| Library / Tipiṭaka / д̇ибидага • Tipiṭaka / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) |
10. гимиласуд̇д̇аван̣н̣анаа
10. Kimilasuttavaṇṇanā
986. д̣̇асамз гимилааяанд̇и звам̣наамагз наг̇арз. зд̇ад̣̇авожаад̇и т̇зро гира жинд̇зси – ‘‘аяам̣ д̣̇зсанаа на яат̇аанусанд̇хигаа гад̇аа, яат̇аанусанд̇хим̣ г̇амзссаамий’’д̇и д̣̇зсанаанусанд̇хим̣ гхадзнд̇о зд̇ам̣ авожа. гааяан̃н̃ад̇аранд̇и бат̇авийаад̣̇ийсу гааязсу ан̃н̃ад̇арам̣ вад̣̇аами вааяогааяам̣ вад̣̇аамийд̇и ад̇т̇о. ат̇а ваа жагкааяад̇анам̣…бз… габ̣ал̣ийгааро аахаарод̇и бан̃жавийсад̇и руубагодтаасаа руубагааяо наама, д̇зсу аанаабаанам̣ подтаб̣б̣ааяад̇анз сан̇г̇ахид̇ад̇д̇аа гааяан̃н̃ад̇арам̣ ход̇и, д̇асмааби звамааха. д̇асмаад̇ихаад̇и яасмаа жад̇уусу гааязсу ан̃н̃ад̇арам̣ вааяогааяам̣, бан̃жавийсад̇и годтаасз ваа руубагааяз ан̃н̃ад̇арам̣ аанаабаанам̣ анубассад̇и, д̇асмаа гааяз гааяаанубассийд̇и ад̇т̇о. звам̣ саб̣б̣ад̇т̇а ад̇т̇о взд̣̇ид̇аб̣б̣о. взд̣̇анаан̃н̃ад̇аранд̇и д̇ийсу взд̣̇анаасу ан̃н̃ад̇арам̣, сукавзд̣̇анам̣ санд̇хааязд̇ам̣ вуд̇д̇ам̣.
986. Dasame kimilāyanti evaṃnāmake nagare. Etadavocāti thero kira cintesi – ‘‘ayaṃ desanā na yathānusandhikā katā, yathānusandhiṃ gamessāmī’’ti desanānusandhiṃ ghaṭento etaṃ avoca. Kāyaññataranti pathavīādīsu kāyesu aññataraṃ vadāmi vāyokāyaṃ vadāmīti attho. Atha vā cakkhāyatanaṃ…pe… kabaḷīkāro āhāroti pañcavīsati rūpakoṭṭhāsā rūpakāyo nāma, tesu ānāpānaṃ phoṭṭhabbāyatane saṅgahitattā kāyaññataraṃ hoti, tasmāpi evamāha. Tasmātihāti yasmā catūsu kāyesu aññataraṃ vāyokāyaṃ, pañcavīsati koṭṭhāse vā rūpakāye aññataraṃ ānāpānaṃ anupassati, tasmā kāye kāyānupassīti attho. Evaṃ sabbattha attho veditabbo. Vedanāññataranti tīsu vedanāsu aññataraṃ, sukhavedanaṃ sandhāyetaṃ vuttaṃ.
саад̇хугам̣ манасигааранд̇и бийд̇ибадисам̣взд̣̇ид̇аад̣̇ивасзна уббаннам̣ сунд̣̇арам̣ манасигаарам̣. гим̣ бана манасигааро сукаа взд̣̇анаа ход̇ийд̇и? на ход̇и, д̣̇зсанаасийсам̣ банзд̇ам̣. яат̇зва хи ‘‘анижжасан̃н̃аабхааванаануяог̇амануяуд̇д̇аа’’д̇и (ма. ни. 3.147) зд̇т̇а сан̃н̃аанаамзна бан̃н̃аа вуд̇д̇аа, звамид̇хааби манасигааранаамзна жхаанавзд̣̇анаа вуд̇д̇аад̇и взд̣̇ид̇аб̣б̣аа. зд̇асмин̃хи жад̇уггз батамабад̣̇з бийд̇исийсзна взд̣̇анаа вуд̇д̇аа, д̣̇уд̇ияабад̣̇з суканд̇и саруубзнзва вуд̇д̇аа. жид̇д̇асан̇каарабад̣̇ад̣̇ваяз ‘‘сан̃н̃аа жа взд̣̇анаа жа жзд̇асигаа зд̇з д̇хаммаа жид̇д̇аббадиб̣ад̣̇д̇хаа жид̇д̇асан̇каараа’’д̇и (бади. ма. 1.174) важанад̇о ‘‘вид̇аггавижаарз табзд̇ваа саб̣б̣зби жид̇д̇асамбаяуд̇д̇агаа д̇хаммаа жид̇д̇асан̇каарз сан̇г̇ахид̇аа’’д̇и важанад̇о жид̇д̇асан̇кааранаамзна взд̣̇анаа вуд̇д̇аа. д̇ам̣ саб̣б̣ам̣ манасигааранаамзна сан̇г̇ахзд̇ваа ид̇ха ‘‘саад̇хугам̣ манасигаара’’нд̇и ааха.
