃ paṭiyādeti, sabbopi yānadova hoti. Sukhado hotīti yānassa sukhāvahanato sukhado nāma hoti. Cakkhudoti andhakāre cakkhumantānampi rūpadassanābhāvato dīpado cakkhudo nāma hoti, anuruddhatthero viya dibbacakkhu sampadampi labhati.
সব্বদদো হোতীতি সব্বেসংযেৰ বলাদীনং দাযকো হোতি। দ্ৰে তযো গামে পিণ্ডায চরিত্ৰা কিঞ্চি অলদ্ধা আগতস্সাপি সীতলায পোক্খরণিযা ন্হাযিত্ৰা পতিস্সযং পৰিসিত্ৰা মুহুত্তং মঞ্চে নিপজ্জিত্ৰা উট্ঠায নিসিন্নস্স হি কাযে বলং আহরিত্ৰা পক্খিত্তং ৰিয হোতি। বহি ৰিচরন্তস্স চ কাযে ৰণ্ণাযতনং ৰাতাতপেহি ঝাযতি, পতিস্সযং পৰিসিত্ৰা দ্ৰারং পিধায মুহুত্তং নিপন্নস্স চ ৰিসভাগসন্ততি ৰূপসম্মতি, সভাগসন্ততি ওক্কমতি, ৰণ্ণাযতনং আহরিত্ৰা পক্খিত্তং ৰিয হোতি। বহি ৰিচরন্তস্স পাদে কণ্টকো ৰিজ্ঝতি, খাণু পহরতি, সরীসপাদিপরিস্সযো চেৰ চোরভযঞ্চ উপ্পজ্জতি, পতিস্সযং পৰিসিত্ৰা দ্ৰারং পিধায নিপন্নস্স সব্বেতে পরিস্সযা ন হোন্তি, ধম্মং সজ্ঝাযন্তস্স ধম্মপীতিসুখং, কম্মট্ঠানং মনসিকরোন্তস্স উপসমসুখং উপ্পজ্জতি। তথা বহি ৰিচরন্তস্স চ সেদা মুচ্চন্তি, অক্খীনি ফন্দন্তি, সেনাসনং পৰিসনক্খণে কূপে ওতিণ্ণো ৰিয হোতি, মঞ্চপীঠাদীনি ন পঞ্ঞাযন্তি। মুহুত্তং নিসিন্নস্স পন অক্খিপসাদো আহরিত্ৰা পক্খিত্তো ৰিয হোতি, দ্ৰারকৰাটৰাতপানমঞ্চপীঠাদীনি পঞ্ঞাযন্তি। তেন ৰুত্তং – ‘‘সো চ সব্বদদো হোতি, যো দদাতি উপস্সয’’ন্তি।
Sabbadado hotīti sabbesaṃyeva balādīnaṃ dāyako hoti. Dve tayo gāme piṇḍāya caritvā kiñci aladdhā āgatassāpi sītalāya pokkharaṇiyā nhāyitvā patissayaṃ pavisitvā muhuttaṃ mañce nipajjitvā uṭṭhāya nisinnassa hi kāye balaṃ āharitvā pakkhittaṃ viya hoti. Bahi vicarantassa ca kāye vaṇṇāyatanaṃ vātātapehi jhāyati, patissayaṃ pavisitvā dvāraṃ pidhāya muhuttaṃ nipannassa ca visabhāgasantati vūpasammati, sabhāgasantati okkamati, vaṇṇāyatanaṃ āharitvā pakkhittaṃ viya hoti. Bahi vicarantassa pāde kaṇṭako vijjhati, khāṇu paharati, sarīsapādiparissayo ceva corabhayañca uppajjati, patissayaṃ pavisitvā dvāraṃ pidhāya nipannassa sabbete parissayā na honti, dhammaṃ sajjhāyantassa dhammapītisukhaṃ, kammaṭṭhānaṃ manasikarontassa upasamasukhaṃ uppajjati. Tathā bahi vicarantassa ca sedā muccanti, akkhīni phandanti, senāsanaṃ pavisanakkhaṇe kūpe otiṇṇo viya hoti, mañcapīṭhādīni na paññāyanti. Muhuttaṃ nisinnassa pana akkhipasādo āharitvā pakkhitto viya hoti, dvārakavāṭavātapānamañcapīṭhādīni paññāyanti. Tena vuttaṃ – ‘‘so ca sabbadado hoti, yo dadāti upassaya’’nti.
অমতংদদো চ সো হোতীতি পণীতভোজনস্স পত্তং পূরেন্তো ৰিয অমরণদানং নাম দেতি। যো ধম্মমনুসাসতীতি যো ধম্মং অনুসাসতি, অট্ঠকথং কথেতি, পাল়িং ৰাচেতি, পুচ্ছিতপঞ্হং ৰিস্সজ্জেতি, কম্মট্ঠানং আচিক্খতি, ধম্মস্সৰনং করোতি, সব্বোপেস ধম্মং অনুসাসতি নাম। সব্বদানানঞ্চ ইদং ধম্মদানমেৰ অগ্গন্তি ৰেদিতব্বং। ৰুত্তম্পি চেতং –
Amataṃdado ca so hotīti paṇītabhojanassa pattaṃ pūrento viya amaraṇadānaṃ nāma deti. Yo dhammamanusāsatīti yo dhammaṃ anusāsati, aṭṭhakathaṃ katheti, pāḷiṃ vāceti, pucchitapañhaṃ vissajjeti, kammaṭṭhānaṃ ācikkhati, dhammassavanaṃ karoti, sabbopesa dhammaṃ anusāsati nāma. Sabbadānānañca idaṃ dhammadānameva agganti veditabbaṃ. Vuttampi cetaṃ –
‘‘সব্বদানং ধম্মদানং জিনাতি,
‘‘Sabbadānaṃ dhammadānaṃ jināti,
সব্বরসং ধম্মরসো জিনাতি।
Sabbarasaṃ dhammaraso jināti;
সব্বরতিং ধম্মরতি জিনাতি,
Sabbaratiṃ dhammarati jināti,
তণ্হক্খযো সব্বদুক্খং জিনাতী’’তি॥ (ধ॰ প॰ ৩৫৪)। দুতিযং।
Taṇhakkhayo sabbadukkhaṃ jinātī’’ti. (dha. pa. 354); Dutiyaṃ;
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ২. কিংদদসুত্তং • 2. Kiṃdadasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ২. কিংদদসুত্তৰণ্ণনা • 2. Kiṃdadasuttavaṇṇanā
