| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
২. কিংদদসুত্তৰণ্ণনা
2. Kiṃdadasuttavaṇṇanā
৪২. দ্ৰে তীণি ভত্তানি অভুত্ৰাতি দ্ৰে তযো ৰারে ভত্তানি অভুঞ্জিত্ৰা। উট্ঠাতুং ন সক্কোতীতি উট্ঠাতুম্পি ন সক্কোতী, পগেৰ অঞ্ঞং সরীরেন কাতব্বকিচ্চং দুব্বলভাৰতো। দুব্বলোপি হুত্ৰাতি ভুঞ্জনতো পুব্বে দুব্বলো হুত্ৰা বলসম্পন্নো হোতি। এৰং ব্যতিরেকতো অন্ৰযতো চ আহারস্স সরীরে বলৰতং আহ। যস্মা অন্নদো দাযকো পটিগ্গাহকস্স বলদো হোতি, তস্মা সো আযতিং অত্তনো সরীরে বলদো অৰিনাসৰসেন বলস্স রক্খকো চ হোতি। তেনাহ ভগৰা – ‘‘বলং খো পন দত্ৰা বলস্স ভাগী হোতী’’তি (অ॰ নি॰ ৫.৩৭) সেসপদেসুপি এসেৰ নযো। সুরূপোপীতি অভিরূপোপি। ৰিরূপো হোতীতি বীভচ্ছরূপো কোপীনস্স অচ্ছন্নত্তা। ইদঞ্চ যানন্তি সামঞ্ঞতো ৰুত্তং। উপাহনাতি সরূপতো দস্সেতি। অদুক্খপ্পত্তো হুত্ৰা যাতি ৰত্ততি এতেনাতি যানন্তি ছত্তাদীনম্পি যানভাৰো ৰুত্তো। তেনাহ ‘‘যানদো সুখদো হোতী’’তি। চক্খুদো নাম হোতি চক্খুনা কাতব্বকিচ্চে সহকারীকারণভাৰতো দীপস্স।
42.Dve tīṇi bhattāni abhutvāti dve tayo vāre bhattāni abhuñjitvā. Uṭṭhātuṃ na sakkotīti uṭṭhātumpi na sakkotī, pageva aññaṃ sarīrena kātabbakiccaṃ dubbalabhāvato. Dubbalopi hutvāti bhuñjanato pubbe dubbalo hutvā balasampanno hoti. Evaṃ byatirekato anvayato ca āhārassa sarīre balavataṃ āha. Yasmā annado dāyako paṭiggāhakassa balado hoti, tasmā so āyatiṃ attano sarīre balado avināsavasena balassa rakkhako ca hoti. Tenāha bhagavā – ‘‘balaṃ kho pana datvā balassa bhāgī hotī’’ti (a. ni. 5.37) sesapadesupi eseva nayo. Surūpopīti abhirūpopi. Virūpo hotīti bībhaccharūpo kopīnassa acchannattā. Idañca yānanti sāmaññato vuttaṃ. Upāhanāti sarūpato dasseti. Adukkhappatto hutvā yāti vattati etenāti yānanti chattādīnampi yānabhāvo vutto. Tenāha ‘‘yānado sukhado hotī’’ti. Cakkhudo nāma hoti cakkhunā kātabbakicce sahakārīkāraṇabhāvato dīpassa.
‘‘সব্বেসংযেৰ বলাদীনং দাযকো হোতী’’তি সঙ্খেপতো ৰুত্তং অত্থং ৰিত্থারতো দস্সেতুং ‘‘দ্ৰে তযো গামে’’তিআদি ৰুত্তং। নিসজ্জাদিৰসেন পতিস্সযিতব্বতো পতিস্সযো, ৰিহারো। পক্খিত্তং ৰিয হোতি পরিস্সমস্স ৰিনোদিতত্তা। বহি ৰিচরন্তস্সাতি পতিস্সযং অলভিত্ৰা বহি ৰিৰটঙ্গণে ৰিচরন্তস্স। ঝাযতীতি ঝাযন্তং হোতি, কিলমতীতি অত্থো। সীতুণ্হাদিৰিরোধিপচ্চযৰসেন সসন্তানে ৰিসভাগসন্ততি, তব্বিপরিযাযতো সভাগসন্ততি ৰেদিতব্বা। সুখং নাম দুক্খপচ্চযপরিহারতো সুখপচ্চযুপ্পন্নতো চ হোতি, তদুভযং পতিস্সযৰসেন লভতীতি দস্সেন্তো ‘‘বহি ৰিচরন্তস্স পাদে’’তিআদিমাহ। ধম্মপীতিসুখন্তি ধম্মপচ্চৰেক্খণেন উপ্পন্নপীতিসুখং। উপসমসুখন্তি কিলেসানং ৰূপসমেন পৰত্তসুখং। নিৰাতং পিহিতৰাতপানং পতিস্সযং পৰিসিত্ৰা দ্ৰারং পিধায ঠিতস্স অন্ধকারো হোতীতি ৰুত্তং ‘‘কূপে ওতিণ্ণো ৰিয হোতী’’তি। তেনাহ ‘‘মঞ্চপীঠাদীনি ন পঞ্ঞাযন্তী’’তি। তযিদং বহিসমাপন্নপরিস্সমদোসেন, ন চ পতিস্সযদোসেন। তেনাহ ‘‘মুহুত্ত’’ন্তিআদি।