Sādhukaṃ manasikāranti pītipaṭisaṃveditādivasena uppannaṃ sundaraṃ manasikāraṃ. Kiṃ pana manasikāro sukhā vedanā hotīti? Na hoti, desanāsīsaṃ panetaṃ. Yatheva hi ‘‘aniccasaññābhāvanānuyogamanuyuttā’’ti (ma. ni. 3.147) ettha saññānāmena paññā vuttā, evamidhāpi manasikāranāmena jhānavedanā vuttāti veditabbā. Etasmiñhi catukke paṭhamapade pītisīsena vedanā vuttā, dutiyapade sukhanti sarūpeneva vuttā. Cittasaṅkhārapadadvaye ‘‘saññā ca vedanā ca cetasikā ete dhammā cittappaṭibaddhā cittasaṅkhārā’’ti (paṭi. ma. 1.174) vacanato ‘‘vitakkavicāre ṭhapetvā sabbepi cittasampayuttakā dhammā cittasaṅkhāre saṅgahitā’’ti vacanato cittasaṅkhāranāmena vedanā vuttā. Taṃ sabbaṃ manasikāranāmena saṅgahetvā idha ‘‘sādhukaṃ manasikāra’’nti āha.
звам̣ санд̇зби яасмаа зсаа взд̣̇анаа аарамман̣ам̣ на ход̇и, д̇асмаа взд̣̇анаанубассанаа на яуж̇ж̇ад̇ийд̇и. но на яуж̇ж̇ад̇и, махаасад̇ибадтаанаад̣̇ийсуби хи д̇ам̣ д̇ам̣ сукаад̣̇ийнам̣ вад̇т̇ум̣ аарамман̣ам̣ гад̇ваа взд̣̇анаа взд̣̇аяад̇и, д̇ам̣ бана взд̣̇анаабавад̇д̇им̣ убаад̣̇ааяа ‘‘ахам̣ взд̣̇аяаамий’’д̇и вохаарамад̇д̇ам̣ ход̇и, д̇ам̣ санд̇хааяа ‘‘сукам̣ взд̣̇анам̣ взд̣̇аяамаано сукам̣ взд̣̇анам̣ взд̣̇аяаамий’’д̇иаад̣̇и вуд̇д̇ам̣. абижа ‘‘бийд̇иббадисам̣взд̣̇ий’’д̇иаад̣̇ийнам̣ ад̇т̇аван̣н̣анааяамзд̇асса барихааро вуд̇д̇оязва. вуд̇д̇ан̃хзд̇ам̣ висуд̣̇д̇химаг̇г̇з –
Evaṃ santepi yasmā esā vedanā ārammaṇaṃ na hoti, tasmā vedanānupassanā na yujjatīti. No na yujjati, mahāsatipaṭṭhānādīsupi hi taṃ taṃ sukhādīnaṃ vatthuṃ ārammaṇaṃ katvā vedanā vedayati, taṃ pana vedanāpavattiṃ upādāya ‘‘ahaṃ vedayāmī’’ti vohāramattaṃ hoti, taṃ sandhāya ‘‘sukhaṃ vedanaṃ vedayamāno sukhaṃ vedanaṃ vedayāmī’’tiādi vuttaṃ. Apica ‘‘pītippaṭisaṃvedī’’tiādīnaṃ atthavaṇṇanāyametassa parihāro vuttoyeva. Vuttañhetaṃ visuddhimagge –
