| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
5. පඤ්‌චමපණ්‌ණාසකං
5. Pañcamapaṇṇāsakaṃ
(21) 1. කිමිලවග්‌ගො
(21) 1. Kimilavaggo
1. කිමිලසුත්‌තවණ්‌ණනා
1. Kimilasuttavaṇṇanā
201. පඤ්‌චමස්‌ස පඨමෙ කිමිලායන්‌ති එවංනාමකෙ නගරෙ. නිචුලවනෙති මුචලින්‌දවනෙ. එතදවොචාති අයං කිර ථෙරො තස්‌මිංයෙව නගරෙ සෙට්‌ඨිපුත්‌තො සත්‌ථු සන්‌තිකෙ පබ්‌බජිත්‌වා පුබ්‌බෙනිවාසඤාණං පටිලභි. සො අත්‌තනා නිවුත්‌ථං ඛන්‌ධසන්‌තානං අනුස්‌සරන්‌තො කස්‌සපදසබලස්‌ස සාසනොසක්‌කනකාලෙ පබ්‌බජිත්‌වා චතූසු පරිසාසු සාසනෙ අගාරවං කරොන්‌තීසු නිස්‌සෙණිං බන්‌ධිත්‌වා පබ්‌බතං ආරුය්‌හ තත්‌ථ සමණධම්‌මං කත්‌වා අත්‌තනො නිවුත්‌ථභාවං අද්‌දස. සො ‘‘සත්‌ථාරං උපසඞ්‌කමිත්‌වා තං කාරණං පුච්‌ඡිස්‌සාමී’’ති එතං ‘‘කො නු ඛො, භන්‌තෙ’’තිආදිවචනං අවොච.
201. Pañcamassa paṭhame kimilāyanti evaṃnāmake nagare. Niculavaneti mucalindavane. Etadavocāti ayaṃ kira thero tasmiṃyeva nagare seṭṭhiputto satthu santike pabbajitvā pubbenivāsañāṇaṃ paṭilabhi. So attanā nivutthaṃ khandhasantānaṃ anussaranto kassapadasabalassa sāsanosakkanakāle pabbajitvā catūsu parisāsu sāsane agāravaṃ karontīsu nisseṇiṃ bandhitvā pabbataṃ āruyha tattha samaṇadhammaṃ katvā attano nivutthabhāvaṃ addasa. So ‘‘satthāraṃ upasaṅkamitvā taṃ kāraṇaṃ pucchissāmī’’ti etaṃ ‘‘ko nu kho, bhante’’tiādivacanaṃ avoca.
සත්‌ථරි අගාරවා විහරන්‌ති අප්‌පතිස්‌සාති සත්‌ථරි ගාරවඤ්‌චෙව ජෙට්‌ඨකභාවඤ්‌ච අනුපට්‌ඨපෙත්‌වා විහරන්‌ති. සෙසෙසුපි එසෙව නයො. තත්‌ථ චෙතියඞ්‌ගණාදීසු ඡත්‌තං ධාරෙත්‌වා උපාහනා ආරුය්‌හ විචරන්‌තො නානප්‌පකාරඤ්‌ච නිරත්‌ථකකථං කථෙන්‌තො සත්‌ථරි අගාරවො විහරති නාම. ධම්‌මස්‌සවනග්‌ගෙ පන නිසීදිත්‌වා නිද්‌දායන්‌තො චෙව නානප්‌පකාරඤ්‌ච නිරත්‌ථකකථං කථෙන්‌තො ධම්‌මෙ අගාරවො විහරති නාම. සඞ්‌ඝමජ්‌ඣෙ බාහාවික්‌ඛෙපකං නානත්‌තකථං කථෙන්‌තො ථෙරනවමජ්‌ඣිමෙසු ච චිත්‌තීකාරං අකරොන්‌තො සඞ්‌ඝෙ අගාරවො විහරති නාම. සික්‌ඛං අපරිපූරෙන්‌තො සික්‌ඛාය අගාරවො විහරති නාම. අඤ්‌ඤමඤ්‌ඤං කලහභණ්‌ඩනාදීනි කරොන්‌තො අඤ්‌ඤමඤ්‌ඤං අගාරවො විහරති නාම. දුතියං උත්‌තානත්‌ථමෙව.
Satthari agāravā viharanti appatissāti satthari gāravañceva jeṭṭhakabhāvañca anupaṭṭhapetvā viharanti. Sesesupi eseva nayo. Tattha cetiyaṅgaṇādīsu chattaṃ dhāretvā upāhanā āruyha vicaranto nānappakārañca niratthakakathaṃ kathento satthari agāravo viharati nāma. Dhammassavanagge pana nisīditvā niddāyanto ceva nānappakārañca niratthakakathaṃ kathento dhamme agāravo viharati nāma. Saṅghamajjhe bāhāvikkhepakaṃ nānattakathaṃ kathento theranavamajjhimesu ca cittīkāraṃ akaronto saṅghe agāravo viharati nāma. Sikkhaṃ aparipūrento sikkhāya agāravo viharati nāma. Aññamaññaṃ kalahabhaṇḍanādīni karonto aññamaññaṃ agāravo viharati nāma. Dutiyaṃ uttānatthameva.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 1. කිමිලසුත්‌තං • 1. Kimilasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-4. කිමිලසුත්‌තාදිවණ්‌ණනා • 1-4. Kimilasuttādivaṇṇanā