‘‘Sabbesaṃyeva balādīnaṃ dāyako hotī’’ti saṅkhepato vuttaṃ atthaṃ vitthārato dassetuṃ ‘‘dve tayo gāme’’tiādi vuttaṃ. Nisajjādivasena patissayitabbato patissayo, vihāro. Pakkhittaṃ viya hoti parissamassa vinoditattā. Bahi vicarantassāti patissayaṃ alabhitvā bahi vivaṭaṅgaṇe vicarantassa. Jhāyatīti jhāyantaṃ hoti, kilamatīti attho. Sītuṇhādivirodhipaccayavasena sasantāne visabhāgasantati, tabbipariyāyato sabhāgasantati veditabbā. Sukhaṃ nāma dukkhapaccayaparihārato sukhapaccayuppannato ca hoti, tadubhayaṃ patissayavasena labhatīti dassento ‘‘bahi vicarantassa pāde’’tiādimāha. Dhammapītisukhanti dhammapaccavekkhaṇena uppannapītisukhaṃ. Upasamasukhanti kilesānaṃ vūpasamena pavattasukhaṃ. Nivātaṃ pihitavātapānaṃ patissayaṃ pavisitvā dvāraṃ pidhāya ṭhitassa andhakāro hotīti vuttaṃ ‘‘kūpe otiṇṇo viya hotī’’ti. Tenāha ‘‘mañcapīṭhādīni na paññāyantī’’ti. Tayidaṃ bahisamāpannaparissamadosena, na ca patissayadosena. Tenāha ‘‘muhutta’’ntiādi.
ন মরতি এতেনাতি অমরণং, নিব্বানাধিগমাদযো। তস্স দানং ধম্মূপদেসো, তং দেতি। তেনাহ ‘‘যো ধম্মং অনুসাসতী’’তি। তযিদং ধম্মানুসাসনং কথং হোতীতি আহ ‘‘অট্ঠকথ’’ন্তিআদি। অট্ঠকথং কথেতীতি অৰিৰটপাঠস্স পাল়িযা অত্থসংৰণ্ণনং করোতীতি অত্থো। অনধীতিনো পন পাল়িং ৰাচেতি। তত্থ তত্থ গতট্ঠানে পুচ্ছিতপঞ্হং ৰিস্সজ্জেতি, অযং তাৰ গন্থধুরো, পটিপত্তিৰাসধুরে পন কম্মট্ঠানং আচিক্খতি, উভযেসম্পি ধম্মস্সৰনং করোতি। সব্বদানন্তি যথাৰুত্তআমিসদানং অভযদানং। ধম্মদানন্তি ধম্মদেসনা। ধম্মরতীতি সমথৰিপস্সনাধম্মে অভিরতি। ধম্মরসোতি সদ্ধম্মসন্নিস্সযং পীতিপামোজ্জং।
Na marati etenāti amaraṇaṃ, nibbānādhigamādayo. Tassa dānaṃ dhammūpadeso, taṃ deti. Tenāha ‘‘yo dhammaṃ anusāsatī’’ti. Tayidaṃ dhammānusāsanaṃ kathaṃ hotīti āha ‘‘aṭṭhakatha’’ntiādi. Aṭṭhakathaṃ kathetīti avivaṭapāṭhassa pāḷiyā atthasaṃvaṇṇanaṃ karotīti attho. Anadhītino pana pāḷiṃ vāceti. Tattha tattha gataṭṭhāne pucchitapañhaṃ vissajjeti, ayaṃ tāva ganthadhuro, paṭipattivāsadhure pana kammaṭṭhānaṃ ācikkhati, ubhayesampi dhammassavanaṃ karoti. Sabbadānanti yathāvuttaāmisadānaṃ abhayadānaṃ. Dhammadānanti dhammadesanā. Dhammaratīti samathavipassanādhamme abhirati. Dhammarasoti saddhammasannissayaṃ pītipāmojjaṃ.
কিংদদসুত্তৰণ্ণনা নিট্ঠিতা।
Kiṃdadasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ২. কিংদদসুত্তং • 2. Kiṃdadasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ২. কিংদদসুত্তৰণ্ণনা • 2. Kiṃdadasuttavaṇṇanā