‘‘д̣̇вийхаагаарзхи бийд̇и бадисам̣вид̣̇ид̇аа ход̇и – аарамман̣ад̇о жа асаммохад̇о жа. гат̇ам̣ аарамман̣ад̇о бийд̇и бадисам̣вид̣̇ид̇аа ход̇и? саббийд̇игз д̣̇вз жхаанз самаабаж̇ж̇ад̇и, д̇асса самаабад̇д̇игкан̣з жхаанабадилаабхзна аарамман̣ад̇о бийд̇и бадисам̣вид̣̇ид̇аа ход̇и аарамман̣асса бадисам̣вид̣̇ид̇ад̇д̇аа. гат̇ам̣ асаммохад̇о бийд̇и бадисам̣вид̣̇ид̇аа ход̇и? саббийд̇игз д̣̇вз жхаанз самаабаж̇ж̇ид̇ваа вудтааяа жхаанасамбаяуд̇д̇абийд̇им̣ каяад̇о ваяад̇о саммасад̇и, д̇асса вибассанаагкан̣з лагкан̣аббадивзд̇хзна асаммохад̇о бийд̇и бадисам̣вид̣̇ид̇аа ход̇и. вуд̇д̇ан̃хзд̇ам̣ бадисамбхид̣̇ааяам̣ (бади. ма. 1.172) ‘‘‘д̣̇ийгхам̣ ассаасавасзна жид̇д̇асса згаг̇г̇ад̇ам̣ авигкзбам̣ баж̇аанад̇о сад̇и убадтид̇аа ход̇и, д̇ааяа сад̇ияаа д̇зна н̃аан̣зна саа бийд̇и бадисам̣вид̣̇ид̇аа ход̇ий’д̇и. зд̇знзва наязна авасзсабад̣̇ааниби ад̇т̇ад̇о взд̣̇ид̇аб̣б̣ааний’’д̇и.
‘‘Dvīhākārehi pīti paṭisaṃviditā hoti – ārammaṇato ca asammohato ca. Kathaṃ ārammaṇato pīti paṭisaṃviditā hoti? Sappītike dve jhāne samāpajjati, tassa samāpattikkhaṇe jhānapaṭilābhena ārammaṇato pīti paṭisaṃviditā hoti ārammaṇassa paṭisaṃviditattā. Kathaṃ asammohato pīti paṭisaṃviditā hoti? Sappītike dve jhāne samāpajjitvā vuṭṭhāya jhānasampayuttapītiṃ khayato vayato sammasati, tassa vipassanākkhaṇe lakkhaṇappaṭivedhena asammohato pīti paṭisaṃviditā hoti. Vuttañhetaṃ paṭisambhidāyaṃ (paṭi. ma. 1.172) ‘‘‘dīghaṃ assāsavasena cittassa ekaggataṃ avikkhepaṃ pajānato sati upaṭṭhitā hoti, tāya satiyā tena ñāṇena sā pīti paṭisaṃviditā hotī’ti. Eteneva nayena avasesapadānipi atthato veditabbānī’’ti.
ид̇и яат̇зва жхаанабадилаабхзна аарамман̣ад̇о бийд̇исукажид̇д̇асан̇каараа бадисам̣вид̣̇ид̇аа хонд̇и, звам̣ иминааби жхаанасамбаяуд̇д̇зна взд̣̇анаасан̇каад̇аманасигаарабадилаабхзна аарамман̣ад̇о взд̣̇анаа бадисам̣вид̣̇ид̇аа ход̇и. д̇асмаа сувуд̇д̇амзд̇ам̣ ‘‘взд̣̇анаасу взд̣̇анаанубассий бхигку д̇асмим̣ самаяз вихарад̇ий’’д̇и.
Iti yatheva jhānapaṭilābhena ārammaṇato pītisukhacittasaṅkhārā paṭisaṃviditā honti, evaṃ imināpi jhānasampayuttena vedanāsaṅkhātamanasikārapaṭilābhena ārammaṇato vedanā paṭisaṃviditā hoti. Tasmā suvuttametaṃ ‘‘vedanāsu vedanānupassī bhikkhu tasmiṃ samaye viharatī’’ti.
наахам̣, аананд̣̇а, мудтассад̇исса асамбаж̇аанассаад̇и зд̇т̇а аяамад̇хиббааяо – яасмаа ‘‘жид̇д̇абадисам̣взд̣̇ий ассаасиссаамий’’д̇иаад̣̇инаа наязна бавад̇д̇о бхигку гин̃жааби ассаасабассаасанимид̇д̇амаарамман̣ам̣ гарод̇и, д̇асса бана жид̇д̇асса аарамман̣з сад̇ин̃жа самбаж̇ан̃н̃ан̃жа убадтаабзд̇ваа бавад̇д̇анад̇о жид̇д̇з жид̇д̇аанубассийязва наамзса ход̇и. на хи мудтассад̇исса асамбаж̇аанасса аанаабаанассад̇исамаад̇хибхааванаа ад̇т̇и, д̇асмаа аарамман̣ад̇о жид̇д̇абадисам̣вид̣̇ид̇авасзна ‘‘жид̇д̇з жид̇д̇аанубассий бхигку д̇асмим̣ самаяз вихарад̇ий’’д̇и.
Nāhaṃ, ānanda, muṭṭhassatissa asampajānassāti ettha ayamadhippāyo – yasmā ‘‘cittapaṭisaṃvedī assāsissāmī’’tiādinā nayena pavatto bhikkhu kiñcāpi assāsapassāsanimittamārammaṇaṃ karoti, tassa pana cittassa ārammaṇe satiñca sampajaññañca upaṭṭhāpetvā pavattanato citte cittānupassīyeva nāmesa hoti. Na hi muṭṭhassatissa asampajānassa ānāpānassatisamādhibhāvanā atthi, tasmā ārammaṇato cittapaṭisaṃviditavasena ‘‘citte cittānupassī bhikkhu tasmiṃ samaye viharatī’’ti.
со яам̣ д̇ам̣ ход̇и абхиж̇жхаад̣̇оманассаанам̣ бахаанам̣, д̇ам̣ бан̃н̃ааяа д̣̇исваа саад̇хугам̣ аж̇жхубзгкид̇аа ход̇ийд̇и зд̇т̇а абхиж̇жхаа гаамажчанд̣̇анийваран̣амзва, д̣̇оманассавасзна б̣яаабаад̣̇анийваран̣ам̣ д̣̇ассид̇ам̣. ид̣̇ан̃хи жад̇уггам̣ вибассанаавасзнзва вуд̇д̇ам̣, д̇хаммаанубассанаа жа нийваран̣абаб̣б̣аад̣̇ивасзна бан̃жавид̇хаа ход̇и, д̇ассаа нийваран̣абаб̣б̣ам̣ аад̣̇и, д̇ассааби ид̣̇ам̣ нийваран̣ад̣̇ваяам̣ аад̣̇и. ид̇и д̇хаммаанубассанааяа аад̣̇им̣ д̣̇ассзд̇ум̣ абхиж̇жхаад̣̇оманассаананд̇и ааха. бахаананд̇и анижжаанубассанааяа нижжасан̃н̃ам̣ баж̇ахад̇ийд̇и звам̣ бахаанагаран̃аан̣ам̣ ад̇хиббзд̇ам̣. д̇ам̣ бан̃н̃ааяа д̣̇исваад̇и д̇ам̣ анижжавирааг̇анирод̇хабадиниссаг̇г̇ан̃аан̣асан̇каад̇ам̣ бахаанан̃аан̣ам̣ абарааяа вибассанаабан̃н̃ааяа, д̇амби абарааяаад̇и звам̣ вибассанаабарамбарам̣ д̣̇ассзд̇и . аж̇жхубзгкид̇аа ход̇ийд̇и яан̃жасса бат̇абадибаннам̣ аж̇жхубзгкад̇и, яан̃жа згад̇о убадтаанам̣ аж̇жхубзгкад̇ийд̇и д̣̇вид̇хаа аж̇жхубзгкад̇и наама. д̇ад̇т̇а сахаж̇аад̇аанамбиаж̇жхубзгканаа ход̇и аарамман̣ассааби аж̇жхубзгканаа. ид̇ха аарамман̣а аж̇жхубзгканаа ад̇хиббзд̇аа. д̇асмаад̇ихаананд̣̇аад̇и яасмаа ‘‘анижжаанубассий ассаасиссаамий’’д̇иаад̣̇инаа наязна бавад̇д̇о на гзвалам̣ нийваран̣аад̣̇ид̇хаммз, абхиж̇жхаад̣̇оманассасийсзна бана вуд̇д̇аанам̣ д̇хаммаанам̣ бахаанагаран̃аан̣амби бан̃н̃ааяа д̣̇исваа аж̇жхубзгкид̇аа ход̇и, д̇асмаа д̇хаммзсу д̇хаммаанубассий бхигку д̇асмим̣ самаяз вихарад̇ийд̇и взд̣̇ид̇аб̣б̣о.
So yaṃ taṃ hoti abhijjhādomanassānaṃ pahānaṃ, taṃ paññāya disvā sādhukaṃ ajjhupekkhitā hotīti ettha abhijjhā kāmacchandanīvaraṇameva, domanassavasena byāpādanīvaraṇaṃ dassitaṃ. Idañhi catukkaṃ vipassanāvaseneva vuttaṃ, dhammānupassanā ca nīvaraṇapabbādivasena pañcavidhā hoti, tassā nīvaraṇapabbaṃ ādi, tassāpi idaṃ nīvaraṇadvayaṃ ādi. Iti dhammānupassanāya ādiṃ dassetuṃ abhijjhādomanassānanti āha. Pahānanti aniccānupassanāya niccasaññaṃ pajahatīti evaṃ pahānakarañāṇaṃ adhippetaṃ. Taṃ paññāya disvāti taṃ aniccavirāganirodhapaṭinissaggañāṇasaṅkhātaṃ pahānañāṇaṃ aparāya vipassanāpaññāya, tampi aparāyāti evaṃ vipassanāparamparaṃ dasseti . Ajjhupekkhitā hotīti yañcassa pathapaṭipannaṃ ajjhupekkhati, yañca ekato upaṭṭhānaṃ ajjhupekkhatīti dvidhā ajjhupekkhati nāma. Tattha sahajātānampiajjhupekkhanā hoti ārammaṇassāpi ajjhupekkhanā. Idha ārammaṇa ajjhupekkhanā adhippetā. Tasmātihānandāti yasmā ‘‘aniccānupassī assāsissāmī’’tiādinā nayena pavatto na kevalaṃ nīvaraṇādidhamme, abhijjhādomanassasīsena pana vuttānaṃ dhammānaṃ pahānakarañāṇampi paññāya disvā ajjhupekkhitā hoti, tasmā dhammesu dhammānupassī bhikkhu tasmiṃ samaye viharatīti veditabbo.
звамзва код̇и зд̇т̇а жад̇умахаабат̇о вияа ча ааяад̇анаани д̣̇адтаб̣б̣аани. д̇асмим̣ бам̣субун̃ж̇о вияа часу ааяад̇анзсу гилзсаа. жад̇уухи д̣̇исаахи ааг̇ажчанд̇аа сагадарат̇аа вияа жад̇уусу аарамман̣зсу бавад̇д̇аа жад̇д̇ааро сад̇ибадтаанаа. згзна сагадзна ваа рат̇зна ваа бам̣субун̃ж̇асса убахананам̣ вияа гааяаанубассанаад̣̇ийхи баабагаанам̣ агусалаанам̣ д̇хаммаанам̣ убагхаад̇о взд̣̇ид̇аб̣б̣од̇и.
Evameva khoti ettha catumahāpatho viya cha āyatanāni daṭṭhabbāni. Tasmiṃ paṃsupuñjo viya chasu āyatanesu kilesā. Catūhi disāhi āgacchantā sakaṭarathā viya catūsu ārammaṇesu pavattā cattāro satipaṭṭhānā. Ekena sakaṭena vā rathena vā paṃsupuñjassa upahananaṃ viya kāyānupassanādīhi pāpakānaṃ akusalānaṃ dhammānaṃ upaghāto veditabboti.
згад̇хаммаваг̇г̇о батамо.
Ekadhammavaggo paṭhamo.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 10. гимиласуд̇д̇ам̣ • 10. Kimilasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 10. гимиласуд̇д̇аван̣н̣анаа • 10. Kimilasuttavaṇṇanā
